1. Mɛni ji “Nyɔŋmɔ toiŋjɔlɛ lɛ”? Ni kɛ́ wɔyɛ “Nyɔŋmɔ toiŋjɔlɛ lɛ,” mɛɛ gbɛ nɔ wɔnáa he sɛɛ? (Filipibii 4:6, 7)

 TOIŊJƆLƐ ko yɛ ni mɛi ni ekaseko Yehowa he nii lɛ leee. No ji, “Nyɔŋmɔ toiŋjɔlɛ lɛ,” ni ji bɔ ni mɔ ko tsui nyɔɔ emli ehãa kɛ́ wekukpaa kpakpa yɛ ekɛ e-Tsɛ ni yɔɔ ŋwɛi lɛ teŋ. Kɛ́ wɔyɛ Nyɔŋmɔ toiŋjɔlɛ lɛ, wɔyeŋ wɔtsui yɛ nɔ ko nɔ ko he. (Kanemɔ Filipibii 4:6, 7.) Agbɛnɛ hu, naanyobɔɔ kpakpa hiɔ wɔ kɛ mɛi ni sumɔɔ Yehowa lɛ ateŋ, ni wekukpaa kpakpa bakãa wɔ kɛ Yehowa, ni ji “toiŋjɔlɛ Nyɔŋmɔ lɛ” teŋ. (1 Tes. 5:23) Kɛ́ wɔle wɔ-Tsɛ Yehowa, ni ji toiŋjɔlɛ Nyɔŋmɔ lɛ jogbaŋŋ, wɔkɛ wɔhiɛ fɔ̃ enɔ, ni wɔbo lɛ toi lɛ, ebaahã wɔtsui anyɔ wɔmli ni wɔyeŋ wɔtsui kɛ́ wɔkɛ shihilɛi ni mli wawai kpe.

2. Ani wɔbaanyɛ wɔná Nyɔŋmɔ toiŋjɔlɛ lɛ lɛɛlɛŋ kɛ́ wɔkɛ shihilɛi ni mli wawai miikpe? Mɛni hewɔ okɛɔ nakai?

² Kɛ́ tsɛŋemɔ hela loo adebɔɔ naa oshãra ba he ni wɔyɔɔ lɛ, loo aawu ta yɛ he ni wɔyɔɔ lɛ, loo aawa wɔ yi lɛ, ani wɔbaanyɛ wɔná Nyɔŋmɔ toiŋjɔlɛ lɛ lɛɛlɛŋ? Shihilɛi ni mli wawai tamɔ nɛkɛ baanyɛ ahã wɔtsui afã waa. Shi Yesu wo esɛɛnyiɛlɔi lɛ ŋaa akɛ: “Nyɛkayea nyɛtsui ni nyɛtsui akafãa hu.” (Yoh. 14:27) Miishɛɛ sane ji, nyɛmimɛi komɛi kɛ ŋaawoo nɛɛ etsu nii ni eye ebua amɛ waa. Yehowa eye ebua amɛ ni amɛná toiŋjɔlɛ yɛ shihilɛi ni mli wawai ni amɛkɛkpe lɛ fɛɛ sɛɛ.

