1. Mɛni akɛɛ mɛi babaoo ko akɛ amɛfee?

FEEMƆ shihilɛ nɛɛ he mfoniri okwɛ. Mɛi babaoo ni jɛ maji srɔtoi anɔ ni wieɔ wiemɔi srɔtoi lɛ efã gbɛ kɛtee Yerusalem. Trukaa lɛ, Yudafoi komɛi ni yɔɔ jɛmɛ lɛ kɛ gbɔi lɛ bɔi wiemɔ yɛ gbɔi lɛ amaŋ wiemɔi srɔtoi lɛ amli. Enɛ hã gbɔi lɛ anaa kpɛ amɛhe waa! Shi sane ni amɛnu ni aawie yɛ amɛmaŋ wiemɔi lɛ amli lɛ kɛ nɔ ni sɛɛ mli lɛ bɔfo Petro kɛɛ mɛi fɛɛ ni yɔɔ jɛmɛ lɛ hã amɛnaa kpɛ amɛhe fe nakai po. Nibii ni ahã amɛle nakai gbi lɛ lɛ eko ji akɛ, kɛ́ amɛhe Yesu Kristo nɔ amɛye lɛ amɛbaanyɛ amɛná naanɔ wala. Enɛ ta amɛtsuiŋ waa ni etsirɛ amɛ ni amɛbi akɛ: “Mɛni esa akɛ wɔfee?” Petro kɛɛ amɛ akɛ: “Nyɛhãa abaptisia nyɛteŋ mɔ fɛɛ mɔ.”​—Bɔf. 2:37, 38.

2. Mɛni he wɔbaasusu yɛ nikasemɔ nɛɛ mli? (Kwɛmɔ mfoniri ni yɔɔ wolo lɛ hiɛ lɛ.)

² Nɔ ni tee nɔ sɛɛ mli yɛ nakai gbi lɛ nɔ lɛ sa kadimɔ waa. Abaptisi mɛi aaafee 3,000 ni amɛbatsɔmɔ Kristo kaselɔi. Nakai gbi lɛ, Yesu sɛɛnyiɛlɔi lɛ je nitsumɔ ni ekɛwo amɛdɛ̃ akɛ amɛfee mɛi kaselɔi lɛ shishi. Ni Yesu sɛɛnyiɛlɔi etsu nakai nitsumɔ lɛ kɛbashi ŋmɛnɛ. Ŋmɛnɛ lɛ, wɔnyɛŋ wɔshiɛ wɔhã mɔ ko ni amrɔ nɔŋŋ lɛ ehã abaptisi lɛ. Ekolɛ ebaahe nyɔji abɔ, afi loo nɔ ni fe nakai dani mɔ lɛ baahã abaptisi lɛ. Kɛ́ oyɛ mɔ ko ni okɛ lɛ miikase nii bianɛ lɛ, ekã shi faŋŋ akɛ ole akɛ ebiɔ mɔdɛŋbɔɔ waa dani abaanyɛ aye abua mɔ ko ni ebatsɔ Yesu kaselɔ. Yɛ nikasemɔ nɛɛ mli lɛ, wɔbaakwɛ nɔ ni wɔbaanyɛ wɔfee kɛye wɔbua wɔ-Biblia mli nikaselɔi ni amɛya amɛhiɛ koni abaptisi amɛ.

3. Tamɔ bɔ ni awie yɛ Mateo 28:19, 20 lɛ, mɛni esa akɛ wɔ-Biblia mli nikaselɔi lɛ afee koni amɛshɛ baptisimɔ he?

³ Ja wɔ-Biblia mli nikaselɔ lɛ kɛ nibii ni ekaseɔ yɛ Biblia lɛ mli lɛ etsu nii dani abaanyɛ abaptisi lɛ. (Kanemɔ Mateo 28:19, 20.)  Kɛ́ wɔ-Biblia mli nikaselɔ lɛ kɛ nibii ni ekaseɔ lɛ tsu nii lɛ, ebaatsɔ tamɔ “nuu hiɛshikalɔ” ni Yesu wie ehe yɛ enɔkwɛmɔnɔ lɛ mli akɛ etsa shi ni ema etsũ lɛ yɛ tɛsaa nɔ lɛ. (Mat. 7:24, 25; Luka 6:47, 48) Mɛni wɔbaanyɛ wɔfee kɛye wɔbua wɔ-Biblia mli nikaselɔi lɛ ni amɛkɛ nɔ ni amɛkaseɔ lɛ atsu nii? Nyɛhãa wɔkwɛa nibii etɛ ni wɔbaanyɛ wɔfee.

