SAJI pii yɛ Biblia lɛ mli ni hãa wɔnaa akɛ, mɛi ni ŋmala lɛ yɛ “henumɔi tamɔ wɔ nɔŋŋ.” (Yak. 5:17) Akɛ nɔkwɛmɔnɔ lɛ, Paulo wie yɛ Romabii 7:21-24 lɛ akɛ: “Kɛ́ miitao mafee nɔ ni ja lɛ, minaa nɔ gbonyo hu yɛ mimli. . . . Gbɔmɔ ni nii yɔɔ mɔbɔ ji mi!” Akɛni wɔyeee emuu hewɔ lɛ, bei komɛi lɛ, wɔnáaa lɛ mlɛo akɛ wɔbaafee nɔ ni ja. Shi Paulo wiemɔi nɛɛ shɛjeɔ wɔmii, ejaakɛ ehãa wɔnaa akɛ, lɛ hu enáaa lɛ mlɛo akɛ ebaafee nɔ ni ja be fɛɛ be.

Saji krokomɛi ni Paulo wie lɛ hu hãa wɔnaa bɔ ni enu he ehã. Eko ji nɔ ni ewie yɛ Galatiabii 2:20 lɛ, akɛ: “Nyɔŋmɔ Bi lɛ ni sumɔ mi ni ekɛ ehe hã yɛ mihewɔ.” Ani bo hu onuɔ he akɛ bo ohewɔ Yesu bagbo? Ekolɛ, bei komɛi lɛ, onuuu he nakai.

Eeenyɛ efee akɛ, bei komɛi lɛ, eshai komɛi ni wɔfee be ko ni eho lɛ ahewɔ lɛ, wɔnuɔ he akɛ wɔhe bɛ sɛɛnamɔ, ni akɛ, Yehowa nyɛŋ asumɔ wɔ ni ekɛ wɔhe eshai lɛ ake wɔ, aahu ni ebaahã e-Bi lɛ abagbo kɛkpɔ̃ wɔ. Shi jeee nakai kwraa Yesu miisumɔ ni wɔna kpɔmɔnɔ lɛ. Mɛni tsɔɔ nakai? Ni mɛni baaye abua wɔ ni wɔna kpɔmɔnɔ lɛ tamɔ bɔ ni Yesu miisumɔ ni wɔna lɛ lɛ? Hã wɔkwɛ.

Yesu miisumɔ ni wɔyɔse akɛ, wɔhewɔ ekɛ ewala bashã afɔle lɛ. Mɛni hewɔ wɔkɛɔ nakai? Wɔkɛɔ nakai yɛ sane ni abɔ he amaniɛ yɛ Luka 23:39-43 lɛ hewɔ. Hii ni asɛŋ amɛ yɛ Yesu masɛi lɛ ateŋ mɔ kome kɛ nibimɔ ko fɔ̃ Yesu hiɛ. Nuu nɛɛ diɛŋtsɛ etsɔ hiɛ ewie akɛ eji efɔŋfeelɔ. Ekã shi faŋŋ akɛ, efɔŋ ni efee lɛ jeee efɔŋ bibioo, ejaakɛ dani abaasɛŋ mɔ ko lɛ, belɛ, efɔŋ ni efee lɛ naa wa waa. Be ni nuu nɛɛ piŋɔ lɛ, ekpa Yesu fai akɛ: “Kɛ́ oba o-Maŋtsɛyeli lɛ mli lɛ, kaimɔ mi.”

