1-2. Mɛɛ naagbai Yehowa tsuji anɔkwafoi baanyɛ amɛkɛkpe?

 SANE wulu ko baanyɛ anina wɔ ni baahã wɔshihilɛ atsake trukaa. Akɛ nɔkwɛmɔnɔ lɛ, nyɛmi nuu ko ni atsɛɔ lɛ Luis a lɛ tee helatsamɔhe, ni datrɛfonyo lɛ kɛɛ lɛ akɛ ená kansa ko, ni yɛ nyɔji fioo mli lɛ ebaagbo. Nyɛmi yoo ko ni atsɛɔ lɛ Monika lɛ hu kɛ ewu ni eji asafoŋ onukpa lɛ miisɔmɔ Yehowa kɛ ekãa. Kɛkɛ ni gbi ko lɛ, ená ele akɛ ewu lɛ miifee nibii gbohii yɛ dujiaŋshi, ni efee nakai afii pii. Yɛ nyɛmi yoo oshijafo ko ni atsɛɔ lɛ Olivia lɛ gbɛfaŋ lɛ, ehe bahia ni ejo foi kɛshi shĩa, ejaakɛ no mli lɛ, kɔɔyɔɔ wulu ko miiba. Be ni eku esɛɛ eba lɛ, ena akɛ kɔɔyɔɔ wulu lɛ efite eshĩa lɛ kwraa. Nyɛmimɛi nɛɛ fɛɛ ashihilɛ tsake kwraa yɛ be kukuoo mli. Ani nɔ ko nakai enina bo pɛŋ? Ani sane ko enina bo trukaa ni ehã oshihilɛ etsake kwraa?

² Eyɛ mli akɛ Yehowa tsuji anɔkwafoi ji wɔ moŋ, shi wɔkɛ shihilɛi ni mli wawai kpeɔ, ni hela mɔɔ wɔ, tamɔ bɔ ni eji yɛ adesai fɛɛ agbɛfaŋ lɛ nɔŋŋ. Agbɛnɛ hu, mɛi ni sumɔɔɔ Yehowa webii lɛ teɔ shi amɛwoɔ wɔ loo amɛwaa wɔ yi. Yehowa etsĩii nibii ni tamɔ nɛkɛ lɛ anaa, shi ewo wɔ shi akɛ ebaaye ebua wɔ. (Yes. 41:10) Yɛ eyelikɛbuamɔ naa lɛ, wɔbaanyɛ wɔya nɔ wɔsɔmɔ lɛ kɛ miishɛɛ, wɔkpɛ yiŋ kpakpai, ni wɔye lɛ anɔkwa yɛ shihilɛi ni mli wawai po amli. Yɛ nikasemɔ nɛɛ mli lɛ, wɔbaasusu nibii ejwɛ ni Yehowa feɔ kɛyeɔ ebuaa wɔ kɛ́ wɔkɛ shihilɛi ni mli wawai kpe lɛ ahe. Agbɛnɛ hu, wɔbaakwɛ nibii ni esa ni wɔfee koni wɔná eyelikɛbuamɔ lɛ he sɛɛ.

 YEHOWA BAABU OHE

3. Kɛ́ sane wulu ko nina wɔ lɛ, mɛni ebaanyɛ ewa kɛhã wɔ akɛ wɔbaafee?

³ Nɔ ni ji naagba lɛ. Kɛ́ sane wulu ko nina wɔ lɛ, no baanyɛ ahã ewa kɛhã wɔ akɛ wɔbaasusu nii ahe jogbaŋŋ ni wɔkpɛ yiŋ kpakpai. Mɛni hewɔ? Bei pii lɛ, kɛ́ eba lɛ nakai lɛ, wɔtsui kumɔɔ waa ni wɔhaoɔ aahu akɛ, wɔjwɛŋmɔ fɛɛ gbɛɔ. Efeɔ tamɔ nɔ ni wɔnyiɛ duŋ mli ni wɔnaaa he ni wɔkɛ wɔnane maa. Nɛkɛ ji bɔ ni nyɛmimɛi yei enyɔ lɛ ni wɔwie amɛhe kɛtsɔ hiɛ lɛ nu he amɛhã. Olivia kɛɛ: “Be ni kɔɔyɔɔ wulu lɛ fite mishĩa lɛ, mihao aahu akɛ, mileee nɔ ni mafee po.” Monika ni ewu je esɛɛ lɛ hu wie akɛ: “Nɔ ni efee lɛ dɔ mi waa. Efee tamɔ nɔ ni akɛ kakla etsu mitsui mli. Mifee basaa aahu akɛ, kɛ́ mite shi leebi po lɛ, mileee bɔ ni mifeɔ mihe. Mibɔleee kwraa akɛ ebaanyɛ efee nɔ ko nɛkɛ.” Mɛni Yehowa ewo shi akɛ ebaafee kɛwa wɔ kɛ́ shihilɛ ko hã wɔhao waa?

