Nibii nɛɛ eko ji, he ni wɔda yɛ. Hii komɛi yɛ ni he ni amɛda yɛ lɛ, abuuu yei ahãaa nɔ ko. Akɛ nɔkwɛmɔnɔ lɛ, kpokpaa nɔkwɛlɔ ko ni yɔɔ Bolivia ni atsɛɔ lɛ Hans lɛ wie akɛ: “Hii komɛi yɛ ni he ni amɛda yɛ lɛ, atsɔɔ amɛ akɛ yei ni sɔmɔɔ hii. Enɛ hewɔ lɛ, hii lɛ nuɔ he akɛ amɛnɔ kwɔlɔ kwraa fe yei lɛ, ni amɛbuuu amɛ amɛhãaa nɔ ko.” Asafoŋ onukpa ko ni yɔɔ Taiwan ni atsɛɔ lɛ Shengxian lɛ hu wie akɛ: “He ni miyɔɔ lɛ, hii pii nuɔ he akɛ esaaa ni yoo tsɔɔ ejwɛŋmɔ yɛ sane ko he. Kɛ́ nuu ko tsĩ susumɔ ko ni yoo kɛhã yɛ sane ko he lɛ tã lɛ, hii krokomɛi po ebuuu lɛ.” Hii komɛi hu feɔ nibii komɛi yɛ ŋaa mli kɛtsɔɔ akɛ amɛbuuu yei. Eko ji, amɛwieɔ nibii komɛi ni esaaa yɛ yei ahe kɛwoɔ mɛi anaa ŋmɔlɔ.

Shi miishɛɛ sane ji, ekɔɔɔ he eko he ni mɔ ko da yɛ aloo bɔ ni atsɔse lɛ ahã lɛ, ebaanyɛ etsake. Ebaanyɛ etsake susumɔ ni ehiɛ akɛ hii anɔ kwɔ fe yei lɛ. (Efe. 4:​22-24) Nɔ ni baawa lɛ koni enyɛ efee enɛ ji, ni ebaakase bɔ ni Yehowa kɛ yei yeɔ ehãa lɛ. Yɛ sane nɛɛ mli lɛ, wɔbaakwɛ bɔ ni Yehowa kɛ yei yeɔ ehãa, bɔ ni nyɛmimɛi hii baanyɛ akase lɛ, kɛ nɔ ni asafoŋ onukpai baanyɛ afee kɛtsɔɔ akɛ amɛbuɔ nyɛmimɛi yei.

TE YEHOWA KƐ YEI YEƆ EHÃA TƐŊŊ?

Mɔ ni fe fɛɛ ni wɔbaanyɛ wɔkase ni wɔna bɔ ni akɛ yei yeɔ jogbaŋŋ ahãa ji Yehowa. Eji Tsɛ ni musuŋ tsɔɔ lɛ ni sumɔɔ adesai fɛɛ, ni enaa nyɛmimɛi yei anɔkwafoi lɛ akɛ ebiyei ni eshwɛɛɛ amɛhe kwraa. (Yoh. 3:16) Hã wɔkwɛ gbɛi komɛi anɔ ni Yehowa kɛ yei yeɔ ni hãa wɔnaa akɛ esumɔɔ amɛ, ni ebuɔ amɛ.

Yehowa enaaa yei akɛ amɛbaa shi fe hii. Yehowa bɔ hii kɛ yei fɛɛ tamɔ bɔ ni eyɔɔ lɛ. (1 Mo. 1:27)  Yehowa ebɔɔɔ hii bɔ ni baahã amɛná nilee babaoo loo hesai babaoo fe yei, ni esumɔɔɔ hii asane fe yei hu. (2 Kro. 19:7) Bɔ ni Yehowa bɔ hii koni amɛnyɛ amɛkase Biblia mli anɔkwalei ni amɛnu shishi ni amɛjie Yehowa sui ni nɔ bɛ lɛ kpo lɛ, nakai nɔŋŋ ebɔ yei lɛ hu. Bɔ ni Yehowa shwɛɛɛ hii ni heɔ enɔ amɛyeɔ lɛ ahe lɛ, nakai nɔŋŋ eshwɛɛɛ yei ni heɔ enɔ amɛyeɔ lɛ hu ahe. Bɔ ni Yehowa ehã hii hiɛnɔkamɔ akɛ amɛbaanyɛ amɛhi shi kɛya naanɔ yɛ shikpɔŋ lɛ nɔ loo akɛ amɛsɔmɔ akɛ maŋtsɛmɛi kɛ osɔfoi yɛ ŋwɛi lɛ, nakai hiɛnɔkamɔ lɛ nɔŋŋ ekɛhã yei hu. (2 Pet. 1:1) Enɛɛmɛi fɛɛ hãa wɔnaa akɛ, Yehowa enaaa yei akɛ amɛbaa shi fe hii.

