NIKASEMƆ 29
Fi Yesu, Wɔ-Nɔkwɛlɔ Lɛ Sɛɛ
“Akɛ hegbɛ fɛɛ ehã mi yɛ ŋwɛi kɛ shikpɔŋ lɛ nɔ.”—MAT. 28:18.
LALA 13 Kristo Ji Wɔ-Nɔkwɛmɔnɔ
NƆ NI ABAASUSU HE a
1. Mɛni Yehowa miisumɔ ni afee ŋmɛnɛ?
ŊMƐNƐ lɛ, Yehowa miisumɔ ni ashiɛ Maŋtsɛyeli lɛ he sane kpakpa lɛ ahã mɔ fɛɛ mɔ yɛ je lɛ mli. (Mar. 13:10; 1 Tim. 2:3, 4) Nitsumɔ nɛɛ kã Yehowa tsui nɔ waa. No hewɔ lɛ, ehala Yesu, e-Bi ni esumɔɔ lɛ lɛ koni ekwɛ nɔ. Wɔle akɛ, Yesu baakwɛ shiɛmɔ nitsumɔ lɛ nɔ jogbaŋŋ, ni ebaakwɛ ni atsu lɛ bɔ ni Yehowa taoɔ lɛ lɛ pɛpɛɛpɛ dani naagbee lɛ aba.—Mat. 24:14.
2. Mɛni he wɔbaasusu yɛ nikasemɔ nɛɛ mli?
2 Yɛ nikasemɔ nɛɛ mli lɛ, wɔbaakwɛ bɔ ni Yesu tsɔɔ “nyɔŋ anɔkwafo kɛ hiɛshikalɔ lɛ” nɔ etsɔɔ esɛɛnyiɛlɔi lɛ nii kɛjɛɔ Nyɔŋmɔ Wiemɔ lɛ mli, ni etoɔ amɛhe gbɛjianɔ ni amɛshiɛ kɛkpele je lɛ fɛɛ bɔ ni anako enɔ dã. (Mat. 24:45) Agbɛnɛ hu, wɔbaakwɛ nɔ ni wɔteŋ mɔ fɛɛ mɔ baanyɛ efee kɛfi Yesu kɛ nyɔŋ anɔkwafo lɛ sɛɛ.
YESU NI KWƐƆ SHIƐMƆ NITSUMƆ LƐ NƆ
3. Mɛɛ hegbɛ ahã Yesu?
3 Yesu ni kwɛɔ shiɛmɔ nitsumɔ lɛ nɔ. Mɛni hewɔ wɔwieɔ nakai? Be ni eshwɛ fioo ni Yesu baaya ŋwɛi lɛ, ekɛ esɛɛnyiɛlɔi anɔkwafoi komɛi kpe yɛ gɔŋ ko nɔ yɛ Galilea. Be ni ekɛ amɛ kpe lɛ, ekɛɛ amɛ akɛ: “Akɛ hegbɛ fɛɛ ehã mi yɛ ŋwɛi kɛ shikpɔŋ lɛ nɔ.” Kɛkɛ ni ekɛfata he akɛ: “No hewɔ lɛ, nyɛyaa nyɛyafea mɛi ni jɛ jeŋmaji lɛ fɛɛ amli lɛ kaselɔi.” (Mat. 28:18, 19) Nɔ ni Yesu wie lɛ sa kadimɔ waa, ejaakɛ ehãa wɔnaa akɛ ahã lɛ hegbɛ koni ekwɛ shiɛmɔ nitsumɔ lɛ nɔ.
4. Mɛni hewɔ wɔbaanyɛ wɔwie kɛ nɔmimaa akɛ Yesu nɔŋŋ ni kwɛɔ wɔshiɛmɔ nitsumɔ lɛ nɔ yɛ wɔbei nɛɛ amli?
4 Yesu wie akɛ, abaashiɛ ahã mɛi ni afee amɛ kaselɔi yɛ “jeŋmaji lɛ fɛɛ amli,” ni ewie hu akɛ, ekɛ esɛɛnyiɛlɔi lɛ baahi shi “kɛyashi je lɛ naagbee gbii lɛ amli.” (Mat. 28:20) Nɔ ni ewie nɛɛ hãa wɔnaa faŋŋ akɛ, abaatsu shiɛmɔ nitsumɔ lɛ kɛbashi wɔbei nɛɛ amli, ni Yesu nɔŋŋ baakwɛ nɔ.