4. Mɛɛ shi Yehowa ewo wɔ? (Filipibii 4:​6, 7)

⁴ Nɔ ni Yehowa feɔ. Yehowa ewo shi akɛ, ebaahã wɔná nɔ ni Biblia lɛ tsɛɔ lɛ, “Nyɔŋmɔ toiŋjɔlɛ” lɛ. (Kanemɔ Filipibii 4:​6, 7.) Wekukpaa kpakpa ni yɔɔ wɔ kɛ Yehowa teŋ lɛ hewɔ lɛ, wɔyeee wɔtsui ni wɔjwɛŋŋ pii. Enɛ ji nɔ ni Biblia lɛ tsɛɔ lɛ, “Nyɔŋmɔ toiŋjɔlɛ” lɛ. Toiŋjɔlɛ nɛɛ “fe niiashishinumɔi fɛɛ,” ni tsɔɔ akɛ, wɔnyɛŋ wɔnu shishi. Aleenɔ, ani osɔle waa ohã Yehowa pɛŋ ni be ni ogbe naa lɛ, onu he akɛ ohe ejɔ bo waa tamɔ nɔ ni awo jatsu ko yɛ onɔ? Bɔ ni onu he ohã lɛ ji “Nyɔŋmɔ toiŋjɔlɛ” lɛ.

5. Mɛɛ gbɛ nɔ Nyɔŋmɔ toiŋjɔlɛ lɛ buɔ wɔjwɛŋmɔi kɛ wɔtsuii ahe?

⁵ Nakai ŋmalɛ lɛ nɔŋŋ tsa nɔ akɛ Nyɔŋmɔ toiŋjɔlɛ lɛ ‘baabu wɔtsuii kɛ wɔjwɛŋmɔi ahe.’ Greek wiemɔ ni atsɔɔ shishi akɛ ‘bu’ yɛ ŋmalɛ nɛɛ mli lɛ ji wiemɔ ni akɛtsuɔ nii kɛ́ aawie asraafoi ni miibu maŋ ko he lɛ ahe. Mɛi ni yɔɔ maŋ lɛ mli lɛ nyɛɔ amɛwɔɔ ni amɛsheee gbeyei, ejaakɛ amɛle akɛ asraafoi lɛ miibu maŋ lɛ he. Nakai nɔŋŋ Nyɔŋmɔ toiŋjɔlɛ lɛ buɔ wɔtsuii kɛ wɔjwɛŋmɔi ahe ni wɔtsui yeee, ejaakɛ wɔle akɛ efɔŋ ko ninaŋ wɔ. (Lala 4:8) Tamɔ bɔ ni eba lɛ yɛ Hana gbɛfaŋ lɛ, kɛ́ wɔshihilɛ lɛ tsakeee amrɔ nɔŋŋ po lɛ, wɔyeŋ wɔtsui. (1 Sam. 1:​16-18) Ni kɛ́ wɔyeee wɔtsui lɛ, ewaaa akɛ wɔbaasusu nii ahe jogbaŋŋ ni wɔkpɛ yiŋ kpakpai.

