1. Mɛɛ sane ni Maŋtsɛ David bi wɔteŋ mɛi komɛi hu biɔ?

WƆ FƐƐ wɔná kulɛ, wɔyɛ miishɛɛ ni wɔbɛ naagba ko kwraa. Shi bei komɛi lɛ, wɔkɛ naagbai kpeɔ, ni no hãa wɔyeɔ wɔtsui. Anɔkwa, bei komɛi lɛ, Yehowa tsuji komɛi biɔ sane ni Maŋtsɛ David bi lɛ nɔŋŋ, akɛ: “Mɛɛ be nɔŋŋ maye mitsui kɛyashi? Mɛɛ be nɔŋŋ maye awerɛho yɛ mitsui mli daa gbi kɛyashi?”​—Lala 13:2.

2. Mɛni he wɔbaasusu yɛ nikasemɔ nɛɛ mli?

² Bɔ fɛɛ bɔ ni fee lɛ, wɔbaaye wɔtsui yɛ nɔ ko he kɛ̃. Shi nibii komɛi yɛ ni wɔbaanyɛ wɔfee koni wɔkaye wɔtsui fe nine. Yɛ nikasemɔ nɛɛ mli lɛ, wɔbaakwɛ nibii komɛi ni baanyɛ ahã wɔye wɔtsui. No sɛɛ lɛ, wɔbaasusu nibii ekpaa ni wɔbaanyɛ wɔfee koni wɔkaye wɔtsui fe nine kɛ́ wɔkɛ naagbai kpe lɛ ahe.

3. Mɛɛ naagbai wɔkɛkpeɔ? Ani wɔbaanyɛ wɔtsĩ naagbai nɛɛ fɛɛ anaa?

³ Nibii ni hãa wɔyeɔ wɔtsui lɛ ekomɛi yɛ ni wɔnyɛŋ wɔfee nɔ ko tsɔ yɛ he. Akɛ nɔkwɛmɔnɔ lɛ, nɔ ko bɛ ni wɔbaanyɛ wɔfee yɛ bɔ ni niyenii kɛ atade jara kɛ tsũ nyɔmɔwoo yaa hiɛ daa afi lɛ he. Agbɛnɛ hu, ekolɛ mɛi ni wɔkɛtsuɔ nii loo mɛi ni wɔkɛyaa skul lɛ baaka wɔ ni wɔmale, wɔju, loo wɔkɛ wɔhe awo jeŋba sha mli, ni nɔ ko tsɔ bɛ ni wɔbaafee ni baahã amɛtsake. Nakai nɔŋŋ wɔnyɛŋ wɔhã mɛi akpa awuiyeli yɛ wɔkutsei lɛ  amli. Wɔkɛ naagbai nɛɛ kpeɔ ejaakɛ wɔyɛ jeŋ fɔŋ mli, ni mɛi pii kɛ Biblia mli shishitoo mlai tsuuu nii. Agbɛnɛ hu, Satan, ni ji je nɛɛ nyɔŋmɔ lɛ le akɛ, kɛ́ mɛi ‘ye amɛtsui yɛ je nɛɛ mli nibii ahe lɛ,’ ebaanyɛ ehã amɛkpa Yehowa sɔɔmɔ. (Mat. 13:22; 1 Yoh. 5:19) No hewɔ lɛ, ebɛ naakpɛɛ akɛ je lɛ mli eyi tɔ kɛ naagbai ni hãa mɛi yeɔ amɛtsui.

