1. Kɛ́ wɔsusu Abraham hemɔkɛyeli lɛ he lɛ, mɛni ekolɛ wɔbaabi wɔhe?

 MƐI pii enu Abraham he sane pɛŋ, shi amɛleee lɛ jogbaŋŋ. Shi bo lɛ, ole lɛ jogbaŋŋ. Akɛ nɔkwɛmɔnɔ lɛ, ole akɛ Biblia lɛ tsɛɔ lɛ ‘mɛi fɛɛ ni heɔ amɛyeɔ lɛ atsɛ.’ (Rom. 4:11) Shi ekolɛ obaabi ohe akɛ, ‘Ani manyɛ manyiɛ Abraham nanemaahei lɛ asɛɛ ni maná hemɔkɛyeli ni mli wa tamɔ lɛ?’ Hɛɛ, obaanyɛ.

2. Mɛni hewɔ esa akɛ wɔkase Abraham he sane? (Yakobo 2:​22, 23)

² Nɔ kome ni baaye abua wɔ ni wɔná hemɔkɛyeli tamɔ Abraham ji, ni wɔbaakase ehe sane. Abraham fee nɔ fɛɛ nɔ ni Nyɔŋmɔ kɛɛ lɛ akɛ efee lɛ. Akɛ nɔkwɛmɔnɔ lɛ, efã kɛjɛ emaŋ ni eyahi he ko shɔŋŋ, ehi mama tsũi amli afii pii, ni be ni Nyɔŋmɔ kɛɛ ekɛ ebi Isak ni esumɔɔ lɛ waa lɛ ashã afɔle lɛ, ekɛɛɛ dabi. Nibii nɛɛ ni Abraham fee lɛ tsɔɔ akɛ, eheɔ Nyɔŋmɔ nɔ eyeɔ waa. Abraham hemɔkɛyeli lɛ kɛ enitsumɔi lɛ hewɔ lɛ, Nyɔŋmɔ ná ehe miishɛɛ ni ebatsɔ enaanyo. (Kanemɔ Yakobo 2:​22, 23.) Yehowa miisumɔ ni ená wɔ fɛɛ, ni bo hu ofata he lɛ, he miishɛɛ ni wɔtsɔmɔ enanemɛi. Enɛ hewɔ lɛ, ekɛ emumɔ lɛ tsirɛ Paulo kɛ Yakobo ni amɛwie nɔ ni Abraham fee lɛ he. Amrɔ nɛɛ, wɔbaasusu nɔ ni Paulo wie yɛ Abraham he yɛ Romabii yitso 4 lɛ kɛ nɔ ni Yakobo wie yɛ ehe yɛ Yakobo yitso 2 lɛ he wɔkwɛ. Amɛ fɛɛ amɛwie nɔ ko ni sa kadimɔ waa yɛ Abraham he.

3. Mɛɛ ŋmalɛ Paulo kɛ Yakobo fɛɛ tsɛ yisɛɛ?

³ Paulo kɛ Yakobo fɛɛ tsɛ 1 Mose 15:6 lɛ yisɛɛ. Jɛmɛ kɛɔ akɛ: “[Abraham he] Yehowa nɔ eye, ni ebu no jalɛ ehã lɛ.” Kɛ́ akɛɛ Yehowa naa mɔ ko akɛ jalɔ lɛ, etsɔɔ akɛ eyɛ mɔ lɛ he miishɛɛ  ni enaa lɛ akɛ tɔmɔ ko bɛ ehe. Eyɛ naakpɛɛ waa akɛ Yehowa baabu adesa ko ni yeee emuu ni eji eshafeelɔ lɛ akɛ mɔ ko ni tɔmɔ ko bɛ ehe. Ŋwanejee ko bɛ he akɛ, bo hu oosumɔ ni Nyɔŋmɔ abu bo akɛ jalɔ loo mɔ ko ni tɔmɔ ko bɛ ehe, ni ebaanyɛ ebu bo nakai! Hã wɔkwɛ nɔ hewɔ ni ebu Abraham jalɔ lɛ ni no baaye abua bo ni ona nɔ ni kɛ́ ofee lɛ, bo hu ebaabu bo jalɔ.

