1. Mɛni hewɔ wɔbaanyɛ wɔkɛɛ akɛ Abraham hiɛnɔkamɔ lɛ efeee efolo lɛ?

 YEHOWA wo enaanyo Abraham shi akɛ, ebaafɔ binuu, ni binuu nɛɛ nɔ shikpɔŋ lɛ nɔ jeŋmaji fɛɛ baatsɔ aná jɔɔmɔ. (1 Mo. 15:5; 22:18) Abraham he Nyɔŋmɔ nɔ eye waa, no hewɔ lɛ, eyiŋ efeee lɛ kɔshikɔshi bibioo po akɛ shiwoo nɛɛ baaba mli. Be ni Abraham eye afii 100, ni eŋa eye afii 90 po lɛ, no mli lɛ amɛfɔko binuu ni awo ehe shi lɛ lolo. (1 Mo. 21:​1-7) Shi Biblia lɛ kɛɛ: “[Abraham ná] hiɛnɔkamɔ ni ehe eye hu akɛ ebaatsɔ jeŋmaji pii atsɛ yɛ nɔ ni awie lɛ naa.” (Rom. 4:18) Abraham hiɛnɔkamɔ lɛ ba mli. Tamɔ bɔ ni wɔ fɛɛ wɔle lɛ, ebafɔ binuu ni atsɛɔ lɛ Isak. Mɛni hã Abraham ná nɔmimaa waa akɛ nɔ ni Nyɔŋmɔ ewie lɛ baaba mli?

2. Mɛni hã Abraham ná nɔmimaa waa akɛ, nɔ ni Yehowa ewie lɛ baaba mli?

² Abraham le Yehowa jogbaŋŋ, ni enɛ ji nɔ ni hã “ená nɔmimaa kwraa akɛ nɔ ni Nyɔŋmɔ ewo he shi lɛ” baaba mli. (Rom. 4:21) Abraham hemɔkɛyeli lɛ hewɔ lɛ, Yehowa ná ehe miishɛɛ ni ebu lɛ jalɔ. (Yak. 2:23) Romabii 4:18 lɛ kɛɔ akɛ Abraham ná hiɛnɔkamɔ ni ehe eye hu. No hewɔ lɛ, agbɛnɛ, hã wɔkwɛ nɔ ni bɔfo Paulo wie yɛ hiɛnɔkamɔ he yɛ Romabii yitso 5 lɛ mli.

3. Mɛni Paulo wie yɛ hiɛnɔkamɔ he?

³ Yɛ Romabii yitso 5 lɛ mli lɛ, Paulo tsɔɔ nɔ hewɔ ni wɔbaanyɛ wɔná nɔmimaa akɛ ‘wɔhiɛnɔkamɔ lɛ hãŋ wɔnine anyɛ shi.’  (Rom. 5:5) Agbɛnɛ hu, etsɔɔ wɔ nɔ ni wɔbaanyɛ wɔfee akɛ Kristofoi koni wɔhiɛnɔkamɔ lɛ mli awa. Be ni wɔsusuɔ nɔ ni Paulo wie yɛ Romabii 5:​1-5 lɛ he lɛ, okɛto bo diɛŋtsɛ ohe okwɛ. Ekolɛ enɛ baahã ona akɛ, hiɛnɔkamɔ ni oyɔɔ akɛ Kristofonyo lɛ mli ewa fe tsutsu lɛ. Agbɛnɛ hu, ebaaye ebua bo ni ona nɔ ni obaanyɛ ofee koni ohiɛnɔkamɔ lɛ mli awa. Shi dani wɔbaaya no nɔ lɛ, hã wɔsusu hiɛnɔkamɔ ko ni nɔ bɛ ni Paulo kɛɛ ehãŋ wɔnine anyɛ shi lɛ he.

4. Mɛni Paulo wie he yɛ Romabii 5:​1, 2 lɛ?

⁴ Kanemɔ Romabii 5:​1, 2. Paulo ŋma wolo nɛɛ eyahã asafo ni yɔɔ Roma lɛ. Nyɛmimɛi ni yɔɔ asafo nɛɛ mli lɛ kase Yehowa kɛ Yesu he nii, amɛhe amɛnɔ amɛye, ni amɛbatsɔmɔ Kristofoi. Amɛhemɔkɛyeli lɛ hewɔ lɛ, Nyɔŋmɔ bu amɛ jalɔi, ni ekɛ mumɔ krɔŋkrɔŋ lɛ fɔ amɛ mu. Enɛ hã amɛbaná hiɛnɔkamɔ ko ni nɔ bɛ ni baanyɛ aba mli hu.

