Kɛ́ mɛi enyɔ bote gbalashihilɛ mli lɛ, Yehowa miisumɔ ni amɛná miishɛɛ, ni suɔmɔ ni yɔɔ amɛteŋ lɛ mli awa, ni amɛgbãla lɛ sɛɛ atsɛ. (Mat. 19:4-6) Kɛ́ obaasumɔ ni obote gbalashihilɛ mli lɛ, te obaafee tɛŋŋ oná hefatalɔ ni sa? Akɛni Yehowa ni bɔ wɔ hewɔ lɛ, lɛ ele nibii ni kɛ́ wɔfee lɛ wɔbaaná miishɛɛ yɛ wɔgbalashihilɛ mli. No hewɔ lɛ, kɛ́ okɛ shishitoo mlai ni ekɛhã lɛ tsu nii lɛ, obaaná miishɛɛ yɛ shihilɛ mli. Hã wɔsusu shishitoo mlai nɛɛ ekomɛi ahe wɔkwɛ.

Klɛŋklɛŋ shishitoo mla lɛ kɔɔ wɔ diɛŋtsɛ wɔhe. Ekɛɔ akɛ: “Tsui lakaa mɔ fe nɔ fɛɛ nɔ, ni ehe yɛ ahuntoo.” (Yer. 17:9) Kɛ́ mɛi enyɔ ni miitao abote gbalashihilɛ mli lɛ bɔi nyiɛmɔ kɛhã gbalashihilɛ lɛ, ewaaa kwraa akɛ henumɔi ni amɛyɔɔ kɛhã amɛhe lɛ mli baawa oya, ni kɛ́ eba lɛ nakai lɛ, ebaawa akɛ amɛbaakpɛ amɛyiŋ jogbaŋŋ. Kɛ́ mɛi damɔ bɔ ni amɛnuɔ he amɛhãa lɛ nɔ titri amɛkpɛ amɛyiŋ akɛ amɛbaabote gbalashihilɛ mli lɛ, bei pii lɛ amɛyagbeee naa ekpakpa. (Abɛi 28:26) No hewɔ ni nilee bɛ mli akɛ kɛ́ mɛi enyɔ je nyiɛmɔ kɛhã gbalashihilɛ shishi nɔŋŋ lɛ, amɛbaawie nibii ni tsɔɔ akɛ amɛsumɔɔ amɛhe waa loo amɛbaawowoo amɛhe shi be ni amɛleko amɛhe jogbaŋŋ lɛ.

Abɛi 22:3 lɛ hu kɛɔ akɛ: “Hiɛtɛ̃lɔ naa oshãra lɛ, ni eteɔ ehe, shi mɔ ni jwɛŋmɔ esako lɛ, ebɛŋkɛɔ he, ni enaa amane.” Mɛɛ oshãrai yɔɔ wɛbsaitii loo apps ni akɛtaoɔ gbalashihilɛ mli hefatalɔi lɛ ahe? Ekome ji akɛ, bei komɛi lɛ, mɛi komɛi kɛ mɛi ni amɛleee yakpeɔ yɛ wɛbsaitii loo apps nɛɛ anɔ ni amɛkɛ amɛ jeɔ nyiɛmɔ kɛhã gbalashihilɛ shishi. Shi mɛi ni amɛkɛjeɔ nyiɛmɔ shishi nɛɛ sumɔɔɔ amɛ tamɔ bɔ ni amɛkɛɛ amɛsumɔɔ amɛ lɛ, ni amɛyashiɔ amɛ yɛ gbɛteŋ. Agbɛnɛ hu, mɛi komɛi kɛ gbɛ́i ni jeee amɛgbɛ́i diɛŋtsɛ gbeleɔ akaunt yɛ wɛbsaitii nɛɛ anɔ koni amɛkɛlaka mɛi ni jwɛŋmɔ esako lɛ ni amɛju amɛshika. Bei komɛi lɛ, mɛi ni lakaa mɛi nɛɛ kɛɔ akɛ Odasefoi ji amɛ.

Naa oshãra kroko hu. Wɛbsaitii kɛ apps nɛɛ ekomɛi yɛ ni kɔmpiuta ni tsɔɔ kɛji mɔ ko baafee hefatalɔ ni sa kɛhã bo aloo ebafeŋ hefatalɔ ni sa kɛhã bo. Shi nɔ ko bɛ ni tsɔɔ akɛ kɔmpiuta baanyɛ atsɔɔ mɔ ko hefatalɔ ni sa kɛhã lɛ loo mɔ ni esaaa. No hewɔ lɛ, kɛ́ okwɛ lɛ, ani nilee yɛ mli akɛ obaata shi ni tsɔne ko ni adesai fee lɛ akpɛ yiŋ ahã bo yɛ sane ko ni he hiaa tamɔ gbalashihilɛ he? Kɔmpiuta kɛ Biblia mli shishitoo mlai lɛ, te nɔ ni baanyɛ aye abua bo fe fɛɛ lɛ?​—Abɛi 1:7; 3:5-7.

 Shishitoo mla kroko hu ji nɔ ni yɔɔ Abɛi 14:15 lɛ. Ekɛɔ akɛ: “Mɔ ni jwɛŋmɔ esako lɛ heɔ wiemɔ fɛɛ wiemɔ eyeɔ, shi hiɛtɛ̃lɔ kwɛɔ enajifaamɔi jogbaŋŋ.” Esa akɛ ole mɔ ko jogbaŋŋ dani okpɛ oyiŋ akɛ okɛ lɛ baabote gbalashihilɛ mli. Shi enɛ feemɔ baanyɛ awa yɛ wɛbsaitii loo apps ni akɛtaoɔ gbalashihilɛ mli hefatalɔi lɛ anɔ. Kɛ́ obi mɔ lɛ ehe saji ni bo hu otsɔɔ lɛ ohe saji, ni nyɛfɔɔ nyɛhe mɛseji sɛndimɔ waa po lɛ, ani obaanyɛ okɛɛ lɛɛlɛŋ akɛ ole lɛ? Mɛi komɛi ni susu akɛ amɛná mɔ ko ni amɛsumɔɔ waa lɛ awerɛ fɛɛ ho amɛhe be ni amɛna mɔ lɛ agbɛnɛ.

