1. Yɛ blema be ni aŋmaa Biblia lɛ, te mɛi naa blodo amɛhãa tɛŋŋ?

 YƐ BLEMA LƐ, mɛi yeɔ blodo waa. (1 Mo. 14:18; Luka 4:4) Anɔkwa, bɔ ni ayeɔ blodo waa yɛ nakai beiaŋ lɛ hewɔ lɛ, mɛi ni ŋma Biblia lɛ ateŋ mɛi komɛi kɛ wiemɔ ni ji “blodo” lɛ tsuɔ nii kɛ́ amɛmiiwie niyenii he. (Mat. 6:11; Bɔf. 20:​7, shn.) Naakpɛɛ nii ni Yesu fee ni ale waa lɛ ateŋ enyɔ kɔɔ blodo he. (Mat. 16:​9, 10) Abɔ naakpɛɛ nii nɛɛ ateŋ ekome he amaniɛ yɛ Yohane yitso 6 lɛ. Wɔbaasusu amaniɛbɔɔ nɛɛ he ni wɔkwɛ akɛ mɛni wɔbaanyɛ wɔkase yɛ mli ŋmɛnɛ.

2. Mɛni ba ni ehe bahia ni mɛi babaoo ayatao nɔ ko amɛye?

² Be ko lɛ, Yesu bɔfoi lɛ tee amɛyashiɛ yɛ he ko, ni be ni amɛku amɛsɛɛ lɛ, Yesu kɛ amɛ fɛɛ kwɔ lɛlɛ kɛfo Galilea Ŋshɔ lɛ koni amɛyajɔɔ amɛhe. (Mar. 6:​7, 30-32; Luka 9:10) Amɛtee he ko banee yɛ Betsaida niiaŋ. Shi eyeee be ko ni mɛi pii babua shi yɛ jɛmɛ koni amɛbana Yesu. Kulɛ, Yesu baanyɛ eshi amɛ ni eyajɔɔ ehe, shi efeee nakai. Moŋ lɛ, ehe be etsɔɔ amɛ Maŋtsɛyeli lɛ he nii ni etsa amɛteŋ mɛi ni bɛ hewalɛ lɛ. Shi be ni je bɔi naa lɛ, kaselɔi lɛ susu bɔ ni mɛi pii nɛɛ fɛɛ baafee amɛná nɔ ko amɛye lɛ he. Ekolɛ, mɛi lɛ ateŋ mɛi komɛi kɛ niyenii fioo ba, shi amɛteŋ mɛi pii lɛ, ehe baahia ni amɛya akrowai lɛ amli amɛyahé niyenii. (Mat. 14:15; Yoh. 6:​4, 5) Mɛni Yesu baafee yɛ sane lɛ he?

 YESU TSƆ NAAKPƐƐ GBƐ NƆ EHÃ AMƐ NIYENII

3. Mɛni Yesu kɛɛ ebɔfoi lɛ akɛ amɛfee amɛhã mɛi babaoo lɛ? (Kwɛmɔ mfoniri lɛ hu.)

³ Yesu kɛɛ ebɔfoi lɛ akɛ: “Ehe ehiaaa ni amɛshi; nyɛ nyɛhãa amɛ nɔ ko amɛyea.” (Mat. 14:16) Yɛ adesai ahiɛ lɛ, etamɔ nɔ ni enɛ feemɔ baawa, ejaakɛ hii aaafee 5,000 ni ebaabi ni alɛ lɛ. Kɛ́ akɛ yei kɛ gbekɛbii po fata he lɛ, belɛ yibɔ lɛ baanyɛ afee 15,000 loo nɔ. (Mat. 14:21) Andrea kɛɛ Yesu akɛ: “Naa gbekɛ nuu fioo ko ni hiɛ barle blodoi enumɔ kɛ ŋshɔŋ loi enyɔ. Shi mɛi pii nɛɛ, amɛnɛgbɛ enɛ baashɛ?” (Yoh. 6:9) Barle blodo ji niyenii ko ni mɔ fɛɛ mɔ yeɔ, ni eeenyɛ efee akɛ loi bibii lɛ ji loi ni awo lɛ ŋoo ni aka. Shi ekã shi faŋŋ akɛ, niyenii fioo nɛɛ ni gbekɛ nuu lɛ hiɛ lɛ shɛŋ he ko he ko.

