1-2. (a) Mɛɛ be wɔkaiɔ wɔsuɔlɔi ni egboi lɛ waa? (b) Gbi gbɛkɛ ni enɔ jetsɛremɔ lɛ Yesu baagbo lɛ, mɛni ekɛɛ wɔfee?

 MƐI komɛi ni wɔsumɔɔ amɛsane waa lɛ gboi etsɛ waa, shi wɔkaiɔ amɛ lolo. Be ni wɔkaiɔ amɛ waa ji, gbi nɔ ni amɛgboi lɛ.

² Daa afi lɛ, wɔ kɛ mɛi akpekpei abɔ yɛ jeŋ fɛɛ feɔ ekome kɛkaiɔ mɔ ko ni wɔsumɔɔ esane waa lɛ gbele lɛ. Lɛ ji Yesu Kristo. (1 Pet. 1:8) Wɔkaiɔ bɔ ni ekɛ ewala hã koni ekɛkpɔ̃ wɔ kɛje esha kɛ gbele mli lɛ. (Mat. 20:28) Yesu diɛŋtsɛ po kɛɛ esɛɛnyiɛlɔi lɛ akɛ amɛkai egbele lɛ. Gbi gbɛkɛ ni enɔ jetsɛremɔ lɛ ebaagbo lɛ, eto gbɛkɛ niyeli krɛdɛɛ ko he gbɛjianɔ, ni efã ekaselɔi lɛ akɛ: “Nyɛyaa nɔ nyɛfea enɛ kɛkaia mi.”​—Luka 22:19.

3. Mɛni he wɔbaasusu yɛ nikasemɔ nɛɛ mli?

³ Mɛi ni baa Kristo gbele lɛ Kaimɔ lɛ ateŋ mɛi fioo pɛ yɔɔ hiɛnɔkamɔ akɛ amɛbaaya ŋwɛi. Shi mɛi akpekpei abɔ ni baa lɛ yɛ hiɛnɔkamɔ akɛ amɛbaahi shikpɔŋ lɛ nɔ. Yɛ nikasemɔ nɛɛ mli lɛ, wɔbaakwɛ nɔ hewɔ ni mɛi ni yɔɔ hiɛnɔkamɔ akɛ amɛbaaya ŋwɛi, kɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ fɛɛ sumɔɔ waa ni amɛya Kaimɔ lɛ daa afi lɛ. Agbɛnɛ hu, wɔbaakwɛ bɔ ni wɔnáa Kaimɔ lɛ shishi ni wɔyaa  lɛ he sɛɛ wɔhãa. Nyɛhãa wɔjea shishi kɛ nɔ hewɔ ni mɛi ni afɔ amɛ mu lɛ yaa Kaimɔ lɛ.

