Ani okane Buu-Mɔɔ srɔtoi ni ba yɛ afi 2019 lɛ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Nyɔŋmɔ ewo shi akɛ: “Tawuu nii ko bɛ ni asɔ̃ ashi bo ni baanyɛ nɔ ko afee.” Mɛni shiwoo nɛɛ tsɔɔ? (Yes. 54:17)

Etsɔɔ akɛ, Yehowa hãŋ nɔ ko kwraa akpãtã wɔhiɛ. Akɛ nɔkwɛmɔnɔ lɛ, kɛ́ “mɛi ni yitseiaŋ wala” fã kɛba wɔnɔ lɛ, ebaabu wɔhe. (Yes. 25:4, 5) Nɔ ko bɛ ni wɔhenyɛlɔi lɛ baafee ni baaye wɔ awui kɛya naanɔ.​—w19.01, bf. 6-7.

Mɛɛ gbɛ nɔ bɔ ni Nyɔŋmɔ kɛ Kanaanbii lɛ kɛ Israelbii ni yeee lɛ anɔkwa lɛ ye ehã lɛ hãa wɔnaa akɛ eyeɔ jalɛ sane?

Nyɔŋmɔ gbala mɛi ni kɛ amɛhe wo bɔlɛnamɔ nifeemɔi ni yɔɔ nyaŋemɔ amli, loo amɛwa yei kɛ gbekɛbii ayi lɛ atoi. Shi ejɔɔ mɛi ni boɔ lɛ toi ni kɛ mɛi yeɔ jogbaŋŋ lɛ.​—w19.02, bf. 22-23.

Kɛ́ wɔyɛ he ko ni aasɔle, shi mɔ ni sɔleɔ lɛ jeee Odasefonyo lɛ, mɛni esa akɛ wɔfee?

Wɔbaanyɛ wɔfee diŋŋ, shi esaaa akɛ wɔfeɔ nɔ ko ni etsɔɔɔ bulɛ. Wɔkɛŋ “amen,” ni wɔmɔmɔŋ mɛi ni yɔɔ wɔmasɛi lɛ aniji amli hu. Kɛ́ wɔmiisumɔ lɛ, wɔ diɛŋtsɛ wɔbaanyɛ wɔsɔle yɛ wɔyitsoŋ.​—w19.03, bf. 31.

Mɛni hewɔ eji esha kpele akɛ mɔ ko baafee gbekɛ ko niseniianii?

Kɛ́ mɔ ko fee gbekɛ ko niseniianii lɛ, efee gbekɛ lɛ esha, efee asafo lɛ esha, efee esha eshi amralofoi lɛ, ni efee esha eshi Nyɔŋmɔ. Kɛ́ awo mlai ni tsɔɔ akɛ kɛ́ mɔ ko nu akɛ afee gbekɛ ko niseniianii lɛ eyabɔ amralofoi lɛ, asafoŋ onukpai lɛ yeɔ mlai nɛɛ anɔ.​—w19.05, bf. 9-10.

Te wɔbaafee tɛŋŋ wɔtsake mɛi ni wɔji yɛ wɔmligbɛ tɔ̃ɔ lɛ?

Nibii titrii ni esa akɛ wɔfee ji: Wɔsɔle wɔhã Yehowa, wɔjwɛŋ nii anɔ ni wɔpɛi wɔmli wɔkwɛ, ni wɔkɛ mɛi ni hiɛ kã shi abɔ.​—w19.06, bf. 11.

Mɛni wɔbaanyɛ wɔfee bianɛ kɛsaa wɔhe kɛhã yiwaa?

