1. Mɛni kɛ́ nyɛmi nuu ko fee lɛ, ebaahã ebatsɔ Kristofonyo ni eda yɛ mumɔŋ?

 MAŊTSƐ David kɛɛ Solomon akɛ: “Wajemɔ ohe ni ofee nuu.” (1 Maŋ. 2:​1-3, shn.) Esa akɛ nyɛmimɛi hii fɛɛ ni yɔɔ ŋmɛnɛ lɛ abɔ mɔdɛŋ ni amɛbo ŋaawoo nɛɛ toi. Nɔ ni baaye abua amɛ ni amɛnyɛ amɛfee nakai ji, ni amɛbaabo Nyɔŋmɔ mlai toi, ni amɛkɛ Biblia mli shishitoo mlai atsu nii yɛ nɔ fɛɛ nɔ ni amɛfeɔ lɛ mli. (Luka 2:52) Nyɛmimɛi oblahii, mɛni hewɔ ehe miihia waa ni nyɛbatsɔmɔ mɛi ni edara yɛ mumɔŋ?

2-3. Mɛni hewɔ ehe miihia waa ni Kristofonyo oblanyo abatsɔ mɔ ko ni eda yɛ mumɔŋ lɛ?

² Nyɛmimɛi hii tsuɔ nibii ni he hiaa waa yɛ weku lɛ kɛ asafo lɛ mli. Kɛ́ oblanyo ji bo lɛ, ekã shi faŋŋ akɛ, osusu nibii ni obaasumɔ ni ofee wɔsɛɛ lɛ ahe. Ekolɛ obaasumɔ ni otsu be fɛɛ sɔɔmɔ nitsumɔ lɛ, otsɔ asafoŋ sɔɔlɔ, ni sɛɛ mli lɛ, otsɔ asafoŋ onukpa. Ekolɛ obaasumɔ hu ni obote gbalashihilɛ mli ni ofɔ bii. (Efe. 6:4; 1 Tim. 3:1) Dani obaanyɛ oshɛ otii nɛɛ ahe ni otsu amɛhe nii jogbaŋŋ lɛ, esa akɛ otsɔ mɔ ko ni eda yɛ mumɔŋ. b

³ Mɛni baanyɛ aye abua bo ni obatsɔ mɔ ko ni eda yɛ mumɔŋ? Ehe baahia ni okase nibii komɛi ni he hiaa waa. No hewɔ lɛ, te obaafee tɛŋŋ okase nibii nɛɛ ni osaa ohe kɛhã nibii ni obaasumɔ ni ofee wɔsɛɛ lɛ?

4. Namɛi nɛkɛ obaanyɛ okase amɛnɔkwɛmɔnɔ kpakpa lɛ? (Kwɛmɔ mfoniri lɛ hu.)

⁴ Kasemɔ mɛi ni feɔ nɔkwɛmɔnɔ kpakpa. Awie hii pii ni fee nɔkwɛmɔnɔ kpakpa lɛ ahe yɛ Biblia lɛ mli, ni obaanyɛ okase amɛ. Hii nɛɛ ni hi shi yɛ blema lɛ sumɔɔ Nyɔŋmɔ, ni amɛtsu nibii srɔtoi  kɛye amɛbua Nyɔŋmɔ webii lɛ. Agbɛnɛ hu, obaanyɛ okase hii ni edara yɛ mumɔŋ ni yɔɔ bo diɛŋtsɛ oweku lɛ kɛ osafo lɛ mli lɛ. (Heb. 13:7) Ni obaanyɛ okase mɔ ni fee nɔkwɛmɔnɔ kpakpa fe fɛɛ, ni ji Yesu Kristo lɛ hu. (1 Pet. 2:21) Be ni okaseɔ blema bii lɛ ahe nii, ni osusuɔ nɔkwɛmɔnɔ kpakpa ni mɛi ni yɔɔ ŋmɛnɛ lɛ feɔ lɛ he lɛ, okɛ ojwɛŋmɔ aya sui ni sa kadimɔ ni amɛjieɔ lɛ kpo lɛ anɔ. (Heb. 12:​1, 2) No sɛɛ lɛ, kwɛmɔ bɔ ni obaafee okase amɛ.