4. Mɛni hewɔ mɛi ni afɔ amɛ mu lɛ yeɔ blodo lɛ ni amɛnuɔ wain lɛ eko yɛ Kaimɔ lɛ shishi lɛ?

⁴ Daa afi lɛ, kɛ́ mɛi ni afɔ amɛ mu lɛ tee Kaimɔ lɛ, amɛyeɔ blodo lɛ ni amɛnuɔ wain lɛ eko. Mɛni hewɔ amɛyɔɔ hegbɛ akɛ amɛfeɔ nakai? Nyɛhãa wɔsusua nɔ ni tee nɔ gbi gbɛkɛ ni enɔ jetsɛremɔ lɛ abaagbe Yesu lɛ he koni no aye abua wɔ ni wɔhã sanebimɔ nɛɛ hetoo. Be ni Yesu kɛ ebɔfoi lɛ ye Hehoo lɛ amɛgbe naa lɛ, eto nɔ ni abale lɛ akɛ Nuŋtsɔ Lɛ Gbɛkɛ Niyeli lɛ shishi. Ekɛ blodo kɛ wain hã ebɔfoi anɔkwafoi 11 lɛ, ni ekɛɛ amɛ akɛ amɛye ni amɛnu. Yesu kɛ amɛwie kpaŋmɔi enyɔ komɛi ahe. Ekome ji, kpaŋmɔ hee lɛ, ni ekroko lɛ ji, Maŋtsɛyeli kpaŋmɔ lɛ. * (Luka 22:19, 20, 28-30) Kpaŋmɔi nɛɛ gbele gbɛ koni bɔfoi lɛ kɛ mɛi fioo komɛi ayaye maŋtsɛmɛi kɛ osɔfoi yɛ ŋwɛi. (Kpo. 5:10; 14:1) Mɛi ni afɔ amɛ mu lɛ, ni ji mɛi ni yɔɔ kpaŋmɔi enyɔ nɛɛ amli lɛ, ateŋ mɛi ni eshwɛ yɛ shikpɔŋ lɛ nɔ lɛ pɛ ni yɔɔ hegbɛ akɛ amɛyeɔ blodo lɛ ni amɛnuɔ wain lɛ eko yɛ Kaimɔ lɛ shishi.

5. Mɛni mɛi ni afɔ amɛ mu lɛ le yɛ amɛhiɛnɔkamɔ lɛ he?

⁵ Naa yiŋtoo kroko hewɔ ni mɛi ni afɔ amɛ mu lɛ sumɔɔ waa ni amɛya Kaimɔ lɛ. Kɛ́ amɛtee lɛ, amɛnáa hegbɛ amɛsusuɔ amɛhiɛnɔkamɔ lɛ he. Hiɛnɔkamɔ ni Yehowa ehã amɛ lɛ nɔ bɛ! Abaahã amɛ gbɔmɔtso ni nyɛŋ afite ni nyɛŋ agbo hu, ni amɛbaaya ŋwɛi. Agbɛnɛ hu, amɛkɛ Yesu Kristo kɛ mɛi 144,000 lɛ mli bii krokomɛi lɛ baaye nɔ. Ni nɔ ni fe fɛɛ lɛ, amɛbaana Yehowa! (1 Kor. 15:51-53; 1 Yoh. 3:2) Mɛi ni afɔ amɛ mu lɛ le akɛ, kɛ́ amɛtee ŋwɛi lɛ amɛbaaná hegbɛi nɛɛ fɛɛ. Shi ja amɛye anɔkwa kɛtee gbele mli dani amɛbaaná hegbɛ amɛya ŋwɛi. (2 Tim. 4:7, 8) Mɛi ni afɔ amɛ mu lɛ náa miishɛɛ waa kɛ́ amɛjwɛŋ amɛhiɛnɔkamɔ lɛ he. (Tito 2:13) Ni “gwantɛŋi krokomɛi” lɛ hu? (Yoh. 10:16) Mɛni hewɔ amɛyaa Kaimɔ lɛ shishi?

6. Mɛni hewɔ gwantɛŋi krokomɛi lɛ yaa Kaimɔ lɛ shishi?

⁶ Kɛ́ gwaŋtɛŋi krokomɛi lɛ tee Kaimɔ lɛ shishi lɛ, amɛyeee blodo lɛ ni amɛnuuu wain lɛ eko, shi amɛyɛ he miishɛɛ akɛ amɛyɛ jɛmɛ koni amɛye nɔ ni baaya nɔ lɛ he odase. Yɛ afi 1938 lɛ, aje gbɛ ahã mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ le akɛ, amɛbaanyɛ amɛya Kaimɔ lɛ shishi. Enɛ ji klɛŋklɛŋ be ni afee nakai. March 1, 1938 Blɔfo Buu-Mɔɔ lɛ wie akɛ: “Eja, ni tɔmɔ ko kwraa bɛ he hu akɛ gwaŋtɛŋi krokomɛi lɛ baaya nifeemɔ nɛɛ shishi koni amɛyaye nɔ ni baaya nɔ lɛ he odase. . . . Enɛ ji miishɛɛ be kɛhã amɛ hu.” Bɔ ni kɛ́ afɔ̃ mɛi nine kɛtee yookpeemɔ ko shishi lɛ amɛnáa miishɛɛ akɛ amɛbaaye nɔ ni baaya nɔ lɛ he odase lɛ, nakai nɔŋŋ gwaŋtɛŋi krokomɛi lɛ yɛ he miishɛɛ akɛ amɛbaaya Kaimɔ lɛ shishi koni amɛyaye nɔ ni baaya nɔ lɛ he odase.

