1. Mɛni hewɔ ŋmɛnɛ lɛ, mɛi pii nuɔ he akɛ amɛnyɛŋ amɛhe nibii ni yɔɔ Biblia lɛ mli lɛ amɛye lɛ?

 ŊMƐNƐ lɛ, mɛi pii heee mɔ ko mɔ ko amɛyeee. Amɛheee maŋ onukpai, jeŋ shikpalɔi, kɛ jarayelɔi amɛyeee, ejaakɛ amɛnuɔ he akɛ amɛmiitao amɛye amɛhe nii kɛkɛ. Kɛfata he lɛ, amɛbuuu osɔfoi po. Enɛ hewɔ lɛ, ebɛ naakpɛɛ akɛ amɛnuɔ he akɛ amɛnyɛŋ amɛkɛ amɛhiɛ afɔ̃ Biblia lɛ, ni ji wolo ni osɔfoi lɛ kɛɛ amɛkɛtsuɔ nii lɛ nɔ.

2. Yɛ nɔ ni aŋma yɛ Lala 119:160 lɛ naa lɛ, mɛni esa akɛ wɔhe wɔye?

² Shi wɔ akɛ Yehowa tsuji lɛ, wɔheɔ wɔyeɔ akɛ lɛ ji “anɔkwale Nyɔŋmɔ” lɛ ni wɔsane kã etsui nɔ. (Lala 31:5; Yes. 48:17) Wɔle akɛ, wɔbaanyɛ wɔkɛ wɔhiɛ afɔ̃ saji fɛɛ ni wɔkaneɔ yɛ Biblia lɛ mli lɛ anɔ, ejaakɛ wɔheɔ wɔyeɔ akɛ, Nyɔŋmɔ Wiemɔ lɛ fɛɛ lɛ, “anɔkwale sɔŋŋ ni.” (Kanemɔ Lala 119:160.) Wɔkɛ nɔ ni Biblia he nilelɔ ko wie lɛ kpãa gbee. Ewie akɛ: “Nɔ fɛɛ nɔ ni Nyɔŋmɔ wieɔ lɛ, anɔkwale ni, ni ebaaba mli. Nyɔŋmɔ tsuji baanyɛ amɛhe nɔ fɛɛ nɔ ni ewie lɛ amɛye, ejaakɛ amɛheɔ lɛ mɔ ni wie lɛ amɛyeɔ.”

3. Mɛni he wɔbaasusu yɛ nikasemɔ nɛɛ mli?

³ Te wɔbaafee tɛŋŋ wɔye wɔbua mɛi ni amɛnyɛ amɛmu amɛfɔ̃ Biblia lɛ nɔ waa tamɔ bɔ ni wɔfeɔ lɛ? Yɛ nikasemɔ nɛɛ mli lɛ, wɔbaakwɛ yiŋtoi etɛ ahewɔ ni wɔbaanyɛ wɔmu wɔfɔ̃ Biblia lɛ nɔ. Nomɛi ji, nibii ni yɔɔ mli lɛ tsakeko, gbalɛi ni yɔɔ mli lɛ baa mli, ni emli saji lɛ nyɛɔ ehãa mɛi tsakeɔ.

4. Mɛni hewɔ mɛi komɛi nuɔ he akɛ Biblia lɛ mli saji lɛ etsake lɛ?

⁴ Yehowa Nyɔŋmɔ kɛ emumɔ lɛ tsirɛ hii anɔkwafoi aaafee 40 ni amɛŋma Biblia lɛ. Shi woji ni hii nɛɛ diɛŋtsɛ kɛ amɛniji ŋmala lɛ eko bɛ ŋmɛnɛ. Moŋ lɛ, mɛi kwɛ nɔ ni amɛŋmala lɛ anɔ amɛŋmala eko amɛshwie shi, ni no ji nɔ ni wɔyɔɔ ŋmɛnɛ lɛ. Enɛ hewɔ lɛ, mɛi komɛi nuɔ he akɛ Biblia lɛ mli saji lɛ etsake. Shi mɛni hewɔ wɔheɔ wɔyeɔ akɛ Biblia lɛ mli saji lɛ tsakeko lɛ?