3. Kɛ́ tsɛŋemɔ hela ba he ni wɔyɔɔ lɛ loo jeŋ fɛɛ lɛ, mɛɛ gbɛ nɔ ebaanyɛ efite wɔtoiŋjɔlɛ?

³ Kɛ́ tsɛŋemɔ hela ba he ni wɔyɔɔ lɛ loo jeŋ fɛɛ lɛ, ebaanyɛ esa wɔhe waa. Akɛ nɔkwɛmɔnɔ lɛ, COVID-19 hela lɛ sa mɛi pii ahe. Yɛ niiamlitaomɔ ko ni afee lɛ mli lɛ, mɛi ni abibii amɛ saji  lɛ ateŋ mɛi babaoo wie akɛ, amɛnyɛɛɛ amɛwɔ jogbaŋŋ be ni COVID-19 hela lɛ ba lɛ. Hela lɛ hã mɛi pii ye amɛtsui waa ni amɛhao, mɛi nu dãa waa ni amɛkɛ tsofai tsu nii yɛ gbɛ ni esaaa nɔ. Mɛi fee amɛwekumɛi niseniianii waa, ni mɛi pii hu ka akɛ amɛbaagbe amɛhe. Kɛ́ tsɛŋemɔ hela ba yɛ he ni oyɔɔ lɛ, mɛni obaanyɛ ofee koni oná Nyɔŋmɔ toiŋjɔlɛ lɛ ni okaye otsui pii?

4. Mɛɛ gbɛ nɔ nɔ ni Yesu wie yɛ naagbee gbii lɛ ahe lɛ yeɔ ebuaa wɔ ni wɔkaye wɔtsui pii?

⁴ Yesu gba akɛ yɛ naagbee gbii lɛ amli lɛ, “tsɛŋemɔ helai ni gbeɔ mɔ baaba yɛ heihei.” (Luka 21:11) Mɛɛ gbɛ nɔ enɛ ni wɔle lɛ yeɔ ebuaa wɔ ni wɔkaye wɔtsui pii? Kɛ́ tsɛŋemɔ helai ba lɛ, efeee wɔ naakpɛɛ. Ehãa wɔnaa akɛ, nibii miiya lɛ tamɔ bɔ ni Yesu wie akɛ ebaaya lɛ lɛ. Enɛ hewɔ lɛ, esa akɛ wɔbo ŋaa ni Yesu wo mɛi ni naagbee gbii lɛ enina amɛ lɛ akɛ: “Nyɛkwɛa ni nyɛtsui akafãa” lɛ toi.​—Mat. 24:6.

5. (a) Yɛ nɔ ni awie yɛ Filipibii 4:8, 9 lɛ naa lɛ, kɛ́ tsɛŋemɔ hela ba he ni wɔyɔɔ lɛ, mɛni esa akɛ wɔsɔle wɔbi? (b) Kɛ́ wɔbo Biblia lɛ ni arikɔdi lɛ toi lɛ, mɛɛ gbɛ nɔ wɔbaaná he sɛɛ?

⁵ Kɛ́ tsɛŋemɔ hela ba he ni wɔyɔɔ lɛ, ebaanyɛ ehã wɔhao ni wɔshe gbeyei. Nakai eba lɛ yɛ nyɛmi yoo ko ni atsɛɔ lɛ Desi lɛ gbɛfaŋ. b COVID-19 hela lɛ gbe etsɛkwɛ̃, epapa nyɛmi nukpa bi, kɛ edatrɛfonyo. Enɛ hã eshe gbeyei waa akɛ lɛ hu hela lɛ baamɔ lɛ ni ekɛbaahã emami ni egbɔ lɛ. Hela lɛ hewɔ lɛ, enu he akɛ enitsumɔ baaŋmɛɛ lɛ, ni enáŋ shika ni ekɛhé niyenii ni ekɛ eko awo etsũ nyɔmɔ, ni enɛ hã ehao waa. Eye etsui aahu akɛ, kɛ́ eyakã shi lɛ, ewɔɔɔ. Shi mɛni Desi fee ni hã ená toiŋjɔlɛ? Esɔle ni Yehowa aye abua lɛ ni ekaye etsui ni esusu nibii kpakpai ahe. (Kanemɔ Filipibii 4:8, 9.) Ebo Yehowa toi kɛtsɔ Biblia lɛ ni arikɔdi lɛ toi ni eboɔ lɛ nɔ. Ewie akɛ: “Gbei srɔtoi ni mɛi ni kane Biblia lɛ kɛkane lɛ jɔɔ mitsui he ni ehãaa maye mitsui, ni ehã mina akɛ Yehowa susuɔ mihe.”​—Lala 94:19.

