1. Mɛni Yehowa egba akɛ ebaaya nɔ yɛ wɔbei nɛɛ amli?

YEHOWA egba akɛ, yɛ wɔbei nɛɛ amli lɛ, “hii nyɔŋma ni jɛ jeŋmaji lɛ anɔ wiemɔi lɛ fɛɛ amli lɛ baamɔ Yudanyo kome atade kakadaŋŋ mli, hɛɛ, amɛbaamɔ mli kpɛŋŋ, ni amɛbaakɛɛ akɛ: ‘Wɔkɛ nyɛ baaya, ejaakɛ wɔnu akɛ, Nyɔŋmɔ kɛ nyɛ yɛ.’” (Zak. 8:23) “Yudanyo” lɛ damɔ shi kɛhã mɛi ni Nyɔŋmɔ kɛ emumɔ krɔŋkrɔŋ lɛ efɔ amɛ mu lɛ. Gbɛ́i kroko ni akɛle amɛ ji “Nyɔŋmɔ Israel.” (Gal. 6:16) “Hii nyɔŋma” lɛ damɔ shi kɛhã mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ lɛ nɔ lɛ. Amɛle akɛ, Yehowa ejɔɔ mɛi ni afɔ amɛ mu lɛ, ni amɛnuɔ he akɛ, eji hegbɛ kpele ni amɛná akɛ amɛkɛ mɛi ni afɔ amɛ mu lɛ baafee ekome kɛsɔmɔ lɛ.

2. Mɛɛ shishinumɔ naa “hii nyɔŋma” lɛ kɛ mɛi ni afɔ amɛ mu lɛ yaa?

² Wɔnyɛŋ wɔle mɛi fɛɛ ni afɔ amɛ mu ni yɔɔ shikpɔŋ lɛ nɔ ŋmɛnɛ lɛ agbɛ́ii. * Kɛ̃lɛ, mɛi ni yɔɔ ŋmɛnɛ ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ baanyɛ ‘amɛkɛ amɛ aya.’ Yɛ mɛɛ shishinumɔ naa? Biblia lɛ wie yɛ “hii nyɔŋma” lɛ ahe akɛ, amɛbaamɔ “Yudanyo kome atade kakadaŋŋ mli, hɛɛ, amɛbaamɔ mli kpɛŋŋ, ni amɛbaakɛɛ akɛ: ‘Wɔkɛ nyɛ baaya, ejaakɛ wɔnu akɛ, Nyɔŋmɔ kɛ nyɛ yɛ.’” Ŋmalɛ lɛ tsĩ Yudanyo kome tã. Shi wɔle akɛ akɛ wiemɔ ni ji “nyɛ” lɛ tsuɔ nii ahãa mɛi pii. Ni tsɔɔ akɛ, Yudanyo kome lɛ damɔ shi kɛhã kuu ko, ni ji mɛi fɛɛ ni afɔ  amɛ mu lɛ. Mɛi ni afɔko amɛ mu lɛ kɛ mɛi ni afɔ amɛ mu lɛ feɔ ekome kɛsɔmɔɔ Yehowa. Shi amɛnuuu he akɛ mɛi ni afɔ amɛ mu lɛ ji amɛhiɛnyiɛlɔi, ejaakɛ amɛle akɛ Yesu ji wɔ-Hiɛnyiɛlɔ.​—Mat. 23:10.

3. Mɛɛ sanebimɔi abaahã hetoo yɛ nikasemɔ nɛɛ mli?

³ Akɛni Kristofoi ni afɔ amɛ mu lɛ ateŋ mɛi komɛi yɛ wɔteŋ lolo yɛ shikpɔŋ lɛ nɔ hewɔ lɛ, ekolɛ wɔbaasumɔ ni wɔle sanebimɔi nɛɛ ahetoo: (1) Te esa akɛ mɛi ni afɔ amɛ mu lɛ afee amɛnii amɛhã tɛŋŋ? (2) Kɛ́ mɔ ko ye blodo lɛ ni enu wain lɛ eko yɛ Kaimɔ lɛ shishi lɛ, te esa akɛ wɔfee wɔnii wɔhã tɛŋŋ yɛ ehe? (3) Ni kɛ́ wɔyɔse akɛ mɛi ni yeɔ blodo lɛ ni amɛnuɔ wain lɛ yɛ Kaimɔ lɛ shishi lɛ ayi miifa hu? Ani esa akɛ egba wɔnaa? Abaahã sanebimɔi nɛɛ hetoo yɛ nikasemɔ nɛɛ mli.