4. Mɛni obaanyɛ ofee kɛye obua o-Biblia mli nikaselɔ lɛ koni eya ehiɛ fiofio kɛshɛ baptisimɔ he? (Kwɛmɔ akrabatsa ni ji, “ Ye Obua O-Biblia Mli Nikaselɔ Lɛ Ni Ekɛ Otii Amamɔ Ehiɛ Ni Eshɛ He” lɛ hu.)

⁴ Ye obua o-Biblia mli nikaselɔ lɛ ni ekɛ otii amamɔ ehiɛ. Mɛni hewɔ esa akɛ ofee nakai? Hã wɔkɛ nɔkwɛmɔnɔ nɛɛ atsɔɔ mli. Kɛ́ oofã gbɛ kɛmiiya he ko ni jekɛ waa lɛ, ekolɛ obaasumɔ ni owa yɛ heihei. Mɛni hewɔ? Ejaakɛ no hãŋ gbɛfãa lɛ anyira ohiɛ. Nakai nɔŋŋ kɛ́ o-Biblia mli nikaselɔ lɛ kɛ otii ni ebaanyɛ eshɛ he yɛ be kukuoo mli mamɔ ehiɛ lɛ, no baaye abua lɛ ni ena akɛ ebaanyɛ eya ehiɛ ni abaptisi lɛ. Okɛ Oyi Aná Wala Kɛya Naanɔ! wolo lɛ fã ni ji, “Nɔ Ni Obaanyɛ Ofee” lɛ aye abua o-Biblia mli nikaselɔ lɛ ni ekɛ otii amamɔ ehiɛ. Kɛ́ nyɛgbe nikasemɔ lɛ eko fɛɛ eko naa lɛ, ye obua lɛ ni ena bɔ ni oti ni awie he yɛ nakai fã lɛ mli lɛ baaye abua lɛ ni ekɛ nɔ ni ekase lɛ atsu nii. Kɛ́ oyɛ oti kroko ni obaasumɔ ni eshɛ he lɛ, nyɛŋmaa yɛ fã ni ji, “Nɔ Kroko Ni Obaanyɛ Ofee” lɛ. Be fɛɛ be ni nyɛbaashɛ fã nɛɛ, okɛ o-Biblia mli nikaselɔ lɛ agba otii ni ebaanyɛ eshɛ he yɛ be kukuoo mli kɛ nɔ ni ebaahe be fioo dani ebaanyɛ eshɛ he lɛ ahe sane.