Yehowa boɔ yei atoi. Yehowa susuɔ bɔ ni yei nuɔ he amɛhãa kɛ naagbai ni amɛkɛkpeɔ lɛ ahe waa. Akɛ nɔkwɛmɔnɔ lɛ, ebo sɔlemɔi ni Rahel kɛ Hana fɛɛ sɔle lɛ toi ni etsu amɛnaagba lɛ he nii ehã amɛ. (1 Mo. 30:22; 1 Sam. 1:​10, 11, 19, 20) Agbɛnɛ hu, yɛ Biblia lɛ mli lɛ, hii komɛi bo yei atoi. Yehowa kɛ emumɔ lɛ tsirɛ mɛi ni ŋma Biblia lɛ ni amɛbɔ saji nɛɛ ahe amaniɛ yɛ Biblia lɛ mli. Akɛ nɔkwɛmɔnɔ lɛ, Yehowa fã Abraham akɛ ebo eŋa Sara toi, ni Abraham fee nakai. (1 Mo. 21:​12-14) Agbɛnɛ hu, Maŋtsɛ David bo Abigail toi. David wie po akɛ, Yehowa ni tsu Abigail ni ekɛ lɛ abawie. (1 Sam. 25:​32-35) Yesu, ni feɔ enii tamɔ Yehowa pɛpɛɛpɛ lɛ hu bo emami, ni ji Maria toi. (Yoh. 2:​3-10) Nɔkwɛmɔnii srɔtoi nɛɛ hãa wɔnaa akɛ, gbɛ kome ni Yehowa tsɔɔ nɔ etsɔɔ akɛ ebuɔ yei ji, eboɔ amɛ toi.

Emuɔ efɔ̃ɔ yei anɔ. Akɛ nɔkwɛmɔnɔ lɛ, Yehowa hã Hawa hegbɛ koni efata he ni akwɛ shikpɔŋ muu lɛ fɛɛ nɔ. (1 Mo. 1:28) Enɛ ni efee lɛ tsɔɔ akɛ enaaa Hawa akɛ ebaa shi fe ewu Adam, shi moŋ enaa lɛ akɛ Adam hefatalɔ. Agbɛnɛ hu, Yehowa kɛ nitsumɔ wo gbalɔ yoo Debora kɛ gbalɔ yoo Hulda dɛŋ koni amɛwo ewebii lɛ ŋaa. Debora wo kojolɔ ko ŋaa, ni Hulda hu wo maŋtsɛ ko ŋaa. (Koj. 4:​4-9; 2 Maŋ. 22:​14-20) Ŋmɛnɛ hu lɛ, Yehowa ehã Kristofoi yei hegbɛ ni amɛtsu enitsumɔ lɛ. Yei anɔkwafoi nɛɛ sɔmɔɔ akɛ shiɛlɔi, gbɛgbalɔi, kɛ maŋsɛɛ sɔɔlɔi. Amɛyeɔ amɛbuaa ni atɛŋɔ Maŋtsɛyeli Asai kɛ nitsumɔhe niji, ni amɛyeɔ amɛbuaa ni amaa ni akuraa hu. Nyɛmimɛi yei nɛɛ ekomɛi sɔmɔɔ yɛ Betel loo yɛ wiemɔ shishitsɔɔmɔ ɔfisii amli. Nyɛmimɛi yei nɛɛ tamɔ asraafoi babaoo ni Yehowa kɛmiitsu nii kɛmiitsu esuɔmɔnaa nii. (Lala 68:11) Eyɛ faŋŋ akɛ, Yehowa enaaa yei akɛ amɛbɛ nyɛmɔi tamɔ hii.

MƐNI BAAYE ABUA NYƐMIMƐI HII KONI AMƐKASE BƆ NI YEHOWA KƐ YEI YEƆ EHÃA LƐ?