5. Mɛɛ hiɛnɔkamɔ mɛi ni afɔ amɛ mu lɛ yɔɔ?

⁵ Sɛɛ mli lɛ, Paulo ŋma wolo emaje Kristofoi ni afɔ amɛ mu ni yɔɔ Efeso lɛ ni ewie hiɛnɔkamɔ ni Nyɔŋmɔ ehã amɛ lɛ he. Nakai hiɛnɔkamɔ lɛ ji, amɛbaaná “gboshinii kɛhã mɛi krɔŋkrɔŋi lɛ.” (Efe. 1:18) Agbɛnɛ hu, be ni Paulo ŋma wolo emaje Kolosebii lɛ, etsɔɔ amɛ he ni amɛhiɛnɔkamɔ lɛ baaba mli yɛ. Etsɛ amɛhiɛnɔkamɔ lɛ akɛ, ‘hiɛnɔkamɔ ni akɛto ahã amɛ yɛ ŋwɛi.’ (Kol. 1:​4, 5) Saji nɛɛ ni Paulo wie lɛ hãa wɔnaa akɛ, Kristofoi ni afɔ amɛ mu lɛ ahiɛnɔkamɔ ji, abaatee amɛ shi kɛya ŋwɛi, amɛbaahi shi kɛya naanɔ yɛ jɛmɛ, ni amɛkɛ Kristo baaye maŋtsɛ.—1 Tes. 4:​13-17; Kpo. 20:6.

6. Mɛni nyɛmi nuu ko ni afɔ lɛ mu lɛ wie yɛ ehiɛnɔkamɔ lɛ he?

⁶ Kristofoi ni afɔ amɛ mu lɛ shwɛɛɛ hiɛnɔkamɔ nɛɛ he kwraa. Amɛteŋ mɔ kome ni atsɛɔ lɛ Nyɛminuu Frederick Franz, ni kɛ afii pii sɔmɔ Yehowa lɛ jɛ etsuiŋ ewie yɛ afi 1991 akɛ: “Wɔhiɛnɔkamɔ lɛ ji anɔkwale, ni ebaaba  mli yɛ asafoku bibioo ni ji 144,000 lɛ mlibii lɛ ateŋ naagbee mɔ kwraa he kɛteke nɔ ni wɔsusu lɛ po. . . . [Wɔlaajeko] wɔhenumɔ ni kɔɔ bɔ ni nakai hiɛnɔkamɔ lɛ jara wa hã lɛ. . . . Wɔhiɛ miisɔ enɛ babaoo bei abɔ ni ebiɔ ni wɔkɛ be kakadaŋŋ amɛ lɛ. Eji nɔ ko ni esa akɛ wɔmɛ, kɛ́ ebiɔ afii akpeiakpe po. Mibuɔ wɔhiɛnɔkamɔ lɛ waa bianɛ fe be fɛɛ.”

7-8. Mɛɛ hiɛnɔkamɔ Yehowa tsuji ni yɔɔ ŋmɛnɛ lɛ ateŋ mɛi pii yɔɔ? (Romabii 8:​20, 21)

⁷ Mɛi ni jáa Yehowa ŋmɛnɛ lɛ ateŋ mɛi babaoo yɛ hiɛnɔkamɔ kroko. Nakai hiɛnɔkamɔ lɛ ji, amɛbaahi shi kɛya naanɔ yɛ shikpɔŋ lɛ nɔ yɛ Nyɔŋmɔ Maŋtsɛyeli lɛ shishi, ni nakai hiɛnɔkamɔ lɛ nɔŋŋ ji hiɛnɔkamɔ ni no mli lɛ Abraham yɔɔ lɛ. (Heb. 11:​8-10, 13) Paulo wie jɔɔmɔi ni mɛi ni yɔɔ hiɛnɔkamɔ nɛɛ baaná lɛ ahe. (Kanemɔ Romabii 8:​20, 21.) Klɛŋklɛŋ be ni oná ole jɔɔmɔi ni Biblia lɛ ewo shi akɛ wɔbaaná wɔsɛɛ lɛ, te nɔ ni oná he miishɛɛ waa? Ani shi ni Biblia lɛ ewo akɛ, wɔsɛɛ lɛ wɔbaaye emuu, ni wɔfeŋ esha dɔŋŋ lɛ? Aloo shi ni awo akɛ wɔsɛɛ lɛ, abaatee mɛi ni wɔsumɔɔ amɛsane ni egboi lɛ ashi ni amɛhi shi kɛya naanɔ yɛ Paradeiso mli yɛ shikpɔŋ lɛ nɔ lɛ? Ekɔɔɔ he eko emli nɔ ni ji lɛ, hiɛnɔkamɔ nɛɛ hã okɛ miishɛɛ kpa nibii ni baaba wɔsɛɛ lɛ gbɛ.

