NIKASEMƆ 5
LALA 108 Nyɔŋmɔ Suɔmɔ Ni Tsakeee Lɛ
Bɔ Ni Wɔnáa Yehowa Suɔmɔ Lɛ He Sɛɛ Wɔhãa
“Kristo Yesu ba je lɛ mli koni ebahere eshafeelɔi ayiwala.”—1 TIM. 1:15.
NƆ NI WƆBAAKASE
Bɔ ni wɔnáa kpɔmɔnɔ lɛ he sɛɛ wɔhãa, kɛ nɔ ni wɔbaanyɛ wɔfee kɛtsɔɔ akɛ wɔhiɛ sɔɔ nikeenii ni Yehowa kɛdro wɔ nɛɛ.
1. Mɛni kɛ́ wɔfee lɛ, ebaahã Yehowa aná miishɛɛ waa?
ŊƆƆ lɛ akɛ, oke mɔ ko ni osumɔɔ esane waa lɛ nɔ ko ni yɔɔ fɛo ni he yɔɔ sɛɛnamɔ waa. Kɛ́ mɔ lɛ kɛ nikeenii lɛ yato he ko ni ejwɛŋŋ he kwraa lɛ, te obaanu he ohã tɛŋŋ? Ekolɛ ebaadɔ bo waa! Shi kɛ́ mɔ lɛ kɛ nikeenii nɛɛ tsu nii ni eda bo shi yɛ he lɛ, ŋwanejee ko bɛ he akɛ, obaaná miishɛɛ waa. Mɛɛ gbɛ nɔ nɔkwɛmɔnɔ nɛɛ kɔɔ kpɔmɔnɔ lɛ he? Yehowa kɛ e-Bi lɛ hã koni egbo kɛkpɔ̃ wɔ. Kɛ́ Yehowa na akɛ wɔhiɛ sɔɔ enikeenii nɛɛ kɛ esuɔmɔ, ni ji nɔ ni tsirɛ lɛ ni ekɛ kpɔmɔnɔ nɛɛ hã lɛ, ebaaná miishɛɛ waa!—Yoh. 3:16; Rom. 5:7, 8.
2. Mɛni he wɔbaasusu yɛ nikasemɔ nɛɛ mli?
2 Shi be ni be shwieɔ mli lɛ, ekolɛ wɔnaŋ kpɔmɔnɔ lɛ akɛ nɔ ko ni jara wa dɔŋŋ. Kɛ́ eba lɛ nakai lɛ, ebaafee tamɔ nɔ ni wɔkɛ Nyɔŋmɔ nikeenii nɛɛ eyato he ko ni wɔnaaa dɔŋŋ ni wɔjwɛŋŋ he hu dɔŋŋ. Bɔ ni afee ni ekaba lɛ nakai lɛ, esa akɛ wɔsusu nibii ni Nyɔŋmɔ kɛ Kristo efee amɛhã wɔ lɛ ahe be fɛɛ be. Nikasemɔ nɛɛ baaye abua wɔ ni wɔfee nakai. Wɔbaana bɔ ni wɔnáa kpɔmɔnɔ lɛ he sɛɛ bianɛ kɛ bɔ ni wɔbaaná he sɛɛ wɔsɛɛ hu. Agbɛnɛ hu, wɔbaana nibii ni wɔbaanyɛ wɔfee kɛtsɔɔ akɛ wɔhiɛ sɔɔ suɔmɔ ni Yehowa ejie kpo etsɔɔ wɔ lɛ, titri lɛ, yɛ Kaimɔ be nɛɛ mli.
BƆ NI WƆNÁA KPƆMƆNƆ LƐ HE SƐƐ BIANƐ
3. Mɛɛ gbɛ nɔ wɔnáa kpɔmɔnɔ lɛ he sɛɛ bianɛ po?
3 Wɔmiiná Kristo kpɔmɔ afɔleshaa lɛ he sɛɛ bianɛ po. Akɛ nɔkwɛmɔnɔ lɛ, kpɔmɔnɔ lɛ hewɔ lɛ, Yehowa kɛ wɔhe eshai lɛ keɔ wɔ. Jeee doo akɛ Yehowa kɛ wɔhe eshai ake wɔ, shi eesumɔ ni efee nakai. Lalatsɛ lɛ wie nɔ ko ni hãa wɔnaa akɛ ehiɛ sɔɔ bɔ ni Yehowa kɛ eshai keɔ lɛ waa. Ewie akɛ: “Bo Yehowa, ohi ni osumɔɔ waa akɛ okɛ esha ake.”—Lala 86:5; 103:3, 10-13.
