1. Kɛ́ wɔmiitao wɔda yɛ mumɔŋ lɛ, mɛni esa akɛ wɔfee?

 GBEKƐBII daraa oyayaayai, ni bei pii lɛ kɛ́ wɔna enɛ lɛ, efeɔ wɔ naakpɛɛ. Wɔle akɛ, jeee nɔ ko ni gbekɛbii lɛ feɔ ni hãa amɛdaraa oyayaayai lɛ. Shi kɛ́ wɔmiitao wɔda yɛ mumɔŋ lɛ, no lɛ esa akɛ wɔfee nɔ ko yɛ he. b (1 Kor. 13:11; Heb. 6:1) Esa akɛ wɔfee nibii ni baahã wɔ kɛ Yehowa teŋ naanyobɔɔ lɛ mli awa. Agbɛnɛ hu, esa akɛ wɔbi lɛ ni ehã wɔ emumɔ krɔŋkrɔŋ lɛ koni no aye abua wɔ ni wɔná sui kpakpai, wɔkase nibii ni baaye abua wɔ yɛ shihilɛ mli, ni wɔsaa wɔhe kɛhã sɔ̃i ni ekolɛ wɔbaaná wɔsɛɛ lɛ.—Abɛi 1:5.

2. Mɛni 1 Mose 1:27 lɛ tsɔɔ wɔ? Ni mɛni he wɔbaasusu yɛ nikasemɔ nɛɛ mli?

² Be ni Yehowa bɔ ade lɛ, ebɔ nuu kɛ yoo. (Kanemɔ 1 Mose 1:27.) Esoro nuu gbɔmɔtso, ni esoro yoo gbɔmɔtso. Shi nibii krokomɛi yɛ ni hãa esoroɔ yei yɛ hii ahe. Akɛ nɔkwɛmɔnɔ lɛ, esoro sɔ̃i ni Yehowa etu ewo yei adɛŋ lɛ yɛ sɔ̃i ni etu ewo hii adɛŋ lɛ he, ni amɛ fɛɛ lɛ, ehe miihia ni amɛná sui kɛ hesai ni baaye abua amɛ ni amɛtsu amɛsɔ̃i lɛ ahe nii. (1 Mo. 2:18) Yɛ nikasemɔ nɛɛ mli lɛ, wɔbaakwɛ nɔ ni esa akɛ nyɛmimɛi oblayei afee koni amɛbatsɔmɔ Kristofoi yei ni edara yɛ mumɔŋ. Yɛ nikasemɔ ni nyiɛ sɛɛ mli lɛ, wɔkɛ wɔjwɛŋmɔ baaya nyɛmimɛi oblahii anɔ.

3-4. Namɛi nɛkɛ nyɛmimɛi oblayei baanyɛ amɛkase? (Kwɛmɔ mfoniri lɛ hu.)

³ Awie yei pii ni sumɔɔ Yehowa ni amɛsɔmɔ lɛ lɛ ahe yɛ Biblia  lɛ mli. c Yei nɛɛ jie sui ni awie he yɛ ŋmalɛ ni nikasemɔ lɛ damɔ nɔ lɛ mli lɛ kpo. ‘Amɛŋmɛ pɛpɛɛpɛ yɛ amɛnifeemɔi amli,’ ni ‘amɛye anɔkwa yɛ nibii fɛɛ amli.’ Mɛi krokomɛi ni nyɛmimɛi oblayei baanyɛ akase ji, nyɛmimɛi yei ni edara yɛ mumɔŋ ni yɔɔ amɛsafoi lɛ amli lɛ.

⁴ Nyɛmimɛi oblayei, ani nyɛle nyɛmimɛi yei komɛi ni feɔ nɔkwɛmɔnɔ kpakpa ni nyɛbaanyɛ nyɛkase amɛ? Nyɛkɛ nyɛjwɛŋmɔ ayaa sui kpakpai ni amɛyɔɔ lɛ anɔ, ni nyɛkwɛa akɛ mɛɛ gbɛ nɔ nyɛbaanyɛ nyɛkase amɛ. Yɛ kukuji ni nyiɛ sɛɛ lɛ amli lɛ, wɔbaasusu sui etɛ komɛi ni he hiaa waa ni esa akɛ Kristofoi yei aná lɛ ahe.