4. Mɛɛ kɔkɔbɔɔ yɔɔ 1 Korintobii 11:27-29? Ni mɛni hewɔ esa akɛ mɛi ni afɔ amɛ mu lɛ kɛ hiɛdɔɔ asusu he?

⁴ Esa akɛ mɛi ni afɔ amɛ mu lɛ kɛ hiɛdɔɔ asusu kɔkɔbɔɔ ni yɔɔ 1 Korintobii 11:27-29 lɛ he. (Kanemɔ.) Mɛni baatsɔɔ akɛ mɔ ko ni afɔ lɛ mu lɛ miiye blodo lɛ ni eenu wain lɛ “bɔ ni esaaa”? Kɛ́ eyeee Yehowa anɔkwa, ni fɛɛ sɛɛ lɛ, eye blodo lɛ ni enu wain lɛ yɛ Kaimɔ lɛ shishi lɛ, belɛ eeye ni eenu bɔ ni esaaa.  (Heb. 6:4-6; 10:26-29) Mɛi ni afɔ amɛ mu lɛ le akɛ, esa akɛ amɛye anɔkwa kɛyawula shi, kɛjeee nakai lɛ, amɛnine shɛŋ ‘jweremɔnɔ ni ji ŋwɛi tsɛmɔ ni Nyɔŋmɔ tsɔɔ Kristo Yesu nɔ etsɛɔ amɛ lɛ nɔ.’​—Fip. 3:13-16.

5. Te esa akɛ Kristofoi ni afɔ amɛ mu lɛ afee amɛnii amɛhã tɛŋŋ?

⁵ Yehowa mumɔ krɔŋkrɔŋ lɛ hãa etsuji baa amɛhe shi; ehãaa amɛwó amɛhe nɔ. (Efe. 4:1-3; Kol. 3:10, 12) No hewɔ lɛ, esaaa akɛ mɛi ni afɔ amɛ mu lɛ nuɔ he akɛ amɛhi fe mɛi krokomɛi. Kɛ́ afɔ mɔ ko mu lɛ, no etsɔɔɔ doo akɛ Yehowa ehã lɛ mumɔ krɔŋkrɔŋ lɛ babaoo fe etsuji krokomɛi ni eshwɛ lɛ, ni mɛi ni afɔ amɛ mu lɛ le enɛ. Agbɛnɛ hu, amɛnuuu he akɛ amɛnuɔ Biblia lɛ shishi jogbaŋŋ fe mɔ fɛɛ mɔ. Ekaba kɔkɔɔkɔ akɛ mɔ ko ni afɔ lɛ mu lɛ baakɛɛ mɛi krokomɛi akɛ afɔ amɛ mu, ni no hewɔ lɛ esa akɛ amɛye blodo lɛ ni amɛnu wain lɛ eko yɛ Kaimɔ lɛ shishi. Mɛi ni afɔ amɛ mu lɛ baa amɛhe shi, ni amɛkpɛlɛɔ nɔ akɛ, Yehowa pɛ ji mɔ ni yɔɔ hegbɛ akɛ ehalaa mɛi kɛhã ŋwɛi hiɛnɔkamɔ lɛ.