4. Kɛ́ wɔsusu naagbai ni wɔbaanyɛ wɔkɛkpe lɛ ahe lɛ, mɛni baanyɛ aba?

⁴ Bei komɛi lɛ, wɔsusuɔ naagbai ni wɔbaanyɛ wɔkɛkpe lɛ ahe, ni no hãa wɔyeɔ wɔtsui waa. Akɛ nɔkwɛmɔnɔ lɛ, ekolɛ wɔsheɔ gbeyei akɛ be ko baashɛ ni wɔnáŋ shika ni fa bɔ ni sa wɔkɛkwɛ wɔhe, loo akɛ, hela baamɔ wɔ ni wɔnyɛŋ wɔya nitsumɔ loo wɔnitsumɔ baaje wɔdɛŋ po. Kɛfata he lɛ, bei komɛi lɛ, wɔyeɔ wɔtsui akɛ ekolɛ wɔyayeŋ anɔkwa kɛ́ wɔkɛ kaa kpe. Agbɛnɛ hu, etsɛŋ Satan baahã ewebii lɛ atutua Nyɔŋmɔ webii lɛ. No hewɔ lɛ, ekolɛ wɔbaaye wɔtsui yɛ bɔ ni wɔbaafee wɔnii wɔhã kɛ́ atutua wɔ lɛ he. Ani eji tɔmɔ akɛ wɔbaaye wɔtsui yɛ saji ni tamɔ nɛkɛ lɛ ahe?

5. Be ni Yesu wie akɛ ‘wɔkpa wɔtsui ni wɔyeɔ lɛ,’ no mli lɛ mɛni etsɔɔ lɛ?

⁵ Be ko lɛ, Yesu kɛɛ esɛɛnyiɛlɔi lɛ akɛ ‘amɛkpa amɛtsui ni amɛyeɔ lɛ.’ (Mat. 6:25) Ani Yesu miitsɔɔ akɛ kɛ́ wɔye wɔtsui yɛ nɔ ko he lɛ, belɛ wɔfee esha? Dabi kwraa. Anɔkwa, Yehowa tsuji anɔkwafoi komɛi ni hi shi yɛ blema lɛ ye amɛtsui yɛ nibii ahe, shi Yehowa mli fuuu amɛ. * (1 Maŋ. 19:4; Lala 6:3) No hewɔ lɛ, nɔ ni Yesu miitsɔɔ moŋ ji, esaaa akɛ wɔyeɔ wɔtsui yɛ je nɛŋ nibii ahe aahu akɛ, wɔnyɛɛɛ wɔsɔmɔ Nyɔŋmɔ jogbaŋŋ, ni enɛ woɔ mɔ hewalɛ waa. Amrɔ nɛɛ, nyɛhãa wɔkwɛa nibii komɛi ni baaye abua wɔ koni wɔkaye wɔtsui fe nine.​—Kwɛmɔ akrabatsa ni yitso ji, “ Nibii Ni Baaye Abua Bo.”

6. Yɛ nɔ ni aŋma yɛ Filipibii 4:6, 7 lɛ naa lɛ, mɛni baanyɛ aye abua wɔ ni wɔkaye wɔtsui fe nine?

⁶ (1) Sɔlemɔ daa. Kɛ́ wɔhao yɛ nɔ ko he waa lɛ, wɔbaanyɛ wɔsɔle wɔhã Yehowa, ni no baaye abua wɔ ni wɔkaye wɔtsui. (1 Pet. 5:7) Yehowa baabo wɔsɔlemɔ lɛ toi, ni ebaatsɔ emumɔ krɔŋkrɔŋ ni yɔɔ hewalɛ lɛ nɔ edro wɔ ‘Nyɔŋmɔ toiŋjɔlɛ ni fe adesai aniiashishinumɔi fɛɛ lɛ.’​—Kanemɔ Filipibii 4:6, 7; Gal. 5:22.

7. Kɛ́ wɔmiisɔle lɛ, mɛni esa akɛ wɔhã ehi wɔjwɛŋmɔ mli?

⁷ Kɛ́ oosɔle oohã Yehowa lɛ, gbaa lɛ otsuiŋ saji fɛɛ. Hã ele nɔ tuuntu ni gbaa onaa kɛ bɔ ni onuɔ he ohãa yɛ he. Kɛ́ nɔ ko yɛ ni obaanyɛ ofee yɛ he lɛ, bi lɛ ni eye ebua bo ni ona, ni ehã bo hewalɛ ni okɛtsu he nii. Shi kɛ́ nɔ ko bɛ ni obaanyɛ ni ofee yɛ he lɛ, kpa lɛ fai ni eye ebua bo koni okaye otsui fe nine yɛ he. Kɛ́ otsĩ nɔ tuuntu ni gbaa onaa lɛ tã otsɔɔ Yehowa yɛ sɔlemɔ mli lɛ, no lɛ, kɛ́ eehã hetoo lɛ, obaana faŋŋ. Kɛ́ Yehowa hãaa osɔlemɔ lɛ hetoo amrɔ nɔŋŋ po lɛ, esaaa akɛ okpaa sɔlemɔ. Yehowa miisumɔ ni ohã ele nɔ tuuntu ni gbaa onaa. Shi eesumɔ hu ni osɔle be fɛɛ be ni okakpa.​—Luka 11:8-10.