7. Mɛni hewɔ gwantɛŋi krokomɛi lɛ boɔ wiemɔ ni ahãa yɛ Kaimɔ lɛ shishi lɛ toi jogbaŋŋ lɛ?

⁷ Gwantɛŋi krokomɛi lɛ hu susuɔ amɛhiɛnɔkamɔ lɛ he. Amɛboɔ Kaimɔ lɛ wiemɔ lɛ toi jogbaŋŋ, ejaakɛ emli saji lɛ pii kɔɔ nɔ ni Kristo kɛ mɛi 144,000 ni baafata ehe kɛye nɔ lɛ baafee ahã adesai anɔkwafoi yɛ Afii Akpe Nɔyeli lɛ mli lɛ he. Yɛ Afii Akpe Nɔyeli lɛ mli lɛ,  Yesu Kristo kɛ mɛi ni kɛ lɛ baaye nɔ lɛ baakwɛ ni asaa shikpɔŋ lɛ nɔ fɛfɛo koni etsɔ paradeiso, ni amɛbaaye amɛbua adesai koni amɛye emuu. Mɛi akpekpei abɔ ni yɔɔ hiɛnɔkamɔ akɛ amɛbaahi shikpɔŋ lɛ nɔ ni baa Kaimɔ lɛ shishi lɛ feɔ jɔɔmɔi ni Biblia lɛ egba akɛ amɛbaaná wɔsɛɛ lɛ ahe mfoniri. Ekomɛi ji nɔ ni yɔɔ Yesaia 35:5, 6; 65:21-23; kɛ Kpojiemɔ 21:3, 4 lɛ, ni enɛ hãa amɛnáa miishɛɛ waa. Kɛ́ amɛfee amɛhe mfoniri ni amɛkɛ amɛwekumɛi kɛ amɛnanemɛi yɛ jeŋ hee lɛ mli lɛ, ehãa hiɛnɔkamɔ ni amɛyɔɔ kɛ amɛfai shi ni amɛtswa akɛ amɛbaaya nɔ amɛsɔmɔ Yehowa daa lɛ mli waa.​—Mat. 24:13; Gal. 6:9.

8. Mɛni ji yiŋtoo kroko hewɔ ni gwantɛŋi krokomɛi lɛ yaa Kaimɔ lɛ shishi?

⁸ Naa yiŋtoo kroko hewɔ ni gwaŋtɛŋi krokomɛi lɛ yaa Kaimɔ lɛ shishi. Amɛmiisumɔ ni amɛtsɔɔ mɛi ni afɔ amɛ mu lɛ akɛ amɛsumɔɔ amɛ ni amɛbaaye amɛbua amɛ. Nyɔŋmɔ Wiemɔ lɛ gba akɛ, mɛi ni afɔ amɛ mu lɛ kɛ mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ baafee ekome kɛtsu nii. Nyɛhãa wɔsusua gbalɛi ni tsɔɔ nakai lɛ ekomɛi ahe wɔkwɛa.