⁸ Kɛ́ wɔhiɛnɔkamɔ ji wɔbaahi shi kɛya naanɔ yɛ ŋwɛi jio, shikpɔŋ lɛ nɔ jio, wɔyɛ hiɛnɔkamɔ ni nɔ bɛ ni baanyɛ ahã wɔná miishɛɛ. Ni hiɛnɔkamɔ ni wɔyɔɔ lɛ mli baanyɛ awa. Nɔ ni Paulo wie yɛ Romabii 5:3 lɛ tsɔɔ wɔ nɔ ni kɛ́ wɔfee lɛ ebaaba lɛ nakai. Nyɛhãa wɔkwɛa nɔ ni ewie yɛ jɛmɛ yɛ wɔhiɛnɔkamɔ lɛ he. Enɛ baaye ebua wɔ ni wɔhe wɔye waa akɛ, nɔ ni wɔhiɛ kã nɔ lɛ baaba mli.

9-10. Tamɔ bɔ ni eba lɛ yɛ Paulo gbɛfaŋ lɛ, mɛni esa akɛ Kristofoi akpa gbɛ? (Romabii 5:3) (Kwɛmɔ mfonirii lɛ hu.)

⁹ Kanemɔ Romabii 5:3. Paulo wie akɛ, kɛ́ wɔna amanehulu lɛ, ebaanyɛ ehã wɔhiɛnɔkamɔ lɛ mli awa. Ekolɛ enɛ baahã wɔhiɛ afee wɔ yaa fioo. Shi esa akɛ Kristo sɛɛnyiɛlɔi fɛɛ akpa gbɛ akɛ amɛbaana amanehulu ko kɛ̃.  Wɔkɛ bɔfo Paulo afee enɛ he nɔkwɛmɔnɔ. Ekɛɛ Kristofoi ni yɔɔ Tesalonika lɛ akɛ: “Be ni wɔkɛ nyɛ yɔɔ lɛ, wɔkɛɛ nyɛ wɔto akɛ wɔbaana amanehulu, ni tamɔ bɔ ni nyɛle lɛ, eba mli nakai.” (1 Tes. 3:4) Ni ekɛɛ Kristofoi ni yɔɔ Korinto lɛ hu akɛ: “Nyɛmimɛi, wɔsumɔɔɔ ni wɔkɛ amanehulu ni wɔkɛkpe . . . lɛ atee nyɛ. . . . Wɔhiɛ kãaa wɔwala nɔ po.”—2 Kor. 1:8; 11:​23-27.

¹⁰ Kristofoi ni yɔɔ ŋmɛnɛ lɛ hu baanyɛ akpa gbɛ akɛ amɛbaana amanehulu. (2 Tim. 3:12) Te tɛŋŋ? Be ni ohe Yesu nɔ oye ni obɔi esɛɛnyiɛmɔ nɛɛ, ani ona amanehulu ko? Ani onanemɛi kɛ owekumɛi yeɔ ohe fɛo loo amɛwaa bo yi po? Ani ofai shi ni otswa akɛ obaaye anɔkwa yɛ nibii fɛɛ mli lɛ hewɔ lɛ, onáaa nibii mlɛo yɛ nitsumɔhe lɛ? (Heb. 13:18) Ani shiɛmɔ nitsumɔ lɛ hewɔ lɛ, amralofoi lɛ miiwa bo yi? Ekɔɔɔ he eko amanehulu ni wɔnaa bianɛ lɛ, Paulo kɛɛ wɔnya. Mɛni hewɔ?