4. Mɛni hewɔ anyɛŋ atsɛ adesa ko akɛ jalɔ lɛ?

⁴ Yɛ Romabii awolo lɛ mli lɛ, Paulo wie akɛ gbɔmɛi fɛɛ efee esha. (Rom. 3:23) No hewɔ lɛ, te tɛŋŋ ni Nyɔŋmɔ buɔ mɔ ko akɛ jalɔ loo mɔ ko ni tɔmɔ bɛ ehe ni enáa ehe miishɛɛ lɛ? Paulo tsɔ Abraham sane lɛ nɔ eye ebua Kristofoi fɛɛ koni amɛná sanebimɔ nɛɛ hetoo.

5. Mɛni nɔ Yehowa damɔ ebu Abraham jalɔ? (Romabii 4:​2-4)

⁵ Yehowa bu Abraham jalɔ be ni eyɔɔ Kanaan shikpɔŋ lɛ nɔ. Mɛni hewɔ Yehowa bu lɛ jalɔ? Ani no mli lɛ, Abraham yeɔ Mose Mla lɛ nɔ jogbaŋŋ hewɔ? Dabi kwraa. (Rom. 4:13) Be ni Nyɔŋmɔ bu Abraham jalɔ lɛ sɛɛ nɔ ni fe afii 400 dani ekɛ Mla lɛ hã Israelbii lɛ. No hewɔ lɛ, mɛni nɔ edamɔ ebu Abraham jalɔ lɛ mɔ? Yehowa dromɔ ni fa babaoo lɛ hewɔ lɛ, ebu Abraham jalɔ yɛ ehemɔkɛyeli lɛ hewɔ.—Kanemɔ Romabii 4:​2-4.

6. Mɛni nɔ Yehowa damɔɔ ebuɔ eshafeelɔ ko jalɔ?

⁶ Paulo wie hu akɛ kɛ́ mɔ ko he Nyɔŋmɔ nɔ eye lɛ, “abuɔ ehemɔkɛyeli lɛ akɛ jalɛ ahãa lɛ.” (Rom. 4:5) Ekɛfata he akɛ: “Nakai nɔŋŋ David hu wie miishɛɛ ni gbɔmɔ náa kɛ́ Nyɔŋmɔ shi nitsumɔi asɛɛ ebu jalɛ ehã lɛ lɛ he akɛ: ‘Mɛi ni akɛ amɛnifeemɔi ni mla eŋmɛɛɛ gbɛ lɛ eke amɛ, ni atsĩmɔ amɛhe eshai anɔ lɛ yɛ miishɛɛ; gbɔmɔ ni Yehowa ebuuu ehe esha lɛ he akɔntaa lɛ yɛ miishɛɛ.’” (Rom. 4:​6-8; Lala 32:​1, 2) Nyɔŋmɔ kɛ mɛi ni heɔ enɔ amɛyeɔ lɛ ahe eshai keɔ amɛ loo etsĩmɔɔ nɔ. Ekɛkeɔ amɛ kwraa, ni ebuuu he akɔntaa dɔŋŋ. Ebuɔ mɛi ni tamɔ nakai lɛ akɛ jalɔi loo mɛi ni tɔmɔ ko bɛ amɛhe yɛ amɛhemɔkɛyeli lɛ hewɔ.

7. Mɛni hewɔ abu Nyɔŋmɔ tsuji anɔkwafoi ni hi shi yɛ blema lɛ akɛ jalɔi?

⁷ Eyɛ mli akɛ Nyɔŋmɔ bu Abraham, David, kɛ etsuji anɔkwafoi krokomɛi jalɔi moŋ, shi no mli lɛ amɛkã he amɛji eshafeelɔi, ni amɛyeee emuu. Fɛɛ sɛɛ lɛ, amɛhemɔkɛyeli lɛ hewɔ lɛ, Nyɔŋmɔ bu amɛ akɛ mɛi ni tɔmɔ ko bɛ amɛhe, titri lɛ, kɛ́ akɛ amɛ to mɛi ni heee Nyɔŋmɔ nɔ amɛyeee lɛ ahe. (Efe. 2:12) Yɛ wolo ni Paulo ŋma eyahã Romabii lɛ mli lɛ, ehã efee faŋŋ akɛ, ja mɔ ko yɛ hemɔkɛyeli dani ebaanyɛ etsɔ Nyɔŋmɔ naanyo. Hemɔkɛyeli ni hã Abraham kɛ David batsɔmɔ Nyɔŋmɔ nanemɛi, ni no nɔŋŋ baanyɛ ahã wɔ hu wɔbatsɔmɔ Nyɔŋmɔ nanemɛi.

