Ani okane Buu-Mɔɔ srɔtoi ni ba afi nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Kɛji wɔhe be wɔkɛ Yehowa wie, wɔbo lɛ toi, ni wɔjwɛŋ ehe lɛ, te wɔbaaná he sɛɛ wɔhã tɛŋŋ?

Wɔbaakpɛ yiŋ kpakpai, wɔbaatsɔmɔ tsɔɔlɔi ni he esa, wɔhemɔkɛyeli lɛ mli baawa waa, ni wɔbaasumɔ Yehowa waa.​—w22.01, bf. 30-31.

Kɛ́ wɔhe Yehowa kɛ mɛi ni ehala akɛ amɛnyiɛ hiɛ yɛ asafo lɛ mli lɛ wɔye bianɛ lɛ, mɛɛ gbɛ nɔ no baaye abua wɔ?

Kɛ́ wɔbo asafoŋ onukpai lɛ agbɛtsɔɔmɔ toi, ni wɔhãaa wɔyiŋ afee wɔ enyɔnyɔɔnyɔ yɛ yiŋ ni amɛkpɛɔ lɛ ahe lɛ, no tsɔɔ akɛ wɔheɔ wɔyeɔ akɛ gbɛtsɔɔmɔi nɛɛ jɛ Yehowa ŋɔɔ. Enɛ baawa wɔ koni kɛ́ akɛ gbɛtsɔɔmɔi hã wɔ yɛ amanehulu kpeteŋkpele lɛ mli ni ekolɛ efee wɔ akɛ eyɛ nɔ ko ko loo nilee bɛ mli po lɛ, wɔkɛtsu nii.​—w22.02, bf. 4-6.

Be ni ŋwɛibɔfo lɛ kɛɛ Zakaria akɛ, ‘abaana plomo lɛ yɛ Amralo Zerubabel dɛŋ’ lɛ, no mli lɛ mɛni etaoɔ etsɔɔ lɛ? (Zak. 4:8-10)

Nɔ ni ŋwɛibɔfo lɛ taoɔ etsɔɔ Nyɔŋmɔ webii lɛ ji akɛ, eyɛ mli akɛ sɔlemɔ shĩa hee lɛ tamɔɔɔ tsutsu nɔ lɛ moŋ, shi abaama agbe naa ni akɛbaatsu Yehowa yiŋtoo he nii.​—w22.03, bf. 16-17.

Mɛɛ gbɛ nɔ wɔbaanyɛ wɔfee “nɔkwɛmɔnɔ . . . yɛ wiemɔ mli”? (1 Tim. 4:12)

Wɔkɛ mɛi wieɔ yɛ bulɛ kɛ naajɔlɛ mli yɛ shiɛmɔ nitsumɔ lɛ mli, wɔjɛɔ wɔtsuiŋ wɔláa ni wɔbɔɔ mɔdɛŋ wɔhãa saji ahetoo be fɛɛ be kɛ́ wɔtee asafoŋ kpeei, wɔwieɔ anɔkwale be fɛɛ be, wɔwieɔ nibii ni tswaa mɔ emaa shi, ni wɔkɛ wiemɔ fɔŋ tsuuu nii.​—w22.04, bf. 6-9.

Mɛni hewɔ kooloo awuiyelɔ ni awie ehe yɛ Kpojiemɔ 13:1, 2 lɛ tamɔ kooloi awuiyelɔi (loo maŋtsɛyelii) ejwɛ ni awie amɛhe yɛ Daniel yitso 7 lɛ mli lɛ fɛɛ ni akɛtsa?

Kooloo awuiyelɔ ni awie ehe yɛ Kpojiemɔ 13 lɛ damɔɔɔ shi kɛhãaa nɔyeli kome pɛ, tamɔ Roma nɔyeli lɛ nɛkɛ. Moŋ lɛ, edamɔ shi kɛhã nɔyelii fɛɛ ni eye adesai anɔ kɛjɛ blema kɛbashi ŋmɛnɛ.​—w22.05, bf. 9.