9. Mɛɛ gbɛ nɔ gbalɛ ni yɔɔ Zakaria 8:23 lɛ hãa wɔnaa wekukpaa ni yɔɔ gwantɛŋi krokomɛi lɛ kɛ mɛi ni afɔ amɛ mu lɛ teŋ?

⁹ Kanemɔ Zakaria 8:23. Gbalɛ nɛɛ taa mɔ tsuiŋ waa, ni ehãa wɔnaa wekukpaa ni yɔɔ gwantɛŋi krokomɛi lɛ kɛ amɛnyɛmimɛi ni afɔ amɛ mu lɛ teŋ. Wiemɔi ni ji, “Yudanyo” kɛ “nyɛ” ni akɛtsu nii lɛ fɛɛ kɔɔ mɛi ni afɔ amɛ mu lɛ ateŋ mɛi ni eshwɛ yɛ shikpɔŋ lɛ nɔ lɛ ahe. (Rom. 2:28, 29) “Hii nyɔŋma ni jɛ jeŋmaji lɛ anɔ wiemɔi lɛ fɛɛ amli” lɛ damɔ shi kɛhã gwantɛŋi krokomɛi lɛ. Gbalɛ lɛ kɛɛ ‘amɛbaamɔ Yudanyo kome lɛ atade kakadaŋŋ lɛ mli kpɛŋŋ,’ ni tsɔɔ akɛ, amɛ kɛ mɛi ni afɔ amɛ mu lɛ baafee ekome kɛjá Yehowa. No hewɔ lɛ, gwantɛŋi krokomɛi lɛ yaa Kaimɔ lɛ shishi kɛtsɔɔ akɛ amɛsumɔɔ mɛi ni afɔ amɛ mu lɛ waa.

10. Mɛɛ gbɛ nɔ Yehowa ehã gbalɛ ni yɔɔ Ezekiel 37:15-19, 24, 25 lɛ eba mli?

¹⁰ Kanemɔ Ezekiel 37:15-19, 24, 25. Yehowa ehã gbalɛ nɛɛ eba mli. Ehã mɛi ni afɔ amɛ mu lɛ kɛ gwantɛŋi krokomɛi lɛ efee ekome waa diɛŋtsɛ. Gbalɛ lɛ wie tsei enyɔ komɛi ahe. Mɛi ni yɔɔ hiɛnɔkamɔ akɛ amɛbaaya ŋwɛi lɛ tamɔ tso ni aŋma “Yuda” yɛ nɔ lɛ (Yuda ji akutso ni ahalaa maŋtsɛ yɛ mli yɛ Israel), ni mɛi ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ tamɔ “Efraim tso” lɛ. * Yehowa baafee kui enyɔ nɛɛ ekome koni amɛtsɔ “tso kome.” Ni tsɔɔ akɛ, amɛbaafee ekome kɛsɔmɔ yɛ Maŋtsɛ kome, ni ji Kristo Yesu lɛ shishi. Daa afi lɛ, mɛi ni afɔ amɛ mu lɛ kɛ gwantɛŋi krokomɛi lɛ yaa Kaimɔ lɛ shishi. Shi amɛyaaa akɛ kui srɔtoi enyɔ, moŋ lɛ, amɛyaa akɛ “tooku kome yɛ tookwɛlɔ kome shishi.”​—Yoh. 10:16.

11. Mɛni ji nɔ titri ni “gwaŋtɛŋi” ni awie amɛhe yɛ Mateo 25:31-36, 40 lɛ feɔ kɛyeɔ amɛbuaa Kristo nyɛmimɛi lɛ?

¹¹ Kanemɔ Mateo 25:31-36, 40. “Gwantɛŋi” ni Yesu wie amɛhe yɛ nɔkwɛmɔnɔ nɛɛ mli lɛ damɔ shi kɛhã mɛi ni feɔ nɔ ni ja yɛ naagbee gbii lɛ amli ni yɔɔ hiɛnɔkamɔ akɛ amɛbaahi shikpɔŋ lɛ nɔ lɛ. Amɛ nɔŋŋ ji gwantɛŋi krokomɛi lɛ, ni amɛyeɔ amɛbuaa Kristo nyɛmimɛi ni afɔ amɛ mu lɛ ateŋ mɛi ni eshwɛ yɛ shikpɔŋ lɛ nɔ lɛ. Gbɛ titri ni amɛtsɔɔ nɔ amɛfeɔ nakai ji, amɛyeɔ amɛbuaa amɛ koni amɛnyɛ amɛtsu nitsumɔ kpele ko ni akɛwo amɛdɛŋ lɛ, ni ji, ni amɛshiɛ ni amɛfee mɛi kaselɔi yɛ jeŋ fɛɛ lɛ.​—Mat. 24:14; 28:19, 20.