5. Mɛɛ gbɛ nɔ wɔhãa gbalɛ ni yɔɔ Lala 110:3 lɛ baa mli?
5 Yesu le akɛ bɔ fɛɛ bɔ ni fee lɛ, abaaná mɛi atsu shiɛmɔ nitsumɔ lɛ yɛ naagbee gbii lɛ amli. Ele akɛ, nɔ ni lalatsɛ lɛ gba lɛ baaba mli. Egba akɛ: “Omaŋbii lɛ baajɛ amɛsuɔmɔ mli amɛkɛ amɛhe ahã yɛ ota gbi lɛ nɔ.” (Lala 110:3) Kɛ́ ootsu shiɛmɔ nitsumɔ lɛ eko lɛ, belɛ oofi Yesu kɛ nyɔŋ anɔkwafo lɛ sɛɛ ni oohã gbalɛ nɛɛ hu miiba mli. Wɔmiitsu shiɛmɔ nitsumɔ lɛ waa, shi wɔkɛ naagbai hu miikpe.
6. Mɛni ji naagba kome ni mɛi ni shiɛɔ sane kpakpa lɛ kɛkpeɔ ŋmɛnɛ?
6 Naagbai ni wɔkɛkpeɔ lɛ ekome ji, mɛi teɔ shi amɛwoɔ wɔ yɛ shiɛmɔ nitsumɔ lɛ ni wɔtsuɔ lɛ hewɔ. Mɛi ni ekwa anɔkwa jamɔ lɛ, jamɔŋ hiɛnyiɛlɔ, kɛ amralofoi komɛi ewie wiemɔi ni bɛ mli yɛ shiɛmɔ nitsumɔ lɛ he, ni enɛ ehã mɛi pii ená jwɛŋmɔ ni ejaaa yɛ shiɛmɔ nitsumɔ lɛ ni wɔtsuɔ lɛ he. Kɛ́ wɔwekumɛi, wɔnanemɛi, kɛ mɛi ni wɔkɛtsuɔ nii lɛ he amalei nɛɛ amɛye lɛ, ewaaa akɛ amɛbaanyɛ wɔnɔ ni wɔkpa Yehowa jamɔ, ni wɔkpa shiɛmɔ hu. Yɛ maji komɛi anɔ lɛ, awoɔ wɔnyɛmimɛi lɛ ahe gbeyei, atutua amɛ, amɔmɔɔ amɛ ni awoɔ amɛtsuŋ po yɛ shiɛmɔ ni amɛshiɛɔ hewɔ. Shi enɛ efeee wɔ naakpɛɛ, ejaakɛ Yesu gba akɛ: “Jeŋmaji lɛ fɛɛ baanyɛ nyɛ yɛ migbɛ́i lɛ hewɔ.” (Mat. 24:9) Anɔkwa, wɔyi ni awaa lɛ po tsɔɔ akɛ wɔmiifee Yehowa suɔmɔnaa nii. (Mat. 5:11, 12) Abonsam ni hãa mɛi teɔ shi amɛwoɔ wɔ lɛ. Shi wɔle akɛ, enyɛŋ Yesu. Yesu fiɔ wɔsɛɛ, no hewɔ lɛ, ŋmɛnɛ lɛ, aashiɛ sane kpakpa lɛ yɛ he fɛɛ he.