5. Kɛ́ oblayoo ko miitao ni ebatsɔ Kristofonyo ni eda yɛ mumɔŋ lɛ, mɛni hewɔ ehe miihia waa ni eba ehe shi?

⁵ Kɛ́ Kristofonyo ko miitao eda yɛ mumɔŋ lɛ, su kome ni he hiaa waa ni esa akɛ ená ji, heshibaa. Kɛ́ yoo ko baa ehe shi lɛ, wekukpaa kpakpa hiɔ ekɛ Yehowa teŋ, kɛ agbɛnɛ hu, ekɛ mɛi krokomɛi ateŋ. (Yak. 4:6) Akɛ nɔkwɛmɔnɔ lɛ, yoo ni sumɔɔ Yehowa lɛ jɛɔ etsui mli ebaa ehe shi ni ekɛ gbɛtsɔɔmɔ ni Yehowa kɛhã yɛ 1 Korintobii 11:3 lɛ tsuɔ nii. Yɛ nakai ŋmalɛ lɛ mli lɛ, Yehowa tsɔɔ mɔ ni ehala ni enyiɛ hiɛ yɛ asafo lɛ mli, kɛ mɔ ni ehala ni enyiɛ hiɛ yɛ weku lɛ mli. d

6. Mɛni Rebeka fee ni tsɔɔ akɛ ebaa ehe shi? Ni mɛɛ gbɛ nɔ nyɛmimɛi oblayei baanyɛ akase lɛ?

⁶ Mɔ ko ni ba ehe shi waa ni nyɛmimɛi oblayei baanyɛ akase ji, Rebeka. Rebeka hiɛ kã shi, ni ewala beiaŋ fɛɛ lɛ, ekpɛ yiŋ kpakpai ni bi ni efee ekãa, ni enyɛ eyɔse nɔ ni esa akɛ efee yɛ shihilɛ fɛɛ shihilɛ mli kɛ be ni esa akɛ efee. (1 Mo. 24:58; 27:​5-17) Fɛɛ sɛɛ lɛ, ebuɔ mɔ, ni eboɔ gbɛtsɔɔmɔ toi. (1 Mo. 24:​17, 18, 65) Kɛ́ bo hu oba ohe shi ni obo mɛi ni Yehowa ehala akɛ amɛnyiɛ hiɛ lɛ toi ni okɛ amɛgbɛtsɔɔmɔ tsu nii lɛ, obaatsɔ mɔ ko ni oweku lɛ mli bii fɛɛ kɛ osafoŋbii lɛ baanyɛ akase.

7. Mɛni Ester fee ni tsɔɔ akɛ ebaa ehe shi? Ni mɛɛ gbɛ nɔ nyɛmimɛi oblayei baanyɛ akase lɛ?

⁷ Nɔ kroko ni hãa anaa akɛ mɔ ko baa ehe shi  ji, kɛ́ mɔ lɛ tɛkeee hegbɛ ni eyɔɔ lɛ. Biblia lɛ kɛɔ akɛ: “Mɔ ni baa ehe shi lɛ, (loo “mɔ ni tɛkeee hegbɛ ni eyɔɔ lɛ,”) ehiɛ kã shi.” (Abɛi 11:2; shn.) Yoo anɔkwafo ko ni jie su nɛɛ kpo ji, Ester. Ester ba ehe shi, ni etɛkeee hegbɛ ni eyɔɔ lɛ. No hewɔ lɛ, be ni awó lɛ maŋnyɛ lɛ, eyeee etsui naa sane. Be ni etsɛkwɛ̃ bi Mordekai ni ye lɛ onukpa lɛ wo lɛ ŋaa lɛ, ebo toi. (Est. 2:​10, 20, 22) Kɛ́ bo hu obi ŋaawoo ni obo ŋaawoo toi lɛ, no baatsɔɔ akɛ obaa ohe shi.—Tito 2:​3-5.

