Harvey mami kɛ epapa fɔ bihii ejwɛ, ni lɛ ji amɛkromɔ. Amɛba anɔkwale lɛ mli nɔ ni fe afii 80 ni eho nɛ. No mli lɛ, amɛyɛ Midland Junction yɛ Australia anaigbɛ. Nakai beiaŋ lɛ, nibii amli ewa waa yɛ Australia. Harvey kase Yehowa he nii ni ebasumɔ lɛ, ni abaptisi lɛ be ni eye afii 14. Nɔ kome ni ebakase ji akɛ, kɛ́ Yehowa asafo lɛ kɛɛ bo akɛ otsu nɔ ko lɛ, kaakɛɛ dabi kɔkɔɔkɔ. Be ni eji oblanyo fioo lɛ, be ko lɛ akɛɛ lɛ ni ekane Buu-Mɔɔ lɛ mli yɛ asafoŋ kpee shishi. Shi enu he akɛ enyɛŋ ekane lɛ jogbaŋŋ, no hewɔ lɛ, ekɛɛ dabi. Shi nyɛmi lɛ ni kɛ nitsumɔ lɛ woɔ edɛŋ lɛ kɛɛ lɛ akɛ, “Kɛ́ Yehowa asafo lɛ kɛɛ mɔ ko akɛ etsu nɔ ko lɛ, ele akɛ ebaanyɛ etsu hewɔ ekɛɔ lɛ akɛ etsu lɛ!”​—2 Kor. 3:5.

Be ni mi kɛ mimami kɛ minyɛmi yoo onukpa lɛ ba anɔkwale lɛ mli lɛ, wɔyɛ England. No mli lɛ, mipapa sumɔɔɔ anɔkwale lɛ kwraa. Shi sɛɛ mli lɛ, lɛ hu ebatsɔ nyɛmi. Be ni mikɛɛ mabaptisi lɛ, enyaaa he kwraa. Shi abaptisi mi kɛ̃. No mli lɛ, miye afii nɛɛhu. Mikɛma mihiɛ akɛ masɔmɔ akɛ daa gbɛgbalɔ, ni wɔsɛɛ lɛ, matsɔ maŋsɛɛ sɔɔlɔ. Shi mipapa kɛɛ ja miye afii 21 dani ebaaŋmɛ mi gbɛ ni  masɔmɔ akɛ daa gbɛgbalɔ. Shi minyɛɛɛ mamɛ kɛyashi nakai beiaŋ. No hewɔ lɛ, be ni miye afii 16 lɛ, mibi lɛ kɛji manyɛ mayahi minyɛmi yoo onukpa lɛ ŋɔɔ yɛ Australia, ni eŋmɛ mi gbɛ ni mitee. Yehowa dromɔ naa lɛ, be ni miye afii 18 lɛ, minyɛ mibatsɔ daa gbɛgbalɔ.

Australia mikɛ Harvey yakpe yɛ. No mli lɛ, lɛ hu eeshwe akɛ esɔmɔ akɛ maŋsɛɛ sɔɔlɔ. No hewɔ lɛ, yɛ afi 1951 lɛ, wɔbote gbalashihilɛ mli. Wɔfee ekome kɛtsu gbɛgbamɔ nitsumɔ lɛ afii enyɔ, kɛkɛ ni ahã wɔbɔi sɔɔmɔ akɛ kpokpaa nɔkwɛlɔ kɛ eŋa. Wɔkpokpaa lɛ da waa, ni eyɛ Australia anaigbɛ. No hewɔ lɛ, bei pii lɛ, wɔfãa gbɛ kakadaŋŋ kɛtsɔɔ ŋa kpataa nɔ kɛ hei ni mɛi bɛ tsɔ.