8-9. Mɛni mɛi komɛi ewie yɛ nɔ ni Paulo kɛ Yakobo ŋma lɛ he? Ni mɛni hewɔ?

⁸ Ani hemɔkɛyeli he miihia kwraa fe nitsumɔi? Aloo nitsumɔi ahe miihia kwraa fe hemɔkɛyeli? Sɔlemɔi lɛ etaa sane nɛɛ naa afii ohai abɔ. Osɔfoi lɛ ekomɛi kɛɛ kɛ́ ohe Nuŋtsɔ Yesu Kristo nɔ oye lɛ, no pɛ kɛkɛ fa, abaahere oyiwala. Ekolɛ onu ni amɛmiiwie akɛ, “Hemɔ Yesu nɔ oye, ni abaahere oyiwala.” Amɛteŋ mɛi komɛi po tsɛɔ sane ko ni Paulo wie lɛ yisɛɛ, akɛ: “Nyɔŋmɔ shi nitsumɔi asɛɛ ebu jalɛ ehã lɛ.” (Rom. 4:6) Shi sɔlemɔi lɛ ekomɛi hu kɛɔ akɛ, kɛ́ ofã gbɛ kɛtee hei ni sɔlemɔ lɛ buɔ lɛ akɛ eyɛ krɔŋkrɔŋ, ni ofee mɛi ejurɔ lɛ, abaahere oyiwala. Ekolɛ sane ni awie yɛ Yakobo 2:24 lɛ hewɔ amɛkɛɔ nakai. Jɛmɛ kɛɛ: “Nitsumɔi anɔ abaatsɔ abu mɔ ko jalɔ, shi jeee hemɔkɛyeli pɛ nɔ.”

 ⁹ Susumɔi srɔtoi nɛɛ ni sɔlemɔi lɛ hiɛ lɛ hewɔ lɛ, Biblia he nilelɔi komɛi kɛɛ nɔ ni Yakobo wie akɛ esa akɛ mɔ ko afee koni ahere eyiwala lɛ kɛ nɔ ni Paulo wie lɛ kpãaa gbee. Yɛ amɛsusumɔ naa lɛ, Paulo kɛɛ kɛ́ mɔ ko yɛ hemɔkɛyeli lɛ, no pɛ kɛkɛ baahã Nyɔŋmɔ aná ehe miishɛɛ; shi Yakobo hu kɛɛ kɛ́ mɔ ko tsu nitsumɔi kpakpai lɛ, no ji nɔ ni baahã Nyɔŋmɔ aná ehe miishɛɛ. Nuu ko ni le Nyɔŋmɔjamɔ he saji waa lɛ wie akɛ, Yakobo eyanuuu nɔ hewɔ ni Paulo kɛɛ abaanyɛ adamɔ hemɔkɛyeli pɛ nɔ abu mɔ ko jalɔ lɛ shishi, ni akɛ, Yakobo kɛ Paulo kpãaa gbee. Shi Yehowa ni kɛ emumɔ lɛ tsirɛ Paulo kɛ Yakobo fɛɛ ni amɛŋma nɔ ni amɛŋma lɛ. (2 Tim. 3:16) No hewɔ lɛ, bɔ fɛɛ bɔ ni fee lɛ, saji ni amɛŋmala lɛ kɛ amɛhe kpãa gbee. No hewɔ lɛ, esaaa akɛ nɔ ni amɛwie lɛ shishinumɔ feɔ naagba. Yɛ anɔkwale mli lɛ, kɛ́ okwɛ nɔ ni amɛteŋ mɔ fɛɛ mɔ wieɔ he be ni amɛwie hemɔkɛyeli kɛ nitsumɔ he lɛ, onaa akɛ amɛkɛ amɛhe kpãa gbee.