8. Mɛɛ gbɛ nɔ 1 Timoteo 2:​9, 10 lɛ, baanyɛ aye abua nyɛmi yoo ko ni esaa ehe bɔ ni baahã ana akɛ enaaa ehe tsɔ?

⁸ Nɔ kroko ni hãa anaa akɛ mɔ ko baa ehe shi ji, kɛ́ mɔ lɛ enaaa ehe tsɔ. Ester jie su nɛɛ hu kpo. Eyɛ mli akɛ ‘ehe yɛ fɛo’ moŋ, shi efeee nibii ni baagbala mɛi ajwɛŋmɔ kɛba enɔ. (Est. 2:​7, 15) Mɛɛ gbɛ nɔ Kristofoi yei baanyɛ akase Ester yɛ enɛ gbɛfaŋ? Gbɛ kome ji nɔ ni atsɔɔ yɛ 1 Timoteo 2:​9, 10 lɛ. (Kanemɔ.) Bɔfo Paulo kɛɛ Kristofoi yei akɛ, amɛkɛ hiɛ ni gboɔ nɔ kɛ hiɛshikamɔ awula amɛhe. Greek wiemɔi ni Paulo kɛtsu nii yɛ biɛ lɛ hãa wɔnaa akɛ, esa akɛ Kristofoi yei awo atade ni bulɛ yɔɔ he, ni agbɛnɛ hu, amɛsusu bɔ ni mɛi baana amɛhesaamɔ amɛhã lɛ he. Nyɛmimɛi yei ni kɛ hiɛ ni gboɔ nɔ saa nyɛhe, wɔsumɔɔ nyɛsane waa, ni wɔmiihã nyɛ aekoo!

9. Mɛni wɔkaseɔ yɛ Abigail sane lɛ mli?

⁹ Naa su kroko ni nyɛmimɛi yei fɛɛ ni edara yɛ mumɔŋ lɛ jieɔ lɛ kpo. No ji, amɛkɔɔ sane sɛɛ. Shi kɛ́ akɛɛ mɔ ko kɔɔ sane sɛɛ lɛ, te etsɔɔ tɛŋŋ? Etsɔɔ akɛ, mɔ lɛ nyɛɔ ekpaa ekpakpa kɛ efɔŋ mli, ni no sɛɛ lɛ, ehalaa akɛ ebaafee nɔ ni ja. Abigail fee nɔkwɛmɔnɔ kpakpa yɛ enɛ gbɛfaŋ. Be ko lɛ, ewu kpɛ yiŋ gbonyo ko ni kɛ weku muu lɛ fɛɛ wala wo oshãra mli. Shi Abigail kɔ sane sɛɛ ni efee nɔ ko yɛ naagba lɛ he amrɔ nɔŋŋ, ni no here weku muu lɛ fɛɛ yiwala. (1 Sam. 25:​14-23, 32-35) Kɛ́ wɔkɔɔ sane sɛɛ lɛ, no baawa wɔ ni wɔle be ni esa akɛ wɔwie kɛ be ni esa akɛ wɔfee diŋŋ. Agbɛnɛ hu, ebaaye ebua wɔ ni wɔfee nibii ni tsɔɔ akɛ wɔsusuɔ mɛi ahe ni yɛ nakai beiaŋ nɔŋŋ lɛ, wɔkoliii amɛsaji amli.—1 Tes. 4:11.

10-11. Kɛ́ okase nikanemɔ kɛ niŋmaa jogbaŋŋ lɛ, mɛɛ gbɛ nɔ bo kɛ mɛi krokomɛi baaná he sɛɛ? (Kwɛmɔ mfoniri lɛ hu.)

¹⁰ Esa akɛ Kristofoi yei akase nibii ni baaye abua amɛ yɛ shihilɛ mli. Nibii komɛi yɛ ni kɛ́ gbekɛbii yei kase yɛ amɛgbekɛbiiashi lɛ, eyeɔ ebuaa amɛ amɛwala gbii fɛɛ. Naa fioo komɛi.