12-13. Mɛni ji nibii krokomɛi ni gwantɛŋi krokomɛi lɛ feɔ kɛyeɔ amɛbuaa Kristo nyɛmimɛi lɛ?

 ¹² Daa afi lɛ, kɛ́ eshwɛ otsii fioo ni abaaye Kaimɔ lɛ, gwantɛŋi krokomɛi lɛ feɔ nɔ ko kɛyeɔ amɛbuaa Kristo nyɛmimɛi lɛ. Amɛkɛ ekãa fɔ̃ɔ mɛi nine yɛ jeŋ fɛɛ koni amɛba Kaimɔ lɛ shishi. (Kwɛmɔ akrabatsa ni ji, “ Ani Oosaa Ohe Ooto Kaimɔ Lɛ?”) Agbɛnɛ hu, amɛyeɔ amɛbuaa kɛtoɔ nibii ahe gbɛjianɔ koni anyɛ aye Kaimɔ lɛ yɛ asafo fɛɛ asafo mli yɛ jeŋ fɛɛ eyɛ mli akɛ yɛ asafoi pii amli lɛ, abɛ mɛi ni afɔ amɛ mu yɛ jɛmɛ. Eŋɔɔ gwaŋtɛŋi krokomɛi lɛ anaa waa akɛ amɛmiiye amɛmiibua Kristo nyɛmimɛi lɛ yɛ gbɛi nɛɛ anɔ. Amɛle akɛ, Yesu naa nɔ ni amɛfeɔ kɛyeɔ amɛbuaa enyɛmimɛi ni afɔ amɛ mu lɛ akɛ lɛ amɛfeɔ amɛhãa lɛ.​—Mat. 25:37-40.

¹³ Mɛɛ yiŋtoi krokomɛi ahewɔ wɔ fɛɛ wɔyaa Kaimɔ lɛ shishi ekɔɔɔ he eko hiɛnɔkamɔ ni wɔyɔɔ lɛ?

14. Mɛni Yehowa kɛ Yesu efee kɛtsɔɔ akɛ amɛsumɔɔ wɔ waa?

¹⁴ Wɔhiɛ sɔɔ nɔ ni Yehowa kɛ Yesu efee kɛtsɔɔ akɛ amɛsumɔɔ wɔ lɛ. Yehowa efee nibii pii kɛtsɔɔ akɛ esumɔɔ wɔ. Shi ekome ko yɛ ni fe ekrokomɛi lɛ fɛɛ. No ji tsu ni etsu e-Bi koome lɛ koni ebapiŋ ni egbo ehã wɔ lɛ. (Yoh. 3:16) Yesu hu tsɔɔ akɛ esumɔɔ wɔ waa, ejaakɛ ejɛ esuɔmɔ mli ekɛ ewala fɔ̃ shi ehã wɔ. (Yoh. 15:13) Nɔ ko nɔ ko bɛ ni wɔbaanyɛ wɔfee kɛto Yehowa kɛ Yesu najiaŋ yɛ nɔ ni amɛfee amɛhã wɔ lɛ hewɔ. Shi wɔbaanyɛ wɔtsɔ bɔ ni wɔhiɔ shi wɔhãa lɛ nɔ wɔtsɔɔ akɛ, wɔhiɛ sɔɔ nɔ ni amɛfee amɛhã wɔ lɛ. (Kol. 3:15) Agbɛnɛ hu, kɛ́ wɔtee Kaimɔ lɛ, wɔkaiɔ suɔmɔ ni amɛjie kpo amɛtsɔɔ wɔ lɛ ni wɔnáa hegbɛ wɔtsɔɔ amɛ akɛ wɔsumɔɔ amɛ.

