Yɛ sane ni awie yɛ 5 Mose 22:25-27 lɛ mli lɛ, jeee kpaako ayaatsɔɔ kɛji nuu lɛ yeɔ fɔ aloo eyeee fɔ, ejaakɛ eyeɔ fɔ momo. Moŋ lɛ, aatsɔɔ nɔ hewɔ ni oblayoo lɛ yeɔ bem. Hã wɔkwɛ nɔ hewɔ ni wɔkɛɔ nakai.

Yɛ 5 Mose 22:23, 24 lɛ, awie akɛ, kɛji nuu ko kɛ oblayoo ko ni abi eshi kɛhã gbalashihilɛ lɛ kpe “yɛ maŋ lɛ mli” ni ekɛ lɛ wɔ lɛ, efite gbãla, ejaakɛ abuɔ oblayoo lɛ akɛ mɔ ko ni ebote gbalashihilɛ mli. Ni oblayoo lɛ hu? Lɛ hu abaabu lɛ gbalafitelɔ, “ejaakɛ ebolɔɔɔ.” Eji ebolɔ kulɛ, bɔ fɛɛ bɔ ni fee lɛ, mɛi baanu ni amɛbaayahere lɛ. Shi akɛni ebolɔɔɔ hewɔ lɛ, abaabu lɛ kɛ nuu lɛ fɛɛ fɔ.

No sɛɛ dani awie sane ni yɔɔ kuku 25 kɛyashi 27 lɛ, akɛ: “Kɛji nuu lɛ kɛ oblayoo ni abi eshi kɛhã gbalashihilɛ lɛ kpe yɛ ŋa mli, ni nuu lɛ mɔ oblayoo lɛ akrana naa ni ekɛ lɛ wɔ lɛ, no lɛ, nuu lɛ ni kɛ oblayoo lɛ wɔ lɛ kome pɛ agbo, ni kaafee oblayoo lɛ nɔ ko. Oblayoo lɛ efeko esha ko ni sa gbele. Bɔ ni mɔ ko tutuaa enyɛmi gbɔmɔ ni egbeɔ lɛ lɛ, nakai nɔŋŋ sane nɛɛ ji. Ejaakɛ ŋa mli ekɛ oblayoo ni abi eshi kɛhã gbalashihilɛ lɛ kpe yɛ, ni oblayoo lɛ bolɔ, shi mɔ ko mɔ ko bɛ ni baahere lɛ.”

Abu yoo lɛ bem, ni abuuu lɛ gbalafitelɔ. Mɛni hewɔ? Ejaakɛ aŋɔ lɛ akɛ ‘ebolɔ, shi mɔ ko mɔ ko bɛ ni baahere lɛ.’ Shi abu nuu lɛ fɔ akɛ efite gbãla ni eto yoo lɛ, mɔ ni abi eshi kɛhã gbalashihilɛ lɛ, kabonaa, ejaakɛ emɔ lɛ “akrana naa ni ekɛ lɛ wɔ.”

Mla nɛɛ hãa wɔnaa nɔ hewɔ ni abu yoo lɛ bem lɛ. Shi yɛ nakai beiaŋ nɔŋŋ lɛ, ehãa wɔnaa hu akɛ, abu nuu lɛ fɔ, ejaakɛ eto yoo lɛ kabonaa, ni efite gbãla hu. Fɛɛ mli lɛ, wɔle akɛ kojolɔi lɛ kɛ gbɛtsɔɔmɔ ni yɔɔ faŋŋ ni Nyɔŋmɔ eti mli shii abɔ etsɔɔ ewebii lɛ baatsu nii. ‘Amɛbaapɛi sane lɛ mli fitsofitso’ ni amɛkpɛ yiŋ ni ja.​—5 Mo. 13:14; 17:4; 2 Mo. 20:14.