Nyɔŋmɔ kɛɛ Adam akɛ: “Gbi nɔ ni obaaye [tso lɛ nɔ yibii lɛ eko] lɛ, bɔ fɛɛ bɔ ni fee lɛ, obaagbo.” (1 Mose 2:17) Eji Nyɔŋmɔ bɔ Adam ni egbɔ ni egbo kulɛ, ehe ehiaŋ ni ekɛ famɔ ni tamɔ nakai ahã lɛ. Adam le akɛ kɛ́ eyeee tso lɛ nɔ yibii lɛ eko lɛ, egboŋ.

Ebiii ni Adam kɛ Hawa aye nakai tso lɛ nɔ yibii lɛ eko koni amɛhi wala mli, ejaakɛ aduawa tsei babaoo yɛ abɔɔ lɛ mli. (1 Mose 2:9) Kɛ́ Adam kɛ eŋa lɛ yeee tso nɛɛ nɔ yibii lɛ eko lɛ, no baatsɔɔ akɛ amɛboɔ mɔ ni hã amɛ wala lɛ toi. No baatsɔɔ hu akɛ, amɛkpɛlɛɔ nɔ akɛ Nyɔŋmɔ ji mɔ ni sa akɛ etsɔɔ amɛ gbɛ.

Ja wɔsusu sanegbaa ko ni nɔ ni jɛ mli kɛba lɛ sa wɔ fɛɛ wɔhe lɛ he, dani wɔbaanu nɔ hewɔ ni Adam kɛ Hawa gboi lɛ shishi. Satan Abonsam tsɔ onufu ko nɔ emale kɛfite Nyɔŋmɔ. Biblia lɛ kɛɔ akɛ: “Onufu ji kooloo ko ni hiɛ tɛ̃ fe ŋa mli kooloi fɛɛ ni Yehowa Nyɔŋmɔ efee lɛ. No hewɔ lɛ, ekɛɛ yoo lɛ akɛ: ‘Ani eji anɔkwale akɛ Nyɔŋmɔ kɛɛ nyɛkaye abɔɔ lɛ mli tsei lɛ eko fɛɛ eko yibii?’”​—1 Mose 3:1.

Ni Hawa hã hetoo akɛ: “Wɔbaanyɛ wɔye abɔɔ lɛ mli tsei lɛ ayibii lɛ eko. Shi Nyɔŋmɔ wie tso ni ma abɔɔ lɛ teŋ lɛ nɔ yibii lɛ he akɛ: ‘Nyɛkayea eko, dabi, nyɛkataa he; kɛjeee nakai lɛ nyɛbaagboi.’” Kɛkɛ ni onufu lɛ kɛɛ lɛ akɛ: “Nyɛgboiŋ kɔkɔɔkɔ. Ejaakɛ Nyɔŋmɔ le akɛ gbi tuuntu nɔ ni nyɛbaaye eko lɛ, nyɛhiŋmɛii baagbele, ni nyɛbaatsɔmɔ tamɔ Nyɔŋmɔ, nyɛbaale ekpakpa kɛ efɔŋ.” No hewɔ lɛ, Satan tsɔɔ akɛ Yehowa ji amalelɔ, ni akɛ, ekɛ nɔ ko kpakpa miitee wɔklɛŋklɛŋ fɔlɔi lɛ.​—1 Mose 3:2-5.

Hawa he nɔ ni akɛɛ lɛ lɛ eye. Ekwɛ tso lɛ gãa. Ena akɛ tso lɛ yɛ fɛo, ni efeɔ hiŋmɛii lɛ akɔnɔ! Ekpã enine mli, etse eyibii lɛ eko, kɛkɛ ni ebɔi yeli. Biblia lɛ kɛfata he akɛ: “No sɛɛ be ni ewu lɛ yɔɔ emasɛi lɛ, ehã lɛ hu eko ni ebɔi yeli.”​—1 Mose 3:6.

Ŋwanejee ko bɛ he akɛ, be ni Nyɔŋmɔ na akɛ ebii ni esumɔɔ lɛ eje gbɛ amɛgbo enɔ toi lɛ, edɔ lɛ waa! Mɛni efee? Yehowa kɛɛ Adam akɛ: “Obaaku osɛɛ kɛya shikpɔŋ, ejaakɛ no mli ajie bo kɛjɛ. Ejaakɛ sũ ji bo, ni sũ mli obaaku osɛɛ kɛya.” (1 Mose 3:17-19) Enɛ hewɔ lɛ, “gbii fɛɛ ni Adam ye yɛ wala mli lɛ fee afii 930, kɛkɛ ni egbo.” (1 Mose 5:5) Adam eyaaa ŋwɛi, ni eyahiii shi yɛ mumɔi ashihilɛhe ko hu. Dani Yehowa kɛ shikpɔŋ sũ baabɔ lɛ lɛ, no mli lɛ ebɛ wala mli. No hewɔ lɛ, be ni egbo lɛ, etsɔ tamɔ shikpɔŋ sũ ni wala bɛ mli ni akɛbɔ lɛ lɛ nɔŋŋ. Ehiii shi yɛ he ko he ko. Mɛɛ mɔbɔ sane nɛ!

Akɛni Adam kɛ Hawa je gbɛ amɛgbo Nyɔŋmɔ nɔ toi hewɔ lɛ, emuuyeli kɛ hegbɛ ni amɛná akɛ amɛbaahi shi kɛya naanɔ lɛ ŋmɛɛ amɛ. Amɛgbɔmɔtso tsake; amɛtsɔmɔ mɛi ni yeee emuu ni feɔ esha. Shi jeee amɛ pɛ amɛna nɔ yɛ esha ni amɛfee akɛni amɛgbo toi lɛ hewɔ. Bii ni amɛfɔ lɛ hu yeee emuu. Romabii 5:12 lɛ kɛɔ akɛ: “Gbɔmɔ kome [Adam] nɔ esha tsɔ kɛba je lɛ mli, ni gbele tsɔ esha nɔ kɛba, ni no hã gbele tsɛŋe gbɔmɛi fɛɛ, ejaakɛ amɛ fɛɛ amɛfee esha.”

Biblia lɛ wieɔ esha kɛ gbele he akɛ “nɔ ni akɛha majimaji lɛ fɛɛ ahiɛ lɛ kɛ nɔhaanɔ ni alo ni akɛha jeŋmaji lɛ fɛɛ anɔ lɛ.” (Yesaia 25:7) Nɔhaanɔ nɛɛ eha adesai anɔ tamɔ afua ko ni pɔizin yɔɔ mli ni mɔ ko mɔ ko nyɛŋ aye ehe kɛje mli. Eji anɔkwale akɛ, “Adam mli ni mɛi fɛɛ gboiɔ yɛ.” (1 Korintobii 15:22) Sane ni esa akɛ enɛ ahã wɔbi wɔhe ji nɔ ni bɔfo Paulo bi lɛ, akɛ: “Namɔ baajie mi kɛje gbɔmɔtso ni kɛ mi yaa nɛkɛ gbele nɛɛ mli lɛ dɛŋ?” Ani mɔ ko baanyɛ?​—Romabii 7:24.