5. Namɛi ŋmala Hebri Ŋmalɛ lɛ eko amɛshwie shi? Ni te amɛfee lɛ amɛhã tɛŋŋ? (Kwɛmɔ mfoniri ni yɔɔ wolo lɛ hiɛ lɛ.)

⁵ Yehowa hã aŋmala Hebri Ŋmalɛ lɛ pii ashwie shi koni e-Wiemɔ lɛ hiɛ akakpãtã. Akɛ nɔkwɛmɔnɔ lɛ, efã Israel maŋtsɛmɛi lɛ ni amɛŋmala Mla lɛ eko amɛhã amɛhe, ni efã Levibii lɛ ni amɛtsɔɔ Israelbii lɛ Yehowa Mla lɛ. (5 Mo. 17:18; 31:24-26; Neh. 8:7) Be ni Israelbii lɛ tee nomŋɔɔ mli yɛ Babilon lɛ, woloŋmalɔi ni he esa ŋmala Hebri Ŋmalɛ lɛ pii amɛshwie shi. (Ezr. 7:6) Woloŋmalɔi nɛɛ tsu amɛnitsumɔ lɛ jogbaŋŋ diɛŋtsɛ. Anɔkwa, amɛbɔi wiemɔi kɛ wiemɔ kulibii ni yɔɔ woji lɛ amli lɛ kanemɔ koni ekaba lɛ akɛ amɛshi nɔ ko loo amɛkɛ nɔ ko efata he. Fɛɛ sɛɛ lɛ, akɛni adesai ni yeee emuu ji amɛ hewɔ lɛ, tɔmɔi bibiibibii ba nɔ ni amɛŋmala lɛ amli. Shi akɛni mɛi srɔtoisrɔtoi pii ŋmala sane kome too lɛ nɔŋŋ amɛshwie shi hewɔ lɛ, ŋmɛnɛ lɛ, ewaaa akɛ wɔbaana tɔmɔi nɛɛ. Mɛni hewɔ wɔkɛɔ nakai?

6. Mɛni ji gbɛ kome ni atsɔɔ nɔ anaa tɔmɔi ni yɔɔ Bibliai ni akɛ niji ŋmala lɛ amli?

⁶ Biblia he nilelɔi ni yɔɔ ŋmɛnɛ lɛ yɛ gbɛ ko ni hi waa ni amɛtsɔɔ nɔ amɛnaa tɔmɔi ni yɔɔ blema Bibliai ni akɛ niji ŋmala ashwie shi lɛ amli. Hã wɔkɛ nɔkwɛmɔnɔ ko atsɔɔ bɔ ni amɛfeɔ enɛ amɛhãa lɛ mli. Ŋɔɔ lɛ akɛ, akɛ wolo ko ehã hii 100 ni amɛkɛ amɛniji aŋmala eko amɛshwie shi. Kɛ́ amɛteŋ mɔ kome tɔ̃ lɛ, te abaafee tɛŋŋ ana lɛ? Gbɛ kome ni abaanyɛ atsɔ nɔ ana ji, ni akɛ enɔ lɛ ni eŋma lɛ baato mɛi krokomɛi lɛ anɔ lɛ he akwɛ. Nɔ ko nakai pɛpɛɛpɛ Biblia he nilelɔi lɛ feɔ. Amɛkɛ Bibliai ni akɛ niji ŋmala lɛ srɔtoisrɔtoi pii totoɔ amɛhe ni no hãa amɛnaa tɔmɔi ni yɔɔ mli.

