1. Kɛ́ wɔjwɛŋ shi ni Yehowa ewo akɛ ebaahã wɔ naanɔ wala lɛ nɔ lɛ, mɛɛ gbɛ nɔ wɔnáa he sɛɛ?

 YEHOWA ewo shi akɛ, mɛi ni boɔ lɛ toi lɛ baaná “naanɔ wala.” (Rom. 6:23) Kɛ́ wɔjwɛŋ shiwoo nɛɛ nɔ lɛ, ehãa suɔmɔ ni wɔyɔɔ kɛhã Yehowa lɛ mli waa waa. Bo lɛ, susumɔ enɛ he okwɛ: Yehowa, wɔ-Tsɛ ni yɔɔ ŋwɛi lɛ sumɔɔ wɔ aahu akɛ, esumɔɔɔ ni nɔ ko gbálaa wɔ kɛ lɛ teŋ.

2. Mɛɛ gbɛ nɔ shi ni Yehowa ewo akɛ ebaahã wɔ naanɔ wala lɛ yeɔ ebuaa wɔ?

² Shi ni Nyɔŋmɔ ewo wɔ akɛ ebaahã wɔ naanɔ wala lɛ yeɔ ebuaa wɔ ni wɔnyɛɔ wɔfiɔ shi yɛ naagbai ni wɔkɛkpeɔ ŋmɛnɛ lɛ amli. Kɛ́ wɔhenyɛlɔi kɛɛ kɛ́ wɔkpaaa Yehowa sɔɔmɔ lɛ amɛbaagbe wɔ po lɛ, shiwoo nɛɛ hewɔ lɛ wɔkpaaa lɛ sɔɔmɔ. Mɛni hewɔ? Yiŋtoo kome hewɔ ji akɛ, wɔle akɛ kɛ́ wɔye Yehowa anɔkwa kɛyashi wɔgbo lɛ, ebaatee wɔ shi, ni kɛ́ wɔtee nɔ wɔye lɛ anɔkwa lɛ, wɔgboŋ dɔŋŋ. (Yoh. 5:28, 29; 1 Kor. 15:55-58; Heb. 2:15) Mɛni hewɔ wɔbaanyɛ wɔhe wɔye akɛ wɔbaanyɛ wɔhi shi kɛya naanɔ? Nyɛhãa wɔsusua yiŋtoi ni nyiɛ sɛɛ nɛɛ ahe wɔkwɛa.

3. Mɛni hewɔ wɔbaanyɛ wɔhe wɔye akɛ Yehowa baanyɛ ehã wɔhi shi kɛya naanɔ lɛ? (Lala 102:12, 24, 27)

³ Nɔ hewɔ ni wɔheɔ wɔyeɔ akɛ Yehowa baanyɛ ehã wɔhi shi kɛya naanɔ lɛ ji, lɛ eŋɔɔ wala jɛɔ, ni ehiɔ shi kɛyaa naanɔ. (Lala 36:9) Naa ŋmalɛi fioo komɛi ni tsɔɔ akɛ Yehowa ehi shi  daa ni ebaaya nɔ ehi shi daa. Lala 90:2 lɛ kɛɔ akɛ, Yehowa ji Nyɔŋmɔ “kɛjɛ naanɔ kɛmiiya naanɔ.” Lala 102 lɛ hu wieɔ nɔ ko ni tamɔ nakai nɔŋŋ. (Kanemɔ Lala 102:12, 24, 27.) Agbɛnɛ hu, gbalɔ Habakuk ŋma yɛ wɔ-Tsɛ ni yɔɔ ŋwɛi lɛ he akɛ: “Ao, Yehowa, ani obɛ kɛjɛ naanɔ? Ao, mi-Nyɔŋmɔ, mi-Mɔ Krɔŋkrɔŋ, ogbooo.”​—Hab. 1:12.

