NIKASEMƆ 2
LALA 19 Nuŋtsɔ Lɛ Gbɛkɛ Niyeli Lɛ
Ani Osaa Ohe Kɛhã Gbi Ni He Hiaa Fe Fɛɛ Yɛ Afi Lɛ Mli Lɛ?
“Nyɛyaa nɔ nyɛfea enɛ kɛkaia mi.”—LUKA 22:19.
NƆ NI WƆBAAKASE
Wɔbaakwɛ nɔ hewɔ ni esoro Kaimɔ lɛ kwraa yɛ kpeei krokomɛi ni wɔyaa lɛ ahe, bɔ ni wɔbaafee wɔsaa wɔhe kɛhã Kaimɔ lɛ, kɛ bɔ ni wɔbaafee wɔye wɔbua mɛi krokomɛi ni amɛba.
1. Mɛni hewɔ Kaimɔ lɛ ji nifeemɔ ni he hiaa fe fɛɛ yɛ afi lɛ mli lɛ? (Luka 22:19, 20)
KRISTO gbele lɛ Kaimɔ lɛ ji nifeemɔ ni he hiaa fe fɛɛ yɛ afi lɛ mli kɛhã Yehowa tsuji. Mɛni hewɔ? Ejaakɛ enɛ pɛ ji nifeemɔ ni Yesu je gbɛ efã esɛɛnyiɛlɔi lɛ akɛ amɛfee. (Kanemɔ Luka 22:19, 20.) Yiŋtoi pii ahewɔ wɔkpaa Kaimɔ lɛ gbɛ waa lɛ. Hã wɔsusu ekomɛi ahe wɔkwɛ.
2. Mɛɛ yiŋtoi komɛi ahewɔ wɔkpaa Kaimɔ lɛ gbɛ waa lɛ?
2 Yiŋtoi ahewɔ ni wɔkpaa Kaimɔ lɛ gbɛ lɛ ekomɛi ji, eyeɔ ebuaa wɔ koni wɔjwɛŋ bɔ ni kpɔmɔnɔ lɛ jara wa waa lɛ nɔ, ni ekaiɔ wɔ gbɛi anɔ ni wɔbaanyɛ wɔtsɔ wɔtsɔɔ akɛ wɔhiɛ sɔɔ Yesu afɔleshaa lɛ. (2 Kor. 5:14, 15) Agbɛnɛ hu, ehãa wɔ hegbɛ koni “wɔwowoo wɔhe hewalɛ.” (Rom. 1:12) Kɛfata he lɛ, daa afi lɛ, wɔnyɛmimɛi pii ni ekpa asafoŋ kpeeibaa lɛ baa Kaimɔ lɛ. Amɛteŋ mɛi komɛi yɛ ni kɛ́ amɛba lɛ, bɔ ni ahereɔ amɛ hiɛmɛɛ lɛ hewɔ lɛ, amɛkuɔ amɛsɛɛ amɛbaa Yehowa ŋɔɔ. Agbɛnɛ hu, mɛi pii ni afɔ̃ɔ amɛ nine lɛ kpɛlɛɔ ni akɛ amɛ jeɔ Biblia lɛ kasemɔ shishi yɛ nɔ ni amɛnaa kɛ nɔ ni amɛnuɔ yɛ nifeemɔ lɛ shishi lɛ hewɔ. Enɛɛmɛi fɛɛ ahewɔ Kaimɔ lɛ kã wɔtsui nɔ waa lɛ!