Nyɛmimɛi hii, nɔ ni baaye abua wɔ koni wɔle kɛji wɔkɛ nyɛmimɛi yei yeɔ tamɔ bɔ ni Yehowa kɛ amɛ yeɔ lɛ ji, ni wɔbaajɛ wɔtsui mli wɔpɛi bɔ ni wɔsusuɔ nii ahe wɔhãa, kɛ bɔ ni wɔfeɔ wɔnii wɔhãa lɛ mli. Shi dani wɔbaanyɛ wɔfee nakai lɛ, yelikɛbuamɔ he baahia wɔ. Bɔ ni datrɛfoi nyɛɔ amɛkɛ tsɔji kwɛɔ wɔmli koni amɛna kɛji akɛ naagba ko yɛ wɔtsui he lɛ, nakai nɔŋŋ naanyo kpakpa ko, kɛ agbɛnɛ hu, Nyɔŋmɔ Wiemɔ lɛ baanyɛ aye abua wɔ koni wɔna kɛ́ wɔhiɛ jwɛŋmɔ ni ejaaa yɛ yei ahe. Te wɔbaafee tɛŋŋ wɔná yelikɛbuamɔ nɛɛ?

Bi onaanyo kpakpa ko. (Abɛi 18:17) Ebaahi akɛ wɔbaabi wɔnaanyo ko ni mli hi ni wɔheɔ wɔyeɔ waa akɛ ebaakɛɛ wɔ anɔkwale lɛ saji tamɔ: “Kɛ́ okwɛ lɛ, te mikɛ nyɛmimɛi yei yeɔ mihãa tɛŋŋ? Ani amɛnuɔ he akɛ mibuɔ amɛ? Ani nɔ ko yɛ ni oona akɛ manyɛ mafee ni baahã mikɛ amɛ aye jogbaŋŋ?” Kɛ́ onaanyo lɛ tsɔɔ nibii komɛi ni obaanyɛ ofee ni baahã okɛ yei aye jogbaŋŋ lɛ, kaajie onaa. Bɔɔ mɔdɛŋ akɛ obaafee tsakemɔi ni sa lɛ moŋ.

Kasemɔ Nyɔŋmɔ Wiemɔ lɛ. Nɔ ni fe fɛɛ ni baaye abua wɔ koni wɔna kɛji wɔkɛ nyɛmimɛi yei yeɔ jogbaŋŋ ji, ni wɔbaakase Nyɔŋmɔ Wiemɔ lɛ ni wɔkɛto susumɔi ni wɔyɔɔ yɛ yei ahe kɛ bɔ ni wɔkɛ amɛ yeɔ wɔhãa lɛ he. (Heb. 4:12) Kɛ́ wɔkase Biblia lɛ, wɔbaana hii komɛi ni kɛ yei ye jogbaŋŋ kɛ hii komɛi ni efeee nakai. No sɛɛ lɛ, wɔkɛ amɛnifeemɔi lɛ ato wɔnɔ lɛ he wɔkwɛ. Bɔ ni afee ni okɛ ŋmalɛ ko akafi susumɔ ko ni ejaaa ni ohiɛ yɛ yei ahe lɛ sɛɛ lɛ, kɛ́ okane ŋmalɛ ko lɛ, okɛ ŋmalɛi krokomɛi ato he bɔ ni afee ni ona bɔ ni Yehowa naa yei ehãa lɛ diɛŋtsɛ. Akɛ nɔkwɛmɔnɔ lɛ, 1 Petro 3:7 lɛ kɛɛ, ‘wumɛi kɛ woo awo amɛŋamɛi akɛ gbɛ́ ni waaa.’ b Ani ŋmalɛ nɛɛ tsɔɔ akɛ yei lɛ, amɛleee nii, ni amɛbɛ hesai tamɔ hii? Dabi kwraa. Kɛ́ okɛ nɔ ni Petro wie lɛ to nɔ ni aŋma yɛ Galatiabii 3:​26-29, ni wieɔ akɛ Yehowa ehala hii  kɛ yei fɛɛ ni amɛkɛ Yesu aye maŋtsɛ yɛ ŋwɛi lɛ he lɛ, wɔnaa nakai. No hewɔ lɛ, kɛ́ wɔkase Nyɔŋmɔ Wiemɔ lɛ, ni wɔbi wɔnaanyo kpakpa ko bɔ ni wɔkɛ yei yeɔ wɔhãa lɛ he sane lɛ, no baaye abua wɔ koni wɔna nibii ni kɛ́ wɔfee lɛ, no baahã wɔnyɛmimɛi yei lɛ ana akɛ wɔbuɔ amɛ waa.