8. Kɛ́ wɔmiisɔle lɛ, mɛni esaaa akɛ wɔhiɛ kpaa nɔ?

⁸ Jeee nibii ni haoɔ wɔ lɛ pɛ esa akɛ wɔkɛɛ Yehowa yɛ sɔlemɔ mli; esa akɛ wɔkai ni wɔda lɛ shi hu. Kɛ́ wɔkɛ naagbai pii miikpe yɛ wɔshihilɛ mli po lɛ, esa akɛ wɔsusu nibii kpakpai pii ni Yehowa efee ehã wɔ lɛ ahe. Kɛ́ bɔ ni naagbai lɛ ehã wɔhao sɔŋŋ hewɔ lɛ, wɔnaaa nɔ ni wɔwieɔ yɛ sɔlemɔ lɛ mli po lɛ, esa akɛ wɔkai akɛ kɛ́ wɔwie nɔ ko tamɔ, ‘Yehowa ee, ye obua mi’ po kɛkɛ lɛ, ebaabo wɔ toi.​—2 Kro. 18:31; Rom. 8:26.

9. Kɛ́ wɔkɛ naagba ko kpe ni gbeyei mɔ wɔ lɛ, mɛni esa akɛ wɔfee?

 ⁹ (2) Okɛ ohiɛ afɔ̃ Yehowa nɔ, jeee bo diɛŋtsɛ ohe nɔ. Yɛ gbalɔ Yesaia beiaŋ lɛ, Asiriabii lɛ kpɛ amɛyiŋ akɛ amɛbaayatutua Yudabii lɛ. Enɛ hã Yudabii lɛ she gbeyei ni amɛyabi Ejiptbii lɛ ni amɛbaye amɛbua amɛ ni amɛkɛ Asiriabii lɛ awu. (Yes. 30:1, 2) Shi Yehowa bɔ amɛ kɔkɔ akɛ gbɛ ni amɛkɔ lɛ ejaaa ni amɛyagbeŋ naa ekpakpa. (Yes. 30:7, 12, 13) Etsɔ Yesaia nɔ ehã ewebii lɛ le nɔ ni kɛ́ amɛfee lɛ amɛbaahi shi shweshweeshwe. Ekɛɛ amɛ akɛ: “Kɛji nyɛhi shi kpoo ni nyɛkɛ nyɛhiɛ fɔ̃ minɔ lɛ, nyɛbaaná hewalɛ.”​—Yes. 30:15b.

10. Mɛɛ shihilɛi amli nɛkɛ wɔbaanyɛ wɔtsɔɔ akɛ wɔkɛ wɔhiɛ fɔ̃ɔ Yehowa nɔ?

¹⁰ Mɛɛ shihilɛi amli wɔbaanyɛ wɔtsɔɔ akɛ wɔkɛ wɔhiɛ fɔ̃ɔ Yehowa nɔ? Naa ekomɛi. Ŋɔɔ lɛ akɛ, oyaná nitsumɔ ko ni shika yɛ mli waa fe nɔ ni otsuɔ amrɔ nɛɛ, shi ebaahe obe pii ni ehãŋ onyɛ osɔmɔ Yehowa jogbaŋŋ tamɔ bɔ ni ofeɔ bianɛ lɛ. Aloo, ŋɔɔ lɛ akɛ, mɔ ko ni okɛtsuɔ nii ni abaptisiko lɛ lɛ kɛɛ bo akɛ esumɔɔ bo, ni eetao ni ekɛ bo abote gbalashihilɛ mli. Aloo, ŋɔɔ lɛ akɛ, owekunyo ko ni osumɔɔ esane waa lɛ kɛɛ bo akɛ, kɛ́ obaaya nɔ osɔmɔ Nyɔŋmɔ lɛ, belɛ ekɛ bo baafo takoŋ. Kɛ́ okɛ shihilɛi nɛɛ eko kpe lɛ, ebɛ mlɛo. Shi Yehowa etsɔɔ wɔ nɔ ni esa akɛ wɔfee yɛ shihilɛi nɛɛ amli. (Mat. 6:33; 10:37; 1 Kor. 7:39) No hewɔ lɛ, ani okɛ ohiɛ baafɔ̃ enɔ ni okɛ egbɛtsɔɔmɔi atsu nii?

