Mɔ Ko Nyɛŋ Ejo Gbele Naa Foi
ŊƆƆ lɛ akɛ, ookwɛ fim ko ni kɔɔ nuu ko ni tswaa bɔɔlu ni ehe gbɛ́i waa, ní osumɔɔ ebɔɔlutswaa hu lɛ he. Be ni aje shishi lɛ, ajie egbekɛbiiashi ni eekase bɔ ni atswaa bɔɔlu, ni etee nɔ ekase aahu. Kɛkɛ ni ajie lɛ ni eetswa bɔɔlu eehã tim ko ni ale waa, ni no sɛɛ lɛ, eyatswa bɔɔlu yɛ maŋsɛɛ. Etsɛɛɛ kɛkɛ ni ajie lɛ ni egbɔ, ni be ni fim lɛ ba naagbee lɛ, egbo.
Fim nɛɛ jeee adesã ko kɛkɛ, ekɔɔ mɔ ko ni ehi shi pɛŋ he. Ekɔɔɔ he eko mɔ ni fim lɛ kɔɔ ehe—lalafeelɔ ko jio, jeŋ shikpalɔ ko jio, foidalɔ ko jio, loo mɔ kroko ni ehe gbɛ́i jio—fim lɛ hãa anaa akɛ, naagbee mli lɛ, egbo. Ekolɛ mɔ lɛ nyɛ efee nibii pii, shi ani okpɛlɛɛɛ nɔ akɛ, eji egbɔɔɔ ni ebaagbo kulɛ ebaafee babaoo fe bɔ ni efee lɛ?
Kɛ́ wɔjwɛŋ he lɛ, wɔwerɛ hoɔ wɔhe, shi wɔteŋ mɔ ko mɔ ko nyɛŋ ejo naa foi. (Jajelɔ 9:5) Ekɔɔɔ he eko mɔdɛŋ ni wɔbaabɔ koni wɔjo gbɔlɛ kɛ gbele naa foi lɛ, wɔyeŋ omanye. Jeee no pɛ kɛkɛ, ekolɛ oshãra loo hela ko baanyɛ ahã wɔgboi trukaa. Biblia lɛ tsɔɔ akɛ, wɔtamɔ leebi “afua ni pueɔ be fioo, kɛkɛ lɛ elaaje.”—Yakobo 4:14.
Akɛni wɔteŋ mɔ fɛɛ mɔ baanyɛ egbo trukaa hewɔ lɛ, mɛi komɛi baa amɛjeŋ oookɛɛ nɔ ni amɛmiikɛɛ akɛ, “nyɛhãa wɔyea ni wɔnua, ejaakɛ wɔ́ benɛ wɔgboi.” (1 Korintobii 15:32) Shi onaaa akɛ kɛ́ mɔ ko baa ejeŋ nakai lɛ, belɛ ekpɛlɛɔ nɔ akɛ ebaanyɛ egbo trukaa lɛɛlɛŋ, ni ebɛ hiɛnɔkamɔ ko hu? Be ko kɛ̃ yɛ adesa fɛɛ adesa shihilɛ mli—titri lɛ, kɛ́ ekɛ shihilɛ ko ni mli wa waa miikpe lɛ—ebiɔ ehe akɛ, ‘Ani abɔ wɔ ni wɔgbɔlɔ ni wɔgboi?’ Nɛgbɛ wɔbaaná sanebimɔ nɛɛ hetoo yɛ?
Mɛi pii susuɔ akɛ jeŋ shikpalɔi baanyɛ afo gbele sɛɛ. Bɔ ni atee hiɛ yɛ jeŋ shikpamɔ kɛ tsofafeemɔ mli hewɔ lɛ, wɔhiɔ shi wɔtsɛɔ fe be ko ni eho. Ni jeŋ shikpalɔi komɛi miibɔ mɔdɛŋ ni amɛhã wɔhi shi wɔtsɛ fe nɛkɛ po. Ekɔɔɔ he eko nɔ ni baajɛ amɛmɔdɛŋbɔɔ lɛ mli kɛba lɛ, amrɔ nɛɛ amɛnyɛko amɛhã sanebimɔi ni nyiɛ sɛɛ nɛɛ ahetoo: Mɛni hewɔ wɔgbɔlɔɔ ni wɔgboiɔ? Ani abaanyɛ aye wɔhenyɛlɔ ni ji gbele lɛ nɔ kunim? Abaahã sanebimɔi nɛɛ kɛ sanebimɔ ni ji, Ani abɔ wɔ ni wɔgbɔlɔ ni wɔgboi? lɛ hetoo yɛ saji ni nyiɛ sɛɛ lɛ amli.