1. Be ni Adam kɛ Hawa tɔ̃ lɛ sɛɛ nɔŋŋ lɛ, mɛni Yehowa fee? (1 Mose 3:15)

 BE NI Adam kɛ Hawa tɔ̃ lɛ sɛɛ nɔŋŋ ni Yehowa gba gbalɛ ko ni baahã amɛseshibii lɛ aná hiɛnɔkamɔ. Gbalɛ nɛɛ yɛ 1 Mose 3:15 lɛ.​—Kanemɔ.

2. Mɛni hewɔ gbalɛ nɛɛ he hiaa waa lɛ?

² Gbalɛ nɛɛ yɛ Biblia lɛ klɛŋklɛŋ wolo lɛ mli. Shi yɛ gbɛ ko nɔ lɛ, Biblia lɛ mli woji lɛ fɛɛ kɛ lɛ yɛ tsakpaa. Wɔbaanyɛ wɔkɛ gbalɛ ni yɔɔ 1 Mose 3:15 lɛ ato kpãa ni akɛfiɔ blɔ lɛ he. Bɔ ni kpãa feɔ bɔlɔwui lɛ fɛɛ ekome lɛ, nakai nɔŋŋ gbalɛ ni yɔɔ 1 Mose 3:15 lɛ feɔ saji fɛɛ ni yɔɔ Biblia lɛ mli lɛ ekome ni amɛwieɔ oti kome he. No ji, Nyɔŋmɔ baatsu mɔ ko koni ebahere wɔ ni ekpãtã Satan kɛ mɛi fɔji fɛɛ ni fiɔ esɛɛ lɛ ahiɛ. b Enɛ ji miishɛɛ sane waa kɛhã mɛi ni sumɔɔ Yehowa lɛ!

3. Mɛni he wɔbaasusu yɛ nikasemɔ nɛɛ mli?

³ Yɛ nikasemɔ nɛɛ mli lɛ, wɔbaahã sanebimɔi komɛi ni kɔɔ gbalɛ ni yɔɔ 1 Mose 3:15 lɛ mli lɛ ahetoo. Nomɛi ji: Namɛi  awie amɛhe yɛ gbalɛ nɛɛ mli? Mɛɛ gbɛ nɔ gbalɛ nɛɛ eba mli? Ni mɛɛ gbɛ nɔ wɔnáa he sɛɛ?

4. Namɔ ji onufu lɛ? Ni te wɔfeɔ tɛŋŋ wɔleɔ enɛ?

⁴ Awie “onufu” ko, onufu lɛ ‘seshi,’ “yoo” ko, kɛ yoo lɛ ‘seshi’ lɛ he yɛ gbalɛ ni yɔɔ 1 Mose 3:14, 15 lɛ mli. Biblia lɛ yeɔ ebuaa wɔ ni wɔnaa mɔ ni amɛteŋ mɔ fɛɛ mɔ damɔ shi kɛhã. c Klɛŋklɛŋ lɛ, nyɛhãa wɔkwɛa mɔ ni “onufu lɛ” damɔ shi kɛhã. Onufu diɛŋtsɛ nyɛŋ anu nɔ ni Yehowa wie yɛ Eden abɔɔ lɛ mli lɛ shishi. No hewɔ lɛ, eyɛ faŋŋ akɛ be ni Yehowa kɛ onufu lɛ wieɔ lɛ, no mli lɛ, ekɛ bɔɔ nɔ ko ni le nii waa ni wieɔ lɛ. Namɔ ni? Kpojiemɔ 12:9 lɛ hãa wɔnaa mɔ ni onufu lɛ damɔ shi kɛhã. Efee lɛ faŋŋ yɛ jɛmɛ akɛ, “blema onufu lɛ” ji Satan Abonsam. Shi namɛi ji onufu lɛ seshi lɛ?

5. Namɛi ji onufu lɛ seshi lɛ?

⁵ Kɛ́ Biblia lɛ kɛ seshi tsu nii yɛ mfonirifeemɔ gbɛ nɔ lɛ, ekɔɔ mɛi ni susuɔ nii ahe ni amɛfeɔ amɛnii tamɔ mɔ ni akɛɛ amɛjɛ emli, ni ji amɛtsɛ lɛ he. No hewɔ lɛ, onufu lɛ seshi lɛ ji ŋwɛibɔfoi fɔji kɛ adesai ni feɔ amɛnii tamɔ Satan ni teɔ shi amɛwoɔ Yehowa Nyɔŋmɔ kɛ ewebii lɛ. Ŋwɛibɔfoi ni shi amɛnitsumɔ yɛ ŋwɛi ni amɛba shikpɔŋ lɛ nɔ yɛ Noa gbii lɛ amli kɛ adesai ni feɔ amɛnii tamɔ amɛtsɛ Abonsam lɛ fata he.​—1 Mo. 6:1, 2; Yoh. 8:44; 1 Yoh. 5:19; Yuda 6.

