1-2. Fɔlɔi, kɛ́ nyɛbii lɛ bi nyɛ saji ni kɔɔ Nyɔŋmɔ kɛ Biblia lɛ he lɛ, te esa akɛ nyɛna lɛ tɛŋŋ?

 MƐI pii kɛɔ akɛ, bi tsɔsemɔ kãaa shi akɔɔɔ kwraa. Kɛ́ fɔlɔ ji bo lɛ, wɔmiihã bo aekoo, ejaakɛ wɔle akɛ oofee bɔ fɛɛ bɔ ni obaanyɛ kɛmiiye oobua obi lɛ koni ehemɔkɛyeli lɛ mli awa. (5 Mo. 6:​6, 7) Shi ekolɛ be ni obi lɛ daa lɛ, ebaabibii bo saji yɛ nibii ni wɔheɔ wɔyeɔ lɛ ahe. Akɛ nɔkwɛmɔnɔ lɛ, ekolɛ ebaabi bo nɔ hewɔ ni Yehowa kɛɔ akɛ wɔkafee nibii komɛi.

² Kɛ́ obi lɛ bi bo saji ni tamɔ nɛkɛ lɛ, ekolɛ otsui baaye ni obaanu he akɛ ehemɔkɛyeli lɛ he miijɔ. Shi yɛ anɔkwale mli lɛ, be ni gbekɛbii daraa lɛ, esa akɛ amɛbibii saji, ejaakɛ no baaye abua amɛ ni amɛhemɔkɛyeli lɛ mli awa. (1 Kor. 13:11) No hewɔ lɛ, kaahã otsui fã. Moŋ lɛ, be fɛɛ be ni obi lɛ baabi bo nibii ni wɔheɔ wɔyeɔ lɛ ahe sane lɛ, ŋɔɔ lɛ akɛ hegbɛ ni oná ni okɛbaaye obua lɛ ni esusu nii ahe kɛya shɔŋŋ koni ehemɔkɛyeli lɛ mli awa.

3. Mɛni he wɔbaasusu yɛ nikasemɔ nɛɛ mli?

³ Yɛ nikasemɔ nɛɛ mli lɛ, wɔbaakwɛ nibii ni fɔlɔi baanyɛ afee kɛye amɛbua amɛbii ni (1) amɛhe amɛye waa akɛ, Nyɔŋmɔ yɛ ni Biblia lɛ ji e-Wiemɔ, (2) amɛna nɔ hewɔ ni kɛ́ amɛhi shi yɛ Biblia lɛ jeŋba he mlai lɛ anaa lɛ, amɛbaaná he sɛɛ, kɛ (3) amɛle bɔ ni amɛbaafee amɛgbala nibii ni amɛheɔ amɛyeɔ lɛ amli amɛhã mɛi. Agbɛnɛ hu, wɔbaana nɔ hewɔ ni ehi akɛ wɔbii lɛ baabibii wɔ saji, kɛ nibii ni wɔbaanyɛ wɔkɛ amɛ afee ekome akɛ weku kɛfee koni no ahã wɔná hegbɛ ni wɔkɛ amɛ agba wɔhemɔkɛyeli lɛ he sane.

 YE OBUA OBI LƐ NI EHE EYE WAA AKƐ NYƆŊMƆ YƐ NI BIBLIA LƐ JI EWIEMƆ

4. Mɛɛ saji ekolɛ obi lɛ baabi bo, ni mɛni hewɔ?

⁴ Fɔlɔi, esaaa akɛ nyɛsusuɔ akɛ, akɛni nyɛheɔ nyɛyeɔ akɛ Nyɔŋmɔ yɛ hewɔ lɛ, nyɛbii lɛ hu baahe amɛye akɛ eyɛ. Be ni afɔ bo lɛ, oleee akɛ Yehowa yɛ, ni nakai nɔŋŋ eji yɛ obi lɛ gbɛfaŋ. Ekolɛ be ni obi lɛ daa lɛ, ebaabi bo saji tamɔ: ‘Mɛni tsɔɔ akɛ Nyɔŋmɔ yɛ? Ani manyɛ mahe nibii ni aŋma yɛ Biblia lɛ mli lɛ maye lɛɛlɛŋ?’ Biblia lɛ kɛɔ akɛ, ehi akɛ wɔbaajwɛŋ saji ahe jogbaŋŋ ni ‘wɔka nii fɛɛ wɔkwɛ.’ (Rom. 12:1; 1 Tes. 5:21) No hewɔ lɛ, mɛni obaanyɛ ofee kɛye obua obi lɛ koni ehe eye waa akɛ Nyɔŋmɔ yɛ ni Biblia lɛ ji e-Wiemɔ?