4. Namɛi ahewɔ Yehowa kɛ kpɔmɔnɔ lɛ hã? (Luka 5:32; 1 Timoteo 1:15)
4 Ekolɛ wɔteŋ mɛi komɛi nuɔ he akɛ wɔsaaa mɛi ni Yehowa kɛ wɔhe eshai keɔ wɔ. Ni nakai eji. Wɔ fɛɛ lɛ, wɔsaaa mɛi ni Yehowa kɛ wɔhe eshai keɔ wɔ. Bɔfo Paulo wie nɔ ko ni hãa wɔnaa akɛ enu he nakai. Ewie akɛ: “Misaaa mɔ ni atsɛɔ lɛ bɔfo po.” Shi ewie kɛfata he akɛ: “Nyɔŋmɔ dromɔ naa miji mɔ ni miji nɛɛ.” (1 Kor. 15:9, 10) Kɛ́ wɔtsake wɔtsui yɛ wɔhe eshai lɛ ahewɔ lɛ, Yehowa kɛkeɔ wɔ. Jeee sa ni wɔsa lɛ hewɔ efeɔ nakai, shi moŋ suɔmɔ ni eyɔɔ kɛhã wɔ lɛ hewɔ. No hewɔ lɛ, kɛ́ oonu he akɛ osaaa mɔ ni Yehowa kɛ ehe eshai keɔ lɛ lɛ, kaimɔ akɛ Yehowa kɛ kpɔmɔnɔ lɛ hãaa yɛ jalɔi ahewɔ, shi moŋ, ekɛhã yɛ eshafeelɔi ni etsake amɛtsui lɛ ahewɔ.—Kanemɔ Luka 5:32; 1 Timoteo 1:15.
5. Ani esa akɛ wɔnu he akɛ doo lɛ, esa akɛ Yehowa kɛ wɔhe eshai ake wɔ? Mɛni hewɔ okɛɔ nakai?
5 Kɛ́ wɔsɔmɔ Yehowa afii fioo jio, afii pii jio, esaaa akɛ wɔnuɔ he akɛ doo lɛ, esa akɛ Yehowa kɛ wɔhe eshai ake wɔ. Shi enɛ etsɔɔɔ akɛ Yehowa hiɛ esɔɔɔ nibii fɛɛ ni wɔfee yɛ esɔɔmɔ lɛ mli lɛ; ehiɛ sɔɔ. (Heb. 6:10) Ekɛ kpɔmɔnɔ lɛ hã akɛ nikeenii, shi jeee akɛ ekɛmiiwo nibii ni wɔtsu yɛ esɔɔmɔ lɛ mli lɛ he nyɔmɔ. No hewɔ lɛ, ejaaa akɛ wɔbaanu he akɛ nibii ni wɔtsu yɛ esɔɔmɔ lɛ mli lɛ hewɔ lɛ, wɔsa mɛi ni esa akɛ ekɛ wɔhe eshai ake wɔ. Kɛ́ wɔnu he nakai lɛ, etamɔ nɔ ni wɔmiikɛɛ akɛ ehe ehiaaa ni Kristo abagbo kɛkpɔ̃ wɔ.—Okɛto Galatiabii 2:21 lɛ he.
