NIKASEMƆ 28
LALA 123 Ba Ohe Shi Ohã Teokrase Gbɛtsɔɔmɔ
Ani Obaanyɛ Otsɔɔ Kɛji Sane Ko Ji Anɔkwale Aloo Eji Amale?
“Nyɛdamɔa shi shiŋŋ, be mli ni nyɛkɛ anɔkwale efi nyɛhɛ akɛ bɛlti.”—EFE. 6:14.
NƆ NI WƆBAAKASE
Bɔ ni wɔbaafee wɔtsɔse wɔhe koni wɔnyɛ wɔna kɛji sane ko ji anɔkwale ni ejɛ Yehowa ŋɔɔ, aloo eji amale ni ejɛ Satan kɛ wɔhenyɛlɔi lɛ aŋɔɔ.
1. Te onaa anɔkwale lɛ ohãa tɛŋŋ?
WƆSUMƆƆ anɔkwale lɛ, ni ji nibii ni wɔkase yɛ Nyɔŋmɔ Wiemɔ lɛ mli lɛ. Nibii nɛɛ anɔ wɔhemɔkɛyeli lɛ damɔ. (Rom. 10:17) Wɔbana ni wɔhe wɔye akɛ, Yehowa to Kristofoi asafo lɛ shishi koni etsɔ “anɔkwale lɛ akulashiŋ kɛ enɔdaamɔnɔ.” (1 Tim. 3:15) Agbɛnɛ hu, wɔjɛɔ wɔtsuiŋ wɔbaa wɔhe wɔhãa mɛi ni nyiɛɔ hiɛ yɛ wɔteŋ lɛ, ni kɛ́ amɛjɛ Biblia lɛ mli amɛgbala anɔkwale lɛ mli amɛhã wɔ loo amɛhã wɔ gbɛtsɔɔmɔi ni baaye abua wɔ ni wɔfee Nyɔŋmɔ suɔmɔnaa nii lɛ, wɔboɔ toi ni wɔkɛtsuɔ nii.—Heb. 13:17.
2. Yɛ nɔ ni awie yɛ Yakobo 5:19 lɛ naa lɛ, mɛni baanyɛ aba be ni wɔbale anɔkwale lɛ po?
2 Shi be ni wɔbale anɔkwale lɛ ni wɔbahe wɔye akɛ esa akɛ wɔkɛ gbɛtsɔɔmɔi ni Yehowa asafo lɛ kɛhãa wɔ lɛ atsu nii lɛ sɛɛ po lɛ, esa akɛ wɔkwɛ jogbaŋŋ ni wɔkadu gbɛ. (Kanemɔ Yakobo 5:19.) Satan baasumɔ waa ni wɔkahe Biblia lɛ wɔye dɔŋŋ, ni agbɛnɛ hu, wɔyiŋ afee wɔ enyɔnyɔɔnyɔ yɛ gbɛtsɔɔmɔi ni Yehowa asafo lɛ kɛhãa wɔ lɛ ahe.—Efe. 4:14.
3. Mɛni hewɔ esa akɛ wɔhiɛ anɔkwale lɛ mli kpɛŋŋ? (Efesobii 6:13, 14)
3 Kanemɔ Efesobii 6:13, 14. Etsɛŋ, Abonsam kɛ amalei ni ewa akɛ abaayoo sɛɛ baalaka jeŋmaji lɛ koni amɛte shi amɛwo Yehowa. (Kpo. 16:13, 14) Wɔle hu akɛ, Satan hiɛ baadɔ waa fe bianɛ po ni ebaafee bɔ fɛɛ bɔ ni ebaanyɛ koni elaka Yehowa webii lɛ. (Kpo. 12:9) Enɛ hewɔ lɛ, ehe miihia ni wɔtsɔse wɔhe koni wɔnyɛ wɔna kɛji sane ko ji anɔkwale aloo eji amale, ni agbɛnɛ hu, wɔbo gbɛtsɔɔmɔi ni ajɛɔ Biblia lɛ mli akɛhãa wɔ lɛ toi. (Rom. 6:17; 1 Pet. 1:22) Ja wɔfee nakai dani wɔbaanyɛ wɔfo amanehulu kpeteŋkpele lɛ!