5. Mɛni obaanyɛ ofee koni ole bɔ ni ajwɛŋɔ jogbaŋŋ? Ni mɛni hewɔ ehe miihia ni oná su nɛɛ? (Lala 119:9)

⁵ Kasemɔ bɔ ni ‘ajwɛŋɔ jogbaŋŋ be fɛɛ be.’ (Abɛi 3:21) Mɔ ko ni jwɛŋɔ jogbaŋŋ lɛ susuɔ nii ahe kɛyaa shɔŋŋ, ni efeee enii kɛkɛ. No hewɔ lɛ, miamɔ ohiɛ ni okase nɛkɛ su nɛɛ ni okɛtsu nii daa gbi. Mɛni hewɔ? Ŋmɛnɛ lɛ, oblahii pii feɔ nɔ ni amɛ diɛŋtsɛ amɛsumɔɔ loo amɛnyiɛɔ amɛhenumɔi asɛɛ. (Abɛi 7:7; 29:11) Agbɛnɛ hu, Intanɛt lɛ, social media, kɛ nibii ni ajieɔ yɛ TV nɔ kɛ sinii amli lɛ baanyɛ aná onɔ hewalɛ. No hewɔ lɛ, mɛni obaanyɛ ofee koni ole bɔ ni ajwɛŋɔ jogbaŋŋ? Klɛŋklɛŋ lɛ, kasemɔ shishitoo mlai ni yɔɔ Biblia lɛ mli lɛ, ni osusu nɔ hewɔ ni amɛhe yɔɔ sɛɛnamɔ lɛ he. No sɛɛ lɛ, kɛ́ oyaakpɛ yiŋ lɛ, susumɔ shishitoo mlai nɛɛ ahe koni okpɛ yiŋ kpakpai ni baahã Yehowa aná miishɛɛ. (Kanemɔ Lala 119:9.) Kɛ́ onyɛ okase enɛ feemɔ jogbaŋŋ lɛ, no baaye abua bo waa ni obatsɔ mɔ ko ni eda yɛ mumɔŋ. (Abɛi 2:​11, 12; Heb. 5:14) Hã wɔkwɛ bɔ ni kɛ́ ojwɛŋɔ jogbaŋŋ lɛ, ebaaye ebua bo, (1) ni ole bɔ ni okɛ nyɛmimɛi yei baaye ohã, kɛ (2) ni okpɛ yiŋ kpakpai yɛ bɔ ni osaa ohe ohãa lɛ he.

