1. Be ni eshwɛ fioo ni Yesu baagbo lɛ, mɛni ekɛɛ efɔŋfeelɔ ko ni yɔɔ emasɛi lɛ? (Luka 23:39-43)

 FEEMƆ shihilɛ nɛɛ he mfoniri: Akala Yesu kɛ efɔŋfeelɔi enyɔ komɛi yɛ tso jaŋŋ nɔ, ni amɛmiiná nɔ ni amɛmiihe amɛgboi. (Luka 23:32, 33) Efɔŋfeelɔi lɛ wie amɛshi Yesu. No hewɔ lɛ, ekã shi faŋŋ akɛ amɛjeee ekaselɔi. (Mat. 27:44; Mar. 15:32) Shi amɛteŋ mɔ kome tsake etsui ni ekɛɛ Yesu akɛ: “Yesu, kɛ́ oba o-Maŋtsɛyeli lɛ mli lɛ, kaimɔ mi.” Yesu kɛɛ lɛ akɛ: “Lɛɛlɛŋ, miikɛɛ bo ŋmɛnɛ akɛ, obaafata mihe yɛ Paradeiso.” (Kanemɔ Luka 23:39-43.) Nɔ ko bɛ ni tsɔɔ akɛ efɔŋfeelɔ nɛɛ bo “ŋwɛi Maŋtsɛyeli lɛ” he sane ni Yesu shiɛ lɛ toi ni ehe eye. Ni Yesu ekɛɛɛ lɛ akɛ ebaabote ŋwɛi Maŋtsɛyeli lɛ mli. (Mat. 4:17) No hewɔ lɛ, ekã shi faŋŋ akɛ, shikpɔŋ lɛ nɔ Paradeiso lɛ he no mli lɛ Yesu kɛ lɛ wieɔ lɛ. Mɛni hewɔ wɔkɛɔ nakai?

2. Mɛni tsɔɔ akɛ efɔŋfeelɔ ni tsake etsui lɛ ji Yudanyo?

² Eeenyɛ efee akɛ, efɔŋfeelɔ ni tsake etsui lɛ, Yudanyo ji lɛ. Efɔŋfeelɔ nɛɛ bi mɔ kroko lɛ akɛ, “Ani osheee Nyɔŋmɔ gbeyei kwraa, amrɔ nɛɛ ni bo hu ooná toigbalamɔ kome too lɛ nɔŋŋ lɛ?” (Luka 23:40) Yudafoi lɛ já Nyɔŋmɔ kome pɛ, shi jeŋmaji lɛ já nyɔŋmɔi babaoo. (2 Mo. 20:2, 3; 1 Kor. 8:5, 6) Eji efɔŋfeelɔi nɛɛ ji jeŋmajiaŋbii kulɛ, sanebimɔ lɛ baaba lɛ akɛ, ‘Ani osheee nyɔŋmɔi lɛ gbeyei kwraa?’ Kɛfata he lɛ, atsuuu Yesu jeŋmajiaŋbii lɛ aŋɔɔ. Moŋ lɛ, atsu lɛ “Israel shĩa lɛ gwantɛŋi ni elaaje lɛ aŋɔɔ,” ni no mli lɛ Nyɔŋmɔ ehã Israelbii lɛ ele akɛ ebaatee gbohii ashi. (Mat. 15:24) Eeenyɛ efee akɛ, efɔŋfeelɔ ni tsake etsui lɛ le sane nɛɛ, ni ewiemɔi lɛ tsɔɔ akɛ Yehowa baatee Yesu shi ni eye nɔ yɛ Nyɔŋmɔ Maŋtsɛyeli  lɛ mli. Ekolɛ nuu nɛɛ yɛ hiɛnɔkamɔ akɛ Nyɔŋmɔ baatee lɛ hu shi.

