NIKASEMƆ 51
LALA 3 Yehowa—Wɔhewalɛ, Wɔhiɛnɔkamɔ; Onɔ Wɔkɛ Wɔhiɛ Fɔ̃ɔ
Yehowa Naa Wɔhiɛ Yaafonui Lɛ, Ni Enuɔ He Ehãa Wɔ
“Okɛ mihiɛ yaafonui lɛ awo okooloo hewolo tɔ lɛ mli. Ani aŋmalako fɛɛ yɛ owolo lɛ mli?”—LALA 56:8.
NƆ NI WƆBAAKASE
Wɔbaana akɛ Yehowa naa bɔ ni wɔnuɔ he wɔhãa kɛ́ wɔkɛ shihilɛ ni mli wa ko miikpe, ni efeɔ nɔ fɛɛ nɔ ni ebaanyɛ kɛshɛjeɔ wɔmii.
1-2. Mɛɛ shihilɛi komɛi hãa wɔfóɔ?
WƆ FƐƐ wɔfóɔ yɛ be kɛ beiaŋ. Bei komɛi lɛ, kɛ́ wɔná miishɛɛ lɛ, wɔfóɔ. Akɛ nɔkwɛmɔnɔ lɛ, kɛ́ nɔ ko ni kã wɔtsui nɔ waa ba mli, tamɔ wɔfɔ bi nɛkɛ lɛ, wɔnáa miishɛɛ aahu akɛ, wɔfóɔ. Agbɛnɛ hu, kɛ́ wɔkai nɔ ko ni hã wɔná miishɛɛ waa yɛ shihilɛ mli, loo wɔna wɔnaanyo ko ni wɔna lɛ etsɛ waa lɛ, no hu hãa wɔfóɔ.
2 Shi bei pii lɛ, nɔ ni hãa wɔfóɔ ji kɛ́ nɔ ko ni yɔɔ dɔlɛ waa nina wɔ. Akɛ nɔkwɛmɔnɔ lɛ, kɛ́ mɔ ko fee wɔ nɔ ko ni edɔ wɔ waa lɛ, ekolɛ wɔbaafó. Agbɛnɛ hu, kɛ́ wɔmiipiŋ yɛ hela ko hewɔ loo mɔ ko ni wɔsumɔɔ esane waa lɛ gbo lɛ, ekolɛ wɔbaafó. Kɛ́ eba lɛ nɛkɛ lɛ, wɔnuɔ he tamɔ bɔ ni gbalɔ Yeremia nu he be ni Babilonbii lɛ kpãtã Yerusalem hiɛ lɛ. Ewie akɛ: “Yaafonui hoɔ kɛjeɔ mihiŋmɛiiaŋ tamɔ fai . . . Yaafonui hoɔ kɛjeɔ mihiŋmɛiiaŋ daa, esɛɛ efooo bibioo po.”—Yaf. 3:48, 49.
3. Kɛ́ Yehowa na ni etsuji miipiŋ lɛ, te enuɔ he ehãa tɛŋŋ? (Yesaia 63:9)
3 Yehowa le shii abɔ ni wɔfó yɛ wɔshihilɛ mli yɛ naagbai ni wɔkɛkpeɔ lɛ ahewɔ. Biblia lɛ hãa wɔleɔ akɛ, ele naagbai fɛɛ ni etsuji kɛkpeɔ ni hãa amɛhaoɔ waa lɛ, ni kɛ́ amɛbo amɛtsɛ lɛ kɛhã yelikɛbuamɔ lɛ, eboɔ amɛ toi. (Lala 34:15) Shi jeee no pɛ Yehowa feɔ. Akɛni eji wɔ-Tsɛ, ni esumɔɔ wɔ waa hewɔ lɛ, kɛ́ ena ni wɔmiifó lɛ, edɔɔ lɛ ni efeɔ nɔ ko oya kɛyeɔ ebuaa wɔ.—Kanemɔ Yesaia 63:9.