4. Mɛni he wɔbaasusu yɛ nikasemɔ nɛɛ mli?
4 Yɛ nikasemɔ nɛɛ mli lɛ, abaatsɔɔ wɔ sui enyɔ ni baaye abua wɔ ni wɔnyɛ wɔna kɛji sane ko ji anɔkwale, ni sui nɛɛ hu baaye abua wɔ ni wɔbo gbɛtsɔɔmɔi ni Yehowa asafo lɛ kɛhãa wɔ lɛ toi. No sɛɛ lɛ, wɔbaasusu ŋaawoi etɛ komɛi ni baaye abua wɔ ni wɔya nɔ wɔhiɛ anɔkwale lɛ mli kpɛŋŋ lɛ ahe.
SUI NI BAAYE ABUA WƆ NI WƆNA KƐJI SANE KO JI ANƆKWALE
5. Kɛ́ wɔsheɔ Yehowa gbeyei lɛ, mɛɛ gbɛ nɔ no baanyɛ aye abua wɔ ni wɔfee nibii ni baahã Yehowa aná wɔhe miishɛɛ?
5 Yehowa gbeyeishemɔ. Kɛ́ wɔsheɔ Yehowa gbeyei lɛ, no tsɔɔ akɛ wɔsumɔɔ lɛ waa ni no hewɔ lɛ, wɔsumɔŋ ni wɔfee nɔ ko ni baagba enaa. Kɛ́ wɔsheɔ Yehowa gbeyei lɛ, wɔbaaná he miishɛɛ waa akɛ wɔbaale srɔto ni yɔɔ nɔ ni ja kɛ nɔ ni ejaaa teŋ, kɛ anɔkwale kɛ amale teŋ. Enɛ baahã wɔnyɛ wɔfee nibii ni baahã Yehowa aná wɔhe miishɛɛ. (Abɛi 2:3-6; Heb. 5:14) Esaaa akɛ wɔsheɔ gbɔmɔ gbeyei fe Yehowa kɔkɔɔkɔ, ejaakɛ bei pii lɛ, nibii ni gbɔmɛi baasumɔ ni wɔfee lɛ esaaa Yehowa hiɛ.
6. Mɛɛ gbɛ nɔ gbɔmɔ gbeyeishemɔ hã Israel wekuyitsei nyɔŋma du gbɛ kɛje anɔkwale lɛ he?
6 Kɛ́ wɔyashe gbɔmɔ gbeyei moŋ fe Nyɔŋmɔ lɛ, no baanyɛ ahã wɔdu gbɛ kɛje anɔkwale lɛ he. Hã wɔkɛ wekuyitsei 12 ni atsu amɛ ni amɛyakpá shikpɔŋ ni Yehowa ewo shi akɛ ebaahã Israelbii lɛ shi lɛ asane lɛ afee enɛ he nɔkwɛmɔnɔ. Amɛteŋ mɛi nyɔŋma yashe Kanaanbii lɛ gbeyei fe Yehowa. Amɛkɛɛ amɛnyɛmimɛi Israelbii lɛ akɛ: “Wɔnyɛŋ wɔkwɔ kɛya ní wɔkɛ amɛ ayawu, ejaakɛ amɛhe wa fe wɔ.” (4 Mo. 13:27-31) Yɛ adesai ahiɛ lɛ, Kanaanbii lɛ ahe wa fe Israelbii lɛ lɛɛlɛŋ. Shi kɛ́ mɔ ko kɛɛ no hewɔ lɛ amɛbaaye Israelbii lɛ anɔ kunim lɛ, belɛ mɔ lɛ hiɛ ekpa nɔ akɛ Yehowa fata Israelbii lɛ ahe. Kulɛ esa akɛ shikpalɔi nyɔŋma lɛ kɛ amɛjwɛŋmɔ ama nɔ ni Yehowa taoɔ ni Israelbii lɛ afee lɛ nɔ, ni agbɛnɛ hu, amɛsusu nɔ ni efee ehã amɛ etsɛko tsɔ lɛ he. Eji amɛfee nakai kulɛ, amɛbaana akɛ, Yehowa he wa kwraa fe Kanaanbii lɛ. Yoshua kɛ Kaleb efeee amɛnii tamɔ shikpalɔi nyɔŋma lɛ. Amɛtsɔɔ akɛ amɛheɔ Yehowa nɔ amɛyeɔ ni amɛmiisumɔ ni amɛfee nɔ ni sa ehiɛ. Amɛkɛɛ maŋbii lɛ akɛ: “Kɛ́ Yehowa yɛ wɔhe miishɛɛ lɛ, no lɛ, bɔ fɛɛ bɔ ni fee lɛ, ekɛ wɔ baaya shikpɔŋ nɛɛ nɔ, ni ekɛbaahã wɔ.”—4 Mo. 14:6-9.