6. Mɛni hewɔ wɔnyɛŋ wɔkɛɛ akɛ “yoo lɛ” ji Hawa lɛ?

⁶ Agbɛnɛ, nyɛhãa wɔkwɛa akɛ namɔ ji “yoo lɛ.” Yoo lɛ nyɛŋ afee Hawa. Mɛni hewɔ? Naa yiŋtoo kome hewɔ. Awie yɛ gbalɛ lɛ mli  akɛ, yoo lɛ seshi lɛ ‘baajwara’ onufu lɛ yitso. Wɔna akɛ, onufu lɛ ji ŋwɛibɔfo fɔŋ ni atsɛɔ lɛ Satan lɛ. Shi akɛni Hawa seshibii lɛ ji adesai ni yeee emuu hewɔ lɛ, amɛnyɛŋ amɛjwara Satan yitso. Kɛ́ nakai ni lɛ, namɔ ji mɔ ni baanyɛ ajwara Satan yitso?

7. Yɛ nɔ ni awie yɛ Kpojiemɔ 12:1, 2, 5, 10 lɛ naa lɛ, namɔ ji yoo lɛ ni atsĩ etã yɛ 1 Mose 3:15 lɛ? Mɛni hewɔ wɔkɛɔ nakai?

⁷ Naagbee wolo ni yɔɔ Biblia lɛ mli lɛ yeɔ ebuaa wɔ ni wɔnaa mɔ ni yoo ni atsĩ etã yɛ 1 Mose 3:15 lɛ ji. (Kanemɔ Kpojiemɔ 12:1, 2, 5, 10.) Yoo nɛɛ jeee adesa, ejaakɛ akɛɛ nyɔɔŋtsere yɛ enajiashi, ni ŋulamii 12 akekere fi eyitso. Ni ole bi ni efɔ? Efɔ Nyɔŋmɔ Maŋtsɛyeli lɛ. Maŋtsɛyeli lɛ yɛ ŋwɛi. No hewɔ lɛ bɔ fɛɛ bɔ ni fee lɛ, yoo lɛ hu yɛ ŋwɛi. Kɛ́ nakai ni lɛ, namɔ edamɔ shi kɛhã? Edamɔ shi kɛhã Yehowa gbɛjianɔtoo lɛ fã ni yɔɔ ŋwɛi lɛ, ni ji ŋwɛibɔfoi anɔkwafoi lɛ.​—Gal. 4:26.

8. Namɔ ji mɔ titri ni feɔ yoo lɛ seshi lɛ? Ni mɛɛ be ená nakai hegbɛ lɛ? (1 Mose 22:15-18)

⁸ Nyɔŋmɔ Wiemɔ lɛ hãa wɔnaa mɔ titri ni feɔ yoo lɛ seshi lɛ. Egba akɛ, seshi nɛɛ baajɛ Abraham weku lɛ mli, ni nakai pɛpɛɛpɛ eba lɛ. (Kanemɔ 1 Mose 22:15-18.) Afɔ Yesu yɛ Abraham weku lɛ mli. (Luka 3:23, 34) Shi dani seshi lɛ baanyɛ ajwara Satan Abonsam yitso lɛ, esa akɛ efee mɔ ko ni yɔɔ hewalɛ fe adesai. Enɛ hewɔ lɛ, be ni Yesu ye aaafee afii 30 lɛ, akɛ mumɔ krɔŋkrɔŋ lɛ fɔ lɛ mu. Be ni afɔ Yesu mu lɛ, nakai beiaŋ ebatsɔ mɔ titri ni feɔ yoo lɛ seshi lɛ. (Gal. 3:16) Be ni Yesu gbo lɛ, Nyɔŋmɔ tee lɛ shi ni ‘ekɛ anunyam kɛ woo fi lɛ akekere,’ ni ekɛ ‘hegbɛ fɛɛ hã lɛ yɛ ŋwɛi kɛ shikpɔŋ lɛ nɔ’ koni “efite Abonsam nitsumɔi lɛ.”​—Heb. 2:7; Mat. 28:18; 1 Yoh. 3:8.

