Ani okane Buu-Mɔɔ srɔtoi ni ba afi nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Te esa akɛ wɔfee wɔnii wɔhã tɛŋŋ yɛ mɛi ni afɔ amɛ mu lɛ ahe?

Wɔle akɛ amɛhemɔkɛyeli mli wa, shi wɔkɛ woo srɔto ko hãaa amɛ, ni ‘wɔnyaaa amɛhe’ fe nine hu. (Yuda 16, shn.) Agbɛnɛ hu, wɔbiii amɛ saji tamɔ bɔ ni fee ni afɔ amɛ mu; enɛ jeee wɔhe sane.​—w20.01, bf. 29.

Mɛni hãa onaa akɛ Yehowa jwɛŋɔ ohe?

Biblia lɛ hãa wɔleɔ akɛ be ni oyɔɔ omami musuŋ beebe lɛ, ejwɛŋɔ ohe. Agbɛnɛ hu, eboɔ osɔlemɔi toi. Ele oyitsoŋ kɛ otsuiŋ saji fɛɛ, ni onifeemɔi baanyɛ ahã ená miishɛɛ aloo ewerɛ aho ehe. (1 Kro. 28:9; Abɛi 27:11) Eye ebua bo ni obatsɔ enaanyo.​—w20.02, bf. 12.

Mɛɛ be nɛkɛ esa akɛ wɔwie, ni mɛɛ be nɛkɛ esa akɛ wɔfee diŋŋ?

Esa akɛ wɔkɛ miishɛɛ agba mɛi Yehowa he sane. Kɛ́ wɔna akɛ mɔ ko miikɔ gbɛ ko ni ejaaa lɛ, esa akɛ wɔwie. Kɛ́ ehe bahia ni asafoŋ onukpai lɛ awo mɔ ko ŋaa lɛ, esaaa akɛ amɛfeɔ diŋŋ. Esaaa akɛ wɔbiɔ bɔ ni ato nitsumɔ lɛ he gbɛjianɔ ahã yɛ maŋ ko ni atsĩ wɔnaa yɛ jɛmɛ lɛ nɔ; ni kɛ́ wɔle lɛ, esaaa akɛ wɔgbaa mɛi. Esaaa akɛ wɔjieɔ teemɔŋ saji akpo.​—w20.03, bf. 20-21.

Mɛni ji nibii komɛi ni hãa esoroɔ baalabii ni awie amɛhe yɛ Yoel yitso 2 lɛ yɛ nɔ ni awie amɛhe yɛ Kpojiemɔ yitso 9 lɛ ahe?

Yoel 2:20-29 lɛ kɛɔ akɛ Nyɔŋmɔ baashwie baalabii lɛ, ni nibii fɛɛ ni amɛfite lɛ, ebaato najiaŋ. No sɛɛ lɛ, ebaafɔse emumɔ lɛ eshwie mɛi anɔ. Enɛ ba mli be ni Babilonbii lɛ tutua Israel lɛ, kɛ agbɛnɛ hu, yɛ no sɛɛ. Baalabii ni awie amɛhe yɛ Kpojiemɔ 9:1-11 lɛ feɔ Yehowa tsuji ni afɔ amɛ mu lɛ ahe mfoniri. Amɛkɛ ekãa shiɛɔ akɛ, Nyɔŋmɔ baakojo jeŋ fɔŋ nɛɛ ni ekpãtã hiɛ, ni sane nɛɛ hãa mɛi ni kɛ je lɛ efee ekome lɛ ahe shãa amɛ.​—w20.04, bf. 3-6.

Namɔ ji kooyigbɛ maŋtsɛ lɛ yɛ wɔbei nɛɛ amli?

Russia kɛ maji ni fata ehe lɛ. Amɛmiifee nibii ni miisa Nyɔŋmɔ webii lɛ ahe tɛ̃ɛ; amɛtsĩ shiɛmɔ nitsumɔ lɛ naa, ni amɛmiiwa nyɛmimɛi lɛ ayi. Agbɛnɛ hu, amɛkɛ wuoyigbɛ maŋtsɛ lɛ miitswa.​—w20.05, bf. 13.

Ani sui nɛɛhu ni atsĩ tã yɛ Galatiabii 5:22, 23 lɛ pɛ ni feɔ ‘mumɔ lɛ yibii lɛ’?

Dabi. Mumɔ krɔŋkrɔŋ lɛ baanyɛ aye abua wɔ ni wɔjie sui kpakpai krokomɛi tamɔ shifimɔ kpo. (1 Tim. 6:11)​—w20.06, bf. 17.

Dani wɔkɛ wɔhe mfoniri, sane ko, loo nɔ kroko baawo Intanɛt lɛ nɔ lɛ, mɛɛ sane kome ko esa akɛ wɔbi wɔhe?

Ani mfoniri nɛɛ loo sane nɛɛ baahã efee tamɔ nɔ ni miifee fuu ni mibaaa mihe shi?​—w20.07, bf. 6-7.

Mɛɛ gbɛ nɔ Kristofoi baanyɛ akase wolɛi ni he esa?

Amɛyaa wuo be ni amɛbaaná loo, kɛ agbɛnɛ hu, yɛ he ni amɛbaaná loo lɛ yɛ. Amɛyɛ wuoyaa nibii kpakpai ni amɛle bɔ ni akɛtsuɔ nii jogbaŋŋ. Amɛkɛ ekãa tsuɔ nii kɛ́ amɛkɛ naagbai kpe po. Wɔ hu wɔbaanyɛ wɔfee nakai yɛ shiɛmɔ nitsumɔ lɛ mli.​—w20.09, bf. 5.

Mɛni wɔbaanyɛ wɔfee kɛye wɔbua wɔ-Biblia mli nikaselɔi lɛ koni amɛsumɔ Yehowa waa?

Wɔwo amɛ hewalɛ ni amɛkane Biblia lɛ daa ni amɛjwɛŋ nɔ. Wɔtsɔɔ amɛ bɔ ni asɔleɔ.​—w20.11, bf. 4.

Namɛi fata “mɛi fɛɛ” lɛ ni Paulo kɛɛ ‘yɛ Kristo lɛ mli lɛ abaahã amɛhiɛ akãmɔ’ lɛ ahe?​—1 Kor. 15:22.

Sane nɛɛ ni bɔfo Paulo wie lɛ etsɔɔɔ akɛ abaatee adesai fɛɛ ni ehi shikpɔŋ nɔ pɛŋ lɛ shi. Mɛi ni afɔ amɛ mu lɛ, ni ji ‘mɛi ni afee amɛ krɔŋkrɔŋ yɛ Kristo Yesu mli’ lɛ fata “mɛi fɛɛ” lɛ ni abaatee amɛ shi lɛ ahe. (1 Kor. 1:2; 15:18)​—w20.12, bf. 5-6.

Kɛ́ atsake mɛi ni afɔ amɛ mu lɛ ‘yɛ hiŋmɛitswaa kome mli, be mli ni akpãa naagbee tɛtɛrɛmantɛrɛ lɛ,’ mɛni amɛbaatsu?—1 Kor. 15:51-53.

Kristo baanyiɛ amɛhiɛ ni amɛkɛ dadetso akpala jeŋmaji lɛ. (Kpo. 2:26, 27)​—w20.12, bf. 12-13.