4. Kɛ́ ewa kɛhã wɔ akɛ wɔbaanu shishi akɛ Yehowa ehi shi daa lɛ, ani esa akɛ no agba wɔnaa? Tsɔɔmɔ mli.

⁴ Ani ewa kɛhã bo akɛ obaahe oye akɛ Yehowa hiɔ shi kɛyaa “naanɔi anaanɔ”? (Yes. 40:28) Kɛ́ nakai lɛ, jeee okome. Elihu wie yɛ Nyɔŋmɔ he akɛ: “Wɔjwɛŋmɔ nyɛŋ ashɛ efii lɛ falɛ lɛ he.” (Hiob 36:26) Shi kɛ́ wɔjwɛŋmɔ shɛɛɛ nɔ ko he lɛ, no etsɔɔɔ akɛ ebɛ mli loo ejeee anɔkwale. Akɛ nɔkwɛmɔnɔ lɛ, kɛ́ wɔjwɛŋmɔ shɛɛɛ bɔ ni feɔ ni srawa hewalɛ hãa kane suɔ lɛ he lɛ, ani no tsɔɔ akɛ jeee srawa hewalɛ ni hãa kane suɔ? Dabi kwraa! Nakai nɔŋŋ wɔ akɛ adesai lɛ, ekolɛ ebaawa kɛhã wɔ akɛ wɔbaanu shishi akɛ Yehowa ehi shi daa ni ebaaya nɔ ehi shi. Shi kɛ́ wɔnuuu enɛ shishi po lɛ, no etsɔɔɔ akɛ ejeee anɔkwale. (Rom. 11:33-36) Yehowa yɛ dani nibii ni yɔɔ ŋwɛi, tamɔ hulu lɛ kɛ ŋulamii lɛ ba shihilɛ mli. Biblia lɛ kɛɛ, Yehowa ji “mɔ ni kɛ ehewalɛ fee shikpɔŋ lɛ.” Eyɛ kwraa dani ebɔ nibii ni yɔɔ ŋwɛi lɛ. (Yer. 51:15; Bɔf. 17:24) Mɛɛ yiŋtoo kroko hewɔ wɔbaanyɛ wɔhe wɔye akɛ wɔbaanyɛ wɔhi shi kɛya naanɔ?

5. Mɛɛ gbɛ nɔ esoro bɔ ni Yehowa bɔ Adam kɛ Hawa yɛ nibii krokomɛi ni yɔɔ wala mli lɛ ahe?

⁵ Nibii fɛɛ ni yɔɔ wala mli ni Yehowa bɔ lɛ, ebɔɔɔ amɛ ni amɛhi shi kɛya naanɔ. Shi esoro bɔ ni ebɔ adesai ehã kwraa. Ebɔ wɔ ni kulɛ wɔhi shi ni wɔgbooo. Shi Yehowa bɔ Adam kɔkɔ akɛ: “Ekpakpa kɛ efɔŋ lee tso lɛ, kaaye enɔ yibii lɛ eko, ejaakɛ gbi nɔ ni obaaye eko lɛ, bɔ fɛɛ bɔ ni fee lɛ, obaagbo.” (1 Mo. 2:17) Eji Adam kɛ Hawa bo Yehowa toi kulɛ, amɛgboŋ. Ŋwanejee ko bɛ he akɛ, kulɛ kɛ́ eshɛ he ko lɛ, Yehowa baaŋmɛ amɛ gbɛ ni amɛye “wala tso lɛ” nɔ yibii lɛ eko, ni kulɛ enɛ baahã ‘amɛhi shi kɛya naanɔ.’ b​—1 Mo. 3:22.

6-7. (a) Mɛni ekoŋŋ tsɔɔ akɛ Yehowa ebɔɔɔ wɔ ni wɔgboi? (b) Mɛni obaasumɔ ni ofee yɛ jeŋ hee lɛ mli? (Kwɛmɔ mfoniri lɛ.)