11. Mɛɛ saji yɔɔ Biblia lɛ mli ni baaye abua wɔ ni wɔkashe gbeyei kɛ́ ate shi awo wɔ?

¹¹ (3) Kasemɔ nii kɛjɛ nɔkwɛmɔnii kpakpai kɛ nɔkwɛmɔnii gbohii ni yɔɔ Biblia lɛ mli lɛ amli. Saji pii yɛ Biblia lɛ mli ni hãa wɔnaa akɛ, kɛ́ wɔkɛ naagba ko kpe lɛ, esaaa akɛ wɔyeɔ wɔtsui, shi moŋ, esa akɛ wɔkɛ wɔhiɛ afɔ̃ Yehowa nɔ. Kasemɔ saji nɛɛ, ni be ni ofeɔ nakai lɛ, kwɛmɔ akɛ obaana nɔ ni ye ebua Nyɔŋmɔ tsuji ni amɛsheee gbeyei be ni ate shi awo amɛ waa lɛ. Akɛ nɔkwɛmɔnɔ lɛ, be ni Yudafoi asaneyelihe wulu lɛ mli bii lɛ fã bɔfoi lɛ akɛ amɛkpa shiɛmɔ lɛ, amɛhãaa no awo amɛhe gbeyei. Moŋ lɛ, amɛfee ekãa ni amɛkɛɛ amɛ akɛ: “Esa akɛ wɔbo Nyɔŋmɔ moŋ toi akɛ nɔyelɔ fe gbɔmɛi.” (Bɔf. 5:29) Sɛɛ mli be ni agwao amɛ po lɛ, no hãaa amɛshe gbeyei ni amɛkpa sane kpakpa lɛ shiɛmɔ. (Bɔf. 5:40-42) Mɛni hewɔ? Ejaakɛ amɛle akɛ Yehowa yɛ amɛsɛɛ, ni eyɛ nɔ ni amɛfeɔ lɛ he miishɛɛ. Nakai nɔŋŋ be ni ayaagbe Stefano lɛ, etsui efãaa. Biblia lɛ hãa wɔleɔ akɛ ehenyɛlɔi lɛ ‘na ehiɛ tamɔ ŋwɛibɔfo hiɛ.’ (Bɔf. 6:12-15) Stefano he eye akɛ nɔ ni efeɔ lɛ sa Yehowa hiɛ, ni no ji nɔ ni ye ebua lɛ yɛ nakai shihilɛ lɛ mli lɛ.