3. Mɛɛ gbɛ nɔ Kaimɔ lɛ hãa wɔkɛ wɔnyɛmimɛi ni yɔɔ je lɛŋ fɛɛ lɛ feɔ ekome? (Kwɛmɔ mfoniri lɛ hu.)
3 Nɔ kroko hewɔ ni wɔkpaa Kaimɔ lɛ gbɛ waa ji, ehãa wɔkɛ wɔnyɛmimɛi ni yɔɔ jeŋ fɛɛ lɛ feɔ ekome. Nakai gbi lɛ, kɛ́ hulu lɛ bɔi shinyɔɔ lɛ, Yehowa Odasefoi ni yɔɔ jeŋ fɛɛ lɛ baabua amɛhe naa. Wɔ fɛɛ wɔbaabo wiemɔ ko ni hãa wɔnaa bɔ ni kpɔmɔnɔ lɛ he hiaa waa lɛ toi, wɔbaalá lalai enyɔ kɛjie Yehowa yi, akɛ blodo lɛ kɛ wain lɛ baahã wɔ ni wɔ hu wɔkɛbaahã mɔ ni tsa wɔnɔ lɛ, ni wɔ fɛɛ wɔkɛ tsui krɔŋŋ baakɛɛ “amen” yɛ sɔlemɔi ejwɛ ni abaasɔle lɛ eko fɛɛ eko naagbee. Nɛkɛ ji bɔ ni asafoi fɛɛ ni yɔɔ jeŋ fɛɛ lɛ baafee dani gbi lɛ baaba naagbee. Kɛ́ okwɛ lɛ, te Yehowa kɛ Yesu baanu he amɛhã tɛŋŋ kɛ́ amɛna bɔ ni wɔfee ekome yɛ jeŋ fɛɛ kɛmiiwo amɛhiɛ nyam lɛ? Amɛbaaná miishɛɛ waa!
Kaimɔ lɛ hãa wɔkɛ wɔnyɛmimɛi ni yɔɔ jeŋ fɛɛ lɛ feɔ ekome (Kwɛmɔ kuku 3) f
4. Mɛni he wɔbaasusu yɛ nikasemɔ nɛɛ mli?
4 Yɛ nikasemɔ nɛɛ mli lɛ, wɔbaasusu sanebimɔi ni nyiɛ sɛɛ nɛɛ ahe: Mɛni wɔbaanyɛ wɔfee kɛsaa wɔtsui kɛhã Kaimɔ lɛ? Mɛni wɔbaanyɛ wɔfee kɛwa mɛi krokomɛi koni amɛná he sɛɛ? Ni mɛni wɔbaanyɛ wɔfee kɛwa wɔnyɛmimɛi ni ekpa asafoŋ kpeeibaa lɛ? Sanebimɔi nɛɛ ahetoi lɛ baaye abua wɔ ni wɔsaa wɔhe jogbaŋŋ kɛhã nifeemɔ ni he hiaa waa nɛɛ.
MƐNI WƆBAANYƐ WƆFEE KƐSAA WƆTSUI KƐHÃ KAIMƆ LƐ?
5. (a) Mɛni hewɔ esa akɛ wɔjwɛŋ bɔ ni kpɔmɔnɔ lɛ jara wa waa lɛ he? (Lala 49:7, 8) (b) Mɛni okase yɛ vidio ni ji, Mɛni Hewɔ Yesu Gbo? lɛ mli?
5 Nɔ kome ni he hiaa waa ni wɔbaanyɛ wɔfee kɛsaa wɔtsui kɛhã Kaimɔ lɛ ji, ni wɔbaajwɛŋ bɔ ni Yesu Kristo kpɔmɔ afɔleshaa lɛ jara wa waa lɛ nɔ. Akɛ adesai ni yeee emuu lɛ, nɔ ko nɔ ko bɛ ni wɔbaanyɛ wɔfee kɛye wɔhe kɛje esha kɛ gbele dɛŋ. (Kanemɔ Lala 49:7, 8; kwɛmɔ vidio ni yitso ji Mɛni Hewɔ Yesu Gbo?) a No hewɔ lɛ, Yehowa to gbɛjianɔ koni Yesu kɛ ewala abashã afɔle kɛhere wɔ. (Rom. 6:23) Enɛ hã Yehowa kɛ Yesu tsɔ shihilɛ ni naa wa waa mli. Kɛ́ wɔtee nɔ wɔjwɛŋ nɔ ni Yehowa kɛ Yesu tsɔ mli yɛ wɔhewɔ lɛ nɔ lɛ, ebaahã wɔhiɛ asɔ kpɔmɔnɔ lɛ waa. Wɔbaasusu nibii ni Yehowa kɛ Yesu tsɔ mli dani amɛnyɛ amɛkɛ kpɔmɔnɔ lɛ hã lɛ fioo komɛi ahe. Shi dani wɔbaafee no lɛ, nyɛhãa wɔsusua nɔ ni kpɔmɔnɔ lɛ ji lɛ he klɛŋklɛŋ.