¹¹ Kasemɔ bɔ ni akaneɔ nii jogbaŋŋ kɛ bɔ ni aŋmaa nii jogbaŋŋ. Yɛ hei komɛi lɛ, mɛi susuɔ akɛ ehe ehiaaa ni yei kaseɔ nikanemɔ kɛ niŋmaa. Shi ehi, ni ehe miihia hu, ni Kristofoi fɛɛ ale nikanemɔ kɛ niŋmaa. e (1 Tim. 4:13) No  hewɔ lɛ, miamɔ ohiɛ ni okase bɔ ni akaneɔ nii jogbaŋŋ kɛ bɔ ni aŋmaa nii jogbaŋŋ, kɛ́ nakai feemɔ wa kɛhã bo po. Kɛ́ ofee nakai lɛ, mɛɛ gbɛ nɔ obaaná he sɛɛ? No baaye ebua bo ni oná nitsumɔ. Agbɛnɛ hu, no baaye ebua bo ni onyɛ okase Nyɔŋmɔ Wiemɔ lɛ jogbaŋŋ ni otsɔɔ mɛi hu. Nɔ ni fe fɛɛ lɛ, kɛ́ onyɛɔ okaneɔ Nyɔŋmɔ Wiemɔ lɛ daa ni ojwɛŋɔ nɔ lɛ, no baahã wekukpaa ni yɔɔ okɛ lɛ teŋ lɛ mli awa.—Yos. 1:8; 1 Tim. 4:15.

12. Mɛɛ gbɛ nɔ Abɛi 31:26 lɛ baanyɛ aye abua bo ni obo sane toi jogbaŋŋ ni owie jogbaŋŋ?

¹² Kasemɔ bɔ ni aboɔ sane toi jogbaŋŋ kɛ bɔ ni akɛ mɔ wieɔ jogbaŋŋ. Esa akɛ Kristofoi ale bɔ ni aboɔ sane toi jogbaŋŋ kɛ bɔ ni akɛ mɔ wieɔ jogbaŋŋ. Yesu kaselɔ Yakobo wo wɔ ŋaa kpakpa yɛ enɛ he. Ewie akɛ: “Esa akɛ mɔ fɛɛ mɔ he afee oya kɛ sane toiboo, ekaye ehe oyai kɛwie.” (Yak. 1:19) Kɛ́ mɔ ko kɛ bo miiwie ni obo lɛ toi jogbaŋŋ lɛ, no hãa mɔ lɛ naa akɛ ‘onuɔ he ohãa lɛ.’ (1 Pet. 3:8) Kɛ́ ekolɛ onuuu nɔ ni mɔ lɛ wieɔ lɛ shishi jogbaŋŋ loo onako bɔ ni enuɔ he ehãa lɛ jogbaŋŋ lɛ, obaanyɛ obi lɛ saji ni baaye abua bo ni ona. Be ni obo lɛ toi ogbe naa lɛ, jwɛŋmɔ nii ahe jogbaŋŋ dani owie. (Abɛi 15:​28, shn.) Bi ohe akɛ: ‘Ani nɔ ni miyawie lɛ anɔkwale ni, ni etswaa mɔ emaa shi? Ani bulɛ yɛ he? Ani ebaahã mɔ lɛ ana akɛ misusuɔ ehe?’ Kasemɔ nyɛmimɛi yei ni edara yɛ mumɔŋ ni le bɔ ni aboɔ sane toi jogbaŋŋ kɛ bɔ ni awieɔ jogbaŋŋ lɛ. (Kanemɔ Abɛi 31:26.) Kɛ́ amɛmiiwie lɛ, bo nɔ ni amɛwieɔ lɛ toi jogbaŋŋ ni okɛ ojwɛŋmɔ aya bɔ ni amɛwieɔ lɛ amɛhãa lɛ nɔ. Kɛ́ oboɔ sane toi jogbaŋŋ ni owieɔ jogbaŋŋ lɛ, okɛ mɛi baahi shi jogbaŋŋ ni toiŋjɔlɛ baahi okɛ amɛ teŋ.

13. Mɛni baaye abua bo ni ole shĩakwɛmɔ jogbaŋŋ? (Kwɛmɔ mfoniri lɛ hu.)

¹³ Kasemɔ bɔ ni akwɛɔ shĩa jogbaŋŋ. Yɛ hei pii lɛ, yei titri tsuɔ shĩa nii. Omami loo nyɛmi yoo kroko ni bɔɔ mɔdɛŋ baanyɛ aye abua bo ni ole bɔ ni atsuɔ shĩa nii jogbaŋŋ. Nyɛmi yoo ko ni atsɛɔ lɛ Cindy lɛ wie akɛ: “Nɔ kome ni hi waa ni mimami tsɔɔ mi ji, kɛ́ misumɔɔ nitsumɔ lɛ, maná miishɛɛ. Etsɔɔ mi nihoomɔ, shĩasaamɔ, nikpɛɛ, kɛ bɔ ni akɛ shika fioo héɔ nii, ni enɛ ye ebua mi yɛ shihilɛ mli ni ehã minyɛ mitsu babaoo yɛ Yehowa sɔɔmɔ lɛ mli. Agbɛnɛ hu, etsɔɔ mi akɛ esa akɛ mafee mɛi gbɔ, ni enɛ ye ebua mi ni mibale nyɛmimɛi ni bɔɔ mɔdɛŋ yɛ anɔkwale lɛ mli ni manyɛ makase amɛ.” (Abɛi 31:​15, 21, 22) Yoo ni hiɛ wa kɛ nitsumɔ, ni feɔ mɔ gbɔ, ni le shĩakwɛmɔ lɛ yeɔ ebuaa eweku lɛ kɛ asafo lɛ waa.—Abɛi 31:​13, 17, 27; Bɔf. 16:15.

