Bɔ Ni Wɔbaafee Wɔná Miishɛɛ Be Ni Wɔmɛɔ Yehowa
ANI ookwɛ be ni Yehowa baafo nɔfɔŋfeemɔ fɛɛ sɛɛ ni efee nibii fɛɛ ehee lɛ gbɛ? (Kpo. 21:1-5) Ŋwanejee ko bɛ he akɛ, ookwɛ gbɛ! Shi jeee be fɛɛ be eyɔɔ mlɛo akɛ wɔbaaya nɔ wɔmɛ Yehowa, titri lɛ, kɛ́ wɔkɛ shihilɛi ni mli wawai miikpe. Kɛ́ wɔmiikwɛ nɔ ko gbɛ ni ebaaa mli mra lɛ, enyɛɔ ehãa wɔhaoɔ waa.—Abɛi 13:12, shn.
Fɛɛ sɛɛ lɛ, Yehowa miikpa gbɛ akɛ wɔbaato wɔtsui shi ni wɔmɛ lɛ kɛyashi be ni ebaatsu nibii ahe nii yɛ be ni eto lɛ naa. Mɛni hewɔ ekpaa gbɛ akɛ wɔbaafee nakai? Mɛni kɛ́ wɔfee lɛ wɔbaaná miishɛɛ be ni wɔmɛɔ lɛ?
MƐNI HEWƆ YEHOWA KPAA GBƐ AKƐ WƆBAATO WƆTSUI SHI NI WƆMƐ LƐ?
Biblia lɛ kɛɛ: “Yehowa eto etsui shi eemɛ koni edro nyɛ, ni ebaate shi ni ena nyɛ mɔbɔ. Ejaakɛ Yehowa lɛ, Nyɔŋmɔ ni yeɔ jalɛ sane ji lɛ. Mɛi fɛɛ ni mɛɔ lɛ waa lɛ yɛ miishɛɛ.” (Yes. 30:18) Yudafoi toigbolɔi lɛ ji mɛi ni gbalɔ Yesaia kɛwie yɛ biɛ lɛ. (Yes. 30:1) Shi wiemɔi nɛɛ hã anɔkwafoi ni yɔɔ amɛteŋ lɛ ná hiɛnɔkamɔ. Ŋmɛnɛ lɛ, wiemɔi nɛɛ nɔŋŋ hãa Yehowa tsuji anɔkwafoi náa hiɛnɔkamɔ.
No hewɔ lɛ, esa akɛ wɔto wɔtsui shi ni wɔmɛ, ejaakɛ Yehowa hu eto etsui shi eemɛ. Eto be ni ekɛbaakpãtã jeŋ fɔŋ nɛɛ hiɛ, ni eemɛ ni nakai gbi lɛ kɛ ŋmɛlɛtswaa lɛ ashɛ. (Mat. 24:36) Be ni nakai be lɛ baashɛ lɛ, mɔ fɛɛ mɔ ena faŋŋ akɛ, saji ni Abonsam ewie eshi Yehowa kɛ mɛi ni jáa lɛ lɛ ekome folo po bɛ mli. No sɛɛ lɛ, Yehowa baakpãtã Satan kɛ mɛi ni fata ehe lɛ fɛɛ ahiɛ, shi wɔ lɛ, ‘ebaana wɔ mɔbɔ.’
Kɛyashi nakai be lɛ baashɛ lɛ, ekolɛ Yehowa ejieŋ wɔ kɛjeŋ shihilɛi ni mli wawai ni wɔkɛkpeɔ lɛ amli. Shi ehã wɔle akɛ, wɔbaanyɛ wɔná miishɛɛ be ni wɔmɛɔ lɛ lɛ. Tamɔ Yesaia wie lɛ, wɔbaanyɛ wɔná miishɛɛ be ni wɔshweɔ nibii kpakpai ni kã wɔhiɛ lɛ. (Yes. 30:18) a Shi te wɔbaafee tɛŋŋ wɔná nakai miishɛɛ lɛ? Naa nibii ejwɛ ni baanyɛ aye abua wɔ.
BƆ NI WƆBAAFEE WƆNÁ MIISHƐƐ BE NI WƆMƐƆ LƐ
Okɛ ojwɛŋmɔ ama nibii kpakpai ni yaa nɔ yɛ oshihilɛ mli lɛ anɔ. Maŋtsɛ David na nibii gbohii pii yɛ eshihilɛ mli. (Lala 37:35) Shi fɛɛ sɛɛ lɛ, eŋma akɛ: “Feemɔ diŋŋ yɛ Yehowa hiɛ ni oto otsui shi omɛ lɛ. Kaahã gbɔmɔ wo omli la gbɔmɔ ni tsuɔ eŋaatsɔi ahe nii lɛ.” (Lala 37:7) David diɛŋtsɛ kɛ ŋaawoo nɛɛ tsu nii. Ekɛ ejwɛŋmɔ ma shi ni Yehowa ewo lɛ akɛ ebaahere lɛ lɛ nɔ. Agbɛnɛ hu, ehiɛ sɔ nibii kpakpai fɛɛ ni Yehowa efee ehã lɛ lɛ. (Lala 40:5) Kɛ́ wɔ hu wɔkɛ wɔjwɛŋmɔ ma nibii kpakpai ni yaa nɔ yɛ wɔshihilɛ mli lɛ anɔ, ni wɔkɛ wɔjwɛŋmɔ emaaa wɔnaagbai lɛ anɔ lɛ, ewaŋ tsɔ kɛhãŋ wɔ akɛ wɔbaaya nɔ wɔmɛ Yehowa.