6. Mɛni ji kpɔmɔnɔ? Ni mɛni hewɔ wɔbaanyɛ wɔkɛɛ akɛ Yesu wala ni ekɛshã afɔle lɛ ji kpɔmɔnɔ lɛ?
6 Kpɔmɔnɔ ji nyɔmɔ ni awoɔ bɔ ni afee ni nine ashɛ nɔ ko ni eŋmɛɛ mɔ ko lɛ nɔ ekoŋŋ. Be ni Nyɔŋmɔ bɔ klɛŋklɛŋ gbɔmɔ, ni ji Adam lɛ, no mli lɛ eye emuu. Be ni efee esha lɛ, hegbɛ ni eyɔɔ akɛ lɛ kɛ ebii lɛ fɛɛ baanyɛ ahi shi kɛya naanɔ lɛ ŋmɛɛ amɛ. Akɛni Yesu eye emuu hewɔ lɛ, ekɛ ewala shã afɔle koni enine ashɛ nɔ ni Adam hã eŋmɛɛ ebii lɛ nɔ. Be ni Yesu bahi shikpɔŋ lɛ nɔ lɛ mli fɛɛ lɛ, “efeee esha ko, ni anaaa amale ko yɛ edaaŋ hu.” (1 Pet. 2:22) Enɛ hewɔ lɛ, Yesu gbo akɛ mɔ ko ni eye emuu, tamɔ bɔ ni Adam eye emuu dani efee esha lɛ. No hewɔ lɛ, ebaanyɛ ekɛ ewala ni eye emuu ni ekɛshã afɔle lɛ ahé nɔ ni Adam hã eŋmɛɛ ebii lɛ.—1 Kor. 15:45; 1 Tim. 2:6.
7. Mɛɛ shihilɛi komɛi Yesu kɛkpe ni kulɛ ebaanyɛ ehã egbo Yehowa nɔ toi?
7 Be ni Yesu yɔɔ shikpɔŋ lɛ nɔ lɛ, ebo Yehowa toi yɛ nɔ fɛɛ nɔ mli be ni nakai feemɔ wa hã lɛ po. Akɛ nɔkwɛmɔnɔ lɛ, be ni eji gbekɛ lɛ, etee nɔ ebo efɔlɔi ni yeee emuu lɛ toi, eyɛ mli akɛ lɛ lɛ, eye emuu. (Luka 2:51) Agbɛnɛ hu, be ni eji oblanyo fioo lɛ, eeenyɛ efee akɛ mɛi ka lɛ ni efee nibii ni Yehowa sumɔɔɔ loo egbo efɔlɔi anɔ toi, shi efeee nakai. Ni be ni Yesu batsɔ onukpa hu lɛ, Satan ka lɛ. Ekɛɛ lɛ ni ekwa Yehowa po, shi Yesu tee nɔ ebo Yehowa toi. (Mat. 4:1-11) Satan fee bɔ fɛɛ bɔ ni ebaanyɛ koni Yesu afee esha koni ekanyɛ ekɛ kpɔmɔnɔ lɛ hã.
8. Mɛɛ shihilɛi krokomɛi ni mli wawai Yesu kɛkpe?
8 Be ni Yesu tsuɔ esɔɔmɔ nitsumɔ lɛ, ekɛ shihilɛi krokomɛi ni mli wawai ni baanyɛ ahã efee nɔ ko ni Yehowa sumɔɔɔ lɛ kpe. Akɛ nɔkwɛmɔnɔ lɛ, ehenyɛlɔi wa lɛ yi ni amɛka akɛ amɛbaagbe lɛ. (Luka 4:28, 29; 13:31) Agbɛnɛ hu, Yesu kaselɔi lɛ fee lɛ nibii ni dɔ lɛ waa yɛ emuu ni amɛyeee lɛ hewɔ. (Mar. 9:33, 34) Be ni ayeɔ esane lɛ, awa lɛ yi, ni aye ehe fɛo. No sɛɛ lɛ, apiŋ lɛ waa, ni agbe lɛ tamɔ agbeɔ ojotswalɔ ko lɛ. (Heb. 12:1-3) Etsɔ piŋmɔ nɛɛ fɛɛ mli ni Yehowa yelikɛbuamɔ bɛ mli. b—Mat. 27:46.
9. Kɛ́ wɔsusu bɔ ni Yesu kɛ ewala shã afɔle ehã wɔ lɛ he lɛ, te no hãa wɔnuɔ he wɔhãa tɛŋŋ? (1 Petro 1:8)
9 Ŋwanejee ko bɛ he akɛ, Yesu tsɔ shihilɛ ni mli wa waa mli dani enyɛ ekɛ ewala shã afɔle ehã wɔ. Kɛ́ wɔsusu bɔ ni Yesu jɛ esuɔmɔ mli efee enɛ lɛ he lɛ, ehãa suɔmɔ ni wɔyɔɔ kɛhã lɛ lɛ mli waa waa, aloo jeee nakai?—Kanemɔ 1 Petro 1:8.