5. Yɛ Marko 10:17-22 lɛ, mɛni Yesu kɛɛ nuu niiatsɛ ko akɛ efee? Ni mɛni hewɔ?

⁵ Ye obua o-Biblia mli nikaselɔ lɛ ni efee tsakemɔi yɛ eshihilɛ mli. (Kanemɔ Marko 10:17-22.) Yesu le akɛ, ebaawa ehã nuu ko ni yɔɔ nii lɛ akɛ ebaahɔ̃ɔ ehe nibii fɛɛ. Shi kɛ̃lɛ, ekɛɛ nuu niiatsɛ ko akɛ eyafee nakai. (Mar. 10:23) Mɛni hewɔ Yesu bi ni nuu nɛɛ afee nɔ ko ni baahã eshihilɛ atsake kwraa lɛ? Ejaakɛ Yesu sumɔɔ esane. Bei komɛi lɛ, ewa kɛhã wɔ akɛ wɔbaawo wɔ-Biblia mli nikaselɔ ko hewalɛ ni ekɛ nɔ ko ni  ekaseɔ lɛ atsu nii ejaakɛ wɔnuɔ he akɛ wɔshɛko shɔŋŋ yɛ nikasemɔ lɛ mli ni no hewɔ lɛ efeemɔ baawa kɛhã lɛ. Bei komɛi lɛ, eheɔ be dani mɛi nyɛɔ amɛkpaa nibii gbohii ni amɛfeɔ lɛ ni amɛwoɔ subaŋ hee lɛ. (Kol. 3:9, 10) Shi kɛ́ wɔkɛ wɔ-Biblia mli nikaselɔ ko wie tsakemɔ ko ni esa akɛ efee lɛ he mra lɛ, no baaye abua lɛ ni ebɔi he nitsumɔ mra. Ebaatsɔɔ hu akɛ esane kã wɔtsui nɔ.​—Lala 141:5; Abɛi 27:17.

6. Mɛni hewɔ esa akɛ wɔbi wɔ-Biblia mli nikaselɔi lɛ saji ni baahã amɛtsɔɔ amɛsusumɔ yɛ saji ahe?

⁶ Kɛ́ wɔkɛ mɔ ko miikase nii lɛ, ehe miihia ni wɔbi lɛ saji ni baahã etsɔɔ ejwɛŋmɔ yɛ nɔ ni wɔkɛ lɛ kaseɔ lɛ he. Enɛ baaye abua wɔ ni wɔna kɛji enu nɔ ni ekaseɔ lɛ shishi ni eheɔ eyeɔ. Kɛ́ wɔkɛ sanebimɔi ni tamɔ nɛkɛ fɔɔ nitsumɔ lɛ, ewaŋ tsɔ kɛhãŋ wɔ akɛ wɔkɛ wɔnikaselɔ lɛ baasusu saji komɛi ni wɔle akɛ ebaanyɛ ewa kɛhã lɛ akɛ ebaakpɛlɛ nɔ lɛ ahe. Sanebimɔi pii yɛ Oyi Aná Wala Kɛya Naanɔ! wolo lɛ mli ni baahã nikaselɔ lɛ atsɔɔ esusumɔ yɛ saji ahe. Akɛ nɔkwɛmɔnɔ lɛ, sanebimɔ ko yɛ nikasemɔ 04 lɛ mli ni biɔ akɛ, “Kɛ́ okwɛ lɛ, kɛ́ okɛ Yehowa gbɛ́i lɛ tsɛ lɛ lɛ, te ebaanu he ehã tɛŋŋ?” Eko hu yɛ nikasemɔ 09 lɛ ni biɔ akɛ, “Mɛɛ nibii komɛi obaasumɔ ni osɔle yɛ he?” Kɛ́ okɛ mɔ ko bɔi nikasemɔ ehee lɛ, ekolɛ ebaawa kɛhã lɛ akɛ ebaahã sanebimɔi ni tamɔ nɛkɛ lɛ ahetoo. Shi kɛ́ oye obua lɛ ni esusu ŋmalɛi kɛ mfonirii ni yɔɔ nikasemɔ lɛ mli lɛ ahe lɛ, fiofio lɛ ebaana naa.