Ekã shi faŋŋ akɛ, be ni nuu lɛ wie wiemɔi nɛɛ, Yesu tsɔ eyitso ekwɛ ehiɛ. Yɛ piŋmɔ ni epiŋɔ lɛ fɛɛ sɛɛ lɛ, efee ehiɛ ŋmɔlɔŋmɔlɔ ni ekɛ lɛ wie tamɔ mɔ kɛ enaanyo. Ekɛɛ lɛ akɛ: “Lɛɛlɛŋ, miikɛɛ bo ŋmɛnɛ akɛ, obaafata mihe yɛ Paradeiso.” Kadimɔ akɛ, Yesu ekɛɛɛ nuu lɛ kɛkɛ akɛ, ‘gbɔmɔ Bi lɛ ba koni ekɛ ewala abahã akɛ kpɔmɔnɔ kɛkpɔ̃ mɛi babaoo.’ (Mat. 20:28) Moŋ lɛ, ekɛ wiemɔi ni ji, “bo,” kɛ “obaafata mihe” lɛ tsu nii, koni nuu lɛ ana faŋŋ akɛ, lɛ ehewɔ ekɛ ewala bashã afɔle lɛ. Agbɛnɛ hu, ehã ena nɔ ni efɔleshãa lɛ baatsu ahã lɛ, no ji, ebaahi paradeiso mli yɛ shikpɔŋ lɛ nɔ.

Eyɛ mli akɛ nuu awuiyelɔ nɛɛ náaa hegbɛ esɔmɔ Nyɔŋmɔ moŋ, shi no mli lɛ, Yesu miitao ena akɛ, ebaanyɛ ená kpɔmɔnɔ lɛ he sɛɛ. Kɛ́ Yesu shwe ni awuiyelɔ nɛɛ po ana akɛ lɛ ehewɔ akɛ kpɔmɔnɔ lɛ hã lɛ, belɛ wɔbaanyɛ wɔwie kɛ nɔmimaa akɛ, eesumɔ ni wɔ ni wɔhã abaptisi wɔ, ni wɔmiisɔmɔ Nyɔŋmɔ lɛ, wɔ hu wɔna lɛ nakai. No hewɔ lɛ, mɛni baaye abua wɔ ni wɔna kpɔmɔnɔ lɛ nakai yɛ tɔmɔi ni wɔtɔ̃ be ko ni eho lɛ fɛɛ sɛɛ?

Yesu kɛ nitsumɔ wo Paulo dɛŋ akɛ eyashiɛ, ni enɛ hã Paulo na faŋŋ akɛ, lɛɛlɛŋ, lɛ ehewɔ Yesu bagbo. Nɔ ko ni Paulo wie lɛ hãa wɔnaa nakai. Ewie akɛ: “Miida wɔ-Nuŋtsɔ Kristo Yesu, mɔ ni hã mi hewalɛ lɛ shi, ejaakɛ ebu mi anɔkwafo, ni ekɛ sɔɔmɔ wo midɛŋ, eyɛ mli akɛ tsutsu lɛ miji mɔ ko ni wieɔ wiemɔi fɔji kɛ yiwalɔ kɛ mɔ ni ebuuu nɔ ko moŋ.” (1 Tim. 1:12-14) Paulo na akɛ, kɛ́ yɛ awui ni eye lɛ fɛɛ sɛɛ lɛ, Yesu ena lɛ mɔbɔ ni etuu nitsumɔ ko ewo edɛŋ lɛ, belɛ Yesu sumɔɔ lɛ ni eheɔ lɛ eyeɔ waa. Yesu ehã bo hu nitsumɔ akɛ oyashiɛ. (Mat. 28:19, 20) Te esa akɛ enɛ aná onɔ hewalɛ ehã tɛŋŋ?

Nyɛmi nuu ko ni atsɛɔ lɛ Albert, ni ashwie lɛ kɛje asafo lɛ mli aaafee afii 34 nɛ, shi nyɛsɛɛ nɛɛ nɔŋŋ lɛ ahe lɛ lɛ wie akɛ: “Mihe eshai lɛ yɛ mihiɛ daa. Shi kɛ́ mitee shiɛmɔ lɛ, minuɔ he tamɔ bɔ ni bɔfo Paulo nu he lɛ, akɛ, Yesu kɛ nitsumɔ ko ewo midɛŋ. Enɛ shɛjeɔ mimii, ni ehãa minuɔ he akɛ mijeee gbɔmɔ fɔŋ, mihe yɛ sɛɛnamɔ, ni hiɛnɔkamɔ yɛ kɛhã mi.”​—Lala 51:3.