⁶ Jeŋ shikpalɔi komɛi ena akɛ, kɛ́ adesai baanyɛ ahi shi afii babaoo fe afii abɔ ni wɔhiɔ shi ŋmɛnɛ lɛ, wɔjwɛŋmɔ lɛ yɛ nyɛmɔ ni ebaanyɛ eya nɔ ekɛbua saji anaa eto.  Yɛ afi 2010 lɛ, wolo ko ni atsɛɔ lɛ Scientific American Mind lɛ wie akɛ: “Wɔjwɛŋmɔ lɛ yɛ nyɛmɔ lɛ ni abaanyɛ akɛkase nibii babaoo ni kɛ́ akɛɛ aajie nibii ni yɔɔ mli lɛ yɛ TV nɔ lɛ, ebaahe ŋmɛlɛtswai 3,000,000.” Ni tsɔɔ akɛ, adesai ajwɛŋmɔ lɛ baanyɛ atsu nii afii 300 kɛ sɛɛ po. Anɔkwa, jwɛŋmɔ lɛ baanyɛ atsu nii afii babaoo fe nakai po. Shi nɔ ni amɛwie nɛɛ hãa wɔnaa akɛ, bɔ ni Yehowa bɔ wɔjwɛŋmɔ lɛ hewɔ lɛ, eyɛ nyɛmɔ lɛ ni kulɛ abaanyɛ akɛkase nii afii babaoo fe afii 70 loo 80.​—Lala 90:10.

⁷ Agbɛnɛ hu, Yehowa bɔ wɔ bɔ ni baahã wɔshwe akɛ wɔhi shi daa. Biblia lɛ kɛɛ Nyɔŋmɔ kɛ ‘naanɔ ewo adesai atsui mli.’ (Jaj. 3:11) Enɛ ji yiŋtoo kome hewɔ ni wɔsumɔɔɔ gbele ni wɔnaa lɛ akɛ wɔhenyɛlɔ lɛ. (1 Kor. 15:26) Akɛ nɔkwɛmɔnɔ lɛ, wɔteŋ namɔ ni kɛ́ hela mɔ lɛ waa lɛ, ebaata shi ni ekwɛ ni egbo ni efeee he nɔ ko? Mɔ ko mɔ ko efeŋ nakai. Bei pii lɛ, nɔ ni wɔfeɔ moŋ ji, wɔyaa helatsamɔhe loo wɔtaoɔ tsofa ko wɔnuɔ koni wɔná hewalɛ. Anɔkwa, wɔfeɔ bɔ fɛɛ bɔ ni wɔbaanyɛ koni wɔkagboi. Ni te wɔnuɔ he wɔhãa tɛŋŋ kɛji mɔ ko ni wɔsumɔɔ esane waa lɛ gbo? Kɛ́ mɔ lɛ eda jio, edako jio, egbele lɛ dɔɔ wɔ kɛboteɔ wɔtsui mli tɔ̃ɔ. (Yoh. 11:32, 33) Ekã shi faŋŋ akɛ, eji wɔ-Nyɔŋmɔ ni yɔɔ suɔmɔ lɛ sumɔɔɔ ni wɔhiɔ shi kɛyaa naanɔ kulɛ, ehãŋ wɔ jwɛŋmɔ ni baanyɛ amɔ nii afii babaoo, ni ehãŋ wɔshwe hu akɛ wɔhi shi daa. Enɛɛmɛi fɛɛ hãa wɔnaa akɛ, Yehowa baanyɛ ehã wɔhi shi kɛya naanɔ. Shi yiŋtoi krokomɛi hu yɛ ni hãa wɔnaa akɛ wɔbaanyɛ wɔhi shi kɛya naanɔ. Nyɛhãa wɔsusua nibii komɛi ni Yehowa fee yɛ blema kɛ nibii ni eefee ŋmɛnɛ ni tsɔɔ akɛ etsakeko eyiŋtoo akɛ eesumɔ ni adesai ahi shi kɛya naanɔ lɛ.

8. Mɛni Yesaia 55:11 lɛ tsɔɔ wɔ yɛ yiŋtoo ni Yehowa yɔɔ kɛhã adesai lɛ he?

⁸ Eyɛ mli akɛ esha ni Adam kɛ Hawa fee lɛ hewɔ lɛ amɛ kɛ amɛbii lɛ fɛɛ gboiɔ moŋ, shi Yehowa yiŋtoo kɛhã adesai lɛ tsakeko. (Kanemɔ Yesaia 55:11.) Yehowa miisumɔ lolo ni adesai ni yeɔ lɛ anɔkwa lɛ ahi shi kɛya naanɔ. Nibii ni Yehowa ewie kɛ nibii ni efee koni nakai yiŋtoo lɛ aba mli lɛ hãa wɔnaa nakai.