6. Mɛɛ gbɛ nɔ aŋkro nikasemɔ kɛ asafoŋ kpeei baanyɛ aye abua bo?

⁶ Ŋwanejee ko bɛ he akɛ, kɛ́ tsɛŋemɔ hela ba he ni oyɔɔ lɛ, ebaanyɛ esa nibii ni ofeɔ daa gbi lɛ ahe. Shi kaahã esa aŋkro nikasemɔ ni ofeɔ kɛ asafoŋ kpeei ni oyaa lɛ ahe. Niiashikpamɔi ni yɔɔ asafo lɛ woji kɛ vidioi lɛ amli lɛ baahã ona akɛ, onyɛmimɛi Kristofoi ni kɛ naagbai ni tamɔ onɔ lɛ miikpe lɛ miifi shi. (1 Pet. 5:9) Asafoŋ kpeei lɛ baaye ebua bo ni ojwɛŋ nibii kpakpai ni woɔ mɔ hewalɛ ni yɔɔ Ŋmalɛ lɛ mli lɛ ahe. Ebaahã oná hegbɛ kɛwo onyɛmimɛi lɛ hewalɛ ni amɛ hu amɛwo bo hewalɛ. (Rom. 1:11, 12) Kɛ́ ojwɛŋ bɔ ni Yehowa ye ebua etsuji ni hela mɔ amɛ ni nu he akɛ amɛhe efee shoo loo ni amɛshe  gbeyei lɛ ahe lɛ, ebaawaje bo, ni ebaahã hemɔkɛyeli ni oyɔɔ akɛ ebaaye ebua bo hu lɛ mli awa.

7. Mɛni obaanyɛ okase yɛ bɔfo Yohane sane lɛ mli?

⁷ Bɔ fɛɛ bɔ ni shihilɛ lɛ ji lɛ, okɛ onyɛmimɛi Kristofoi lɛ afɔ sanegbaa. Kɛ́ tsɛŋemɔ hela ko ba lɛ, ekolɛ ebaabi ni wɔhã gbɛ akamɔ wɔ kɛ mɛi ateŋ kɛ́ wɔyɛ wɔnyɛmimɛi Kristofoi lɛ po ateŋ. Yɛ bei ni tamɔ nɛkɛ mli lɛ, ekolɛ obaanu he tamɔ bɔ ni bɔfo Yohane nu he lɛ. No mli lɛ, Yohane miitao ena enaanyo Gaio hiɛ kɛ hiɛ. (3 Yoh. 13, 14) Shi ele akɛ, shihilɛ ko hewɔ lɛ, enyɛŋ ena Gaio hiɛ kɛ hiɛ. No hewɔ lɛ, mɛni efee? Eŋma Gaio lɛta. Kɛ́ bɔ ni shihilɛ lɛ yɔɔ hewɔ lɛ, onyɛɛɛ okɛ onyɛmimɛi lɛ awie hiɛ kɛ hiɛ lɛ, obaanyɛ otswa amɛ, okɛ amɛ afee vidio kɔɔl, loo osɛndi amɛ mɛseji. Kɛ́ ofee bɔ fɛɛ bɔ ni obaanyɛ ni okɛ onyɛmimɛi Kristofoi lɛ gba sane lɛ, no baaye abua bo ni okanu he akɛ ohe efee shoo, ni otsui hu baanyɔ omli. Kɛ́ onu he akɛ ohao waa lɛ, bi asafoŋ onukpai lɛ ni amɛye amɛbua bo, ni okɛ ŋaawoi ni amɛkɛbaahã bo lɛ atsu nii.​—Yes. 32:1, 2.