6. Yɛ nɔ ni awie yɛ 1 Korintobii 4:7, 8 lɛ hewɔ lɛ, mɛni esaaa akɛ Kristofoi ni afɔ amɛ mu lɛ kpaa gbɛ?

⁶ Eji hegbɛ kpele ni mɛi ni afɔ amɛ mu lɛ ená akɛ amɛbaaya ŋwɛi. Shi esaaa akɛ amɛkpaa gbɛ akɛ mɛi kɛ woo srɔto ko baahã amɛ yɛ hegbɛ nɛɛ ni amɛná lɛ hewɔ. (Fip. 2:2, 3) Be ni Yehowa fɔ amɛ mu lɛ, etswaaa he adafi etsɔɔɔ jeŋ fɛɛ. No hewɔ lɛ, esaaa akɛ efeɔ amɛ naakpɛɛ akɛ, jeee mɛi fɛɛ baahe aye amrɔ nɔŋŋ akɛ afɔ amɛ mu. Biblia lɛ woɔ wɔ ŋaa akɛ, kɛ́ mɔ ko kɛɛ Nyɔŋmɔ ehala lɛ kɛhã nitsumɔ krɛdɛɛ ko lɛ, wɔkahe nɔ ni mɔ lɛ wieɔ lɛ wɔye oya nɔŋŋ. (Kpo. 2:2) Mɛi ni afɔ amɛ mu lɛ kpaaa gbɛ akɛ mɛi kɛ amɛ baaye yɛ gbɛ krɛdɛɛ nɔ. No hewɔ lɛ, kɛ́ amɛmiijie amɛhe shi amɛmiitsɔɔ mɔ ko lɛ, amɛtsĩŋ tã amɛtsɔŋ mɔ lɛ akɛ afɔ amɛ mu. Kɛfata he lɛ, amɛfeŋ fuu yɛ hegbɛ kpele nɛɛ ni amɛná lɛ he.​—Kanemɔ 1 Korintobii 4:7, 8.

7. Mɛni esaaa akɛ Kristofoi ni afɔ amɛ mu lɛ feɔ? Ni mɛni hewɔ?

⁷ Kristofoi ni afɔ amɛ mu lɛ ateŋ mɔ ko mɔ ko ebuuu ehe akɛ eji kuu krɛdɛɛ ko mli nyo. Enɛ hewɔ lɛ, jeee mɛi krokomɛi ni afɔ amɛ mu lɛ pɛ amɛkɛbɔɔ. Agbɛnɛ hu, ehe ehiaaa ni amɛyatao Kristofoi krokomɛi ni afɔ amɛ mu ni amɛkɛ amɛ asusu amɛmufɔɔ lɛ he, loo amɛkɛ amɛ afee ekome kɛkase Biblia lɛ. (Gal. 1:15-17) Kɛ́ mɛi ni afɔ amɛ mu lɛ tse kui ni tamɔ nɛkɛ lɛ, belɛ, amɛhã asafo lɛ mli egbála. Ni no baatsɔɔ akɛ, amɛmiite shi amɛmiiwo mumɔ krɔŋkrɔŋ lɛ, ejaakɛ mumɔ krɔŋkrɔŋ lɛ yeɔ ebuaa Nyɔŋmɔ webii lɛ koni toiŋjɔlɛ kɛ ekomefeemɔ ahi amɛteŋ.​—Rom. 16:17, 18.

8. Mɛni hewɔ esa akɛ okwɛ jogbaŋŋ yɛ bɔ ni okɛ mɛi ni afɔ amɛ mu lɛ yeɔ hãa lɛ he lɛ? (Kwɛmɔ shishigbɛ niŋmaa lɛ hu.)

⁸ Te esa akɛ wɔkɛ nyɛmimɛi ni afɔ amɛ mu lɛ aye ahã tɛŋŋ? Kɛ́ mɔ ko fata Kristo nyɛmimɛi ni afɔ amɛ mu lɛ ahe jio, efataaa amɛhe jio lɛ, esaaa akɛ wɔkɛ woo srɔto ko hãa lɛ. (Mat. 23:8-12) Biblia lɛ woɔ wɔ hewalɛ ni wɔkase asafoŋ onukpai lɛ ahemɔkɛyeli, shi ewieee akɛ wɔwó adesa ko wɔhiɛnyiɛlɔ. (Heb. 13:7) Biblia lɛ kɛɔ hu akɛ, Kristofoi komɛi sa “woo toi enyɔ.” Shi kadimɔ akɛ, jeee mu ni afɔ amɛ lɛ hewɔ akɛɛ amɛsa woo lɛ. Moŋ lɛ, bɔ ni ‘amɛkwɛɔ wɔnɔ jogbaŋŋ,’ kɛ bɔ ni ‘amɛtsuɔ nii waa yɛ wiemɔ kɛ nitsɔɔmɔ mli’ lɛ hewɔ. (1 Tim. 5:17) Kɛ́ wɔjie mɛi ni afɔ amɛ mu lɛ ayi fe nine loo wɔnya amɛhe fe nine lɛ, ebaanyɛ egba amɛnaa waa, loo ehã amɛwó amɛhe nɔ po. * (Rom. 12:3) Wɔteŋ mɔ ko mɔ ko sumɔŋ ni efee nɔ ko ni baanyɛ atɔ̃tɔ Kristo nyɛmimɛi ni afɔ amɛ mu lɛ ateŋ mɔ ko nane, aloo jeee nakai?​—Luka 17:2.