MƐNI ASAFOŊ ONUKPAI LƐ FEƆ KƐTSƆƆ AKƐ AMƐBUƆ NYƐMIMƐI YEI?

Kɛ́ nyɛmimɛi hii ni yɔɔ asafo lɛ mli lɛ na bɔ ni asafoŋ onukpai lɛ kɛ nyɛmimɛi yei lɛ yeɔ yɛ suɔmɔ kɛ bulɛ mli lɛ, ebaaye ebua amɛ ni amɛ hu amɛna bɔ ni amɛkɛ nyɛmimɛi yei lɛ baaye ahã. Mɛni asafoŋ onukpai lɛ feɔ kɛtsɔɔ akɛ amɛbuɔ nyɛmimɛi yei? Hã wɔkwɛ nibii pɔtɛi komɛi ni amɛfeɔ ni mɛi krokomɛi baanyɛ akase.

Asafoŋ onukpai lɛ jieɔ nyɛmimɛi yei lɛ ayi. Bɔfo Paulo fee nɔkwɛmɔnɔ kpakpa ehã asafoŋ onukpai lɛ yɛ enɛ gbɛfaŋ. Ejie nyɛmimɛi yei pii ayi yɛ wolo ni eŋma kɛhã asafo ni yɔɔ Roma lɛ mli. (Rom. 16:12) Kɛ́ okwɛ lɛ, te nyɛmimɛi yei nɛɛ nu he amɛhã tɛŋŋ be ni akane wolo nɛɛ atsɔɔ asafo lɛ? Ekã shi faŋŋ akɛ, amɛná miishɛɛ waa. Nakai nɔŋŋ ŋmɛnɛ lɛ, asafoŋ onukpai lɛ jieɔ nyɛmimɛi yei lɛ ayi waa yɛ sui kpakpai ni amɛjieɔ lɛ kpo kɛ nɔ ni amɛtsuɔ yɛ Yehowa sɔɔmɔ lɛ mli lɛ hewɔ. Enɛ hãa nyɛmimɛi yei lɛ nuɔ he akɛ, anaa nɔ ni amɛfeɔ lɛ, ni abuɔ amɛ waa. Nyɛmimɛi yei lɛ ayi ni asafoŋ onukpai lɛ jieɔ lɛ woɔ amɛ hewalɛ ni amɛyaa nɔ amɛsɔmɔɔ Yehowa.—Abɛi 15:23.

Asafoŋ onukpai lɛ jɛɔ amɛtsui mli amɛjieɔ nyɛmimɛi yei lɛ ayi, ni amɛtsɔɔ nɔ pɔtɛɛ hewɔ ni amɛjieɔ amɛyi lɛ. Mɛni hewɔ amɛfeɔ nakai? Nyɛmi yoo ko ni atsɛɔ lɛ Jessica lɛ wie akɛ: “Naagba ko bɛ he akɛ nyɛmi nuu ko baahã nyɛmi yoo ko ‘aekoo.’ Shi kɛ́ nyɛmi nuu ko jie wɔyi yɛ nɔ ko pɔtɛɛ he, tamɔ bɔ ni wɔtsɔɔ wɔbii koni amɛtara shi diŋŋ yɛ asafoŋ kpeei ashishi, loo wɔhe ni wɔkɛshã afɔle kɛyawó mɔ ko ni akɛ lɛ miikase Biblia lɛ kɛba asafoŋ kpee nɛkɛ lɛ, wɔnáa miishɛɛ waa.” Kɛ́ asafoŋ onukpai lɛ jie nyɛmimɛi  yei ayi yɛ nɔ ko pɔtɛɛ he lɛ, ehãa nyɛmimɛi yei lɛ nuɔ he akɛ amɛhe yɛ sɛɛnamɔ yɛ asafo lɛ mli.