7. Mɛni hãa wɔnaa akɛ, mɛi ni kwɛ Hebri Ŋmalɛ lɛ nɔ amɛŋmala eko amɛshwie shi lɛ ateŋ mɛi pii kwɛ jogbaŋŋ ni amɛŋmala nibii ni yɔɔ mli lɛ pɛpɛɛpɛ?

⁷ Mɛi ni kwɛ Biblia lɛ nɔ amɛŋmala eko amɛshwie shi lɛ kwɛ jogbaŋŋ ni amɛŋmala nibii ni yɔɔ mli lɛ pɛpɛɛpɛ. No hewɔ lɛ, tɔmɔi bibiibibii pɛ yɔɔ nɔ ni amɛŋmala lɛ amli. Naa nɔkwɛmɔnɔ ko ni tsɔɔ nakai. Hebri Ŋmalɛ lɛ ni akɛ niji ŋmala lɛ ateŋ nɔ ni woji lɛ fɛɛ yɔɔ mli ni etsɛ fe fɛɛ ji, Leningrad Kodɛs lɛ, ni aŋma aaafee afi 1008 loo 1009 Ŋ.B. Shi nyɛsɛɛ nɛɛ, ana Hebri Ŋmalɛ lɛ mli woji lɛ ekomɛi, loo emli woji lɛ fãi komɛi ni aŋmala aaafee afii 1,000 dani aŋma Leningrad Kodɛs lɛ. Be ni aŋmala woji nɛɛ agbe naa lɛ, akwɛ nɔ aŋmala ekrokomɛi ashwie shi, ni akwɛ nomɛi hu anɔ aŋmala ekrokomɛi ashwie shi nakai aahu afii 1,000 dani aŋma Leningrad Kodɛs lɛ. No hewɔ lɛ, ekolɛ mɛi komɛi baasusu akɛ tɔmɔi pii baahi Leningrad Kodɛs lɛ mli. Shi jeee nakai kwraa eji. Be ni nilelɔi komɛi kɛ Hebri Ŋmalɛ lɛ ni akɛ niji ŋmala ni etsɛ waa lɛ to nɔ ni etsɛko nakai lɛ ahe lɛ, amɛna akɛ tsakemɔi bibiibibii pɛ eba wiemɔi komɛi ni akɛtsu nii lɛ ahe, ni no po diɛŋtsɛ lɛ, etsakeee bɔ ni anuɔ nɔ ni aŋma lɛ shishi ahãa.

8. Mɛɛ gbɛ nɔ esoro Kristofoi A-Greek Ŋmalɛ ni akɛ niji ŋmala lɛ yɛ woji krokomɛi ni aŋmala yɛ nakai beiaŋ lɛ ekomɛi ahe?

⁸ Blema Kristofoi lɛ nyiɛ nɔkwɛmɔnɔ kpakpa ni mɛi ni ŋmala Hebri Ŋmalɛ lɛ amɛshwie shi lɛ fee lɛ sɛɛ. Amɛ hu amɛkwɛ woji 27 ni feɔ Greek Ŋmalɛ lɛ anɔ amɛŋmala eko pɛpɛɛpɛ  amɛshwie shi, ni amɛkɛ Ŋmalɛ lɛ fãi ni amɛŋmala lɛ tsu nii yɛ amɛkpeei ashishi kɛ shiɛmɔ nitsumɔ lɛ mli. Be ni nilelɔ ko kɛ Greek Ŋmalɛ ni akɛ niji ŋmala ni yɔɔ lolo lɛ to woji tamɔ yinɔsane woji, skul woji, kɛ ekrokomɛi ni afee yɛ nakai beiaŋ lɛ ahe lɛ, ewie akɛ: “Greek Ŋmalɛ ni akɛ niji ŋmala lɛ abɔ ni yɔɔ ŋmɛnɛ lɛ fa kwraa fe amɛ, . . . ni etamɔ nɔ ni akura Ŋmalɛ lɛ jogbaŋŋ fe amɛ.” Wolo ko ni atsɛɔ lɛ Anatomy of the New Testament lɛ wie akɛ: “Wɔbaanyɛ wɔhe wɔye akɛ, saji ni yɔɔ [Greek Ŋmalɛ lɛ] shishitsɔɔmɔi kpakpai ni yɔɔ ŋmɛnɛ lɛ amli lɛ nɔŋŋ ji saji ni mɛi ni ŋmala Biblia lɛ ŋmala amɛshwie shi lɛ.”