4. Namɛi awie amɛhe yɛ Biblia lɛ mli ni wɔbaasusu amɛhe? Ni mɛni no baahã wɔkase yɛ Yehowa he?
4 Biblia lɛ hãa wɔnaa bɔ ni Yehowa feɔ enii ehãa kɛ́ ena ni etsuji miifó. Wɔbaanyɛ wɔna enɛ yɛ nɔ ni ba Hana, David, kɛ Maŋtsɛ Hezekia nɔ lɛ mli. Mɛni hã amɛfó? Te Yehowa fee enii ehã tɛŋŋ be ni ena ni amɛmiifó ni amɛmiitao eye ebua amɛ lɛ? Ni mɛɛ gbɛ nɔ amɛsane lɛ baanyɛ ashɛje wɔmii kɛ́ wɔmiifó yɛ wɔwerɛ ni eho wɔhe, nɔ ko ni mɔ ko efee ni edɔ wɔ waa, loo wɔhiɛnɔkamɔ ni etã lɛ hewɔ?
KƐ́ WƆMIIFÓ YƐ WƆWERƐ NI EHO WƆHE LƐ HEWƆ
5. Te shihilɛ ni Hana kɛkpe lɛ hã enu he ehã tɛŋŋ?
5 Hana kɛ naagbai srɔtoisrɔtoi kpe ni hã efó ni eye awerɛho. Naagbai nɛɛ ateŋ ekome ji, no mli lɛ ewu yɛ ŋa kroko ni atsɛɔ lɛ Penina, ni ebienyɛ nɛɛ sumɔɔɔ esane kwraa. Nɔ ni fite sane lɛ fe fɛɛ lɛ, Penina yɛ bii, shi Hana lɛ, ebɛ bi. (1 Sam. 1:1, 2) Agbɛnɛ hu, Penina yeɔ Hana he fɛo yɛ fɔ ni enyɛɛɛ efɔ lɛ hewɔ. Kɛ́ okɛ shihilɛ ni Hana kɛkpe lɛ eko kpe lɛ, kulɛ te obaanu he ohã tɛŋŋ? Sane lɛ dɔ Hana aahu akɛ, “efóɔ ni eyeee nii,” ni ‘ewerɛ ho ehe waa diɛŋtsɛ.’—1 Sam. 1:6, 7, 10.
6. Mɛni Hana fee ni shɛje emii?
6 Mɛni Hana fee ni shɛje emii? Nɔ kome ni efee ji, etee eyajá Yehowa yɛ kpee buu lɛ naa. Be ni etee lɛ, eeenyɛ efee akɛ etee he ko ni bɛŋkɛ kpee buu lɛ kpo lɛ nɔ, ni esɔle etsɛ Yehowa ni “efó waa be ni esɔleɔ lɛ.” Ekpa Yehowa fai akɛ, ‘Kwɛmɔ amanehulu ni otsulɔ naa lɛ, ni okai mi.’ (1 Sam. 1:10b, 11) Hana fɔse etsuiŋ eshwie Yehowa hiɛ yɛ sɔlemɔ mli. Ekã shi faŋŋ akɛ, edɔ Yehowa waa be ni ena ni ebiyoo ni eshwɛɛɛ ehe kwraa lɛ miifó lɛ!
7. Te Hana nu he ehã tɛŋŋ be ni efɔse etsuiŋ eshwie Yehowa hiɛ lɛ?
7 Be ni Hana kɛɛ Yehowa nɔ fɛɛ nɔ ni gbaa enaa lɛ egbe naa lɛ, Osɔfonukpa Eli shɛje emii akɛ, Yehowa baahã lɛ nɔ ni ebi lɛ lɛ. Te Hana nu he ehã tɛŋŋ yɛ no sɛɛ? Biblia lɛ kɛɛ: “Yoo lɛ yiŋ etee ni eyaye nii, ni ehiɛ efeee mɔbɔmɔbɔ dɔŋŋ.” (1 Sam. 1:17, 18) Eyɛ mli akɛ Hana naagbai lɛ asɛɛ efooo amrɔ nɔŋŋ moŋ, shi eyeee etsui dɔŋŋ. Hana he eye akɛ Yehowa enu lɛ shishi ni ena enaagbai lɛ, ni ebaaye ebua lɛ. Nakai pɛpɛɛpɛ Yehowa fee. Enu Hana shishi, ebo esɔlemɔ lɛ toi, ni sɛɛ mli lɛ ehã efɔ.—1 Sam. 1:19, 20; 2:21.