8. Kɛ́ oshãra ko ba lɛ, mɛɛ gbɛ nɔ ebaanyɛ efite otoiŋjɔlɛ?

⁸ Kɛ́ nu afua loo shikpɔŋhosomɔ loo la fite nii yɛ he ni oyɔɔ lɛ, ekolɛ obaaye otsui be kplaŋŋ yɛ oshãra nɛɛ hewɔ. Kɛ́ oshãra lɛ hã mɔ ko ni osumɔɔ esane gbo loo ekpãtã onibii ahiɛ lɛ, ekolɛ kɛbashi bianɛ lɛ, ooye awerɛho lolo, ohiɛnɔkamɔ etã, loo omli efu po. Enɛ etsɔɔɔ akɛ osumɔɔ heloonaa nibii loo ohemɔkɛyeli mli waaa. Shihilɛi ni okɛkpe lɛ mli wa, ni mɛi komɛi po baakpa gbɛ akɛ obaafee onii yɛ gbɛ ni esaaa nɔ. (Hiob 1:11) Shi obaanyɛ oná toiŋjɔlɛ yɛ shihilɛ ni tamɔ nɛkɛ lɛ fɛɛ sɛɛ. Yɛ mɛɛ gbɛ nɔ?

9. Mɛɛ gbɛ nɔ nibii ni Yesu wie lɛ saa wɔ etoɔ nibii ni wɔkɛbaakpe lɛ?

⁹ Kaahã ohiɛ kpa nɔ akɛ, Yesu egba akɛ nibii ni tamɔ nɛkɛ baaba. Mɛi komɛi ni yɔɔ je lɛ lɛ mli lɛ susuɔ akɛ oshãra ko ninaŋ amɛ. Shi wɔ lɛ, wɔle akɛ yɛ naagbee gbii nɛɛ amli lɛ, oshãrai wujiwuji baaba ni eko baanyɛ asa wɔhe. Yesu kɛɛ esɛɛnyiɛlɔi lɛ akɛ, “shikpɔŋhosomɔi wuji” kɛ oshãrai krokomɛi baaba dani naagbee lɛ baaba. (Luka 21:11) Agbɛnɛ hu, egba akɛ “abaaya nɔ afee nibii babaoo ni mla eŋmɛɛɛ gbɛ.” (Mat. 24:12) Nibii nɛɛ ekomɛi ji, efɔŋfeemɔ, awuiyeli, kɛ basabasafeemɔ. Yesu ewieee akɛ nibii gbohii nɛɛ baaba mɛi ni jáaa Yehowa lɛ pɛ anɔ. Yɛ anɔkwale mli lɛ, Yehowa tsuji anɔkwafoi pii kɛ oshãrai ni tamɔ nɛkɛ lɛ ekpe. (Yes. 57:1; 2 Kor. 11:25) Ekolɛ Yehowa tsɔŋ naakpɛɛ gbɛ nɔ ebuŋ wɔhe kɛjeŋ oshãrai lɛ ahe, shi wɔle akɛ ebaaye ebua wɔ ni wɔkaye wɔtsui.

10. Kɛ́ wɔsaa wɔhe wɔto oshãrai lɛ, mɛɛ gbɛ nɔ no tsɔɔ akɛ wɔyɛ hemɔkɛyeli yɛ Yehowa mli? (Abɛi 22:3)

¹⁰ Kɛ́ wɔsaa wɔhe wɔto dani oshãra ba lɛ, ehãaa wɔye wɔtsui tsɔ. Shi kɛ́ wɔsaa wɔhe wɔto oshãra lɛ, ani no tsɔɔ akɛ wɔheee Yehowa wɔyeee? Dabi kwraa. Anɔkwa, kɛ́ wɔsaa wɔhe wɔto oshãra lɛ, no moŋ tsɔɔ akɛ wɔheɔ wɔyeɔ akɛ Yehowa baanyɛ akwɛ wɔ. Mɛni hewɔ wɔkɛɔ nakai? Ejaakɛ Nyɔŋmɔ Wiemɔ lɛ woɔ wɔ ŋaa ni wɔsaa wɔhe wɔto oshãrai. (Kanemɔ Abɛi 22:3.) Ni Yehowa asafo lɛ tsɔɔ magazin srɔtoi, asafoŋ kpeei, kɛ adafitswai srɔtoi anɔ ekaiɔ wɔ koni wɔsaa wɔhe wɔto oshãrai. c Ani wɔheɔ Yehowa wɔyeɔ? Kɛ́ nakai lɛ, wɔbaabo ŋaawoi ni ekɛhãa lɛ toi bianɛ dani oshãra ko aba.