10. Mɛni mli Yehowa tsɔ bɔ ni afee ni Yesu anyɛ ekɛ ewala ashã afɔle ehã wɔ?
10 Ni Yehowa hu? Mɛni mli etsɔ bɔ ni afee ni Yesu anyɛ ekɛ ewala ashã afɔle ehã wɔ? Suɔmɔ ni Yehowa yɔɔ kɛhã e-Bi Yesu lɛ mli wa waa fe suɔmɔ ni tsɛ ko baanyɛ aná ehã ebi. (Abɛi 8:30) No hewɔ lɛ, kɛ́ okwɛ lɛ, te Yehowa nu he ehã tɛŋŋ be ni ena ni aapiŋ e-Bi lɛ lɛ ni aafee lɛ niseniianii lɛ? Ŋwanejee ko bɛ he akɛ edɔ lɛ waa.
11. Mɛni okɛbaatsɔɔ bɔ ni Yehowa nu he ehã be ni agbe Yesu lɛ mli?
11 Kɛ́ obi egbo dã lɛ, ole bɔ ni eyɔɔ dɔlɛ waa hã. Wɔheɔ wɔyeɔ waa akɛ, Yehowa baatee mɛi ni egboi lɛ ashi. Fɛɛ sɛɛ lɛ, kɛ́ mɔ ko ni wɔsumɔɔ esane waa gbo lɛ, edɔɔ wɔ waa. Enɛ hãa wɔnaa bɔ ni Yehowa nu he ehã yɛ afi 33 Ŋ.B. be ni e-Bi ni esumɔɔ esane waa lɛ piŋ kɛtee gbele mli lɛ. c—Mat. 3:17.
12. Mɛni wɔbaanyɛ wɔfee kɛjɛ bianɛ kɛyashi be ni abaaye Kaimɔ lɛ?
12 Kɛjɛ bianɛ aahu kɛyashi be ni abaaye Kaimɔ lɛ, bɔɔ mɔdɛŋ ni okase kpɔmɔnɔ lɛ he nii babaoo be ni ofeɔ aŋkro nikasemɔ loo be ni okɛ oweku lɛ feɔ Weku Jamɔ lɛ. Okɛ Niiamlitaomɔ Wolo Kɛhã Yehowa Odasefoi lɛ loo asafo lɛ woji krokomɛi atao nii amli koni ole nibii hei yɛ kpɔmɔnɔ lɛ he. d Agbɛnɛ hu, bɔɔ mɔdɛŋ ni okane Kaimɔ lɛ he Biblia kanemɔ ni yɔɔ Wɔshiɛmɔ Kɛ Wɔshihilɛ Akɛ Kristofoi—Kpee Nifeemɔ Wolo lɛ mli lɛ. Yɛ Kaimɔ gbi lɛ nɔ hu lɛ, bɔɔ mɔdɛŋ ni okwɛ Leebi Jamɔ krɛdɛɛ lɛ. Kɛ́ wɔsaa wɔtsui kɛhã Kaimɔ lɛ, no dani wɔbaanyɛ wɔye wɔbua mɛi krokomɛi ni amɛ hu amɛná he sɛɛ.—Ezr. 7:10.
YE OBUA MƐI KONI AMƐNÁ KAIMƆ LƐ HE SƐƐ
13. Mɛni ji klɛŋklɛŋ nɔ ni wɔbaanyɛ wɔfee kɛye wɔbua mɛi ni amɛná Kaimɔ lɛ he sɛɛ?
13 Mɛɛ gbɛ nɔ wɔbaanyɛ wɔye wɔbua mɛi koni amɛná Kaimɔ lɛ he sɛɛ? Klɛŋklɛŋ lɛ, wɔbaanyɛ wɔfɔ̃ amɛ nine kɛba Kaimɔ lɛ shishi. Yɛ mɛi ni wɔfɔ̃ɔ amɛ nine be ni wɔnyiɛ shiɛmɔ nɔ lɛ sɛɛ lɛ, wɔbaanyɛ wɔŋmala mɛi krokomɛi ni wɔbaasumɔ ni wɔfɔ̃ amɛ nine lɛ agbɛ́ii wɔshwie shi. Mɛi nɛɛ ateŋ mɛi komɛi baanyɛ afee wɔwekumɛi, mɛi ni wɔkɛtsuɔ nii, mɛi ni wɔkɛyaa skul, kɛ mɛi krokomɛi ni wɔle. Kɛ́ wɔbɛ ninefɔɔ woji lɛ pii po lɛ, wɔbaanyɛ wɔkɛ ehe link amaje amɛ. Namɔ aaale, ekolɛ amɛteŋ mɛi komɛi baaba!—Jaj. 11:6.
