Kɛ́ akɛɛ mɔ ko nuɔ he ehãa mɔ lɛ, nɔ ni etsɔɔ ji akɛ, mɔ lɛ nyɛɔ ekɛ ehe woɔ mɔ ko shihilɛ mli, ni efeɔ he mfoniri akɛ, eji lɛ ekɛ nakai shihilɛ lɛ kpeɔ kulɛ, te ebaanu he ehã tɛŋŋ. Nuu ko ni atsɛɔ lɛ Dr. Rick Hanson, ní ekase bɔ ni ansɔ lɛ tsuɔ nii ehãa lɛ he nii babaoo lɛ tsɔɔ mli akɛ, ‘wɔnuɔ he wɔhãa mɛi, yɛ bɔ ni abɔ wɔ ahã lɛ hewɔ.’

SUSUMƆ ENƐ HE OKWƐ: Mɛni hewɔ wɔnyɛɔ wɔnuɔ he wɔhãa mɛi kwraa fe bɔ ni adebɔɔ nibii krokomɛi feɔ lɛ? Biblia lɛ tsɔɔ akɛ, Nyɔŋmɔ bɔ wɔ tamɔ bɔ ni eyɔɔ lɛ. (1 Mose 1:26) Enɛ tsɔɔ akɛ, wɔnyɛɔ wɔfeɔ wɔnii tamɔ Nyɔŋmɔ, ni wɔjieɔ esui kpakpai lɛ akpo bɔ ni wɔɔnyɛ. No hewɔ lɛ, kɛ́ mɛi nu he amɛhã mɛi, ni amɛye amɛbua amɛ lɛ, no tsɔɔ akɛ amɛmiijie Yehowa Nyɔŋmɔ, amɛ-Bɔlɔ ni naa mɔbɔ lɛ su kpo.​—Abɛi 14:31.

Nyɔŋmɔ nuɔ he ehãa wɔ, ni kɛ́ wɔmiipiŋ lɛ, esumɔɔɔ kwraa. Biblia lɛ wie yɛ blema Israelbii ni Ejiptbii lɛ ye amɛ nyɔŋ waa, ní no sɛɛ lɛ, eyatɔ amɛ yɛ ŋa lɛ nɔ afii 40 lɛ ahe akɛ: “Be ni amɛhao lɛ mli fɛɛ lɛ, lɛ hu ehao.” (Yesaia 63:9) Kadimɔ akɛ, jeee akɛ Nyɔŋmɔ na amɛhaomɔ lɛ kɛkɛ. Enu amɛpiŋmɔ lɛ hu he. Ewie akɛ: “Mile piŋmɔ ni amɛpiŋɔ lɛ jogbaŋŋ.” (2 Mose 3:7) Nyɔŋmɔ wie hu akɛ: “Mɔ fɛɛ mɔ ni taa nyɛhe lɛ, eeta mihiŋmɛi mli ajaŋmalaatɛ he.” (Zakaria 2:8) Kɛ́ mɔ ko fee wɔ dɔlɛ nii lɛ, edɔɔ Nyɔŋmɔ hu.

Biblia lɛ hãa wɔnaa akɛ, eyɛ mli akɛ ekolɛ wɔ diɛŋtsɛ wɔbaabu wɔhe fɔ, ni wɔbaanu he akɛ wɔsaaa mɛi ni Nyɔŋmɔ nuɔ he ehãa amɛ moŋ, shi “Nyɔŋmɔ da fe wɔtsuii, ni ele nɔ fɛɛ nɔ.” (1 Yohane 3:19, 20) Nyɔŋmɔ le wɔ fe bɔ ni wɔ diɛŋtsɛ wɔle wɔhe. Ele shihilɛ mli ni wɔyɔɔ, wɔsusumɔi, kɛ bɔ ni wɔnuɔ he wɔhãa lɛ jogbaŋŋ. Enuɔ he ehãa wɔ.