Amɛboɔ nyɛmimɛi yei lɛ atoi. Asafoŋ onukpai ni baa amɛhe shi lɛ le akɛ nilee bɛ mɔ kome yitsoŋ. No hewɔ lɛ, asafoŋ onukpai nɛɛ biɔ nyɛmimɛi yei ni amɛtsɔɔ amɛjwɛŋmɔ yɛ saji ahe, ni amɛboɔ amɛ toi jogbaŋŋ kɛ́ amɛmiiwie. Enɛ ni amɛfeɔ lɛ woɔ nyɛmimɛi yei lɛ hewalɛ waa, ni amɛ, ni ji asafoŋ onukpai lɛ diɛŋtsɛ hu náa he sɛɛ. Yɛ mɛɛ gbɛ nɔ? Asafoŋ onukpa ko ni sɔmɔɔ yɛ Betel ni atsɛɔ lɛ Gerardo lɛ wie akɛ: “Miyɔse akɛ, kɛ́ mibi nyɛmi yoo ko susumɔ yɛ sane ko he lɛ, eyeɔ ebuaa mi ni minyɛɔ mitsuɔ minitsumɔ lɛ jogbaŋŋ. Bei pii lɛ, nyɛmimɛi yei lɛ etsɛ yɛ nitsumɔ lɛ mli po fe nyɛmimɛi hii lɛ babaoo.” Yɛ asafo lɛ mli lɛ, nyɛmimɛi yei pii sɔmɔɔ akɛ gbɛgbalɔi, no hewɔ lɛ, amɛle bɔ ni akutso lɛ mli bii lɛ yɔɔ. Asafoŋ onukpa ko ni atsɛɔ lɛ Bryan lɛ wie akɛ: “Wɔnyɛmimɛi yei lɛ yɛ nibii babaoo ni amɛbaanyɛ amɛkɛwa asafo lɛ. No hewɔ lɛ, bo amɛ toi.”

Asafoŋ onukpai ni hiɛ kã shi lɛ etswaaa nyɛmimɛi yei asusumɔ yɛ sane ko he lɛ amɛfɔ̃ɔɔ oya. Mɛni hewɔ? Asafoŋ onukpa ko ni atsɛɔ lɛ Edward lɛ wie akɛ: “Nyɛmi yoo ko susumɔ kɛ niiashikpamɔ yɛ sane ko he lɛ baanyɛ aye abua nyɛmi nuu ko koni ena sane muu lɛ fɛɛ jogbaŋŋ, ni ebaanyɛ eye ebua lɛ koni enu he ehã mɛi krokomɛi.” (Abɛi 1:5) Kɛ́ asafoŋ onukpa ko nyɛŋ ekɛ nyɛmi yoo ko susumɔ yɛ sane ko he lɛ atsu nii po lɛ, asafoŋ onukpa lɛ baanyɛ ada nyɛmi yoo lɛ shi akɛ ehã ni ele nɔ ni esusuɔ kɛ bɔ ni enaa sane lɛ ehãa.

Amɛtsɔseɔ nyɛmimɛi yei lɛ. Asafoŋ onukpai ni yoɔ nii asɛɛ lɛ bɔɔ mɔdɛŋ akɛ amɛbaatsɔse nyɛmimɛi yei lɛ. Akɛ nɔkwɛmɔnɔ lɛ, amɛtsɔɔ nyɛmimɛi yei bɔ ni akwɛɔ shiɛmɔ kpee nɔ ahãa koni kɛ́ aleenɔ nyɛmi nuu ko ni abaptisi lɛ baaa lɛ, amɛnyɛ amɛkwɛ nɔ. Amɛbaanyɛ amɛtsɔɔ nyɛmimɛi yei lɛ bɔ ni akɛ tsɔji komɛi tsuɔ nii ahãa koni kɛ́ aama asafo lɛ tsũ ko loo aakura lɛ, amɛnyɛ amɛkɛtsu nii. Yɛ Betel hu lɛ, nɔkwɛlɔi baanyɛ atsɔse nyɛmimɛi yei koni amɛtsu nitsumɔi srɔtoi, tamɔ Betel shĩa kuramɔ, nibii ahemɔ, shika he akɔntaabuu, kɔmpiutai ahe nitsumɔ, kɛ nibii krokomɛi ni tamɔ nakai. Kɛ́ asafoŋ onukpai lɛ tsɔse nyɛmimɛi yei lɛ, no hãa nyɛmimɛi yei lɛ naa akɛ asafoŋ onukpai lɛ muɔ amɛfɔ̃ɔ amɛnɔ.