10. Mɛɛ nitsumɔi ahe no mli lɛ Paulo wieɔ lɛ? (Romabii 3:​21, 28) (Kwɛmɔ mfoniri lɛ hu.)

¹⁰ Mɛɛ “nitsumɔi” no mli lɛ Paulo wieɔ he yɛ Romabii yitso 3 kɛ 4 lɛ? No mli lɛ, eewie “mla nitsumɔi,” ni ji mla ni akɛhã Mose yɛ Sinai Gɔŋ lɛ nɔ lɛ he nitsumɔi ahe. (Kanemɔ Romabii 3:​21, 28.) Yɛ Paulo beiaŋ lɛ, eeenyɛ efee akɛ, ewa kɛhã Yudafoi komɛi ni ebatsɔmɔ Kristofoi lɛ akɛ amɛbaahe amɛye akɛ, akɛ Mose Mla lɛ tsuuu nii dɔŋŋ, ni no hewɔ lɛ, ehe ehiaaa ni amɛtsuɔ Mose Mla lɛ nitsumɔi lɛ. Susumɔ ni amɛhiɛ nɛɛ hewɔ lɛ, Paulo gbala amɛjwɛŋmɔ kɛtee Abraham nɔ koni ehã amɛna akɛ, jeee “mla nitsumɔi” anɔ Nyɔŋmɔ damɔɔ ebuɔ mɔ ko jalɔ, shi moŋ, nɔ ni edamɔɔ nɔ ji, hemɔkɛyeli. Enɛ woɔ mɔ hewalɛ waa, ejaakɛ ehãa wɔnaa akɛ, kɛ́ wɔhe  Nyɔŋmɔ kɛ Kristo nɔ wɔye lɛ, Nyɔŋmɔ baaná wɔhe miishɛɛ.    

11. Mɛɛ “nitsumɔi” ahe no mli lɛ Yakobo wieɔ lɛ?

¹¹ Shi esoro “nitsumɔi” ni Yakobo tsĩ tã yɛ Yakobo yitso 2 lɛ mli lɛ kwraa yɛ “mla nitsumɔi” ni Paulo wie he lɛ ahe. No mli lɛ, Yakobo miiwie nitsumɔi loo nibii ni Kristofoi feɔ daa gbi lɛ ahe. Nibii nɛɛ hãa anaa kɛji mɔ ko heɔ Nyɔŋmɔ nɔ eyeɔ lɛɛlɛŋ. Hã wɔkwɛ nɔkwɛmɔnii enyɔ ni Yakobo wie he ni tsɔɔ nakai.

12. Mɛni Yakobo wie ni tsɔɔ akɛ, esa akɛ nitsumɔi afata hemɔkɛyeli he? (Kwɛmɔ mfoniri lɛ hu.)

¹² Yɛ klɛŋklɛŋ nɔkwɛmɔnɔ lɛ mli lɛ, Yakobo hã wɔna akɛ esaaa akɛ Kristofoi kwɛɔ hiɛiaŋ. Egba nɔkwɛmɔnɔ ko ni kɔɔ nuu ko ni tseɔ ehiɛ ehãa niiatsɛmɛi shi etseee ehiɛ ehãaa ohiafoi lɛ he. Yakobo tsɔɔ mli akɛ, nuu ni tamɔ nakai lɛ baanu he akɛ eyɛ hemɔkɛyeli, shi nɛgbɛ nitsumɔi ni tsɔɔ nakai lɛ yɔɔ? (Yak. 2:​1-5, 9) Yɛ nɔkwɛmɔnɔ ni ji enyɔ lɛ mli lɛ, Yakobo wie nyɛmi ko ni na ‘enyɛmi Kristofonyo ko ni bɛ atade loo niyenii’ shi efeee nɔ ko kɛyeee ebuaaa lɛ lɛ he. Kɛ́ mɔ nɛɛ kɛɛ eyɛ hemɔkɛyeli po lɛ, efeee nɔ ko ni tsɔɔ nakai; enɛ hewɔ lɛ, wɔbaanyɛ wɔkɛɛ akɛ ebɛ hemɔkɛyeli. Tamɔ bɔ ni Yakobo wie lɛ, ‘hemɔkɛyeli lɛ, kɛ nitsumɔi fataaa he lɛ, eji hemɔkɛyeli ni egbo.’—Yak. 2:​14-17.

