NYƐMI YOO ko ni atsɛɔ lɛ Lisa * lɛ tsɔɔ nɔ ni gbala lɛ kɛba anɔkwale lɛ mli. Ewie akɛ: “Mlihilɛ ni nyɛmimɛi lɛ jie lɛ kpo lɛ ji nɔ ni ná minɔ hewalɛ waa.” Nyɛmi yoo ko ni atsɛɔ lɛ Anne lɛ hu wie akɛ: “Nibii ni atsɔɔ mi lɛ ná minɔ hewalɛ, shi nɔ titri ni gbala mi kɛba anɔkwale lɛ mli ji, mlihilɛ ni Odasefoi lɛ jie lɛ kpo lɛ.” Mlihilɛ ni ajie kpo atsɔɔ nyɛmimɛi yei enyɔ nɛɛ ye ebua amɛ waa ni bianɛ lɛ amɛkaneɔ Biblia lɛ ni amɛjwɛŋɔ nɔ.

Te wɔbaafee tɛŋŋ wɔjie mlihilɛ kpo ni ená mɛi anɔ hewalɛ lɛ? Nyɛhãa wɔsusua gbɛi enyɔ ahe, nomɛi ji, wɔwiemɔ kɛ wɔnifeemɔ. No sɛɛ lɛ, wɔbaakwɛ akɛ, namɛi esa akɛ wɔjie mlihilɛ kpo wɔtsɔɔ.

Abɛi yitso 31 lɛ hãa wɔnaa akɛ, “mlihilɛ mla lɛ” kã yoo kpakpa ni awie ehe yɛ nakai ŋmalɛ lɛ mli lɛ lilɛi nɔ. (Abɛi 31:26) Yoo nɛɛ hãa “mla” nɛɛ kudɔɔ nɔ ni ewieɔ kɛ bɔ ni ewieɔ ehãa. Esa akɛ tsɛmɛi hu ahã “mla” nɛɛ akã amɛlilɛi nɔ. Fɔlɔi babaoo le akɛ, kɛ́ amɛbolɔ amɛwo amɛbii lɛ loo amɛkɛ amɛ wie wiemɔi ni dɔɔ mɔ lɛ, egbaa amɛbii lɛ anaa waa ni ehãa ewaa kɛhãa amɛbii lɛ akɛ amɛbaabo amɛ toi. Shi kɛ́ fɔlɔi kɛ amɛbii lɛ wie yɛ naajɔlɛ mli lɛ, ehãaa ewa kɛhã amɛ akɛ amɛbaabo toi.

Kɛ́ fɔlɔ ji bo jio, jeee fɔlɔ ji bo jio, mɛni baaye abua bo koni ohã “mlihilɛ mla lɛ” akã olilɛi nɔ? Abɛi 31:26 lɛ klɛŋklɛŋ fã lɛ hãa wɔnaa nɔ ni baaye abua bo. Awie yɛ jɛmɛ akɛ: “Egbɛɔ edaaŋ yɛ hiɛshikamɔ mli.” Enɛ tsɔɔ akɛ, esa akɛ wɔkɛ wiemɔi ni sa kɛ gbee ni sa awie. No hewɔ lɛ, ebaafee nɔ ni hi akɛ kɛ́ wɔyaawie lɛ wɔbaabi wɔhe akɛ, ‘Ani nɔ ni miyawie nɛɛ baanyɛ atee mlifu shi loo ebaahã toiŋjɔlɛ aba?’ (Abɛi 15:1) Esa akɛ wɔtsɔ hiɛ wɔsusu nii ahe dani wɔwie.

Abɛi 12:18 lɛ hu wieɔ akɛ: “Wiemɔ ni awieɔ ni asusuuu he lɛ, etamɔ nɔ ni aabamɔ klante.” Kɛ́ wɔjwɛŋ bɔ ni wɔwiemɔi kɛ bɔ ni wɔwieɔ lɛ wɔhãa lɛ baanyɛ aná mɛi anɔ hewalɛ ahã lɛ he lɛ, ebaaye ebua wɔ ni wɔwie wiemɔi ni sa. Hɛɛ, kɛ́ wɔhã “mlihilɛ mla lɛ” kã wɔlilɛi nɔ lɛ, ehãŋ wɔkɛ wiemɔi ni esaaa atsu nii, ni wɔbolɔŋ wɔwoŋ mɛi hu. (Efe. 4:31, 32) Moŋ lɛ, wɔbaawie wiemɔi ni hi ni tswaa mɔ emaa shi ni wɔkɛ gbee ni sa baawie. Yehowa fee enɛ he nɔkwɛmɔnɔ be ni eshɛje etsulɔ Elia ni no mli lɛ etsui efã lɛ mii lɛ. Ŋwɛibɔfo ni kɛ lɛ wie yɛ Yehowa najiaŋ lɛ kɛ lɛ wie kɛ “gbee blɛoo ko ni naa waaa.” (1 Maŋ. 19:12) Shi jeee wiemɔ mli pɛ wɔbaanyɛ wɔtsɔɔ akɛ wɔmli hi. Esa akɛ wɔtsɔ wɔnifeemɔi hu anɔ wɔhã ana akɛ wɔmli hi. Te wɔbaafee enɛ wɔhã tɛŋŋ?