7. Mɛni hãa onaa akɛ Kpojiemɔ 14:6, 7 lɛ miiba mli?
7 Naagba kroko ni wɔkɛkpeɔ ji, mɛi ni esa akɛ wɔshiɛ wɔhã lɛ wieɔ wiemɔi srɔtoisrɔtoi pii. Ani enɛ baahã wɔkpa sane kpakpa lɛ shiɛmɔ? Dabi kwraa. Yɛ ninaa ni Yesu jie lɛ kpo etsɔɔ Yohane lɛ mli lɛ, egba akɛ yɛ wɔbei nɛɛ amli lɛ, abaashiɛ sane kpakpa lɛ yɛ wiemɔ fɛɛ wiemɔ mli. (Kanemɔ Kpojiemɔ 14:6, 7.) Gbalɛ nɛɛ miiba mli ŋmɛnɛ. Akɛ nɔkwɛmɔnɔ lɛ, mɛi ni yɔɔ je lɛŋ he fɛɛ he baanyɛ akane Biblia mli saji yɛ jw.org wɛbsaiti lɛ nɔ ejaakɛ saji yɛ wɛbsaiti lɛ nɔ yɛ wiemɔi ni fa fe 1,000 mli. Agbɛnɛ hu, Gbɛtsɔɔmɔ Kuu lɛ ekpɛlɛ ni atsɔɔ Oyi Aná Wala Kɛya Naanɔ! wolo lɛ, ni ji wolo titri ni wɔkɛfeɔ mɛi kaselɔi lɛ shishi kɛya wiemɔ 700 kɛ sɛɛ amli. Kɛfata he lɛ, afee vidioi ahã toimulɔi kɛ braille woji hu ahã shwilafoi koni akɛtsɔɔ amɛ Yehowa he nii. Nibii ni wɔtsĩ tã nɛɛ ahewɔ lɛ, mɛi pii enu Maŋtsɛyeli lɛ he sane kpakpa lɛ. Biblia lɛ gba akɛ, mɛi ni “jɛ jeŋmaji lɛ anɔ wiemɔi lɛ fɛɛ amli” lɛ baakase “wiemɔ krɔŋŋ” lɛ, ni ji Nyɔŋmɔ he anɔkwa saji ni yɔɔ Nyɔŋmɔ Wiemɔ lɛ mli lɛ. (Zak. 8:23; Zef. 3:9) Gbalɛ nɛɛ miiba mli ejaakɛ Yesu Kristo miikwɛ shiɛmɔ nitsumɔ lɛ nɔ jogbaŋŋ.
8. Ŋmɛnɛ lɛ, mɛɛ yibii kpakpai wɔshiɛmɔ nitsumɔ lɛ ewo?
8 Ŋmɛnɛ lɛ, mɛi 8,000,000 kɛ sɛɛ ni jɛ maji 240 anɔ yɛ Yehowa asafo lɛ mli, ni daa afi lɛ abaptisiɔ mɛi akpei abɔ. Nɔ ni sa kadimɔ yɛ kaselɔi hei nɛɛ ahe lɛ jeee amɛyifalɛ, shi moŋ “subaŋ hee lɛ,” ni ji Kristofoi asui ni amɛjieɔ lɛ kpo lɛ. (Kol. 3:8-10) Amɛteŋ mɛi pii yɛ ni no mli lɛ, amɛjeŋba ekpɔtɔ, amɛyeɔ mɛi awui, amɛkɛ mɛi ni esoro amɛhewolo nɔ su loo he ni amɛjɛ lɛ yeee jogbaŋŋ, ni amɛbuɔ amɛmaŋ lɛ akɛ enɔ kwɔ fe maji krokomɛi fɛɛ. Shi ŋmɛnɛ lɛ, amɛkpa nibii nɛɛ fɛɛ. Amɛhã gbalɛ ni yɔɔ Yesaia 2:4 lɛ eba mli, ejaakɛ ‘amɛkaseee tawuu dɔŋŋ.’ Kɛ́ wɔbɔ mɔdɛŋ wɔwo subaŋ hee lɛ, ebaagbala mɛi kɛba Yehowa asafo lɛ mli, ni ebaatsɔɔ hu akɛ wɔnyiɛ Yesu, ni ji wɔ-Nɔkwɛlɔ lɛ sɛɛ. (Yoh. 13:35; 1 Pet. 2:12) Lɛ ji mɔ ni yeɔ ebuaa wɔ ni wɔnyɛɔ wɔfeɔ nibii nɛɛ fɛɛ.
