Mɛni Baanyɛ Awa Wɔ Koni Nibii Ahi Ahã Wɔ Wɔsɛɛ?

TSWAA

Tamɔ wɔna yɛ saji ni tsɔ hiɛ lɛ amli lɛ, mɛi pii susuɔ akɛ shɛɛ mli sane, skulyaa, ninámɔ, loo jeŋba kpakpa baanyɛ ahã nibii ahi ahã amɛ wɔsɛɛ. Kɛ́ mɔ ko kɛ ehiɛ fɔ̃ nibii nɛɛ anɔ akɛ no baahã ená shihilɛ kpakpa wɔsɛɛ lɛ, belɛ, etamɔ nɔ ni eeya he ko ni eleee, ni ehiɛ map ni ejaaa. Ani enɛ tsɔɔ akɛ nɔ ko bɛ ni baanyɛ awa wɔ koni nibii ahi ahã wɔ wɔsɛɛ? Dabi, nɔ ko yɛ!

ŊAAWOO NI JƐ MƆ KO NI HIƐ KÃ SHI FE MƆ FƐƐ MƆ LƐ ŊƆƆ

Bei pii kɛ́ wɔmiikpɛ yiŋ ko lɛ, wɔbiɔ ŋaawoo yɛ mɔ ko ni ye wɔ onukpa ni hiɛ kã shi fe wɔ lɛ dɛŋ. Yɛ sane ni wɔsusuɔ he lɛ hu mli lɛ, mɔ ko yɛ ni ye wɔ onukpa kwraa, ni hiɛ kã shi fe wɔ ni baanyɛ awa wɔ koni nibii ahi ahã wɔ wɔsɛɛ. Wɔbaanyɛ wɔkane eŋaawoo lɛ yɛ ŋmalɛi krɔŋkrɔŋi komɛi ni aje amɛŋmaa shishi aaafee afii 3,500 ni eho nɛ lɛ amli. Ŋmalɛi krɔŋkrɔŋi nɛɛ fɛɛ ji nɔ ni atsɛɔ lɛ Biblia lɛ.

Mɛni hewɔ obaanyɛ okɛ ohiɛ afɔ̃ Biblia lɛ nɔ lɛ? Ejaakɛ ejɛ mɔ ni etsɛ fe fɛɛ, ni hiɛ kã shi fe mɔ fɛɛ mɔ yɛ je lɛ mli lɛ ŋɔɔ. Lɛ ji “Mɔ Ni Eye Gbii Pii,” ni yɛ “kɛjɛ naanɔ kɛmiiya naanɔ” lɛ. (Daniel 7:9; Lala 90:2) Lɛ ji “Mɔ ni bɔ ŋwɛi lɛ, anɔkwa Nyɔŋmɔ lɛ, mɔ ni shɔ̃ shikpɔŋ lɛ.” (Yesaia 45:18) Ekɛɛ wɔ akɛ, egbɛ́i ji Yehowa.—Lala 83:18.

Biblia lɛ ewieee akɛ maŋ ko nɔ bii hi fe maŋ kroko nɔ bii, ejaakɛ ejɛ mɔ ni bɔ gbɔmɛi fɛɛ lɛ ŋɔɔ. Emli ŋaawoo lɛ be hooo, ni eye ebua mɛi ni jɛ je lɛŋ he fɛɛ he. Atsɔɔ shishi kɛtee wiemɔi babaoo amli, ni afee pii fe woji krokomɛi fɛɛ. * Enɛ tsɔɔ akɛ, mɛi ni yɔɔ he fɛɛ he lɛ baanyɛ akane ni etsɔɔ amɛ gbɛ. Anɔkwa saji nɛɛ kɛ nɔ ni Biblia lɛ diɛŋtsɛ ewie lɛ kpãa gbee akɛ:

“Nyɔŋmɔ kwɛɛɛ mɛi ahiɛiaŋ, shi moŋ, yɛ jeŋmaŋ fɛɛ jeŋmaŋ mli lɛ, mɔ ni sheɔ lɛ gbeyei ni efeɔ nɔ ni ja lɛ, lɛ ji mɔ ni enáa ehe miishɛɛ.”—BƆFOI 10:34, 35.