Kɛ́ wɔkɛ wɔnifeemɔi kɛ wɔwiemɔi tsɔɔ akɛ wɔmli hi lɛ, belɛ wɔmiikase Yehowa. (Efe. 4:32; 5:1, 2) Lisa ni wɔtsĩ etã kɛtsɔ hiɛ lɛ tsɔɔ nɔ ni Yehowa Odasefoi lɛ fee kɛjie mlihilɛ kpo amɛtsɔɔ lɛ. Ewie akɛ: “Be ni akɛɛ wɔfã trukaa lɛ, nyɛmimɛi enyɔ kɛ amɛŋamɛi bi gbɛ kɛjɛ amɛnitsumɔ mli ni amɛbaye amɛbua wɔ kɛto wɔnibii lɛ. No mli lɛ akɛ mi bɔiko nikasemɔ po!” Enɛ tsirɛ Lisa ni enu he akɛ esa akɛ ehã akɛ lɛ akase nii.

Anne ni wɔtsĩ etã yɛ sane nɛɛ shishijee lɛ hu wie akɛ, mlihilɛ ni nyɛmimɛi lɛ jie kpo amɛtsɔɔ lɛ lɛ ta etsuiŋ waa. Ewie akɛ: “Bɔ ni mɛi  feɔ amɛnii amɛhãa yɛ je lɛ mli lɛ hewɔ lɛ, efee mi akɛ nɔ ko ni amɛtaoɔ amɛná yɛ mihe lɛ hewɔ amɛfeɔ nɔ ni amɛfeɔ lɛ. Be ni mikɛ Odasefoi lɛ kpe klɛŋklɛŋ kwraa lɛ, miheee amɛ miyeee. Mibi mihe akɛ, ‘Mɛni hewɔ amɛtseɔ amɛhiɛ waa amɛhãa mi nɛkɛ?’ Shi bɔ ni mɔ ni kɛ mi kaseɔ nii lɛ tee nɔ ejie mlihilɛ kpo etsɔɔ mi lɛ hã mijie susumɔi gbohii ni mihiɛ yɛ amɛhe lɛ kɛje mijwɛŋmɔ mli.” Enɛ hã Anne kɛ ejwɛŋmɔ ma nɔ ni ekaseɔ lɛ nɔ agbɛnɛ.

Kadimɔ akɛ, suɔmɔ kɛ mlihilɛ ni nyɛmimɛi lɛ jie kpo amɛtsɔɔ Lisa kɛ Anne lɛ ji nɔ ni ta amɛtsuiŋ waa ni amɛhã akɛ amɛ bɔi nikasemɔ lɛ. Agbɛnɛ hu, ehã amɛjie susumɔi gbohii ni amɛhiɛ yɛ Yehowa kɛ ewebii lɛ ahe lɛ kɛje amɛjwɛŋmɔ mli.

Mɛi komɛi yɛ ni he ni amɛda yɛ loo bɔ ni atsɔse amɛ ahã lɛ hewɔ lɛ, amɛkɛ mɛi wieɔ kɛ bulɛ, ni daa nɛɛ amɛhiɛ yɛ ŋmɔlɔŋmɔlɔ. Kɛ́ nɛkɛ mɔ ko yɔɔ loo nakai atsɔse lɛ lɛ, naagba ko bɛ he. Shi no etsɔɔɔ doo akɛ emli hi tamɔ bɔ ni Nyɔŋmɔ mli hi lɛ.​—Okɛto Bɔfoi 28:2 lɛ he.

Ja wɔŋmɛ gbɛ ni Nyɔŋmɔ mumɔ krɔŋkrɔŋ lɛ eye ebua wɔ dani wɔbaanyɛ wɔjie mlihilɛ kpo tamɔ bɔ ni efeɔ lɛ, ejaakɛ mlihilɛ fata yibii  ni Nyɔŋmɔ mumɔ krɔŋkrɔŋ lɛ hãa awoɔ lɛ he. (Gal. 5:22, 23) Kɛ́ wɔhã mumɔ krɔŋkrɔŋ lɛ ye ebua wɔ lɛ, wɔbaakase Yehowa kɛ Yesu. Agbɛnɛ hu, akɛ Kristofoi lɛ, wɔsumɔɔ ni wɔjie suɔmɔ kpo wɔtsɔɔ mɛi krokomɛi. No hewɔ lɛ, nibii enyɔ ni tsirɛɔ wɔ ni wɔjɛ wɔtsuiŋ wɔjie mlihilɛ kpo wɔtsɔɔ mɛi tamɔ bɔ ni Nyɔŋmɔ feɔ lɛ. Nomɛi ji, suɔmɔ ni wɔyɔɔ kɛhã Yehowa Nyɔŋmɔ kɛ suɔmɔ ni wɔyɔɔ kɛhã wɔnyɛmi gbɔmɔ.

Bei pii lɛ, ewaaa akɛ wɔmli baahi ahã mɛi ni wɔle loo mɛi ni be ko ni eho lɛ amɛjie mlihilɛ kpo amɛtsɔɔ wɔ lɛ. (2 Sam. 2:6) Gbɛ kome ni wɔtsɔɔ nɔ wɔfeɔ nakai ji, wɔdaa amɛ shi. (Kol. 3:15) Shi ani wɔmli hi hã mɛi ni wɔnuɔ he akɛ amɛsaaa mɛi ni ajieɔ mlihilɛ kpo atsɔɔ amɛ lɛ hu?

Hã wɔsusu Yehowa nɔkwɛmɔnɔ lɛ he wɔkwɛ. Biblia lɛ wieɔ Yehowa dromɔ lɛ, ni ji mlihilɛ kpele ni ejieɔ kpo etsɔɔ mɛi ni amɛsaaa mