1. Mɛni Yesu wie yɛ be ni ‘je lɛ baaba naagbee’ lɛ he? Ni mɛɛ kɔkɔ ebɔ esɛɛnyiɛlɔi lɛ?

 BE NI eshwɛ gbii fioo ni abaagbe Yesu lɛ, ekaselɔi lɛ ateŋ mɛi ejwɛ ba amɛbabi lɛ akɛ: “Mɛni baafee . . . je lɛ naagbee gbii lɛ he okadi lɛ?” (Mat. 24:3) Etamɔ nɔ ni no mli lɛ kaselɔi lɛ miitao amɛle be ni abaakpãtã Yerusalem kɛ sɔlemɔ shĩa lɛ hiɛ. Yɛ hetoo ni Yesu hã amɛ lɛ mli lɛ, ewie Yerusalem kɛ sɔlemɔ shĩa lɛ hiɛkpatamɔ lɛ he. Shi jeee no pɛ he ewie; ewie jeŋ ni wɔyɔɔ mli nɛɛ “naagbee gbii lɛ” hu he. Be ni Yesu wieɔ be ni naagbee lɛ baaba lɛ he lɛ, ewie akɛ: “Nakai gbi lɛ kɛ nakai ŋmɛlɛtswaa lɛ, mɔ ko mɔ ko leee, bɔfoi ni yɔɔ ŋwɛi lɛ po loo Bi lɛ po leee, ja Tsɛ lɛ.” No sɛɛ lɛ, ebɔ esɛɛnyiɛlɔi fɛɛ kɔkɔ ni ‘amɛya nɔ amɛshi kpe,’ ni ‘amɛya nɔ amɛbu.’​—Mar. 13:32-37.

2. Mɛni hewɔ ehe bahia ni blema Kristofoi lɛ abo Yesu kɔkɔbɔɔ akɛ amɛya nɔ amɛbu lɛ toi lɛ?

² Ehe bahia ni blema Kristofoi ni hi shi yɛ Yudea lɛ aya nɔ abu, ejaakɛ amɛwala damɔ no nɔ. Yesu tsɔɔ amɛ nibii ni kɛ́ amɛna lɛ, no baahã amɛna akɛ Yerusalem hiɛkpatamɔ lɛ ebɛŋkɛ. Ewie akɛ: “Kɛ́ nyɛna akɛ asraafoi ebɔ nsara ewo Yerusalem he kɛkpe lɛ, belɛ nyɛnáa nyɛlea akɛ emaŋfɔfeemɔ lɛ eshɛ etã.” Yesu kɛɛ amɛ akɛ kɛ́ amɛna nakai lɛ, ‘amɛbɔi foijee kɛya gɔji lɛ anɔ.’ (Luka 21:20, 21) Mɛi ni bo lɛ toi lɛ ayi ná wala be ni Romabii lɛ ba amɛbakpãtã Yerusalem hiɛ lɛ.

3. Mɛni he wɔbaasusu yɛ nikasemɔ nɛɛ mli?

³ Ŋmɛnɛ lɛ, wɔyɛ jeŋ fɔŋ nɛɛ naagbee gbii lɛ amli. No hewɔ lɛ, esa akɛ wɔhã wɔhiɛ ahi wɔhe nɔ ni wɔya nɔ wɔbu, ni tsɔɔ  akɛ, wɔkɛ wɔhiŋmɛii akwɛ nibii ni yaa nɔ yɛ je lɛ mli lɛ jogbaŋŋ. Yɛ nikasemɔ nɛɛ mli lɛ, wɔbaana bɔ ni wɔbaafee wɔsusu nii ahe jogbaŋŋ be ni wɔkwɛɔ nibii ni yaa nɔ yɛ je lɛ mli lɛ. Agbɛnɛ hu, wɔbaana bɔ ni wɔbaafee wɔhã wɔhiɛ ahi wɔhe nɔ, kɛ bɔ ni wɔbaafee wɔkɛ be ni eshwɛ lɛ atsu nii jogbaŋŋ.

4. Mɛni hewɔ esa akɛ wɔkwɛ bɔ ni nibii ni yaa nɔ yɛ je lɛ mli ŋmɛnɛ lɛ hãa Biblia mli gbalɛi baa mli lɛ?

⁴ Yiŋtoi kpakpai pii ahewɔ wɔsumɔɔ ni wɔkwɛ bɔ ni nibii ni yaa nɔ yɛ je lɛ mli ŋmɛnɛ lɛ hãa Biblia mli gbalɛi baa mli. Yiŋtoi nɛɛ ateŋ ekome ji akɛ, Yesu hã wɔle nibii pɔtɛi komɛi ni baawa wɔ ni wɔna akɛ jeŋ fɔŋ nɛɛ naagbee lɛ ebɛŋkɛ. (Mat. 24:3-14) Bɔfo Petro hu wo wɔ hewalɛ ni wɔkɛ wɔjwɛŋmɔ ama bɔ ni Biblia mli gbalɛi baa mli amɛhãa lɛ nɔ koni no ahã wɔhemɔkɛyeli lɛ mli awa. (2 Pet. 1:19-21) Kpojiemɔ 1:1 lɛ hu hãa wɔnaa yiŋtoo kroko. Jɛmɛ kɛɔ akɛ: “Saji ni Yesu Kristo jie lɛ kpo koni ekɛtsɔɔ enyɔji lɛ nibii ni sa akɛ aba mli oya nɔŋŋ.” Yiŋtoi nɛɛ ahewɔ wɔsumɔɔ waa ni wɔkwɛ nibii ni yaa nɔ yɛ je lɛ mli ŋmɛnɛ lɛ kɛ bɔ ni ekolɛ amɛhãa Biblia mli gbalɛi baa mli amɛhãa lɛ. Shi ekolɛ, wɔbaasumɔ ni wɔkɛ mɛi krokomɛi agba nibii nɛɛ ahe sane.

5. Mɛni esaaa akɛ wɔfeɔ? Shi mɛni esa akɛ wɔfee? (Kwɛmɔ mfonirii lɛ hu.)

⁵ Kɛ́ wɔkɛ wɔnyɛmimɛi Kristofoi lɛ loo mɛi krokomɛi miigba Biblia mli gbalɛi ahe sane lɛ, esa akɛ wɔkwɛ jogbaŋŋ ni wɔkaka wɔyiŋ wɔwie nɔ ko ni asafo lɛ ewieko. Mɛni hewɔ? Ejaakɛ wɔsumɔŋ ni wɔwie nɔ ko ni kɛ mligbalamɔ baaba asafo lɛ mli. Akɛ nɔkwɛmɔnɔ lɛ, ŋɔɔ lɛ akɛ wɔnu ni je lɛŋ nɔyelɔi miitsɔɔ bɔ ni amɛbaafee amɛhã ta ko ni awuɔ lɛ sɛɛ afo koni toiŋjɔlɛ aba ni mɛi ahi shi shweshweeshwe. Yɛ nɔ najiaŋ ni wɔbaamu sane naa oya nɔŋŋ akɛ eji gbalɛ ni yɔɔ 1 Tesalonikabii 5:3 lɛ mlibaa lɛ, esa akɛ wɔkwɛ nɔ ni Yehowa asafo lɛ ewie yɛ sane nɛɛ ni eba lɛ he. Kɛ́ wɔhã saji ni wɔkɛ mɛi gbaa lɛ damɔ nibii ni asafo lɛ ehã wɔle lɛ anɔ lɛ, ebaahã asafo lɛ afee ekome ni ‘wɔsusumɔ baafee ekome.’​—1 Kor. 1:10; 4:6.