13. Mɛɛ nɔkwɛmɔnɔ Yakobo gba kɛtsɔɔ akɛ esa akɛ nitsumɔi afata wɔhemɔkɛyeli lɛ he? (Yakobo 2:​25, 26)

¹³ Agbɛnɛ, Yakobo wie Rahab he akɛ mɔ ko ni kɛ enitsumɔi tsɔɔ akɛ eyɛ hemɔkɛyeli. (Kanemɔ Yakobo 2:​25, 26.) Eyɛ mli akɛ ejeee Israelnyo moŋ, shi nibii ni enu yɛ Yehowa he lɛ hã eyɔse akɛ, Yehowa miiye eebua Israelbii lɛ. (Yos. 2:​9-11) Ekɛ enifeemɔ tsɔɔ akɛ eyɛ hemɔkɛyeli. Ebu Israelbii enyɔ ni atsu amɛ koni amɛbakpa shikpɔŋ lɛ shi lɛ ahe koni  akagbe amɛ. Enɛ hewɔ lɛ, eyɛ mli akɛ yoo nɛɛ bɛ Mose Mla lɛ shishi ni eyeee emuu, tamɔ bɔ ni Abraham hu bɛ Mla lɛ shishi ni eyeee emuu lɛ moŋ, shi abu lɛ jalɔ, tamɔ bɔ ni abu Abraham jalɔ lɛ. Esane lɛ hãa wɔnaa akɛ, kɛ́ mɔ ko kɛɛ eyɛ hemɔkɛyeli lɛ, belɛ ehe miihia ni ekɛ nitsumɔi atsɔɔ nakai.

14. Mɛni hewɔ wiemɔi ni Paulo kɛ Yakobo wie lɛ eteee shi ewooo amɛhe lɛ?

¹⁴ No hewɔ lɛ, Paulo kɛ Yakobo fɛɛ miiwie hemɔkɛyeli kɛ nitsumɔi ahe moŋ, shi esoro nitsumɔi ni Paulo wieɔ he lɛ yɛ nitsumɔi ni Yakobo wieɔ he lɛ ahe. Shi amɛteee shi amɛwooo amɛhe. No mli lɛ, Paulo miikɛɛ Yudafoi ni ebatsɔmɔ Kristofoi lɛ akɛ, Mla lɛ nitsumɔi kɛkɛ ni amɛbaatsu lɛ hãŋ Nyɔŋmɔ aná amɛhe miishɛɛ. Ni Yakobo hu fee lɛ faŋŋ ehã Kristofoi lɛ akɛ, esa akɛ amɛfee nibii kpakpai kɛtsɔɔ akɛ amɛyɛ hemɔkɛyeli.

15. Mɛɛ nibii kɛ́ wɔfee lɛ, no baatsɔɔ akɛ wɔyɛ hemɔkɛyeli? (Kwɛmɔ mfonirii lɛ hu.)

¹⁵ Yehowa kpaaa gbɛ akɛ kɛ́ wɔmiisumɔ ni atsɛ wɔ jalɔi lɛ, belɛ esa akɛ wɔfee nɔ ni Abraham fee lɛ pɛpɛɛpɛ. Anɔkwa, nibii pii yɛ ni kɛ́ wɔfee lɛ no baatsɔɔ akɛ wɔyɛ hemɔkɛyeli. Akɛ nɔkwɛmɔnɔ lɛ, wɔbaanyɛ wɔhere mɛi hei ni baa asafoŋ kpeei lɛ, wɔye wɔbua wɔnyɛmimɛi ni yelikɛbuamɔ he miihia amɛ lɛɛlɛŋ lɛ, ni wɔfee wɔwekumɛi ejurɔ. (Rom. 15:7; 1 Tim. 5:​4, 8; 1 Yoh. 3:18) Kɛ́ wɔfee nibii nɛɛ, Yehowa baaná wɔhe miishɛɛ ni ebaajɔɔ wɔ. Gbɛ kome ni he hiaa waa ni wɔbaanyɛ wɔtsɔ nɔ wɔtsɔɔ akɛ wɔyɛ hemɔkɛyeli ji, ni wɔkɛ ekãa baatsu shiɛmɔ nitsumɔ lɛ. (1 Tim. 4:16) Wɔ fɛɛ wɔbaanyɛ wɔkɛ wɔnifeemɔi atsɔɔ akɛ wɔyɛ hemɔkɛyeli akɛ Yehowa shiwoi lɛ baaba mli, ni akɛ, nɔ fɛɛ nɔ ni ekɛɔ wɔ akɛ wɔfee lɛ ja. Ni kɛ́ wɔfee nakai lɛ, wɔbaanyɛ wɔná nɔmimaa akɛ,  Nyɔŋmɔ baabu wɔ afata jalɔi lɛ ahe, ni wɔbaatsɔmɔ enanemɛi.