6. Mɛni hewɔ Paulo tsu nii waa yɛ Yehowa sɔɔmɔ lɛ mli lɛ?
6 Paulo le akɛ, jeee nii ni ebaatsu waa yɛ Yehowa sɔɔmɔ lɛ mli lɛ nɔ Yehowa baadamɔ ekɛ ehe eshai ake lɛ. Kɛ́ nakai lɛ, mɛni hewɔ etsu nii waa yɛ Yehowa sɔɔmɔ lɛ mli mɔ? Ekɛ no tsɔɔ akɛ ehiɛ sɔɔ bɔ ni Yehowa jie mlihilɛ kpo etsɔɔ lɛ ni ena lɛ mɔbɔ lɛ. (Efe. 3:7) Wɔ hu wɔyaa nɔ wɔkɛ ekãa sɔmɔɔ Yehowa, jeee koni edamɔ no nɔ ena wɔ mɔbɔ ni ekɛ wɔhe eshai ake wɔ, shi moŋ, koni wɔkɛtsɔɔ akɛ wɔhiɛ sɔɔ bɔ ni enaa wɔ mɔbɔ lɛ.
7. Mɛɛ sɛɛnamɔ kroko wɔnáa bianɛ yɛ kpɔmɔnɔ lɛ hewɔ? (Romabii 5:1; Yakobo 2:23)
7 Gbɛ kroko ni wɔnáa kpɔmɔnɔ lɛ he sɛɛ bianɛ ji, ehãa wekukpaa kpakpa hiɔ wɔ kɛ Yehowa teŋ. a Yɛ nikasemɔ ni tsɔ hiɛ lɛ mli lɛ, wɔna akɛ be ni afɔ wɔ lɛ, wekukpaa bɛ wɔ kɛ Yehowa teŋ. Shi kpɔmɔnɔ lɛ hewɔ lɛ, ‘toiŋjɔlɛ baanyɛ ahi wɔ kɛ Nyɔŋmɔ teŋ,’ ni wɔbaanyɛ wɔbɛŋkɛ lɛ.—Kanemɔ Romabii 5:1; Yakobo 2:23.
8. Mɛni hewɔ esa akɛ wɔda Yehowa shi yɛ hegbɛ ni wɔná akɛ wɔbaanyɛ wɔsɔle wɔhã lɛ lɛ hewɔ?
8 Wekukpaa kpakpa ni yɔɔ wɔ kɛ Yehowa teŋ lɛ hewɔ lɛ, wɔbaanyɛ wɔsɔle wɔhã lɛ, ni enɛ ji hegbɛ ni nɔ bɛ kwraa. Jeee sɔlemɔi ni asɔleɔ yɛ wɔkpeei srɔtoi lɛ ashishi lɛ pɛ toi Yehowa boɔ, shi moŋ, eboɔ sɔlemɔi ni wɔsɔleɔ akɛ aŋkroaŋkroi lɛ hu toi. Kɛ́ wɔhao ni wɔsɔle lɛ, ehãaa wɔye wɔtsui tsɔ. Shi jeee enɛ pɛ sɔlemɔ feɔ ehãa wɔ; ehãa naanyobɔɔ ni yɔɔ wɔ kɛ Yehowa teŋ lɛ hu mli waa. (Lala 65:2; Yak. 4:8; 1 Yoh. 5:14) Be ni Yesu yɔɔ shikpɔŋ lɛ nɔ lɛ, esɔle shii abɔ ehã Yehowa, ejaakɛ ele akɛ eebo lɛ toi, ni agbɛnɛ hu, no baahã wekukpaa ni yɔɔ ekɛ e-Tsɛ lɛ teŋ lɛ mli awa. (Luka 5:16) Eŋɔɔ wɔnaa waa akɛ, Yesu kpɔmɔ afɔleshaa lɛ hewɔ lɛ, wɔbaanyɛ wɔtsɔmɔ Yehowa nanemɛi ni wɔtsɔ sɔlemɔ nɔ wɔkɛ lɛ agba sane po!