7. Mɛɛ gbɛ nɔ obaanyɛ okɛ mɛi aniiashikpamɔi aye abua o-Biblia mli nikaselɔ lɛ?

⁷ Kɛ́ o-Biblia mli nikaselɔ lɛ bana tsakemɔi ni esa akɛ efee lɛ, okɛ mɛi aniiashikpamɔi awo lɛ hewalɛ ni etsu he nii. Akɛ nɔkwɛmɔnɔ lɛ, kɛ́ efolɔɔ asafoŋ kpeei amli lɛ, obaanyɛ ojie vidio ni ji, Yehowa Jwɛŋɔ Mihe ni yɔɔ nikasemɔ 14 lɛ fã ni ji, “Ehe Saji Krokomɛi” lɛ otsɔɔ lɛ. Oyi Aná Wala Kɛya Naanɔ! wolo lɛ mli nikasemɔi lɛ pii yɛ ni kɛ́ okwɛ efã ni ji, “Kasemɔ Pii Ofata He” loo “Ehe Saji Krokomɛi” lɛ, obaana niiashikpamɔi ni tamɔ nɛkɛ yɛ jɛmɛ. * Shi kwɛmɔ jogbaŋŋ ni okawie nibii tamɔ, “Kɛ́ mɔnɛ enyɛ efee lɛ, belɛ, bo hu obaanyɛ ofee,” ejaakɛ no baahã efee tamɔ nɔ ni okɛ o-Biblia mli nikaselɔ lɛ miito mɔ kroko he. Moŋ lɛ, gbalamɔ ejwɛŋmɔ kɛya vidio lɛ mli saji pɔtɛɛ ni hãa anaa nɔ ni ye ebua mɔ lɛ ni enyɛ ekɛ nibii ni ekase yɛ Biblia lɛ mli lɛ tsu nii lɛ anɔ. Ekolɛ obaanyɛ otsɔɔ lɛ ŋmalɛ pɔtɛɛ ko loo nɔ ko pɔtɛɛ ni mɔ lɛ fee ni ye ebua lɛ. Agbɛnɛ hu, tsɔɔmɔ lɛ nɔ ni Yehowa fee kɛye ebua mɔ lɛ. Kɛ́ okɛ nikaselɔ lɛ susu nibii nɛɛ ahe lɛ, ekolɛ ebaamu sane naa akɛ, lɛ hu ebaanyɛ etsake.

8. Mɛni wɔbaanyɛ wɔfee kɛye wɔbua wɔ-Biblia mli nikaselɔi koni amɛsumɔ Yehowa?

⁸ Ye obua o-Biblia mli nikaselɔ lɛ ni esumɔ Yehowa. Te obaafee tɛŋŋ ofee nakai? Ŋɔɔ hegbɛ fɛɛ hegbɛ ni obaaná lɛ ni okɛye obua lɛ ni ebale Yehowa sui lɛ jogbaŋŋ. Ye obua lɛ ni ena akɛ Yehowa lɛ, miishɛɛ Nyɔŋmɔ ji lɛ, ni eyeɔ ebuaa mɛi fɛɛ ni sumɔɔ lɛ lɛ. (1 Tim. 1:11; Heb. 11:6) Hã o-Biblia mli nikaselɔ lɛ ana akɛ, kɛ́ ekɛ nibii ni ekaseɔ lɛ tsu nii lɛ, ebaaná he sɛɛ, ni akɛ no po tsɔɔ akɛ Yehowa sumɔɔ lɛ. (Yes. 48:17, 18) Kɛ́ o-Biblia mli nikaselɔ lɛ basumɔ Yehowa waa lɛ, ebaaná he miishɛɛ waa akɛ efee tsakemɔi fɛɛ ni he hiaa lɛ.​—1 Yoh. 5:3.

9. Mɛɛ gbɛ nɔ Marko 10:29, 30 lɛ baanyɛ aye abua mɔ ko ni ená he miishɛɛ akɛ ebaahã nibii aŋmɛɛ lɛ loo ekɛ nibii ashã afɔle koni ehã abaptisi lɛ?