8-9. Yɛ nɔ ni aŋma yɛ Hebribii 10:24, 25 lɛ naa lɛ, mɛni hewɔ esa akɛ wɔfee bɔ fɛɛ bɔ ni wɔbaanyɛ ni wɔya asafoŋ kpeei lɛ? (Kwɛmɔ mfoniri lɛ hu.)
8 Nɔ ni wɔkaseɔ yɛ mli. Ani okɛ shihilɛ ko ni naa wa miikpe ni hãa oyeɔ awerɛho ni ofóɔ? Akɛ nɔkwɛmɔnɔ lɛ, ekolɛ owekunyo ko loo onaanyo ko egbo. Bei pii lɛ, kɛ́ eba lɛ nakai lɛ, wɔsumɔɔɔ ni wɔbɛŋkɛɔ mɛi. Shi kaimɔ akɛ Hana tee kpee buu lɛ naa, ni jɛmɛ Yehowa shɛje emii yɛ. Nakai nɔŋŋ Yehowa baashɛje bo hu omii ni ewo bo hewalɛ kɛ́ omia ohiɛ otee asafoŋ kpeei be ni onuuu he akɛ oya po. (Kanemɔ Hebribii 10:24, 25.) Nibii ni wɔnuɔ kɛjɛɔ Biblia lɛ mli yɛ asafoŋ kpeei ashishi lɛ shɛjeɔ wɔmii ni ehãa wɔjieɔ wɔjwɛŋmɔ kɛjeɔ nibii ni hãa wɔyeɔ wɔtsui lɛ anɔ ni wɔkɛ wɔjwɛŋmɔ maa nibii kpakpai anɔ. Enɛ baanyɛ aye abua wɔ ni wɔkaye awerɛho tsɔ, kɛ́ wɔnaagbai lɛ asɛɛ efooo amrɔ nɔŋŋ po.
9 Kɛ́ wɔtee asafoŋ kpeei lɛ, wɔnyɛmimɛi Kristofoi lɛ shɛjeɔ wɔmii ni amɛhãa wɔnaa akɛ amɛsumɔɔ wɔ waa. Enɛ hãa wɔnáa miishɛɛ. (1 Tes. 5:11, 14) Naa bɔ ni gbɛgbalɔ krɛdɛɛ ko ni ŋa gbo lɛ nuɔ he ehãa. Ewie akɛ: “Mifóɔ lolo. Bei komɛi lɛ, miyahɔɔ he ko diŋŋ ni mifóɔ. Shi kɛ́ mitee asafoŋ kpee lɛ, ewoɔ mi hewalɛ waa. Saji ni nyɛmimɛi lɛ kɛ mi gbaa kɛ saji ahetoi ni amɛhãa lɛ shɛjeɔ mimii. Kɛ́ mihao tamɔ mɛni, ni mitee asafoŋ kpee lɛ, mináa miishɛɛ.” Kɛ́ wɔtee asafoŋ kpeei lɛ, Yehowa baanyɛ etsɔ wɔnyɛmimɛi lɛ anɔ eshɛje wɔmii.
Wɔnyɛmimɛi Kristofoi lɛ baanyɛ ashɛje wɔmii (Kwɛmɔ kuku 8-9)