11. Mɛni okaseɔ yɛ Margaret sane lɛ mli?

¹¹ Naa nyɛmi yoo ko ni atsɛɔ lɛ Margaret lɛ  niiashikpamɔ. Be ko lɛ, la je yɛ ekutso lɛ mli. No hewɔ lɛ, amralo lɛ fã ni mɔ fɛɛ mɔ ashi nakai akutso lɛ mli. Akɛni mɔ fɛɛ mɔ miitao eshi oya nɔŋŋ hewɔ lɛ, gbɛ lɛ batsĩ yɛ tsɔji babaoo ni nyiɛ nɔ lɛ hewɔ. No hewɔ lɛ, tsɔne ko nyɛɛɛ aya ni tsɔne ko nyɛɛɛ aba. No mli lɛ, lasu kpɔŋŋ eyi kɔɔyɔɔ lɛ mli, no hewɔ lɛ, Margaret nyɛɛɛ aje kpo kɛje etsɔne lɛ mli. Shi akɛni esaa ehe eto hewɔ lɛ, enyɛ eje oshãra nɛɛ mli. No mli lɛ, eyɛ map yɛ ebaagi lɛ mli. No hewɔ lɛ, ekwɛ nɔ ni ena gbɛ kroko ni ebaanyɛ etsɔ nɔ kɛje he ni oshãra lɛ yɔɔ lɛ. Be ni oshãra lɛ bako lɛ, Margaret je gbɛ eyatsɔ gbɛ nɛɛ nɔ koni ele gbɛ lɛ nɔ koni kɛ́ oshãra ko ba lɛ enyɛ etsɔ gbɛ nɛɛ nɔ ni etɔɔɔ lɛ. Akɛni enyɛ esaa ehe nɛkɛ hewɔ lɛ, enyɛ eje oshãra lɛ mli shweshweeshwe.

12. Mɛni hewɔ esa akɛ wɔbo gbɛtsɔɔmɔi ni akɛhãa koni akɛbu wɔhe lɛ toi lɛ?

¹² Bei komɛi lɛ, amralofoi lɛ baabi ni wɔkaje kpo yɛ be pɔtɛɛ ko mli loo wɔfã yɛ he ko loo wɔfee nibii krokomɛi. Amɛfeɔ enɛ fɛɛ koni amɛkɛbu wɔ kɛ mɛi krokomɛi ahe. Mɛi komɛi booo gbɛtsɔɔmɔi nɛɛ toi ejaakɛ amɛsumɔɔɔ ni amɛshiɔ nibii ni amɛyɔɔ lɛ ni amɛyaa. Shi Kristofoi efeee nakai. Amɛ lɛ, amɛboɔ gbɛtsɔɔmɔi ni tamɔ nɛkɛ lɛ toi, ejaakɛ Biblia lɛ kɛɔ wɔ akɛ: “Nuŋtsɔ lɛ hewɔ lɛ, nyɛbaa nyɛhe shi nyɛwoa nibii fɛɛ ni gbɔmɛi efee lɛ ashishi, kɛ́ eji maŋtsɛ ni nɔ kwɔ fe nyɛ jio, amralofoi ni etsu amɛ . . . jio.” (1 Pet. 2:13, 14) Yehowa asafo lɛ hu hãa wɔ gbɛtsɔɔmɔi koni ekɛbu wɔhe. Be fɛɛ be lɛ, akaiɔ wɔ akɛ wɔkɛ wɔtɛlifoŋ nɔmba ahã wɔsafoŋ onukpai lɛ ni wɔtsɔɔ amɛ he ni wɔyɔɔ koni kɛ́ oshãra ko ba lɛ amɛnine anyɛ ashɛ wɔnɔ. Ani ofee nakai? Ekolɛ, akɛ gbɛtsɔɔmɔ baahã wɔ akɛ wɔkaje kpo loo wɔfã kɛya he ko loo abaatsɔɔ wɔ bɔ ni wɔbaafee wɔnine ashɛ nibii ni he hiaa wɔ lɛ anɔ loo bɔ ni wɔbaafee wɔye wɔbua mɛi kɛ be ni esa akɛ wɔfee nakai. Kɛ́ wɔbooo toi lɛ, wɔkɛ wɔwala kɛ asafoŋ onukpai lɛ awala baawo oshãra mli. Esa akɛ wɔkai be fɛɛ be akɛ, hii anɔkwafoi nɛɛ miibu wɔhe. (Heb. 13:17) Margaret wie akɛ: “Miheɔ miyeɔ waa akɛ, gbɛtsɔɔmɔi ni asafoŋ onukpai lɛ kɛ Yehowa asafo lɛ kɛhã lɛ ni mikɛtsu nii lɛ ni here miyiwala.”