3. Be ni Yesu tsĩ Paradeiso tã lɛ, mɛni eeenyɛ efee akɛ eba efɔŋfeelɔ ni tsake etsui lɛ jwɛŋmɔ mli? Tsɔɔmɔ mli. (1 Mose 2:15)

³ Akɛni efɔŋfeelɔ ni tsake etsui lɛ ji Yudanyo hewɔ lɛ, ŋwanejee ko bɛ he akɛ ele akɛ Yehowa ni bɔ Adam kɛ Hawa ni ekɛ amɛ wo Paradeiso lɛ mli. No hewɔ lɛ, ekã shi faŋŋ akɛ, ele akɛ Paradeiso ni Yesu tsĩ tã lɛ baafee abɔɔ fɛfɛo ko ni yɔɔ shikpɔŋ lɛ nɔ.​—Kanemɔ 1 Mose 2:15.

4. Mɛni esa akɛ nɔ ni Yesu kɛɛ efɔŋfeelɔ lɛ atsirɛ wɔ ni wɔfee?

⁴ Esa akɛ nɔ ni Yesu kɛɛ efɔŋfeelɔ lɛ atsirɛ wɔ ni wɔsusu bɔ ni Paradeiso lɛ mli shihilɛ baaji ahã lɛ he. Toiŋjɔlɛ ni Israelbii lɛ ná be ni Maŋtsɛ Solomon yeɔ nɔ lɛ baahã wɔle bɔ ni Paradeiso lɛ mli shihilɛ baaji ahã. Biblia lɛ kɛɛ Yesu nɔ kwɔ fe Solomon. Yesu kɛ mɛi ni baafata ehe kɛye nɔ lɛ baafee ekome kɛtsu nii koni amɛhã shikpɔŋ lɛ atsɔ paradeiso fɛfɛo. (Mat. 12:42) Ekã shi faŋŋ akɛ, “gwantɛŋi krokomɛi” lɛ baanya he akɛ amɛbaale nɔ ni kɛ́ amɛfee lɛ amɛbaahi Paradeiso lɛ mli kɛya naanɔ.​—Yoh. 10:16.

5. Kɛ́ okwɛ lɛ, te shihilɛ baaji ahã tɛŋŋ yɛ Paradeiso lɛ mli?

⁵ Kɛ́ okwɛ lɛ, te Paradeiso lɛ mli shihilɛ baafee tɛŋŋ? Ekolɛ, obaafee he mfoniri akɛ, eji he ko ni yɔɔ fɛo tamɔ Eden abɔɔ lɛ. (1 Mo. 2:7-9) Ekolɛ obaakai akɛ, gbalɔ Mika gba akɛ Nyɔŋmɔ webii lɛ ateŋ “mɔ fɛɛ mɔ baata ewain tso kɛ egbami tso shishi.” (Mika 4:3, 4) Obaakai hu akɛ, Biblia lɛ gba akɛ abaaná niyenii babaoo. (Lala 72:16; Yes. 65:21, 22) No hewɔ lɛ, feemɔ ohe mfoniri ni ota okpɔlɔ ko ni ato niyenii pii ni ŋɔɔŋɔi yɛ nɔ lɛ sɛɛ yɛ abɔɔ fɛfɛo ko mli ni fɔfɔi miije ŋma yɛ jɛmɛ ni okɛ owekumɛi kɛ onanemɛi kɛ mɛi ni atee amɛ shi lɛ miigba sane kɛ miishɛɛ. Enɛ jeee lamɔ ko kɛkɛ. Nɛkɛ ji bɔ ni Paradeiso lɛ mli shihilɛ baafee. Shi wɔbaaná nitsumɔ kpakpa wɔtsu hu yɛ Paradeiso lɛ mli.