Mɛni ji nɔ titri ni kɛ́ wɔfee lɛ ebaatsɔɔ akɛ wɔheɔ wɔyeɔ akɛ Nyɔŋmɔ yeɔ jalɛ sane?

Kɛ́ mɔ ko jɛ wɔ, efee nɔ ko ni edɔ wɔ, loo etɔ̃ wɔnɔ lɛ, esa akɛ wɔjie ehe mlifu kɛje wɔtsui mli ni wɔshi sane lɛ wɔhã Yehowa. Ebaahã naagbai ni ejɛ esha mli kɛba lɛ fɛɛ sɛɛ afo.​—w22.06, bf. 10-11.

Kɛ́ atsɛ nyɛmi nuu ko ni esɔle yɛ asafoŋ kpee shishi lɛ, mɛni esa akɛ ehã ehi ejwɛŋmɔ mli be ni esɔleɔ lɛ?

Esaaa akɛ enaa lɛ akɛ hegbɛ ni ená ni ekɛbaawo mɛi ŋaa loo ekɛbaatswa adafi. Esaaa akɛ ‘ewieɔ babaoo,’ titri lɛ kɛ́ eesɔle kɛmiije kpee ko shishi. (Mat. 6:7)​—w22.07, bf. 24-25.

Kɛ́ akɛɛ abaatee “mɛi ni fee nibii gbohii lɛ” ashi “kɛya kojomɔ mli” lɛ, te atsɔɔ tɛŋŋ? (Yoh. 5:29)

Agbalaŋ amɛtoi yɛ nibii ni amɛfee dani amɛgboi lɛ ahe. Abaadamɔ bɔ ni amɛbaafee amɛnii amɛhã yɛ amɛshitee lɛ sɛɛ lɛ nɔ akojo amɛ.​—w22.09, bf. 18.

Mɛni J. F. Rutherford wo nyɛmimɛi ni ba kpee ko ni afee yɛ September 1922 lɛ shishi lɛ hewalɛ ni amɛfee ni sa kadimɔ waa?

Yɛ kpee ko ni afee yɛ Cedar Point, yɛ Ohio, yɛ U.S.A. lɛ shishi lɛ, ewie akɛ: “Maŋtsɛ lɛ miiye nɔ! Nyɛji enajiaŋdamɔlɔi sanejajelɔi. No hewɔ lɛ, nyɛtswaa, nyɛtswaa, nyɛtswaa Maŋtsɛ lɛ kɛ e-Maŋtsɛyeli lɛ he adafi!”​—w22.10, bf. 3-5.

Mɛɛ gbɛi etɛ Yesaia yitso 30 lɛ hãa wɔnaa akɛ Yehowa tsɔɔ nɔ eyeɔ ebuaa wɔ koni wɔnyɛ wɔfi shi?

Yesaia yitso 30 lɛ hãa wɔleɔ akɛ (1) Yehowa boɔ wɔsɔlemɔi toi ni ehãa hetoo, (2) ekɛ gbɛtsɔɔmɔi hãa wɔ, ni (3) ejɔɔ wɔ bianɛ ni ebaajɔɔ wɔ wɔsɛɛ hu.​—w22.11, bf. 9.

Mɛni hewɔ wɔbaanyɛ wɔkɛɛ akɛ wiemɔi ni yɔɔ Lala 37:10, 11, 29 lɛ ba mli yɛ blema ni ebaasaa eba mli ekoŋŋ wɔsɛɛ lɛ?

Nɔ ni David wie yɛ ŋmalɛ nɛɛ mli lɛ tsɔɔ bɔ ni nibii tee lɛ jogbaŋŋ yɛ Israel be ni maŋtsɛmɛi kpakpai tamɔ Solomon yeɔ nɔ lɛ. Yesu tsɛ wiemɔi ni yɔɔ kuku 11 lɛ yisɛɛ be ni ewieɔ Paradeiso ni baaba lɛ he lɛ. (Mat. 5:5; Luka 23:43)​—w22.12, bf. 8-10, 14.