Yɛ afi 1954 lɛ, afɔ̃ wɔ nine ni wɔba Gilead klas 25 nɔ lɛ. Wɔna akɛ etsɛŋ, nɔ ni wɔshwe aahu lɛ baaba mli, ni wɔbaatsɔmɔ maŋsɛɛ sɔɔlɔi. Wɔkɛ meele ni fã gbɛ kɛtee New York kɛhã skul lɛ. Yɛ skul lɛ, wɔkase Biblia lɛ waa diɛŋtsɛ, ni wɔkase Spanish hu. Harvey náaa enɛ feemɔ mlɛo kwraa, ejaakɛ mɛi ni wieɔ Spanish lɛ yɛ bɔ ni amɛtsɛɔ “r,” ni lɛ lɛ enyɛɛɛ etsɛ lɛ nakai.

Yɛ skul lɛ mli lɛ, abi ni mɛi ni baasumɔ ni amɛyasɔmɔ yɛ Japan lɛ abaŋma amɛgbɛ́i koni atsɔɔ amɛbɔ ni awieɔ Japanese. Wɔshwe ni Yehowa asafo lɛ diɛŋtsɛ atsɔɔ wɔ he ni wɔyasɔmɔ yɛ, no hewɔ lɛ, wɔyaŋmaaa wɔgbɛ́i. No sɛɛ etsɛɛɛ lɛ, Albert Schroeder ni ji wɔ-Gilead tsɔɔlɔi lɛ ateŋ mɔ kome lɛ ná ele akɛ wɔyaŋmaaa wɔgbɛ́i. No hewɔ lɛ ekɛɛ wɔ akɛ: “Nyɛsusua he jogbaŋŋ.” Shi loloolo lɛ wɔyaŋmaaa wɔgbɛ́i. No hewɔ lɛ, Nyɛminuu Schroeder kɛ tsɔɔlɔi krokomɛi lɛ hã aŋma wɔgbɛ́i. No sɛɛ lɛ, ehã wɔle, ni ekɛɛ wɔ akɛ: “Nyɛkwɛa kɛji nyɛbaana Japanese lɛ kasemɔ naa lo.” Etɔɔɔ Harvey kwraa kɛ Japanese kasemɔ.

Wɔyashɛ Japan yɛ afi 1955. No mli lɛ shiɛlɔi 500 pɛ ni yɔɔ jɛmɛ. No mli lɛ Harvey eye afii 26, ni miye afii 24. Ahã wɔyasɔmɔ yɛ Kobe he ni lɛjiadaamɔhe ko yɔɔ lɛ, ni wɔsɔmɔ yɛ jɛmɛ afii ejwɛ. No sɛɛ lɛ, ahã wɔbɔi sɔɔmɔ ekoŋŋ akɛ kpokpaa nɔkwɛlɔ kɛ eŋa, ni wɔsɔmɔ yɛ he ko ni bɛŋkɛ Nagoya maŋ lɛ. Nyɛmimɛi ni yɔɔ jɛmɛ lɛ, niyenii ni ayeɔ yɛ jɛmɛ lɛ, kɛ jɛmɛ shikamɔ hã wɔná miishɛɛ waa be ni wɔsɔmɔɔ yɛ jɛmɛ lɛ. Shi eyeee be ko ni Yehowa asafo lɛ hã wɔ nitsumɔ kroko. Ani wɔbaakɛɛ dabi?

Wɔsɔmɔ yɛ gbɛfãa nitsumɔ lɛ mli afii etɛ. Kɛkɛ ni Japan nitsumɔhe nine lɛ bi wɔ kɛji wɔbaasumɔ ni wɔyasɔmɔ yɛ Taiwan, ni wɔye wɔbua Amisbii lɛ.  No mli lɛ nyɛmimɛi ni wieɔ Amis lɛ ateŋ mɛi komɛi etsɔmɔ jamɔkwalɔi, ni ehe bahia ni aná nyɛmi ko ni wieɔ Japanese jogbaŋŋ koni etsu shihilɛ lɛ he nii. * Nitsumɔ ni wɔtsuɔ yɛ Japan lɛ etse wɔnaa. No hewɔ lɛ be ni ninefɔɔ nɛɛ ba lɛ, ewa hã wɔ akɛ wɔbaashi. Shi wɔmɔ mli ejaakɛ wɔkɛfee wɔsu akɛ, kɛ́ Yehowa kɛɛ wɔ akɛ wɔtsu nɔ ko lɛ, wɔkɛŋ dabi kɔkɔɔkɔ.