15. Mɛni hewɔ mɛi ni afɔ amɛ mu lɛ kɛ gwantɛŋi krokomɛi lɛ fɛɛ hiɛ sɔɔ kpɔmɔnɔ lɛ waa lɛ?

¹⁵ Wɔhiɛ sɔɔ kpɔmɔnɔ lɛ waa. (Mat. 20:28) Mɛi ni afɔ amɛ mu lɛ ahiɛ sɔɔ kpɔmɔnɔ lɛ waa, ejaakɛ no ji nɔ ni ehã amɛná hiɛnɔkamɔ akɛ amɛbaaya ŋwɛi lɛ. Akɛni amɛheɔ amɛyeɔ akɛ Kristo bagbo ehã amɛ hewɔ lɛ, Yehowa ebu amɛ jalɔi ni eŋɔ amɛ akɛ ebii. (Rom. 5:1; 8:15-17, 23) Gwantɛŋi krokomɛi lɛ hu hiɛ sɔɔ kpɔmɔnɔ lɛ. Akɛni amɛheɔ amɛyeɔ akɛ Kristo bagbo ehã amɛ hewɔ lɛ, wekukpaa kpakpa yɛ amɛ kɛ Nyɔŋmɔ teŋ, amɛnyɛɔ amɛkɛ sɔɔmɔ krɔŋŋ hãa lɛ, ni amɛyɛ hiɛnɔkamɔ akɛ ‘amɛbaaje amanehulu kpeteŋkpele lɛ mli.’ (Kpo. 7:13-15) Nɔ kome ni mɛi ni afɔ amɛ mu lɛ kɛ gwantɛŋi krokomɛi lɛ feɔ kɛtsɔɔ akɛ amɛhiɛ sɔɔ kpɔmɔnɔ lɛ ji, amɛyaa Kaimɔ lɛ shishi daa afi.

16. Mɛni ji nɔ kroko hewɔ ni wɔyaa Kaimɔ lɛ shishi?

¹⁶ Nɔ kroko hewɔ ni wɔyaa Kaimɔ lɛ shishi ji akɛ, wɔmiisumɔ ni wɔbo Yesu toi. Kɛ́ wɔhiɛnɔkamɔ ji akɛ wɔbaaya ŋwɛi jio, wɔbaahi shikpɔŋ lɛ nɔ jio lɛ, wɔmiisumɔ ni wɔye famɔ ni Yesu kɛhã gbi gbɛkɛ ni eto Kaimɔ lɛ shishi lɛ nɔ. Efã esɛɛnyiɛlɔi lɛ akɛ: “Nyɛyaa nɔ nyɛfea enɛ kɛkaia mi.”​—1 Kor. 11:23, 24.

17. Mɛɛ gbɛ nɔ Kaimɔ lɛ hãa wɔtsiɔ wɔbɛŋkɛɔ Yehowa?

¹⁷ Ehãa wɔtsiɔ wɔbɛŋkɛɔ Yehowa. (Yak. 4:8) Tamɔ bɔ ni wɔkase momo lɛ, Kaimɔ lɛ hãa wɔnáa hegbɛ wɔjwɛŋɔ hiɛnɔkamɔ ni Yehowa ehã wɔ lɛ he, ni wɔjwɛŋɔ suɔmɔ kpele ni ejie kpo etsɔɔ wɔ lɛ nɔ. (Yer. 29:11; 1 Yoh. 4:8-10) Kɛ́ wɔjwɛŋ hiɛnɔkamɔ ni wɔyɔɔ lɛ kɛ Yehowa suɔmɔ ni sɛɛ efooo lɛ he lɛ, no baahã wɔsumɔ Yehowa waa ni wɔ kɛ lɛ teŋ naanyobɔɔ lɛ mli awa.​—Rom. 8:38, 39.