6. Mɛni wɔbaanyɛ wɔkase yɛ 2 Petro 3:11-13 lɛ mli?

⁶ Kanemɔ 2 Petro 3:11-13. Nɔ ni bɔfo Petro wie lɛ yeɔ ebuaa wɔ ni wɔnaa yiŋtoo hewɔ ni esa akɛ wɔhã wɔjwɛŋmɔ ahi bɔ ni Biblia mli gbalɛi baa mli amɛhãa lɛ nɔ. Ewo wɔ hewalɛ ni ‘wɔhã Yehowa gbi lɛ baa lɛ ahi wɔjwɛŋmɔ mli jogbaŋŋ.’ Mɛni hewɔ ewo wɔ nakai hewalɛ lɛ? Ani efee nakai koni no aye abua wɔ ni wɔnyɛ wɔtsɔɔ ‘gbi kɛ ŋmɛlɛtswaa’ nɔ ni Yehowa kɛ Harmagedon baaba? Dabi. Moŋ lɛ, koni no aye abua wɔ ni wɔna akɛ he ni nibii eshɛ lɛ, esa akɛ wɔba wɔjeŋ jogbaŋŋ ni ‘wɔkɛ wɔhe awo Nyɔŋmɔjamɔ nifeemɔi amli.’ (Mat. 24:36; Luka 12:40) Kɛ́ wɔɔwie yɛ gbɛ kroko nɔ lɛ, esa akɛ wɔhã wɔjeŋba he atse be fɛɛ be, ni nɔ fɛɛ nɔ ni wɔtsuɔ yɛ Yehowa sɔɔmɔ lɛ mli lɛ ahã ana faŋŋ akɛ, wɔsumɔɔ lɛ waa. Nɔ kome ni baaye abua wɔ ni wɔfee enɛ ji, ni wɔbaahã wɔhiɛ ahi wɔhe nɔ.

7. Kɛ́ akɛɛ wɔhiɛ ahi wɔhe nɔ lɛ, te atsɔɔ tɛŋŋ? (Luka 21:34)

⁷ Wɔna akɛ, Yesu kɛɛ ekaselɔi lɛ akɛ amɛhã amɛhiɛ ahi nibii ni yaa nɔ yɛ je lɛ mli lɛ anɔ. Shi jeee no pɛ ekɛɛ amɛ; ekɛɛ amɛ ni amɛhã amɛhiɛ ahi amɛ diɛŋtsɛ amɛhe nɔ hu. Efee enɛ faŋŋ yɛ kɔkɔ ni ebɔ amɛ yɛ Luka 21:34 lɛ mli. (Kanemɔ.) Ekɛɛ amɛ akɛ: “Nyɛhiɛ ahia nyɛhe nɔ.” Kɛ́ mɔ ko hiɛ yɛ ehe nɔ lɛ, enyɛɔ eyɔseɔ nibii ni baanyɛ afite ekɛ Yehowa teŋ, ni efeɔ bɔ fɛɛ bɔ ni ebaanyɛ koni etsi ehe kɛje nakai nibii lɛ ahe. Enɛ hewɔ lɛ, eyaa nɔ ehiɔ Nyɔŋmɔ suɔmɔ lɛ mli.​—Abɛi 22:3; Yuda 20, 21.

8. Mɛɛ ŋaa bɔfo Paulo wo Kristofoi?

 ⁸ Bɔfo Paulo wo Kristofoi ŋaa ni amɛhã amɛhiɛ ahi amɛhe nɔ. Akɛ nɔkwɛmɔnɔ lɛ, ewo Kristofoi ni yɔɔ Efeso lɛ ŋaa akɛ: “Be fɛɛ be lɛ, nyɛhiɛ ahia nyɛhe nɔ jogbaŋŋ koni nyɛkanyiɛ akɛ mɛi ni hiɛ kãaa shi, shi moŋ akɛ hiɛshikalɔi.” (Efe. 5:15, 16) Be fɛɛ be lɛ, Satan bɔɔ mɔdɛŋ koni efite wekukpaa ni kã wɔ kɛ Yehowa teŋ lɛ. No hewɔ lɛ, Biblia lɛ woɔ wɔ ŋaa ni ‘wɔya nɔ wɔyɔse nɔ ni ji Yehowa suɔmɔnaa nii’ koni wɔnyɛ wɔbu wɔhe kɛje Satan ŋaatsɔi lɛ ahe.​—Efe. 5:17.

