KƐ́ ONAANYO ko ni osumɔɔ esane waa lɛ ŋma bo wolo kɛwo bo hewalɛ lɛ, te obaanu he ohã tɛŋŋ? Ŋwanejee ko bɛ he akɛ, obaaná miishɛɛ waa. No hewɔ lɛ, ekã shi faŋŋ akɛ, be ni bɔfo Paulo ŋma enaanyo Kristofonyo ko ni esumɔɔ esane waa, ni atsɛɔ lɛ Timoteo lɛ wolo ko ni tamɔ nakai lɛ, Timoteo ná miishɛɛ waa, ni etao he ko diŋŋ eyahɔ ni ekane. Ŋmɛnɛ lɛ, wɔle nakai wolo lɛ akɛ 2 Timoteo lɛ. Be ni Timoteo nine shɛ wolo lɛ nɔ lɛ, ekolɛ ebi ehe akɛ: ‘Te Paulo yɔɔ tɛŋŋ? Ani eyɛ ŋaa ko ni ebaawo mi ni baaye abua mi yɛ misɔɔmɔ nitsumɔ lɛ mli? Mɛɛ gbɛ nɔ wolo nɛɛ baaye abua mi ni manyɛ matsu minitsumɔ lɛ jogbaŋŋ, ni maye mabua mɛi krokomɛi hu?’ Tamɔ bɔ ni wɔbaana lɛ, Timoteo ná sanebimɔi nɛɛ fɛɛ kɛ ekrokomɛi ni fata he lɛ ahetoo yɛ wolo ni nɔ bɛ ni Paulo ŋma lɛ lɛ mli. Amrɔ nɛɛ, wɔbaasusu wolo lɛ mli otii fioo komɛi ahe, ni wɔkwɛ bɔ ni amɛbaanyɛ amɛye amɛbua wɔ.

Bɔ ni Paulo je wolo lɛ shishi ehã lɛ hã Timoteo na faŋŋ akɛ, esane kã etsui nɔ waa diɛŋtsɛ. Paulo tsɛ lɛ akɛ ‘ebi ni esumɔɔ.’ (2 Tim. 1:2) Timoteo nine shɛ wolo nɛɛ nɔ yɛ aaafee afi 65 Ŋ.B. No mli lɛ, eeenyɛ efee akɛ eye fe afii 30, ni ekɛ afii pii esɔmɔ akɛ asafoŋ onukpa. Agbɛnɛ hu, ekɛ Paulo ebɔ naanyo nɔ ni fe afii nyɔŋma, ni ekase nibii pii yɛ edɛŋ.

Be ni Paulo ŋma Timoteo wolo lɛ, no mli lɛ, awo Paulo tsuŋ yɛ Roma ni etsɛŋ abaagbe lɛ. Shi yɛ naagbai ni ekɛkpɛɔ nɛɛ fɛɛ asɛɛ lɛ, etee nɔ efi shi, ni eye Yehowa anɔkwa. (2 Tim. 1:15, 16; 4:6-8) Ekã shi faŋŋ akɛ, enɛ wo Timoteo hewalɛ waa. Paulo kɛɛ lɛ akɛ: “Miyaa nɔ mifiɔ shi yɛ nibii fɛɛ amli.” (2 Tim. 2:8-13) Wiemɔi nɛɛ hã Timoteo na akɛ, Paulo yɛ ekãa waa. Ŋmɛnɛ lɛ, Paulo nɔkwɛmɔnɔ kpakpa lɛ baanyɛ awo wɔ hu hewalɛ.

Paulo wo Timoteo ŋaa ni ebu nɔ fɛɛ nɔ ni etsuɔ yɛ Nyɔŋmɔ sɔɔmɔ lɛ mli lɛ akɛ nɔ ko ni jara wa waa. Ekɛɛ Timoteo akɛ ‘ekɛ Nyɔŋmɔ nikeenii ni yɔɔ emli lɛ atsu nii kɛ hiɛdɔɔ, tamɔ bɔ ni ataa la mli koni etso waa lɛ.’ (2 Tim. 1:6) Greek wiemɔ ni Paulo kɛtsu nii ni atsɔɔ shishi akɛ “nikeenii” lɛ ji, khaʹri·sma. Kɛ́ akɛ wiemɔ nɛɛ tsu nii lɛ, nɔ ni baa mɛi ajwɛŋmɔ mli ji, nɔ ko ni akɛke mɔ ko loo akɛhã lɛ yakatswaa, nɔ ko  ni egboko he deŋme, nɔ ko ni esaaa lɛ. Timoteo nine shɛ nikeenii nɛɛ nɔ be ni ahala lɛ koni etsu nitsumɔ krɛdɛɛ ko kɛye ebua asafoi lɛ.​—1 Tim. 4:14.