7. Mɛni baaye abua wɔ ni wɔya nɔ wɔshe Yehowa gbeyei moŋ fe gbɔmɛi? (Kwɛmɔ mfoniri lɛ hu.)
7 Mɛni baaye abua wɔ ni wɔya nɔ wɔshe Yehowa gbeyei moŋ fe gbɔmɛi? Nɔ kome ni baaye abua wɔ ji, ni be fɛɛ be lɛ wɔbaabi wɔhe akɛ, ‘Mɛɛ yiŋ kɛ́ mikpɛ lɛ, ebaasa Yehowa hiɛ?’ (Lala 16:8) Kɛ́ okane sane ko yɛ Biblia lɛ mli lɛ, bi ohe akɛ, ‘Eji mi ni miyaje shihilɛ nɛɛ mli kulɛ, mɛni mafee?’ Akɛ nɔkwɛmɔnɔ lɛ, ŋɔɔ lɛ akɛ oyɛ jɛmɛ be ni Israel wekuyitsei nyɔŋma lɛ baawie akɛ Israelbii lɛ nyɛŋ aye Kanaanbii lɛ anɔ kunim lɛ. Ani kulɛ obaahe amɛ oye? Ani amɛwiemɔi lɛ baahã Kanaanbii lɛ ahe ŋmiŋmi amɔ bo? Aloo suɔmɔ ni oyɔɔ kɛhã Yehowa kɛ bɔ ni osumɔɔ waa akɛ osa ehiɛ lɛ baahã okɛ ohiɛ afɔ̃ enɔ? Yoshua kɛ Kaleb yinɔbii lɛ eyayɔseee akɛ nɔ ni Yoshua kɛ Kaleb wieɔ lɛ ji anɔkwale. Enɛ hewɔ lɛ, Yehowa hãaa amɛteŋ mɔ ko mɔ ko aya Shiwoo Shikpɔŋ lɛ nɔ.—4 Mo. 14:10, 22, 23.
Kulɛ namɛi awiemɔ obaahe oye? (Kwɛmɔ kuku 7)
8. Mɛɛ su esa akɛ wɔmia wɔhiɛ waa ni wɔná? Ni mɛni hewɔ?
8 Heshibaa. Yehowa jieɔ anɔkwale lɛ kpo etsɔɔ mɛi ni baa amɛhe shi. (Mat. 11:25) Wɔba wɔhe shi ni wɔhã akɛ wɔ kase nii ni no ye ebua wɔ ni wɔba anɔkwale lɛ mli. (Bɔf. 8:30, 31) No hewɔ lɛ, esa akɛ wɔya nɔ wɔba wɔhe shi ni wɔkwɛ jogbaŋŋ ni wɔkawó wɔhe nɔ. Henɔwomɔ baanyɛ ahã wɔnu he akɛ, yɛ Biblia mli shishitoo mlai kɛ gbɛtsɔɔmɔi ni Yehowa asafo lɛ kɛhãa lɛ sɛɛ lɛ, wɔbaanyɛ wɔfee nɔ ni wɔ diɛŋtsɛ hu wɔsusuɔ akɛ eja.