12. Yɛ nɔ ni aŋma yɛ 1 Petro 3:14 kɛ 4:14 lɛ naa lɛ, mɛni hewɔ wɔbaanyɛ wɔná miishɛɛ kɛ́ awa wɔ yi?

¹² Bɔfoi lɛ na nibii ni hã amɛna faŋŋ akɛ Yehowa kɛ amɛ yɛ. Akɛ nɔkwɛmɔnɔ lɛ, ehã amɛ hewalɛ ni amɛkɛfee naakpɛɛ nii. (Bɔf. 5:12-16; 6:8) Yehowa hãaa wɔ hewalɛ ni wɔkɛfee naakpɛɛ nii ŋmɛnɛ. Shi akɛni esumɔɔ wɔ hewɔ lɛ, etsɔɔ e-Wiemɔ lɛ nɔ ehãa wɔnaa faŋŋ akɛ kɛ́ wɔna nɔ yɛ jalɛ hewɔ lɛ, eyɛ wɔhe miishɛɛ ni emumɔ lɛ yɛ wɔnɔ. (Kanemɔ 1 Petro 3:14; 4:14.) No hewɔ lɛ, nɔ najiaŋ ni wɔbaajwɛŋ bɔ ni wɔbaafee wɔnii wɔhã kɛ́ awa wɔ yi waa wɔsɛɛ he lɛ, esa akɛ wɔkwɛ nɔ ni wɔbaanyɛ wɔfee bianɛ koni wɔná hemɔkɛyeli ni mli wa akɛ Yehowa baaye abua wɔ ni ebaahere wɔ. Yesu wo esɛɛnyiɛlɔi lɛ shi akɛ: “Mikɛ wiemɔi kɛ hiɛshikamɔ ni nyɛshiteekɛwolɔi lɛ fɛɛ nyɛŋ atsĩ naa loo aku naa baahã nyɛ.” Blema Kristofoi lɛ he shiwoo nɛɛ amɛye; ni esa akɛ wɔ hu wɔfee nakai nɔŋŋ. Wɔyɛ nɔmimaa akɛ, tamɔ bɔ ni Yesu wie lɛ, ‘kɛ́ wɔfi shi lɛ, wɔbaabaa wɔwala yi.’ (Luka 21:12-19)  Agbɛnɛ hu, esaaa akɛ wɔhiɛ kpaa nɔ kɔkɔɔkɔ akɛ, Yehowa kɛ etsuji ni yeɔ lɛ anɔkwa kɛyaa gbele mli lɛ ahe saji fɛɛ toɔ ejwɛŋmɔ mli. Enɛ ni ele lɛ hewɔ lɛ, ebaatee amɛ shi.

13. Mɛni hewɔ esa akɛ wɔsusu mɛi ni ye amɛhe oyai amɛfee nii ni amɛkɛ amɛhiɛ efɔ̃ɔɔ Yehowa nɔ lɛ ahe saji lɛ ahe?

¹³ Wɔbaanyɛ wɔkase nii kɛjɛ mɛi ni ye amɛhe oyai amɛfee nii ni amɛkɛ amɛhiɛ efɔ̃ɔɔ Yehowa nɔ lɛ ahe saji ni aŋmala lɛ amli koni wɔkatɔ̃ tɔmɔi ni amɛtɔ̃ lɛ. Akɛ nɔkwɛmɔnɔ lɛ, be ni Asa baye Yuda nɔ maŋtsɛ lɛ, asraafoi akuu babaoo ko batutua lɛ. Shi ekɛ ehiɛ fɔ̃ Yehowa nɔ, ni Yehowa ye ebua lɛ ni enyɛ eye amɛnɔ kunim. (2 Kro. 14:9-12) Shi sɛɛ mli be ni Israel Maŋtsɛ Baasha kɛ asraafoi akuu bibioo ko batutua lɛ lɛ, ekɛ ehiɛ efɔ̃ɔɔ Yehowa nɔ tamɔ efee be ko ni eho lɛ. Moŋ lɛ, ehã Siriabii lɛ shika koni amɛye amɛbua lɛ. (2 Kro. 16:1-3) Agbɛnɛ hu, be ni eshwɛ fioo ni ebaagbo lɛ, hela ko ni naa wa waa mɔ lɛ. Shi no hu ekɛ ehiɛ efɔ̃ɔɔ Yehowa nɔ ni eye ebua lɛ.​—2 Kro. 16:12.

