Te Abaafee Tɛŋŋ Aye Gbele Nɔ Kunim Lɛ?
ADAM kɛ Hawa toigbele lɛ hã esha kɛ gbele tsɛŋe adesai fɛɛ moŋ, shi no tsakeee Nyɔŋmɔ yiŋtoo kɛhã adesai aweku lɛ. Nyɔŋmɔ ewie shii abɔ yɛ e-Wiemɔ lɛ, ni ji Biblia lɛ, mli akɛ eyiŋtoo lɛ tsakeko.
-
“Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.”—Lala 37:29.
-
“Ebaami gbele kɛbaaya naanɔ, ni Nuŋtsɔ Ofe Yehowa baatsumɔ mɔ fɛɛ mɔ hiɛ yaafonui.”—Yesaia 25:8.
-
“Naagbee henyɛlɔ ni abaafo esɛɛ ji gbele.”—1 Korintobii 15:26.
-
“Gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko woŋ yara ko hu dɔŋŋ, ni mɔ ko hu piŋŋ dɔŋŋ.”—Kpojiemɔ 21:4.
Mɛɛ gbɛ nɔ Nyɔŋmɔ baatsɔ ‘emi gbele,’ ní efo henyɛlɔ nɛɛ sɛɛ? Tamɔ bɔ ni wɔna lɛ, Biblia lɛ kɛɔ faŋŋ akɛ, ‘jalɔi lɛ baahi shi kɛya naanɔ.’ Shi ekɛɔ hu akɛ, “mɔ ko mɔ ko bɛ shikpɔŋ lɛ nɔ ni ji jalɔ ni feɔ ekpakpa be fɛɛ be.” (Jajelɔ 7:20) Ani enɛ tsɔɔ akɛ, Nyɔŋmɔ biŋ dɔŋŋ ni adesai ni yeee emuu lɛ ahi shi yɛ etaomɔ nii lɛ anaa bɔ ni afee ni amɛhi shi kɛya naanɔ? Ebaŋ lɛ nakai kɔkɔɔkɔ! Akɛni “Nyɔŋmɔ . . . nyɛŋ emale” hewɔ lɛ, efeŋ nakai da. (Tito 1:2) Belɛ, mɛni mɔ Nyɔŋmɔ baafee koni yiŋ ni ejɛ suɔmɔ mli eto be ni ebɔ adesai lɛ aba mli?
NYƆŊMƆ ‘BAAMI GBELE KƐBAAYA NAANƆ.’—YESAIA 25:8
KPƆMƆNƆ LƐ BAAHÃ AYE GBELE NƆ KUNIM
Yehowa Nyɔŋmɔ jɛ suɔmɔ mli ewo kpɔmɔnɔ ko koni ekɛkpɔ̃ adesai kɛje gbele mli. Kpɔmɔnɔ ji nɔ ko ni akɛhãa mɔ ko koni akɛkpãta lɛ yɛ enɔ ko ni afite he, loo akɛhãa koni nine ashɛ nɔ ko nɔ, ni esa akɛ nɔ ni akɛhãa lɛ kɛ nɔ ni akpɔ̃ɔ lɛ jara aye egbɔ. Akɛni adesai fɛɛ ji eshafeelɔi ni amɛsa gbele hewɔ lɛ, Biblia lɛ kɛɔ faŋŋ akɛ: “Amɛteŋ mɔ ko mɔ ko nyɛŋ enyɛmi ekpɔ̃ loo ni ehã Nyɔŋmɔ kpɔmɔnɔ kɛkpɔ̃ enyɛmi, (ejaakɛ amɛwala he kpɔmɔnɔ lɛ jara wa aahu akɛ amɛnyɛŋ amɛwo kɔkɔɔkɔ).”—Lala 49:7, 8.
Kɛ́ adesa ni yeee emuu gbo lɛ, ebaanyɛ ewo lɛ diɛŋtsɛ ehe eshai pɛ he nyɔmɔ; enyɛŋ ekpɔ̃ ehe, loo ewo mɔ kroko he eshai he nyɔmɔ. (Romabii 6:7) No hewɔ lɛ, ehe bahia ni wɔná mɔ ko ni eye emuu ni esha ko bɛ ehe ni ekɛ ewala ahã kɛwo wɔhe eshai lɛ he nyɔmɔ, jeee enɔ.—Hebribii 10:1-4.