6. Kɛ́ oblanyo ko jwɛŋɔ jogbaŋŋ lɛ, mɛɛ gbɛ nɔ no baaye abua lɛ ni ele bɔ ni ekɛ nyɛmimɛi yei baaye ehã?

⁶ Kɛ́ ojwɛŋɔ jogbaŋŋ lɛ, obaale bɔ ni okɛ nyɛmimɛi yei baaye ohã. Akɛ nɔkwɛmɔnɔ lɛ, bɔ ni Yehowa bɔ wɔ ehã lɛ hewɔ lɛ, eshɛɔ he ko ni wɔnuɔ akɛ wɔbote gbalashihilɛ mli. No hewɔ lɛ, kɛ́ nyɛmi nuu ko miishwe ni ebote gbalashihilɛ mli lɛ, ejeee tɔmɔ. Shi kɛ́ nyɛmi nuu ko ni jwɛŋɔ jogbaŋŋ lɛ efeko klalo akɛ ebaabote gbalashihilɛ mli lɛ, ebaakwɛ bɔ ni ekɛ yei yeɔ ehãa lɛ jogbaŋŋ. Ewieŋ nɔ ko, eŋmaŋ nɔ ko, ni efeŋ nɔ ko hu ni baahã nyɛmi yoo ko anu he akɛ eyɛ ehe miishɛɛ. (1 Tim. 5:​1, 2) Agbɛnɛ hu, kɛ́ nyɛmi nuu ko ni jwɛŋɔ jogbaŋŋ lɛ kɛ nyɛmi yoo ko nyiɛ kɛhã gbalashihilɛ lɛ, ekɛ lɛ kome too ehiŋ he ko ni mɔ ko mɔ  ko fataaa amɛhe kɔkɔɔkɔ, bɔ ni afee ni ekafite gbɛ́i kpakpa ni nyɛmi yoo lɛ efee yɛ Yehowa kɛ gbɔmɛi ahiɛ lɛ.—1 Kor. 6:18.

7. Kɛ́ Kristofonyo oblanyo ko jwɛŋɔ jogbaŋŋ lɛ, mɛɛ gbɛ nɔ no baaye abua lɛ ni ekpɛ yiŋ kpakpai yɛ bɔ ni esaa ehe kɛ bɔ ni ekuɔ eyi ehãa lɛ mli?

⁷ Nɔ kroko ni baahã ana akɛ Kristofonyo oblanyo ko jwɛŋɔ jogbaŋŋ ji, bɔ ni esaa ehe kɛ bɔ ni ekuɔ eyi ehãa. Hesaamɔi ni eba nɔ yɛ je lɛ mli ŋmɛnɛ lɛ pii yɛ ni mɛi ni sheee Yehowa gbeyei loo mɛi ni bɛ jeŋba ni kɛba. Akɛni amɛjeŋba ekpɔtɔ hewɔ lɛ, atadei ni amɛkɛba lɛ pii yɛ ni emɔɔ mɔ pampii loo ehãa hii jeɔ yei. Kɛ́ oblanyo ni miibɔ mɔdɛŋ ni ebatsɔ mɔ ko ni eda yɛ mumɔŋ lɛ miikpɛ yiŋ yɛ nɔ ni ebaawo he lɛ, ehãa Biblia mli shishitoo mlai kɛ nyɛmimɛi hii ni feɔ nɔkwɛmɔnɔ kpakpa yɛ asafo lɛ mli lɛ ahesaamɔ kudɔɔ lɛ. Ebiɔ ehe saji tamɔ: ‘Ani mihesaamɔ loo yi ni mitaoɔ maku lɛ baahã ana akɛ mijwɛŋɔ jogbaŋŋ ni misusuɔ mɛi krokomɛi ahe? Ani bɔ ni misaa mihe mihãa lɛ hãa mɛi naa akɛ Yehowa tsulɔ ji mi lɛɛlɛŋ?’ (1 Kor. 10:​31-33; Tito 2:6) Kristofonyo oblanyo ni jwɛŋɔ jogbaŋŋ lɛ hiɛ baa nyam yɛ enyɛmimɛi Kristofoi lɛ kɛ Yehowa hiɛ.