9. Mɛni wɔbaanyɛ wɔfee kɛtsɔɔ akɛ wɔbuɔ mɛi ni Yehowa efɔ amɛ mu lɛ?

⁹ Mɛni wɔbaanyɛ wɔfee kɛtsɔɔ akɛ wɔbuɔ mɛi ni Yehowa efɔ amɛ mu lɛ? Esaaa akɛ wɔbiɔ amɛ bɔ ni fee ni afɔ amɛ mu. Enɛ jeee wɔhe sane; amɛ kɛ Yehowa teŋ sane ni. (1 Tes. 4:11; 2 Tes. 3:11) Agbɛnɛ hu, esaaa akɛ wɔnáa jwɛŋmɔ lɛ akɛ, mɛi ni afɔ amɛ mu lɛ ahefatalɔi, amɛfɔlɔi, loo amɛwekumɛi hu fata mɛi ni afɔ amɛ mu lɛ ahe. Jeee weku mli ni mɔ ko jɛ loo mɔ ni ekɛbaabote gbalashihilɛ mli ni baahã afɔ lɛ mu. Nyɔŋmɔ ni fɔɔ mɛi mu. (1 Tes. 2:12) Kɛfata he lɛ, esaaa akɛ wɔbiɔ saji ni baanyɛ awo mɛi awerɛho. Akɛ nɔkwɛmɔnɔ lɛ, esaaa akɛ wɔbiɔ mɔ ko ni afɔ lɛ mu lɛ ŋa loo ewu bɔ ni enuɔ he ehãa kɛji esusu bɔ ni shihilɛ baafee yɛ jeŋ hee lɛ mli be ni ehefatalɔ lɛ bɛ shikpɔŋ nɛɛ nɔ dɔŋŋ lɛ he. Wɔle akɛ, bɔ fɛɛ bɔ ni fee lɛ, yɛ jeŋ hee lɛ mli lɛ, Yehowa baahã ‘nɔ fɛɛ nɔ ni hiɛ kã lɛ atɔ kɛ nɔ ni etaoɔ.’​—Lala 145:16.

10. Kɛ́ ‘wɔnya mɛi ahe’ fe nine lɛ, mɛɛ oshãra ebaanyɛ ekɛba?

¹⁰ Kɛ́ wɔbuuu mɛi ni afɔ amɛ mu lɛ akɛ amɛhe hiaa fe mɛi krokomɛi lɛ, ebuɔ wɔhe. Yɛ mɛɛ gbɛ nɔ? Biblia lɛ hãa wɔleɔ akɛ, mɛi ni afɔ amɛ mu lɛ ateŋ mɛi komɛi baanyɛ akpa Yehowa jamɔ. (Mat. 25:10-12; 2 Pet. 2:20, 21) No hewɔ lɛ, kɛ́ ‘wɔnya mɛi ahe’ fe nine, mɛi ni afɔ amɛ mu jio, mɛi ni ale jogbaŋŋ yɛ asafo lɛ mli jio, mɛi ni kɛ afii pii esɔmɔ Yehowa jio lɛ, ebaanyɛ etsɔ wɔ tsɔne. Wɔsɛɛ, kɛ́ ekolɛ mɛi nɛɛ eyayeee Yehowa anɔkwa loo amɛshi asafo lɛ, wɔbaayanyiɛ amɛsɛɛ. Ni no baanyɛ ahã wɔhemɔkɛyeli lɛ agbɔjɔ, loo wɔkpa Yehowa sɔɔmɔ po.​—Yuda 16, shn.