14. Mɛni okaseɔ yɛ Crystal sane lɛ mli? Ni mɛni baaye abua bo ni oshɛ otii ni okɛmamɔ ohiɛ lɛ ahe?

¹⁴ Kasemɔ bɔ ni obaafee okwɛ ohe. Nɔ kome ni he hiaa waa ni esa akɛ Kristofoi fɛɛ ni edara yɛ mumɔŋ lɛ akase ji, bɔ ni amɛbaafee amɛkwɛ amɛhe ni amɛmii ashɛ nibii ni amɛyɔɔ lɛ ahe. (Fip. 4:11; 2 Tes. 3:​7, 8) Nyɛmi yoo ko ni atsɛɔ lɛ Crystal lɛ wie akɛ: “Be ni mibaya sɛkɛndre skul lɛ, mifɔlɔi wo mi hewalɛ ni mikase ninenaa nitsumɔ loo nɔ ko ni manyɛ mikɛkwɛ mihe  wɔsɛɛ. Mipapa wo mi ŋaa ni mikase shika he akɔntaabuu, ni no ye ebua mi waa.” Nɔ kroko ni esa akɛ okase ji, bɔ ni obaafee oto shika ni baa odɛŋ lɛ he gbɛjianɔ jogbaŋŋ bɔ ni ohe fiŋ bo. (Abɛi 31:​16, 18) Kɛ́ omii shɛɔ nii ni oyɔɔ lɛ ahe ni ofiliii nii basabasa lɛ, obaanyɛ oshɛ otii ni okɛmamɔ ohiɛ yɛ Yehowa sɔɔmɔ lɛ mli lɛ ahe.—1 Tim. 6:8.

15-16. Mɛɛ gbɛ nɔ nyɛmimɛi yei oshijafoi yeɔ amɛbuaa asafo lɛ? (Marko 10:​29, 30)

¹⁵ Kɛ́ ofee nibii ni baahã oná sui kpakpai, ni okase nibii ni baaye abua bo yɛ shihilɛ mli lɛ, no baawa bo ni otsu sɔ̃i ni ekolɛ obaaná wɔsɛɛ lɛ ahe nii jogbaŋŋ. Naa nibii komɛi ni ekolɛ obaasumɔ ni ofee wɔsɛɛ.

¹⁶ Ekolɛ obaasumɔ ni oye oshija kɛyashi be ko. Tamɔ bɔ ni Yesu wie lɛ, nyɛmimɛi yei komɛi ekpɛ amɛyiŋ akɛ amɛboteŋ gbalashihilɛ mli kɛ́ mɛi ni yɔɔ he ni amɛyɔɔ lɛ wieɔ amɛshiɔ oshijayeli po. (Mat. 19:​10-12) Nyɛmimɛi yei komɛi hu yɛ ni shihilɛ ko hewɔ amɛkã he amɛji oshijafoi lɛ. Kɛ́ oshijafo ji bo lɛ, wɔmiisumɔ ni ole akɛ Yehowa kɛ Yesu ebuuu bo akɛ ohe bɛ sɛɛnamɔ akɛni oboteko gbalashihilɛ mli lɛ hewɔ. Yɛ je lɛŋ fɛɛ lɛ, nyɛmimɛi yei oshijafoi miiye amɛmiibua asafo lɛ waa. Amɛsumɔɔ amɛnyɛmimɛi lɛ asane, ni amɛsusuɔ amɛhe, ni enɛ ehã amɛbatsɔmɔ tamɔ nyɛmimɛi yei kɛ mamimɛi amɛhã mɛi pii yɛ asafo lɛ mli.—Kanemɔ Marko 10:​29, 30; 1 Tim. 5:2.