6. Mɛni wɔbaanyɛ wɔfee koni wɔná Nyɔŋmɔ toiŋjɔlɛ lɛ? (Kwɛmɔ mfoniri lɛ hu.)

⁶ Nɔ ni esa akɛ wɔfee. Kɛ́ wɔhao lɛ, esa akɛ wɔbo wɔtsɛ mfonirifeemɔŋ bulɔ lɛ. Yɛ mɛɛ gbɛ nɔ? Esa akɛ wɔsɔle aahu kɛyashi wɔbaanu he akɛ wɔná Nyɔŋmɔ toiŋjɔlɛ lɛ. (Luka 11:9; 1 Tes. 5:17) Mɛni ye ebua Luis, mɔ ni wɔtsĩ etã kɛtsɔ hiɛ lɛ, kɛ eŋa Ana be ni amɛná amɛle akɛ Luis baagbo yɛ nyɔji fioo pɛ mli lɛ? Luis wie akɛ: “Yɛ shihilɛ ni tamɔ nɛkɛ mli lɛ, ewa waa  akɛ obaakpɛ yiŋ kpakpai yɛ bɔ ni obaasumɔ ni datrɛfoi akwɛ bo ahã kɛ saji krokomɛi ahe. Shi sɔlemɔ eye ebua wɔ waa ni wɔhaooo tsɔ.” Luis kɛ eŋa lɛ kɛɛ amɛsɔle waa shii abɔ ni Yehowa aye abua amɛ ni amɛkajwɛŋ pii, amɛkaye amɛtsui, ni agbɛnɛ hu, amɛnyɛ amɛkpɛ yiŋ kpakpai. Lɛɛlɛŋ, Yehowa ye ebua amɛ hu. Kɛ́ bo hu okɛ shihilɛ ko ni mli wa miikpe lɛ, yaa nɔ osɔle, ni Yehowa toiŋjɔlɛ lɛ baabu otsui kɛ ojwɛŋmɔ he.—Rom. 12:12.

YEHOWA BAAYE EBUA BO NI OKAJE OŊƐLƐ NƆ

7. Bei komɛi kɛ́ wɔkɛ shihilɛ ni mli wa kpe lɛ, te wɔnuɔ he wɔhãa tɛŋŋ?

⁷ Nɔ ni ji naagba lɛ. Kɛ́ wɔkɛ shihilɛ ni mli wa kpe lɛ, bei komɛi lɛ, ehosoɔ wɔ ni ehãa wɔjeɔ wɔŋɛlɛ nɔ tamɔ lɛlɛ ko ni ma ŋshɔ hiɛ ni kɔɔyɔɔ miitswa lɛ kɛmiiya kɛmiiba. Ana ni wɔtsĩ etã kɛtsɔ hiɛ lɛ wie akɛ be ni Luis gbo lɛ, nɛkɛ ji bɔ ni enu he. Ewie akɛ: “Bei komɛi lɛ, mifeɔ shwɛm ni minii feɔ mihe mɔbɔ. Bei komɛi hu lɛ, kɛ́ mikai akɛ egbo lɛ, mimli fuɔ mihe waa.” Agbɛnɛ hu, Ana nu he akɛ ehe efee shoo, ni kɛ́ ebi ni ekpɛ yiŋ yɛ nibii ni kulɛ Luis tsuɔ he nii lɛ ahe lɛ, efeɔ lɛ ahuntoo. Bei komɛi lɛ, enuɔ he tamɔ lɛlɛ ni ma ŋshɔ hiɛ ni kɔɔyɔɔ miitswa lɛ kɛmiiya kɛmiiba. Kɛ́ wɔnu he akɛ wɔmiihe wɔje wɔŋɛlɛ nɔ lɛ, mɛɛ gbɛ nɔ Yehowa yeɔ ebuaa wɔ?