⁹ Dani Biblia mli nikaselɔ ko baanyɛ aya ehiɛ kɛshɛ baptisimɔ he lɛ, ehe baahia ni ekɛ nibii komɛi ashã afɔle. Tamɔ nuu niiatsɛ lɛ ni wɔtsĩ  etã kɛtsɔ hiɛ lɛ, ehe baahia ni wɔ-Biblia mli nikaselɔi lɛ ekomɛi kɛ amɛheloonaa nibii komɛi ashã afɔle. Akɛ nɔkwɛmɔnɔ lɛ, kɛ́ nitsumɔ ni amɛtsuɔ lɛ teɔ shi ewoɔ Biblia mli shishitoo mlai lɛ, ekolɛ ehe baahia ni amɛtao nitsumɔ kroko. Yɛ amɛteŋ mɛi pii agbɛfaŋ lɛ, ehe baahia ni amɛkɛ amɛnanemɛi ni jáaa Yehowa lɛ akpa bɔɔ. Amɛteŋ mɛi komɛi hu yɛ ni amɛwekumɛi ni sumɔɔɔ Yehowa Odasefoi asane lɛ baakpoo amɛ. Yesu diɛŋtsɛ wie akɛ, ebaawa kɛhã mɛi komɛi akɛ amɛkɛ amɛnibii baashã afɔle loo amɛhã nibii komɛi aŋmɛɛ amɛ yɛ Maŋtsɛyeli lɛ hewɔ. Shi ewo shi akɛ mɛi ni baanyiɛ esɛɛ lɛ anine enyɛŋ shi kɔkɔɔkɔ. Yehowa baajɔɔ amɛ, ni ewebii lɛ baasumɔ amɛ tamɔ amɛwekumɛi. (Kanemɔ Marko 10:29, 30.) Mɛɛ gbɛ nɔ obaanyɛ oye obua o-Biblia mli nikaselɔ lɛ koni ena nyɛmimɛi lɛ akɛ ewekumɛi?

10. Mɛni okaseɔ yɛ Manuel niiashikpamɔ lɛ mli?

¹⁰ Okɛ o-Biblia mli nikaselɔ lɛ abɔ naanyo. Ehe miihia ni ohã o-Biblia mli nikaselɔ lɛ ana akɛ ojwɛŋɔ ehe waa. Mɛni hewɔ? Naa nɔ ni nyɛmi nuu ko ni atsɛɔ lɛ Manuel ni yɔɔ Mexico lɛ wie yɛ nɔ ni mɔ ni kɛ lɛ kase nii lɛ fee kɛye ebua lɛ lɛ he. Ewie akɛ: “Be fɛɛ be kɛ́ wɔmiiba wɔbakase nii lɛ, ebiɔ mi bɔ ni miyɔɔ kɛ bɔ ni nibii yaa lɛ ehãa. Enɛ hãa minyɛɔ mikɛ lɛ gbaa sane ni misheee gbeyei. Mina akɛ esusuɔ mihe diɛŋtsɛ.”

11. Kɛ́ wɔkɛ wɔ-Biblia mli nikaselɔi lɛ fɔɔ sanegbaa yɛ bei krokomɛi amli lɛ, mɛɛ gbɛ nɔ amɛbaaná he sɛɛ?

¹¹ Yesu kɛ ekaselɔi lɛ fɔɔ sanegbaa. (Yoh. 3:22) No hewɔ lɛ yɛ be ni nyɛkɛkaseɔ nii lɛ sɛɛ lɛ, taomɔ be ni okɛ o-Biblia mli nikaselɔ lɛ agba sane. Kɛ́ o-Biblia mli nikaselɔ lɛ miiya ehiɛ ni oshihilɛ baaŋmɛ bo gbɛ lɛ, obaanyɛ ofɔ̃ lɛ nine kɛba shĩa koni nyɛkɛ nɔ ko asara nyɛnaa loo nyɛkwɛ Broadcasting nifeemɔi lɛ eko. Be ni hi waa ni onikaselɔ lɛ baaná nɔ ko ni tamɔ nɛkɛ lɛ he sɛɛ ji, kɛ́ aaye gbi jurɔ ko ni kɛ Biblia lɛ kpãaa gbee ni ekolɛ ehe efee shoo lɛ. Nyɛmi nuu ko ni yɔɔ Uganda ni atsɛɔ lɛ Kazibwe lɛ wie akɛ: “Efeɔ mi akɛ mikase Yehowa he nii babaoo kɛjɛ nii ni mitsɔɔlɔ lɛ kɛ mi kase lɛ mli, shi mikase babaoo hu kɛjɛ sane ni wɔgba bei krokomɛi ni jeee nii wɔkaseɔ lɛ mli. Mina akɛ Yehowa susuɔ ewebii  lɛ ahe waa, ni amɛyɛ miishɛɛ. Ni enɛ pɛpɛɛpɛ ji nɔ ni no mli lɛ mitaoɔ ni maná yɛ shihilɛ mli.”