11. Nyɛsɛɛ nɛɛ, mɛni oyɔse yɛ mɛi ni yeɔ Kaimɔ lɛ he okadi nibii lɛ ayifalɛ lɛ he?

¹¹ Be ko ni eho lɛ, daa afi lɛ, mɛi ni yeɔ Kaimɔ lɛ he okadi nibii lɛ ayifalɛ lɛ nɔ gbɔɔ. Shi nyɛsɛɛ nɛɛ, etamɔ nɔ ni daa afi lɛ, amɛyi miifa moŋ. Ani esa akɛ wɔye wɔtsui yɛ enɛ he? Dabi. Hã wɔkwɛ nɔ hewɔ.

12. Mɛni hewɔ esaaa akɛ wɔyeɔ wɔtsui yɛ mɛi abɔ ni yeɔ Kaimɔ lɛ he okadi nibii lɛ eko lɛ he?

¹² “Yehowa le mɛi ni ji enii.” (2 Tim. 2:19) Yehowa le mɛi ni efɔ amɛ mu lɛ fɛɛ. Shi mɛi ni kaneɔ mɛi ni yeɔ Kaimɔ lɛ he okadi nibii lɛ nyɛŋ atsɔɔ mɛi ni afɔ amɛ mu lɛɛlɛŋ kɛ mɛi ni afɔko amɛ mu. No hewɔ lɛ, mɛi komɛi ni afɔko amɛ mu, shi amɛ amɛsusuɔ akɛ afɔ amɛ mu lɛ, fata mɛi ni akaneɔ lɛ ahe. Mɛi komɛi yɛ ni amɛyeɔ blodo lɛ ni amɛnuɔ wain lɛ eko, kɛkɛ  lɛ, sɛɛ mli lɛ amɛkpa. Mɛi komɛi hu yɛ ni hela ko miigba amɛnaa loo amɛyɛ jwɛŋmɔŋ naagba, ni no hewɔ lɛ, efeɔ amɛ akɛ amɛkɛ Kristo baaye nɔ yɛ ŋwɛi. Nibii nɛɛ fɛɛ hãa wɔnaa akɛ, wɔnyɛŋ wɔtsɔɔ mɛi abɔ ni afɔ amɛ mu ni yɔɔ shikpɔŋ lɛ nɔ lolo.

13. Ani Biblia lɛ etsɔɔ mɛi abɔ ni afɔ amɛ mu ni baahi shikpɔŋ lɛ nɔ be ni amanehulu kpeteŋkpele lɛ baaje shishi?

¹³ Mɛi ni afɔ amɛ mu ni Yesu baaŋɔ kɛya ŋwɛi kɛ́ eba lɛ baajɛ shikpɔŋ lɛ nɔ hei srɔtoi babaoo. (Mat. 24:31) Biblia lɛ hãa wɔleɔ akɛ, mɛi ni afɔ amɛ mu lɛ ateŋ mɛi fioo baahi shikpɔŋ lɛ nɔ yɛ naagbee gbii lɛ amli. (Kpo. 12:17) Shi etsɔɔɔ amɛteŋ mɛi abɔ ni baashwɛ be ni amanehulu kpeteŋkpele lɛ baaje shishi.

14. Yɛ nɔ ni awie yɛ Romabii 9:11, 16 lɛ naa lɛ, mɛni esa akɛ wɔhã ehi wɔjwɛŋmɔŋ yɛ be ni Yehowa kɛhalaa mɛi 144,000 lɛ he?