6. Mɛni wɔbaatsu yɛ Paradeiso lɛ mli? (Kwɛmɔ mfoniri lɛ.)

⁶ Yehowa bɔ wɔ bɔ ni kɛ́ wɔtsu nii lɛ wɔbaaná miishɛɛ. (Jaj. 2:24) Yɛ Kristo Afii Akpe Nɔyeli lɛ mli lɛ, wɔbaatsu nii waa. Atade, niyenii, kɛ wɔɔhe he baahia mɛi ni baafo amanehulu kpeteŋkpele lɛ kɛ mɛi akpekpei abɔ ni abaatee amɛ shi lɛ. Enɛ hewɔ lɛ, ehe baahia ni wɔtsu nii waa, ni nitsumɔ ni wɔbaatsu lɛ baahã wɔná miishɛɛ. Bɔ ni Yehowa kɛɛ Adam kɛ Hawa akɛ amɛsaa abɔɔ fɛfɛo ni ekɛhã amɛ lɛ mli lɛ, nakai nɔŋŋ wɔbaasaa shikpɔŋ lɛ nɔ ni etsɔ paradeiso fɛfɛo. Wɔbaatsɔɔ mɛi akpekpei abɔ ni abaatee amɛ shi ni leee nɔ ko tsɔ yɛ Yehowa kɛ eyiŋtoo lɛ he lɛ  nii, ni wɔbaatsɔɔ anɔkwafoi ni hi shi dani Yesu ba shikpɔŋ lɛ nɔ lɛ nii babaoo.

7. Mɛni wɔbaanyɛ wɔhe wɔye? Ni mɛni hewɔ?

⁷ Toiŋjɔlɛ baahi Paradeiso lɛ mli. Mɔ fɛɛ mɔ baaná nɔ ni etaoɔ, ni abaato nibii ahe gbɛjianɔ jogbaŋŋ hu. Mɛni hewɔ wɔkɛɔ nakai? Ejaakɛ Yehowa etsɔ hiɛ efee nɔ ko ni hãa wɔnaa bɔ ni shihilɛ baaji kɛ́ e-Bi lɛ bɔi shikpɔŋ lɛ nɔyeli. Mɛni ji no? No ji bɔ ni ehã nibii tee lɛ ehã yɛ Maŋtsɛ Solomon nɔyeli lɛ shishi lɛ.

8. Mɛɛ gbɛ nɔ wiemɔi ni Maŋtsɛ David wie yɛ Lala 37:10, 11, 29 lɛ ba mli yɛ blema? (Kwɛmɔ “Sanebimɔi Ni Jɛ Kanelɔi Adɛŋ” ni yɔɔ Buu-Mɔɔ lɛ nɛɛ mli lɛ.)

⁸ Yehowa kɛ emumɔ lɛ tsirɛ Maŋtsɛ David ni etsɔɔ bɔ ni nibii baaya lɛ ahã wɔsɛɛ yɛ Israel kɛ́ maŋtsɛ ko ni yeɔ anɔkwa ni hiɛ kã shi lɛ miiye nɔ. (Kanemɔ Lala 37:10, 11, 29.) Bei pii kɛ́ wɔkɛ mɛi miigba Paradeiso lɛ he sane lɛ, wɔkaneɔ Lala 37:11 lɛ wɔtsɔɔ amɛ. Naagba bɛ he akɛ wɔbaafee nakai, ejaakɛ Yesu tsɛ nakai ŋmalɛ lɛ yisɛɛ yɛ e-Gɔŋ Nɔ Shiɛmɔ lɛ mli, ni no hãa wɔnaa akɛ ebaaba mli ekoŋŋ wɔsɛɛ. (Mat. 5:5) Shi be ni David wie wiemɔi ni yɔɔ nakai ŋmalɛ lɛ mli lɛ, no mli lɛ eetsɔɔ bɔ ni nibii baaya lɛ ahã yɛ Maŋtsɛ Solomon gbii lɛ amli. Be ni Solomon yeɔ Israel nɔ lɛ, Nyɔŋmɔ jɔɔ amɛ ni amɛná toiŋjɔlɛ kɛ nii babaoo yɛ “shikpɔŋ ni mliki kɛ wo hoɔ yɛ nɔ” lɛ nɔ. No mli lɛ, Nyɔŋmɔ etsɔ hiɛ ekɛɛ amɛ akɛ, ‘Kɛ́ nyɛtee nɔ nyɛnyiɛ yɛ mimlai lɛ anaa lɛ, mahã toiŋjɔlɛ aba shikpɔŋ lɛ nɔ, ni nyɛbaakamɔ shi, ni mɔ ko mɔ ko woŋ nyɛhe gbeyei.’ (3 Mo. 20:24; 26:3, 6) Nɔ ni Nyɔŋmɔ wie nɛɛ ba mli be ni Solomon yeɔ nɔ lɛ. (1 Kro. 22:9; 29:26-28) Yehowa wo shi hu akɛ, nakai beiaŋ lɛ, ‘anaŋ mɛi fɔji dɔŋŋ.’ (Lala 37:10) Enɛ hãa wɔnaa akɛ, wiemɔi ni yɔɔ Lala 37:10, 11, 29 lɛ ba mli yɛ blema ni ebaasaa eba mli wɔsɛɛ hu.