12. Mɛni hewɔ esa akɛ wɔtsake shiɛlɔi ni wɔkɛyaa wɔ-Biblia mli nikaselɔi lɛ aŋɔɔ lɛ amli?

¹² Tsakemɔ shiɛlɔi ni okɛyaa jɛmɛ lɛ amli. Ekolɛ ewaaa kɛhãaa bo akɛ okome too obaaya okɛ o-Biblia mli nikaselɔ lɛ ayakase nii loo obaahã shiɛlɔ kome too lɛ nɔŋŋ afata ohe be fɛɛ be. Shi kɛ́ okɛ shiɛlɔi srɔtoisrɔtoi yaa o-Biblia mli nikaselɔ lɛ ŋɔɔ lɛ, ekolɛ ebaaná he sɛɛ waa. Nyɛmi nuu ko ni yɔɔ Moldova ni atsɛɔ lɛ Dmitrii lɛ wie akɛ: “Shiɛlɔ fɛɛ shiɛlɔ ni fata mitsɔɔlɔ lɛ he kɛba lɛ tsɔ gbɛ srɔto nɔ egbala saji amli ehã mi. Enɛ ye ebua mi ni mina shihilɛi krokomɛi amli ni manyɛ mikɛ nɔ ni mikase lɛ atsu nii yɛ. Akɛni no mli lɛ mina nyɛmimɛi lɛ ateŋ mɛi babaoo hu hewɔ lɛ, be ni mitee asafoŋ kpee klɛŋklɛŋ kwraa lɛ, mihiɛ gbooo tsɔ.”

13. Mɛni hewɔ esa akɛ wɔye wɔbua wɔ-Biblia mli nikaselɔi koni amɛba asafoŋ kpeei lɛ?

¹³ Ye obua o-Biblia mli nikaselɔ lɛ ni eba asafoŋ kpeei. Mɛni hewɔ? Ejaakɛ Yehowa efã ewebii lɛ akɛ amɛkpe kutuu; efata nibii ni amɛfeɔ kɛjáa lɛ lɛ ahe. (Heb. 10:24, 25) Agbɛnɛ hu, wɔnyɛmimɛi lɛ tamɔ weku kɛhã wɔ. Kɛ́ wɔkɛ amɛ kpe yɛ asafoŋ kpeei ashishi lɛ, etamɔ nɔ ni wɔ fɛɛ wɔfee ekome yɛ shĩa ni wɔmiiye niyenii ko ni ŋɔɔ waa. Kɛ́ onyɛ oye obua o-Biblia mli nikaselɔ lɛ ni ebɔi asafoŋ kpeei baa lɛ, oye obua lɛ ni eshɛ otii ni he hiaa waa ni baanyɛ ahã eshɛ baptisimɔ he lɛ ateŋ ekome he. Shi ekolɛ enáŋ lɛ mlɛo akɛ ebaabɔi asafoŋ kpeei baa. Mɛɛ gbɛ nɔ Oyi Aná Wala Kɛya Naanɔ! wolo lɛ baanyɛ aye abua o-Biblia mli nikaselɔ lɛ ni eye nɔ fɛɛ nɔ ni baanyɛ atsĩ enaa ni ekaba asafoŋ kpeei lɛ nɔ?