Wɔyashɛ Taiwan November afi 1962. Nakai beiaŋ lɛ, shiɛlɔi 2,271 pɛ yɔɔ Taiwan, ni amɛteŋ mɛi pii ji Amisbii. Nɔ klɛŋklɛŋ ni wɔfee ji, wɔkase Chinese. No mli lɛ Chinese wolo kome pɛ wɔyɔɔ, ni mɔ ni tsɔɔ wɔ lɛ hu nuuu Blɔfo. Shi wɔnyɛ wɔkase kɛ̃.

Be ni wɔyashɛ Taiwan lɛ, eyeee be ko ni ahã Harvey bɔi sɔɔmɔ akɛ mɔ ni kwɛɔ nitsumɔhe nine lɛ nɔ. Akɛni nitsumɔhe nine lɛ edaaa hewɔ lɛ, Harvey nyɛ etsu nitsumɔ fɛɛ ni esa akɛ etsu yɛ jɛmɛ lɛ, ni yɛ nakai beiaŋ nɔŋŋ lɛ, ekɛ nyɛmimɛi ni wieɔ Amis lɛ sɔmɔ otsii etɛ yɛ nyɔɔŋ lɛ mli. Yɛ nakai beiaŋ nɔŋŋ lɛ, enyɛ esɔmɔ akɛ kpokpaa wulu nɔkwɛlɔ, ni ehã wiemɔi yɛ kpokpaa nɔ kpeei ashishi. Kulɛ Harvey baanyɛ ahã wiemɔi lɛ yɛ Japanese mli ni nyɛmimɛi ni wieɔ Amis lɛ baanu shishi. Shi maŋ lɛ nɔyeli lɛ ekpɛlɛɛɛ ni akɛ wiemɔ kroko tsuɔ nii yɛ jamɔ nifeemɔi ashishi akɛ ja Chinese pɛ. No hewɔ lɛ, ehã wiemɔ lɛ yɛ Chinese mli, eyɛ mli akɛ enuuu lɛ jogbaŋŋ, ni atsɔɔ shishi kɛtee Amis mli.

Akɛni no mli lɛ asraafoi ni kwɛɔ Taiwan nɔ hewɔ lɛ, kɛ́ nyɛmimɛi lɛ yaafee kpee lɛ, ja amɛyabi gbɛ ni ahã amɛ gbɛŋmɛɛ wolo dã, ni no hu po diɛŋtsɛ lɛ, kɛ́ aba bimɔ lɛ jeee sane bibioo. Polisifoi lɛ baashɔɔ amɛnajiaŋshi aahu dani amɛkɛbaahã. No hewɔ lɛ Harvey tsɔ̃ ŋaa ko. Kɛ́ eshwɛ otsi ni abaafee kpee lɛ shi ahãko amɛ gbɛŋmɛɛ wolo lɛ, eyataa amɛnɔ yɛ polis steshɛŋ lɛ. Ŋaa ni eto lɛ ye omanye, ejaakɛ kɛ́ polisifoi lɛ na ni mɔ ko ni jɛ maŋsɛɛ ta amɛnɔ yɛ polis steshɛŋ lɛ, efeɔ amɛ ahuntoo kɛkɛ lɛ amɛhã lɛ gbɛŋmɛɛ wolo lɛ.

Be ni wɔyɔɔ Taiwan lɛ, bei pii lɛ kɛ́ wɔmiiya shiɛmɔ lɛ, wɔnyiɛɔ ŋmɛlɛtswaa kome kɛ sɛɛ, ni wɔkwɔlɔɔ gɔji ni wɔfoɔ fai. Mikaiɔ klɛŋklɛŋ be ni mikwɔ gɔŋ lɛ. Nakai gbi lɛ be ni atswaa leebi ŋmɛji enumɔ kɛ fã lɛ, wɔye nii momo ni wɔta bɔs mli kɛmiiya akrowa ko ni jɛkɛ waa lɛ. Be ni wɔyashɛ lɛ, wɔfo faa wulu ko, kɛkɛ ni wɔbɔi gɔŋ lɛ kwɔɔ. Gɔŋ lɛ ma shi tamɔ gbogbo, ni be ni wɔkwɔɔ lɛ, kɛ́ miwó mihiɛ nɔ lɛ, minaa nyɛmi lɛ ni nyiɛ mihiɛ lɛ naneshishi.

