Wɔ fɛɛ wɔbɛ dekã kwraa, no hewɔ lɛ, be fioo pɛ wɔnáa kɛfeɔ aŋkro nikasemɔ. Mɛni obaanyɛ ofee koni okɛ be nɛɛ atsu nii jogbaŋŋ ni oná he sɛɛ? Klɛŋklɛŋ lɛ, esa akɛ oto otsui shi. Kɛ́ oto otsui shi okase nii, ni nɔ ni okase lɛ faaa po lɛ, obaaná he sɛɛ fe nɔ ni okɛ oyaiyeli baakase nibii babaoo.

Agbɛnɛ hu, too onibii ahe gbɛjianɔ koni ona nɔ ni esa akɛ okase klɛŋklɛŋ. (Efe. 5:15, 16) Bɔ ni obaanyɛ oto he gbɛjianɔ ohã yɛ otsi lɛ mli lɛ he nɔkwɛmɔnɔ nɛ:

• Daa gbi lɛ, kanemɔ Biblia lɛ. (Lala 1:2) Ebaahi waa akɛ okɛ Biblia lɛ mli yitsei ni atsɔɔ akɛ wɔkane nakai otsi lɛ yɛ Wɔshiɛmɔ Kɛ Wɔshihilɛ Akɛ Kristofoi​—Kpee Nifeemɔ Wolo lɛ mli lɛ baaje shishi.

• Saamɔ ohe kɛhã Buu-Mɔɔ Nikasemɔ lɛ kɛ nibii ni abaakase yɛ otsi teŋ kpee lɛ shishi lɛ. Saamɔ ohe akɛ obaahã hetoo.​—Lala 22:22.

• Kɛ́ oyɛ be lolo lɛ, kanemɔ Buu-Mɔɔ lɛ, maŋbii anɔ lɛ; Awake! lɛ; nibii ni akɛwo jw.org lɛ nɔ lɛ; loo okwɛ vidioi srɔtoi lɛ.

• Kɔ sane ko ni otao mli. Akɛ nɔkwɛmɔnɔ lɛ, obaanyɛ otao sane ko ni miigba onaa, sanebimɔ ko ni oyɔɔ, loo Biblia mli sane ko ni ootao onu shishi jogbaŋŋ lɛ mli. Obaana nibii krokomɛi hu ni obaanyɛ okase yɛ jw.org lɛ fã ni ji, “Biblia Kasemɔ Nifeemɔi” lɛ.