9. Mɛni baaye abua wɔ ni wɔya nɔ wɔba wɔhe shi?
9 Nɔ kome ni baaye abua wɔ ni wɔya nɔ wɔba wɔhe shi ji, ni wɔbaahã ehi wɔjwɛŋmɔ mli akɛ, kɛ́ akɛ wɔ to Yehowa he lɛ, wɔjeee nɔ ko kwraa. (Lala 8:3, 4) Nɔ kroko ni baaye abua wɔ ji, ni wɔbaabi Yehowa ni eye ebua wɔ ni wɔba wɔhe shi be fɛɛ be ni wɔŋmɛ gbɛ ni etsɔɔ wɔ nii. Kɛ́ wɔfee nakai lɛ, Yehowa baaye ebua wɔ ni wɔkɛ esusumɔi ni ejieɔ lɛ kpo etsɔɔ wɔ kɛtsɔ e-Wiemɔ lɛ kɛ esafo lɛ nɔ lɛ atsu nii moŋ fe wɔ diɛŋtsɛ wɔsusumɔi. Be ni okaneɔ Biblia lɛ, kwɛmɔ akɛ obaana nibii ni tsɔɔ akɛ Yehowa sumɔɔ mɛi ni baa amɛhe shi, shi eehi mɛi ni wóɔ amɛhe nɔ lo. Ni kɛ́ oná sɔɔmɔ hegbɛ ko ni baahã mɛi ale bo waa lɛ, kwɛmɔ jogbaŋŋ ni okawó ohe nɔ, shi moŋ oya nɔ oba ohe shi.
MƐNI BAAYE ABUA WƆ NI WƆHIƐ ANƆKWALE LƐ MLI KPƐŊŊ?
10. Yɛ blema lɛ, namɛi anɔ Yehowa tsɔ ekɛ gbɛtsɔɔmɔi hã ewebii lɛ?
10 Kɛ́ Yehowa asafo lɛ kɛ gbɛtsɔɔmɔ hã lɛ, hemɔ oye akɛ Yehowa ŋɔɔ ejɛ. Yɛ blema Israel lɛ, Yehowa tsɔ Mose kɛ Yoshua nɔ ekɛ gbɛtsɔɔmɔi hã ewebii lɛ. (Yos. 1:16, 17) Yehowa Nyɔŋmɔ jɔɔ Israelbii lɛ bei abɔ ni amɛbu hii nɛɛ akɛ enajiaŋdamɔlɔi. No sɛɛ afii pii be ni ato Kristofoi asafo lɛ shishi ehee lɛ, bɔfoi 12 lɛ ni kɛ gbɛtsɔɔmɔi hã Nyɔŋmɔ webii lɛ. (Bɔf. 8:14, 15) Kɛkɛ ni sɛɛ mli lɛ, ahala asafoŋ onukpai ni yɔɔ Yerusalem lɛ ateŋ mɛi komɛi afata bɔfoi lɛ ahe. Nyɛmimɛi lɛ kɛ gbɛtsɔɔmɔi ni hii anɔkwafoi nɛɛ kɛhã amɛ lɛ tsu nii, ni no hewɔ lɛ “asafoi lɛ tee nɔ amɛhe wa yɛ hemɔkɛyeli lɛ mli ni amɛyibɔ lɛ tee nɔ efa daa gbi.” (Bɔf. 16:4, 5) Ŋmɛnɛ lɛ, kɛ́ wɔ hu wɔbo gbɛtsɔɔmɔi ni Yehowa asafo lɛ kɛhãa wɔ lɛ toi ni wɔkɛtsu nii lɛ, Yehowa baajɔɔ wɔ. Shi kɛ́ wɔkɛ mɛi ni Yehowa ehala ni amɛnyiɛ wɔhiɛ lɛ agbɛtsɔɔmɔi tsuuu nii lɛ, te ebaanu he ehã tɛŋŋ? Nɔ ko ni ba be ni Yehowa nyiɛ Israelbii lɛ ahiɛ kɛmiiya Shiwoo Shikpɔŋ lɛ nɔ lɛ baaye abua wɔ ni wɔhã sanebimɔ nɛɛ hetoo.
11. Yɛ blema Israel lɛ, be ni mɛi komɛi te shi amɛwo Mose, ni ji mɔ ni Nyɔŋmɔ ehala akɛ enyiɛ ewebii lɛ ahiɛ lɛ, mɛni Nyɔŋmɔ fee amɛ? (Kwɛmɔ mfoniri lɛ hu.)