9. Mɛni baaye abua wɔ ni wɔnyɛ wɔyɔse nɔ ni ji “Yehowa suɔmɔnaa nii”?

⁹ Jeee nɔ fɛɛ nɔ ni baanyɛ afite wɔ kɛ Yehowa teŋ wekukpaa lɛ he awie yɛ Biblia lɛ mli. Bei pii lɛ, ehe bahiaa ni wɔkpɛ yiŋ yɛ saji ni Biblia lɛ ewieko he tɛ̃ɛ lɛ ahe. Dani wɔbaanyɛ wɔkpɛ yiŋ kpakpai yɛ saji ni tamɔ nakai lɛ ahe lɛ, esa akɛ wɔyɔse nɔ ni ji “Yehowa suɔmɔnaa nii.” Nɔ ni baaye abua wɔ ni wɔfee nakai ji, ni wɔbaakase Nyɔŋmɔ Wiemɔ lɛ daa ni wɔjwɛŋ nɔ. Kɛ́ wɔtee nɔ wɔyɔse nɔ ni ji Yehowa suɔmɔnaa nii ni wɔná “Kristo jwɛŋmɔ lɛ” eko lɛ, ebaaye ebua wɔ ni wɔnyiɛ akɛ ‘mɛi ni hiɛ kã shi,’ kɛ́ Biblia lɛ woko mla pɔtɛɛ yɛ bɔ ni esa akɛ wɔfee wɔnii yɛ shihilɛ ko mli lɛ he po. (1 Kor. 2:14-16) Nibii ni baanyɛ afite wɔ kɛ Yehowa teŋ lɛ ekomɛi yɛ ni ewaaa akɛ wɔbaana, shi ekomɛi hu yɛ ni ewa akɛ wɔbaana.

10. Mɛni ji nibii komɛi ni baanyɛ afite wɔ kɛ Yehowa teŋ ni esa akɛ wɔkwɛ wɔhe nɔ jogbaŋŋ yɛ he?

¹⁰ Nibii ni baanyɛ afite wɔ kɛ Yehowa teŋ lɛ ekomɛi ji, ni wɔbaafee wɔnii tamɔ wɔsumɔɔ mɔ ko shi wɔfeko wɔjwɛŋmɔ akɛ wɔkɛ lɛ baabote gbalashihilɛ mli, daanumɔ babaoo, ŋmaayeli, ni wɔbaawie wiemɔi ni yɔɔ dɔlɛ wɔshi mɛi, kɛ agbɛnɛ hu, ponografi, sinii ni yiwalɛ nifeemɔi yɔɔ mli, kɛ nibii krokomɛi ni tamɔ nakai lɛ akwɛmɔ. (Lala 101:3) Daa gbi lɛ, wɔhenyɛlɔ Abonsam miitao hegbɛ ko kɛkɛ ni ekɛfite wɔ kɛ Yehowa teŋ. (1 Pet. 5:8) Kɛ́ wɔhãaa wɔhiɛ ahi wɔhe nɔ jogbaŋŋ lɛ, Satan baadu hetsɛ̃, amimyeli, nyɛɛ, kɛ henɔwomɔ yɛ wɔtsui kɛ wɔjwɛŋmɔ mli, loo ebaahã wɔbɛ mɛi wɔwo wɔmli, loo wɔshishiu mɛi. (Gal. 5:19-21) Shishijee lɛ, ekolɛ wɔnaŋ sui nɛɛ akɛ amɛbaanyɛ amɛfite wɔ kɛ Yehowa teŋ. Shi kɛ́ wɔkwɛɛɛ ni wɔbaajie amɛ oya nɔŋŋ lɛ, amɛbaahe shi yɛ wɔtsui mli tamɔ jwɛi ni pɔizin yɔɔ mli, ni amɛbaahã wɔná naagbai pii.​—Yak. 1:14, 15.

11. Mɛni ji nɔ ko ni baanyɛ afite wɔ kɛ Yehowa teŋ ni kɛ́ wɔkwɛɛɛ ni ahi lɛ, wɔyɔseŋ? Ni mɛni hewɔ esa akɛ wɔtsi wɔhe kɛje oshãra nɛɛ he?