5. Mɛni fɔlɔi baanyɛ afee kɛye abua amɛbii ni amɛhe amɛye waa akɛ Biblia lɛ ji Nyɔŋmɔ Wiemɔ, ni nɔ fɛɛ nɔ ni awie yɛ mli lɛ ji anɔkwale? (Romabii 12:2)

⁵ Wo obi lɛ hewalɛ ni etao nii amli, koni lɛ diɛŋtsɛ ena akɛ saji ni awie yɛ Biblia lɛ mli lɛ ji anɔkwale. (Kanemɔ Romabii 12:2.) Kɛ́ obi lɛ bi bo sane lɛ, ŋɔɔ nakai hegbɛ lɛ ni okɛtsɔɔ lɛ bɔ ni akɛ Watch Tower Publications Index lɛ, Niiamlitaomɔ Wolo Kɛhã Yehowa Odasefoi lɛ, kɛ nibii krokomɛi ni asafo lɛ efee ni akɛtaoɔ nii amli lɛ tsuɔ nii ahãa. Akɛ nɔkwɛmɔnɔ lɛ, kɛ́ eetao ena nibii ni yeɔ odase akɛ Biblia lɛ jeee wolo ko kɛkɛ, shi moŋ, eji Nyɔŋmɔ Wiemɔ lɛ, obaanyɛ ohã ekwɛ Niiamlitaomɔ Wolo lɛ mli ni etao saneyitso ni ji “Biblia Lɛ.” Saneyitso fioo ko yɛ nakai saneyitso lɛ shishi ni kɛɛ “Ajɛ Nyɔŋmɔ Mumɔ Lɛŋ Aŋma,” ni ebaana nibii pii ni yeɔ odase akɛ Biblia lɛ ji “Nyɔŋmɔ wiemɔ” lɛ yɛ jɛmɛ. (1 Tes. 2:13) Agbɛnɛ hu, ebaanyɛ etao blema Asiria maŋ ko ni atsɛɔ lɛ Ninive lɛ he saji pii yɛ asafo lɛ woji lɛ amli. Be ko ni eho lɛ, jeŋ nilelɔi komɛi wie akɛ, maŋ ko bɛ ni atsɛɔ lɛ Ninive. Shi aaafee afi 1850 mli lɛ, mɛi ni kaseɔ blema nibii ahe nii lɛ tsa shi ni amɛyana maŋ ni no mli lɛ atsɛɔ lɛ Ninive lɛ ni efee koikoi. Enɛ hã ana faŋŋ akɛ, lɛɛlɛŋ, no mli lɛ maŋ ko yɛ ni atsɛɔ lɛ Ninive, tamɔ bɔ ni awie yɛ Biblia lɛ mli lɛ. (Zef. 2:​13-15) Kɛ́ obi lɛ miisumɔ ni ele nɔ ni Biblia lɛ gba yɛ Ninive hiɛkpatamɔ lɛ he, kɛ bɔ ni enɛ eba mli ehã lɛ, ebaanyɛ ekwɛ sane ni ji “Ani Ole?” ni yɔɔ November 2021 Buu-Mɔɔ lɛ mli lɛ. Wo obi lɛ hewalɛ ni ekɛ nɔ ni awie yɛ asafo lɛ woji lɛ amli lɛ ato nɔ ni niiamlitaomɔ woji krokomɛi ni abaanyɛ amu afɔ̃ nɔ lɛ ewie lɛ ahe. Enɛ baahã hemɔkɛyeli ni eyɔɔ akɛ nɔ ni Biblia lɛ wieɔ lɛ ji anɔkwale lɛ mli awa.