Mɛɛ ŋaa Paulo wo Timoteo yɛ nikeenii nɛɛ he? Ewo lɛ ŋaa akɛ ‘ekɛtsu nii kɛ hiɛdɔɔ, tamɔ ataa la mli koni etso waa lɛ.’ Eeenyɛ efee akɛ, be ni Timoteo kane wiemɔi nɛɛ lɛ, nɔ ni ba ejwɛŋmɔ mli ji, bɔ ni la ko naa baa shi kɛ́ ataaa mli kɛ bɔ ni etsoɔ waa kɛ́ ata mli lɛ. Greek wiemɔ kulibii ashishitsɔɔmɔ wolo ko tsɔɔ mli akɛ, wiemɔ ni Paulo kɛtsu nii (ni ji, a·na·zo·py·reʹo) lɛ shishi ji, “ni abaatsĩɛ la ko hiɛ, ahã etso ekoŋŋ, loo ahuu koni etso waa.” No hewɔ lɛ, yɛ mfonirifeemɔŋ lɛ, nɔ ni etsɔɔ ji, “ni abaawo mɔ ko hewalɛ ni ekɛ ekãa pii atsu nɔ ko ni etsuɔ lɛ.” Nɔ ko nakai no mli lɛ Paulo kɛɔ Timoteo lɛ. Eekɛɛ lɛ akɛ, ‘ekɛ etsui fɛɛ awo enitsumɔ lɛ mli.’ Ŋmɛnɛ hu lɛ, ehe miihia ni wɔkɛ ekãa pii asɔmɔ Yehowa.

Timoteo na nɔ kroko yɛ wolo ni Paulo ŋma lɛ lɛ mli ni wo lɛ hewalɛ ni etsu esɔɔmɔ nitsumɔ lɛ jogbaŋŋ. Paulo ŋma lɛ akɛ: “Tsɔ mumɔ krɔŋkrɔŋ ni hiɔ wɔmli lɛ nɔ obu nɔ kpakpa ni akɛwo odɛŋ nɛɛ he.” (2 Tim. 1:14) Mɛni ji nɔ kpakpa ni akɛwo Timoteo dɛŋ lɛ? No ji “wiemɔi ni hãa mɔ náa hewalɛ” ni Paulo tsĩ tã yɛ kuku ni tsɔ hiɛ lɛ mli lɛ, ni ji nibii ni Timoteo kase yɛ Ŋmalɛ lɛ mli lɛ. (2 Tim. 1:13) Akɛni Timoteo lɛ, Kristofonyo ji lɛ hewɔ lɛ, sɔ̃ bakã enɔ akɛ etsɔɔ enyɛmimɛi Kristofoi lɛ, kɛ agbɛnɛ hu, mɛi ni yɔɔ eshikpɔŋkuku lɛ mli lɛ nibii ni ekase lɛ, ni ji anɔkwale lɛ. (2 Tim. 4:1-5) Agbɛnɛ hu, no mli lɛ, ahala Timoteo akɛ asafoŋ onukpa koni ekwɛ Nyɔŋmɔ webii lɛ anɔ. (1 Pet. 5:2) Ehe bahia ni Timoteo akpa Yehowa fai ni etsɔ emumɔ krɔŋkrɔŋ lɛ kɛ E-Wiemɔ lɛ nɔ eye ebua lɛ koni enyɛ ebu nɔ kpakpa ni akɛwo edɛŋ lɛ he.​—2 Tim. 3:14-17.

