Ani okane Buu-Mɔɔ srɔtoi ni ba afi nɛɛ jogbaŋŋ? Kwɛmɔ akɛ obaanyɛ ohã sanebimɔi ni nyiɛ sɛɛ nɛɛ ahetoo lo:

Te Yehowa kɛ yei yeɔ ehãa tɛŋŋ ni esa akɛ wɔkase?

Yehowa enaaa yei akɛ amɛbaa shi fe hii. Yehowa boɔ yei atoi, esusuɔ bɔ ni amɛnuɔ he amɛhãa kɛ naagbai ni amɛkɛkpeɔ lɛ ahe waa, ni eheɔ eyeɔ akɛ amɛbaanyɛ amɛtsu enitsumɔ lɛ.—w24.01, bf. 15-16.

Mɛɛ gbɛ nɔ wɔbaanyɛ wɔkɛ ŋaawoo ni yɔɔ Efesobii 5:7 lɛ ni kɛɔ akɛ, “Nyɛkɛ amɛ akafea nɔ ko nɔ ko” lɛ, atsu nii?

Bɔfo Paulo miiwo wɔ ŋaa ni wɔkɛ mɛi ni baanyɛ ahã ewa kɛhã wɔ akɛ wɔbaahi shi yɛ Yehowa jeŋba he mlai lɛ anaa lɛ akabɔ. Jeee mɛi ni wɔnaa amɛ hiɛ kɛ hiɛ ni wɔkɛ amɛ shãraa lɛ pɛ he enɛ kɔɔ, shi moŋ ekɔɔ mɛi ni wɔkɛshãraa yɛ social media nɔ lɛ hu ahe.—w24.03, bf. 22-23.

Mɛɛ saji ni bɛ mli esa akɛ wɔtsi wɔhe kɛje he?

Esa akɛ wɔkwɛ jogbaŋŋ yɛ saji ni wɔnyɛmimɛi Kristofoi lɛ gbaa wɔ shi amɛtaoko mli, kɛ saji ni mɛi ni wɔleee lɛ sɛndiɔ wɔ kɛtsɔ email nɔ lɛ ahe. Agbɛnɛ hu, esa akɛ wɔtsi wɔhe kɛje jamɔkwalɔi ni kwaa amɛfeɔ tamɔ amɛyɛ anɔkwale lɛ he miishɛɛ lɛ ahe.—w24.04, bf. 12.

Mɛni wɔle yɛ bɔ ni Yehowa baakojo Maŋtsɛ Solomon, mɛi ni gboi yɛ Sodom kɛ Gomora, kɛ mɛi ni gboi yɛ Nu Afua lɛ mli lɛ he? Ni mɛni wɔleee yɛ he?

Wɔnyɛŋ wɔwie kɛ nɔmimaa akɛ Yehowa ekpãtã mɛi nɛɛ ahiɛ kɛtee naanɔ. Kɛ́ ebaatee amɛ shi jio, eteŋ amɛ shi jio, wɔleee; Yehowa pɛ ni le, ni wɔle akɛ enaa mɔbɔ waa.—w24.05, bf. 3-4.

Biblia lɛ kɛ Yehowa toɔ “Tɛsaa” he. Mɛni no tsɔɔ wɔ yɛ ehe? (5 Mo. 32:4)

Wɔbaanyɛ wɔba Yehowa abo. Eyeɔ anɔkwa, ni wɔbaanyɛ wɔmu wɔfɔ̃ enɔ, ejaakɛ eyeɔ eshiwoi anɔ be fɛɛ be. Etsakeee; bɔ ni efeɔ enii ehãa lɛ tsakeee, ni nɔ ni eto eyiŋ akɛ ebaafee lɛ hu tsakeŋ.—w24.06, bf. 26-28.

Kɛ́ otee asafo kroko mli lɛ, mɛni baaye abua bo ni oná miishɛɛ?

Okɛ ohiɛ afɔ̃ Yehowa nɔ. Eye ebua etsuji ni hi shi yɛ blema lɛ, ni ebaaye ebua bo hu. Okɛ asafo mli ni ojɛ lɛ akato asafo ni otee mli lɛ he. Okɛ ohe awo asafo nifeemɔi amli, ni bɔɔ mɔdɛŋ ni okɛ mɛi abɔ naanyo.—w24.07, bf. 26-28.

Mɛni wɔkaseɔ yɛ nɔkwɛmɔnii etɛ ni yɔɔ Mateo yitso 25 lɛ amli?

Nɔkwɛmɔnɔ ni kɔɔ gwantɛŋi lɛ kɛ abotiai lɛ ahe lɛ hãa wɔnaa akɛ, ehe miihia ni wɔye anɔkwa. Nɔkwɛmɔnɔ ni kɔɔ oblayei froi ni hiɛ kã shi kɛ oblayei froi kwashiai lɛ ahe lɛ hãa wɔnaa akɛ, esa akɛ wɔsaa wɔhe wɔto ni wɔhã wɔhiɛ ahi wɔhe nɔ. Nɔkwɛmɔnɔ ni kɔɔ talɛntai lɛ ahe lɛ hu hãa wɔnaa akɛ, esa akɛ wɔtsu nii waa, ni wɔkafee anihao.—w24.09, bf. 20-24.

Te Solomon sɔlemɔ shĩa lɛ ablanaa lɛ kwɔlɛ lɛ?

Yɛ 2 Kronika 3:4 lɛ, Biblia shishitsɔɔmɔi komɛi kɛɛ ablanaa lɛ kwɔlɛ ji “ninetalɔi 120,” loo nanetalɔi 175 sɔŋŋ! Shi blema wolokpoi komɛi ni amuɔ afɔ̃ɔ amɛnɔ waa lɛ hu kɛɛ ekwɔlɛ ji “ninetalɔi 20,” loo nanetalɔi 30. Kɛ́ okwɛ sɔlemɔ shĩa lɛ gbogboi lɛ atilɛ lɛ, etamɔ nɔ ni nanetalɔi 30 lɛ ji nɔ ni ja.—w24.10, bf. 31.

Kɛ́ akɛɛ esa akɛ asafoŋ sɔɔlɔ afee ‘wu ni yɔɔ ŋa kome’ lɛ, te atsɔɔ tɛŋŋ? (1 Tim. 3:12)

Etsɔɔ akɛ, esa akɛ ená ŋa kome pɛ, ni esaaa akɛ ekɛ ehe woɔ bɔlɛnamɔ jeŋba sha mli. Agbɛnɛ hu, esaaa akɛ efeɔ nɔ ko ni baahã yoo kroko anu he akɛ esumɔɔ lɛ.—w24.11, bf. 19.

Mɛni hewɔ wɔbaanyɛ wɔkɛɛ akɛ Yohane 6:53 lɛ kɔɔɔ Nuŋtsɔ Lɛ Gbɛkɛ Niyeli lɛ he lɛ?

Yɛ Yohane 6:53 lɛ, Yesu kɛɛ esa akɛ wɔye eheloo ni wɔnu elá. Yesu wie wiemɔi nɛɛ yɛ Galilea yɛ afi 32 Ŋ.B., ni no mli lɛ, ekɛ Yudafoi komɛi ni heee enɔ amɛyeee lɛ ni wieɔ. Enɛ sɛɛ afi dani eto Nuŋtsɔ Lɛ Gbɛkɛ Niyeli lɛ shishi yɛ Yerusalem, ni mɛi ni ekɛto shishi ji mɛi ni kɛ lɛ baaye nɔ akɛ maŋtsɛmɛi yɛ ŋwɛi lɛ.—w24.12, bf. 10-11.