6. Mɛɛ gbɛ nɔ fɔlɔi baanyɛ aye abua amɛbii ni amɛkɛ nibii ni amɛnaa lɛ ato nɔ ni Biblia lɛ wieɔ lɛ he? Okɛ enɛ he nɔkwɛmɔnɔ ahã. (Kwɛmɔ mfoniri lɛ hu.)

⁶ Ye obua obi lɛ ni ekɛ nibii ni enaa lɛ ato nɔ ni Biblia lɛ wieɔ lɛ he. Fɔlɔi, gbɛi babaoo yɛ ni nyɛbaanyɛ nyɛtsɔ nɔ nyɛkɛ nyɛbii lɛ agba Biblia lɛ he sane loo nyɛhã amɛna akɛ Nyɔŋmɔ yɛ. Gbɛi  nɛɛ ateŋ ekome ji, ni nyɛkɛ nyɛbii lɛ baayashara shi yɛ miziɔm, hei ni akaseɔ tsei kɛ kwɛ̃ɛ nii krokomɛi ahe nii yɛ (botanical garden), loo miziɔm ko ni afee yɛ Yehowa Odasefoi anitsumɔhe nine ko. Miziɔm komɛi po yɛ ni nyɛbaanyɛ nyɛtsɔ Intanɛt lɛ nɔ nyɛshara shi yɛ jɛmɛ. Akɛ nɔkwɛmɔnɔ lɛ, kɛ́ nyɛmiishara shi yɛ miziɔm ko lɛ, obaanyɛ ogbala obi lɛ jwɛŋmɔ kɛya blema nibii ni hãa wɔnaa akɛ nɔ ni Biblia lɛ ewie lɛ ji anɔkwale lɛ anɔ. Nibii nɛɛ ateŋ ekome ji Moab Tɛ lɛ. Tɛ nɛɛ eye afii 3,000, ni aŋma Nyɔŋmɔ gbɛ́i Yehowa lɛ yɛ nɔ. Eyɛ Louvre Museum ni yɔɔ Paris, yɛ France lɛ. Agbɛnɛ hu, nyɛbaanyɛ nyɛyakwɛ tɛ nɛɛ henɔ ni afee yɛ miziɔm ni ji, “The Bible and the Divine Name” ni yɔɔ Yehowa Odasefoi Anitsumɔhe Yitso ni yɔɔ Warwick, yɛ New York lɛ. Moab Tɛ lɛ hãa wɔnaa akɛ, Moab maŋtsɛ Mesha te shi ewo Israelbii lɛ, ni nakai pɛpɛɛpɛ Biblia lɛ hu ewie. (2 Maŋ. 3:​4, 5) Kɛ́ obi lɛ kɛ lɛ diɛŋtsɛ ehiŋmɛi na nibii ni tsɔɔ akɛ nɔ ni Biblia lɛ wieɔ lɛ ji anɔkwale lɛ, no baahã ehemɔkɛyeli lɛ mli awa.—Okɛto 2 Kronika 9:6 lɛ he.

7-8. (a) Mɛni pataŋ fɛfɛji ni yɔɔ adebɔɔ nibii ahe lɛ hãa wɔnaa? Tsɔɔmɔ pataŋ nɛɛ eko. (Kwɛmɔ mfoniri lɛ hu.) (b) Mɛɛ sane obaanyɛ obi obi lɛ ni baahã ehe eye waa akɛ Nyɔŋmɔ ni bɔ nibii fɛɛ?