Nakai leebi lɛ, Harvey kɛ nyɛmimɛi hii lɛ ekomɛi ni tsu nii yɛ shiɛmɔ nitsumɔ lɛ mli, ni mikome too miyashiɛ yɛ akrowa bibioo ko ni awieɔ Japanese yɛ jɛmɛ. Be ni atswa shwane ŋmɛlɛ kome lɛ nɔ ko miihe afee mi, ejaakɛ kɛjɛ leebi ni miye nii lɛ miyeko nɔ ko dɔŋŋ. Be ni mikɛ Harvey kpe ekoŋŋ lɛ, ekome enyiɛ. No mli lɛ ehã magazin, ni nɔ najiaŋ ni abaahã lɛ shika lɛ, ahã lɛ wuɔwɔji etɛ ni ahoko. Nakai gbi lɛ, etsɔɔ mi bɔ ni ayeɔ wuɔwɔlɔ ni ahoko. Ekɔ wuɔwɔlɔ lɛ ekome, ni egbu fɔlɔ bibioo yɛ ebiɛ kɛ ebiɛ, kɛkɛ ni eshɔ emli nii lɛ fɛɛ. No sɛɛ lɛ, ehã mi ekome ni mimia mihiɛ miye. Shi namɔ baaye ekome lɛ ni eshwɛ lɛ? Harvey kɛɛ kɛ́ hɔmɔ ye mi ni nɔ nyɔ minɔ lɛ, enyɛŋ ewó mi kɛkpeleke gɔŋ lɛ, no hewɔ lɛ ekɛhã mi ni miye.

Naa sane ko ni ba be ko ni wɔtee he ko kɛhã kpokpaa nɔ kpee. Wɔyahi nyɛmi ko shĩa yɛ Maŋtsɛyeli Asa lɛ masɛi nɔŋŋ. Amisbii lɛ kɛ hejuu shwɛɛɛ kwraa. No hewɔ lɛ, kpokpaa nɔkwɛlɔ lɛ ŋa lɛ fee nu ehã wɔ koni wɔju wɔhe. No mli lɛ Harvey hiɛ edɔ, no hewɔ lɛ ekɛɛ mi miyaju klɛŋklɛŋ. No hewɔ lɛ mibatee. Shi be ni miyana he ni akɛ nibii lɛ emamɔ ehã wɔ ni wɔju wɔ he lɛ, minaa kpɛ mihe. Eekwɛ Maŋtsɛyeli Asa lɛ tɛ̃ɛ. Ni no mli lɛ nyɛmimɛi hii komɛi yɛ jɛmɛ ni amɛmiito nibii kɛhã kpee lɛ. Miyabi kpokpaa nɔkwɛlɔ lɛ ŋa lɛ ni ehã mi nɔ ko ni mikɛtsĩ he ni miyaju mihe yɛ lɛ, ni ehã mi rɔba ko. Shi rɔba lɛ diɛŋtsɛ lɛ kɛ́ mɔ ko damɔ sɛɛ lɛ, eena nɔ fɛɛ nɔ. Miyakwɛ tsũ lɛ sɛɛ akɛ aleenɔ manyɛ mayaju yɛ jɛmɛ lo. Shi be ni mitee lɛ mina dɔkɔdɔkɔi agboiagboi komɛi yɛ jɛmɛ ni mishe gbeyei akɛ kɛ́ mitee lɛ amɛbaatsɔtse mi. Miku misɛɛ miyadamɔ he ni kpokpaa nɔkwɛlɔ lɛ ŋa lɛ kɛ nula, nuhɔnɔ, kɛ okpolu lɛ ema ehã wɔ koni wɔju wɔhe yɛ lɛ. Ni miwie yɛ miyitsoŋ akɛ: ‘Nyɛmimɛi lɛ ahiɛ edɔ waa, amɛnaŋ po akɛ ooju ohe. Ni kɛ́ ojuuu ohe hu lɛ ebaagba nyɛmimɛi lɛ anaa. No hewɔ lɛ, kwɛmɔ, ju ohe oya ni obaho.’ Ni nakai pɛpɛɛpɛ mifee.