Bɔ ni fɔlɔi ni yɔɔ suɔmɔ tsɔɔ amɛbii gbɛ lɛ, nakai nɔŋŋ Yehowa Nyɔŋmɔ ji Tsɛ ni yɔɔ suɔmɔ, ni sumɔɔ ni eye ebua wɔ kɛtsɔ e-Wiemɔ lɛ, ni ji Biblia lɛ nɔ. (2 Timoteo 3:16) Obaanyɛ okɛ ohiɛ afɔ̃ e-Wiemɔ lɛ nɔ, ejaakɛ lɛ ebɔ wɔ, ni ele nɔ ni baahã wɔná miishɛɛ.

OBAANYƐ OKƐ OHIƐ AFƆ̃ BIBLIA LƐ NƆ

Wɔbaanyɛ wɔhe nɔ ni Biblia lɛ kɛɔ yɛ wɔsɛɛ he lɛ wɔye, ejaakɛ aaafee afii 2,000 ni eho nɛ lɛ, egba nibii ni baaya nɔ yɛ je lɛŋ kɛ bɔ ni mɛi baaba amɛjeŋ amɛhã, ni ŋmɛnɛ lɛ wɔmiina lɛ nakai.

NIBII NI BAAYA NƆ

“Jeŋmaŋ baate shi awo jeŋmaŋ, ni maŋtsɛyeli baate shi awo maŋtsɛyeli. Shikpɔŋhosomɔi wuji baaba, ni hɔmɔ kɛ tsɛŋemɔ helai ni gbeɔ mɔ baaba yɛ heihei.”—LUKA 21:10, 11.

BƆ NI MƐI BAABA AMƐJEŊ AMƐHÃ

“Naagbee gbii lɛ amli lɛ, bei krɛdɛi ni mli shihilɛ wa baaba. Ejaakɛ gbɔmɛi baatsɔmɔ hesuɔlɔi, shikasuɔlɔi, shwãlɔi, henɔwolɔi, mɛi ni wieɔ wiemɔi fɔji, fɔlɔi anɔ toigbolɔi, mɛi ni hiɛ esɔɔɔ nii, mɛi ni yeee anɔkwa, mɛi ni bɛ suɔmɔ kɛhã amɛweku mli bii, mɛi ni anyɛɛɛ akɛ amɛ afee kpaŋmɔ, mɛi ni wieɔ mɛi krokomɛi ahe efɔŋ, mɛi ni nyɛɛɛ amɛhe nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, mɛi ni jieɔ mɛi amɛhãa, kuɛŋtilɔi, mɛi ni naa amɛhe tsɔ, mɛi ni sumɔɔ shwɛmɔ-kɛ-ŋɔɔmɔ moŋ fe Nyɔŋmɔ.”—2 TIMOTEO 3:1-4.

Te fee tɛŋŋ ni nɔ ni Biblia lɛ gba afii babaoo nɛ lɛ eba mli pɛpɛɛpɛ lɛ? Ŋwanejee ko bɛ he akɛ, okɛ nuu ko ni jɛ Hong Kong, ni atsɛɔ lɛ Leung lɛ baakpã gbee. Ewie akɛ: “Jeee ŋmɛnɛ kwraa aŋmala Biblia mli gbalɛi lɛ. Gbɔmɔ ko nyɛŋ egba nibii ni tamɔ nɛkɛ ni amɛba mli pɛpɛɛpɛ. Eyɛ faŋŋ akɛ, Biblia lɛ jɛ mɔ ko ni hiɛ kã shi kwraa fe wɔ lɛ ŋɔɔ.”