Ŋɔɔ hegbɛ fɛɛ hegbɛ ni obaaná lɛ kɛjie Yehowa yi. Mɔ ni ŋma Lala 71 lɛ kɛɛ Yehowa akɛ: “Maya nɔ mamɛ; majie oyi babaoo fe tsutsu lɛ.” (Lala 71:14) Ekã shi faŋŋ akɛ, David ni ŋma lala nɛɛ. Mɛni ebaafee kɛjie Yehowa yi? Ebaagba mɛi Yehowa he sane, ni ebaalá yijiemɔ lalai ehã lɛ. (Lala 71:16, 23) Tamɔ David lɛ, wɔ hu wɔbaanyɛ wɔná miishɛɛ be ni wɔmɛɔ Yehowa lɛ. Wɔjieɔ Yehowa yi kɛ́ wɔshiɛ wɔhã mɛi, wɔkɛ wɔwekumɛi kɛ wɔnanemɛi gba ehe sane, kɛ agbɛnɛ hu, kɛ́ wɔlá asafo lɛ lalai lɛ. No hewɔ lɛ, be fɛɛ be ni obaalá Maŋtsɛyeli lala ko lɛ, susumɔ emli wiemɔi lɛ ahe, ni no baahã oná miishɛɛ.
Okɛ onyɛmimɛi Kristofoi lɛ abɔ koni amɛwo bo hewalɛ. Be ni David kɛ naagbai kpe lɛ, ekɛɛ Yehowa akɛ: “Mikɛ mihiɛ baafɔ̃ ogbɛ́i lɛ nɔ yɛ onɔkwafoi lɛ ahiɛ.” (Lala 52:9) Wɔ hu wɔkɛ wɔnyɛmimɛi Kristofoi lɛ bɔɔ ni amɛwoɔ wɔ hewalɛ be ni wɔtee asafoŋ kpeei kɛ be ni wɔkɛ amɛ nyiɛ shiɛmɔ nɔ. Shi kɛfata he lɛ, amɛbaanyɛ amɛwo wɔ hewalɛ kɛ́ wɔkɛ amɛ fee ekome kɛjie wɔhiɛtserɛ.—Rom. 1:11, 12.
Feemɔ nibii ni baahã ohiɛnɔkamɔ lɛ mli awa. Lala 62:5 lɛ kɛɔ akɛ: “Mifee diŋŋ, ni miimɛ Nyɔŋmɔ ejaakɛ lɛ edɛŋ nɔ ni mihiɛ kã nɔ lɛ jɛɔ.” Ehe miihia waa ni wɔná hiɛnɔkamɔ ni mli wa, titri lɛ, kɛ́ naagbee lɛ baaa oya tamɔ bɔ ni wɔsusuɔ lɛ. Esa akɛ wɔná hemɔkɛyeli ni mli wa akɛ, Yehowa shiwoi lɛ fɛɛ baaba mli, kɛ́ ehe bahia ni wɔmɛ shiwoi nɛɛ afii pii po. Kɛ́ wɔkase Nyɔŋmɔ Wiemɔ lɛ, wɔhiɛnɔkamɔ lɛ mli baawa waa. Akɛ nɔkwɛmɔnɔ lɛ, wɔbaanyɛ wɔkase nibii ni Biblia lɛ egba ni eba mli, bɔ ni Biblia lɛ eteee shi ewooo ehe eyɛ mli akɛ mɛi srɔtoisrɔtoi ni ŋma, kɛ agbɛnɛ hu, nɔ ni etsɔɔ wɔ yɛ Yehowa he lɛ he nii. (Lala 1:2, 3) Kɛfata he lɛ, be ni wɔmɛɔ ni shi ni Yehowa ewo akɛ ebaahã wɔ naanɔ wala lɛ aba mli lɛ, esa akɛ wɔya nɔ ‘wɔsɔle yɛ mumɔ krɔŋkrɔŋ lɛ kɛ gbeekpamɔ naa’ koni wekukpaa ni kã wɔ kɛ Yehowa teŋ lɛ mli aya nɔ awa.—Yuda 20, 21.
Tamɔ bɔ ni Maŋtsɛ David he eye lɛ, bo hu hemɔ oye akɛ Yehowa hiŋmɛi kã mɛi ni mɛɔ lɛ lɛ ahe, ni ejieɔ suɔmɔ ni tsakeee kpo etsɔɔ amɛ. (Lala 33:18, 22) Okɛ ojwɛŋmɔ aya nibii kpakpai ni yaa nɔ yɛ oshihilɛ mli lɛ anɔ. Jiemɔ Yehowa yi. Okɛ onyɛmimɛi Kristofoi lɛ abɔ koni amɛwo bo hewalɛ, ni ofee nibii ni baahã ohiɛnɔkamɔ lɛ mli awa be fɛɛ be. Kɛ́ ofee nibii nɛɛ, no baaye abua bo ni oya nɔ oto otsui shi omɛ Yehowa kɛ miishɛɛ.
a Abaanyɛ atsɔɔ Hebri wiemɔ ni atsɔɔ shishi akɛ “mɛɔ lɛ waa” lɛ shishi hu akɛ, “shweɔ ni nɔ ko aba, loo hiɛ kã nɔ akɛ nɔ ko baaba.” Enɛ tsɔɔ akɛ, ejeee tɔmɔ akɛ wɔbaashwe waa ni Yehowa ajie naagbai fɛɛ ni wɔkɛkpeɔ lɛ kɛya.