11. Mɛni hewɔ esa akɛ wɔtswa wɔfai shi akɛ wɔbaafi shi yɛ amanehului amli lɛ?

¹¹ Kɛ́ wɔmiina amanehulu po lɛ, esa akɛ wɔná miishɛɛ, ejaakɛ wɔle akɛ nakai amanehulu lɛ baanyɛ aye abua wɔ ni wɔná su ko ni he hiaa waa. Romabii 5:3 lɛ kɛɛ: “Amanehulu lɛ tsɛɔ shifimɔ kɛbaa.” Kristofonyo fɛɛ Kristofonyo baana amanehulu. No hewɔ lɛ, esa akɛ Kristofoi fɛɛ akase bɔ ni afiɔ shi. Esa akɛ wɔtswa wɔfai shi akɛ, wɔbaafi shi ekɔɔɔ he eko amanehulu ni wɔkɛbaakpe. Anɔkwa, ja wɔfi shi dani wɔnine baashɛ nɔ ni wɔhiɛ kã nɔ lɛ nɔ. Esaaa akɛ wɔfeɔ wɔnii tamɔ mɛi ni yɔɔ Yesu jwɛŋmɔ mli be ni ewie dumɔwui ni yashwie tɛsai anɔ lɛ ahe lɛ. Yesu kɛɛ amɛmɔɔ wiemɔ lɛ mli kɛ miishɛɛ, shi ‘kɛ́ amanehulu loo yiwaa te shi lɛ, amɛnane tɔtɔ̃ɔ.’ (Mat. 13:​5, 6, 20, 21) Lɛɛlɛŋ, kɛ́ aate shi aawo wɔ loo wɔmiina amanehulu ko lɛ, eŋɔɔɔ, shi kɛ́ wɔfi shi yɛ mli lɛ, wɔnáa he sɛɛ waa. Yɛ mɛɛ gbɛ nɔ?

12. Kɛ́ wɔfi shi lɛ, mɛɛ gbɛ nɔ wɔnáa he sɛɛ?

¹² Yakobo tsɔɔ sɛɛnamɔi ni jɛɔ shifimɔ mli kɛbaa. Ewie akɛ: “Nyɛhãa shifimɔ lɛ agbea enitsumɔ naa, koni nyɛye emuu ni nyɛhi kɛwula shi yɛ gbɛ fɛɛ gbɛ nɔ, koni ekashwɛ nyɛ nɔ ko.” (Yak. 1:​2-4) Yakobo wie shifimɔ he akɛ, akɛ nitsumɔ ko ewo edɛŋ ni esa akɛ etsu. Mɛɛ nitsumɔ akɛwo edɛŋ lɛ? Enitsumɔ ji, ni eye ebua bo koni oto otsui shi waa, ohemɔkɛyeli mli awa, ni okɛ ohiɛ afɔ̃ Nyɔŋmɔ nɔ yɛ nɔ fɛɛ nɔ mli. Shi nɔ kroko yɛ ni he hiaa ni shifimɔ hãa wɔnáa.

13-14. Mɛni shifimɔ hãa wɔnáa? Ni mɛɛ gbɛ nɔ enɛ saa wɔhiɛnɔkamɔ lɛ he? (Romabii 5:4)

¹³ Kanemɔ Romabii 5:4. Paulo kɛɛ, shifimɔ tsɛɔ “shihilɛ ni Nyɔŋmɔ náa he miishɛɛ” kɛbaa. No hewɔ lɛ, kɛ́ ofi shi lɛ, no baahã Yehowa aná ohe miishɛɛ. Enɛ etsɔɔɔ akɛ kɛ́ aawa wɔ yi loo wɔkɛ shihilɛ ko ni mli wa miikpe lɛ eŋɔɔ Yehowa naa. Nɔ ni ŋɔɔ enaa moŋ ji, bɔ ni ofiɔ shi lɛ, ni no ji nɔ ni hãa enáa ohe miishɛɛ lɛ. Enɛ ji jɔɔmɔ wulu diɛŋtsɛ, aloo jeee nakai?—Lala 5:12.