YESU EHALA NYƆŊ KO ETO EWEBII LƐ ANƆ
9. Yɛ nɔ ni aŋma yɛ Mateo 24:45-47 lɛ naa lɛ, mɛni Yesu gba akɛ ebaafee yɛ naagbee gbii lɛ amli?
9 Kanemɔ Mateo 24:45-47. Yesu gba akɛ yɛ naagbee gbii lɛ amli lɛ, ebaahala “nyɔŋ anɔkwafo kɛ hiɛshikalɔ” eto ewebii lɛ anɔ koni ejɛ Nyɔŋmɔ Wiemɔ lɛ mli etsɔɔ amɛ nii. No hewɔ lɛ, esa akɛ wɔkpa gbɛ akɛ wɔbaaná nyɔŋ ko yɛ wɔbei nɛɛ amli ni baatsu nii waa, ni eba mli nakai. Yesu, ni ji wɔ-Nɔkwɛlɔ lɛ etsɔ mɛi ni afɔ amɛ mu lɛ ateŋ hii fioo ko ni tsuɔ ni akɛ kuu lɛ anɔ ehã Nyɔŋmɔ webii lɛ kɛ mɛi ni yɔɔ wiemɔ lɛ he miishɛɛ lɛ ‘niyenii yɛ be ni sa mli.’ Hii nɛɛ enaaa amɛhe akɛ amɛji amɛnyɛmimɛi lɛ ahemɔkɛyeli lɛ nɔ nuŋtsɔmɛi. (2 Kor. 1:24) Shi moŋ amɛhãa ehiɔ amɛjwɛŋmɔŋ akɛ, Yesu Kristo ji Nyɔŋmɔ webii lɛ ‘ahiɛnyiɛlɔ kɛ tatsɛ.’—Yes. 55:4.
10. Woji ni onaa yɛ mfoniri lɛ mli lɛ ateŋ te nɔ ni ye ebua bo ni obayi wala gbɛ lɛ nɔ?
10 Kɛjɛ afi 1919 kɛbaa nɛɛ, nyɔŋ anɔkwafo lɛ efee woji srɔtoi koni akɛye abua mɛi ni yɔɔ wiemɔ lɛ he miishɛɛ lɛ ni amɛbale Yehowa. Akɛ nɔkwɛmɔnɔ lɛ, yɛ afi 1921 lɛ, nyɔŋ lɛ fee wolo ni ji, The Harp of God lɛ koni eye ebua mɛi ni yɔɔ wiemɔ lɛ he miishɛɛ lɛ ni amɛle Biblia mli anɔkwalei ni esa akɛ mɔ fɛɛ mɔ ale klɛŋklɛŋ lɛ. Sɛɛ mli lɛ, afee woji krokomɛi hu. Nomɛi ji, “Hã Nyɔŋmɔ Afee Anɔkwafo,” Anɔkwale Ni Kɛ Mɔ Yaa Naanɔ Wala Mli Lɛ, Obaanyɛ Ohi Shi Kɛya Naanɔ Yɛ Paradeiso Yɛ Shikpɔŋ Nɔ, Nilee Ni Kɛ Mɔ Yaa Naanɔ Wala Mli, Mɛni Biblia Lɛ Tsɔɔ Diɛŋtsɛ?, Mɛni Wɔbaanyɛ Wɔkase Kɛjɛ Biblia Lɛ Mli?, kɛ Oyi Aná Wala Kɛya Naanɔ! ni afee nyɛsɛɛ nɛɛ nɔŋŋ lɛ. Woji nɛɛ ateŋ te nɔ ni ye ebua bo ni obale Yehowa ni obɔi lɛ sɔɔmɔ? Afee woji nɛɛ koni eye ebua wɔ ni wɔfee mɛi kaselɔi, ni eko fɛɛ eko ba yɛ ebe naa diɛŋtsɛ.