11 Be ni Israelbii lɛ nyiɛ gbɛ kɛyaa Shiwoo Shikpɔŋ lɛ nɔ lɛ, amɛteŋ mɛi komɛi ni ji hiɛnaanɔbii lɛ wie amɛshi Mose yɛ nitsumɔ ni Yehowa kɛwo edɛŋ lɛ hewɔ. Amɛwie akɛ: “Asafo muu lɛ fɛɛ yɛ krɔŋkrɔŋ [jeee Mose pɛ], amɛ fɛɛ, ni Yehowa yɛ amɛteŋ.” (4 Mo. 16:1-3) Eji anɔkwale akɛ yɛ Yehowa hiɛ lɛ, “asafo muu lɛ fɛɛ yɛ krɔŋkrɔŋ,” shi no mli lɛ Yehowa eje gbɛ ehala Mose akɛ enyiɛ ewebii lɛ ahiɛ. (4 Mo. 16:28) No hewɔ lɛ, be ni hiɛnaanɔbii atuatselɔi nɛɛ wie amɛshi Mose lɛ, yɛ anɔkwale mli lɛ, Yehowa amɛwieɔ amɛshiɔ lɛ. Nɔ najiaŋ ni amɛbaafee nɔ ni Yehowa sumɔɔ lɛ, amɛfee nɔ ni baahã amɛná hegbɛi pii ni amɛhe gbɛ́i. Nyɔŋmɔ gbe mɛi ni nyiɛ atuatsemɔ lɛ hiɛ lɛ kɛ mɛi akpei abɔ ni fi amɛ sɛɛ lɛ. (4 Mo. 16:30-35, 41, 49) Ŋmɛnɛ hu lɛ, Yehowa nyaaa mɛi ni kɛ gbɛtsɔɔmɔi ni esafo lɛ kɛhãa lɛ tsuuu nii lɛ ahe kwraa.
Kulɛ namɔ sɛɛ obaafi? (Kwɛmɔ kuku 11)
12. Mɛni hewɔ wɔbaanyɛ wɔmu wɔfɔ̃ Yehowa asafo lɛ nɔ be fɛɛ be lɛ?
12 Wɔbaanyɛ wɔmu wɔfɔ̃ Yehowa asafo lɛ nɔ be fɛɛ be. Nɔ hewɔ ni wɔkɛɔ nakai lɛ ji akɛ, kɛ́ Gbɛtsɔɔmɔ Kuu lɛ na akɛ esa akɛ afee tsakemɔ yɛ bɔ ni wɔnuɔ Biblia mli sane ko shishi wɔhãa loo bɔ ni ato sɔɔmɔ nitsumɔ lɛ he gbɛjianɔ ahã lɛ mli lɛ, amɛfeɔ nakai oya nɔŋŋ. (Abɛi 4:18) Amɛfeɔ nakai ejaakɛ nɔ ni he hiaa amɛ fe fɛɛ yɛ shihilɛ mli ji, ni amɛbaafee nɔ ni sa Yehowa hiɛ. Agbɛnɛ hu, amɛfeɔ bɔ fɛɛ bɔ ni amɛbaanyɛ koni amɛhã yiŋ fɛɛ yiŋ ni amɛbaakpɛ lɛ kɛ Nyɔŋmɔ Wiemɔ lɛ akpã gbee, ejaakɛ Nyɔŋmɔ Wiemɔ lɛ sɛɛ esa akɛ Yehowa webii fɛɛ anyiɛ.
13. Mɛni ji ‘wiemɔi ni sɛɛnamɔ yɔɔ he lɛ he nɔkwɛmɔnɔ lɛ’? Ni mɛɛ gbɛ nɔ ebaanyɛ eye ebua wɔ?
13 ‘Yaa nɔ onyiɛ wiemɔi ni sɛɛnamɔ yɔɔ he lɛ he nɔkwɛmɔnɔ lɛ sɛɛ.’ (2 Tim. 1:13, shn.) ‘Wiemɔi ni sɛɛnamɔ yɔɔ he lɛ he nɔkwɛmɔnɔ lɛ’ ji nibii fɛɛ ni Kristo tsɔɔ esɛɛnyiɛlɔi lɛ ni aŋma yɛ Biblia lɛ mli lɛ. (Yoh. 17:17) Tsɔɔmɔi nɛɛ anɔ nibii fɛɛ ni wɔheɔ wɔyeɔ lɛ damɔ. Yehowa asafo lɛ etsɔɔ wɔ akɛ, esa akɛ nɔ fɛɛ nɔ ni wɔheɔ wɔyeɔ lɛ kɛ tsɔɔmɔi nɛɛ akpã gbee. Ni bei abɔ ni nɔ fɛɛ nɔ ni wɔheɔ wɔyeɔ lɛ kɛ tsɔɔmɔi nɛɛ kpãa gbee lɛ, Yehowa baajɔɔ wɔ.