9. Mɛni Yesaia 40:8 lɛ wie yɛ Biblia lɛ he ni ji anɔkwale waa?

⁹ Wɔna akɛ, woloŋmalɔi pii ni hi shi afii ohai abɔ nɛ lɛ gbo deŋme ni amɛŋmala Biblia lɛ eko amɛshwie shi. No hewɔ Biblia lɛ mli saji lɛ tsakeko ni ŋmɛnɛ lɛ wɔná eko wɔkaneɔ ni wɔkaseɔ lɛ. b Ŋwanejee ko bɛ he akɛ, Yehowa ni kwɛ ni abaa e-Wiemɔ lɛ yi kɛjɛ blema kɛbashi ŋmɛnɛ lɛ. (Kanemɔ Yesaia 40:8.) Shi mɛi komɛi kɛɛ, kɛ́ Biblia lɛ mli saji lɛ tsakeko po lɛ, no etsɔɔɔ doo akɛ Biblia lɛ ji Nyɔŋmɔ Wiemɔ. No hewɔ lɛ, nyɛhãa wɔkwɛa nibii ni tsɔɔ akɛ Biblia lɛ Nyɔŋmɔ Wiemɔ ni.

10. Gbaa nɔkwɛmɔnɔ ko ni tsɔɔ akɛ, nɔ ni awie yɛ 2 Petro 1:21 lɛ ji anɔkwale. (Kwɛmɔ mfonirii lɛ.)

¹⁰ Gbalɛi pii yɛ Biblia lɛ mli ni eba mli. Gbalɛi nɛɛ ekomɛi yɛ ni agba afii ohai abɔ dani amɛba mli, ni yinɔsane maa nɔ mi akɛ amɛba mli lɛɛlɛŋ. Enɛ efeee wɔ naakpɛɛ, ejaakɛ wɔle akɛ Yehowa ji mɔ ni hã agba gbalɛi ni yɔɔ Biblia lɛ mli lɛ. (Kanemɔ 2 Petro 1:21.) Gbalɛi nɛɛ ekomɛi ji gbalɛi ni kɔɔ blema Babilon maŋ lɛ shigbeemɔ he lɛ. Yɛ aaafee afi 778 kɛmiimɔ afi 732 D.Ŋ.B. lɛ, Yehowa kɛ emumɔ lɛ tsirɛ gbalɔ Yesaia ni egba akɛ, abaaye Babilon, maŋ ni yɔɔ hewalɛ waa lɛ, nɔ kunim. Yesaia gba po akɛ, mɔ ko ni atsɛɔ lɛ Koresh lɛ ni baaye maŋ lɛ nɔ kunim, ni etsɔɔ gbɛ pɔtɛɛ ni ebaatsɔ nɔ efee nakai. (Yes. 44:27–45:2) Egba hu akɛ, sɛɛ mli lɛ abaakpãtã Babilon hiɛ kwraa, ni mɔ  ko mɔ ko ehiŋ jɛmɛ dɔŋŋ. (Yes. 13:19, 20) Nakai pɛpɛɛpɛ eba lɛ. Yɛ afi 539 D.Ŋ.B. lɛ, Mediabii lɛ kɛ Persiabii lɛ ye Babilon nɔ kunim, ni ŋmɛnɛ lɛ, nakai maŋ kpeteŋkpele lɛ etsɔ koikoi.​—Kwɛmɔ vidio ni yitso ji, Biblia Lɛ Gba Gbɛ Ni Abaatsɔ Nɔ Aye Babilon Nɔ Kunim, ni yɔɔ Oyi Aná Wala Kɛya Naanɔ! wolo lɛ ilɛtrɔniki nɔ lɛ, nikasemɔ 03, oti 5 lɛ.