4. Mɛni wɔkaseɔ yɛ sane ni abɔ he amaniɛ yɛ Yohane 6:​11-13 lɛ mli? (Kwɛmɔ mfonirii lɛ hu.)

⁴ Shi Yesu miisumɔ ni efee mɛi babaoo lɛ ejurɔ. No hewɔ lɛ, efã amɛ akɛ, amɛtara shi kui kui yɛ jwɛi fɔ lɛ nɔ. (Mar. 6:​39, 40; kanemɔ Yohane 6:​11-13.) No sɛɛ lɛ, esɔle eda e-Tsɛ lɛ shi yɛ niyenii lɛ hewɔ. Ehi waa akɛ Yesu da Nyɔŋmɔ shi, ejaakɛ lɛ ji mɔ ni dro amɛ niyenii lɛ. Nɔ ni Yesu fee lɛ kaiɔ wɔ akɛ, esa akɛ wɔsɔle dani wɔye nii, ekɔɔɔ he eko he ni wɔyɔɔ. Be ni Yesu sɔle egbe naa lɛ, ehã aja niyenii lɛ ahã mɛi lɛ, ni amɛye ni amɛtɔrɔ. Anɔkwa, niyenii lɛ fa aahu akɛ, pii shwɛ. Shi yɛ nɔ najiaŋ ni abaatsi ashwie kɛkɛ lɛ, Yesu hã abaa yi. Ehã ekaselɔi lɛ bua niyenii ni shwɛ lɛ naa, ekolɛ, koni sɛɛ mli lɛ aye. Ekpãtãaa nii ahiɛ, ni enɛ ji nɔ ko ni wɔ fɛɛ wɔbaanyɛ wɔkase. Fɔlɔi, nyɛbaanyɛ nyɛkɛ sane nɛɛ atsɔɔ nyɛbii lɛ nɔ  hewɔ ni ehe miihia ni amɛsɔle dani amɛye nii, amɛnu he amɛhã mɛi, ni amɛfee mɛi ejurɔ tamɔ Yesu.

5. Mɛni mɛi lɛ ka akɛ amɛbaafee? Shi mɛni Yesu fee?

⁵ Bɔ ni Yesu tsɔɔ nii kɛ naakpɛɛ nii ni efee lɛ hã mɛi lɛ anaa kpɛ amɛhe waa. Amɛmu sane naa po akɛ, lɛ ji gbalɔ wulu lɛ ni Mose wo shi akɛ Nyɔŋmɔ baawó yɛ ewebii lɛ ateŋ lɛ. (5 Mo. 18:​15-18) Enɛ hewɔ lɛ, amɛnu he akɛ ebaafee maŋtsɛ ni nɔ bɛ, ni kɛ́ ebatsɔ maŋtsɛ lɛ, niyenii sane efeŋ naagba dɔŋŋ yɛ Israel. No hewɔ lɛ, kulɛ “amɛmiiba amɛbamɔ [Yesu] ni amɛwó lɛ maŋtsɛ.” (Yoh. 6:​14, 15) Shi Yesu le akɛ, kɛ́ ehã amɛwó lɛ maŋtsɛ lɛ, belɛ, ekɛ ehe miiwo pɔlitis mli. No hewɔ lɛ, ehãaa amɛwó lɛ maŋtsɛ. Biblia lɛ kɛɛ, ‘eshi jɛmɛ ni ekometoo etee gɔŋ lɛ nɔ.’ Yesu hãaa mɛi anyɛ enɔ ni ekɛ ehe awo pɔlitis mli. Enɛ ji nɔ ko ni he hiaa waa ni esa akɛ wɔkase!

