MƐI hiɛ susumɔi srɔtoi babaoo yɛ wala kɛ gbele he. Mɛi komɛi susuɔ akɛ kɛ́ amɛgbo lɛ, amɛbaaya nɔ amɛhi shi, ekolɛ yɛ shihilɛ kroko mli aloo yɛ he kroko. Mɛi krokomɛi hu nuɔ he akɛ abaasaa afɔ amɛ ekoŋŋ yɛ shihilɛ kroko mli. Ni mɛi komɛi hu heɔ yeɔ akɛ gbele kɛ nɔ fɛɛ nɔ baa naagbee.

Ekolɛ bo hu ohiɛ susumɔ kroko yɛ sane nɛɛ he, yɛ he ni atsɔse bo yɛ loo kusumi ni oda yɛ mli lɛ hewɔ. Akɛni susumɔi ni ahiɛ yɛ nɔ ni baa kɛ́ mɔ ko gbo he lɛ fa babaoo hewɔ lɛ, ani mɔ ko loo he ko yɛ ni wɔbaanyɛ wɔná sane ni futuɔ mɔ yiŋ waa nɛɛ hetoo ni ja ni anyɛɔ akɛ he fɔ̃ɔ nɔ yɛ?

Jamɔ mli hiɛnyiɛlɔi kɛ afii babaoo etsɔɔ akɛ, adesa susuma lɛ gbooo. Kɛ́ hooo kwraa, mɛi ni yɔɔ jamɔi srɔtoi fɛɛ amli​—Kristofoi, Hindubii, Yudafoi, Muslimbii, kɛ jamɔi krokomɛi amlibii​—heɔ yeɔ akɛ susuma lɛ gbooo, ejaakɛ eyaaa nɔ ehiɔ shi yɛ mumɔi ashihilɛ ko yɛ gbele sɛɛ. Shi Buddhabii heɔ yeɔ akɛ, akɛni kɛ́ wɔgboi lɛ wɔbablaa shii abɔ hewɔ lɛ, eshɛɔ he ko ni kɛ́ afɔ wɔ lɛ wɔnáa miishɛɛ ni sɛɛ efooo ní piŋmɔ bɛ mli, ni atsɛɔ miishɛɛ nɛɛ akɛ Nirvana.

Tsɔɔmɔi ni awie he kɛtsɔ hiɛ lɛ hewɔ lɛ, mɛi babaoo ni yɔɔ je lɛŋ fɛɛ heɔ yeɔ akɛ, gbele hãa anáa hegbɛ kɛhiɔ shi yɛ jeŋ kroko mli. Kɛhã mɛi babaoo lɛ, gbele ji wɔshihilɛ lɛ fã ko ni he hiaa waa, ni etamɔ nɔ ni gbele fata Nyɔŋmɔ yiŋtoo kɛhã wɔ lɛ he. Shi mɛni Biblia lɛ kɛɔ yɛ sane nɛɛ he? Ofainɛ, kanemɔ sane ni nyiɛ sɛɛ lɛ. Ekolɛ hetoo lɛ baahã onaa akpɛ ohe.