⁷ Ye obua obi lɛ ni ejwɛŋ adebɔɔ nibii ahe. Be ni nyɛnyiɛ akrowa ko loo nyɛsharaa shi yɛ he ko ni adebɔɔ nibii yɔɔ lɛ, obaanyɛ ogbala obi lɛ jwɛŋmɔ kɛya pataŋ ni yɔɔ adebɔɔ nibii srɔtoisrɔtoi ahe lɛ nɔ. Mɛni hewɔ? Nɔ hewɔ lɛ ji akɛ, pataŋ srɔtoisrɔtoi lɛ hãa wɔnaa akɛ mɔ ko ni bɔ nibii fɛɛ, ni akɛ, nakai mɔ lɛ le nii ni ehiɛ kã shi waa. Akɛ nɔkwɛmɔnɔ lɛ, jeŋ shikpalɔi ekase pataŋ ni wɔnaa yɛ waa ŋoŋo, sunflower fɔfɔi, bai ni yɔɔ tsei kɛ kwɛ̃ɛ nii krokomɛi ahe, ŋulami kushai, kɛ adebɔɔ nibii krokomɛi ni tamɔ nakai lɛ ahe lɛ he nii afii pii. Jeŋ shikpalɔ ko ni atsɛɔ lɛ Nicola Fameli lɛ tsɔɔ mli akɛ, kɛ́ okane shii abɔ ni pataŋ lɛ bɔleɔ loo lain abɔ ni eŋmaa lɛ, nɔmba ni obaaná lɛ fata nɔmbai komɛi ni atsɛɔ amɛ Fibonacci sequence lɛ ahe. a

⁸ Ekolɛ kɛ́ obi lɛ tee skul lɛ, abaatsɔɔ lɛ pataŋ krokomɛi ni yɔɔ adebɔɔ nibii ahe. Akɛ nɔkwɛmɔnɔ lɛ, kɛ́ okwɛ tsei lɛ, obaana akɛ amɛgbala niji, ni niji nɛɛ hu egbala niji bibii, ni niji bibii nɛɛ hu egbala niji bibiibibii, ni etsara nɔ nakai. Anaa pataŋ nɛɛ yɛ adebɔɔ nibii krokomɛi hu ahe. Shi namɔ fee pataŋ fɛfɛji nɛɛ fɛɛ? Kɛ́ obi lɛ jwɛŋ sanebimɔ nɛɛ kɛ ekrokomɛi ni tamɔ nakai lɛ ahe lɛ, ekolɛ, no baaye abua lɛ ni ehe eye waa akɛ Nyɔŋmɔ ni bɔ nibii fɛɛ. (Heb. 3:4) Kɛ́ obi lɛ da kɛshɛ he ko lɛ, esa akɛ oye obua lɛ ni ena nɔ hewɔ ni ehe miihia ni wɔbo Nyɔŋmɔ mlai lɛ toi. No hewɔ lɛ, obaanyɛ obi lɛ akɛ, “Kɛ́ Nyɔŋmɔ ni bɔ wɔ lɛ, kɛ́ okwɛ lɛ, ani etsɔŋ wɔ bɔ ni esa akɛ wɔhi shi wɔhã koni wɔná miishɛɛ yɛ shihilɛ mli?” Kɛkɛ lɛ, ohã ele akɛ Nyɔŋmɔ hã  wɔ Biblia lɛ koni etsɔɔ wɔ nɔ ni kɛ́ wɔfee lɛ wɔbaaná miishɛɛ.

YE OBUA OBI LƐ NI ENA AKƐ SƐƐNAMƆ YƐ HE AKƐ EBAABO YEHOWA MLAI LƐ ATOI

9. Mɛni baanyɛ ahã obi lɛ abi bo nɔ hewɔ ni Biblia lɛ kɛɔ wɔ akɛ wɔtsi wɔhe kɛje nibii komɛi ahe?

⁹ Kɛ́ obi lɛ bi bo nɔ hewɔ ni Biblia lɛ kɛɔ akɛ wɔtsi wɔhe kɛje nibii komɛi ahe lɛ, bɔɔ mɔdɛŋ ni ona nɔ hewɔ ni ebiɔ bo sane nɛɛ. Ani eebi akɛni eheee eyeee akɛ nɔ ni Biblia lɛ kɛɔ lɛ ji anɔkwale lɛ hewɔ, loo eebi akɛni eleee bɔ ni ebaafee egbala nɔ ni Biblia lɛ kɛɔ lɛ mli etsɔɔ mɛi krokomɛi lɛ hewɔ? Bɔ fɛɛ bɔ ni sane lɛ ji lɛ, obaanyɛ oye obua obi lɛ ni ena akɛ sɛɛnamɔ yɛ he akɛ wɔbaabo Yehowa mlai lɛ atoi. Obaanyɛ otsɔ Oyi Aná Wala Kɛya Naanɔ! wolo lɛ nɔ ofee nakai. b