13. Mɛni hewɔ nyɛmimɛi ni efã kɛtee he kroko lɛ yɔɔ miishɛɛ kɛ toiŋjɔlɛ lolo lɛ?

¹³ Nyɛmimɛi babaoo ni oshãrai, ta, kɛ basabasafeemɔi ehã amɛshi amɛshĩai kɛyaje he kroko lɛ etsake amɛhe amɛwo shihilɛi ni  amɛyaje mli lɛ amli ni amɛmiiya nɔ amɛmiisɔmɔ Yehowa kɛ ekãa. Nyɛmimɛi nɛɛ etee nɔ “amɛjaje wiemɔ lɛ he sane kpakpa lɛ amɛtsɔɔ” tamɔ bɔ ni blema Kristofoi lɛ ni yiwaa hã amɛgbɛ amɛshwã lɛ fee lɛ. (Bɔf. 8:4) Shiɛmɔ nitsumɔ lɛ hãa amɛkɛ amɛjwɛŋmɔ maa Nyɔŋmɔ Maŋtsɛyeli lɛ nɔ moŋ fe naagbai ni amɛkɛkpeɔ lɛ. Enɛ hewɔ lɛ, amɛyɛ miishɛɛ kɛ toiŋjɔlɛ lolo.

14. Kɛ́ aawa wɔ yi lɛ, mɛɛ gbɛ nɔ ebaanyɛ ehã wɔhao?

¹⁴ Kɛ́ aawa wɔ yi lɛ, nibii pii baanyɛ aŋmɛɛ wɔ ni enɛ baanyɛ ahã wɔhao. Kɛ́ wɔnyɛɔ wɔkɛ wɔnyɛmimɛi Kristofoi lɛ kpeɔ kutuu, wɔnyɛɔ wɔshiɛɔ yɛ maŋ lɛ mli, ni wɔnyɛɔ wɔyaa wɔbaa wɔfeɔ nibii krokomɛi ni he hiaa wɔ lɛ fɛɛ ni wɔsheee gbeyei akɛ abaamɔ wɔ yɛ enɛɛmɛi eko eko he lɛ, wɔmii shɛɔ wɔhe waa. Shi kɛji atsĩ wɔnaa ni wɔkafee nibii nɛɛ, ehãa wɔyeɔ wɔtsui ni wɔsheɔ gbeyei, ejaakɛ wɔleee nɔ ni baanyiɛ sɛɛ kɛba. Tɔmɔ bɛ he akɛ wɔbaanu he nakai. Shi esa akɛ wɔkwɛ jogbaŋŋ hu, ejaakɛ Yesu tsɔɔ akɛ, yiwaa baanyɛ ahã esɛɛnyiɛlɔi lɛ anane atɔ̃tɔ. (Yoh. 16:1, 2) No hewɔ lɛ, mɛni baaye abua wɔ ni wɔtsui akaye kɛ́ aawa wɔ yi?