9. Mɛni Sheba maŋnyɛ lɛ wie yɛ Maŋtsɛ Solomon nɔyeli lɛ he?

⁹ Sheba maŋnyɛ lɛ nu bɔ ni Israelbii lɛ ená toiŋjɔlɛ kɛ nii babaoo yɛ Maŋtsɛ Solomon  nɔyeli lɛ shishi lɛ he. Enɛ hewɔ lɛ, maŋnyɛ nɛɛ fã gbɛ kɛtee Yerusalem tɔ̃ɔ koni lɛ diɛŋtsɛ eyana kɛ ehiŋmɛi. (1 Maŋ. 10:1) Be ni ená nibii fɛɛ ni yaa nɔ yɛ Solomon maŋtsɛyeli lɛ shishi lɛ, ewie akɛ: “Nɔ ni agba mi lɛ shɛɛɛ emli fã po. . . . Anɔkwa, owebii lɛ yɛ miishɛɛ, ni otsuji ni damɔɔ ohiɛ be fɛɛ be ni amɛboɔ onilee lɛ toi lɛ hu yɛ miishɛɛ!” (1 Maŋ. 10:6-8) Bɔ ni nibii tee lɛ yɛ Solomon nɔyeli lɛ shishi lɛ ji bɔ ni nibii baaya lɛ ahã be ni Yehowa hãa e-Bi Yesu yeɔ nɔ lɛ he nɔ ko fioo kɛkɛ.

10. Mɛni hewɔ kɛ́ akɛ Solomon to Yesu he lɛ, eshɛɛɛ Yesu he kwraa lɛ?

¹⁰ Kɛ́ akɛ Solomon to Yesu he lɛ, eshɛɛɛ Yesu he kwraa. Solomon yeee emuu, ni etɔ̃ tɔmɔi ni yɔɔ hiɛdɔɔ ni kɛ naagbai ba Nyɔŋmɔ webii lɛ anɔ waa. Shi Yesu ji nɔyelɔ ni yeɔ emuu, ni etɔ̃ɔɔ. (Luka 1:32; Heb. 4:14, 15) Satan hã Yesu tsɔ shihilɛi ni mli wawai amli, shi efi shi ni eye Yehowa anɔkwa. Kristo efeee esha kɔkɔɔkɔ, ni efeŋ nɔ ko ni baaye eshishibii lɛ awui. Eŋɔɔ wɔnaa waa akɛ lɛ ji wɔ-Maŋtsɛ, ejaakɛ maŋtsɛ ko maŋtsɛ ko bɛ ni tamɔ lɛ.

11. Namɛi baafata Yesu he kɛye nɔ?

¹¹ Mɛi 144,000 baafata Yesu he kɛye adesai anɔ ni amɛkwɛ ni Yehowa yiŋtoo kɛhã shikpɔŋ lɛ aba mli. (Kpo. 14:1-3) Hii kɛ yei nɛɛ etsɔmɔ shihilɛi ni mli wawai amli be ni amɛyɔɔ shikpɔŋ lɛ nɔ lɛ, no hewɔ lɛ amɛbaanu he amɛhã adesai. Shi mɛni tuuntu mɛi 144,000 lɛ baatsu?