10. Kɛ́ wɔwerɛ ho wɔhe waa lɛ, mɛɛ gbɛ nɔ wɔbaanyɛ wɔkase Hana?
10 Nɔ kroko ni Hana fee ni shɛje emii ji, efɔse etsuiŋ eshwie Yehowa hiɛ. Kɛ́ bo hu ‘oshɛrɛ nibii fɛɛ ni hãa oyeɔ otsui lɛ oshwie Yehowa nɔ lɛ,’ ebaaye ebua bo. (1 Pet. 5:7) Naa nɔ ni nyɛmi yoo ko ni julɔi gbe ewu lɛ wie. Ewie akɛ: “Mitsui kumɔ aahu akɛ, minuuu he akɛ manyɛ maná miishɛɛ gbi ko. Shi be fɛɛ be ni masɔle mahã Yehowa, mi-Tsɛ ni yɔɔ ŋwɛi ni sumɔɔ mi lɛ, no shɛjeɔ mimii ni ehãa mitsui nyɔɔ mimli. Bei komɛi lɛ, mileee nɔ tuuntu ni mawie kɛtsɔɔ Yehowa bɔ ni minuɔ he mihãa lɛ diɛŋtsɛ, shi enuɔ mi shishi. Kɛ́ mihao ni miwerɛ ho mihe waa lɛ, mibiɔ Yehowa ni ehã mi etoiŋjɔlɛ lɛ eko. Kɛ́ mifee nakai lɛ, mihe jɔɔ mi ni minyɛɔ mifeɔ nibii krokomɛi ni miyɔɔ feemɔ yɛ gbi lɛ mli lɛ.” Kɛ́ owerɛ ho ohe ni ofɔse otsuiŋ oshwie Yehowa hiɛ lɛ, enaa ohiɛ yaafonui lɛ ni enuɔ bo shishi. Kɛ́ onaagbai lɛ eyaaa po lɛ, Yehowa baashɛje omii, ni ebaaye ebua bo ni okaye otsui pii. (Lala 94:19; Fip. 4:6, 7) Ni kɛ́ otee nɔ ofi shi lɛ, ebaajɔɔ bo.—Heb. 11:6.
KƐ́ WƆMIIFÓ YƐ NƆ KO NI MƆ KO EFEE NI EDƆ WƆ WAA LƐ HEWƆ
11. Te naagbai ni David kɛkpe yɛ eshihilɛ mli lɛ hã enu he ehã tɛŋŋ?
11 David kɛ naagbai srɔtoi kpe yɛ eshihilɛ mli ni hã efó. Mɛi komɛi nyɛ lɛ, ni ewekumɛi kɛ enanemɛi komɛi po yeee lɛ anɔkwa, ni amɛbɔ mɔdɛŋ akɛ amɛbaafee lɛ efɔŋ. (1 Sam. 19:10, 11; 2 Sam. 15:10-14, 30) Be ko po lɛ, ewie akɛ: “Mikɛ̃ɛmɔ lɛ ehã migbɔjɔ; jenamɔ muu fɛɛ lɛ, mifɔɔ misaa lɛ kɛ yaafonui; mihãa misaatso lɛ yiɔ kɛ yaafonui.” Mɛni hã David nu he nakai? Enu he nakai ‘yɛ mɛi fɛɛ ni haoɔ lɛ lɛ ahewɔ.’ (Lala 6:6, 7) Nibii ni mɛi fee David lɛ dɔ lɛ aahu akɛ, efó waa.
12. Yɛ nɔ ni awie yɛ Lala 56:8 lɛ naa lɛ, mɛni David he eye waa?
12 Yɛ naagbai ni David kɛkpe lɛ fɛɛ sɛɛ lɛ, ele akɛ Yehowa sumɔɔ lɛ. Ewie akɛ: “Yehowa baanu miyaafo gbee lɛ.” (Lala 6:8) Be ko hu lɛ, David wie wiemɔi ni taa mɔ tsuiŋ ni yɔɔ Lala 56:8 lɛ. (Kanemɔ.) Wiemɔi nɛɛ hãa wɔnaa akɛ, Yehowa sumɔɔ wɔ waa ni ejwɛŋɔ wɔhe hu. David nu he tamɔ nɔ ni Yehowa miiloo ehiɛ yaafonui lɛ eewo tɔ mli loo eeŋma yɛ wolo mli. Enɛ hãa wɔnaa akɛ, David ná nɔmimaa waa akɛ, Yehowa miina epiŋmɔ lɛ ni ehiɛ kpako enɔ. David he eye waa akɛ, Yehowa, e-Tsɛ ni yɔɔ ŋwɛi ni sumɔɔ lɛ lɛ, le nɔ fɛɛ nɔ ni etsɔɔ mli lɛ, ni ele bɔ ni enuɔ he ehãa lɛ hu.