Harvey yɔse akɛ nyɛmimɛi ni wieɔ Amis lɛ ateŋ mɛi pii nyɛɛɛ amɛya amɛhiɛ yɛ Yehowa sɔɔmɔ lɛ mli, ejaakɛ amɛleee nikanemɔ, ni abɛ woji yɛ amɛwiemɔ lɛ mli. Shi no mli lɛ, kpaako abɔi Amis wiemɔ lɛ ŋmaa. No hewɔ lɛ, ato gbɛjianɔ koni atsɔɔ nyɛmimɛi lɛ amɛ diɛŋtsɛ amɛwiemɔ lɛ kanemɔ kɛ eŋmaa. Enɛ jeee nitsumɔ bibioo. Shi no ye ebua nyɛmimɛi lɛ, ni fiofio lɛ amɛnyɛ amɛkase Yehowa he nii yɛ amɛ diɛŋtsɛ amɛwiemɔ mli. Yɛ aaafee afi 1966 lɛ, asafo lɛ bɔi woji feemɔ yɛ Amis mli. Ni yɛ afi 1968 lɛ, abɔi Buu-Mɔɔ lɛ kalamɔ yɛ Amis mli.

Shi nɔyeli lɛ ekpɛlɛɛɛ ni ahãa mɛi woji yɛ wiemɔ kroko mli akɛ ja Chinese pɛ. No hewɔ lɛ, bɔ ni afee ni wɔkaná naagba lɛ, atsɔ ŋaa gbɛi srɔtoi anɔ akala Amis Buu-Mɔɔ lɛ. Akɛ nɔkwɛmɔnɔ lɛ, be ko bashɛ ni akalaa Amis Buu-Mɔɔ lɛ mli saji lɛ yɛ Amis kɛ Mandarin Chinese mli yɛ magazin kome too lɛ nɔŋŋ mli, koni aya aba lɛ, wɔmiitsɔɔ Amisbii lɛ Chinese. Kɛjɛ nakai be lɛ kɛbaa nɛɛ lɛ, Yehowa asafo lɛ efee woji srɔtoi yɛ Amis mli, koni akɛye abua Amisbii lɛ ni amɛbale Yehowa.​—Bɔf. 10:34, 35.

Afii pii ni nyɛmimɛi ni wieɔ Amis lɛ ateŋ mɛi babaoo ehiii shi yɛ Nyɔŋmɔ shishitoo mlai lɛ anaa. Akɛni amɛteŋ mɛi pii nuuu Biblia mli shishitoo mlai lɛ ashishi jogbaŋŋ hewɔ lɛ, amɛbɔ ajwamaŋ, amɛtɔ dãa, amɛshɛre tawa, ni amɛkɛ amɛhe wo nifeemɔi krokomɛi ni he tseee amli. Harvey yasara asafoi babaoo koni eye ebua nyɛmimɛi lɛ ni amɛná Yehowa susumɔ yɛ saji nɛɛ ahe. Saramɔ nɛɛ eko mli wɔná niiashikpamɔ ni miwie he yɛ sane nɛɛ shishijee lɛ.

Nyɛmimɛi lɛ ekomɛi ba amɛhe shi, ni amɛfee tsakemɔi ni he hiaa lɛ. Shi dɔlɛ sane ji akɛ amɛteŋ mɛi pii hu efeee nakai. No hewɔ lɛ yɛ afii 20 pɛ mli lɛ, shiɛlɔi ayifalɛ ni yɔɔ Taiwan lɛ nɔ gbɔ kɛjɛ 2,450 kɛba 900 pɛ. Enɛ hao wɔ waa, shi wɔhã ehi wɔjwɛŋmɔ mli akɛ, ja asafo lɛ he etse dani Yehowa baajɔɔ nɔ ni eshwere. (2 Kor. 7:1) Yehowa dromɔ naa lɛ, anyɛ atsuu asafo lɛ he, ni ŋmɛnɛ lɛ ayɛ shiɛlɔi fe 11,000 yɛ Taiwan.