12. Mɛɛ nitsumɔ Yehowa kɛwo mɛi 144,000 lɛ adɛŋ?

¹² Nitsumɔ ni Yehowa kɛwo Yesu kɛ mɛi ni baafata ehe kɛye nɔ lɛ adɛŋ lɛ da kwraa fe Solomon nɔ lɛ. Solomon ye mɛi akpekpei abɔ ni yɔɔ maŋ kome nɔ lɛ anɔ. Shi Yesu kɛ mɛi ni fata ehe lɛ baaye mɛi akpekpe toi akpei abɔ anɔ yɛ jeŋ fɛɛ. Enɛ ji hegbɛ kpele diɛŋtsɛ ni Yehowa kɛhã mɛi 144,000 lɛ!

13. Mɛɛ nitsumɔ kroko mɛi 144,000 lɛ baatsu?

¹³ Mɛi 144,000 lɛ baasɔmɔ akɛ maŋtsɛmɛi kɛ osɔfoi tamɔ Yesu nɔŋŋ. (Kpo. 5:10) Be ni Israelbii lɛ yɔɔ Mose Mla lɛ shishi lɛ, osɔfoi lɛ ji mɛi titri ni yeɔ amɛbuaa amɛ koni amɛná gbɔmɔtsoŋ hewalɛ kpakpa ni amɛsɔmɔ Yehowa jogbaŋŋ. Akɛni Mla lɛ ji “nibii kpakpai ni baaba lɛ ahe mfoniri” hewɔ lɛ, wɔbaanyɛ wɔkɛɛ akɛ mɛi 144,000 lɛ baaye abua Nyɔŋmɔ webii lɛ koni amɛná gbɔmɔtsoŋ hewalɛ kpakpa ni amɛsɔmɔ Yehowa jogbaŋŋ. (Heb. 10:1) Bianɛ lɛ, wɔleee gbɛ ni maŋtsɛmɛi kɛ osɔfoi nɛɛ baatsɔ nɔ amɛkɛ adesai ashara yɛ shikpɔŋ lɛ nɔ. Shi wɔle akɛ bɔ fɛɛ bɔ ni ji lɛ, Yehowa baakwɛ ni mɛi ni baahi Paradeiso lɛ mli yɛ shikpɔŋ lɛ nɔ lɛ aná gbɛtsɔɔmɔ ni he hiaa amɛ lɛ.​—Kpo. 21:3, 4.

14. Mɛɛ gbɛ nɔ “gwantɛŋi krokomɛi” lɛ kɛ “tooku bibioo” lɛ efee ekome?

¹⁴ Yesu tsɛ mɛi ni baafata ehe kɛye nɔ lɛ akɛ “tooku bibioo.” (Luka 12:32) Shi ewie kuu kroko hu he. Etsɛ amɛ akɛ, “gwantɛŋi krokomɛi.” (Yoh. 10:16) Yesu wie akɛ, kui enyɔ nɛɛ baafee ekome akɛ tooku kome. Bianɛ lɛ, kui enyɔ nɛɛ efee ekome kɛmiitsu nii, ni amɛbaaya nɔ amɛfee ekome kɛtsu nii kɛ́ shikpɔŋ lɛ tsɔ Paradeiso. Nakai beiaŋ lɛ, “tooku bibioo” lɛ yɛ ŋwɛi, ni “gwantɛŋi krokomɛi” lɛ baaná hegbɛ akɛ amɛhi shikpɔŋ lɛ nɔ yɛ miishɛɛ mli kɛya naanɔ. Shi nibii komɛi yɛ ni esa akɛ “gwantɛŋi krokomɛi” lɛ afee dani ahã amɛ hegbɛ ni amɛhi Paradeiso lɛ mli.

15. (a) Mɛni “gwantɛŋi krokomɛi” lɛ baanyɛ amɛfee kɛye amɛbua Kristo nyɛmimɛi lɛ? (b) Mɛɛ gbɛ nɔ wɔbaanyɛ wɔkase nyɛmi nuu lɛ ni wɔnaa yɛ shwapo lɛ mli lɛ? (Kwɛmɔ mfoniri lɛ.)