11. Mɛni hewɔ ehe hiaa waa ni wɔ fɛɛ wɔkase Biblia lɛ ni wɔle Yehowa jogbaŋŋ?
11 Jeee mɛi ni yɔɔ wiemɔ lɛ he miishɛɛ lɛ pɛ esa akɛ amɛkase Biblia lɛ ni amɛle Yehowa jogbaŋŋ. Esa akɛ wɔ fɛɛ wɔfee nakai. Bɔfo Paulo ŋma akɛ: “Mɛi ni edara lɛ anɔ ji niyenii ni tsii.” Ekɛfata he akɛ, kɛ́ wɔye niyenii ni tamɔ nɛkɛ lɛ, ebaaye ebua wɔ ‘ni wɔle ekpakpa kɛ efɔŋ mlikpamɔ.’ (Heb. 5:14) Ŋmɛnɛ lɛ, mɛi ajeŋba ekpɔtɔ, ni enɛ baanyɛ ahã ewa kɛhã wɔ akɛ wɔbaaba wɔjeŋ bɔ ni Yehowa taoɔ. Shi Yesu kwɛɔ koni wɔná nibii ni baahã wɔhemɔkɛyeli lɛ mli awa koni wɔhi shi tamɔ bɔ ni Yehowa sumɔɔ. Biblia lɛ, ni ji Nyɔŋmɔ Wiemɔ lɛ mli ajɛɔ ahãa wɔ niyenii nɛɛ. Nyɔŋ anɔkwafo lɛ ni hoɔ niyenii nɛɛ ni amɛjaa, ni Yesu ni kwɛɔ ni amɛfeɔ nakai.
12. Mɛɛ gbɛ nɔ wɔwo Nyɔŋmɔ gbɛ́i lɛ hiɛ nyam tamɔ bɔ ni Yesu fee lɛ?
12 Yesu wo Nyɔŋmɔ gbɛ́i lɛ hiɛ nyam, ni nakai nɔŋŋ wɔ hu wɔfeɔ. (Yoh. 17:6, 26) Akɛ nɔkwɛmɔnɔ lɛ, yɛ afi 1931 lɛ, wɔhã abɔi wɔ tsɛmɔ akɛ Yehowa Odasefoi. Gbɛ́i nɛɛ jɛ Biblia lɛ mli, ni wɔhala akɛ atsɛ wɔ nakai ejaakɛ wɔmiisumɔ ni akɛ wɔ-Tsɛ ni yɔɔ ŋwɛi lɛ gbɛ́i ale wɔ. (Yes. 43:10-12) Kɛjɛ October 1931 lɛ, anaa Yehowa gbɛ́i lɛ yɛ Buu-Mɔɔ lɛ eko fɛɛ eko hiɛ. Agbɛnɛ hu, kɛ́ okwɛ Ŋmalɛ Krɔŋkrɔŋ Lɛ—Jeŋ Hee Shishitsɔɔmɔ lɛ mli lɛ, onaa Yehowa gbɛ́i lɛ yɛ he fɛɛ he ni esa akɛ ehi lɛ. Shi jeee nakai kwraa eji yɛ Bibliai ni Kristendom sɔlemɔi lɛ tsɔɔ shishi lɛ amli. Amɛ lɛ, amɛjie Nyɔŋmɔ gbɛ́i lɛ kɛje amɛshishitsɔɔmɔi lɛ pii amli.