Lalatsɛ lɛ wie akɛ: “Mikɛ mɛi ni lakaa mɛi ebɔɔɔ, ni mitsiɔ mihe kɛjeɔ mɛi ni kɛ amɛsubaŋ teɔ lɛ ahe.” (Lala 26:4) Mɛi babaoo maleɔ yɛ amɛhe saji ni amɛkɛwoɔ wɛbsaitii nɛɛ anɔ lɛ amli, ni amɛnaaa naagba ko yɛ he. Ekolɛ amɛbaaje gbɛ amɛfee amɛnii ookɛɛ gbɔmɛi kpakpai ji amɛ loo wɔbaana amɛ nakai. Ekolɛ amɛteŋ mɛi komɛi po baakɛɛ akɛ Yehowa Odasefoi ji amɛ. Shi sane lɛ ji, ani abaptisi amɛ po? Ani amɛhiɛ dɔɔ yɛ Yehowa sɔɔmɔ lɛ mli? Ani wekukpaa kpakpa yɛ amɛ kɛ Yehowa teŋ? Te ale amɛ yɛ amɛsafo lɛ mli ahã tɛŋŋ? Ani ale amɛ akɛ mɛi ni efeee nɔkwɛmɔnɔ kpakpa loo mɛi ni esaaa akɛ akɛ amɛ bɔɔ naanyo po? Ani amɛyɛ Ŋmalɛ naa hegbɛ akɛ amɛboteɔ gbalashihilɛ mli? Enɛɛmɛi ji nibii komɛi ni esa akɛ ole. Shi kɛ́ okɛ nyɛmimɛi ni le mɔ lɛ jogbaŋŋ lɛ egbaaa sane lɛ, ebaawa akɛ obaale nibii nɛɛ. (Abɛi 15:22) Ni wɔle akɛ, anɔkwa Kristofonyo ko bɛ ni kɛ mɔ ko ni jeee Odasefonyo baabote gbalashihilɛ mli.​—2 Kor. 6:14; 1 Kor. 7:39.

Bianɛ lɛ, wɔbana akɛ wɛbsaitii kɛ apps ni atsɔɔ nɔ ataoɔ gbalashihilɛ mli hefatalɔi lɛ yɛ oshãra. Shi gbɛi krokomɛi yɛ ni hi ni abaanyɛ atsɔ nɔ ale mɔ ko ni baanyɛ abafee hefatalɔ kpakpa. Shi te obaafee tɛŋŋ ni okɛ mɔ ko ni tamɔ nɛkɛ akpe? Kɛ́ he ni nyɛyɔɔ lɛ Yehowa Odasefoi nyɛɔ amɛkpeɔ kutuu lɛ, obaanyɛ okɛ mɔ ko ni tamɔ nakai akpe yɛ asafoŋ kpeei ashishi, kpokpaa nɔ kpeei ashishi, kpeei wuji ashishi, loo henaabuamɔi krokomɛi ashishi.

Shi kɛ́ shihilɛ ko hewɔ lɛ wɔnyɛɛɛ wɔkpe kutuu, tamɔ bɔ ni eji yɛ COVID 19 be nɛɛ mli lɛ, asafoi komɛi tsɔɔ videoconference nɔ amɛfeɔ amɛsafoŋ kpeei lɛ, ni enɛ ji gbɛ kome ni obaanyɛ otsɔ nɔ ole mɔ ko ni obaasumɔ ni okɛ lɛ abote gbalashihilɛ mli lɛ jogbaŋŋ. Obaanyɛ ona bɔ ni etsuɔ asaimɛnt srɔtoi ni ahãa lɛ ahe nii ehãa, ni obaanyɛ ona bɔ ni ehemɔkɛyeli lɛ mli wa hã kɛtsɔ saji ahetoo ni ehãa lɛ nɔ. (1 Tim. 6:11, 12) Kɛ́ akpa asafoŋ kpee hu lɛ, nyɛbaaná hegbɛ nyɛgba sane yɛ breakout room lɛ. Agbɛnɛ hu, obaanyɛ otsɔ henaabuamɔi krokomɛi ni afeɔ kɛtsɔ videoconference nɔ ona bɔ ni ekɛ mɛi yeɔ ehãa, ni no baahã ole mɔ ni eji diɛŋtsɛ. (1 Pet. 3:4) Fiofio lɛ, be ni nyɛleɔ nyɛhe lɛ, nyɛbaanyɛ nyɛna kɛji oti kome too lɛ nɔŋŋ ni ma nyɛ hiɛ, kɛ agbɛnɛ hu kɛji nyɛbaanyɛ nyɛfee hefatalɔi ni sa.

Kɛ́ mɛi ni miitao amɛbote gbalashihilɛ mli lɛ kɛ Biblia mli shishitoo mlai tsu nii be ni amɛtaoɔ hefatalɔ lɛ, ewaŋ kwraa akɛ ŋmalɛ nɛɛ baaba mli yɛ amɛgbɛfaŋ. Nɔ ni kɛɔ akɛ: “Mɔ ni ená ŋa [loo wu] kpakpa lɛ, ená nɔ kpakpa, ni ehiɛ baa nyam yɛ Yehowa hiɛ.”​—Abɛi 18:22.