10. Te obaafee tɛŋŋ oye obua obi lɛ ni ebatsɔ Yehowa naanyo kpaakpa?

¹⁰ Ye obua obi lɛ ni ebatsɔ Yehowa naanyo kpaakpa. Kɛ́ okɛ obi lɛ miikase Oyi Aná Wala Kɛya Naanɔ! wolo lɛ, okɛ sanebimɔi kɛ nɔkwɛmɔnii ni yɔɔ mli lɛ atsu nii koni no ahã ona nɔ ni yɔɔ etsui mli diɛŋtsɛ. (Abɛi 20:5) Akɛ nɔkwɛmɔnɔ lɛ, nikasemɔ 8 lɛ kɛ Yehowa toɔ naanyo kpakpa ko ni baakɛɛ bo nibii ni kɛ́ ofee lɛ ebaabu ohe ni obaaná he sɛɛ lɛ he. Kɛ́ nyɛkane 1 Yohane 5:3 lɛ nyɛgbe naa lɛ, obaanyɛ obi lɛ akɛ, “Bianɛ ni obale akɛ Yehowa ji naanyo kpakpa lɛ, kɛ́ ekɛɛ bo akɛ ofee nɔ ko lɛ, te esa akɛ onu he ohã tɛŋŋ?” Ekolɛ obaana sanebimɔ nɛɛ akɛ ejeee nɔ ko, shi kɛ́ obi obi lɛ, no baaye abua lɛ ni ena akɛ Yehowa sumɔɔ wɔ, ni no hewɔ ewoɔ wɔ mlai lɛ.—Yes. 48:​17, 18.

11. Te obaafee tɛŋŋ oye obua obi lɛ ni ena akɛ kɛ́ wɔkɛ Biblia mli shishitoo mlai tsu nii lɛ, wɔnáa he sɛɛ? (Abɛi 2:​10, 11)

¹¹ Okɛ obi lɛ asusu bɔ ni wɔnáa Biblia mli shishitoo mlai ahe sɛɛ lɛ he. Kɛ́ nyɛmiikane Biblia lɛ loo daa gbi ŋmalɛ lɛ, nyɛsusua bɔ ni Biblia mli shishitoo mlai eye ebua nyɛweku lɛ he. Akɛ nɔkwɛmɔnɔ lɛ, obaanyɛ oŋɔ hegbɛ nɛɛ kɛye obua obi lɛ ni ena akɛ ehi akɛ wɔbaatsu nii waa ni wɔwie anɔkwale be fɛɛ be. (Heb. 13:18) Agbɛnɛ hu, obaanyɛ oye obua lɛ ni ena akɛ, kɛ́ wɔkɛ Biblia mli shishitoo mlai tsu nii lɛ, ehãa wɔnáa gbɔmɔtsoŋ hewalɛ kpakpa kɛ miishɛɛ. (Abɛi 14:​29, 30) Kɛ́ okɛ obi lɛ susu Biblia mli shishitoo mlai ahe lɛ, no baaye abua lɛ ni ená he miishɛɛ waa akɛ ekɛ ŋaawoi ni yɔɔ Biblia lɛ mli lɛ baatsu nii.—Kanemɔ Abɛi 2:​10, 11.

12. Mɛɛ gbɛ nɔ nyɛmi nuu ko kɛ eŋa yeɔ amɛbuaa amɛbinuu ni ena akɛ kɛ́ ekɛ Biblia mli shishitoo mlai tsu nii lɛ, ebaaná he sɛɛ?