15. Mɛni hewɔ esaaa akɛ wɔsheɔ gbeyei akɛ abaawa wɔ yi lɛ? (Yohane 15:20; 16:33)

¹⁵ Nyɔŋmɔ Wiemɔ lɛ kɛɔ wɔ akɛ: “Mɛi fɛɛ ni taoɔ akɛ amɛhi shi yɛ Nyɔŋmɔjamɔ naa yɛ Kristo Yesu mli lɛ, abaawa amɛ hu yi.” (2 Tim. 3:12) No mli lɛ, ewa kɛhã nyɛmi nuu ko ni atsɛɔ lɛ Andrei lɛ akɛ ebaahe enɛ eye be ni atsĩ wɔnitsumɔ lɛ naa yɛ amɛmaŋ lɛ mli lɛ. Andrei kɛɛ ehe akɛ: ‘Odasefoi ni yɔɔ maŋ nɛɛ mli lɛ ayi fa waa, no hewɔ lɛ, te abaafee tɛŋŋ amɔmɔ wɔ fɛɛ lɛ?’ Shi ani susumɔ nɛɛ ni Andrei ná lɛ hã etoiŋ jɔ lɛ? Dabi. Ehã gbeyei mɔ lɛ waa moŋ. Nyɛmimɛi krokomɛi ni yɔɔ nakai maŋ lɛ nɔ lɛ na akɛ, abaanyɛ amɔ amɛ, no hewɔ lɛ, amɛkɛ amɛhiɛ fɔ̃ Yehowa nɔ. Enɛ hewɔ lɛ, amɛyasheee gbeyei tamɔ bɔ ni Andrei she gbeyei lɛ. Andrei na akɛ esa akɛ ekase nyɛmimɛi nɛɛ ni ekɛ ehiɛ afɔ̃ Yehowa nɔ ni ekaná susumɔ lɛ akɛ lɛ lɛ, anyɛŋ amɔ lɛ. Be ni efee nakai lɛ, etsui nyɔ emli ni emii shɛ ehe yɛ shihilɛ ni yaa nɔ lɛ fɛɛ sɛɛ. Nakai nɔŋŋ wɔ hu wɔbaanu he kɛ́ wɔkɛ wɔhiɛ fɔ̃ Yehowa nɔ. Be ni Yesu hã wɔle akɛ abaawa wɔ yi lɛ, ehã  wɔle hu akɛ wɔbaanyɛ wɔfi shi ni wɔye anɔkwa.​—Kanemɔ Yohane 15:20; 16:33.

16. Kɛ́ aawa wɔ yi lɛ, mɛɛ gbɛtsɔɔmɔi esa akɛ wɔbo toi?

¹⁶ Kɛ́ atsĩ wɔnitsumɔ lɛ naa loo aŋmɛɛɛ wɔ gbɛ ni wɔtsu efãi komɛi lɛ, ekolɛ nitsumɔhe nine lɛ kɛ asafoŋ onukpai lɛ kɛ gbɛtsɔɔmɔi baahã wɔ. Akɛ gbɛtsɔɔmɔi ni tamɔ nɛkɛ lɛ hãa koni akɛbu wɔhe, aya nɔ atsɔɔ wɔ Yehowa he nii, ni agbɛnɛ hu, akɛye abua wɔ ni wɔtsu shiɛmɔ nitsumɔ lɛ yɛ bɔ ni shihilɛ lɛ ji lɛ naa. Kɛ́ akɛ gbɛtsɔɔmɔi ni tamɔ nɛkɛ hã ni onuuu shishi jogbaŋŋ po lɛ, bɔɔ mɔdɛŋ waa ni okɛtsu nii. (Yak. 3:17) Agbɛnɛ hu, esaaa akɛ wɔhãa mɛi leɔ wɔnyɛmimɛi lɛ loo gbɛjianɔ ni asafo lɛ eto lɛ he saji kɛji amɛbɛ hegbɛ akɛ amɛleɔ.​—Jaj. 3:7.