14. Mɛni wɔkaseɔ yɛ Asa sane lɛ mli?

¹⁴ Be ni Asa kɛ naagbai kpe yɛ enɔyeli lɛ shishijee lɛ, ekɛ ehiɛ fɔ̃ Yehowa nɔ. Shi sɛɛ mli be ni ekɛ naagbai kpe ekoŋŋ lɛ, ekɛ ehiɛ efɔ̃ɔɔ Nyɔŋmɔ nɔ dɔŋŋ. Moŋ lɛ, enu he akɛ lɛ diɛŋtsɛ ebaanyɛ etsu saji ahe nii. Yɛ adesai asusumɔ naa lɛ, etamɔ nɔ ni nilee yɛ mli akɛ Asa bi Siriabii lɛ ni amɛbaye amɛbua lɛ be ni Israelbii lɛ batutua lɛ, ejaakɛ no hã ekɛ ewebii lɛ ahe jɔ amɛ fioo. Shi nakai hejɔlɛ lɛ sɛɛ etsɛɛɛ. Yehowa tsɔ gbalɔ ko nɔ ekɛɛ lɛ akɛ: “Akɛni okɛ ohiɛ fɔ̃ Siria maŋtsɛ lɛ nɔ, ni okɛ ohiɛ efɔ̃ɔɔ Yehowa, o-Nyɔŋmɔ lɛ nɔ hewɔ lɛ, Siria maŋtsɛ lɛ asraafoi lɛ eje odɛŋ.” (2 Kro. 16:7) Kɛ́ wɔkɛ naagbai kpe lɛ, esa akɛ wɔkɛ wɔhiɛ afɔ̃ Yehowa nɔ ni wɔhã e-Wiemɔ lɛ atsɔɔ wɔ gbɛ. Ekaba kɔkɔɔkɔ akɛ wɔkɛ wɔhe baafɔ̃ wɔhe nɔ ni wɔkɛ wɔ diɛŋtsɛ wɔhiɛshikamɔ atsu saji ahe nii. Kɛ́ naagbai ni wɔkɛkpeɔ lɛ biɔ ni wɔtsu saji ahe nii oya po lɛ, esa akɛ wɔto wɔtsui shi ni wɔkɛ wɔhiɛ afɔ̃ Yehowa nɔ, ni ebaaye ebua wɔ.

15. Kɛ́ wɔmiikane Biblia lɛ, mɛni wɔbaanyɛ wɔfee?

¹⁵ (4) Kpe ŋmalɛi owo oyitsoŋ. Kɛ́ ookane Biblia lɛ ni ona ŋmalɛi ni hãa wɔnaa akɛ, kɛ́ wɔkɛ naagbai kpe lɛ esaaa akɛ wɔyeɔ wɔtsui, moŋ lɛ, esa akɛ wɔkɛ wɔhiɛ afɔ̃ Yehowa nɔ lɛ, bɔɔ mɔdɛŋ ni okase ŋmalɛi nɛɛ owo oyitsoŋ. Obaanyɛ okane lɛ waa ni eje kpo, loo oŋmala oshwie shi ni okane yɛ be kɛ beiaŋ. Yehowa fã Yoshua ni ekane Mla wolo lɛ daa ni ejwɛŋ nɔ, koni efee enii yɛ hiɛshikamɔ mli. Nibii ni ebaakane yɛ Mla lɛ mli lɛ baaye ebua lɛ ni ekashe gbeyei, shi moŋ, ená ekãa kɛnyiɛ Nyɔŋmɔ webii lɛ ahiɛ. (Yos. 1:8, 9) Saji pii yɛ Nyɔŋmɔ Wiemɔ lɛ mli ni baanyɛ aye abua wɔ ni wɔkahao kɛ́ wɔkɛ naagbai ni baanyɛ ahã wɔye wɔtsui loo wɔshe gbeyei lɛ kpe.​—Lala 27:1-3; Abɛi 3:25, 26.