¹² Nyɛmi nuu ko ni atsɛɔ lɛ Steve lɛ kɛ eŋa yɛ binuu ko ni atsɛɔ lɛ Ethan. Steve tsɔɔ bɔ ni amɛyeɔ amɛbuaa amɛbinuu lɛ koni ena akɛ Yehowa sumɔɔ wɔ, ni no hewɔ ewoɔ wɔ mlai lɛ. Ewie akɛ: “Bei komɛi lɛ, wɔbiɔ lɛ saji tamɔ, ‘Mɛni hewɔ Yehowa miisumɔ ni wɔbo famɔ nɛɛ toi lɛ? Mɛɛ gbɛ nɔ enɛ tsɔɔ akɛ esumɔɔ wɔ? Kɛ́ okwɛ lɛ, kɛ́ wɔkɛ shishitoo mla nɛɛ tsuuu nii lɛ, mɛni baaba?’” Nibii nɛɛ ni amɛkɛ Ethan susuɔ he lɛ ehã ehe eye waa akɛ Yehowa jeŋba he mlai lɛ ja. Steve wie kɛfata he akɛ: “Oti ni ma wɔhiɛ ji ni wɔye wɔbua Ethan ni ena akɛ ŋaawoi ni yɔɔ Biblia lɛ mli lɛ hi kwraa fe adesai anɔ.”

13. Te fɔlɔi baafee tɛŋŋ amɛye amɛbua amɛbi ko ni enyɛ ekɛ Biblia mli shishitoo mlai atsu nii? Okɛ enɛ he nɔkwɛmɔnɔ ahã.

¹³ Tsɔɔmɔ obi lɛ bɔ ni ebaafee ekɛ Biblia mli shishitoo mlai atsu nii. Akɛ nɔkwɛmɔnɔ lɛ, ŋɔɔ lɛ akɛ, ahã obi lɛ wolo ko yɛ skul akɛ ekane, ni mɛi ni awie amɛ he yɛ mli lɛ feɔ nibii ni Yehowa sumɔɔɔ. Ekolɛ amɛkɛ amɛhe woɔ jeŋba sha mli, amɛbɔɔ ajwamaŋ, loo amɛfeɔ yiwalɛ nii, ni bɔ ni aŋma wolo lɛ ahã lɛ hãa efeɔ tamɔ nɔ ni naagba bɛ nɔ ni amɛfeɔ lɛ he. Yɛ shihilɛ ni tamɔ nɛkɛ mli lɛ, obaanyɛ oye obua obi lɛ ni ekɛ mɛi  lɛ asubaŋ lɛ ato Biblia mli shishitoo mlai lɛ ahe ekwɛ. (Abɛi 22:​24, 25; 1 Kor. 15:33; Fip. 4:8) Enɛ baanyɛ aye abua lɛ ni kɛ́ aasusu nakai wolo lɛ he yɛ skul lɛ, enyɛ ehã etsɔɔlɔ lɛ loo eklasbii lɛ ale Yehowa susumɔ yɛ nɔ ni ekane yɛ wolo lɛ mli lɛ he.

YE OBUA OBI LƐ NI ELE BƆ NI EBAAFEE EGBALA NIBII NI EHEƆ EYEƆ LƐ AMLI EHÃ MƐI

14. Bei pii lɛ, mɛɛ sane gbekɛbii sheɔ gbeyei akɛ amɛbaagbala mli amɛtsɔɔ mɛi? Ni mɛni hewɔ?

¹⁴ Bei pii lɛ, gbekɛbii sheɔ gbeyei akɛ amɛbaagbala nibii ni amɛheɔ amɛyeɔ lɛ amli amɛtsɔɔ mɛi. Akɛ nɔkwɛmɔnɔ lɛ, efeɔ amɛ hiɛgbele akɛ amɛbaagbala nɔ hewɔ ni amɛheɔ amɛyeɔ akɛ Nyɔŋmɔ ni bɔ nibii fɛɛ lɛ mli amɛtsɔɔ amɛskulbii lɛ. Mɛni hewɔ? Amɛtsɔɔlɔi lɛ hãa efeɔ tamɔ nɔ ni esa akɛ mɔ fɛɛ mɔ ahe aye akɛ nibii ni wɔnaa yɛ je lɛ mli lɛ ba kɛkɛ, ni jeee mɔ ko ni bɔ. No hewɔ lɛ, te obaafee tɛŋŋ oye obua obi lɛ ni ená nɔmimaa akɛ nɔ ni eheɔ eyeɔ lɛ ja?