11. Tsɔɔmɔ bɔ ni gbalɛ ni yɔɔ Daniel 2:41-43 lɛ baa mli ŋmɛnɛ.

¹¹ Biblia lɛ mli gbalɛi komɛi ba mli yɛ blema, shi ekomɛi hu miiba mli ŋmɛnɛ. Enɛ he nɔkwɛmɔnɔ ji Daniel gbalɛ ni kɔɔ Anglo-Amerika Jeŋ Hewalɛ lɛ he lɛ. Gbalɛ nɛɛ miiba mli ŋmɛnɛ. Bo lɛ, hã wɔsusu nɔ hewɔ ni wɔkɛɔ nakai lɛ he wɔkwɛ. (Kanemɔ Daniel 2:41-43.) Daniel gba akɛ, jeŋ hewalɛ nɛɛ “fã baawa” tamɔ dade, ni fã hu baafee tamɔ sũ, ni tsɔɔ akɛ ‘ehe waŋ,’ ni nakai pɛpɛɛpɛ wɔnaa lɛ. Britain kɛ Amerika etsɔɔ akɛ amɛhe wa tamɔ dade, ejaakɛ amɛ titri amɛye amɛbua kuu ni amɛyɔɔ mli lɛ ni amɛye kunim yɛ Jeŋ Tai enyɔ ni awu lɛ amli, ni amɛsraafoi lɛ yɛ hewalɛ waa. Shi fɛɛ sɛɛ lɛ, amɛmaŋbii lɛ ahewɔ lɛ, amɛnyɛko amɛná hewalɛ tamɔ bɔ ni kulɛ amɛbaasumɔ. Maŋbii nɛɛ wieɔ amɛshiɔ yiŋ ni amralo lɛ kɛ nitsumɔhei wujiwuji kpɛɔ lɛ, ni amɛtsetsee kui ni fãa hegbɛi ni maŋbii lɛ yɔɔ lɛ ahe kɛ kui ni kwɛɔ ni akɛ nitsulɔi aye jogbaŋŋ. Nyɛsɛɛ nɛɛ, nuu ko ni ekase je lɛŋ nɔyelii srɔtoi lɛ ahe nii lɛ wie akɛ: “Yɛ maji fɛɛ ni yɔɔ ŋmɛnɛ ni akpɛlɛɔ ni maŋbii lɛ atsɔɔ amɛsusumɔ yɛ saji ahe lɛ anɔ lɛ, United States ji maŋ ni mli egbála fe fɛɛ yɛ maŋkwramɔ saji ahewɔ.” Ni Britain hu? Nyɛsɛɛ nɛɛ, nakai nɔyeli lɛ hu mli egbála, ejaakɛ maŋbii lɛ nyɛɛɛ akpã gbee yɛ bɔ ni esa akɛ amɛkɛ maji ni yɔɔ European Union lɛ mli lɛ ashãra ahã lɛ he. Mligbalamɔi nɛɛ ahewɔ lɛ, Anglo-Amerika Jeŋ Hewalɛ lɛ nyɛɛɛ atsu eyiŋtoi fɛɛ ahe nii.

