Ani okane Buu-Mɔɔ srɔtoi ni ba afi nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Mɛni kɛ́ wɔfee lɛ, no baatsɔɔ akɛ wɔmiitsake wɔjwɛŋmɔ? (Rom. 12:2)

Kɛ́ wɔfee nibii kpakpai fioo ko lɛ, no etsɔɔɔ akɛ wɔtsake wɔjwɛŋmɔ. Moŋ lɛ, esa akɛ wɔpɛi wɔmli jogbaŋŋ wɔkwɛ akɛ wɔmiihi shi yɛ Yehowa mlai lɛ anaa lo koni wɔfee tsakemɔi ni sa lɛ.—w23.01, bf. 8-9.

Mɛni baaye abua wɔ ni wɔkɛ wɔjwɛŋmɔ atsu nii jogbaŋŋ be ni wɔkwɛɔ nibii ni yaa nɔ yɛ je lɛ mli lɛ?

Wɔmiisumɔ ni wɔle bɔ ni nibii ni yaa nɔ yɛ je lɛ mli ŋmɛnɛ lɛ hãa Biblia mli gbalɛi baa mli. Shi esa akɛ wɔkwɛ jogbaŋŋ ni wɔkaka wɔyiŋ wɔwie nɔ ko ni asafo lɛ ewieko, ejaakɛ no baanyɛ ekɛ mligbalamɔ aba. Esa akɛ wɔhã saji ni wɔkɛ mɛi gbaa lɛ adamɔ nibii ni asafo lɛ ehã wɔle lɛ anɔ. (1 Kor. 1:10)—w23.02, bf. 16.

Mɛɛ gbɛ nɔ esoro Yesu baptisimɔ lɛ yɛ esɛɛnyiɛlɔi lɛ anɔ lɛ he?

Ehe ebahiaaa ni Yesu ajɔɔ ehe nɔ ehã Yehowa, ejaakɛ maŋ ni afɔ lɛ yɛ mli lɛ, amɛjɔɔ amɛhe nɔ amɛhã Yehowa momo. Agbɛnɛ hu, ehe ebahiaaa ni etsake etsui, ejaakɛ eye emuu, ni efeee esha.—w23.03, bf. 5.

Mɛni wɔbaanyɛ wɔfee kɛwo mɛi krokomɛi hewalɛ ni amɛhã saji ahetoo?

Esa akɛ wɔwiemɔ lɛ afee kuku koni mɛi krokomɛi hu aná hegbɛ amɛwie. Agbɛnɛ hu, kɛ́ otii pii yɛ kuku lɛ mli lɛ, esaaa akɛ wɔwieɔ fɛɛ. No baahã mɛi krokomɛi aná eko amɛwie.—w23.04, bf. 23.

Mɛni ji “Krɔŋkrɔŋfeemɔ Gbɛ” ni awie he yɛ Yesaia 35:8 lɛ?

No ji mfonirifeemɔŋ gbɛjegbɛ ni agbá kɛjɛ Babilon kɛtee Israel be ni Israelbii lɛ kuɔ amɛsɛɛ kɛjɛɔ nomŋɔɔ mli lɛ. Ni ŋmɛnɛ hu? Nyɔŋmɔ webii, ni ji mɛi ni yɔɔ mfonirifeemɔŋ paradeiso lɛ mli lɛ, nyiɛ “Krɔŋkrɔŋfeemɔ Gbɛ” lɛ nɔ, ni ebaahã amɛná jɔɔmɔi pii wɔsɛɛ yɛ Nyɔŋmɔ Maŋtsɛyeli lɛ mli. Afii pii dani afi 1919 baashɛ lɛ, atsɔɔ Biblia lɛ shishi, akala, ni afee nibii krokomɛi kɛsaa gbɛ lɛ.—w23.05, bf. 15-19.

Be ni Abɛi yitso 9 lɛ woɔ wɔ ŋaa lɛ, mɛɛ yei enyɔ ahe ewie?

Abɛi awolo lɛ wieɔ “yoo kwashia” ko kɛ yoo ko ni damɔ shi kɛhã “anɔkwa hiɛshikamɔ” lɛ he. Yei enyɔ nɛɛ fɛɛ miibo amɛmiitsɛ mɛi. Mɛi ni yaa “yoo kwashia” lɛ ŋɔɔ lɛ yagbeɔ naa yɛ “Gbonyobu lɛ mli,” ni mɛi ni yaa “anɔkwa hiɛshikamɔ” ŋɔɔ lɛ ‘nyiɛɔ niiashishinumɔ gbɛ lɛ nɔ,’ ni amɛbaaná wala. (Abɛi 9:​1, 6, 13, 18)—w23.06, bf. 22-24.