9-10. (a) Namɛi hu fata yoo lɛ seshi lɛ he? Ni mɛɛ be amɛbafataa he? (b) Mɛni he wɔbaasusu agbɛnɛ?

⁹ Shi mɛi krokomɛi baafata Yesu he kɛfee seshi lɛ. Namɛi ni? Nɔ ko ni bɔfo Paulo kɛɛ Yudafoi kɛ jeŋmajiaŋbii ni ebatsɔmɔ Kristofoi ni afɔ amɛ mu lɛ hãa wɔnaa mɛi ni ji. Ekɛɛ amɛ akɛ: “Kɛ́ Kristo nii ji nyɛ lɛ, belɛ Abraham seshi ji nyɛ lɛɛlɛŋ, niyelɔi yɛ shiwoo naa.” (Gal. 3:28, 29) Kɛ́ Yehowa kɛ mumɔ krɔŋkrɔŋ lɛ fɔ Kristofonyo ko mu lɛ, nakai mɔ lɛ bafataa yoo lɛ seshi lɛ he. No hewɔ lɛ, Yesu Kristo kɛ mɛi 144,000 ni baafata ehe kɛye maŋtsɛ lɛ ni feɔ seshi lɛ. (Kpo. 14:1) Amɛ fɛɛ amɛbɔɔ mɔdɛŋ akɛ amɛbaakase amɛ-Tsɛ Yehowa Nyɔŋmɔ ni amɛfee amɛnii tamɔ lɛ.

¹⁰ Amrɔ nɛɛ ni wɔna mɛi ni awie amɛhe yɛ 1 Mose 3:15 lɛ, nyɛhãa wɔkwɛa bɔ ni Yehowa ehã gbalɛ nɛɛ eba mli ehã kɛ bɔ ni wɔnáa he sɛɛ ŋmɛnɛ.

11. Mɛɛ shishinumɔ naa atswa yoo lɛ seshi lɛ ‘nanetsitsi’ nɔ?

¹¹ Gbalɛ ni yɔɔ 1 Mose 3:15 lɛ tsɔɔ akɛ, onufu lɛ baatswa yoo lɛ seshi lɛ ‘nanetsitsi’ nɔ. Gbalɛ nɛɛ ba mli be ni Satan hã Yudafoi lɛ kɛ Romabii lɛ gbe Nyɔŋmɔ Bi lɛ. (Luka 23:13, 20-24) Bɔ ni kɛ́ mɔ ko pila enanetsitsi lɛ enyɛɛɛ enyiɛ kɛyashi fala lɛ baagbo lɛ, nakai nɔŋŋ be ni agbe Yesu lɛ, ehi gbonyobu lɛ mli gbii etɛ ni enyɛɛɛ nɔ ko efee.​—Mat. 16:21.

12. Te Yesu baafee tɛŋŋ ejwara Satan yitso? Ni mɛɛ be ebaafee nakai?

¹² Gbalɛ ni yɔɔ 1 Mose 3:15 lɛ hã ana akɛ Yesu ekaŋ gbonyobu lɛ mli. Mɛni hewɔ wɔkɛɔ nakai? Gbalɛ lɛ wie akɛ seshi lɛ baajwara onufu lɛ yitso. Ja seshi lɛ nanetsitsi  fala lɛ egbo, ni tsɔɔ akɛ, ja atee Yesu shi dani ebaanyɛ efee nakai. Ni nakai pɛpɛɛpɛ eba lɛ. Yesu gbele lɛ sɛɛ gbii etɛ lɛ, atee lɛ shi akɛ mumɔŋ bɔɔ nɔ ni nyɛŋ agbo. Kɛ́ Nyɔŋmɔ be ni eto lɛ shɛ lɛ, Yesu baajwara Satan yitso, ni tsɔɔ akɛ ebaakpãtã ehiɛ kwraa. (Heb. 2:14) Kristo kɛ mɛi ni baafata ehe kɛye nɔ lɛ baajie onufu lɛ seshi lɛ, ni ji Nyɔŋmɔ henyɛlɔi fɛɛ kɛje shikpɔŋ lɛ nɔ.​—Kpo. 17:14; 20:4, 10. d