14. Mɛni hewɔ Kristofoi komɛi eyanyɛɛɛ amɛhiɛ ‘wiemɔi ni sɛɛnamɔ yɔɔ he lɛ he nɔkwɛmɔnɔ lɛ’ mli kpɛŋŋ lɛ?
14 Kɛ́ wɔgba afã kɛje ‘wiemɔi ni sɛɛnamɔ yɔɔ he lɛ he nɔkwɛmɔnɔ lɛ’ he lɛ, mɛni baanyɛ aba? Naa nɔkwɛmɔnɔ ko ni hãa wɔnaa nɔ ni baanyɛ aba. Yɛ blema Kristofoi lɛ abeiaŋ lɛ, nyɛmimɛi lɛ ekomɛi bɔi wiemɔ akɛ Yehowa gbi lɛ eba, ni amale nɛɛ gbɛ eshwã. Shi nɛgbɛ sane nɛɛ jɛ? Etamɔ nɔ ni amɛnine shɛ wolo ko ni akɛɛ bɔfo Paulo ŋma lɛ nɔ ni miitsɔɔ nakai. Kristofoi komɛi ni yɔɔ Tesalonika lɛ he amale nɛɛ amɛye ni amɛgbɛ amɛshwã ni amɛtaoko mli. Eji amɛkɛ amɛjwɛŋmɔ tee nibii ni Paulo tsɔɔ amɛ be ni ekɛ amɛ yɔɔ lɛ anɔ kulɛ, alakaŋ amɛ. (2 Tes. 2:1-5) Paulo wo amɛ ŋaa ni amɛkahe nɔ fɛɛ nɔ ni amɛnuɔ lɛ amɛye. Kɛfata he lɛ, efee nɔ ko ni baaye abua amɛ wɔsɛɛ kɛ́ nɔ ko tamɔ nɛkɛ ba ekoŋŋ. Be ni emuɔ wolo ni ji enyɔ ni eŋma eyahã Tesalonikabii lɛ naa lɛ, ewie akɛ: “Mi Paulo, mi diɛŋtsɛ mininenaa ŋamɔ, ni ji okadi yɛ miwolo fɛɛ wolo mli nɛ; nɛkɛ ji bɔ ni miŋmaa nii.”—2 Tes. 3:17.
15. Mɛni baaye abua wɔ ni wɔnyɛ wɔyɔse amalei kɛ́ awie lɛ tamɔ nɔ ni eyɛ mli po? Okɛ enɛ he nɔkwɛmɔnɔ ahã. (Kwɛmɔ mfonirii lɛ hu.)
15 Mɛni wɔbaanyɛ wɔkase yɛ nɔ ni Paulo kɛɛ Tesalonikabii lɛ mli? Kɛ́ wɔnu sane ko ni kɛ nibii ni wɔkase yɛ Biblia lɛ mli lɛ kpãaa gbee loo sane ko ni hãa mɔ he jɔ̃ɔ ehe waa lɛ, esa akɛ wɔkɛ hiɛshikamɔ atsu nii. Yɛ blema Soviet Union lɛ, nyɛmimɛi lɛ anine shɛ lɛta ko ni akɛɛ ejɛ nitsumɔhe yitso lɛ nɔ. Yɛ lɛta lɛ mli lɛ, awo nyɛmimɛi lɛ ekomɛi hewalɛ ni amɛtse amɛhe kɛje asafo lɛ he ni amɛyatse amɛ diɛŋtsɛ amɛkuu. Kɛ́ okwɛ lɛta lɛ, etamɔ nɔ ni ejɛ nitsumɔhe yitso lɛ lɛɛlɛŋ. Shi nyɛmimɛi anɔkwafoi lɛ na sɛɛ. Amɛna akɛ nɔ ni lɛta lɛ woɔ amɛ hewalɛ ni amɛfee lɛ kɛ nibii ni amɛkase lɛ kpãaa gbee. Ŋmɛnɛ lɛ, Yehowa webii lɛ ahenyɛlɔi lɛ bɔɔ mɔdɛŋ akɛ amɛbaatsɔ nibii tamɔ Intanɛt lɛ kɛ social media nɔ amɛhã wɔyiŋ afutu wɔ ni mligbalamɔi aba wɔteŋ. Nɔ najiaŋ ni wɔbaahã saji ni tamɔ nɛkɛ ni wɔnuɔ loo wɔkaneɔ lɛ ‘ahoso wɔ oya kɛje wɔsusumɔ lɛ he’ lɛ, esa akɛ wɔkɛto nibii ni wɔkase momo lɛ ahe. Kɛ́ wɔfee nakai lɛ, ebaabu wɔhe.—2 Tes. 2:2; 1 Yoh. 4:1.