8. Yɛ nɔ ni aŋma yɛ 1 Petro 5:10 lɛ naa lɛ, mɛni Yehowa ewo shi akɛ ebaafee ehã wɔ?

⁸ Nɔ ni Yehowa feɔ. Yehowa ewo wɔ shi akɛ, kɛ́ shihilɛ lɛ hoso wɔ po lɛ, ebaaye ebua wɔ ni wɔnyɛ wɔdamɔ hosomɔ lɛ naa koni wɔkaje wɔŋɛlɛ nɔ. (Kanemɔ 1 Petro 5:10.) Kɛ́ meele ko nyiɛ ŋshɔ hiɛ ni kɔɔyɔɔ ni naa wa waa ko bɔi tswaa lɛ, ebaanyɛ etswa lɛ kɛya kɛba. Enɛ hewɔ lɛ, meelei pii yɛ nɔ ko tɛtrɛɛ yɛ amɛshishigbɛ biɛ kɛ biɛ ni akpã mli tamɔ loofɔlɔ fiji. Nibii nɛɛ jɔɔ bɔ ni kulɛ kɔɔyɔɔ lɛ tswaa meele lɛ kɛyaa kɛbaa lɛ he, ni mɛi ni yɔɔ meele lɛ mli lɛ feɔ shweshweeshwe, ejaakɛ ehosooo tamɔ tsutsu lɛ. Shi nibii nɛɛ pii yɛ ni ja meele lɛ miiya ehiɛ dani enyɛɔ etsuɔ nii jogbaŋŋ. Nakai nɔŋŋ kɛ́ shihilɛ ko hoso wɔ shi wɔtee nɔ wɔsɔmɔ Yehowa lɛ, ebaaye ebua wɔ ni wɔkaje wɔŋɛlɛ nɔ.

9. Mɛɛ gbɛ nɔ niiamlitaomɔ dɛŋdadei ni asafo lɛ efee lɛ baanyɛ aye abua wɔ ni wɔkaje wɔŋɛlɛ nɔ kɛ́ wɔkɛ shihilɛ ni mli wa miikpe? (Kwɛmɔ mfoniri lɛ hu.)

⁹ Nɔ ni esa akɛ wɔfee. Kɛ́ naagbai hoso bo tamɔ ahum lɛ, miamɔ ohiɛ ni oya nɔ osɔle, oya asafoŋ kpeei, ni oshiɛ. Lɛɛlɛŋ, ekolɛ onyɛŋ ofee babaoo tamɔ tsutsu lɛ, shi hã ehi ojwɛŋmɔ mli akɛ Yehowa nuɔ bo shishi. (Okɛto Luka 21:​1-4 lɛ he.) Agbɛnɛ hu, too be kɛhã aŋkro nikasemɔ kɛ sanenɔjwɛŋmɔ. Mɛni hewɔ? Yehowa etsɔ esafo lɛ nɔ ehã wɔ nibii kpakpai pii ni nɔ bɛ ni baanyɛ aye  abua wɔ ni wɔkaje wɔŋɛlɛ nɔ kɛ́ shihilɛ ko hoso wɔ. Obaanyɛ okɛ niiamlitaomɔ dɛŋdadei tamɔ JW Library^® lɛ, Watch Tower Publications Index lɛ, kɛ Niiamlitaomɔ Wolo Kɛhã Yehowa Odasefoi lɛ atao nii amli koni ona saji ni baanyɛ aye abua bo. Monika ni wɔtsĩ etã kɛtsɔ hiɛ lɛ wie akɛ, be fɛɛ be ni ebaanu he akɛ enaagbai lɛ miihe asu etsui fe nine lɛ, etaoɔ nii amli yɛ asafo lɛ woji lɛ amli amrɔ nɔŋŋ. Akɛ nɔkwɛmɔnɔ lɛ, bei komɛi lɛ etaoɔ saji ni kɔɔ wiemɔ ni ji “mlifu” lɛ he. Bei komɛi hu lɛ, etaoɔ saji ni kɔɔ “sɛɛgbɛtsɔɔmɔ” loo “anɔkwayeli” he. Ekaneɔ saji ni ebaana lɛ aahu kɛyashi ebaanu he akɛ etsui enyɔ emli fioo. Ewie akɛ: “Be ni mibɔi niiamlitaomɔ lɛ, no mli lɛ mitsui miiye waa. Shi be ni miyaa nɔ mikaneɔ saji ni minaa lɛ, minu he tamɔ nɔ ni Yehowa efua mi waa. Mibana akɛ, Yehowa le bɔ ni minuɔ he mihãa lɛ ni eeye eebua mi.” Bo hu Yehowa baanyɛ etsɔ nakai gbɛ nɔŋŋ nɔ eye ebua bo ni okaje oŋɛlɛ nɔ kɛyashi be ni obaana nibii anaa.—Lala 119:​143, 144.