BƆ NI WƆBAANÁ KPƆMƆNƆ LƐ HE SƐƐ WƆSƐƐ
9. Mɛɛ gbɛ nɔ Yehowa tsuji anɔkwafoi baaná kpɔmɔnɔ lɛ he sɛɛ wɔsɛɛ?
9 Wɔsɛɛ lɛ, te Yehowa tsuji anɔkwafoi lɛ baaná kpɔmɔnɔ lɛ he sɛɛ amɛhã tɛŋŋ? Yehowa baahã amɛhi shi kɛya naanɔ. Mɛi pii susuɔ akɛ, enɛ nyɛŋ aba lɛ nakai, ejaakɛ adesai bɔi gboimɔ nɛɛ, jeee ŋmɛnɛ. Shi Yehowa yiŋtoo kɛjɛ be ni ebɔ adesai ji koni amɛhi shi kɛya naanɔ. Eji Adam efeee esha kulɛ, mɔ ko nuŋ he po akɛ adesai nyɛŋ ahi shi kɛya naanɔ. Eyɛ mli akɛ ewa kɛhã mɛi komɛi akɛ amɛbaahe amɛye akɛ wɔbaanyɛ wɔhi shi kɛya naanɔ moŋ, shi wɔbaanyɛ wɔhe wɔye, ejaakɛ Yehowa kɛ nɔ ko ni jara wa waa, ni ji e-Bi lɛ wala hã koni wɔnyɛ wɔhi shi kɛya naanɔ.—Rom. 8:32.
10. Mɛni ji mɛi ni afɔ amɛ mu lɛ kɛ gwantɛŋi krokomɛi lɛ ahiɛnɔkamɔ?
10 Eyɛ mli akɛ wɔsɛɛ dani wɔbaaná naanɔ wala lɛ moŋ, shi Yehowa miisumɔ ni wɔsusu he bianɛ. Mɛi ni afɔ amɛ mu lɛ ahiɛ kã nɔ akɛ amɛbaahi shi kɛya naanɔ yɛ ŋwɛi, ni amɛkɛ Kristo baafee ekome kɛye shikpɔŋ lɛ nɔ. (Kpo. 20:6) Gwantɛŋi krokomɛi lɛ hu ahiɛ kã nɔ akɛ amɛbaahi shi kɛya naanɔ yɛ paradeiso mli yɛ shikpɔŋ lɛ nɔ ni amɛpiŋŋ dɔŋŋ ni amɛyeŋ awerɛho dɔŋŋ. (Kpo. 21:3, 4) Ani ofata gwantɛŋi krokomɛi lɛ ahe ni ohiɛ kã nɔ akɛ obaahi shi kɛya naanɔ yɛ shikpɔŋ lɛ nɔ? Kaanu he akɛ no baa shi fe mɛi ni miiya ŋwɛi lɛ anɔ lɛ. Yehowa bɔ wɔ koni wɔhi shikpɔŋ lɛ nɔ, no hewɔ lɛ ŋwanejee ko bɛ he akɛ, kɛ́ wɔmiihi shi kɛmiiya naanɔ yɛ shikpɔŋ lɛ nɔ lɛ, wɔbaaná miishɛɛ waa.
11-12. Mɛɛ jɔɔmɔi komɛi obaanyɛ okwɛ gbɛ akɛ obaaná yɛ Paradeiso lɛ mli? (Kwɛmɔ mfonirii lɛ hu.)
11 Feemɔ bɔ ni shihilɛ baaji yɛ Paradeiso lɛ mli lɛ he mfoniri okwɛ. Oyeŋ otsui yɛ hela loo gbele he. (Yes. 25:8; 33:24) Yehowa baahã bo nibii kpakpai fɛɛ ni oshweɔ. Mɛni obaasumɔ ni okase? Ani obaasumɔ ni okase kooloi ahe nii, bɔ ni atswaa saŋku, loo bɔ ni atɛŋɔ nii ahãa? Yɛ Paradeiso lɛ mli lɛ, mɛi ni le tsũmaa he nii kɛ okwaafoi ahe baahia waa. Agbɛnɛ hu, nihoolɔi, mɛi ni feɔ nitsumɔ dɛŋdadei, mɛi ni saa abɔi amli, kɛ mɛi ni tsuɔ nitsumɔi krokomɛi hu ahe baahia. (Yes. 35:1; 65:21) Akɛni obaahi shi kɛya naanɔ hewɔ lɛ, obaaná hegbɛ okase nibii nɛɛ ateŋ eko fɛɛ eko ni osumɔɔ lɛ he nii.