Kaahã akɛ amalei ni awie lɛ tamɔ nɔ ni eyɛ mli lɛ laka bo (Kwɛmɔ kuku 15) a
16. Yɛ nɔ ni aŋma yɛ Romabii 16:17, 18 lɛ naa lɛ, kɛ́ mɛi komɛi gba afã kɛje anɔkwale lɛ he lɛ, mɛni esa akɛ wɔfee?
16 Okɛ mɛi ni yeɔ Yehowa anɔkwa lɛ afee ekome. Nyɔŋmɔ miisumɔ ni mɛi fɛɛ ni jáa lɛ lɛ afee ekome. Kɛ́ wɔmɔ anɔkwale lɛ mli kpɛŋŋ lɛ, no baahã wɔfee ekome. Mɛi fɛɛ ni gbaa afã kɛjeɔ anɔkwale lɛ he lɛ kɛ mligbalamɔi baa asafo lɛ mli, no hewɔ lɛ Nyɔŋmɔ kɛɛ ‘wɔtsi wɔhe kɛje amɛhe.’ Kɛ́ wɔtsiii wɔhe kɛjeee amɛhe lɛ, amɛbaagbala wɔ kɛje anɔkwale lɛ mli.—Kanemɔ Romabii 16:17, 18.
17. Kɛ́ wɔnyɛ wɔyɔse nɔ ni ji anɔkwale lɛ ni wɔmɔ mli kpɛŋŋ lɛ, mɛɛ gbɛ nɔ wɔbaaná he sɛɛ?
17 Kɛ́ wɔnyɛ wɔyɔse nɔ ni ji anɔkwale lɛ ni wɔmɔ mli kpɛŋŋ lɛ, wɔbaahi Yehowa masɛi daa ni wɔhemɔkɛyeli lɛ mli baawa. (Efe. 4:15, 16) Agbɛnɛ hu, wɔheŋ amale tsɔɔmɔi kɛ lakamɔ wiemɔi ni Satan gbɛɔ eshwãa lɛ wɔyeŋ, ni Yehowa baabu wɔhe yɛ amanehulu kpeteŋkpele lɛ mli. No hewɔ lɛ, yaa nɔ ohiɛ anɔkwale lɛ mli kpɛŋŋ, ‘ni toiŋjɔlɛ Nyɔŋmɔ lɛ kɛ bo baahi shi.’—Fip. 4:8, 9.
LALA 122 Nyɛfia Shi Shiŋŋ, Nyɛkagbugbaa!
a NƆ NI WƆNAA YƐ MFONIRI LƐ MLI: Afii pii ni eho nɛ yɛ tsutsu Soviet Union lɛ, nyɛmimɛi lɛ anine shɛ lɛta ko nɔ. Etamɔ nɔ ni lɛta nɛɛ jɛ nitsumɔhe yitso lɛ, shi asomoaŋ ejɛ wɔhenyɛlɔi lɛ aŋɔɔ. Ŋmɛnɛ lɛ, mɛi ni nyɛɔ Yehowa webii lɛ baanyɛ atsɔ Intanɛt lɛ nɔ amɛgbɛ Yehowa asafo lɛ he saji ni bɛ mli amɛshwã.