6. Mɛni kɛ́ wɔfee lɛ, no baatsɔɔ akɛ wɔmiikase Yesu? (Kwɛmɔ mfoniri lɛ hu.)

⁶ Ekã shi faŋŋ akɛ, ŋmɛnɛ lɛ, mɛi ekɛŋ wɔ akɛ wɔkɛ blodo fioo alɛ mɛi pii, loo wɔtsɔ naakpɛɛ gbɛ nɔ wɔtsa helai, loo akɛ, amɛbaawó wɔ maŋtsɛ loo maŋhiɛnyiɛlɔ. Shi ekolɛ amɛbaawo wɔ hewalɛ ni wɔkɛ wɔhe awo pɔlitis mli. Akɛ nɔkwɛmɔnɔ lɛ, ekolɛ amɛbaakɛɛ wɔ akɛ wɔfɔ̃ oshiki wɔhã mɔ ko ni amɛnuɔ he akɛ ebaanyɛ ehã nibii ahi lɛ, loo wɔwie nɔ ko ni tsɔɔ akɛ wɔfiɔ esɛɛ. Kɛ́ eba lɛ nakai lɛ, esa akɛ wɔkai nɔ ni Yesu fee lɛ. Ekɛ ehe wooo pɔlitis mli. Sɛɛ mli po lɛ, ewie akɛ: “Mi-Maŋtsɛyeli lɛ  jɛɛɛ je nɛɛ mli.” (Yoh. 17:14; 18:36) Ŋmɛnɛ lɛ, esa akɛ wɔ, ni ji Yesu sɛɛnyiɛlɔi lɛ, ahã wɔsusumɔ kɛ enɔ lɛ akpã gbee ni wɔkase lɛ. Tamɔ efee lɛ, esa akɛ wɔ hu wɔfi Nyɔŋmɔ Maŋtsɛyeli lɛ sɛɛ, wɔgba mɛi Maŋtsɛyeli lɛ he sane, ni wɔsɔle ni Maŋtsɛyeli lɛ aba. (Mat. 6:10) Agbɛnɛ, nyɛhãa wɔkwɛa nɔ kroko ni wɔbaanyɛ wɔkase yɛ Yesu naakpɛɛ nii ni kɔɔ blodo lɛ he lɛ mli.

“AMƐNUUU BLODOI LƐ AHE SANE LƐ SHISHI”

7. Mɛni Yesu fee be ni ekaselɔi ta lɛlɛ lɛ mli lɛ, ni te kaselɔi lɛ fee amɛnii amɛhã tɛŋŋ? (Yohane 6:​16-20) Shi mɛni kaselɔi eyakɔɔɔ sɛɛ?