14. Gbaa niiashikpamɔ ko ni tsɔɔ akɛ kɛ́ wɔhã mɛi Kaimɔ lɛ he ninefɔɔ wolo lɛ, no baanyɛ atsirɛ amɛ ni amɛba.
14 Kɛ́ oje gbɛ ofɔ̃ mɔ ko nine kɛhã Kaimɔ lɛ, no baanyɛ atsirɛ lɛ ni eba. Be ko lɛ, nyɛmi yoo ko ni wu jeee Odasefonyo lɛ naa kpɛ ehe waa be ni ewu lɛ kɛɛ lɛ akɛ ekɛ lɛ baaya Kaimɔ lɛ. Mɛni hewɔ nyɛmi yoo lɛ naa kpɛ ehe lɛ? Nɔ hewɔ lɛ ji, efɔ̃ ewu lɛ nine kɛhã Kaimɔ lɛ shii abɔ, shi ebaaa. No hewɔ lɛ, mɛni ba ni agbɛnɛ lɛ ewu lɛ kɛɛ lɛ akɛ ekɛ lɛ baaya lɛ? Asafoŋ onukpa ko ni le nuu lɛ hã lɛ ninefɔɔ wolo lɛ eko. Nuu lɛ tee Kaimɔ lɛ nakai afi lɛ, ni ekpaaa yaa afii pii.
15. Kɛ́ wɔmiifɔ̃ mɛi nine kɛhã Kaimɔ lɛ, mɛni ji nɔ kome ni esa akɛ wɔhã ehi wɔjwɛŋmɔ mli?
15 Esa akɛ wɔhã ehi wɔjwɛŋmɔ mli akɛ, ekolɛ mɛi ni wɔbaafɔ̃ amɛ nine lɛ baabi wɔ saji pii, titri lɛ, kɛ́ amɛyako Yehowa Odasefoi akpee ko shishi pɛŋ. Wɔbaanyɛ wɔtsɔ hiɛ wɔsusu saji ni ekolɛ amɛbaabi lɛ ahe, ni wɔkwɛ bɔ ni wɔbaahã hetoo wɔhã. (Kol. 4:6) Akɛ nɔkwɛmɔnɔ lɛ, ekolɛ amɛteŋ mɛi komɛi baabi akɛ: ‘Te nifeemɔ lɛ baaya lɛ ehã tɛŋŋ?’ ‘Be enyiɛ ebaaye?’ ‘Mɛɛ atade manyɛ mawo kɛba?’ ‘Ani abaahe shika dani mabote mli?’ ‘Ani abaahe kɔlɛshiŋ?’ Kɛ́ wɔmiifɔ̃ mɔ ko nine kɛhã Kaimɔ lɛ, wɔbaanyɛ wɔbi lɛ tɛ̃ɛ akɛ, “Ani oyɛ sanebimɔ ko?” ni no sɛɛ lɛ, wɔhã saji ni ebaabi lɛ hetoo. Wɔbaanyɛ wɔjie vidio ni ji, Nyɛkaia Yesu Gbele Lɛ kɛ Mɛni Yaa Nɔ Yɛ Maŋtsɛyeli Asa Lɛ Nɔ? lɛ wɔhã mɔ lɛ koni ena bɔ ni ato wɔkpeei lɛ ahe gbɛjianɔ ahã. Agbɛnɛ hu, otii pii yɛ Oyi Aná Wala Kɛya Naanɔ! wolo lɛ nikasemɔ 28 lɛ mli ni wɔbaanyɛ wɔkɛ lɛ asusu he.