15. Mɛni baanyɛ aye abua obi lɛ ni ená nɔmimaa akɛ nɔ ni eheɔ eyeɔ lɛ ja?

¹⁵ Ye obua obi lɛ ni ená nɔmimaa akɛ nɔ ni eheɔ eyeɔ lɛ ja. Esaaa akɛ efeɔ obi lɛ hiɛgbele akɛ eheɔ eyeɔ akɛ Nyɔŋmɔ ni bɔ nibii fɛɛ. (2 Tim. 1:8) Mɛni hewɔ? Ŋmɛnɛ lɛ, jeŋ shikpalɔi babaoo ebayɔse akɛ nibii ni yɔɔ wala mli, tamɔ tsei, kooloi, kɛ adesai baaa kɛkɛ, shi moŋ mɔ ko ni hiɛ kã shi waa ni bɔ amɛ. Enɛ hewɔ lɛ, amɛheee nɔ ni atsɔɔ mɛi babaoo yɛ skul akɛ nibii ni yɔɔ wala mli lɛ ba kɛkɛ lɛ amɛyeee. Nɔ kome ni baanyɛ aye abua obi lɛ ni ehemɔkɛyeli lɛ mli awa ni ená ekãa ji, ni ebaasusu nɔ ni ye ebua nyɛmimɛi komɛi ni amɛhe amɛye akɛ Nyɔŋmɔ ni bɔ nibii fɛɛ lɛ he. c

16. Mɛɛ gbɛ nɔ fɔlɔi baanyɛ aye abua amɛbi ko ni egbala nɔ hewɔ ni eheɔ eyeɔ akɛ Nyɔŋmɔ ni bɔ nibii fɛɛ lɛ mli etsɔɔ mɔ ko? (1 Petro 3:15) (Kwɛmɔ mfoniri lɛ hu.)

¹⁶ Ye obua obi lɛ ni enyɛ egbala nɔ hewɔ ni eheɔ eyeɔ akɛ Nyɔŋmɔ ni bɔ nibii fɛɛ lɛ mli etsɔɔ mɛi. (Kanemɔ 1 Petro 3:15.) Obaanyɛ okɛ lɛ asusu saji ni yɔɔ jw.org lɛ nɔ ni yitso ji, “Oblahii Kɛ Oblayei Biɔ Akɛ—Adebɔɔ Aloo Sutsakemɔ?” lɛ ahe. No sɛɛ lɛ, okɛ obi lɛ asusu naatsɔɔmɔi ni yɔɔ jɛmɛ lɛ ahe ni ekwɛ akɛ te nɔ ni kɛ́ ekɛtsu nii lɛ, ewaŋ kwraa akɛ mɔ ko baanyɛ anu shishi ni ehe eye akɛ Nyɔŋmɔ ni bɔ nibii fɛɛ. Hã ele akɛ, esaaa akɛ ekɛ eskulbii lɛ taa saji anaa. Wo lɛ hewalɛ koni kɛ́ ena akɛ mɔ ko miisumɔ ni ebo lɛ toi lɛ, etsɔ nɔkwɛmɔnii ni shishinumɔ waaa anɔ egbala nibii amli etsɔɔ lɛ.  Ekolɛ, kɛ́ mɔ ko ni ekɛyaa skul kɛɛ lɛ akɛ, “Mi lɛ, ja mina nɔ ko dani miheɔ miyeɔ akɛ eyɛ. No hewɔ lɛ, miheee miyeee akɛ Nyɔŋmɔ yɛ, ejaakɛ minako lɛ dã” lɛ, ebaanyɛ ekɛɛ lɛ akɛ: “Ŋɔɔ lɛ akɛ, onyiɛ koo mli he ko ni gbɔmɔ ko gbɔmɔ ko kwraa bɛ, ni oyana tsũ fɛfɛo ko. Ani obaasusu akɛ tsũ lɛ diɛŋtsɛ ni bama shi, aloo obaakɛɛ akɛ mɔ ko ni ma? Ŋwanejee ko bɛ he akɛ, kɛ́ onaaa mɔ ko yɛ jɛmɛ po lɛ, obaahe oye akɛ mɔ ko ni ma. Kɛ́ nakai ni lɛ, kɛ́ okwɛ jeŋ muu nɛɛ fɛɛ lɛ, ani jeee mɔ ko ni fee?”