9. Mɛni Yehowa ewo shi akɛ ebaafee? (Daniel 12:2, 13)

⁹ Yehowa ewo shi akɛ ebaatee mɛi ni egboi lɛ ashi, ni kɛ́ amɛfee nɔ ni esumɔɔ lɛ, ebaahã amɛhi shi kɛya naanɔ. (Bɔf. 24:15; Tito 1:1, 2) Nuu anɔkwafo Hiob le akɛ, Yehowa miishwe ni etee mɛi ni egboi lɛ ashi. (Hiob 14:14, 15) Gbalɔ Daniel hu le akɛ, Yehowa baatee mɛi ni egboi lɛ ashi ni kɛ́ amɛfee esuɔmɔnaa nii lɛ, amɛbaahi shi kɛya naanɔ. (Lala 37:29; kanemɔ Daniel 12:2, 13.) Yudafoi ni hi shi yɛ Yesu beiaŋ lɛ hu le akɛ, Yehowa baadro enɔkwa tsuji lɛ “naanɔ wala.” (Luka 10:25; 18:18) Yesu wie shiwoo nɛɛ he shii abɔ, ni lɛ diɛŋtsɛ po lɛ, e-Tsɛ lɛ tee lɛ shi.​—Mat. 19:29; 22:31, 32; Luka 18:30; Yoh. 11:25.

10. Mɛni mɛi ni atee amɛ shi yɛ blema lɛ hãa wɔnaa yɛ gbohiiashitee lɛ he? (Kwɛmɔ mfoniri lɛ.)

¹⁰ Yehowa ni hãa wɔ wala, ni eyɛ hewalɛ ni ebaanyɛ ehã mɛi ni egboi lɛ aba wala mli ekoŋŋ. Akɛ nɔkwɛmɔnɔ lɛ, ehã gbalɔ Elia hewalɛ ni ekɛtee Zarefat yoo okulafo lɛ binuu lɛ shi. (1 Maŋ. 17:21-23) Sɛɛ mli lɛ, Yehowa hã gbalɔ Elisha hu hewalɛ ni enyɛ etee Shunam yoo lɛ binuu lɛ shi. (2 Maŋ. 4:18-20, 34-37) Mɛi nɛɛ kɛ mɛi krokomɛi ni Yehowa hã atee amɛ shi lɛ tsɔɔ akɛ, eyɛ hewalɛ ni ebaanyɛ ekɛtee mɛi ni egboi lɛ ashi. Be ni Yesu yɔɔ shikpɔŋ lɛ nɔ lɛ, etee gbohii ashi ni ekɛ no tsɔɔ akɛ e-Tsɛ lɛ ehã lɛ hewalɛ ni ekɛtee gbohii ashi. (Yoh. 11:23-25, 43, 44) Bianɛ lɛ, Yesu yɛ ŋwɛi ni akɛ ‘hegbɛ fɛɛ ehã lɛ yɛ ŋwɛi kɛ shikpɔŋ lɛ nɔ.’ Enɛ hewɔ lɛ, ebaanyɛ eye shi ni ewo akɛ ebaatee “mɛi fɛɛ ni yɔɔ gbohii abui lɛ amli” lɛ ashi lɛ nɔ, ni kɛ́ amɛfee Yehowa suɔmɔnaa nii lɛ, amɛbaahi shi kɛya naanɔ.​—Mat. 28:18; Yoh. 5:25-29.