 ¹⁵ Efɔŋfeelɔ ni tsake etsui lɛ gbo nakai gbi lɛ. No hewɔ lɛ, enáaa hegbɛ etsɔɔ akɛ ehiɛ sɔɔ nɔ ni Kristo fee ehã lɛ lɛ. Shi wɔ, ni ji “gwantɛŋi krokomɛi” lɛ yɛ hegbɛi pii ni wɔbaanyɛ wɔkɛtsɔɔ akɛ wɔhiɛ sɔɔ nɔ ni Yesu efee ehã wɔ lɛ. Akɛ nɔkwɛmɔnɔ lɛ, wɔbaanyɛ wɔtsɔ bɔ ni wɔkɛ enyɛmimɛi ni afɔ amɛ mu lɛ yeɔ wɔhãa lɛ nɔ wɔtsɔɔ akɛ wɔsumɔɔ lɛ. Yesu kɛɛ ebaadamɔ bɔ ni mɛi kɛ enyɛmimɛi lɛ yeɔ amɛhãa lɛ nɔ etsɔɔ kɛji mɔ ko ji gwantɛŋ loo abotia. (Mat. 25:31-40) Nɔ kome ni wɔbaanyɛ wɔfee kɛwa Kristo nyɛmimɛi lɛ ji, ni wɔkɛ ekãa baashiɛ ni wɔfee mɛi kaselɔi. (Mat. 28:18-20) Enɛ hewɔ lɛ, esa akɛ wɔkɛ woji ni wɔtsɔɔ nɔ wɔkɛ mɛi kaseɔ Biblia lɛ atsu nii jogbaŋŋ. Eko ji, Oyi Aná Wala Kɛya Naanɔ! wolo lɛ. Kɛ́ obɛ mɔ ko ni okɛkaseɔ Biblia lɛ bianɛ lɛ, obaanyɛ okɛfee oti akɛ obaabi mɛi kɛji amɛbaasumɔ ni okɛ amɛ akase Biblia lɛ.

16. Mɛni wɔbaanyɛ wɔfee bianɛ ni baawa wɔ ni wɔhi Paradeiso lɛ mli?

¹⁶ Esaaa akɛ wɔmɛɔ ni wɔyashɛɔ Paradeiso lɛ mli dani wɔbɔ mɔdɛŋ akɛ wɔbaajie sui komɛi ni Yehowa nyaaa he lɛ kɛje wɔhe. Enɛ hewɔ lɛ, bianɛ lɛ, esa akɛ wɔmia wɔhiɛ wɔye anɔkwa yɛ wɔwiemɔ kɛ wɔnifeemɔ mli, ni wɔŋmɛ pɛpɛɛpɛ yɛ nɔ fɛɛ nɔ ni wɔfeɔ lɛ mli. Agbɛnɛ hu, esa akɛ wɔye Yehowa, wɔgbalashihilɛ mli hefatalɔi, kɛ wɔnyɛmimɛi Kristofoi lɛ anɔkwa. Kɛ́ wɔmia wɔhiɛ wɔbo Yehowa toi yɛ jeŋ fɔŋ nɛɛ mli lɛ, ewaŋ kɛhãŋ wɔ akɛ wɔbaafee nakai yɛ Paradeiso lɛ mli. Kɛfata he lɛ, wɔbaanyɛ wɔkase hesai kɛ sui krokomɛi ni he baanyɛ aba sɛɛnamɔ yɛ nakai beiaŋ. Kwɛmɔ sane ni ji, “Ani Oosaa Ohe Ooto Be Ni ‘Shikpɔŋ Lɛ Baatsɔ Onɔ’ Lɛ?” ni yɔɔ Buu-Mɔɔ lɛ nɛɛ mli lɛ.