12 Kɛ́ okwɛ lɛ, te obaanu he ohã tɛŋŋ kɛ́ ona ni atee mɛi ni egboi lɛ ashi? Ŋwanejee ko bɛ he akɛ, okɛ miishɛɛ baahere amɛ! (Bɔf. 24:15) Agbɛnɛ hu, kwɛ bɔ ni omii baashɛ ohe waa ohã be mli ni okaseɔ nibii ni Yehowa ebɔ lɛ ahe nii ni no hãa oleɔ lɛ jogbaŋŋ lɛ. (Lala 104:24; Yes. 11:9) Ni nɔ ni fe fɛɛ lɛ, ofeŋ esha dɔŋŋ, no hewɔ lɛ obaanyɛ osɔmɔ Yehowa jogbaŋŋ ni ehe ehiaaa ni obi lɛ ni ekɛ ohe eshai ake bo. Bianɛ lɛ, ani obaasumɔ ni ofee nɔ ni bo diɛŋtsɛ osumɔɔ koni shihilɛ kpakpa nɛɛ ni obaaná yɛ Paradeiso lɛ mli lɛ aŋmɛɛ bo? (Heb. 11:25) Ekã shi faŋŋ akɛ, osumɔŋ ni ofee nakai! Jɔɔmɔi ni wɔbaaná yɛ Paradeiso lɛ mli lɛ hi kwraa fe nibii ni wɔbaanyɛ wɔná yɛ je nɛɛ mli amrɔ nɛɛ. Kaimɔ akɛ, be ko baashɛ ni ehe ebahiaŋ ni wɔkwɛ Paradeiso lɛ gbɛ dɔŋŋ, ejaakɛ no mli lɛ wɔyɛ Paradeiso lɛ mli. Ni nɔ hewɔ ni enɛ fɛɛ baaba lɛ nakai ji suɔmɔ ni Yehowa yɔɔ kɛhã wɔ ni ehã e-Bi lɛ bagbo kɛkpɔ̃ wɔ lɛ!
Mɛɛ jɔɔmɔi okwɛɔ gbɛ waa akɛ obaaná yɛ Paradeiso lɛ mli? (Kwɛmɔ kuku 11-12)
NƆ NI WƆBAANYƐ WƆFEE KƐTSƆƆ AKƐ WƆHIƐ SƆƆ SUƆMƆ NI YEHOWA EJIE KPO ETSƆƆ WƆ LƐ
13. Mɛni wɔbaanyɛ wɔfee kɛtsɔɔ akɛ wɔhiɛ sɔɔ suɔmɔ ni Yehowa ejie kpo etsɔɔ wɔ lɛ? (2 Korintobii 6:1)
13 Mɛni wɔbaanyɛ wɔfee kɛtsɔɔ akɛ wɔhiɛ sɔɔ kpɔmɔnɔ ni Yehowa kɛdro wɔ lɛ? No ji, ni wɔbaahã Yehowa sɔɔmɔ lɛ he ahia wɔ fe nɔ fɛɛ nɔ yɛ wɔshihilɛ mli. (Mat. 6:33) Kaimɔ akɛ, Yesu gbo “koni mɛi ni hiɛ kãmɔ lɛ ahiɛ akakãmɔ kɛmiihã amɛ diɛŋtsɛ amɛhe dɔŋŋ, shi moŋ amɛhiɛ akãmɔ ahã mɔ ni gbo kɛhã amɛ ni atee lɛ shi lɛ.” (2 Kor. 5:15) Ekã shi faŋŋ akɛ, wɔsumɔŋ ni wɔhã yiŋtoo ni yɔɔ Nyɔŋmɔ dromɔ lɛ sɛɛ lɛ afee efolo.—Kanemɔ 2 Korintobii 6:1.