11. Mɛɛ hegbɛ kpɔmɔnɔ lɛ hãa wɔnáa? Ni mɛni hewɔ?

¹¹ Nɔ kroko ni tsɔɔ akɛ Yehowa miisumɔ ni wɔhi shi kɛya naanɔ ji, e-Bi lɛ ni eŋmɛ gbɛ ni agbe lɛ musuŋshãa naa lɛ. Yesu tsɔɔ nɔ hewɔ ni Yehowa ŋmɛ gbɛ ni agbe lɛ lɛ. Ewie akɛ: “Nyɔŋmɔ sumɔɔ je lɛ aahu akɛ ekɛ e-Bi koome lɛ hã, koni mɔ fɛɛ mɔ ni heɔ enɔ eyeɔ lɛ hiɛ akakpãtã shi moŋ ená naanɔ wala.” (Yoh. 3:16) Akɛni Nyɔŋmɔ kɛ e-Bi lɛ lɛ hã koni ekɛkpɔ̃ wɔ kɛjɛ wɔhe eshai lɛ amli hewɔ lɛ, ehã wɔná hegbɛ lɛ akɛ wɔbaahi shi kɛya naanɔ. (Mat. 20:28) Bɔfo Paulo tsɔɔ nɔ hewɔ ni kpɔmɔnɔ lɛ he miihia waa koni Yehowa yiŋtoo lɛ aba mli lɛ mli. Ewie akɛ: “Akɛni gbele tsɔ gbɔmɔ nɔ kɛba hewɔ lɛ, gbohiiashitee hu baatsɔ gbɔmɔ nɔ kɛba. Ejaakɛ bɔ ni Adam mli ni mɛi fɛɛ gboiɔ yɛ lɛ, nakai nɔŋŋ hu Kristo lɛ mli abaahã mɛi fɛɛ ahiɛ akãmɔ yɛ.”​—1 Kor. 15:21, 22.

12. Mɛɛ gbɛ nɔ Nyɔŋmɔ baahã eyiŋtoo kɛhã adesai lɛ aba mli?

¹² Yesu kɛɛ esɛɛnyiɛlɔi lɛ ni amɛsɔle ni Nyɔŋmɔ Maŋtsɛyeli lɛ aba koni afee Nyɔŋmɔ suɔmɔnaa nii yɛ shikpɔŋ lɛ nɔ. (Mat. 6:9, 10) Nyɔŋmɔ yiŋtoo ji, adesai ahi shikpɔŋ lɛ nɔ kɛya naanɔ. Bɔ ni afee ni enɛ aba mli lɛ, Nyɔŋmɔ ewó Yesu Nyɔŋmɔ Maŋtsɛyeli lɛ nɔ Maŋtsɛ, ni eebua mɛi 144,000 anaa kɛmiijɛ shikpɔŋ lɛ nɔ koni amɛfata Yesu he kɛtsu eyiŋtoo lɛ he nii.​—Kpo. 5:9, 10.

13. Mɛni Yehowa feɔ bianɛ? Ni mɛni esa akɛ wɔfee?

¹³ Bianɛ lɛ, Yehowa miibua “asafoku babaoo” ko naa ni eetsɔɔ amɛ nii koni  amɛbatsɔmɔ e-Maŋtsɛyeli lɛ shishi bii. (Kpo. 7:9, 10; Yak. 2:8) Eyɛ mli akɛ ŋmɛnɛ lɛ nyɛɛ kɛ ta egbála mɛi amli moŋ, shi asafoku babaoo lɛ mli bii lɛ bɔɔ mɔdɛŋ amɛfeɔ nibii ni baahã toiŋjɔlɛ ahi amɛ kɛ mɛi fɛɛ ateŋ. Amɛkɛ amɛnifeemɔi tsɔɔ akɛ, amɛmiitswia amɛtawuu klantei kɛmiifee tsina kɔii anaa dadei. (Mika 4:3) No hewɔ lɛ, yɛ nɔ najiaŋ ni amɛkɛ amɛhe baawo ta mli ni amɛgbe mɛi babaoo lɛ, amɛmiitsɔɔ mɛi anɔkwa Nyɔŋmɔ lɛ kɛ eyiŋtoo lɛ he nii koni mɛi lɛ amɔ “wala diɛŋtsɛ” lɛ mli. (1 Tim. 6:19) Nyɔŋmɔ Maŋtsɛyeli lɛ sɛɛ ni amɛfiɔ hewɔ lɛ, bei komɛi lɛ, amɛwekumɛi teɔ shi amɛwoɔ amɛ ni amɛhe fiɔ amɛ hu yɛ shika gbɛfaŋ. Shi Yehowa yeɔ ebuaa amɛ ni amɛnáa nibii ni he hiaa amɛ lɛ. (Mat. 6:25, 30-33; Luka 18:29, 30) Enɛɛmɛi hãa wɔnaa akɛ, Nyɔŋmɔ Maŋtsɛyeli lɛ miiye nɔ ni ebaahã Yehowa yiŋtoo aba mli.