8. Kɛ́ nyɛmi nuu ko miitao etsɔ mɔ ko ni abaanyɛ amu afɔ̃ enɔ lɛ, mɛni esa akɛ efee?

⁸ Feemɔ nibii ni baahã anyɛ amu afɔ̃ onɔ. Oblanyo ni anyɛɔ amuɔ afɔ̃ɔ enɔ lɛ, kɛ́ akɛ nitsumɔ ko wo edɛŋ lɛ, etsuɔ he nii jogbaŋŋ, ni efeɔ nakai yɛ be naa hu. (Luka 16:10) Yesu fee nɔkwɛmɔnɔ ni nɔ bɛ yɛ enɛ gbɛfaŋ. Ehiii shi tamɔ nɔ ni nɔ ko kɔɔɔ ehe eko loo ebɛ nɔ ko tsumɔ. No najiaŋ lɛ, etsu nibii fɛɛ ni Yehowa kɛwo edɛŋ akɛ etsu lɛ, be ni nakai feemɔ wa po. Esumɔɔ mɛi, titri lɛ, ekaselɔi lɛ, ni ejɛ esuɔmɔ mli ekɛ ewala hã yɛ amɛhewɔ. (Yoh. 13:1) Kɛ́ bo hu omia ohiɛ otsu nitsumɔ fɛɛ nitsumɔ ni akɛbaawo odɛŋ lɛ jogbaŋŋ lɛ, belɛ ookase Yesu. Kɛ́ akɛ nitsumɔ ko wo odɛŋ ni oleee bɔ ni atsuɔ lɛ ahãa lɛ, ba ohe shi ni obi mɛi ni le tsumɔ waa lɛ adɛŋ yelikɛbuamɔ. Kaafee anihao kɔkɔɔkɔ. (Rom. 12:11) Moŋ lɛ, tse ohe otsu nii lɛ jogbaŋŋ, ‘tamɔ Yehowa otsuɔ ohãa, shi jeee gbɔmɛi.’ (Kol. 3:23) Hã ehi ojwɛŋmɔ mli akɛ, oyeee emuu, ni no hewɔ lɛ obaatɔ̃. Kɛ́ eba lɛ nakai lɛ, ba ohe shi ni okpɛlɛ nɔ akɛ otɔ̃.—Abɛi 11:2.

9. Mɛni hewɔ esa akɛ Kristofonyo oblanyo akase nibii ni baaye abua lɛ yɛ shihilɛ mli?

⁹ Nyɛmimɛi oblahii, kɛ́ nyɛmiitao nyɛtsɔmɔ mɛi ni edara yɛ mumɔŋ lɛ, esa akɛ nyɛkase nibii ni baaye abua nyɛ yɛ shihilɛ mli. Kɛ́ nyɛkase nibii nɛɛ, no baaye abua nyɛ ni nyɛnyɛ nyɛtsu sɔ̃i ni akɛbaawo nyɛdɛŋ yɛ asafo lɛ mli lɛ ahe nii, nyɛná nitsumɔ ni nyɛkɛbaakwɛ nyɛhe kɛ nyɛweku lɛ, ni agbɛnɛ hu, nyɛkɛ mɛi fɛɛ ahi shi jogbaŋŋ. Naa nibii ni nyɛbaanyɛ nyɛkase lɛ ekomɛi.

10-11. Kɛ́ Kristofonyo oblanyo ko kase nikanemɔ kɛ niŋmaa jogbaŋŋ lɛ, mɛɛ gbɛ nɔ lɛ diɛŋtsɛ kɛ asafo lɛ fɛɛ baaná he sɛɛ? (Lala 1:​1-3) (Kwɛmɔ mfoniri lɛ hu.)

¹⁰ Kasemɔ bɔ ni akaneɔ nii jogbaŋŋ kɛ bɔ ni aŋmaa nii jogbaŋŋ. Biblia lɛ kɛɛ, mɔ ni kaneɔ  Nyɔŋmɔ Wiemɔ lɛ daa ni ejwɛŋɔ nɔ lɛ yɛ miishɛɛ ni eyeɔ omanye. (Kanemɔ Lala 1:​1-3.) Kɛ́ nuu ko kane Biblia lɛ daa lɛ, ebaale Yehowa susumɔ yɛ saji ahe, ni no baaye abua lɛ ni ejwɛŋ jogbaŋŋ ni enyɛ ekɛ Biblia mli shishitoo mlai hu atsu nii jogbaŋŋ. (Abɛi 1:​3, 4) Hii ni tamɔ nɛkɛ ahe miihia waa yɛ asafo lɛ mli. Ani ole nɔ hewɔ?