18. Kɛ́ wɔjwɛŋ Yesu nɔkwɛmɔnɔ lɛ he jogbaŋŋ lɛ, mɛni etsirɛɔ wɔ ni wɔfee?

 ¹⁸ Etsirɛɔ wɔ ni wɔkase Yesu. (1 Pet. 2:21) Kɛ́ eshwɛ gbii fioo ni abaaye Kaimɔ lɛ, wɔkaneɔ Biblia mli saji ni kɔɔ naagbee otsi ni Yesu ye yɛ shikpɔŋ lɛ nɔ, egbele lɛ, kɛ eshitee lɛ he ni wɔsusuɔ he. Gbɛkɛ kɛ́ wɔtee Kaimɔ lɛ, wiemɔ ni ahãa lɛ kaiɔ wɔ suɔmɔ ni Yesu yɔɔ kɛhã wɔ lɛ. (Efe. 5:2; 1 Yoh. 3:16) Kɛ́ wɔkane bɔ ni Yesu kɛ ehe shã afɔle lɛ ni wɔjwɛŋ nɔ lɛ, no baatsirɛ wɔ ni wɔya nɔ wɔnyiɛ “tamɔ bɔ ni mɔ nɛɛ nyiɛ lɛ nɔŋŋ.”​—1 Yoh. 2:6.

19. Te wɔbaafee tɛŋŋ wɔya nɔ wɔhi Nyɔŋmɔ suɔmɔ lɛ mli?

¹⁹ Ehãa wɔfai shi ni wɔtswa akɛ wɔhãŋ nɔ ko nɔ ko afite wɔ kɛ Nyɔŋmɔ teŋ naanyobɔɔ lɛ mli waa. (Yuda 20, 21) Kɛ́ wɔbo Yehowa toi yɛ nɔ fɛɛ nɔ mli, wɔtse egbɛ́i lɛ he, ni wɔfee nibii ni baahã etsui anya lɛ, wɔbaaya nɔ wɔhi esuɔmɔ lɛ mli. (Abɛi 27:11; Mat. 6:9; 1 Yoh. 5:3) Kɛ́ wɔtee Kaimɔ lɛ shishi lɛ, no baahã wɔfai shi ni wɔtswa akɛ daa gbi lɛ wɔbaahi shi bɔ ni baahã Yehowa ana akɛ wɔmiisumɔ ni wɔhi esuɔmɔ lɛ mli kɛya naanɔ lɛ mli awa.

20. Mɛɛ yiŋtoi kpakpai ahewɔ esa akɛ wɔya Kaimɔ lɛ?

²⁰ Kɛ́ wɔhiɛnɔkamɔ ji wɔbaaya ŋwɛi jio, wɔbaahi shikpɔŋ lɛ nɔ jio, wɔyɛ yiŋtoi kpakpai ahewɔ ni esa akɛ wɔya Kaimɔ lɛ. Daa afi kɛ́ wɔbua wɔhe naa yɛ nakai gbi lɛ nɔ lɛ, wɔkaiɔ mɔ ko ni wɔsumɔɔ waa, ni ji Yesu Kristo lɛ gbele lɛ. Nɔ ni fe fɛɛ lɛ, wɔkaiɔ suɔmɔ kpele ni Yehowa jie kpo etsɔɔ wɔ be ni ekɛ e-Bi lɛ hã wɔ akɛ kpɔmɔnɔ lɛ. Afi nɛɛ, wɔbaaye Kaimɔ lɛ Sohaa, April 15, 2022 be ni hulu enyɔ shi. Wɔsumɔɔ Yehowa kɛ e-Bi lɛ, no hewɔ lɛ, kɛ́ eshɛ gbi ni akɛkaiɔ Yesu gbele lɛ, wɔbaabɔ mɔdɛŋ ni wɔya, ni wɔhãŋ nɔ ko nɔ ko atsĩ wɔnaa.