16. Mɛɛ saji krokomɛi ekolɛ mɛi ni baaba Kaimɔ lɛ baabi?
16 Kɛ́ mɛi ni wɔfɔ̃ amɛ nine kɛhã Kaimɔ lɛ ba lɛ, ekolɛ amɛbaabi saji krokomɛi yɛ nifeemɔ lɛ he. Kɛ́ mɔ ko mɔ ko yeee okadi nibii lɛ eko, loo mɛi fioo pɛ ni ye lɛ, ekolɛ amɛbaabi akɛ, ‘Mɛni hewɔ ni nyɛ fɛɛ nyɛyeee blodo lɛ ni nyɛnuuu wain lɛ eko lɛ?’ Ekolɛ amɛbaabi hu akɛ, ‘Shii enyiɛ nyɛyeɔ Kaimɔ lɛ?’ ‘Ani nɛkɛ ato nyɛkpeei lɛ fɛɛ ahe gbɛjianɔ?’ Eyɛ mli akɛ abaahã sanebimɔi nɛɛ pii ahetoo be ni ahãa Kaimɔ lɛ he wiemɔ lɛ moŋ, shi ekolɛ nibii krokomɛi yɛ ni kɔɔ he ni ehe baahia ni wɔgbála mli wɔtsɔɔ mɛi hei nɛɛ. Sane ni ji, “Mɛni Hewɔ Esoro Bɔ Ni Yehowa Odasefoi Feɔ Nuŋtsɔ Lɛ Gbɛkɛ Niyeli Lɛ Kaimɔ Lɛ Yɛ Jamɔi Krokomɛi Lɛ Anɔ He Lɛ?” ni yɔɔ jw.org lɛ nɔ lɛ, baanyɛ aye abua wɔ ni wɔhã amɛsanebimɔi lɛ ekomɛi ahetoo. Dani abaaye Kaimɔ lɛ, be ni ayeɔ Kaimɔ lɛ, kɛ be ni aye Kaimɔ lɛ agbe naa lɛ, esa akɛ wɔfee bɔ fɛɛ bɔ ni wɔbaanyɛ kɛye wɔbua mɛi ni hiɛ tsui kpakpa lɛ koni amɛná nifeemɔ lɛ he sɛɛ.—Bɔf. 13:48.
YE OBUA MƐI NI EKPA ASAFOŊ KPEEIBAA LƐ
17. Mɛɛ gbɛ nɔ asafoŋ onukpai baanyɛ aye abua nyɛmimɛi ni ekpa asafoŋ kpeeibaa lɛ? (Ezekiel 34:12, 16)
17 Asafoŋ onukpai, otsii fioo dani abaaye Kaimɔ lɛ, mɛni nyɛbaanyɛ nyɛfee kɛye nyɛbua mɛi ni ekpa asafoŋ kpeeibaa lɛ? Nyɛhãa amɛnaa akɛ nyɛsusuɔ amɛhe. (Kanemɔ Ezekiel 34:12, 16.) Kɛ́ ebaahi lɛ, dani Kaimɔ be lɛ baashɛ lɛ, nyɛbia mɛi fɛɛ ni ekpa asafoŋ kpeeibaa lɛ ashi. Nyɛhãa amɛlea akɛ amɛsane kã nyɛtsui nɔ ni nyɛmiisumɔ ni nyɛye nyɛbua amɛ yɛ gbɛ fɛɛ gbɛ ni nyɛbaanyɛ nɔ. Nyɛfɔ̃a amɛ nine kɛbaa Kaimɔ lɛ shishi, ni kɛ́ amɛba lɛ, nyɛherea amɛ hiɛmɛɛ. Kɛ́ agbe Kaimɔ lɛ naa lɛ, nyɛyaa nɔ nyɛbia nyɛmimɛi nɛɛ ni jara wa waa kɛhã Yehowa lɛ ashi ni nyɛyea nyɛbuaa amɛ yɛ gbɛ fɛɛ gbɛ ni nyɛbaanyɛ nɔ koni amɛku amɛsɛɛ kɛba Yehowa ŋɔɔ.—1 Pet. 2:25.