¹¹ Nyɛmimɛi hii ni edara yɛ mumɔŋ ni nyɛɔ amɛjɛɔ Biblia lɛ mli amɛtsɔɔ nii ni amɛwoɔ ŋaa lɛ yeɔ amɛbuaa amɛnyɛmimɛi Kristofoi lɛ waa. (Tito 1:9) Kɛ́ ole nikanemɔ kɛ niŋmaa jogbaŋŋ lɛ, obaanyɛ okase nii jogbaŋŋ ni ohã maŋshiɛmɔi ni tswaa mɔ emaa shi, ni obaanyɛ ohã saji ahetoo ni woɔ mɔ hewalɛ. Agbɛnɛ hu, obaanyɛ oŋmala otii be ni okaseɔ nii kɛ be ni oboɔ wiemɔi toi yɛ asafoŋ kpeei, kpeei bibii, kɛ kpeei wuji ashishi. Otii nɛɛ baahã bo diɛŋtsɛ ohemɔkɛyeli lɛ mli awa ni onyɛ owo mɛi krokomɛi hu hewalɛ.

12. Mɛni baaye abua bo ni obo sane toi jogbaŋŋ ni owie jogbaŋŋ?

¹² Kasemɔ bɔ ni aboɔ sane toi jogbaŋŋ kɛ bɔ ni akɛ mɔ wieɔ jogbaŋŋ. Esa akɛ Kristofonyo oblanyo ale bɔ ni aboɔ sane toi jogbaŋŋ kɛ bɔ ni akɛ mɔ wieɔ jogbaŋŋ. Enɛ tsɔɔ akɛ, kɛ́ akɛ lɛ miiwie lɛ, esa akɛ ebo toi jogbaŋŋ ni ebɔ mɔdɛŋ ni enu shishi hu. (Abɛi 20:5) Mɔ ko ni boɔ sane toi jogbaŋŋ lɛ, kɛ́ ekɛ mɔ ko miiwie ni mɔ lɛ gbee tsake, ehiɛ tsake, loo ebɔi nibii komɛi feemɔ lɛ, ebaanyɛ ekɔ sɛɛ. Ni enɛ lɛ, ja okɛ mɛi fɔɔ sanegbaa dani obaanyɛ okase. Kɛ́ gbɛ titri ni otsɔɔ nɔ okɛ mɛi gbaa sane ji, kɛtsɔ tɛs mɛseji, email, loo amɛhenɔi lɛ anɔ lɛ, no baanyɛ ahã ewa kɛhã bo akɛ okɛ mɛi baagba sane hiɛ kɛ hiɛ. No hewɔ lɛ, kwɛmɔ akɛ obaanyɛ okɛ mɛi afɔ wiemɔ hiɛ kɛ hiɛ lo.—2 Yoh. 12.

13. Mɛni ekoŋŋ esa akɛ oblanyo akase? (1 Timoteo 5:8) (Kwɛmɔ mfoniri lɛ hu.)

¹³ Kasemɔ bɔ ni obaafee okwɛ ohe. Esa akɛ Kristofonyo nuu ni eda yɛ mumɔŋ lɛ anyɛ akwɛ lɛ diɛŋtsɛ ehe kɛ eweku lɛ. (Kanemɔ 1 Timoteo 5:8.) Yɛ maji komɛi anɔ lɛ, tsɛmɛi tsɔɔ amɛbihii ninenaa nitsumɔ loo wekunyo kroko feɔ nakai. Yɛ maji komɛi hu anɔ lɛ, amɛkaseɔ ninenaa nitsumɔ lɛ be ni amɛyɔɔ sɛkɛndre skul. Bɔ fɛɛ bɔ ni sane lɛ ji lɛ, ehi akɛ oblahii baakase nitsumɔ ko ni baaye abua amɛ ni amɛnyɛ amɛkwɛ amɛhe. (Bɔf. 18:​2, 3; 20:34; Efe. 4:28) Okɛ onitsumɔ akashwɛ kwraa, ni kɛ́ oje nɔ ko shishi lɛ, miamɔ ohiɛ ni ogbe naa. Mɛi baayɔse enɛ ni amɛbaana akɛ otsuɔ nii waa. Ni kɛ́ mɛi na akɛ otsuɔ nii waa lɛ, ewaaa akɛ obaaná nitsumɔ. Sui kɛ nibii krokomɛi ni atsɔɔ yɛ nikasemɔ nɛɛ mli akɛ Kristofoi hii baanyɛ akase lɛ baanyɛ aye abua amɛ ni amɛtsu nibii krokomɛi ni ekolɛ amɛbaasumɔ ni  amɛtsu wɔsɛɛ lɛ ahe nii. Nyɛhãa wɔsusua nibii nɛɛ ekomɛi ahe wɔkwɛa.