14. Mɛni wɔbaafee kɛtsɔɔ akɛ wɔkɛ wɔhiɛ fɔ̃ɔ Yehowa nɔ ni wɔboɔ egbɛtsɔɔmɔ toi?
14 Nɔ kroko ni wɔbaanyɛ wɔfee kɛtsɔɔ akɛ wɔhiɛ sɔɔ suɔmɔ ni Yehowa ejie kpo etsɔɔ wɔ lɛ ji, ni wɔkɛ wɔhiɛ baafɔ̃ enɔ ni wɔbaabo egbɛtsɔɔmɔ toi. Te wɔbaafee tɛŋŋ wɔfee enɛ lɛ? No ji, kɛ́ wɔyaakpɛ yiŋ ko, yɛ ekolɛ he ni wɔbaasumɔ ni wɔya skul kɛyashi loo wɔmiitao nitsumɔ ko lɛ, esa akɛ klɛŋklɛŋ lɛ, wɔkwɛ akɛ Yehowa baaná yiŋ ni wɔmiitao wɔkpɛ lɛ he miishɛɛ lo. (1 Kor. 10:31; 2 Kor. 5:7) Kɛ́ wɔkpɛ yiŋ ni tsɔɔ akɛ wɔkɛ wɔhiɛ fɔ̃ɔ Yehowa nɔ lɛ, hemɔkɛyeli ni wɔyɔɔ yɛ emli lɛ mli waa ni wɔ kɛ lɛ teŋ naanyobɔɔ lɛ hu mli waa. Ni hiɛnɔkamɔ ni wɔyɔɔ akɛ wɔbaahi shi kɛhã naanɔ lɛ hu mli waa.—Rom. 5:3-5; Yak. 2:21, 22.
15. Mɛni wɔbaanyɛ wɔfee yɛ Kaimɔ be lɛ mli kɛtsɔɔ akɛ wɔhiɛ sɔɔ kpɔmɔnɔ lɛ?
15 Nɔ kroko hu yɛ ni wɔbaanyɛ wɔfee kɛtsɔɔ Yehowa akɛ wɔhiɛ sɔɔ suɔmɔ ni ejie lɛ kpo etsɔɔ wɔ lɛ. No ji ni wɔbaafee nɔ ko yɛ Kaimɔ be lɛ mli kɛtsɔɔ Yehowa akɛ wɔhiɛ sɔɔ kpɔmɔnɔ lɛ waa. Nibii ni wɔbaanyɛ wɔfee lɛ eko ji, ni wɔbaato gbɛjianɔ koni wɔnyɛ wɔba Kaimɔ lɛ, ni agbɛnɛ hu wɔfɔ̃ mɛi nine koni amɛ hu amɛba. (1 Tim. 2:4) Esa akɛ wɔgbala nɔ ni baaya nɔ yɛ Kaimɔ lɛ shishi lɛ mli wɔhã mɛi ni wɔbaafɔ̃ amɛ nine lɛ. Wɔbaanyɛ wɔjie vidio ni ji Mɛni Hewɔ Yesu Gbo? kɛ Nyɛkaia Yesu Gbele Lɛ ni yɔɔ jw.org lɛ nɔ lɛ wɔtsɔɔ amɛ. Asafoŋ onukpai, nyɛhiɛ akakpaa nɔ akɛ nyɛbaafɔ̃ mɛi ni ekpa asafoŋ kpeeibaa kɛ shiɛmɔyaa lɛ hu nine kɛba Kaimɔ. Yehowa kɛ ŋwɛibɔfoi lɛ kɛ wɔ fɛɛ baaná miishɛɛ waa kɛ́ mɛi nɛɛ ateŋ mɛi komɛi ku amɛsɛɛ kɛba asafo lɛ mli ekoŋŋ. (Luka 15:4-7) Agbɛnɛ hu, yɛ Kaimɔ lɛ shishi lɛ, esa akɛ wɔbɔ mɔdɛŋ wɔŋa wɔnyɛmimɛi lɛ kɛ mɛi krokomɛi ni eba lɛ, titri lɛ, mɛi hei kɛ mɛi ni ba asafoŋ kpeei etsɛ lɛ, ni wɔhã amɛhiɛ amɛ.—Rom. 12:13.