17. Mɛɛ gbɛ nɔ fɔlɔi baanyɛ aye abua amɛbi ko ni ena gbɛi anɔ ni ebaanyɛ etsɔ eye odase? Kɛ́ gbekɛ miitao eye mɔ ko ni ekɛyaa skul lɛ odase lɛ, te ebaanyɛ efee lɛ tɛŋŋ?

¹⁷ Ye obua obi lɛ ni ena gbɛi anɔ ni ebaanyɛ etsɔ eye odase. (Rom. 10:10) Wɔbaanyɛ wɔkɛ enɛ ato saŋkutswaa he. Kɛ́ mɔ ko miikase bɔ ni atswaa saŋku lɛ, ejeɔ shishi kɛ lalai ni tswaa waaa. Kɛkɛ lɛ, fiofio lɛ, ehe ebasa. Nakai nɔŋŋ kɛ́ gbekɛ ko miitao ekɛ mɛi abɔi nibii ni eheɔ eyeɔ lɛ ahe sanegbaa lɛ, ebaanyɛ ewie nɔ ko kuku ni ekɛje sanegbaa lɛ shishi. Akɛ nɔkwɛmɔnɔ lɛ, kɛ́ eetao eye mɔ ko ni ekɛyaa skul lɛ odase lɛ, ebaanyɛ ebi lɛ akɛ: “Ani ole akɛ jeŋ shikpalɔi kwɛɔ nibii ni abɔ lɛ anɔ amɛfeɔ tsɔji kɛ nibii krokomɛi? Hã mikɛ enɛ he vidio ko atsɔɔ bo.” Ebaanyɛ ejie vidioi srɔtoi ni yitso ji, Ani Mɔ Ko Ni Fee? lɛ eko etsɔɔ mɔ lɛ, ni ebi lɛ akɛ: “Kɛ́ ajieɔ jeŋ shikpalɔi ni kwɛɔ adebɔɔ nibii anɔ amɛfeɔ nibii lɛ ayi lɛ, ani esaaa akɛ ajieɔ mɔ ni bɔ nibii nɛɛ yi klɛŋklɛŋ?” Enɛ baanyɛ atsirɛ mɔ lɛ ni esumɔ akɛ ekase Yehowa he nii babaoo.

YAA NƆ OYE OBUA OBI LƐ NI EHEMƆKƐYELI LƐ MLI AWA

18. Mɛni fɔlɔi baanyɛ aya nɔ amɛfee kɛye amɛbua amɛbii lɛ koni amɛhemɔkɛyeli lɛ mli awa?

¹⁸ Ŋmɛnɛ lɛ, je lɛ mli eyi obɔ kɛ mɛi ni heee amɛyeee akɛ Yehowa yɛ. (2 Pet. 3:3) No hewɔ lɛ, fɔlɔi, kɛ́ nyɛkɛ nyɛbii lɛ miikase Biblia lɛ, nyɛyea nyɛbuaa amɛ koni amɛkase saji ni baahã amɛhe amɛye akɛ nibii ni awie yɛ Biblia lɛ mli lɛ ji anɔkwale, ni Nyɔŋmɔ jeŋba he mlai lɛ ahe yɛ sɛɛnamɔ. Nyɛkɛ nyɛbii lɛ agbaa nibii ni Yehowa ebɔ lɛ ahe sane, ni nyɛyea nyɛbuaa amɛ ni amɛjwɛŋ nibii nɛɛ anɔ jogbaŋŋ koni amɛhemɔkɛyeli lɛ mli awa. Nyɛyea nyɛbuaa amɛ ni amɛna bɔ ni Biblia mli gbalɛi komɛi eba mli. Ni nɔ ni he hiaa fe fɛɛ lɛ, nyɛkɛ amɛ asɔlea, ni nyɛsɔlea nyɛhãa amɛ hu. Kɛ́ nyɛfee nakai lɛ, Yehowa baaye ebua nyɛbii lɛ ni amɛhemɔkɛyeli lɛ mli awa.—2 Kro. 15:7.