Gbalɛi ohai abɔ yɛ Biblia lɛ mli ni eba mli. * No hãa wɔnaa akɛ, Biblia lɛ, Nyɔŋmɔ Wiemɔ ni lɛɛlɛŋ. Yehowa kɛɛ, “Miji Nyɔŋmɔ, ni mɔ ko mɔ ko tamɔɔɔ mi. Mi mijɛɔ shishijee migbaa nibii ni baaba yɛ naagbee.” (Yesaia 46:9, 10) No hewɔ lɛ, oyɛ yiŋtoo kpakpa hewɔ ni obaanyɛ ohe nɔ ni Biblia lɛ wieɔ yɛ wɔsɛɛ he lɛ oye.

ŊAAWOI NI OBAANÁ HE SƐƐ KƐYA NAANƆ

Kɛ́ okɛ ŋaawoi ni yɔɔ Ŋmalɛ Krɔŋkrɔŋ lɛ mli lɛ tsu nii lɛ, obaaná he sɛɛ. Naa ekomɛi.

SHIKA KƐ NITSUMƆ HE ŊAAWOO KPAKPA

“Hejɔɔmɔ dɛ̃ kɔkɔ obɔ lɛ, ehi fe nii ni atsuɔ waa dɛ̃ kɔkɔi obɔbɔ enyɔ kɛ kɔɔyɔɔ sɛɛtiumɔ.”—JAJELƆ 4:6.

NƆ NI BAAHÃ MIISHƐƐ AHI WEKU MLI

“Esa akɛ nyɛteŋ mɔ fɛɛ mɔ asumɔ eŋa tamɔ lɛ diɛŋtsɛ ehe; ni esa akɛ ŋa lɛ aná bulɛ ni mli kwɔ ehã ewu.”—EFESOBII 5:33.

NƆ NI BAAHÃ WƆKƐ MƐI AHI SHI JOGBAŊŊ

“Kaahã omli fu, ni kaahã omli wo la hu; kaahã omli wo la ni oyafee efɔŋ.”—LALA 37:8.

Kɛ́ okɛ nɔ ni Biblia lɛ kɛɔ lɛ tsu nii lɛ, obaaná shihilɛ kpakpa bianɛ, ni nibii baahi ahã bo wɔsɛɛ. Nyɔŋmɔ ewo shi yɛ Biblia lɛ mli akɛ, nibii baahi wɔsɛɛ, ni eshiwoi lɛ ekomɛi nɛ:

MƐI BAAHI SHI SHWESHWEESHWE

“Amɛmii baashɛ amɛhe waa yɛ toiŋjɔlɛ babaoo mli.”—LALA 37:11.

MƆ FƐƐ MƆ BAANÁ TSŨ KƐ NIYENII

“Amɛbaamamɔ tsũi ni amɛbaahi mli, ni amɛbaafee wain ŋmɔji ni amɛbaaye amɛmli yibii lɛ.”—YESAIA 65:21.

HELA KƐ GBELE SƐƐ BAAFO

“Gbele bɛ dɔŋŋ, ni mɔ ko yeŋ awerɛho dɔŋŋ, ni mɔ ko hu fóŋ dɔŋŋ, ni mɔ ko hu piŋŋ dɔŋŋ.”—KPOJIEMƆ 21:4.

Mɛni esa akɛ ofee koni oná shihilɛ nɛɛ wɔsɛɛ? Abaawie he yɛ sane ni nyiɛ sɛɛ lɛ mli.

^ kk. 6 Kɛ́ ootao saji pii ni kɔɔ Biblia shishitsɔɔmɔ kɛ ejaa he lɛ, yaa www.pr418.com/gaa, ni okwɛ BIBLIA TSƆƆMƆI > YINƆSANE KƐ BIBLIA LƐ.

^ kk. 16 Kɛ́ ootao gbalɛi ni eba mli lɛ ahe saji pii lɛ, kwɛmɔ wolo ni ji, The Bible—God’s Word or Man’s? ni Yehowa Odasefoi fee lɛ yitso 9 lɛ. Obaana wolo nɛɛ yɛ www.pr418.com lɛ nɔ. Kwɛmɔ LIBRARY > BOOKS & BROCHURES.