Mɛni Yehowa fee yɛ ekɛ Lot sane lɛ mli ni hãa wɔnaa akɛ Yehowa baa ehe shi ni enuɔ he ehãa mɛi?

Yehowa kɛɛ Lot akɛ ejo foi kɛshi Sodom kɛya gɔji lɛ anɔ. Shi Lot kpa Yehowa fai ni eŋmɛ lɛ gbɛ ni eyaba abo yɛ Zoar moŋ. Nyɔŋmɔ ŋmɛ Lot gbɛ ni etee Zoar, tamɔ bɔ ni ebi lɛ.—w23.07, bf. 21.

Kɛ́ yoo ko wu kwɛɔ ponografi lɛ, mɛni yoo lɛ baanyɛ efee?

Esa akɛ yoo lɛ ahã ehi ejwɛŋmɔ mli akɛ, jeee lɛ ejɛ. Ekɛ ejwɛŋmɔ ama wekukpaa ni yɔɔ ekɛ Yehowa teŋ lɛ nɔ, ni ekane yei ni awie amɛhe yɛ Biblia lɛ mli ni shihilɛ ni amɛyaje mli lɛ hã amɛhao waa shi Yehowa shɛje amɛmii lɛ ahe sane ni ejwɛŋ nɔ. Ebaanyɛ eye ebua ewu lɛ ni ekpɛ eyiŋ yɛ nɔ ni ebaafee kɛ́ ekɛ shihilɛi ni baanyɛ ahã ekwɛ ponografi lɛ kpe lɛ ahe.—w23.08, bf. 14-17.

Kɛ́ mɔ ko bi wɔ wɔhemɔkɛyeli lɛ he sane lɛ, mɛɛ gbɛ nɔ sɛɛyoomɔ baaye abua wɔ ni wɔkɛ lɛ awie yɛ naajɔlɛ mli?

Kɛ́ wɔna sane ni mɔ lɛ ebi lɛ akɛ nɔ ko ni baaye abua wɔ ni wɔle nɔ ni esusuɔ, moŋ fe nɔ ko ni eetao ekɛtee naataamɔ shi lɛ, no baaye abua wɔ ni wɔkɛ lɛ awie yɛ naajɔlɛ mli.—w23.09, bf. 17.

Mɛni Maria fee ni waje lɛ, ni mɛɛ gbɛ nɔ wɔbaanyɛ wɔkase lɛ?

Be ni akɛɛ Maria akɛ lɛ ebaafɔ Mesia lɛ, Maria hã mɛi krokomɛi ye amɛbua lɛ ni amɛwaje lɛ. Gabriel kɛ Elizabet jɛ Ŋmalɛ lɛ mli amɛwo lɛ hewalɛ waa. Wɔ hu wɔbaanyɛ wɔhã wɔnyɛmimɛi Kristofoi lɛ aye abua wɔ ni amɛwaje wɔ.—w23.10, bf. 15.

Mɛɛ gbɛ nɔ Yehowa hãa sɔlemɔi ahetoo?

Ewo shi akɛ, kɛ́ wɔsɔle lɛ, ebaabo toi ni ekwɛ bɔ ni nɔ ni wɔbiɔ lɛ lɛ kɔɔ eyiŋtoo lɛ he. (Yer. 29:12) Kɛ́ mɛi enyɔ sɔle amɛbi nɔ kome too lɛ nɔŋŋ po lɛ, ebaanyɛ esoro mɔ kome hetoo yɛ mɔ kroko lɛ nɔ lɛ he, shi fɛɛ mli lɛ, Yehowa baaye ebua wɔ be fɛɛ be.—w23.11, bf. 21-22.

Romabii 5:2 lɛ tsĩɔ “hiɛnɔkamɔ” tã, no hewɔ lɛ, mɛni hewɔ awie hiɛnɔkamɔ he ekoŋŋ yɛ kuku 4 lɛ mli?

Kɛ́ ashiɛ ahã mɔ ko lɛ, ebanáa hiɛnɔkamɔ akɛ ebaahi shi kɛya naanɔ yɛ Paradeiso mli yɛ shikpɔŋ lɛ nɔ. Shi kɛ́ ekɛ amanehului srɔtoi kpe ni efi shi yɛ mli, ni ena akɛ Nyɔŋmɔ yɛ ehe miishɛɛ lɛ, ehiɛnɔkamɔ lɛ mli waa.—w23.12, bf. 12-13.