14. Te wɔbaafee tɛŋŋ wɔye wɔbua wɔ-Biblia mli nikaselɔi ni amɛba asafoŋ kpeei?

¹⁴ Okɛ Oyi Aná Wala Kɛya Naanɔ! wolo lɛ nikasemɔ 10 lɛ aye abua o-Biblia mli nikaselɔ lɛ koni ebɔi asafoŋ kpeei baa. Be ni afeɔ wolo nɛɛ, ahã nyɛmimɛi komɛi kɛ amɛ-Biblia mli nikaselɔi kase nikasemɔ 10 lɛ koni akɛka akwɛ. Ni amɛteŋ mɛi pii wie akɛ eye ebua amɛ-Biblia mli nikaselɔi lɛ waa ni amɛbɔi asafoŋ kpeei baa. Enɛ etsɔɔɔ akɛ wɔmɛ kɛyashi wɔbaashɛ nikasemɔ 10 lɛ nɔ dani wɔfɔ̃ wɔ-Biblia mli nikaselɔi lɛ nine kɛba asafoŋ kpeei. Kɛ́ okɛ mɔ ko bɔi Biblia lɛ kasemɔ lɛ, esa akɛ ofɔ̃ lɛ nine kɛba asafoŋ kpeei ashishi, ni oya nɔ ofee nakai yɛ be kɛ beiaŋ. Nikaselɔ fɛɛ nikaselɔ kɛ nɔ ni baanyɛ atsĩ enaa ni ekaba asafoŋ kpeei. No hewɔ lɛ, kwɛmɔ nɔ tuuntu ni tsĩɔ o-Biblia mli nikaselɔ lɛ naa ni okwɛ nɔ ni obaanyɛ ofee kɛye obua lɛ. Kɛ́ ebaaa asafoŋ kpeei amrɔ nɔŋŋ po lɛ, kaahã onijiaŋ je wui. Ná tsui ohã lɛ, shi yaa nɔ okɛ lɛ awie he.

15. Mɛɛ nibii baanyɛ ahã o-Biblia mli nikaselɔ lɛ ashe gbeyei akɛ ebaabatsɔ Yehowa Odasefonyo?

¹⁵ Be ni akɛ bo kaseɔ nii lɛ, mɛni hã oshe gbeyei fioo akɛ obaabatsɔ Yehowa Odasefonyo? Ani eeenyɛ efee akɛ no mli lɛ ooshe gbeyei akɛ obaaya shĩa kɛ shĩa ni oyashiɛ ohã mɛi? Aloo ekolɛ no mli lɛ ooshe gbeyei akɛ onanemɛi kɛ owekumɛi baate shi amɛwo bo? Kɛ́ okɛ shihilɛ ni tamɔ nɛkɛ kpe lɛ, belɛ kɛ́ o-Biblia mli nikaselɔ lɛ hu miishe gbeyei lɛ obaanu lɛ shishi. Yesu wie akɛ mɛi komɛi baashe gbeyei akɛ amɛbaatsɔmɔ ekaselɔi. Shi ewo esɛɛnyiɛlɔi lɛ hewalɛ akɛ amɛkahã nɔ ko wo amɛhe gbeyei ni amɛkpa Yehowa sɔɔmɔ. (Mat. 10:16, 17, 27, 28) Mɛni Yesu fee kɛye ebua esɛɛnyiɛlɔi lɛ koni amɛkashe gbeyei? Ni mɛɛ gbɛ nɔ wɔbaanyɛ wɔkase lɛ?