YESU ETO EWEBII LƐ AHE GBƐJIANƆ
13. Mɛni hãa onaa akɛ Yesu kɛ “nyɔŋ anɔkwafo kɛ hiɛshikalɔ” lɛ miitsu nii ŋmɛnɛ? (Yohane 6:68)
13 Yesu etsɔ “nyɔŋ anɔkwafo kɛ hiɛshikalɔ” lɛ nɔ eto ewebii lɛ ahe gbɛjianɔ jogbaŋŋ yɛ shikpɔŋ lɛ nɔ koni jamɔ krɔŋŋ ashwere. Ani eŋɔɔɔ onaa akɛ ofata asafo ni tamɔ nɛkɛ he? Ekolɛ onuɔ he tamɔ bɔ ni bɔfo Petro nu he lɛ nɔŋŋ. Ekɛɛ Yesu akɛ: “Namɔ ŋɔɔ wɔbaaya? Bo oyɔɔ naanɔ wala wiemɔi lɛ.” (Yoh. 6:68) Eji wɔbaleko Yehowa asafo lɛ kulɛ benɛ nɛɛ nɛgbɛ wɔyɔɔ? Kristo tsɔɔ asafo lɛ nɔ ehãa wɔ nɔ fɛɛ nɔ ni he hiaa wɔ koni wɔnyɛ wɔye Nyɔŋmɔ anɔkwa. Agbɛnɛ hu, etsɔseɔ wɔ koni wɔnyɛ wɔtsu shiɛmɔ nitsumɔ lɛ jogbaŋŋ, ni eyeɔ ebuaa wɔ koni wɔnyɛ wɔwo “subaŋ hee” lɛ ni wɔsa Yehowa hiɛ.—Efe. 4:24.
14. Mɛɛ gbɛ nɔ oná gbɛtsɔɔmɔi ni Yehowa asafo lɛ kɛhã yɛ COVID-19 be nɛɛ mli lɛ he sɛɛ?
14 Yesu kɛ gbɛtsɔɔmɔi ni sa hãa wɔ yɛ shihilɛi ni mli wawai amli, ni be fɛɛ be lɛ, wɔnáa gbɛtsɔɔmɔi nɛɛ ahe sɛɛ. Enɛ he nɔkwɛmɔnɔ ji gbɛtsɔɔmɔi ni akɛhã wɔ be ni COVID-19 hela lɛ je shishi lɛ. Be ni mɛi nyiɛ je lɛ mli ni amɛleee nɔ ni amɛbaafee lɛ, Yesu hã akɛ gbɛtsɔɔmɔi ni yɔɔ faŋŋ hã wɔ koni ebu wɔhe. Awo wɔ hewalɛ ni wɔbu face mask ni wɔhã gbɛ akã wɔ kɛ mɛi ateŋ. Awo asafoŋ onukpai lɛ hewalɛ ni amɛfɔ nyɛmimɛi lɛ ashibimɔ, ni agbɛnɛ hu, amɛye amɛbua amɛ ni amɛhi shi shweshweeshwe, ni amɛwa amɛ koni wekukpãa kpakpa ahi amɛ kɛ Yehowa teŋ. (Yes. 32:1, 2) Nɔ kroko hu ni wo wɔ hewalɛ waa ji, Gbɛtsɔɔmɔ Kuu lɛ amaniɛbɔi srɔtoi lɛ.
15. Mɛɛ gbɛtsɔɔmɔi akɛhã yɛ bɔ ni esa akɛ wɔfee wɔsafoŋ kpeei kɛ bɔ ni esa akɛ wɔtsu shiɛmɔ nitsumɔ lɛ wɔhã yɛ COVID-19 be nɛɛ mli lɛ he? Ni mɛni ejɛ mli kɛba?
15 Yɛ COVID-19 be nɛɛ mli lɛ, akɛ gbɛtsɔɔmɔ ni kɔɔ bɔ ni esa akɛ wɔfee wɔsafoŋ kpeei kɛ bɔ ni esa akɛ wɔtsu shiɛmɔ nitsumɔ lɛ wɔhã lɛ hu hã wɔ. Yɛ be kukuoo mli lɛ, wɔ fɛɛ wɔbɔi asafoŋ kpeei, kpeei bibii, kɛ kpeei wuji yaa yɛ Intanɛt lɛ nɔ. Agbɛnɛ hu, gbɛ titri ni wɔtsɔɔ nɔ wɔyeɔ odase ji, kɛtsɔ lɛta ŋmaa kɛ tɛlifoŋ nɔ. Yehowa ejɔɔ wɔnitsumɔ lɛ nɔ. Nitsumɔhe niji babaoo ebɔ amaniɛ akɛ, shiɛlɔi abɔ ni yɔɔ amɛshikpɔŋkuku lɛ mli lɛ yibɔ lɛ etee hiɛ waa. Nyɛmimɛi babaoo ená niiashikpamɔi ni woɔ mɔ hewalɛ waa yɛ be nɛɛ mli.—Kwɛmɔ akrabatsa ni yitso ji, “ Yehowa Ejɔɔ Wɔshiɛmɔ Nitsumɔ Lɛ Nɔ.”