Kɛjɛ afi 1980 kɛbaa lɛ, nyɛmimɛi ni yɔɔ Amis asafoi lɛ amli lɛ ahe bawa yɛ hemɔkɛyeli lɛ mli. No hewɔ lɛ, Harvey nyɛ ekɛ ebe pii ye ebua mɛi ni wieɔ Chinese lɛ agbɛnɛ. Enyɛ eye ebua nyɛmimɛi yei pii ahefatalɔi ni jeee Odasefoi lɛ ni amɛba anɔkwale lɛ mli ni enɛ hã ená miishɛɛ waa. Mikaiɔ akɛ be ko lɛ, ekɛɛ mi akɛ ená miishɛɛ waa klɛŋklɛŋ be ni hii nɛɛ ateŋ mɔ kome sɔle ehã Yehowa lɛ. Mi hu minyɛ miye mibua mɛi pii ni yɔɔ tsui kpakpa lɛ ni amɛbatsɔmɔ Yehowa nanemɛi ni enɛ hãa mináa miishɛɛ waa. Miná hegbɛ mikɛ mɛi ni mikɛkase nii lɛ ateŋ mɔ kome binuu kɛ ebiyoo fɛɛ tsu nii yɛ Taiwan Betel, ni enɛ hã miná miishɛɛ waa diɛŋtsɛ.

Yɛ January 1, 2010 lɛ, misuɔlɔ Harvey je mli. Wɔkɛ nɔ ni miihe ashɛ 59 ehi shi akɛ wu kɛ ŋa, shi kansa ebaŋɔ mihefatalɔ lɛ kɛtee. Mihiɛ tseɔ lɛ waa diɛŋtsɛ. Shi eŋɔɔ minaa waa akɛ mikɛ lɛ fee ekome kɛsɔmɔ yɛ Japan kɛ Taiwan be ni asafo lɛ je shishi yɛ jɛmɛ etsɛko lɛ. Wiemɔi ni awieɔ yɛ maji enyɔ nɛɛ anɔ lɛ akasemɔ bɛ mlɛo. Shi wɔmia wɔhiɛ wɔkase. Ni yɛ Harvey gbɛfaŋ po lɛ, ekase amɛŋmaa hu.

Harvey gbele lɛ sɛɛ afii fioo lɛ, Gbɛtsɔɔmɔ Kuu lɛ kpɛ mli akɛ, akɛni migbɔ hewɔ lɛ, ebaahi akɛ maku misɛɛ maya Australia. No mli lɛ eŋɔɔɔ minaa, ejaakɛ ‘misumɔɔɔ ni mishiɔ Taiwan.’ Shi mikai nɔ ni Harvey tsɔɔ mi lɛ akɛ, kɛ́ Yehowa asafo lɛ kɛɛ wɔfee nɔ ko lɛ wɔkakɛɛ dabi kɔkɔɔkɔ. No hewɔ lɛ mikpɛlɛ nɔ. Sɛɛ mli lɛ, mina akɛ nilee yɛ mli akɛ amɛkpɛ yiŋ nakai.

Amrɔ nɛɛ miitsu nii yɛ Australasia nitsumɔhe nine lɛ, ni yɛ otsi lɛ naagbee lɛ, mikɛ misafo lɛ yaa shiɛmɔ kɛ asafo kpee. Kɛ́ mɛi ni wieɔ Japanese loo Chinese ba Betel lɛ, minyɛɔ mikɛ amɛ yasharaa shi akɛni minuɔ amɛwiemɔ lɛ hewɔ, ni enɛ hãa mináa miishɛɛ. Kɛ̃lɛ, miikpa gbohiiashitee lɛ gbɛ waa. Mile akɛ Yehowa kɛ Harvey eto shweshweeshwe yɛ ejwɛŋmɔ mli, ejaakɛ Yehowa ekɛɛɛ lɛ akɛ efee nɔ ko ni ebaakɛɛ dabi kɔkɔɔkɔ.​—Yoh. 5:28, 29.