Esa akɛ wɔhã wekukpaa ni yɔɔ wɔ kɛ Yehowa teŋ lɛ mli awa, wɔhe wɔye kɛ wɔtsui fɛɛ akɛ, Yehowa sumɔɔ wɔ ni ekwaŋ wɔ kɔkɔɔkɔ, wɔkane Biblia lɛ ni wɔsɔle daa, wɔhe wɔye kɛ wɔtsui fɛɛ akɛ, nibii kpakpai ni Nyɔŋmɔ ewo shi akɛ ebaatsɔ e-Maŋtsɛyeli lɛ nɔ efee ehã wɔ lɛ baaba mli, ni wɔkpe ŋmalɛi kɛ asafo lɛ lalai ni wɔsumɔɔ waa lɛ wɔwo wɔyitsoŋ.​—w19.07, bf. 2-4.

Mɛni wɔbaanyɛ wɔfee kɛye wɔbua wɔwekumɛi ni amɛná wala?

Ehe miihia ni wɔkɛ wɔhe awo amɛshihilɛ mli, wɔba wɔjeŋ jogbaŋŋ, wɔto wɔtsui shi wɔhã amɛ, ni wɔkɛ ŋaa atsu nii.​—w19.08, bf. 15-17.

Mɛni hewɔ kɛ́ wɔtsu nitsumɔ ni Yesu kɛwo wɔdɛŋ lɛ, wɔhe baajɔ wɔ tamɔ bɔ ni ewo shi yɛ Mateo 11:28 lɛ?

Nɔkwɛlɔi ni yɔɔ Kristofoi asafo lɛ mli lɛ sumɔɔ wɔsane, ni wɔnanemɛi nitsulɔi lɛ kɛ nitsumɔ ni wɔtsuɔ lɛ nɔ bɛ.​—w19.09, bf. 23.

Mɛɛ gbɛ nɔ Nyɔŋmɔ baanyɛ atsɔ ehã wɔná shwelɛ lɛ kɛ hewalɛ lɛ ni wɔkɛtsu nɔ ko yɛ esɔɔmɔ lɛ mli? (Fip. 2:13)

Kɛ́ wɔkane Nyɔŋmɔ Wiemɔ lɛ ni wɔjwɛŋ nɔ lɛ, Nyɔŋmɔ baanyɛ akanya wɔ ni ehã wɔná shwelɛ lɛ kɛ hewalɛ lɛ ni wɔkɛfee esuɔmɔnaa nii. Ebaanyɛ etsɔ emumɔ lɛ nɔ ehã wɔhe asa waa kɛ nɔ ko tsumɔ.​—w19.10, bf. 21.

Mɛɛ nibii ni he hiaa esa akɛ wɔfee dani wɔkpɛ wɔyiŋ yɛ sane ko ni yɔɔ hiɛdɔɔ lɛ he?

Nibii enumɔ ni esa akɛ wɔfee ji: Wɔtao nii amli fitsofitso, wɔsɔle wɔbi hiɛshikamɔ, wɔsusu nɔ hewɔ ni wɔtaoɔ wɔkpɛ nakai yiŋ lɛ he, wɔkɛ oti pɔtɛɛ ko ama wɔhiɛ, ni wɔhã ehi wɔjwɛŋmɔ mli akɛ jeee nɔ fɛɛ nɔ wɔbaanyɛ wɔfee.​—w19.11, bf. 27-29.

Ani no mli lɛ Satan miitao Hawa ahe aye akɛ kɛ́ egbo lɛ, nɔ ko yɛ emli ni gbooo?

Etamɔ nɔ ni wɔnyɛŋ wɔkɛɛ nakai. Abonsam ekɛɛɛ Hawa akɛ kɛ́ egbo lɛ, nɔ ko ni akɛ hiŋmɛi enaaa baafã kɛjɛ emli ni eyahi he kroko. Mɛi fɛɛ ni heɔ amale tsɔɔmɔi amɛyeɔ lɛ ahiɛ kpãtã yɛ Noa Nu Afua lɛ mli. Eeenyɛ efee akɛ, mɛi bɔi kɛɛmɔ akɛ nɔ ko yɛ gbɔmɔ mli ni fãa eyahiɔ he ko dani Nyɔŋmɔ gbɛ mɛi ni maa Babel mɔɔ lɛ eshwã.​—w19.12, bf. 15.