⁷ Be ni Yesu lɛ mɛi babaoo lɛ egbe naa lɛ, ehã ebɔfoi lɛ kwɔ lɛlɛ koni amɛku amɛsɛɛ kɛya Kapernaum, shi lɛ lɛ, ekwɔ kɛtee gɔŋ lɛ nɔ koni mɛi ni miitao amɛwó lɛ maŋtsɛ lɛ anine akashɛ enɔ. (Kanemɔ Yohane 6:​16-20.) Be ni bɔfoi lɛ ta lɛlɛ lɛ mli yɛ ŋshɔ lɛ hiɛ kɛyaa lɛ, kɔɔyɔɔ ko ni naa wa waa bɔi tswaa ni ŋshɔ lɛ fee hamahama. Kɛkɛ ni Yesu nyiɛ nu lɛ hiɛ kɛbanina amɛ, ni ehã bɔfo Petro hu nyiɛ nu lɛ hiɛ. (Mat. 14:​22-31) Be ni Yesu bote lɛlɛ lɛ mli lɛ, kɔɔyɔɔ lɛ kpa tswaa. Enɛ hã kaselɔi lɛ anaa kpɛ amɛhe ni amɛwie akɛ: “Nyɔŋmɔ Bi ji bo lɛɛlɛŋ.” a (Mat. 14:33) Shi nɔ kome ji akɛ, kaselɔi lɛ enaaa akɛ tsakpaa yɛ nu lɛ hiɛ ni Yesu nyiɛ lɛ kɛ naakpɛɛ gbɛ ni etsɔ nɔ ekɛ blodoi fioo lɛ mɛi babaoo lɛ teŋ. Wɔnaa enɛ yɛ nɔ ni Marko wie yɛ sane nɛɛ he lɛ mli. Ewie akɛ: “[Bɔfoi lɛ] anaa kpɛ amɛhe naakpa yɛ enɛ hewɔ, ejaakɛ amɛnuuu blodoi lɛ ahe sane lɛ shishi, ni amɛtsuii nyɛɛɛ anu shishi lolo.” (Mar. 6:​50-52) Kaselɔi lɛ eyakɔɔɔ sɛɛ akɛ, jeee mɛi pii alɛɛ pɛ Yesu baanyɛ ekɛ hewalɛ ni Nyɔŋmɔ edro lɛ lɛ atsu, shi moŋ, ebaanyɛ ekɛfee naakpɛɛ nii krokomɛi hu. Sɛɛ mli lɛ, Yesu diɛŋtsɛ wie naakpɛɛ gbɛ ni etsɔ nɔ ekɛ blodoi fioo lɛ mɛi babaoo lɛ he, ni etsɔɔ nɔ kroko ni wɔbaanyɛ wɔkase yɛ mli.

8-9. Mɛni hewɔ mɛi babaoo lɛ yatao Yesu lɛ? (Yohane 6:​26, 27)

⁸ Mɛi babaoo lɛ ni Yesu lɛ lɛ amɛmusu he miihia amɛ fe Nyɔŋmɔ. Mɛni hewɔ wɔkɛɔ nakai? Be ni Yesu lɛ amɛ lɛ, enɔ jetsɛremɔ lɛ, amɛtee he ni ehã amɛ niyenii lɛ yɛ lɛ, shi amɛnaaa lɛ kɛ ebɔfoi lɛ yɛ jɛmɛ. No hewɔ lɛ, amɛkwɔ lɛji komɛi ni jɛ Tiberia lɛ kɛtee Kapernaum koni amɛyatao lɛ. (Yoh. 6:​22-24) Kɛ́ okwɛ lɛ, mɛni hewɔ no mli lɛ amɛtaoɔ Yesu lɛ? Ani amɛmiitao lɛ koni etsɔɔ amɛ nibii pii yɛ Maŋtsɛyeli lɛ he? Dabi. Yiŋtoo titri hewɔ ni amɛtaoɔ lɛ ji, koni ehã amɛ niyenii ekoŋŋ amɛye. Mɛni hewɔ wɔkɛɔ nakai?

⁹ Kadimɔ nɔ ni ba be ni amɛyanina Yesu yɛ Kapernaum niiaŋ lɛ. Yesu hã amɛle faŋŋ akɛ, niyenii hewɔ amɛtaoɔ lɛ lɛ. Ekɛɛ amɛ akɛ, eyɛ mli akɛ amɛye blodoi lɛ ni amɛtɔrɔ moŋ, shi eji “niyenii ni fiteɔ.” Kɛkɛ ni ewo amɛ hewalɛ ni ‘amɛtsu niyenii ni fiteee ni hãa naanɔ wala’ lɛ moŋ he nii. (Kanemɔ Yohane 6:​26, 27.) Ekolɛ mɛi lɛ anaa kpɛ amɛhe akɛ niyenii ko yɛ ni baanyɛ ahã naanɔ wala. Mɛɛ niyenii he no mli lɛ Yesu wieɔ lɛ? Ni te amɛbaafee tɛŋŋ amɛnine ashɛ nɔ?