17. Tamɔ bɔ ni bɔfoi lɛ fee yɛ blema lɛ, mɛni wɔ hu wɔtswa wɔfai shi akɛ wɔbaafee?

¹⁷ Yehowa kɛ nitsumɔ ewo wɔ, ni ji ewebii lɛ adɛŋ akɛ, ‘wɔye Yesu he odase,’ ni enɛ ji yiŋtoo kome hewɔ ni Satan kɛ wɔ wuɔ lɛ. (Kpo. 12:17) Shi esaaa akɛ wɔhãa Satan kɛ eje lɛ woɔ wɔhe gbeyei. Kɛ́ wɔtee nɔ wɔshiɛ ni wɔtsɔɔ mɛi nii yɛ shi ni ateɔ awoɔ wɔ lɛ fɛɛ sɛɛ lɛ, wɔmii baashɛ wɔhe ni wɔbaaná toiŋjɔlɛ. Yɛ blema lɛ, be ni Sanhedrin lɛ fã bɔfoi lɛ akɛ amɛkashiɛ lɛ, hii anɔkwafoi nɛɛ bo Nyɔŋmɔ moŋ toi ni amɛtee nɔ amɛshiɛ ni no hã amɛná miishɛɛ. (Bɔf. 5:27-29, 41, 42) Shi enɛ etsɔɔɔ akɛ kɛ́ atsĩ wɔnitsumɔ lɛ naa lɛ, wɔbaanyɛ wɔya nɔ wɔshiɛ tamɔ bɔ ni wɔfeɔ bianɛ lɛ. Ehe baahia ni wɔkɛ hiɛshikamɔ atsu nii. (Mat. 10:16) Shi kɛ́ wɔtee nɔ wɔfee bɔ ni wɔbaanyɛ yɛ shihilɛ ni tamɔ nɛkɛ mli lɛ, wɔbaaná toiŋjɔlɛ, ejaakɛ wɔle akɛ wɔmiifee nɔ ni sa Yehowa hiɛ ni wɔmiiye wɔmiibua mɛi ni amɛnine ashɛ sane kpakpa ni baahã amɛná wala lɛ nɔ.

18. Namɔ baanyɛ ahã wɔná toiŋjɔlɛ diɛŋtsɛ?

¹⁸ Hemɔ oye akɛ, kɛ́ okɛ shihilɛi ni mli wawai miikpe po lɛ, obaanyɛ oná toiŋjɔlɛ. Yɛ shihilɛi ni tamɔ nakai lɛ amli lɛ, esa akɛ wɔkai akɛ Nyɔŋmɔ toiŋjɔlɛ lɛ, ni ji toiŋjɔlɛ ni Yehowa Nyɔŋmɔ pɛ kɛhãa lɛ ji toiŋjɔlɛ ni he hiaa wɔ. No hewɔ lɛ, kɛ́ tsɛŋemɔ hela loo oshãra ko ba he ni oyɔɔ lɛ loo awa wɔ yi lɛ, okɛ ohiɛ afɔ̃ Yehowa nɔ. Kaatse ohe kɛje Yehowa asafo lɛ he, okɛ ohiɛ afɔ̃ nibii kpakpai ni Yehowa baafee ehã wɔ wɔsɛɛ lɛ anɔ. Kɛ́ ofee enɛ lɛ, ‘toiŋjɔlɛ Nyɔŋmɔ lɛ kɛ bo baahi shi.’ (Fip. 4:9) Yɛ nikasemɔ ni nyiɛ sɛɛ lɛ mli lɛ, wɔbaakwɛ bɔ ni wɔbaafee wɔye wɔbua wɔnyɛmimɛi ni aawa amɛ yi lɛ koni amɛná Nyɔŋmɔ toiŋjɔlɛ lɛ.