13. Kɛ́ mɔ ko fee wɔ nɔ ko ni ekumɔ wɔtsui waa lɛ, mɛni esa akɛ wɔkai? (Kwɛmɔ mfoniri lɛ hu.)
13 Nɔ ni wɔkaseɔ yɛ mli. Ani mɔ ko ni oheɔ lɛ oyeɔ waa lɛ efee nɔ ko ni ehã otsui ekumɔ? Ekolɛ mɔ ko ni okɛ lɛ miito gbɛjianɔ ni nyɛbote gbalashihilɛ mli loo mɔ ko ni okɛ lɛ ebote gbalashihilɛ mli lɛ eshi bo, loo ekolɛ mɔ ko ni osumɔɔ esane waa lɛ ekpa Yehowa sɔɔmɔ. Nyɛmi nuu ko ŋa yabɔ ajwamaŋ ni esaa eshi ewu lɛ. Ewu lɛ wie akɛ: “Minaa kpɛ mihe, ni efee mi tamɔ nɔ ni miila. Miwerɛ ho mihe, mimli fu, ni minu he akɛ mihe bɛ sɛɛnamɔ.” Kɛ́ bo hu ootsɔ shihilɛ ko ni tamɔ nɛkɛ mli lɛ, ná ole akɛ Yehowa shiŋ bo kɔkɔɔkɔ. Nyɛmi nuu lɛ wie akɛ: “Mibana akɛ, jeee be fɛɛ be adesai baaye wɔ anɔkwa, shi Yehowa lɛ, Tɛsaa ni. Ebaahi wɔmasɛi be fɛɛ be, ekɔɔɔ he eko nɔ ni baaba. Ekwaaa enɔkwafoi lɛ kɔkɔɔkɔ.” (Lala 37:28) Agbɛnɛ hu, kaimɔ akɛ, bɔ ni Yehowa sumɔɔ bo lɛ, adesa ko kwraa bɛ ni baanyɛ asumɔ bo nakai. Eyɛ mli akɛ kɛ́ mɔ ko ni osumɔɔ esane shi bo lɛ, eyɛ dɔlɛ waa moŋ, shi no esaaa bɔ ni Yehowa sumɔɔ osane waa lɛ he. (Rom. 8:38, 39) Sane lɛ ji: Ekɔɔɔ he eko bɔ ni adesa ko kɛ bo eye ehã lɛ, Yehowa, o-Tsɛ ni yɔɔ ŋwɛi lɛ, sumɔɔ bo waa.
Lalai awolo lɛ hãa wɔnaa akɛ, Yehowa yɛ mɛi ni tsui ekumɔ lɛ amasɛi (Kwɛmɔ kuku 13)
14. Mɛɛ gbɛ nɔ Lala 34:18 lɛ baanyɛ ashɛje wɔmii kɛ́ wɔtsui ekumɔ?
14 Kɛ́ mɔ ko efee wɔ nɔ ko ni edɔ wɔ waa lɛ, wiemɔi ni David wie yɛ Lala 34:18 lɛ hu baanyɛ ashɛje wɔmii. (Kanemɔ.) Wolo ko wie akɛ, “mɛi ni werɛ eho amɛhe” ni akɛtsu nii yɛ ŋmalɛ nɛɛ mli lɛ baanyɛ akɔ mɛi ni hiɛnɔkamɔ fɛɛ etã lɛ ahe. Mɛni Yehowa feɔ kɛyeɔ ebuaa mɛi ni miiye awerɛho yɛ mɔ ko ni yeee amɛ anɔkwa lɛ hewɔ? Bɔ ni fɔlɔ ko wóɔ ebi ni miifó ni eshɛjeɔ emii lɛ, nakai Yehowa hu yɛ mɛi ni tsui ekumɔ lɛ amasɛi. Enuɔ he ehãa mɛi ni ayeee amɛ anɔkwa ni no hewɔ lɛ amɛtsui ekumɔ lɛ, ni eesumɔ ni eye ebua amɛ. Kɛ́ wɔtsui ekumɔ loo wɔmiinu he akɛ wɔhe bɛ sɛɛnamɔ lɛ, eesumɔ waa ni eshɛje wɔmii. Ehã wɔ hiɛnɔkamɔ ni baaye abua wɔ ni wɔya nɔ wɔfi shi yɛ naagbai ni wɔkpeɔ bianɛ lɛ amli.—Yes. 65:17.