14. Mɛni kɛ́ oblanyo ko fee lɛ, no baasaa lɛ kɛhã be fɛɛ sɔɔmɔ nitsumɔ lɛ?

¹⁴ Be fɛɛ sɔɔmɔ nitsumɔ lɛ. Nyɛmimɛi hii ni edara yɛ mumɔŋ lɛ ateŋ mɛi pii je be fɛɛ sɔɔmɔ nitsumɔ lɛ shishi be ni amɛdarako tsɔ. Kɛ́ oblanyo ko tsu gbɛgbamɔ nitsumɔ lɛ, eyeɔ ebuaa lɛ ni eleɔ bɔ ni akɛ mɛi srɔtoisrɔtoi feɔ ekome kɛtsuɔ nii. Agbɛnɛ hu, eyeɔ ebuaa lɛ ni etoɔ eshika he gbɛjianɔ jogbaŋŋ. (Fip. 4:​11-13) Nɔ ko ni hi waa ni baanyɛ aye abua bo ni otsu gbɛgbamɔ nitsumɔ lɛ ji, ni obaasɔmɔ akɛ gbɛgbalɔi awalɔ. Mɛi komɛi sɔmɔɔ akɛ gbɛgbalɔi awalɔi kɛyashiɔ be ko, ni no saa amɛ kɛhã daa gbɛgbamɔ nitsumɔ lɛ. Kɛ́ obatsɔ gbɛgbalɔ lɛ, no hãa onáa hegbɛ ni okɛ ohe awo be fɛɛ sɔɔmɔ nitsumɔ lɛ fãi krokomɛi amli. Akɛ nɔkwɛmɔnɔ lɛ, obaanyɛ osɔmɔ akɛ tsumaa sɔɔlɔ loo oyatsu nii yɛ Betel.

15-16. Mɛni baaye abua oblanyo ko ni ebatsɔ asafoŋ sɔɔlɔ loo asafoŋ onukpa?

¹⁵ Asafoŋ sɔɔlɔ loo asafoŋ onukpa. Esa akɛ nyɛmimɛi hii fɛɛ kɛfee oti ni ma amɛhiɛ akɛ, amɛbaatsɔmɔ asafoŋ onukpai koni amɛsɔmɔ amɛnyɛmimɛi Kristofoi lɛ. Biblia lɛ kɛɛ, nyɛmimɛi hii ni miibɔ mɔdɛŋ ni amɛshɛ oti nɛɛ he lɛ ‘miitao nitsumɔ kpakpa.’ (1 Tim. 3:1) Dani nyɛmi nuu ko baanyɛ asɔmɔ akɛ asafoŋ onukpa lɛ, klɛŋklɛŋ lɛ, esa akɛ esɔmɔ akɛ asafoŋ sɔɔlɔ. Asafoŋ sɔɔlɔi yeɔ amɛbuaa asafoŋ onukpai lɛ yɛ gbɛi srɔtoi anɔ. Asafoŋ onukpai kɛ asafoŋ sɔɔlɔi fɛɛ jɛɔ heshibaa mli amɛsɔmɔɔ amɛnyɛmimɛi lɛ, ni amɛtsuɔ shiɛmɔ nitsumɔ lɛ kɛ ekãa. Abaanyɛ ahã nyɛmimɛi hii ni shɛɔ taomɔ nii lɛ ahe lɛ abatsɔmɔ asafoŋ sɔɔlɔi kɛ́ amɛye afii 17 pɛ po. Ni abaanyɛ ahole asafoŋ sɔɔlɔi ni bɔɔ mɔdɛŋ lɛ akɛ asafoŋ onukpai kɛ́ amɛye afii 20 pɛ po.