YEHOWA BAAHIƐ OMLI

10. Kɛ́ sane wulu ko nina wɔ lɛ, ekolɛ te wɔbaanu he tɛŋŋ?

¹⁰ Nɔ ni ji naagba lɛ. Kɛ́ sane wulu ko nina wɔ lɛ, bei komɛi lɛ wɔgbɔjɔɔ ni wɔnuɔ he akɛ wɔnyɛɛɛ nɔ ko wɔfee. Ekolɛ wɔbaanu he tamɔ foidalɔ ko ni joɔ foi waa, shi bianɛ lɛ eetsutsɔ ejaakɛ epila. Ekolɛ ebaawa kɛhã wɔ akɛ wɔbaafee nibii komɛi ni kulɛ efeemɔ yɔɔ mlɛo kɛhã wɔ lɛ. Aloo ekolɛ nibii komɛi ni wɔsumɔɔ feemɔ lɛ afeemɔ baaje wɔtsine. Tamɔ bɔ ni Elia nu he lɛ, ekolɛ wɔ hu wɔbaanu he akɛ wɔkã shi wɔwɔ kɛkɛ. (1 Maŋ. 19:​5-7) Mɛni Yehowa ewo shi akɛ ebaafee ehã wɔ kɛ́ wɔyaje shihilɛ ni tamɔ nɛkɛ mli?

11. Mɛni ji nɔ kroko ni Yehowa feɔ kɛyeɔ ebuaa wɔ? (Lala 94:18)

¹¹ Nɔ ni Yehowa feɔ. Yehowa ewo shi akɛ ebaahiɛ wɔmli. (Kanemɔ Lala 94:18.) Bɔ ni kɛ́ foidalɔ ko pila lɛ, ehe bahiaa ni ahiɛ emli dani enyɛ enyiɛ lɛ, wɔ hu ekolɛ ehe baahia ni aye abua wɔ koni wɔnyɛ wɔya nɔ wɔsɔmɔ Yehowa jogbaŋŋ. Naa nɔ ni Yehowa ewo shi akɛ ebaafee ehã wɔ kɛ́ wɔyaje shihilɛ ni tamɔ nakai mli. Ekɛɛ: “Mi, Yehowa, o-Nyɔŋmɔ lɛ, mihiɛ oninejurɔ mli, mi mɔ ni kɛɔ bo akɛ, ‘Kaashe gbeyei. Maye mabua bo’ lɛ.” (Yes. 41:13) Yehowa ye ebua Maŋtsɛ David yɛ gbɛ ni tamɔ nakai nɔ. Be ni David kɛ shihilɛi ni mli wawai kpe ni ehenyɛlɔi lɛ ka akɛ amɛbaagbe lɛ lɛ, ekɛɛ Yehowa akɛ: “Onine jurɔ hiɛ mimli.” (Lala 18:35) Shi mɛɛ gbɛ nɔ Yehowa yeɔ ebuaa wɔ?

12. Kɛ́ wɔhao lɛ, namɛi anɔ Yehowa baanyɛ etsɔ eye ebua wɔ?

 ¹² Bei pii lɛ, gbɛ ni Yehowa tsɔɔ nɔ eyeɔ ebuaa wɔ ji, etsirɛɔ mɛi koni amɛye amɛbua wɔ. Akɛ nɔkwɛmɔnɔ lɛ, be ko be ni David nijiaŋ je wui lɛ, enaanyo Yonatan shɛje emii ni ewo lɛ hewalɛ. (1 Sam. 23:​16, 17) Nakai nɔŋŋ Yehowa hã Elisha ye ebua Elia. (1 Maŋ. 19:​16, 21; 2 Maŋ. 2:2) Ŋmɛnɛ lɛ, Yehowa baanyɛ etsɔ wɔwekumɛi, wɔnanemɛi, loo asafoŋ onukpai lɛ anɔ eye ebua wɔ. Shi bei komɛi kɛ́ wɔhao waa lɛ, wɔsumɔɔɔ ni wɔbɛŋkɛɔ mɛi, ni kɛ́ mɛi miitao amɛye amɛbua wɔ po lɛ, wɔŋmɛɛɛ amɛ gbɛ. Enɛ lɛ, adesai asu ni. Shi kɛ́ wɔmiitao Yehowa aye abua wɔ lɛ, mɛni esa akɛ wɔfee?