KƐ́ WƆMIIFÓ AKƐNI WƆHIƐNƆKAMƆ FƐƐ ETÃ LƐ HEWƆ
15. Mɛɛ shihilɛ Hezekia kɛkpe ni hã efó waa?
15 Be ni Yuda maŋtsɛ Hezekia ye afii 39 lɛ, hela ko ni naa wa waa mɔ lɛ. Yehowa tsu gbalɔ Yesaia ni eyakɛɛ Hezekia akɛ hela lɛ baagbe lɛ. (2 Maŋ. 20:1) Be ni Hezekia nu enɛ lɛ, ewerɛ ho ehe aahu akɛ efó waa. Esɔle ekpa Yehowa fai koni eye ebua lɛ.—2 Maŋ. 20:2, 3.
16. Be ni Yehowa na Hezekia yaafonui lɛ, mɛni efee?
16 Be ni Yehowa nu Hezekia sɔlemɔ lɛ, ni ena ehiɛ yaafonui lɛ, enu he ehã lɛ, ni ekɛɛ lɛ akɛ: “Minu osɔlemɔ lɛ. Ni mina oyaafonui lɛ hu. Mibatsa bo.” Yehowa tsɔ gbalɔ Yesaia nɔ ehã Hezekia le akɛ ena lɛ mɔbɔ, ni ewo lɛ shi akɛ ekɛ afii komɛi baafata ewala afii lɛ ahe ehã lɛ ni ebaajie lɛ kɛ Yerusalem kɛje Asiriabii lɛ adɛŋ.—2 Maŋ. 20:4-6.
17. Mɛɛ gbɛ nɔ Yehowa shɛjeɔ wɔmii kɛ́ wɔmiiye hela ko ni wɔfee he eko aahu shi ehiii? (Lala 41:3) (Kwɛmɔ mfoniri lɛ hu.)
17 Nɔ ni wɔkaseɔ yɛ mli. Ani ooye hela ko ni ofee he eko aahu shi ehiii tsamɔ? Kɛɛmɔ Yehowa bɔ ni onuɔ he ohãa lɛ yɛ sɔlemɔ mli; obaanyɛ ofó oshwie enɔ po. Biblia lɛ hãa wɔleɔ akɛ, “musuŋtsɔlɛi a-Tsɛ lɛ kɛ miishɛjemɔ fɛɛ Nyɔŋmɔ lɛ,” baashɛje wɔmii yɛ wɔmanehului fɛɛ amli. (2 Kor. 1:3, 4) Ŋmɛnɛ lɛ, wɔkpaaa gbɛ akɛ Yehowa baatsu wɔnaagbai lɛ fɛɛ ahe nii ehã wɔ, shi wɔle akɛ efee klalo akɛ ebaaye ebua wɔ be fɛɛ be. (Kanemɔ Lala 41:3.) Yehowa tsɔɔ emumɔ krɔŋkrɔŋ lɛ nɔ ehãa wɔ hewalɛ, hiɛshikamɔ, kɛ toiŋjɔlɛ koni wɔnyɛ wɔdamɔ wɔnaagbai lɛ anaa. (Abɛi 18:14; Fip. 4:13) Agbɛnɛ hu, ehã wɔle yɛ Biblia lɛ mli akɛ ebaafo helai fɛɛ sɛɛ, ni enɛ hu shɛjeɔ wɔmii waa.—Yes. 33:24.
Yehowa baabo wɔsɔlemɔ toi ni ebaahã wɔ hewalɛ, hiɛshikamɔ, kɛ toiŋjɔlɛ (Kwɛmɔ kuku 17)
18. Mɛɛ ŋmalɛ shɛjeɔ omii waa kɛ́ okɛ shihilɛ ni mli wa waa miikpe? (Kwɛmɔ akrabatsa ni ji, “ Ŋmalɛi Komɛi Ni Baanyɛ Ashɛje Wɔmii Kɛ́ Wɔwerɛ Ho Wɔhe.”)