¹⁶ Kɛ́ ootao osɔmɔ akɛ asafoŋ sɔɔlɔ loo asafoŋ onukpa lɛ, mɛni esa akɛ ofee? Biblia lɛ etsɔko nɔ pɔtɛɛ ni esa akɛ ofee. Shi ehãa wɔleɔ taomɔ nii ni esa akɛ asafoŋ sɔɔlɔi kɛ asafoŋ onukpai ashɛ he. Ni taomɔ nii lɛ eko fɛɛ eko biɔ ni mɔ ko asumɔ Yehowa, esumɔ eweku lɛ, ni esumɔ asafo lɛ. (1 Tim. 3:​1-13; Tito 1:​6-9; 1 Pet. 5:​2, 3) No hewɔ lɛ, bɔɔ mɔdɛŋ ni okase taomɔ nii lɛ eko fɛɛ eko he nii koni onu shishi jogbaŋŋ, ni osɔle obi Yehowa ni eye ebua bo koni onyɛ oshɛ he. c

17. Mɛni baaye abua Kristofonyo oblanyo ko ni wɔsɛɛ lɛ, ebatsɔ wu kɛ weku yitso kpakpa? (Kwɛmɔ mfoniri lɛ hu.)

¹⁷ Wu kɛ weku yitso. Tamɔ bɔ ni Yesu wie lɛ, Kristofoi hii komɛi ekpɛ amɛyiŋ akɛ amɛboteŋ  gbalashihilɛ mli. (Mat. 19:12) Shi kɛ́ okpɛ oyiŋ akɛ obaabote gbalashihilɛ mli lɛ, obaatsɔ wu kɛ weku yitso. (1 Kor. 11:3) Kɛ́ obatsɔ wu lɛ, nɔ ni Yehowa kpaa gbɛ yɛ odɛŋ ji, ni osumɔ oŋa lɛ ni ohã lɛ nibii ni he hiaa lɛ yɛ heloŋ gbɛfaŋ, otsɔ naanyo kpakpa ohã lɛ, ni oye obua lɛ ni ekɛ Yehowa teŋ naanyobɔɔ lɛ mli awa be fɛɛ be. (Efe. 5:​28, 29) Yɛ nikasemɔ nɛɛ mli lɛ, wɔsusu sui kɛ nibii krokomɛi ni esa akɛ okase, tamɔ bɔ ni ajwɛŋɔ jogbaŋŋ, bɔ ni akɛ yei yeɔ ahãa, kɛ nibii ni esa akɛ ofee koni otsɔ mɔ ko ni abaanyɛ amu afɔ̃ enɔ lɛ ahe. Nibii nɛɛ baaye abua bo koni wɔsɛɛ lɛ, obatsɔ wu kɛ weku yitso kpakpa.