No pɛpɛɛpɛ ji gbɛjianɔ ni Nyɔŋmɔ to. Etsu e-Bi Yesu kɛjɛ ŋwɛi koni abafɔ lɛ yɛ shikpɔŋ lɛ nɔ akɛ adesa ni eye emuu ni esha ko kwraa bɛ ehe. (1 Petro 2:22) Yesu kɛɛ eba koni ‘ekɛ ewala abahã akɛ kpɔmɔnɔ kɛkpɔ̃ mɛi babaoo.’ (Marko 10:45) Egbo bɔ ni afee ni eye henyɛlɔ ni ji gbele lɛ nɔ kunim, ni wɔná wala.—Yohane 3:16.
MƐƐ BE ABAAYE GBELE NƆ KUNIM?
Ŋmɛnɛ lɛ, wɔyɛ “bei krɛdɛi ni mli shihilɛ wa” amli, ni no tsɔɔ akɛ, wɔyɛ jeŋ fɔŋ nɛɛ “naagbee gbii” lɛ amli, tamɔ Biblia lɛ egba lɛ. (2 Timoteo 3:1) Naagbee gbii lɛ baaba naagbee yɛ “kojomɔ kɛ mɛi ni ebuuu Nyɔŋmɔ lɛ ahiɛkpatamɔ gbi lɛ nɔ.” (2 Petro 3:3, 7) Shi mɛi ni sumɔɔ Nyɔŋmɔ lɛ baaje nakai hiɛkpatamɔ lɛ mli, ni amɛbaaná “naanɔ wala.”—Mateo 25:46.
Yesu ba koni ‘ekɛ ewala abahã akɛ kpɔmɔnɔ kɛkpɔ̃ mɛi babaoo.’—Marko 10:45
Abaatee mɛi akpekpei abɔ shi, ni amɛ hu amɛbaaná hegbɛ ni amɛhi shi kɛya naanɔ. Be ko be ni Yesu tee Nain lɛ, etee mɔ ko ni egbo shi. No mli lɛ, yoo okulafo ko binuu koome pɛ egbo, ni akɛni Yesu ‘musuŋ tsɔ lɛ’ hewɔ lɛ, etee oblanyo lɛ shi kɛba wala mli ekoŋŋ. (Luka 7:11-15) Bɔfo Paulo hu wie akɛ: “Miyɛ hiɛnɔkamɔ yɛ Nyɔŋmɔ mli . . . akɛ abaatee jalɔi kɛ mɛi ni ejaaa fɛɛ shi.” Hiɛnɔkamɔ ni ma shi shiŋŋ nɛɛ hãa wɔnaa akɛ, Nyɔŋmɔ sumɔɔ adesai waa diɛŋtsɛ.—Bɔfoi 24:15.
Mɛi akpekpe toi akpei abɔ baanyɛ akpa gbɛ akɛ, amɛbaahi shi kɛya naanɔ. Biblia lɛ kɛɔ akɛ: “Jalɔi lɛ, shikpɔŋ lɛ baatsɔ amɛnɔ, ni amɛbaahi nɔ kɛya naanɔ.” (Lala 37:29) Nakai beiaŋ lɛ, amɛmii baashɛ amɛhe waa, ni amɛtsui baanyɔ amɛmli akɛ amɛna wiemɔi ni bɔfo Paulo ŋma aaafee afii 2,000 ni eho nɛ lɛ amlibaa, akɛ: “Gbele, nɛgbɛ okunimyeli lɛ yɔɔ? Gbele, nɛgbɛ nɔ ni okɛtsɛ̃ɔ mɔ lɛ yɔɔ?” (1 Korintobii 15:55) Nakai beiaŋ lɛ, abaaye adesai ahenyɛlɔ kpele ni ji gbele lɛ nɔ kunim kwraa!