Be ni Allan bako anɔkwale lɛ mli lɛ, eyeɔ mɛi awui waa ni efeɔ basabasa. Ewie akɛ: “Misusuɔ awui pii ni miye mɛi lɛ ahe, ni bei komɛi lɛ, enɛ haoɔ mi waa. Shi midaa Yehowa shi akɛ, ehã mi ni miji eshafeelɔ lɛ hegbɛ akɛ mishiɛ sane kpakpa lɛ mihã mɛi. Kɛ́ mina bɔ ni mɛi feɔ amɛnii amɛhãa kɛ́ amɛnu sane kpakpa lɛ, ekaiɔ mi akɛ, Yehowa hi, ni esumɔɔ wɔ. Minuɔ he akɛ, Yehowa miitsɔ minɔ eeye eebua mɛi ni efee nibii gbohii be ko ni eho lɛ.”

Kɛ́ wɔtee shiɛmɔ lɛ, wɔkɛ wɔhewalɛ miitsu nɔ ko kpakpa, ni eyeɔ ebuaa wɔ ni wɔsusuɔ nibii kpakpai ahe. Shiɛmɔ nitsumɔ lɛ hãa wɔnaa akɛ, Yesu ena wɔ mɔbɔ, esumɔɔ wɔ, ni eheɔ wɔ eyeɔ.

Bei abɔ ni wɔyɔɔ Satan jeŋ fɔŋ nɛɛ mli lolo lɛ, wɔtsuii baaya nɔ abu wɔ fɔ yɛ eshai ni wɔfee be ko ni eho lɛ ahe. Mɛni baaye abua wɔ?

Be ni nyɛmi yoo ko ni atsɛɔ lɛ Jean lɛ ji oblayoo lɛ, kɛ́ ekɛ efɔlɔi yɛ shĩa loo etee Maŋtsɛyeli Asa lɛ nɔ lɛ, ebaa ejeŋ jogbaŋŋ, shi kɛ́ eje kpo lɛ, etsɔɔ gbɔmɔ kroko. Jean henilee buɔ lɛ fɔ yɛ bɔ ni eba ejeŋ ehã lɛ he, shi ewie akɛ: “Eŋɔɔ minaa waa akɛ ‘Nyɔŋmɔ da fe wɔtsuii.’” (1 Yoh. 3:19, 20) Yehowa kɛ Yesu le akɛ wɔyeee emuu, ni wɔtɔ̃ɔ yɛ be kɛ beiaŋ. Enɛ ni Jean le lɛ ye ebua lɛ, ni ebaanyɛ eye ebua wɔ hu. Kaahã ohiɛ kpa nɔ kɔkɔɔkɔ akɛ, jeee mɛi ni eye emuu ahewɔ Yehowa kɛ Yesu jɛ suɔmɔ mli amɛkɛ kpɔmɔnɔ lɛ hã, shi moŋ, eshafeelɔi ni etsake amɛtsui lɛ ahewɔ.​—1 Tim. 1:15.

Kɛ́ wɔhe be wɔjwɛŋ bɔ ni Yesu kɛ adesai ni yeee emuu ye ehã lɛ he jogbaŋŋ, ni wɔkɛ wɔhe wo shiɛmɔ nitsumɔ lɛ mli kɛmɔ shi lɛ, wɔbaana faŋŋ akɛ, wɔhewɔ akɛ kpɔmɔnɔ lɛ hã. Anɔkwa, wɔbaanu he tamɔ bɔ ni Paulo nu he lɛ, ni wɔ hu wɔbaawie akɛ: Yesu “sumɔ mi ni ekɛ ehe hã yɛ mihewɔ.”