18 Yehowa wiemɔ lɛ shɛje Hezekia mii. Nakai nɔŋŋ nɔ ni Yehowa ewie yɛ Biblia lɛ mli lɛ baanyɛ ashɛje wɔmii. Kɛ́ wɔkɛ shihilɛ ni mli wa miikpe lɛ, nibii ni Yehowa ewie yɛ Biblia lɛ mli lɛ baanyɛ ashɛje wɔmii ni ehã wɔtsui anyɔ wɔmli. (Rom. 15:4) Be ni ahã nyɛmi yoo ko ni yɔɔ Afrika Anaigbɛ lɛ le akɛ ená kansa lɛ, daa nɛɛ, efóɔ. Ewie akɛ: “Ŋmalɛ ko ni shɛje mimii waa ji Yesaia 26:3 lɛ. Eyɛ mli akɛ bei pii lɛ, wɔnyɛɛɛ wɔfee nɔ ko tsɔ yɛ wɔnaagbai ahe moŋ, shi nakai ŋmalɛ lɛ yeɔ ebuaa mi ni minaa akɛ Yehowa baanyɛ eye ebua wɔ ni wɔkahao pii, ni agbɛnɛ hu, ebaawa wɔ ni wɔnyɛ wɔdamɔ naa.” Ani bo hu oyɛ ŋmalɛ ko ni shɛjeɔ omii kɛ́ okɛ shihilɛ ni mli wa waa miikpe loo okɛ shihilɛ ko ni ehã ohiɛnɔkamɔ fɛɛ etã lɛ miikpe?
19. Mɛɛ jɔɔmɔi wɔbaaná wɔsɛɛ?
19 Wɔyɛ naagbee gbii lɛ anaagbee kwraa lɛ mli, no hewɔ lɛ, wɔbaanyɛ wɔkpa gbɛ akɛ nibii ni hãa wɔyeɔ awerɛho lɛ baafa. Shi tamɔ wɔna yɛ Hana, David, kɛ Maŋtsɛ Hezekia sane lɛ mli lɛ, Yehowa naa wɔhiɛ yaafonui lɛ ni enuɔ he waa ehãa wɔ. Esumɔɔ wɔ waa yɛ shihilɛ ni mli wa ni wɔkɛmiikpe shi wɔmiifi shi lɛ hewɔ, ni ehiɛ kpaaa wɔhiɛ yaafonui lɛ anɔ. No hewɔ lɛ, kɛ́ wɔkɛ shihilɛ ni mli wa waa ko miikpe lɛ, nyɛhãa wɔsɔlea wɔhãa Yehowa ni wɔkɛɛ lɛ bɔ ni wɔnuɔ he wɔhãa. Esaaa akɛ wɔtseɔ wɔhe kɛjeɔ wɔnyɛmimɛi ni yɔɔ asafo lɛ mli ni sumɔɔ wɔ waa lɛ ahe. Ni nyɛhãa wɔyaa nɔ wɔkanea Nyɔŋmɔ Wiemɔ lɛ koni eshɛje wɔmii. Wɔbaanyɛ wɔná nɔmimaa akɛ, kɛ́ wɔtee nɔ wɔfi shi lɛ, Yehowa baajɔɔ wɔ. Nɔ ni fata jɔɔmɔ nɛɛ he ji shi ni ewo akɛ etsɛŋ, ebaatsumɔ wɔhiŋmɛiiaŋ yaafonui fɛɛ, ni mɔ ko efeŋ wɔ nɔ ko ni baadɔ wɔ, ni wɔkɛ shihilɛ ko ekpeŋ ni baahã wɔnu he akɛ wɔhiɛnɔkamɔ fɛɛ etã. (Kpo. 21:4) Nakai be lɛ, miishɛɛ ni wɔbaaná lɛ sɔŋŋ pɛ baahã yaafonui atsere kɛjɛ wɔhiŋmɛiiaŋ.
LALA 4 Yehowa Kwɛɔ Minɔ