10. Mɛni ehe bahia ni mɛi lɛ afee koni amɛná naanɔ wala?

¹⁰ No mli lɛ, Yudafoi lɛ miitao amɛle nɔ ni esa akɛ amɛfee koni amɛná niyenii nɛɛ. Ekolɛ amɛyasusu akɛ kɛ́ amɛye Mose Mla lɛ nɔ lɛ, amɛnine baashɛ nɔ. Shi Yesu kɛɛ amɛ akɛ: “Nyɔŋmɔ nitsumɔ lɛ ji akɛ, nyɛhe mɔ ni etsu lɛ lɛ nɔ nyɛye.” (Yoh. 6:​28, 29) Nɔ ni enɛ tsɔɔ ji akɛ, kɛ́ amɛmiitao ‘amɛná naanɔ wala’ lɛ, esa akɛ amɛhe Yesu, mɔ ni Nyɔŋmɔ tsu lɛ nɔ amɛye. Enɛ ji nɔ ko ni Yesu ewie pɛŋ. (Yoh. 3:​16-18, 36) Sɛɛ mli lɛ, ewie nibii pii ni kɔɔ bɔ ni wɔbaafee wɔná naanɔ wala lɛ he.—Yoh. 17:3.

11. Mɛni Yudafoi lɛ fee ni hãa wɔnaa akɛ nɔ pɛ ni he hiaa amɛ ji, ni amɛbaaná nɔ ko amɛye? (Lala 78:​24, 25)

 ¹¹ Yudafoi lɛ heee amɛyeee akɛ kɛ́ amɛfee nɔ ni Yesu kɛɔ amɛ lɛ, amɛbaaná naanɔ wala. Amɛbi lɛ akɛ: “Mɛɛ okadi obaafee, koni wɔna ni wɔhe onɔ wɔye?” (Yoh. 6:30) Kɛkɛ ni amɛwie akɛ, Mose hã amɛtsɛmɛi lɛ mana amɛye. (Neh. 9:15; Yoh. 6:31; kanemɔ Lala 78:​24, 25.) Nɔ ni amɛwie nɛɛ hãa wɔnaa faŋŋ akɛ, heloonaa niyenii ehe amɛjwɛŋmɔ fɛɛ. Be ni Yesu wie po akɛ “anɔkwa niyenii” ko yɛ ni jɛɔ ŋwɛi ni hãa mɔ náa naanɔ wala lɛ, amɛbiii lɛ akɛ te etsɔɔ tɛŋŋ. (Yoh. 6:32) Anɔkwa, heloonaa niyenii he sane ehe amɛjwɛŋmɔ aahu akɛ, amɛbooo nɔ ni Yesu miibɔ mɔdɛŋ ni etsɔɔ amɛ yɛ bɔ ni amɛbaafee amɛná naanɔ wala he lɛ toi. Mɛni wɔkaseɔ yɛ sane nɛɛ mli?

NƆ NI ESA AKƐ WƆHÃ EHE AHIA WƆ FE FƐƐ YƐ SHIHILƐ MLI

12. Mɛni Yesu wie ni hãa wɔnaa nɔ ni esa akɛ wɔhã ehe ahia wɔ fe fɛɛ yɛ shihilɛ mli?

¹² Naa nɔ ko ni he hiaa waa ni wɔbaanyɛ wɔkase yɛ Yohane yitso 6 lɛ mli. No ji, esa akɛ wɔhã mumɔŋ nibii ahe ahia wɔ fe nibii krokomɛi fɛɛ. Kɛ́ obaakai lɛ, Yesu hã enɛ fee faŋŋ be ni Satan ka lɛ lɛ. Ekɛɛ akɛ: “Jeee niyenii pɛ naa esa akɛ gbɔmɔ ahi wala mli yɛ, shi moŋ, yɛ wiemɔ fɛɛ wiemɔ ni jɛɔ Yehowa daaŋ lɛ naa.” (Mat. 4:​3, 4) Yɛ e-Gɔŋ Nɔ Shiɛmɔ lɛ mli hu lɛ, ehã wɔna akɛ ehe miihia waa ni wɔfee nibii ni baahã wekukpaa kpakpa ahi wɔ kɛ Yehowa teŋ. (Mat. 5:3) No hewɔ lɛ, wɔbaanyɛ wɔbi wɔhe akɛ, ‘Ani bɔ ni mihiɔ shi mihãa lɛ hãa anaa akɛ wekukpaa ni yɔɔ mi kɛ Yehowa teŋ lɛ he miihia mi fe heloonaa nibii?’

