Gbi ko lɛ, nyɛmi yoo ko ni yɔɔ New Zealand lɛ kwɛ vidio ko ni woɔ wɔ hewalɛ ni wɔmusuŋ atsɔ wɔ yɛ mɛi ahe lɛ yɛ jw.org lɛ nɔ. (Yes. 63:​7-9) Ekpɛ eyiŋ akɛ, ekɛ nɔ ni ekase lɛ baatsu nii ni ekwɛ nɔ ni ebaanyɛ efee kɛye ebua mɛi krokomɛi. Sɛɛ mli yɛ nakai gbi lɛ nɔŋŋ nɔ lɛ, eyaaye jara ni ekɛ yoo ko ni he efi lɛ aahu akɛ ebɛ he ko ni ewɔɔ lɛ kpe. Ebi lɛ kɛji ehé nɔ ko ehã lɛ ni eye, ni yoo lɛ kpɛlɛ nɔ. Be ni nyɛmi yoo lɛ yahé niyenii lɛ kɛba lɛ, ekɛ yoo lɛ gba trati ni yitso ji, Ani Amanehulu Sɛɛ Baafo Be Ko? lɛ mli sane kuku.

Nɔŋŋ kɛkɛ ni yoo lɛ bɔi yaafo. Ewie akɛ, atsɔse lɛ yɛ anɔkwale lɛ mli, shi afii babaoo nɛ ni ekpa Yehowa sɔɔmɔ. Ewie akɛ, nyɛsɛɛ nɛɛ esɔleɔ waa ni Yehowa aye ebua lɛ ni eku esɛɛ kɛba eŋɔɔ. Nyɛmi yoo lɛ hã lɛ Biblia, ni ekɛ lɛ to gbɛjianɔ ni ekɛ lɛ abɔi nikasemɔ. a

Bɔ ni Yehowa musuŋ tsɔɔ lɛ yɛ mɛi ahe lɛ, nakai nɔŋŋ esa akɛ wɔmusuŋ atsɔ wɔ yɛ wɔwekumɛi, wɔnyɛmimɛi Kristofoi lɛ, kɛ mɛi krokomɛi fɛɛ ahe. Nɔ kome ni wɔbaanyɛ wɔfee kɛtsɔɔ akɛ wɔmusuŋ tsɔɔ wɔ yɛ mɛi ahe ji, ni wɔbaaŋɔ hegbɛ fɛɛ hegbɛ ni wɔbaaná lɛ kɛye amɛ odase.