¹⁴ Kaimɔ akɛ, Yehowa ná Abraham he miishɛɛ yɛ bɔ ni efi shi yɛ shihilɛi ni mli wawai ni ekɛkpe lɛ amli lɛ hewɔ. Ebatsɔ Yehowa naanyo, ni Yehowa bu lɛ akɛ jalɔ. (1 Mo. 15:6; Rom. 4:​13, 22) Wɔ hu ebaanyɛ ena wɔ nakai. Yehowa lɛ, jeee nibii abɔ ni wɔtsuɔ yɛ esɔɔmɔ lɛ mli loo sɔɔmɔ hegbɛi ni wɔyɔɔ lɛ ni hãa enáa wɔhe miishɛɛ. Moŋ lɛ, bɔ ni wɔfiɔ shi ni wɔyeɔ lɛ anɔkwa lɛ ni hãa enáa wɔhe miishɛɛ. Ni wɔle akɛ, ekɔɔɔ he eko afii abɔ ni wɔye, shihilɛ mli ni wɔyɔɔ, loo wɔnyɛmɔi lɛ, wɔ fɛɛ wɔbaanyɛ wɔfi shi. Ani oofi shi yɛ shihilɛ ko mli bianɛ? Kɛ́ nakai lɛ, ná ole akɛ, Yehowa yɛ ohe miishɛɛ. Kɛ́ wɔna akɛ Yehowa yɛ wɔhe  miishɛɛ lɛ, no baanyɛ aye abua wɔ waa, ebaanyɛ ehã wɔhiɛnɔkamɔ lɛ mli awa.

15. Mɛni Paulo wie kɛtsa esane lɛ nɔ? Ni mɛni hewɔ enɛ baanyɛ ahã mɛi komɛi ahiɛ afee amɛ yaa lɛ?

¹⁵ Paulo tsɔɔ mli akɛ, kɛ́ wɔfi shi yɛ shihilɛi ni mli wawai amli lɛ, Yehowa náa wɔhe miishɛɛ. Kadimɔ nɔ ni Paulo wie kɛnyiɛ sɛɛ. Ewie akɛ: “Shihilɛ ni Nyɔŋmɔ náa he miishɛɛ lɛ hu tsɛɔ hiɛnɔkamɔ kɛbaa, ni hiɛnɔkamɔ lɛ hãaa mɔ nine anyɛ shi.” (Rom. 5:​4, 5) Ekolɛ nɔ ni Paulo wie nɛɛ baahã mɛi komɛi ahiɛ afee amɛ yaa fioo. Mɛni hewɔ? Ejaakɛ yɛ Romabii 5:2 lɛ, Paulo etsɔ hiɛ ewie akɛ, Kristofoi ni yɔɔ Roma lɛ yɛ hiɛnɔkamɔ momo, ni ji “Nyɔŋmɔ anunyam lɛ he hiɛnɔkamɔ lɛ.” Enɛ hewɔ lɛ, ekolɛ mɔ ko baabi akɛ, ‘Kɛ́ nakai Kristofoi lɛ yɛ hiɛnɔkamɔ momo lɛ, mɛni hewɔ Paulo tsĩɔ hiɛnɔkamɔ tã ekoŋŋ yɛ ŋmalɛ nɛɛ mli lɛ?’

16. Mɛni hãa mɔ ko hiɛnɔkamɔ mli waa fiofio? (Kwɛmɔ mfonirii lɛ hu.)

¹⁶ Ja wɔnaa hiɛnɔkamɔ akɛ nɔ ko ni mli baanyɛ awa dani wɔbaanyɛ wɔnu nɔ ni Paulo tsɔɔ lɛ shishi. Akɛ nɔkwɛmɔnɔ lɛ, okaiɔ be klɛŋklɛŋ ni ole nibii ni Nyɔŋmɔ Wiemɔ lɛ tsɔɔ akɛ Nyɔŋmɔ baafee ehã wɔ lɛ? Ekolɛ be ni ole akɛ Nyɔŋmɔ baahã wɔhi shi kɛya naanɔ yɛ paradeiso lɛ mli lɛ, ona lɛ adesã ko kɛkɛ. Shi be ni obale Yehowa jogbaŋŋ kɛ nibii ni ewo shi yɛ Biblia lɛ mli akɛ ebaafee lɛ, enɛ hã ohe oye waa akɛ hiɛnɔkamɔ nɛɛ baaba mli.