12. Mɛni gbalɛi ni yɔɔ Biblia lɛ mli lɛ hãa wɔnaa faŋŋ?

¹² Bɔ ni gbalɛi pii ni yɔɔ Biblia lɛ mli lɛ eba mli lɛ hãa hemɔkɛyeli ni wɔyɔɔ akɛ nibii ni Yehowa ewie akɛ ebaafee ehã wɔ wɔsɛɛ lɛ baaba mli lɛ mli waa. Bɔ ni Lalatsɛ lɛ nu he lɛ, nakai wɔ hu wɔnuɔ he. Esɔle ekɛɛ Yehowa akɛ: “Mishweɔ oyiwalaheremɔ lɛ akɛ nɔ ko, ejaakɛ mihiɛ kã owiemɔ lɛ nɔ.” (Lala 119:81) Yehowa etsɔ Biblia lɛ nɔ ehã ‘wɔná hiɛnɔkamɔ’ akɛ, wɔsɛɛ lɛ nibii baahi. (Yer. 29:11) No hewɔ lɛ, wɔkɛ wɔhiɛ efɔ̃ɔɔ adesai anɔ. Moŋ lɛ, wɔkɛ wɔhiɛ fɔ̃ɔ Yehowa kɛ eshiwoi lɛ anɔ. Nyɛhãa wɔkasea gbalɛi ni yɔɔ Biblia lɛ mli lɛ fitsofitso koni no ahã hemɔkɛyeli ni wɔyɔɔ akɛ Biblia lɛ ji Nyɔŋmɔ Wiemɔ lɛ mli awa.

13. Yɛ nɔ ni aŋma yɛ Lala 119:66, 138 lɛ naa lɛ, mɛɛ yiŋtoo kroko hewɔ wɔbaanyɛ wɔkɛ wɔhiɛ afɔ̃ Biblia lɛ nɔ?

¹³ Kɛ́ mɛi kɛ ŋaawoi ni yɔɔ Biblia lɛ mli lɛ tsu nii lɛ, amɛnáa he sɛɛ, ni enɛ ji yiŋtoo kroko hewɔ ni wɔbaanyɛ wɔkɛ wɔhiɛ afɔ̃ Biblia lɛ nɔ. (Kanemɔ Lala 119:66, 138.) Akɛ nɔkwɛmɔnɔ lɛ, gbalashihilɛ mli bii komɛi ni kulɛ amɛyaatse gbãla lɛ kɛ Biblia lɛ mli ŋaawoi lɛ tsu nii, ni ehã bianɛ lɛ amɛfee ekome ni amɛná miishɛɛ. Amɛbii lɛ hu ená miishɛɛ, ejaakɛ amɛfɔlɔi lɛ kɛ ŋaawoi ni yɔɔ Biblia lɛ mli lɛ miitsu nii, ni no hewɔ lɛ amɛsumɔɔ amɛ ni amɛmiikwɛ amɛ jogbaŋŋ.​—Efe. 5:22-29.