¹⁴ Yehowa baanyɛ ahala mɛi kɛhã ŋwɛi hiɛnɔkamɔ lɛ be fɛɛ be ni esumɔɔ. (Rom. 8:28-30) Yehowa bɔi mɛi ni afɔ amɛ mu lɛ halamɔ yɛ Yesu shitee lɛ sɛɛ. Eeenyɛ efee akɛ, klɛŋklɛŋ afii 100 lɛ mli Kristofoi lɛ fɛɛ fata mɛi ni afɔ amɛ mu lɛ ahe. Kɛjɛ no sɛɛ aahu kɛbashi naagbee gbii lɛ je shishi lɛ, mɛi fioo ko pɛ ji mɛi ni Yehowa fɔ amɛ mu. Mɛni hewɔ? Ejaakɛ mɛi ni kɛɛ Kristofoi ji amɛ yɛ nakai beiaŋ lɛ ateŋ mɛi babaoo ehiii shi yɛ Kristo tsɔɔmɔi lɛ anaa. Wɔbaanyɛ wɔkɛ mɛi fioo ni afɔ amɛ mu yɛ nakai beiaŋ lɛ ato wiiti ni Yesu wie akɛ ekɛ jwɛi lɛ fɛɛ baada lɛ he. (Mat. 13:24-30) Yɛ naagbee gbii nɛɛ amli lɛ, Yehowa miiya nɔ eehala mɛi akɛ mɛi 144,000 lɛ mli bii. * No hewɔ lɛ, kɛ́ ekpɛ eyiŋ akɛ ebaahala mɛi komɛi be ni eshwɛ fioo ni naagbee lɛ baaba lɛ, mɛni hewɔ esa akɛ egba wɔnaa?  Ani wɔle nii fe Yehowa? (Kanemɔ Romabii 9:11, 16.) * Esa akɛ wɔkwɛ jogbaŋŋ ni wɔkafee wɔnii tamɔ nitsulɔi komɛi ni Yesu wie amɛhe yɛ nɔkwɛmɔnɔ ko ni egba lɛ mli lɛ. Amɛbɔi tɔkemɔ yɛ nyɔmɔwoo ni amɛnuŋtsɔ lɛ kɛhã nitsulɔi komɛi ni ba be ni eshwɛ fioo ni abaagbe nitsumɔ lɛ naa lɛ he.​—Mat. 20:8-15.

15. Ani mɛi ni afɔ amɛ mu lɛ fɛɛ ni feɔ “nyɔŋ anɔkwafo kɛ hiɛshikalɔ” ni atsĩ etã yɛ Mateo 24:45-47 lɛ? Tsɔɔmɔ mli.

¹⁵ Jeee mɛi fɛɛ ni yɔɔ hiɛnɔkamɔ akɛ amɛbaaya ŋwɛi lɛ ni feɔ “nyɔŋ anɔkwafo kɛ hiɛshikalɔ lɛ.” (Kanemɔ Mateo 24:45-47.) Tamɔ bɔ ni Yehowa kɛ Yesu fee yɛ blema Kristofoi lɛ abeiaŋ lɛ, ŋmɛnɛ lɛ, amɛmiitsɔ mɛi fioo ko pɛ nɔ amɛmiitsɔɔ mɛi pii nii. Blema Kristofoi lɛ ateŋ mɛi fioo ko pɛ Yehowa kɛtsu nii kɛŋma Kristofoi A-Greek Ŋmalɛ lɛ. Ŋmɛnɛ lɛ, Kristofoi ni afɔ amɛ mu lɛ ateŋ mɛi fioo ko pɛ ji mɛi ni ekɛ nitsumɔ ewo amɛdɛŋ akɛ, amɛhã ewebii lɛ ‘niyenii yɛ be ni sa mli.’

16. Mɛni okase?

¹⁶ No hewɔ lɛ, mɛni wɔkase? Wɔkase akɛ, Yehowa ekpɛ eyiŋ akɛ, ebaahã ewebii lɛ ateŋ mɛi komɛi ahi shi kɛya naanɔ yɛ shikpɔŋ lɛ nɔ, ni ebaahã mɛi komɛi hu ayafata Yesu he yɛ ŋwɛi ni amɛkɛ lɛ aye nɔ akɛ maŋtsɛmɛi. Yehowa baajwere etsuji fɛɛ, ekɔɔɔ he eko kɛji amɛfata mɛi ni feɔ “Yudanyo” lɛ ahe, loo amɛfata mɛi ni feɔ “hii nyɔŋma” lɛ ahe. Ehã amɛ fɛɛ mlai kome too lɛ nɔŋŋ, ni eesumɔ ni amɛye anɔkwa kɛyawula shi. Esa akɛ amɛ fɛɛ amɛba amɛhe shi, ni amɛfee ekome kɛsɔmɔ lɛ. Esa akɛ amɛ fɛɛ amɛfee bɔ fɛɛ bɔ ni amɛbaanyɛ ni amɛhã toiŋjɔlɛ ahi asafo lɛ mli be fɛɛ be. Naagbee lɛ miibɛŋkɛ, no hewɔ lɛ, nyɛhãa wɔ fɛɛ wɔyaa nɔ wɔsɔmɔa Yehowa, ni wɔya nɔ wɔnyiɛ Kristo sɛɛ akɛ “tooku kome.”​—Yoh. 10:16.