18. Mɛni wɔ fɛɛ wɔbaanyɛ wɔfee kɛye wɔbua mɛi ni ekpa asafoŋ kpeeibaa lɛ? (Romabii 12:10)
18 Wɔ fɛɛ wɔbaanyɛ wɔye wɔbua nyɛmimɛi ni ekpa asafoŋ kpeeibaa ni baaba Kaimɔ lɛ. Yɛ mɛɛ gbɛ nɔ? Wɔbaanyɛ wɔhã amɛna akɛ wɔsumɔɔ amɛ, wɔsusuɔ amɛhe, ni wɔbuɔ amɛ. (Kanemɔ Romabii 12:10.) Kaimɔ akɛ, ekolɛ nyɛmimɛi nɛɛ náaa lɛ mlɛo akɛ amɛbaaba Maŋtsɛyeli Asa lɛ nɔ. Ekolɛ amɛsusu akɛ akɛni amɛba asafoŋ kpeei etsɛ hewɔ lɛ, ahereŋ amɛ hiɛmɛɛ. e No hewɔ lɛ, kaabi amɛ saji ni baawo amɛ hiɛgbele, ni kaawie nibii ni baagba amɛnaa hu. (1 Tes. 5:11) Wɔnyɛmimɛi ji amɛ, ni eŋɔɔ wɔnaa waa akɛ amɛbafata wɔhe ekoŋŋ koni wɔjá Yehowa!—Lala 119:176; Bɔf. 20:35.
19. Mɛɛ gbɛ nɔ wɔ kɛ mɛi krokomɛi fɛɛ náa Yesu gbele lɛ Kaimɔ lɛ he sɛɛ?
19 Ani onaaa akɛ ehi waa akɛ Yesu to gbɛjianɔ ni wɔkai egbele lɛ daa afi? Kɛ́ wɔtee Kaimɔ lɛ, wɔnáa he sɛɛ, ni mɛi krokomɛi hu náa he sɛɛ. (Yes. 48:17, 18) Sɛɛnamɔi lɛ ekomɛi ji, suɔmɔ ni wɔyɔɔ kɛhã Yehowa kɛ Yesu lɛ mli waa. Wɔnáa hegbɛ wɔtsɔɔ akɛ wɔhiɛ sɔɔ nɔ ni amɛfee amɛhã wɔ lɛ waa. Suɔmɔ ni yɔɔ wɔ kɛ wɔnyɛmimɛi lɛ ateŋ lɛ mli waa, ni wɔnáa hegbɛ wɔyeɔ wɔbuaa mɛi koni amɛle jɔɔmɔi ni amɛbaanyɛ amɛná yɛ kpɔmɔnɔ lɛ hewɔ. No hewɔ lɛ, nyɛhãa wɔfea bɔ fɛɛ bɔ ni wɔbaanyɛ kɛsaa wɔhe kɛhã afi nɛɛ Kaimɔ lɛ, ni ji gbi ni he hiaa fe fɛɛ yɛ afi lɛ mli lɛ!
MƐNI WƆBAANYƐ WƆFEE . . .
-
kɛsaa wɔtsui kɛhã Kaimɔ lɛ?
-
kɛye wɔbua mɛi ni amɛná Kaimɔ lɛ he sɛɛ?
-
kɛye wɔbua mɛi ni ekpa asafoŋ kpeeibaa lɛ?
LALA 18 Wɔhiɛ Sɔɔ Kpɔmɔnɔ Lɛ Waa
a Kɛ́ ootao ona saji kɛ vidioi ni atsɛ yisɛɛ yɛ nikasemɔ nɛɛ mli lɛ yɛ jw.org lɛ nɔ lɛ, tswaa amɛsaneyitsei lɛ owo akrabatsa ni akɛtaoɔ nii lɛ mli.
b Kwɛmɔ “Sanebimɔi Ni Jɛ Kanelɔi Adɛŋ” ni je kpo yɛ April 2021 Buu-Mɔɔ lɛ mli lɛ.
d Kwɛmɔ akrabatsa ni yitso ji, “ Saji Ni Obaanyɛ Otao Mli.”
e Kwɛmɔ mfonirii lɛ kɛ akrabatsa ni yitso ji, “ Te Asafoŋbii Lɛ Fee Amɛnii Amɛhã Tɛŋŋ?” lɛ. Ewa kɛhã nyɛmi nuu ko ni ekpa asafoŋ kpeeibaa lɛ akɛ ebaaya Maŋtsɛyeli Asa lɛ nɔ, shi emia ehiɛ etee. Nyɛmimɛi lɛ ehere lɛ hiɛmɛɛ, ni amɛkɛ lɛ miigba sane.
f NƆ NI WƆNAA YƐ MFONIRI LƐ MLI: Be ni Yehowa webii ni yɔɔ je lɛ fã kome miiye Kaimɔ lɛ, amɛnyɛmimɛi ni yɔɔ je lɛ fãi krokomɛi lɛ miisaa amɛhe kɛmiihã nifeemɔ krɛdɛɛ nɛɛ.