 Ŋmalɛ lɛ kɛɔ wɔ akɛ

• “Kɛ́ obo otsɛ lɛ, Yehowa baahere bo nɔ; obaafó otsɛ kɛhã yelikɛbuamɔ, ni ebaakɛɛ akɛ, ‘Naa mi!’”​—YESAIA 58:9.

• “‘Ejaakɛ mi lɛ, mile jwɛŋmɔi ni mijwɛŋɔ yɛ nyɛhe lɛ jogbaŋŋ,’ Yehowa kɛɛ, ‘toiŋjɔlɛ jwɛŋmɔi ni, shi jeee sane fɔŋ, koni ahi ahã nyɛ wɔsɛɛ ni nyɛná hiɛnɔkamɔ. Ni nyɛbaatsɛ mi, ni nyɛbaaba nyɛbasɔle nyɛhã mi, ni mabo nyɛ toi.’”​—YEREMIA 29:11, 12.

• “Okɛ mihiɛ yaafonui lɛ awo okooloo hewolo tɔ lɛ mli. Ani aŋmalako fɛɛ yɛ owolo lɛ mli?”​—LALA 56:8.

Kɛ́ wɔná wɔle akɛ Nyɔŋmɔ nuɔ he ehãa wɔ lɛ, ani no baanyɛ awa wɔ ni wɔdamɔ naagbai anaa? Susumɔ yoo ko ni atsɛɔ lɛ Maria lɛ niiashikpamɔ lɛ he okwɛ:

Ewie akɛ: “Be ni kansa mɔ mibinuu lɛ, ní afii enyɔ sɛɛ be ni eye afii 18 lɛ, egbe lɛ lɛ, edɔ mi waa diɛŋtsɛ, ni minu he akɛ je nɛŋ shihilɛ wa, ni nibii eyaaa lɛ bɔ ni akpaa gbɛ. Mimli fu Yehowa, ejaakɛ etsaaa mibi lɛ!

“Afii ekpaa sɛɛ lɛ, minaanyo ko ni yɔɔ asafo lɛ mli ni yɔɔ suɔmɔ, ni musuŋ tsɔɔ lɛ lɛ bo mi toi jogbaŋŋ be ni mikɛɔ lɛ akɛ Yehowa sumɔɔɔ mi lɛ. Ebo mi toi ŋmɛlɛtswai abɔ ní ewieee, kɛkɛ ni etsɛ ŋmalɛ ko ni ta mitsuiŋ waa. Nakai ŋmalɛ lɛ ji 1 Yohane 3:19, 20 lɛ ni kɛɔ akɛ: ‘Nyɔŋmɔ da fe wɔtsuii, ni ele nɔ fɛɛ nɔ’ lɛ. Etsɔɔ mli akɛ, Yehowa le wɔhaomɔi lɛ.

“Enɛ fɛɛ sɛɛ lɛ, ewa kɛhã mi akɛ maŋmɛɛ mlifu lɛ he! Kɛkɛ ni mikane Lala 94:19 lɛ, ni jɛmɛ kɛɛ: ‘Kɛ́ tsuiyelii hã mifee gbedee lɛ, oshɛjeɔ mimii ni ohãa mimii shɛɔ mihe.’ Minu he oookɛɛ mi tuuntu aŋma ŋmalɛ nɛɛ ahã! Naagbee be ni mikɛ Yehowa gba mihaomɔ lɛ he sane lɛ, mihe jɔ mi waa, ejaakɛ mile akɛ ebo mi toi, ni ele mihaomɔ lɛ.”

Le ni wɔle akɛ Nyɔŋmɔ nuɔ wɔ shishi, ni enuɔ he ehãa wɔ lɛ shɛjeɔ wɔmii waa! Shi mɛni hewɔ nɔnai efa nɛkɛ? Ani Nyɔŋmɔ miigbala wɔtoi yɛ efɔŋ ko ni wɔfee lɛ hewɔ? Ani ebaafee nɔ ko kɛfo nɔnai fɛɛ asɛɛ? Abaasusu sanebimɔi nɛɛ ahe yɛ saji ni nyiɛ sɛɛ lɛ amli.