16. Mɛɛ hiɛnɔkamɔ Abraham ná ni ehe eye akɛ ebaaba mli?

¹⁶ Romabii yitso 4 lɛ tsɔɔ wɔ nɔ kroko ni wɔbaanyɛ wɔkase yɛ Abraham he. Nakai yitso lɛ hãa wɔnaa akɛ, esa akɛ wɔya nɔ wɔkɛ wɔjwɛŋmɔ ama wɔhiɛnɔkamɔ lɛ nɔ waa. Yehowa wo Abraham shi akɛ, ‘ebaatsɔ jeŋmaji pii atsɛ,’ ni abaatsɔ enɔ “ajɔɔ shikpɔŋ lɛ nɔ wekui fɛɛ.” Enɛ bafee hiɛnɔkamɔ ni nɔ bɛ ni Abraham kwɛ gbɛ. (1 Mo. 12:3; 15:5; 17:4; Rom. 4:17) Shi be ni Abraham eye afii 100 ni eŋa Sara eye afii 90 lɛ fɛɛ sɛɛ lɛ, no mli lɛ, amɛhiɛnɔkamɔ lɛ bako mli, ejaakɛ amɛfɔko binuu. Yɛ adesa susumɔ naa lɛ, etamɔ nɔ ni Abraham kɛ Sara nyɛŋ afɔ binuu yɛ he ni amɛdara kɛshɛ lɛ hewɔ. Enɛ bafee kaa waa kɛhã Abraham. “Shi ená hiɛnɔkamɔ ni ehe eye hu akɛ ebaatsɔ jeŋmaji pii atsɛ.” (Rom. 4:​18, 19) Ni lɛɛlɛŋ, nɔ ni ehiɛ kã nɔ lɛ ba mli. Efɔ Isak, binuu ni ekpaa gbɛ lɛ.—Rom. 4:​20-22.

17. Mɛni hewɔ wɔ hu wɔbaanyɛ wɔhe wɔye akɛ, Nyɔŋmɔ baanyɛ abu wɔ jalɔi ni wɔtsɔmɔ enanemɛi lɛ?

¹⁷ Wɔ hu Nyɔŋmɔ baanyɛ aná wɔhe miishɛɛ ni ebu wɔ jalɔi ni wɔtsɔmɔ enanemɛi tamɔ eji yɛ Abraham gbɛfaŋ lɛ. Paulo wie nɔ ko ni tamɔ nakai po. Ewie akɛ: “Jeee [Abraham pɛ hewɔ] aŋma wiemɔi ni ji, ‘abu no ahã lɛ’ lɛ, shi moŋ wɔ mɛi ni abaabu no ahã wɔ lɛ hu ahewɔ, ejaakɛ wɔheɔ mɔ ni tee wɔ-Nuŋtsɔ Yesu shi kɛjɛ gbohii ateŋ lɛ wɔyeɔ.” (Rom. 4:​23, 24) Wɔ hu wɔbaanyɛ wɔhe Yehowa nɔ wɔye, wɔtsu nitsumɔi ni tsɔɔ akɛ wɔyɛ hemɔkɛyeli, ni wɔná hiɛnɔkamɔ ni mli wa tamɔ Abraham ná lɛ. Yɛ Romabii yitso 5 lɛ mli lɛ, Paulo wie hiɛnɔkamɔ he agbɛnɛ, ni wɔbaasusu enɛ he yɛ nikasemɔ ni nyiɛ sɛɛ lɛ mli.