Kɛ́ asafoŋ onukpai tsɔse nyɛmimɛi yei lɛ, amɛkɛ nakai tsɔsemɔ lɛ yeɔ amɛbuaa mɛi krokomɛi. Akɛ nɔkwɛmɔnɔ lɛ, nyɛmimɛi yei komɛi ni atsɔse amɛ yɛ tsumaa he lɛ kɛ amɛhesai nɛɛ waa kɛmaa wɔnyɛmimɛi ashĩai ni efite yɛ oshãra ko hewɔ lɛ. Nyɛmimɛi yei ni atsɔse amɛ yɛ bɔ ni atsuɔ maŋ odaseyeli nitsumɔ lɛ kɛ amɛhesai nɛɛ tsɔseɔ nyɛmimɛi yei krokomɛi koni amɛ hu amɛnyɛ amɛtsu nitsumɔ nɛɛ. Te nyɛmimɛi yei naa asafoŋ onukpai ni tsɔseɔ amɛ lɛ amɛhãa tɛŋŋ? Nyɛmi yoo ko ni atsɛɔ lɛ Jennifer lɛ wie akɛ: “Be ko be ni miyaye mibua kɛma Maŋtsɛyeli Asa ko lɛ, nyɛmimɛi hii ni kwɛɔ tsumaa lɛ nɔ lɛ ateŋ mɔ kome tsɔɔ mi bɔ ni atsuɔ nɔ ko. No sɛɛ lɛ, ekwɛ bɔ ni mitsuɔ nii lɛ mihãa lɛ, ni ejie miyi yɛ he. Miná miishɛɛ waa akɛ mikɛ lɛ tsu nii, ejaakɛ ehã minu he akɛ emuɔ efɔ̃ɔ minɔ ni sɛɛnamɔ yɛ mihe.”

KƐ́ WƆKƐ NYƐMIMƐI YEI YE TAMƆ WƆWEKUMƐI LƐ, MƐƐ SƐƐNAMƆI JƐƆ MLI KƐBAA?

Wɔsumɔɔ wɔnyɛmimɛi yei lɛ tamɔ bɔ ni Yehowa sumɔɔ amɛ lɛ. No hewɔ lɛ, wɔkɛ amɛ yeɔ tamɔ wɔ diɛŋtsɛ wɔwekumɛi. (1 Tim. 5:​1, 2) Wɔshwɛɛɛ amɛhe kwraa, ni eŋɔɔ wɔnaa akɛ wɔkɛ amɛ efee ekome kɛmiisɔmɔ Yehowa. Ni kɛ́ wɔna akɛ amɛnuɔ he akɛ wɔsumɔɔ amɛ ni wɔyeɔ wɔbuaa amɛ lɛ, ehãa wɔnáa miishɛɛ waa. Nyɛmi yoo ko ni atsɛɔ lɛ Vanessa lɛ wie akɛ: “Miida Yehowa shi waa akɛ ehã mibafata esafo lɛ he, ejaakɛ nyɛmimɛi hii ni yɔɔ mli lɛ woɔ mi hewalɛ waa.” Nyɛmi yoo ko ni yɔɔ Taiwan lɛ hu wie akɛ: “Eŋɔɔ minaa waa akɛ Yehowa kɛ esafo lɛ buɔ yei waa ni amɛsusuɔ bɔ ni wɔnuɔ he wɔhãa lɛ he. Enɛ hãa mihemɔkɛyeli lɛ mli waa, ni ehãa mihiɛ sɔɔ hegbɛ ni miná akɛ mifata Yehowa asafo lɛ he lɛ waa.”

Kɛ́ Yehowa na akɛ wɔnaa nyɛmimɛi yei tamɔ bɔ ni enaa amɛ lɛ, ni wɔkɛ amɛ yeɔ tamɔ bɔ ni ekɛ amɛ yeɔ lɛ, enáa miishɛɛ waa. (Abɛi 27:11) Asafoŋ onukpa ko ni atsɛɔ lɛ Benjamin ni yɔɔ Scotland lɛ wie akɛ: “Yɛ je lɛ mli lɛ, hii ebuuu yei amɛhãaa nɔ ko kwraa. No hewɔ lɛ, kɛ́ wɔkɛ nyɛmi yoo ko kpe yɛ Maŋtsɛyeli Asa lɛ nɔ lɛ, wɔmiisumɔ ni enu he akɛ wɔsumɔɔ lɛ ni wɔbuɔ lɛ waa.” No hewɔ lɛ, nyɛmimɛi hii, nyɛhãa wɔkasea Yehowa ni wɔhã wɔnyɛmimɛi yei lɛ anu he akɛ wɔsumɔɔ amɛ ni wɔbuɔ amɛ waa.—Rom. 12:10.