16. Mɛni obaanyɛ ofee kɛye obua o-Biblia mli nikaselɔ lɛ koni enyɛ eshiɛ?

¹⁶ Ye obua o-Biblia mli nikaselɔ lɛ fiofio koni enyɛ eshiɛ. Eeenyɛ efee akɛ be ni Yesu tsu ekaselɔi lɛ akɛ amɛyashiɛ lɛ, amɛtsui fã fioo. Shi Yesu ye ebua amɛ; etsɔɔ amɛ mɛi ni amɛshiɛ amɛhã kɛ nɔ ni amɛwie. (Mat. 10:5-7) Mɛɛ gbɛ nɔ obaanyɛ okase Yesu? Ye obua o-Biblia mli nikaselɔ  lɛ ni ena mɛi ni ebaanyɛ eshiɛ ehã. Akɛ nɔkwɛmɔnɔ lɛ, bi lɛ kɛji ele mɔ ko ni baaná sane pɔtɛɛ ko ni nyɛkase yɛ Biblia lɛ mli lɛ he sɛɛ waa. No sɛɛ lɛ, ye obua lɛ ni ena nɔ ko fioo ni ebaanyɛ ewie ni etsɔ nɔ egba mɔ lɛ nɔ ni ekase lɛ. Kɛ́ ebaahi lɛ, obaanyɛ okɛ lɛ asusu sane ni yɔɔ fã ni ji, “Mɛi Komɛi Kɛɔ Akɛ” kɛ “Ekolɛ Mɔ Ko Baabi Bo Akɛ” ni yɔɔ Oyi Aná Wala Kɛya Naanɔ! wolo lɛ mli lɛ he koni ena nɔ ni ebaanyɛ ewie kɛye mɔ ko odase. Kɛ́ okɛ lɛ miisusu he lɛ, ye obua lɛ ni ena bɔ ni ebaanyɛ ejɛ Biblia lɛ mli ehã mɔ lɛ hetoo kuku ni mɔɔ shi.

17. Mɛɛ gbɛ nɔ wɔbaanyɛ wɔkɛ Mateo 10:19, 20, 29-31 lɛ aye abua wɔ-Biblia mli nikaselɔi lɛ ni amɛkɛ amɛhiɛ afɔ̃ Yehowa nɔ?

¹⁷ Ye obua o-Biblia mli nikaselɔ lɛ ni ekɛ ehiɛ afɔ̃ Yehowa nɔ. Yesu kɛɛ ekaselɔi akɛ, Yehowa baaye ebua amɛ ejaakɛ Yehowa sumɔɔ amɛ. (Kanemɔ Mateo 10:19, 20, 29-31.) Hã o-Biblia mli nikaselɔ lɛ ale akɛ Yehowa baaye abua lɛ hu. Gbɛ kome ni obaanyɛ otsɔ nɔ oye obua lɛ ni ekɛ ehiɛ afɔ̃ Yehowa nɔ ji, ni okɛ lɛ baafee ekome kɛsɔle yɛ otii ni ekɛmamɔ ehiɛ lɛ ahe. Nyɛmi nuu ko ni yɔɔ Poland ni atsɛɔ lɛ Franciszek lɛ wie akɛ: “Bei pii lɛ kɛ́ mɔ ni kɛ mi kaseɔ lɛ nii lɛ kɛ mi miisɔle lɛ, etsĩɔ otii ni mikɛ mamɔ mihiɛ lɛ atã. Be ni mina bɔ ni Yehowa hãa mɔ ni kɛ mi kaseɔ nii lɛ sɔlemɔi lɛ ahetoo lɛ, mi hu mibɔi sɔlemɔ nɔŋŋ. Be ni ahe mi yɛ nitsumɔ mli ehee ni miyabi gbɛ kɛhã asafoŋ kpeei kɛ kpokpaa wulu nɔ kpee ko lɛ, mina akɛ Yehowa ye ebua mi.”

18. Kɛ́ Yehowa na bɔ ni wɔbɔɔ mɔdɛŋ waa koni wɔtsɔɔ mɛi nii lɛ, te enuɔ he ehãa tɛŋŋ?

¹⁸ Wɔ-Biblia mli nikaselɔi lɛ asane kã Yehowa tsui nɔ waa. Ele akɛ Kristofoi gboɔ deŋme waa kɛtsɔɔ mɛi nii kɛyeɔ amɛbuaa amɛ koni amɛkɛ lɛ abɔ naanyo, ni ehiɛ sɔɔ enɛ waa ni esumɔɔ amɛ waa. (Yes. 52:7) Kɛ́ amrɔ nɛɛ obɛ Biblia mli nikaselɔ po lɛ, kɛ́ ofata nyɛmimɛi krokomɛi ahe kɛtee shiɛmɔ lɛ, obaanyɛ oye obua amɛ-Biblia mli nikaselɔi lɛ ni amɛya amɛhiɛ kɛshɛ baptisimɔ he.