16. Mɛɛ gbɛ nɔ Yehowa tsɔɔ wɔnyɛmimɛi lɛ anɔ eyeɔ ebuaa wɔ koni wɔkaye wɔtsui, shi moŋ, wɔkɛ wɔhiɛ afɔ̃ enɔ?

¹⁶ (5) Okɛ Nyɔŋmɔ webii lɛ abɔ. Yehowa tsɔɔ wɔnyɛmimɛi lɛ anɔ eyeɔ ebuaa wɔ koni wɔkaye wɔtsui, shi moŋ, wɔkɛ wɔhiɛ afɔ̃ enɔ. Kɛ́ wɔtee asafoŋ kpeei lɛ, wiemɔi ni ahãa, hetoo ni wɔnyɛmimɛi Kristofoi lɛ hãa, kɛ bɔ ni wɔkɛ amɛ gbaa sane lɛ yeɔ ebuaa wɔ waa. (Heb. 10:24, 25) Agbɛnɛ hu, kɛ́ wɔgba wɔnanemɛi ni bɛŋkɛ wɔ kpaakpa yɛ asafo lɛ mli lɛ nibii ni gbaa wɔnaa lɛ, amɛbaanyɛ amɛwo wɔ hewalɛ waa. Ekolɛ “wiemɔ kpakpa” ko ni wɔnaanyo ko baawie lɛ baaye abua wɔ ni wɔkpa wɔtsui yeli yɛ naagba ko he.​—Abɛi 12:25.

17. Yɛ nɔ ni aŋma yɛ Hebribii 6:19 lɛ naa lɛ, mɛɛ gbɛ nɔ wɔhiɛnɔkamɔ lɛ baanyɛ aye abua wɔ ni wɔkaye wɔtsui kɛ́ wɔkɛ naagbai ni mli wala kpe?

¹⁷ (6) Feemɔ nibii ni baahã ohiɛnɔkamɔ  lɛ mli awa. Hiɛnɔkamɔ ni wɔyɔɔ akɛ Maŋtsɛyeli lɛ baaba lɛ ‘tamɔ sɛ́kɛ kɛhã susuma lɛ,’ ni ehãaa wɔye wɔtsui kɛ́ wɔkɛ naagbai ni mli wala kpe. (Kanemɔ Hebribii 6:19.) No hewɔ lɛ, jwɛŋmɔ nibii kpakpai ni Yehowa ewo shi akɛ wɔnine baashɛ nɔ wɔsɛɛ lɛ ahe. Nakai beiaŋ lɛ, mɔ ko mɔ ko yeŋ etsui yɛ nɔ ko he. (Yes. 65:17) Feemɔ ohe mfoniri ni oyɛ jeŋ hee lɛ mli, ni naagbai fɛɛ asɛɛ efo. (Mika 4:4) Agbɛnɛ hu, kɛ́ ogba mɛi ohiɛnɔkamɔ lɛ he sane lɛ, ebaahã ohiɛnɔkamɔ lɛ mli awa. No hewɔ lɛ, bɔɔ mɔdɛŋ ni otsu shiɛmɔ kɛ kaselɔfeemɔ nitsumɔ lɛ kɛ onyɛmɔ fɛɛ. Kɛ́ ofee nakai lɛ, ‘obaaná nɔmimaa kwraa yɛ hiɛnɔkamɔ lɛ he kɛyashi naagbee.’​—Heb. 6:11.

18. Mɛɛ naagbai wɔkɛbaakpe wɔsɛɛ? Ni mɛni baaye abua wɔ koni wɔnyɛ wɔfi shi yɛ naagbai nɛɛ fɛɛ amli?

¹⁸ Jeŋ fɔŋ nɛɛ naagbee lɛ ebɛŋkɛ. No hewɔ lɛ, wɔkɛ naagbai pii ni baanyɛ ahã wɔye wɔtsui lɛ baakpe. Shi afi 2021 afi ŋmalɛ lɛ baaye abua wɔ koni kɛ́ wɔkɛ naagbai nɛɛ kpe lɛ, wɔkɛ wɔhe akafɔ̃ wɔ diɛŋtsɛ wɔhe nɔ ni wɔye wɔtsui, shi moŋ, wɔkɛ wɔhiɛ afɔ̃ Yehowa nɔ. Nyɛhãa wɔtswaa wɔfai shi akɛ, yɛ afi 2021 lɛ mli fɛɛ lɛ, wɔbaatsɔ wɔnifeemɔi anɔ wɔhã ana akɛ, wɔheɔ Yehowa shiwoo ni nyiɛ sɛɛ nɛɛ wɔyeɔ. No ji: “Kɛji nyɛhi shi kpoo ni nyɛkɛ nyɛhiɛ fɔ̃ minɔ lɛ, nyɛbaaná hewalɛ.”​—Yes. 30:15.