¹¹ Nɔ ko ni baanyɛ afite wɔ kɛ Yehowa teŋ ni kɛ́ wɔkwɛɛɛ ni ahi lɛ wɔyɔseŋ ji, ni wɔkɛ mɛi ni sɔmɔɔɔ Yehowa lɛ baabɔ naanyo. Ŋɔɔ lɛ akɛ, okɛ mɔ ko ni jeee Yehowa Odasefonyo lɛ tsuɔ nii yɛ he kome. Akɛni ootao ni mɔ lɛ asumɔ Yehowa Odasefoi asane hewɔ lɛ, ojieɔ mlihilɛ kpo otsɔɔ lɛ ni owaa lɛ. Bei komɛi po lɛ, okɛ lɛ fɛɛ yayeɔ nii. Fiofio lɛ, ebashɛ he ko lɛ daa nɛɛ okɛ lɛ yayeɔ nii. Bei komɛi kɛ́ nyɛyaaye nii lɛ, ewieɔ nibii komɛi ni kɔɔ jeŋba sha he, ni shishijee mli lɛ, onyaaa he. Shi be ni be shwie mli lɛ, kɛ́ eewie nakai nibii lɛ egbaaa onaa po, ejaakɛ onu aahu. Kɛkɛ ni gbi ko be ni nyɛkpa nitsumɔ lɛ, ekɛɛ bo akɛ oba ni nyɛyanu nɔ ko fioo, ni okɛ lɛ tee. Agbɛnɛ, kɛ́ ewie nɔ ko nɔŋŋ lɛ, okɛ lɛ kpãa gbee. Kɛ́ okwɛ lɛ, he ni nyɛbɔ naanyo kɛshɛ lɛ, ani ebaawa akɛ obaafee nibii ni efeɔ lɛ eko? Naagba bɛ he akɛ wɔbaajie mlihilɛ kɛ bulɛ kpo wɔtsɔɔ mɛi fɛɛ. Shi esa akɛ wɔhã ehi wɔjwɛŋmɔ mli akɛ, kɛ́ wɔkɛ mɔ ko bɔ be kplaŋŋ lɛ, ebaaná wɔnɔ hewalɛ waa. (1 Kor. 15:33) Kɛ́ wɔhã wɔhiɛ hi wɔhe nɔ, tamɔ bɔ ni Yesu wo wɔ hewalɛ akɛ wɔfee lɛ, wɔkɛ mɛi ni ehiii shi yɛ Yehowa mlai kɛ gbɛtsɔɔmɔi anaa lɛ  ebɔŋ gbagbalii. (2 Kor. 6:15) Wɔbaana oshãra lɛ, ni wɔbaatsi wɔhe kɛje he.

12. Mɛni esa akɛ Yesu kaselɔi lɛ afee be ni amɛmɛɔ Yerusalem kɛ sɔlemɔ shĩa lɛ hiɛkpatamɔ lɛ?

¹² Yesu sumɔɔɔ ni ekaselɔi lɛ taa shi efolo be ni amɛmɛɔ Yerusalem kɛ sɔlemɔ shĩa lɛ hiɛkpatamɔ lɛ. No hewɔ lɛ, ehã amɛ nitsumɔ ni amɛtsu. Efã amɛ ni amɛshiɛ sane kpakpa lɛ “yɛ Yerusalem, kɛ Yudea kɛ Samaria fɛɛ, kɛ agbɛnɛ hu, kɛyashi shikpɔŋ lɛ nɔ hei ni jekɛ waa lɛ.” (Bɔf. 1:6-8) Nitsumɔ nɛɛ ni Yesu kɛwo ekaselɔi lɛ adɛŋ lɛ jeee nitsumɔ bibioo. Kɛ́ amɛkɛ amɛbe kɛ amɛhewalɛ fɛɛ tsu nitsumɔ nɛɛ, no baatsɔɔ akɛ amɛkɛ amɛbe miitsu nii jogbaŋŋ.

13. Mɛni hewɔ esa akɛ wɔkɛ wɔbe atsu nii jogbaŋŋ? (Kolosebii 4:5)

¹³ Kanemɔ Kolosebii 4:5. Nɔ kome ni baawa wɔ ni wɔhiɛ ahi wɔhe nɔ ji, ni wɔbaakwɛ bɔ ni wɔkɛ wɔbe tsuɔ nii wɔhãa lɛ jogbaŋŋ. Nɔ hewɔ lɛ ji akɛ, ‘nibii ni akpaaa gbɛ’ baanyɛ aba wɔteŋ mɔ fɛɛ mɔ nɔ. (Jaj. 9:11) Wɔwala sɛɛ baanyɛ afo trukaa.