16. Mɛni hewɔ ehi akɛ wɔbaalɛɛ wɔsɔɔmɔ lɛ mli yɛ Kaimɔ be lɛ mli?
16 Ani obaanyɛ olɛɛ osɔɔmɔ lɛ mli yɛ Kaimɔ be lɛ mli? Enɛ ji nɔ kroko ni obaanyɛ ofee kɛtsɔɔ akɛ ohiɛ sɔɔ nɔ ni Nyɔŋmɔ kɛ Kristo efee ehã bo lɛ. Kɛ́ wɔkɛ wɔhe wo shiɛmɔ nitsumɔ lɛ mli waa lɛ, wɔbaana Yehowa nine, ni no baahã wɔkɛ wɔhiɛ afɔ̃ enɔ waa fe tsutsu lɛ po. (1 Kor. 3:9) Agbɛnɛ hu, bɔɔ mɔdɛŋ ni onyiɛ Kaimɔ lɛ he Biblia kanemɔ lɛ he gbɛjianɔtoo ni yɔɔ Ŋmalɛi Lɛ Amli Ni Wɔɔkwɛ Daa wolo lɛ loo otsi teŋ kpee nifeemɔ wolo lɛ mli lɛ sɛɛ pɛpɛɛpɛ. Obaanyɛ okɛ ŋmalɛi nɛɛ afee weku jamɔ loo aŋkro nikasemɔ.
17. Mɛni hãa Yehowa náa miishɛɛ? (Kwɛmɔ akrabatsa ni ji “ Nibii Ni Wɔbaanyɛ Wɔfee Kɛtsɔɔ Akɛ Wɔhiɛ Sɔɔ Suɔmɔ Ni Yehowa Ejie Kpo Etsɔɔ Wɔ Lɛ” hu.)
17 Ekolɛ oshihilɛ eŋmɛŋ bo gbɛ ni ofee nɔ fɛɛ nɔ ni awie he yɛ nikasemɔ nɛɛ mli lɛ. Shi kaimɔ akɛ, Yehowa kɛ bo etooo mɔ ko mɔ ko he. Enaa otsuiŋ ni ele akɛ osumɔɔ lɛ. Enaa nɔ fɛɛ nɔ ni ofeɔ kɛtsɔɔ akɛ ohiɛ sɔɔ kpɔmɔnɔ lɛ, ni ji nikeenii ni nɔ bɛ ni ekɛhã wɔ lɛ, ni enáa he miishɛɛ waa.—1 Sam. 16:7; Mar. 12:41-44.
18. Mɛni hewɔ wɔhiɛ sɔɔ nɔ ni Yehowa Nyɔŋmɔ kɛ Yesu Kristo efee amɛhã wɔ lɛ?
18 Kpɔmɔnɔ lɛ hewɔ lɛ, Yehowa baanyɛ ekɛ wɔhe eshai ake wɔ, wɔbaanyɛ wɔkɛ lɛ abɔ naanyo, ni wɔyɛ hiɛnɔkamɔ akɛ wɔbaanyɛ wɔhi shi kɛya naanɔ. No hewɔ lɛ, be fɛɛ be lɛ, nyɛhãa wɔkɛ wɔnifeemɔi atsɔa akɛ wɔhiɛ sɔɔ suɔmɔ ni Yehowa yɔɔ kɛhã wɔ lɛ, ejaakɛ no tsirɛ lɛ ni efee nibii kpakpai nɛɛ fɛɛ ehã wɔ. (1 Yoh. 4:19) Agbɛnɛ hu, nyɛhãa wɔkɛ wɔnifeemɔi atsɔa akɛ wɔhiɛ sɔɔ bɔ ni Yesu sumɔɔ wɔ aahu akɛ, ekɛ ewala shã afɔle ehã wɔ lɛ!—Yoh. 15:13.
LALA 154 Suɔmɔ Sɛɛ Efooo Kɔkɔɔkɔ
a Dani Yesu kɛ ewala baashã afɔle po lɛ, Yehowa kɛ etsuji anɔkwafoi lɛ ahe eshai keɔ amɛ. Mɛni nɔ edamɔ efee nakai? Yehowa heɔ eyeɔ waa akɛ Yesu baaye lɛ anɔkwa kɛyashi gbele mli tɔ̃ɔ. No hewɔ lɛ, be ni Yesu bako shikpɔŋ lɛ nɔ beebe lɛ, yɛ Yehowa hiɛ lɛ, etamɔ nɔ ni akɛ kpɔmɔnɔ lɛ ehã momo.—Rom. 3:25.