13. Mɛɛ gbɛ nɔ wɔnáa gbalɛ nɛɛ mlibaa lɛ he sɛɛ?

¹³ Nyɔŋmɔ tsuji fɛɛ ni ejɔɔ amɛhe nɔ amɛhã lɛ lɛ miiná gbalɛ nɛɛ he sɛɛ. Be ni Yesu ba shikpɔŋ lɛ nɔ akɛ adesa lɛ, efee enii tamɔ e-Tsɛ lɛ pɛpɛɛpɛ. (Yoh. 14:9) Be ni wɔkase Yesu he nii lɛ, no hã wɔbale Yehowa jogbaŋŋ ni wɔbasumɔ lɛ. Agbɛnɛ hu, nibii ni etsɔɔ wɔ kɛtsɔ Kristofoi asafo lɛ nɔ kɛ gbɛtsɔɔmɔi ni ekɛhãa wɔ lɛ eye ebua wɔ waa. Etsɔɔ wɔ nii koni wɔhi shi bɔ ni baahã Yehowa aná wɔhe miishɛɛ. Ni wɔ fɛɛ wɔmiiná Yesu gbele lɛ, ni ji enanetsitsi nɔ ni atswa lɛ he sɛɛ. Yɛ mɛɛ gbɛ nɔ? Be ni atee Yesu shi lɛ, Yehowa kpɛlɛ efɔleshãa lɛ nɔ koni etsɔ no nɔ ‘ehã wɔhe atse kɛje esha fɛɛ esha mli.’​—1 Yoh. 1:7.

14. Te wɔfeɔ tɛŋŋ wɔleɔ akɛ gbalɛ ni Yehowa gba yɛ Eden lɛ baaa mli amrɔ nɔŋŋ?

¹⁴ Wiemɔi ni Yehowa kɛtsu nii be ni egbaa gbalɛ lɛ yɛ Eden lɛ hã efee faŋŋ akɛ gbalɛ lɛ baŋ mli amrɔ nɔŋŋ. Mɛni hewɔ wɔkɛɔ nakai? Ebaahe be dani yoo lɛ baafɔ seshi ni awo he shi lɛ, ni ebaahe be dani Abonsam baaná mɛi abanyiɛ esɛɛ. Agbɛnɛ hu, ebaahe be dani nyɛɛ baabakã Abonsam webii lɛ kɛ yoo lɛ seshi lɛ teŋ. Ehi akɛ wɔbanu gbalɛ nɛɛ shishi, ejaakɛ ehãa wɔnaa akɛ je nɛɛ ni Satan kudɔɔ lɛ baanyɛ mɛi ni jáa Yehowa lɛ. Sɛɛ mli lɛ, Yesu bɔ ekaselɔi lɛ kɔkɔ yɛ nɔ ko ni tamɔ nɛkɛ nɔŋŋ he. (Mar. 13:13; Yoh. 17:14) Gbalɛ lɛ fã nɛɛ eba mli, titri lɛ yɛ afii 100 ni eho nɛɛ amli, ni wɔnaa enɛ faŋŋ. Mɛɛ gbɛ nɔ eba mli nakai?

15. Mɛni hewɔ je lɛ nyɛɔ wɔ waa fe be fɛɛ ni eho lɛ? Shi mɛni hewɔ esaaa akɛ wɔsheɔ Satan gbeyei?

¹⁵ Be ni awó Yesu Nyɔŋmɔ Maŋtsɛyeli lɛ nɔ maŋtsɛ yɛ afi 1914 lɛ sɛɛ etsɛɛɛ lɛ, ashwie Satan kɛjɛ ŋwɛi. Bianɛ lɛ, eyɛ shikpɔŋ lɛ nɔ ni nɔ ni mɛɔ lɛ ji hiɛkpatamɔ. (Kpo. 12:9, 12) Shi etaaa shi efolo. Emli efu Nyɔŋmɔ webii lɛ waa ni eetutua amɛ. (Kpo. 12:13, 17) Enɛ hewɔ Satan je lɛ nyɛɔ wɔ waa fe be fɛɛ ni eho lɛ. Shi wɔsheee Satan kɛ ewebii lɛ gbeyei ejaakɛ bɔ ni bɔfo Paulo nu he lɛ, nakai nɔŋŋ wɔ hu wɔnuɔ he. Ewie akɛ: “Kɛ́ Nyɔŋmɔ yɛ wɔgbɛfaŋ lɛ, namɔ baate shi awo wɔ?” (Rom. 8:31) Wɔbaanyɛ wɔkɛ wɔhiɛ afɔ̃ Yehowa nɔ kɛ wɔtsui muu fɛɛ ejaakɛ wɔbana akɛ gbalɛ ni yɔɔ 1 Mose 3:15 lɛ fãi pii eba mli momo.

16-18. Mɛɛ gbɛ nɔ Curtis, Ursula, kɛ Jessica ená gbalɛ ni yɔɔ 1 Mose 3:15 lɛ shishi ni amɛnu lɛ he sɛɛ?