16. Kɛ́ wɔjwɛŋ bɔ ni nibii etee lɛ yɛ COVID-19 be nɛɛ mli lɛ he lɛ, mɛɛ nɔmimaa ehãa wɔnáa?
16 Mɛi komɛi nu he akɛ Yehowa asafo lɛ miitsere nɔ ko tsɔ yɛ gbɛtsɔɔmɔi ni ekɛhã yɛ COVID-19 lɛ he lɛ ahewɔ. Shi tamɔ bɔ ni eji be fɛɛ be lɛ, wɔ fɛɛ wɔna akɛ nilee yɛ gbɛtsɔɔmɔi ni akɛhã wɔ lɛ amli. (Mat. 11:19) Kɛ́ wɔjwɛŋ bɔ ni Yesu nyiɛɔ wɔhiɛ lɛ he lɛ, wɔnaa akɛ esumɔɔ wɔ waa. Ni no hu hãa wɔnaa akɛ, ekɔɔɔ he eko nɔ ni baaba wɔsɛɛ lɛ, Yehowa kɛ e-Bi ni esumɔɔ lɛ lɛ shiŋ wɔ.—Kanemɔ Hebribii 13:5, 6.
17. Te le ni ole akɛ Yesu ji wɔ-Nɔkwɛlɔ lɛ hãa onuɔ he ohãa tɛŋŋ?
17 Eŋɔɔ wɔnaa waa akɛ Yesu ji wɔ-Nɔkwɛlɔ. Yesu etsɔ asafo lɛ nɔ eye ebua wɔ koni bɔ ni atsɔse wɔ ahã, maŋ nɔ ni wɔjɛ, kɛ wiemɔ ni wɔwieɔ lɛ akagbála wɔmli. Ajɛɔ Nyɔŋmɔ Wiemɔ lɛ mli akɛ gbɛtsɔɔmɔi hãa wɔ ni atsɔseɔ wɔ koni wɔnyɛ wɔtsu shiɛmɔ nitsumɔ lɛ jogbaŋŋ. Ayeɔ abuaa wɔ koni wɔnyɛ wɔwo subaŋ hee lɛ, ni agbɛnɛ hu wɔjie suɔmɔ kpo wɔtsɔɔ wɔhe. Wɔmiida Yehowa shi waa akɛ ehala Yesu akɛ wɔ-Nɔkwɛlɔ!
LALA 16 Nyɛjiea Yehowa Yi Yɛ E-Bi Ni Afɔ Lɛ Mu Lɛ Hewɔ
a Ŋmɛnɛ lɛ, hii, yei, kɛ gbekɛbii akpekpei abɔ kɛ ekãa miishiɛ sane kpakpa lɛ. Ani ofata amɛhe? Kɛ́ nakai lɛ, belɛ ootsu nii yɛ wɔ-Nuŋtsɔ Yesu Kristo, ni ji wɔ-Nɔkwɛlɔ lɛ shishi. Yɛ nikasemɔ nɛɛ mli lɛ, wɔbaakwɛ nibii komɛi ni tsɔɔ akɛ Yesu miikwɛ wɔshiɛmɔ nitsumɔ lɛ nɔ ŋmɛnɛ. Kɛ́ wɔsusu nibii nɛɛ ahe lɛ, ebaahã wɔfai shi ni wɔtswa akɛ wɔbaaya nɔ wɔsɔmɔ Yehowa ni wɔhã Yesu atsɔɔ wɔ gbɛ lɛ mli awa.