13. Kɛ́ wɔmiitao ni Yehowa aye abua wɔ lɛ, mɛni esa akɛ wɔfee? (Kwɛmɔ mfoniri lɛ hu.)

¹³ Nɔ ni esa akɛ wɔfee. Miamɔ ohiɛ waa ni okatse ohe kɛje mɛi ahe. Kɛ́ wɔtse wɔhe lɛ, bei pii lɛ ehãa wɔsusuɔ wɔ kɛ wɔnaagbai lɛ pɛ ahe ni wɔnyɛɛɛ wɔsusu nibii krokomɛi ahe. Enɛ baanyɛ ahã wɔkpɛ yiŋ komɛi ni ejaaa. (Abɛi 18:1) Wɔ fɛɛ wɔsumɔɔ ni wɔná be ni wɔkɛsusu wɔnaagbai lɛ ahe, titri lɛ, kɛ́ wɔkɛ naagba wulu ko kpe, ni enɛ jeee tɔmɔ. Shi kɛ́ wɔtse wɔhe kɛje mɛi ahe be kplaŋŋ lɛ, belɛ wɔmiitsi wɔhe kɛmiije mɛi ni Yehowa baanyɛ etsɔ amɛnɔ eye ebua wɔ lɛ ahe. No hewɔ lɛ, eyɛ mli akɛ kɛ́ wɔhao lɛ ekolɛ wɔnuŋ he akɛ wɔbɛŋkɛ mɛi moŋ, shi esa akɛ wɔŋmɛ gbɛ ni wɔwekumɛi, wɔnanemɛi, kɛ asafoŋ onukpai lɛ aye abua wɔ. Esa akɛ wɔhã ehi wɔjwɛŋmɔŋ akɛ, Yehowa miitsɔ amɛnɔ eeye eebua wɔ.—Abɛi 17:17; Yes. 32:​1, 2.

YEHOWA BAASHƐJE OMII

14. Mɛɛ shihilɛi baanyɛ ahã wɔshe gbeyei?

¹⁴ Nɔ ni ji naagba lɛ. Bei komɛi lɛ, naagbai ni wɔkɛkpeɔ lɛ hãa wɔtsui fãa. Nyɔŋmɔ tsuji anɔkwafoi komɛi ni awie amɛhe yɛ Biblia lɛ mli lɛ hao loo amɛtsui fã yɛ amɛhenyɛlɔi loo naagbai ni amɛkɛkpe lɛ ahewɔ. (Lala 18:4; 55:​1, 5) Nakai nɔŋŋ ekolɛ ni wɔwieɔ nɛɛ, mɛi ni wɔkɛyaa skul, mɛi ni wɔkɛtsuɔ nii, wɔwekumɛi, loo amralofoi lɛ miite shi amɛmiiwo wɔ. Aloo ekolɛ ahã wɔle akɛ hela ni wɔyeɔ lɛ kɛ wɔ baaya gbele mli. Bei komɛi lɛ, kɛ́ wɔyaje shihilɛ ni tamɔ nɛkɛ mli lɛ, wɔnuɔ he tamɔ gbekɛ bibioo ni nyɛɛɛ ehe nɔ ko efee. Mɛɛ gbɛ nɔ Yehowa yeɔ ebuaa wɔ yɛ shihilɛi ni tamɔ nɛkɛ amli?