13. (a) Mɛni hewɔ ejeee tɔmɔ akɛ wɔbaaye nii? (b) Shi mɛni esa akɛ wɔkwɛ jogbaŋŋ ni wɔkafee? (1 Korintobii 10:​6, 7, 11)

¹³ Naagba bɛ he akɛ wɔbaasɔle wɔbi Yehowa ni ehã wɔ nibii ni he hiaa wɔ, ni ejeee tɔmɔ hu akɛ wɔmii baashɛ wɔhe yɛ nibii nɛɛ ahewɔ. (Luka 11:3) Biblia lɛ kɛɔ akɛ, ehi akɛ gbɔmɔ ‘baaye ni enu ni ená nii ni etsuɔ waa lɛ mli ŋɔɔmɔ,’ ejaakɛ “ejɛ anɔkwa Nyɔŋmɔ lɛ dɛŋ.” (Jaj. 2:24; 8:15; Yak. 1:17) Fɛɛ sɛɛ lɛ, esa akɛ wɔkwɛ jogbaŋŋ ni heloonaa nibii akabatsɔmɔ nibii ni he hiaa wɔ fe fɛɛ yɛ shihilɛ mli. Bɔfo Paulo bɔ Kristofoi ni hi shi be ni eshwɛ fioo ni abaakpãtã Yerusalem kɛ sɔlemɔ shĩa lɛ hiɛ lɛ kɔkɔ yɛ enɛ he. Ewie nibii gbohii komɛi ni Israelbii lɛ fee yɛ Sinai Gɔŋ lɛ he kɛ nibii gbohii krokomɛi ni amɛfee yɛ ŋa lɛ nɔ lɛ ahe. Kɛkɛ ni ekɛɛ amɛ akɛ, ‘amɛkashwe nibii fɔji tamɔ bɔ ni Israelbii lɛ shwe lɛ.’ (Kanemɔ 1 Korintobii 10:​6, 7, 11.) Yehowa tsɔ naakpɛɛ gbɛ nɔ ehã Israelbii lɛ niyenii. Shi amɛkɛ hiɛkɔ̃ɔ ha niyenii lɛ, ni ebatsɔ ‘nɔ fɔŋ’ ehã amɛ. (4 Mo. 11:​4-6, 31-34) Agbɛnɛ hu, amɛfee tsinabi amaga, ni amɛye ni amɛnu, ni amɛshwɛ amɛhiɛ jogbaŋŋ. (2 Mo. 32:​4-6) Paulo tsɛ amɛsane lɛ yisɛɛ ni ekɛbɔ enyɛmimɛi Kristofoi lɛ kɔkɔ. Eshwɛ fioo ni abaakpãtã jeŋ fɔŋ nɛɛ hu hiɛ, no hewɔ lɛ, ehe miihia waa ni wɔbo Paulo kɔkɔbɔɔ lɛ toi koni wɔkatɔ̃ tɔmɔ ni Israelbii lɛ tɔ̃ lɛ eko.