14. Gbaa nɔkwɛmɔnɔ ko ni tsɔɔ akɛ, kɛ́ mɛi kɛ ŋaawoi ni yɔɔ Biblia lɛ mli tsu nii lɛ, ehãa amɛbatsɔmɔɔ gbɔmɛi kpakpai.

¹⁴ Awuiyelɔi ni he yɔɔ gbeyei po kɛ Biblia lɛ mli ŋaawoi etsu nii ni no ehã amɛtsake. Akɛ nɔkwɛmɔnɔ lɛ, Biblia lɛ mli ŋaawoi lɛ hã nuu ko ni atsɛɔ lɛ Jack lɛ tsake kwraa. c No mli lɛ, Jack ji awuiyelɔ ni yitsoŋ wa waa, ni efata mɛi  ni awo amɛ tsuŋ ni abu amɛ gbele fɔ lɛ ateŋ mɛi ni asheɔ amɛ gbeyei waa lɛ ahe. Shi gbi ko lɛ, akɛ mɔ ko miikase nii ni Jack yabo eko toi. Bɔ ni nyɛmimɛi ni kɛ mɔ lɛ kaseɔ nii lɛ fee amɛnii amɛhã lɛ ta Jack tsuiŋ waa ni ehã akɛ lɛ hu bɔi nikasemɔ. Ekɛ nibii ni ekase yɛ Biblia lɛ mli lɛ tsu nii, ni etsake ejeŋba kwraa. Jack tee ehiɛ ni ebatsɔ shiɛlɔ ni abaptisiko lɛ, ni sɛɛ mli lɛ, abaptisi lɛ. Ekɛ ekãa shiɛ Nyɔŋmɔ Maŋtsɛyeli lɛ he sane etsɔɔ mɛi krokomɛi ni awo amɛ tsuŋ lɛ, ni eye ebua kɛ́ hooo kwraa lɛ, mɛi ejwɛ ni amɛbɔi Biblia lɛ kasemɔ. Be ni gbi ni abaagbe Jack lɛ shɛ lɛ, no mli lɛ etsake kwraa; etsɔ gbɔmɔ kpakpa. Jack lɔyafoi lɛ ateŋ mɔ kome wie akɛ: “Kɛ́ mikɛ bɔ ni Jack yɔɔ bianɛ lɛ to bɔ ni eyɔɔ afii 20 ni eho nɛ lɛ he lɛ, etsake kwraa. Nibii ni Yehowa Odasefoi lɛ tsɔɔ lɛ lɛ ewa lɛ waa.” Eyɛ mli akɛ agbe Jack moŋ nɛ, shi enɔkwɛmɔnɔ lɛ hãa wɔnaa akɛ, wɔbaanyɛ wɔkɛ wɔhiɛ afɔ̃ Nyɔŋmɔ Wiemɔ lɛ nɔ, ni akɛ, Biblia lɛ nyɛɔ etsakeɔ mɛi.​—Yes. 11:6-9.

15. Mɛɛ gbɛ nɔ ŋaawoi ni yɔɔ Biblia lɛ mli ni Yehowa tsuji kɛtsuɔ nii lɛ hãa esoroɔ amɛ kwraa? (Kwɛmɔ mfoniri lɛ.)

¹⁵ Akɛni Yehowa webii kɛ Biblia lɛ tsuɔ nii hewɔ lɛ, ehã amɛfee ekome. (Yoh. 13:35; 1 Kor. 1:10) Ewaaa akɛ abaana akɛ ekomefeemɔ kɛ toiŋjɔlɛ yɛ wɔteŋ, ejaakɛ ŋmɛnɛ lɛ, mɛi kɛ amɛhe yeee yɛ maŋkwramɔ saji, maŋ nɔ ni amɛjɛ, loo shikatsɛmɛi loo ohiafoi ni amɛji lɛ hewɔ. Nuu ko ni atsɛɔ lɛ Jean lɛ na ekomefeemɔ ni yɔɔ Yehowa webii lɛ ateŋ lɛ, ni eta etsuiŋ waa. Afɔ lɛ yɛ Afrika maji lɛ eko nɔ, ni jɛmɛ eda yɛ. Shi be ko lɛ, ta te shi yɛ amɛmaŋ lɛ nɔ, ni ekɛ ehe yadɔmɔ maŋ lɛ asraafoi lɛ. Shi sɛɛ mli lɛ, ejo foi kɛtee maji ni bɛŋkɛ amɛ lɛ ateŋ ekome nɔ. Be ni eyɔɔ jɛmɛ lɛ, ekɛ Yehowa Odasefoi kpe. Jean wie akɛ: “Mikase akɛ, anɔkwa jamɔ lɛ mli bii lɛ kɛ amɛhe wooo pɔlitis mli, ekomefeemɔ yɛ amɛteŋ, ni amɛsumɔɔ amɛhe waa.” Ewie kɛfata he akɛ: “Mikɛ mihe fɛɛ hã wɔmaŋ lɛ. Shi be ni mikase Biblia lɛ, etsirɛ mi ni mikɛ mihe fɛɛ hã Yehowa.” Jean tsake kwraa. Bianɛ lɛ, ekɛ mɛi ni esoro he ni  amɛjɛ lɛ enɔɔɔ dɔŋŋ. Moŋ lɛ, eeshiɛ toiŋjɔlɛ he sane kpakpa ni yɔɔ Biblia lɛ mli lɛ eetsɔɔ mɛi fɛɛ. Ŋaawoi ni yɔɔ Biblia lɛ mli lɛ eye ebua mɛi srɔtoisrɔtoi ni jɛ maji srɔtoi pii anɔ, ni enɛ hãa wɔnaa faŋŋ akɛ, Biblia lɛ jɛ Nyɔŋmɔ ŋɔɔ ni wɔbaanyɛ wɔkɛ wɔhiɛ afɔ̃ nɔ.