15. Yɛ nɔ ni aŋma yɛ Lala 94:19 lɛ naa lɛ, mɛni Yehowa baafee ehã wɔ?

¹⁵ Nɔ ni Yehowa feɔ. Lala 94:19 lɛ hãa wɔnaa akɛ Yehowa shɛjeɔ wɔmii ni ehãa wɔmii shɛɔ wɔhe. (Kanemɔ.) Wɔbaanyɛ wɔfee ŋmalɛ nɛɛ  he nɔkwɛmɔnɔ yɛ nɛkɛ gbɛ nɔ. Naa gbekɛ yoo bibioo ko ni nugbɔ miinɛ waa ni srawa miigbala ni eeshe gbeyei, ni no hewɔ lɛ enyɛɛɛ ewɔ. Kɛkɛ ni epapa ba ebawo lɛ ni ehiɛ lɛ aahu kɛyashi ewɔ. Eyɛ mli akɛ nugbɔ lɛ miinɛ ni srawa miigbala lolo moŋ, shi akɛni epapa hiɛ lɛ hewɔ lɛ, esheee gbeyei dɔŋŋ. Nakai nɔŋŋ kɛ́ naagba ko hã wɔshe gbeyei ni wɔtsui fã lɛ, wɔ-Tsɛ ni yɔɔ ŋwɛi lɛ baahiɛ wɔ yɛ mfonirifeemɔŋ kɛyashi wɔbaanu he akɛ wɔsheee gbeyei dɔŋŋ. Shi mɛni esa akɛ wɔfee koni Yehowa anyɛ ashɛje wɔmii yɛ nɛkɛ gbɛ nɔ?

16. Mɛni esa akɛ wɔfee koni Yehowa ashɛje wɔmii? (Kwɛmɔ mfoniri lɛ hu.)

¹⁶ Nɔ ni esa akɛ wɔfee. Okɛ Yehowa agba sane daa kɛtsɔ sɔlemɔ ni obaasɔle ohã lɛ kɛ Biblia lɛ ni obaakane be fɛɛ be lɛ nɔ. (Lala 77:​1, 12-14) Kɛ́ ofeɔ nakai lɛ, no lɛ be fɛɛ be ni okɛ naagba ko baakpe lɛ, nɔ ni baaba ojwɛŋmɔ mli klɛŋklɛŋ ji, ni obaaya Yehowa ŋɔɔ kɛhã yelikɛbuamɔ. Kɛɛmɔ Yehowa nɔ ni ehã osheɔ gbeyei ni ohao lɛ, ni ohã ekɛ bo awie ni eshɛje omii kɛtsɔ e-Wiemɔ lɛ nɔ. (Lala 119:28) Biblia lɛ fãi komɛi yɛ ni kɛ́ ooshe gbeyei ni okane lɛ, ebaashɛje omii waa. Akɛ nɔkwɛmɔnɔ lɛ, kɛ́ okane Hiob wolo lɛ, Lalai awolo lɛ, Abɛi awolo lɛ, loo Yesu wiemɔi ni yɔɔ Mateo yitso 6 lɛ, ebaanyɛ eshɛje omii waa. Kɛ́ osɔle ohã Yehowa ni okane Biblia lɛ, Yehowa baashɛje omii.

17. Mɛni esa akɛ wɔhe wɔye kɛ wɔtsui muu fɛɛ akɛ Yehowa baafee ehã wɔ?

¹⁷ Wɔbaanyɛ wɔhe wɔye kɛ wɔtsui fɛɛ akɛ, kɛ́ sane wulu ko nina wɔ lɛ, Yehowa baaye ebua wɔ, eshiŋ wɔ kɔkɔɔkɔ. Yehowa ewo shi akɛ ebaabu wɔhe, ebaaye ebua wɔ ni wɔkaje wɔŋɛlɛ nɔ, ebaahiɛ wɔmli, ni ebaashɛje wɔmii. (Lala 23:4; 94:14) Biblia lɛ wie yɛ Yehowa he akɛ: “Obaakwɛ mɛi ni kɛ amɛhe fɔ̃ɔ onɔ kwraa lɛ anɔ; obaahã amɛná toiŋjɔlɛ daa, ejaakɛ bo onɔ amɛkɛ amɛhiɛ efɔ̃.” (Yes. 26:3) No hewɔ lɛ, okɛ ohiɛ afɔ̃ Yehowa nɔ, ni ofee nɔ fɛɛ nɔ ni obaanyɛ koni oná eyelikɛbuamɔ lɛ he sɛɛ. Kɛ́ ofee nakai lɛ, Yehowa baahã oná hewalɛ ekoŋŋ kɛ́ naagba wulu ko hoso bo po.