14. Yɛ jeŋ hee lɛ mli lɛ, mɛni hewɔ wɔnáŋ niyenii he naagba?

¹⁴ Be ni Yesu tsɔɔ wɔ akɛ wɔsɔle wɔbi Nyɔŋmɔ ni ehã wɔ “niyenii ni he hiaa wɔ kɛhã ŋmɛnɛ gbi nɛɛ,” etsɔɔ wɔ hu akɛ, wɔbi ni afee nɔ ni Nyɔŋmɔ sumɔɔ “yɛ shikpɔŋ lɛ nɔ, tamɔ bɔ ni afeɔ yɛ ŋwɛi lɛ.” (Mat. 6:​9-11) Kɛ́ afee Nyɔŋmɔ suɔmɔnaa nii yɛ shikpɔŋ lɛ nɔ lɛ, te shihilɛ baafee tɛŋŋ? Biblia lɛ hãa wɔleɔ akɛ, Nyɔŋmɔ suɔmɔnaa nii lɛ eko ji ni wɔná niyenii kpakpa wɔye. Tamɔ bɔ ni awie yɛ Yesaia 25:​6-8 lɛ, yɛ jeŋ hee lɛ mli lɛ, wɔbaaná niyenii kpakpai pii wɔye. Agbɛnɛ hu, Lala 72:16 lɛ kɛɔ akɛ: “Shikpɔŋ lɛ nɔ baayi kɛ ŋmaa; [ŋmaa ní awieɔ he yɛ biɛ lɛ ji wiiti, abele, omɔ, kɛ amɛhenɔi lɛ eko, shn.] ebaafa babaoo kɛteke nɔ yɛ  gɔji lɛ ayiteŋ.” Feemɔ ohe mfoniri ni okɛ ŋmaa nɛɛ eko miihoo niyenii ko ni osumɔɔ waa, loo ni okɛmiihoo niyenii ko ni ohoko daŋ. Agbɛnɛ hu, obaafee wain ŋmɔji ni obaaye amɛmli yibii. (Yes. 65:​21, 22) Jeee bo pɛ obaaná nibii nɛɛ amli ŋɔɔmɔ, shi moŋ, mɛi fɛɛ ni yɔɔ shikpɔŋ lɛ nɔ lɛ baaná mli ŋɔɔmɔ!

15. Mɛni abaatsɔɔ mɛi ni abaatee amɛ shi lɛ? (Yohane 6:​35, shn.)

¹⁵ Kanemɔ Yohane 6:35 kɛ shishigbɛ niŋmaa lɛ. Ni mɛi ni Yesu hã amɛ blodo kɛ loo lɛ hu? Eyɛ mli akɛ amɛteŋ mɛi pii heee Yesu nɔ amɛyeee moŋ, shi ekolɛ abaatee amɛ shi, ni wɔkɛ amɛteŋ mɛi komɛi baakpe. Ehe baahia ni aye abua amɛ ni amɛnu nɔ ni Yesu wie lɛ shishi. (Yoh. 5:​28, 29) Ewie akɛ: “Miji wala blodo lɛ. Mɔ fɛɛ mɔ ni baa miŋɔɔ lɛ, hɔmɔ yeŋ lɛ kɔkɔɔkɔ.” Ehe baahia ni amɛhe amɛye akɛ Yesu kɛ ewala bashã afɔle ehã amɛ. Nakai beiaŋ lɛ, abaatsɔɔ mɛi ni abaatee amɛ shi lɛ kɛ bii ni ekolɛ abaafɔ lɛ Yehowa kɛ nibii ni eto eyiŋ akɛ ebaafee lɛ ahe nii. Ŋwanejee ko bɛ he akɛ, wɔmii baashɛ wɔhe waa be ni wɔtsɔɔ amɛ nii lɛ. Anɔkwa, nitsumɔ nɛɛ baahã wɔná miishɛɛ kwraa fe niyenii ni ŋɔɔŋɔi ni wɔbaaye lɛ.

16. Mɛni he wɔbaasusu yɛ nikasemɔ ni nyiɛ sɛɛ lɛ mli?

¹⁶ Yɛ nikasemɔ nɛɛ mli lɛ, wɔbana nibii komɛi ni wɔbaanyɛ wɔkase yɛ Yohane yitso 6 lɛ mli. Shi nibii krokomɛi yɛ ni Yesu tsɔɔ Yudafoi lɛ yɛ bɔ ni amɛbaafee amɛná “naanɔ wala” lɛ he, ni esa akɛ wɔsusu nomɛi hu ahe. No hewɔ lɛ, yɛ nikasemɔ ni nyiɛ sɛɛ lɛ mli lɛ, wɔbaasusu Yohane yitso 6 lɛ nɔŋŋ mli saji krokomɛi ahe.