17. Ani esa akɛ wɔhã esha ko ni yɔɔ hiɛdɔɔ ni wɔfee be ko ni eho lɛ aya nɔ ahao wɔ? Mɛni hewɔ okɛɔ nakai?

¹⁷ Kɛ́ wɔfee esha ko ni yɔɔ hiɛdɔɔ be ko ni eho ni eehao wɔ lolo lɛ, esa akɛ wɔbɔ mɔdɛŋ wɔjie wɔjwɛŋmɔ kɛje nɔ. Shi enɛ hu etsɔɔɔ akɛ Kristo kpɔmɔ afɔleshaa lɛ hewɔ lɛ  ‘wɔbaaje gbɛ wɔfee esha ni wɔkpaaa.’ (Heb. 10:26-31) Kɛ́ wɔtsake wɔtsui lɛɛlɛŋ, wɔsɔle wɔkpa Yehowa fai koni ekɛ nakai esha lɛ ake wɔ, wɔyana asafoŋ onukpai lɛ kɛhã yelikɛbuamɔ, ni wɔtsake wɔjeŋba lɛ, belɛ wɔbaanyɛ wɔhe wɔye akɛ Yehowa kɛ nakai esha lɛ eke wɔ kwraa. (Yes. 55:7; Bɔf. 3:19) Kaimɔ nɔ ni Yesu kɛɛ Farisifoi lɛ. Ekɛɛ amɛ akɛ: “Mibaaa jalɔi atsɛmɔ, shi moŋ eshafeelɔi.” (Mat. 9:13) Kristo afɔleshaa lɛ baanyɛ agbe wɔhe eshai lɛ fɛɛ.

18. Mɛɛ sane obaasumɔ ni okɛ efɔŋfeelɔ lɛ ni asɛŋ lɛ afata Yesu he lɛ agba?

¹⁸ Ŋɔɔ lɛ akɛ, oyɛ Paradeiso lɛ mli ni okɛ efɔŋfeelɔ lɛ ni kɛ Yesu wie lɛ miigba sane. Kulɛ te obaanu he ohã tɛŋŋ? Ŋwanejee ko bɛ he akɛ, omii baashɛ ohe waa, ni nyɛ fɛɛ nyɛbaagba nibii ni nyɛhiɛ sɔɔ yɛ Yesu kpɔmɔ afɔleshaa lɛ he lɛ he sane. Ekolɛ obaabi lɛ ni egba bo bɔ ni nibii tee lɛ ehã be ni ekɛ Yesu yɔɔ piŋmɔ tso lɛ nɔ lɛ he saji babaoo kɛ bɔ ni enu he ehã be ni Yesu hã ele akɛ ekɛ lɛ baahi Paradeiso lɛ. Ekolɛ lɛ hu ebaabi bo bɔ ni nibii tee lɛ ehã yɛ naagbee gbii nɛɛ amli lɛ he sane. Ebaafee miishɛɛ waa akɛ wɔkɛ mɛi ni tamɔ nɛkɛ baakase Nyɔŋmɔ Wiemɔ lɛ!​—Efe. 4:22-24.

19. Mɛni hewɔ Paradeiso lɛ mli shihilɛ ejeŋ wɔtsine kɔkɔɔkɔ lɛ? (Kwɛmɔ mfoniri ni yɔɔ wolo lɛ hiɛ lɛ.)

¹⁹ Paradeiso lɛ mli shihilɛ ejeŋ wɔtsine kɔkɔɔkɔ. Daa gbi lɛ, wɔkɛ mɛi srɔtoisrɔtoi baakpe ni wɔbaasumɔ ni wɔle amɛ jogbaŋŋ, ni wɔbaatsu nitsumɔi ni baahã wɔná miishɛɛ. Nɔ ni fe fɛɛ lɛ, daa gbi lɛ, wɔbaale Yehowa, wɔ-Tsɛ ni yɔɔ ŋwɛi lɛ jogbaŋŋ, ni wɔmii baashɛ wɔhe waa yɛ nibii ni ekɛdro wɔ lɛ ahewɔ. Wɔbaakase nibii pii yɛ Yehowa kɛ nibii ni ebɔ lɛ ahe, ni suɔmɔ ni wɔyɔɔ kɛhã lɛ lɛ mli baawa gbi fɛɛ gbi. Eŋɔɔ wɔnaa waa akɛ, Yehowa kɛ Yesu ewo wɔ shi akɛ wɔbaanyɛ wɔhi Paradeiso lɛ mli kɛya naanɔ!