14-15. Mɛɛ gbɛ nɔ shi ni Yehowa ewo akɛ ebaajie gbele kɛya naanɔ lɛ baaba mli?

¹⁴ Amrɔ nɛɛ, awó Yesu Nyɔŋmɔ Maŋtsɛyeli lɛ nɔ Maŋtsɛ yɛ ŋwɛi, ni ebaakwɛ ni Yehowa shiwoi fɛɛ aba mli. (2 Kor. 1:20) Kɛjɛ afi 1914 kɛbaa nɛɛ lɛ, Yesu miiye nɔ yɛ ehenyɛlɔi ateŋ. (Lala 110:1, 2) Etsɛŋ, Yesu kɛ mɛi 144,000 ni fata ehe lɛ baagbe amɛkunimyeli lɛ naa, ni amɛbaakpãtã mɛi fɔji lɛ fɛɛ ahiɛ.​—Kpo. 6:2.

 ¹⁵ Yɛ Afii Akpe Nɔyeli lɛ mli lɛ, Yesu baatee mɛi fɛɛ ni egboi lɛ shi, ni ebaaye ebua adesai ni boɔ Yehowa toi lɛ ni amɛye emuu. Mɛi ni Yehowa baabu amɛ jalɔi ni amɛbaafo naagbee kaa lɛ, “shikpɔŋ lɛ baatsɔ amɛnɔ, ni amɛbaahi nɔ kɛya naanɔ.” (Lala 37:10, 11, 29) Nɔ ni fe fɛɛ lɛ, abaafo gbele, ni ji “naagbee henyɛlɔ” lɛ sɛɛ.​—1 Kor. 15:26.

16. Mɛni ji nɔ titri ni esa akɛ etsirɛ wɔ ni wɔsɔmɔ Yehowa?

¹⁶ Wɔna yɛ nikasemɔ nɛɛ mli akɛ, hiɛnɔkamɔ ni wɔyɔɔ akɛ wɔbaahi shi kɛya naanɔ lɛ jɛ Nyɔŋmɔ Wiemɔ, ni ji Biblia lɛ mli. Hiɛnɔkamɔ nɛɛ baaye abua wɔ ni wɔye Yehowa anɔkwa yɛ naagbee gbii ni mli shihilɛ wa nɛɛ amli. Shi jeee le ni wɔle akɛ wɔbaanyɛ wɔhi shi kɛya naanɔ lɛ ji nɔ titri ni esa akɛ etsirɛ wɔ ni wɔfee nɔ ni sa Yehowa hiɛ. Nɔ titri ni esa akɛ etsirɛ wɔ ni wɔye Yehowa kɛ Yesu anɔkwa ji, ni wɔbaasumɔ amɛ waa. (2 Kor. 5:14, 15) Suɔmɔ nɛɛ baatsirɛ wɔ ni wɔkase amɛ ni wɔgba mɛi wɔhiɛnɔkamɔ lɛ he sane. (Rom. 10:13-15) Kɛ́ wɔmiitao wɔtsɔmɔ Yehowa nanemɛi kɛya naanɔ lɛ, esaaa akɛ wɔsusuɔ wɔ pɛ wɔhe, shi esa akɛ wɔsusu mɛi krokomɛi hu ahe.​—Heb. 13:16.

17. Kɛ́ wɔmiitao wɔná naanɔ wala lɛ, mɛni esa akɛ wɔfee? (Mateo 7:13, 14)

¹⁷ Ani wɔbaafata mɛi ni baaná naanɔ wala lɛ ahe? Yehowa efee nɔ ni baahã wɔná naanɔ wala. Bianɛ lɛ, eshwɛ wɔ ni wɔbaanyiɛ gbɛ ni kɛ mɔ yaa naanɔ wala mli lɛ nɔ. (Kanemɔ Mateo 7:13, 14.) Shi te shihilɛ baafee tɛŋŋ kɛ́ wɔmiihi shi kɛmiiya naanɔ? Abaahã sanebimɔ nɛɛ hetoo yɛ nikasemɔ ni nyiɛ sɛɛ lɛ mli.