¹⁶ Gbalɛ ni yɔɔ 1 Mose 3:15 lɛ baanyɛ aye abua wɔ ni wɔdamɔ naagba fɛɛ naagba ni wɔkɛbaakpe lɛ naa. Maŋsɛɛ sɔɔlɔ ko ni yɔɔ Guam ni atsɛɔ lɛ Curtis lɛ wie akɛ: “Bei komɛi lɛ, mikɛ naagbai komɛi kpeɔ ni ehãa ewaa kɛhãa mi akɛ maye Yehowa anɔkwa. Shi mijwɛŋɔ gbalɛ ni yɔɔ 1 Mose 3:15 lɛ nɔ ni no yeɔ ebuaa mi ni miyaa nɔ mikɛ mihiɛ fɔ̃ɔ mi-Tsɛ ni yɔɔ ŋwɛi lɛ nɔ.” Curtis le akɛ, etsɛŋ Yehowa baahã wɔnaagbai fɛɛ sɛɛ afo.

 ¹⁷ Nyɛmi yoo ko ni yɔɔ Bavaria yɛ Germany ni atsɛɔ lɛ Ursula lɛ wie akɛ, 1 Mose 3:15 lɛ shishi ni ebanu lɛ eye ebua lɛ ni ena akɛ, Biblia lɛ ji Nyɔŋmɔ Wiemɔ. Eyɔse akɛ gbalɛi krokomɛi fɛɛ ni yɔɔ Biblia lɛ mli lɛ kɛ gbalɛ nɛɛ yɛ tsakpaa, ni enɛ ta etsuiŋ waa. Ewie hu akɛ: “Be ni mina akɛ Yehowa fee nɔ ko amrɔ nɔŋŋ koni adesai aná hiɛnɔkamɔ lɛ, ehã mibasumɔ lɛ waa.”

¹⁸ Nyɛmi yoo ko ni jɛ Micronesia ni atsɛɔ lɛ Jessica lɛ wie akɛ: “Mikaiɔ bɔ ni minu he mihã be ni mina akɛ anɔkwale lɛ nɛ lɛ waa. Mina akɛ gbalɛ ni yɔɔ 1 Mose 3:15 lɛ miiba mli. Enɛ eye ebua mi ni mina akɛ bɔ ni nibii yaa lɛ ŋmɛnɛ yɛ shihilɛ mli lɛ, jeee nakai Yehowa taoɔ ni nibii aya lɛ. Gbalɛ nɛɛ ehã hemɔkɛyeli ni miyɔɔ akɛ kɛ́ misɔmɔ Yehowa lɛ maná he sɛɛ bianɛ ni wɔsɛɛ hu lɛ maná naanɔ wala lɛ mli ewa.”

19. Mɛni hewɔ wɔbaanyɛ wɔhe wɔye akɛ gbalɛ lɛ naagbee fã lɛ hu baaba mli lɛ?

¹⁹ Tamɔ bɔ ni wɔna lɛ, gbalɛ ni yɔɔ 1 Mose 3:15 lɛ miiba mli. Wɔna mɛi ni ji yoo lɛ seshi lɛ kɛ mɛi ni ji onufu lɛ seshi lɛ faŋŋ. Yesu, ni ji mɔ titri ni feɔ yoo lɛ seshi lɛ nanetsitsi fala lɛ egbo, ni amrɔ nɛɛ eeye nɔ akɛ Maŋtsɛ yɛ ŋwɛi ni enyɛŋ egbo kɔkɔɔkɔ. Eshwɛ fioo ni abaagbe mɛi krokomɛi ni fataa ehe kɛfeɔ yoo lɛ seshi lɛ ahalamɔ lɛ naa. Bɔ ni gbalɛ lɛ klɛŋklɛŋ fã lɛ eba mli lɛ hãa wɔnáa hemɔkɛyeli ni mli wa akɛ enaagbee fã lɛ, ni ji onufu lɛ yitso lɛ ni abaajwara lɛ hu baaba mli. Kɛ́ akpãtã Satan hiɛ lɛ, Nyɔŋmɔ tsuji baaná miishɛɛ waa. No hewɔ lɛ, kaahã onijiaŋ je wui. Nɔ fɛɛ nɔ ni Yehowa ewie lɛ baaba mli. Ebaatsɔ yoo lɛ seshi lɛ nɔ ejɔɔ “shikpɔŋ lɛ nɔ jeŋmaji fɛɛ.”​—1 Mo. 22:18.