18. Mɛni nyɛmi nuu ko baanyɛ afee bianɛ ni baaye abua lɛ ni ebatsɔ tsɛ kpakpa wɔsɛɛ?

¹⁸ Tsɛ. Kɛ́ obote gbalashihilɛ mli lɛ, ekolɛ obaafɔ. Mɛɛ nibii obaanyɛ okase yɛ Yehowa dɛŋ ni baaye abua bo ni obatsɔ tsɛ kpakpa tamɔ lɛ? Nibii pii yɛ ni obaanyɛ okase yɛ edɛŋ. (Efe. 6:4) Akɛ nɔkwɛmɔnɔ lɛ, Yehowa kɛɛ e-Bi Yesu yɛ mɛi ahiɛ akɛ esumɔɔ lɛ ni eyɛ ehe miishɛɛ. (Mat. 3:17) Kɛ́ obatsɔ tsɛ lɛ, kɛɛmɔ obii lɛ daa akɛ, osumɔɔ amɛ. Kɛ́ amɛfee nɔ ko kpakpa lɛ, jiemɔ amɛyi. Tsɛmɛi ni kaseɔ Yehowa lɛ nyɛɔ amɛyeɔ amɛbuaa amɛbii lɛ ni amɛbatsɔmɔɔ Kristofoi ni edara yɛ mumɔŋ. Nɔ kome ni obaanyɛ ofee bianɛ ni baaye abua bo ni otsɔ tsɛ kpakpa wɔsɛɛ ji, ni obaasumɔ ofɔlɔi kɛ onyɛmimɛi lɛ, kɛ osafo lɛ mli bii, ni ohã amɛle akɛ osumɔɔ amɛ ni amɛsane kã otsui nɔ. (Yoh. 15:9) Kɛ́ ofee nakai lɛ, wɔsɛɛ kɛ́ obatsɔ wu kɛ tsɛ lɛ, etɔŋ bo pii. Bianɛ po lɛ, Yehowa kɛ bo baatsu nii waa, ni obaaye obua ofɔlɔi kɛ onyɛmimɛi lɛ, kɛ asafo lɛ.

19-20. Mɛni kɛ́ nyɛmimɛi oblahii fee lɛ, ebaaye ebua amɛ ni amɛbatsɔmɔ mɛi ni edara yɛ mumɔŋ? (Kwɛmɔ mfoniri ni yɔɔ wolo lɛ hiɛ lɛ.)

¹⁹ Nyɛmimɛi oblahii, ja nyɛmia nyɛhiɛ waa dani nyɛbaanyɛ nyɛbatsɔmɔ mɛi ni edara yɛ mumɔŋ. Ehe baahia ni nyɛkase mɛi ni feɔ nɔkwɛmɔnɔ kpakpa, nyɛle bɔ ni ajwɛŋɔ jogbaŋŋ, nyɛtsɔmɔ mɛi ni abaanyɛ amu afɔ̃ amɛnɔ, nyɛkase nibii ni baaye abua nyɛ yɛ shihilɛ mli, ni nyɛsaa nyɛhe kɛhã nibii ni nyɛbaasumɔ ni nyɛfee wɔsɛɛ.

²⁰ Ekolɛ kɛ́ osusu nibii sɔŋŋ ni esa akɛ ofee koni obatsɔ mɔ ko ni eda yɛ mumɔŋ lɛ ahe lɛ, onuɔ he akɛ onyɛŋ oshɛ he kɔkɔɔkɔ. Shi obaanyɛ. Hã ehi ojwɛŋmɔ mli be fɛɛ be akɛ, Yehowa efee klalo akɛ ebaaye ebua bo. (Yes. 41:​10, 13) Onyɛmimɛi Kristofoi lɛ hu yɛ jɛmɛ. Amɛ hu amɛbaaye amɛbua bo. Kɛ́ obatsɔ mɔ ko ni eda yɛ mumɔŋ lɛ, obaaná miishɛɛ waa, ni otsui baanyɔ omli. Nyɛmimɛi oblahii, wɔsumɔɔ nyɛ waa. Yehowa ajɔɔ nyɛ waa yɛ nyɛhiɛ ni nyɛmiaa koni nyɛbatsɔmɔ mɛi ni edara yɛ mumɔŋ lɛ hewɔ.—Abɛi 22:4.