16. Mɛni hewɔ ehe miihia waa ni wɔhã hemɔkɛyeli ni wɔyɔɔ yɛ Biblia lɛ mli akɛ eji Nyɔŋmɔ Wiemɔ lɛ mli awa?

¹⁶ Je lɛŋ shihilɛ baaya nɔ afite fe nɛkɛ po. No hewɔ lɛ kɛ́ wɔkwɛɛɛ ni ahi lɛ, ebaanyɛ ehã ewa kɛhã wɔ akɛ wɔkɛ wɔhiɛ baafɔ̃ Biblia lɛ nɔ. Mɛi baawie nibii komɛi ni baanyɛ ahã wɔnu he akɛ wɔnyɛŋ wɔkɛ wɔhiɛ afɔ̃ Biblia lɛ nɔ, loo akɛ, Yehowa bɛ gbɛjianɔtoo ko ni etsɔɔ nɔ ekwɛɔ ewebii lɛ ŋmɛnɛ. Shi kɛ́ wɔheɔ wɔyeɔ akɛ Nyɔŋmɔ Wiemɔ lɛ anɔkwale sɔŋŋ ni lɛ, nɔ ko nɔ ko bɛ ni mɔ ko baawie ni baahã wɔhemɔkɛyeli lɛ mli agbɔjɔ, ni ‘wɔbaakpɛ mli yɛ wɔtsui mli akɛ, wɔbaanyiɛ Yehowa taomɔ nii lɛ asɛɛ be fɛɛ be kɛyashi naagbee.’ (Lala 119:112) ‘Efeŋ wɔ hiɛgbele’ akɛ wɔbaatsɔɔ mɛi Biblia lɛ ni wɔwo amɛ hewalɛ ni amɛkɛ nɔ ni amɛkaseɔ lɛ atsu nii. (Lala 119:46) Ni wɔkɛ “tsuishitoo kɛ miishɛɛ” baafi shi shiŋŋ kɛ́ wɔkɛ shihilɛi ni mli wawai kpe loo awa wɔyi po.​—Kol. 1:11; Lala 119:143, 157.

17. Mɛni afi 2023 afi ŋmalɛ lɛ baaye abua wɔ ni wɔfee?

¹⁷ Eŋɔɔ wɔnaa waa akɛ Yehowa ehã wɔbale anɔkwale lɛ. Ŋmɛnɛ lɛ, je lɛŋ shihilɛ efee basaa, ni mɛi pii ayiŋ efutu amɛ. Shi anɔkwale lɛ hewɔ lɛ, wɔ lɛ, wɔle bɔ ni esa akɛ wɔhi shi wɔhã, ni no hewɔ lɛ wɔyeee wɔtsui. Agbɛnɛ hu, wɔyɛ hiɛnɔkamɔ akɛ wɔsɛɛ lɛ nibii baahi kɛ́ Nyɔŋmɔ Maŋtsɛyeli lɛ bɔi shikpɔŋ lɛ nɔ yeli. Eba akɛ, afi 2023 afi ŋmalɛ lɛ baaye abua wɔ ni hemɔkɛyeli ni wɔyɔɔ akɛ Nyɔŋmɔ Wiemɔ lɛ fɛɛ lɛ anɔkwale sɔŋŋ ni lɛ mli awa!​—Lala 119:160.