14-15. Mɛni kɛ́ wɔfee lɛ, no baatsɔɔ akɛ wɔkɛ wɔbe miitsu nii jogbaŋŋ? (Hebribii 6:11, 12) (Kwɛmɔ mfoniri lɛ hu.)

¹⁴ Kɛ́ wɔfee Yehowa suɔmɔnaa nii ni wɔfee nibii ni baahã wɔ kɛ lɛ teŋ naanyobɔɔ lɛ mli awa lɛ, belɛ wɔkɛ wɔbe miitsu nii jogbaŋŋ  ji no. (Yoh. 14:21) Esa akɛ ‘wɔfi shi shiŋŋ, wɔkagbugba, ni be fɛɛ be lɛ, wɔtsu babaoo yɛ Nuŋtsɔ lɛ nitsumɔ lɛ mli.’ (1 Kor. 15:58) Kɛkɛ lɛ, wɔsɛɛ kɛ́ naagbee lɛ banina wɔ, loo wɔkã gbele saa nɔ lɛ, edɔŋ wɔ akɛ wɔtsuuu babaoo wɔhãaa Yehowa.​—Mat. 24:13; Rom. 14:8.

¹⁵ Ŋmɛnɛ lɛ, Yesu kaselɔi lɛ miishiɛ Nyɔŋmɔ Maŋtsɛyeli lɛ he sane kpakpa lɛ yɛ jeŋ fɛɛ, ni Yesu kã he eetsɔɔ amɛ gbɛ. Eye eshiwoo lɛ nɔ. Yesu tsɔɔ wɔsafoŋ kpeei kɛ asafo lɛ woji lɛ anɔ etsɔɔ wɔ bɔ ni esa akɛ wɔtsu shiɛmɔ nitsumɔ lɛ wɔhã. Agbɛnɛ hu, ehãa wɔ nibii fɛɛ ni he hiaa wɔ koni wɔnyɛ wɔtsu nitsumɔ nɛɛ. (Mat. 28:18-20) Nɔ ni shwɛɔ wɔ ji, ni wɔbaashiɛ ni wɔtsɔɔ mɛi nii kɛ ekãa, ni agbɛnɛ hu, wɔhã wɔhiɛ ahi nibii ni yaa nɔ yɛ je lɛ mli kɛ wɔ diɛŋtsɛ wɔhe nɔ be ni wɔmɛɔ ni Yehowa akpãtã jeŋ fɔŋ nɛɛ hiɛ lɛ. Kɛ́ wɔkɛ ŋaawoo ni yɔɔ Hebribii 6:11, 12 lɛ tsu nii lɛ, wɔbaahiɛ wɔhiɛnɔkamɔ lɛ mli “kɛyashi naagbee.”​—Kanemɔ.

16. Mɛni esa akɛ efee oti ni ma wɔhiɛ?

¹⁶ Yehowa eto gbi kɛ ŋmɛlɛtswaa ni ekɛbaakpãtã Satan jeŋ fɔŋ nɛɛ hiɛ. Kɛ́ Yehowa kpãtã jeŋ fɔŋ nɛɛ hiɛ lɛ, gbalɛi fɛɛ ni yɔɔ e-Wiemɔ lɛ mli ni kɔɔ jeŋ hee lɛ he lɛ baaba mli. Shi bei komɛi lɛ, wɔbaanu he akɛ jeŋ fɔŋ nɛɛ naagbee lɛ etsɛ tsɔ. Kɛ́ nakai wɔnuɔ he po lɛ, nyɛhãa wɔkaia akɛ Yehowa gbi lɛ “ekpeŋ sɛɛ!” (Hab. 2:3) No hewɔ lɛ, nyɛhãa wɔkɛfea oti ni ma wɔhiɛ akɛ, ‘wɔbaaya nɔ wɔkwɛ Yehowa gbɛ,’ ni ‘wɔto wɔtsui shi wɔmɛ wɔyiwalaheremɔ Nyɔŋmɔ lɛ.’​—Mika 7:7.