Ŋmɛnɛ lɛ, wɔ hu wɔyɛ nɔ kpakpa ko ni akɛwo wɔdɛŋ. No ji Ŋmalɛ lɛ mli anɔkwa saji ni wɔshiɛɔ wɔhãa mɛi lɛ. (Mat. 28:19, 20) Kɛ́ wɔsɔle daa, ni wɔkase Nyɔŋmɔ Wiemɔ lɛ be fɛɛ be lɛ, no baaye abua wɔ ni wɔhiɛ asɔ nɔ kpakpa nɛɛ ni akɛwo wɔdɛŋ lɛ. (Rom. 12:11, 12; 1 Tim. 4:13, 15, 16) Ekolɛ kɛfata he lɛ, wɔmiisɔmɔ akɛ asafoŋ onukpai loo wɔyɛ be fɛɛ sɔɔmɔ nitsumɔ lɛ mli. Enɛɛmɛi jeee sɔɔmɔ hegbɛi bibii. No hewɔ lɛ, kɛ́ wɔnine shɛ eko nɔ lɛ, esa akɛ wɔba wɔhe shi ni wɔkɛ wɔhiɛ afɔ̃ Nyɔŋmɔ nɔ koni eye ebua wɔ. Kɛ́ wɔbu sɔɔmɔ hegbɛi nɛɛ akɛ amɛjara wa, ni wɔkɛ wɔhiɛ fɔ̃ Yehowa nɔ koni eye ebua wɔ ni wɔnyɛ wɔtsu amɛhe nii lɛ, no baaye abua wɔ ni wɔnyɛ wɔbu amɛhe.

Nitsumɔ ni akɛwo Timoteo dɛŋ lɛ bi ni etsɔse mɛi koni amɛnyɛ amɛtsu nitsumɔ ni etsuɔ lɛ eko. Enɛ hewɔ lɛ, Paulo kɛɛ lɛ akɛ: “Nibii ni onu yɛ minaa lɛ . . . okɛwo gbɔmɛi anɔkwafoi adɛŋ, koni no ahã amɛ hu amɛfee mɛi ni sa jogbaŋŋ akɛ amɛtsɔɔ mɛi krokomɛi anii.” (2 Tim. 2:2) Paulo kai Timoteo akɛ, esa akɛ etsɔɔ mɛi krokomɛi nibii ni ekase lɛ. Ŋmɛnɛ hu lɛ, ehe miihia ni nɔkwɛlɔi fɛɛ ni yɔɔ Kristofoi asafo lɛ mli lɛ afee nakai. Nɔkwɛlɔ kpakpa kɛ nɔ ni ele yɛ nitsumɔ ko he lɛ eteee. Moŋ lɛ, etsɔɔ mɛi krokomɛi, bɔ ni afee ni amɛnyɛ amɛtsu nitsumɔ ni etsuɔ lɛ eko. Mɛi komɛi etsɔɔɔ mɛi nibii ni amɛle yɛ nitsumɔ ko he, ejaakɛ amɛsheɔ gbeyei akɛ mɛi lɛ baabale mli fe amɛ loo amɛbaatsu lɛ jogbaŋŋ fe amɛ. Shi nɔkwɛlɔi kpakpai efeee nakai. Amɛ lɛ, kɛ́ amɛmiitsɔɔ mɛi nii lɛ, amɛtsɔɔ amɛ nɔ fɛɛ nɔ ni esa akɛ amɛle yɛ nitsumɔ lɛ he, ni amɛshiii nɔ ko kwraa yɛ mli. Agbɛnɛ hu, amɛyeɔ amɛbuaa mɛi ni amɛtsɔɔ amɛ nii lɛ koni amɛkɛ hiɛshikamɔ kɛ sɛɛyoomɔ atsu nii, no ji, koni amɛda yɛ mumɔŋ. Enɛ hewɔ lɛ, ‘hii anɔkwafoi’ ni amɛtsɔseɔ lɛ nyɛɔ amɛyeɔ amɛbuaa asafo lɛ waa diɛŋtsɛ.

Ŋwanejee ko bɛ he akɛ, Timoteo hiɛ sɔ wolo ni Paulo ŋma lɛ lɛ waa. Ekã shi faŋŋ akɛ, ekane shii abɔ, ni ejwɛŋ nɔ, ni ekwɛ bɔ ni ebaafee ekɛtsu nii yɛ esɔɔmɔ lɛ mli.

Esa akɛ wɔkɛ ŋaa ni Paulo wo Timoteo yɛ ewolo lɛ mli lɛ atsu nii. Enɛ baabi ni wɔkɛ nikeenii ni wɔyɔɔ lɛ atsu nii kɛ hiɛdɔɔ tamɔ ataa la mli koni etso waa lɛ, wɔbu nibii kpakpai ni akɛwo wɔdɛŋ lɛ ahe, ni wɔtsɔɔ mɛi nibii ni wɔkase lɛ. Kɛ́ wɔfee nakai lɛ, tamɔ bɔ ni Paulo kɛɛ Timoteo lɛ, ‘wɔbaatsu wɔsɔɔmɔ lɛ he nii pɛpɛɛpɛ.’​—2 Tim. 4:5.