17. Mɛni Kristofonyo oblayoo ko baanyɛ afee bianɛ koni no awa lɛ ni enyɛ ebote be fɛɛ sɔɔmɔ nitsumɔ lɛ mli?

¹⁷ Be fɛɛ sɔɔmɔ nitsumɔ lɛ. Nyɛmimɛi yei ji mɛi titri ni tsuɔ shiɛmɔ nitsumɔ lɛ yɛ jeŋ fɛɛ. (Lala 68:11) Ani obaanyɛ okɛma ohiɛ akɛ obaabote be fɛɛ sɔɔmɔ nitsumɔ lɛ mli, ni ekolɛ osɔmɔ akɛ gbɛgbalɔ, oye obua kɛ asafo lɛ tsũi amaamɔ, loo oyasɔmɔ yɛ Betel? Kɛ́ nakai lɛ, obaanyɛ obɔi he gbɛjianɔtoo bianɛ. Sɔlemɔ yɛ oti ni okɛma ohiɛ lɛ he, ni okɛ mɛi ni enyɛ eshɛ nakai oti lɛ he lɛ agba sane koni ona nɔ ni esa akɛ ofee koni onyɛ oshɛ he. No sɛɛ lɛ, too gbɛjianɔ ni baaye abua bo ni onyɛ oshɛ he. Kɛ́ omia ohiɛ oshɛ oti ni okɛma ohiɛ lɛ he lɛ, obaaná hegbɛ otsu nibii babaoo yɛ Yehowa sɔɔmɔ lɛ mli ni baahã oná miishɛɛ.

18. Kɛ́ nyɛmi yoo ji bo lɛ, mɛni hewɔ esa akɛ okɛ hiɛshikamɔ ahala mɔ ni obaasumɔ ni okɛbote gbalashihilɛ mli lɛ? (Kwɛmɔ mfoniri lɛ hu.)

¹⁸ Ekolɛ obaabote gbalashihilɛ mli. Sui kɛ hesai ni wɔsusu he yɛ nikasemɔ nɛɛ mli lɛ baaye abua bo ni otsɔ ŋa kpakpa. Kɛ́ okpɛ oyiŋ akɛ obaabote gbalashihilɛ mli lɛ, esa akɛ okɛ  hiɛshikamɔ ahala mɔ ni obaasumɔ ni okɛbote mli. Enɛ ji yiŋ ni he hiaa waa ni obaakpɛ yɛ shihilɛ mli lɛ ateŋ ekome. Hã ehi ojwɛŋmɔ mli akɛ, nuu ni obaahala akɛ okɛ lɛ baabote gbalashihilɛ mli lɛ, lɛ eyitsoyeli shishi obaayaje. (Rom. 7:2; Efe. 5:​23, 33) No hewɔ lɛ, bi ohe akɛ: ‘Nuu lɛ ni mitaoɔ mikɛ lɛ abote gbalashihilɛ mli lɛ, ani eji Kristofonyo kpakpa? Ani Yehowa sɔɔmɔ lɛ he hiaa lɛ yɛ shihilɛ mli fe nɔ fɛɛ nɔ? Ani ekpɛɔ yiŋ kpakpai? Kɛ́ etɔ̃ lɛ, ani ekpɛlɛɔ nɔ akɛ etɔ̃? Te ekɛ yei yeɔ ehãa tɛŋŋ? Ani ebaanyɛ eye ebua mi ni wekukpaa ni yɔɔ mi kɛ Yehowa teŋ lɛ mli awa? Ani ebaanyɛ ekwɛ mi? Ani ebaanyɛ ekɛ mi ahi shi jogbaŋŋ ni wɔbatsɔmɔ nanemɛi kpaakpai? Kɛ́ akɛ nitsumɔ wo edɛŋ lɛ, ani etsuɔ lɛ jogbaŋŋ ni etsuɔ yɛ be naa? Akɛ nɔkwɛmɔnɔ lɛ, mɛɛ nitsumɔi akɛwo edɛŋ yɛ asafo lɛ mli, ni te etsuɔ amɛhe nii ehãa tɛŋŋ?’ (Luka 16:10; 1 Tim. 5:8) Hã ehi ojwɛŋmɔ mli akɛ, kɛ́ ootao oná wu kpakpa lɛ, belɛ esa akɛ ofee nibii ni baahã ana akɛ obaafee ŋa kpakpa.