17. Yɛ ohenɔjɔɔmɔ kɛ obaptisimɔ lɛ sɛɛ lɛ, mɛɛ gbɛ nɔ ohiɛnɔkamɔ lɛ mli ewa fe tsutsu lɛ?

¹⁷ Yɛ ohenɔjɔɔmɔ kɛ obaptisimɔ lɛ sɛɛ lɛ, otee nɔ okase Yehowa he nii, ni no ehã obasumɔ lɛ waa. Enɛ ehã oná nɔmimaa waa akɛ, ohiɛnɔkamɔ lɛ baaba mli. (Heb. 5:13–6:1) Ekolɛ otsɔ nɔ ni Romabii 5:​2-4 lɛ wie lɛ hu mli. Okɛ amanehului srɔtoi kpe, ni ofi shi yɛ fɛɛ mli, ni bianɛ lɛ onuɔ he akɛ Yehowa yɛ ohe miishɛɛ. Akɛni ole akɛ Yehowa yɛ ohe miishɛɛ waa hewɔ lɛ, onuɔ he akɛ nibii ni ewo shi akɛ ebaafee ehã bo lɛ, baaba mli. Ohiɛnɔkamɔ lɛ mli ewa fe tsutsu lɛ, oheɔ oyeɔ akɛ ejeee  adesã ko kɛkɛ, eji nɔ ko ni baaba mli lɛɛlɛŋ. Esaa nɔ fɛɛ nɔ ni ofeɔ lɛ he; esaa bɔ ni ohiɔ shi ohãa, bɔ ni okɛ oweku lɛ yeɔ ohãa, bɔ ni okpɛɔ yiŋ ohãa, kɛ bɔ ni okɛ obe tsuɔ nii ohãa lɛ he.

18. Mɛni Yehowa kɛ emumɔ lɛ tsirɛ Paulo ni ewie ni maa nɔ mi akɛ ohiɛnɔkamɔ lɛ baaba mli?

¹⁸ Bɔfo Paulo wie nɔ ko ni he hiaa waa yɛ hiɛnɔkamɔ ni obaná be ni Nyɔŋmɔ ená ohe miishɛɛ sɛɛ lɛ he. Ekɛɛ hiɛnɔkamɔ ni oná nɛɛ baaba mli. Mɛni hewɔ obaanyɛ ohe oye akɛ ebaaba mli lɛ? Nyɔŋmɔ kɛ emumɔ lɛ tsirɛ Paulo ni ewie nɔ ko ni maa nɔ mi akɛ ebaaba mli. Ewie akɛ: “Hiɛnɔkamɔ lɛ hãaa mɔ nine anyɛ shi; ejaakɛ atsɔ mumɔ krɔŋkrɔŋ ni akɛhã wɔ lɛ nɔ afɔse Nyɔŋmɔ suɔmɔ lɛ awo wɔtsuii amli.” (Rom. 5:5) Obaanyɛ ohe oye waa akɛ, hiɛnɔkamɔ ni Nyɔŋmɔ ehã oná lɛ baaba mli.

19. Mɛni oheɔ oyeɔ waa yɛ ohiɛnɔkamɔ lɛ he?

¹⁹ Kaimɔ shi ni Yehowa wo Abraham kɛ bɔ ni fee ni ená ehe miishɛɛ ni ebatsɔ enaanyo lɛ. Abraham hiɛnɔkamɔ lɛ efeee efolo. Biblia lɛ kɛɛ: “Akɛni Abraham to etsui shi hewɔ lɛ, enine shɛ shiwoo nɛɛ nɔ.” (Heb. 6:15; 11:​9, 18; Rom. 4:​20-22) Enine enyɛɛɛ shi kɔkɔɔkɔ. Obaanyɛ ohe oye waa akɛ, kɛ́ otee nɔ oye anɔkwa lɛ, onine baashɛ nɔ ni ohiɛ kã nɔ lɛ nɔ. Ohiɛnɔkamɔ lɛ baaba mli, no hewɔ lɛ, esa akɛ onya, ejaakɛ onine enyɛŋ shi kɔkɔɔkɔ. (Rom. 12:12) Paulo wie akɛ: “Nyɔŋmɔ ni kɛ hiɛnɔkamɔ hãa lɛ ahã nyɛyimɔ obɔbɔ kɛ miishɛɛ kɛ toiŋjɔlɛ akɛni nyɛkɛ nyɛhiɛ fɔ̃ɔ enɔ lɛ hewɔ, koni nyɛtsɔ mumɔ krɔŋkrɔŋ lɛ hewalɛ nɔ nyɛná hiɛnɔkamɔ kɛteke nɔ.”—Rom. 15:13.