19. Mɛni hewɔ esa akɛ ŋamɛi aná miishɛɛ waa akɛ Biblia lɛ tsɛɔ amɛ amɛwumɛi lɛ ‘ayelikɛbualɔi’ lɛ?

¹⁹ Biblia lɛ kɛɛ yoo kpakpa lɛ, eji “yelikɛbualɔ” kɛ “hefatalɔ ni sa” kɛhã ewu lɛ. (1 Mo. 2:18) Mɛi komɛi nuɔ he akɛ wiemɔi nɛɛ tsɔɔ akɛ yei baa shi loo amɛhe bɛ sɛɛnamɔ tamɔ hii. Shi ani nakai eji? Dabi kwraa! Wiemɔi nɛɛ woɔ yei ahiɛ nyam moŋ. Anɔkwa, ŋmalɛi pii yɛ Biblia lɛ mli ni wieɔ Yehowa he akɛ eji ‘yelikɛbualɔ.’ (Lala 54:4; Heb. 13:6) Kɛ́ yoo ko kɛ ewu feɔ ekome, ni eyeɔ ebuaa lɛ koni enyɛ etsu yiŋ ni ekpɛ yɛ weku lɛ mli lɛ he nii lɛ, wɔbaanyɛ wɔkɛɛ akɛ eji yelikɛbualɔ kpakpa. Yoo ni sumɔɔ Yehowa lɛ baafee nibii ni baahã mɛi ana ewu lɛ sui kpakpai lɛ. (Abɛi 31:​11, 12; 1 Tim. 3:11) Kɛ́ ootao otsɔ ŋa kpakpa wɔsɛɛ lɛ, belɛ feemɔ nibii ni baahã osumɔ Yehowa waa bianɛ, ni oye obua mɛi yɛ shĩa, kɛ agbɛnɛ hu, yɛ asafo lɛ mli.

20. Kɛ́ otsɔ nyɛ kpakpa lɛ, mɛɛ gbɛ nɔ oweku lɛ baaná he sɛɛ?

²⁰ Ekolɛ obaasumɔ ni ofɔ. Kɛ́ obote gbalashihilɛ mli lɛ, ekolɛ okɛ owu lɛ baasumɔ ni nyɛfɔ. (Lala 127:3) No hewɔ lɛ, nilee yɛ mli akɛ obaasusu bɔ ni obaafee otsɔ nyɛ kpakpa wɔsɛɛ lɛ he. Sui kɛ hesai ni wɔsusu he yɛ nikasemɔ nɛɛ mli lɛ baaye abua bo ni otsɔ ŋa kpakpa kɛ nyɛ kpakpa. Kɛ́ osumɔɔ oweku lɛ, omli hi, ni otoɔ otsui shi lɛ, miishɛɛ baahi oweku lɛ mli, ni obii lɛ baana akɛ amɛyɛ shweshweeshwe ni asumɔɔ amɛ.—Abɛi 24:3.

21. Te onaa wɔnyɛmimɛi yei lɛ ohãa tɛŋŋ? Ni mɛni hewɔ? (Kwɛmɔ mfoniri ni yɔɔ wolo lɛ hiɛ lɛ.)

²¹ Nyɛmimɛi oblayei, wɔsumɔɔ nyɛ waa yɛ nibii pii ni nyɛfeɔ nyɛhãa Yehowa kɛ ewebii lɛ ahewɔ. (Heb. 6:10) Nyɛmiaa nyɛhiɛ nyɛfeɔ nibii ni baahã nyɛná sui kpakpai, nyɛkaseɔ nibii ni baahã nyɛ kɛ mɛi ni bɔle nyɛ lɛ aná shihilɛ kpakpa ni amɛná miishɛɛ, ni nyɛfeɔ nibii ni baawa nyɛ ni nyɛnyɛ nyɛtsu sɔ̃i ni ekolɛ nyɛbaaná wɔsɛɛ lɛ ahe nii jogbaŋŋ. Nyɛmimɛi oblayei, Yehowa asafo lɛ shwɛɛɛ nyɛhe kwraa!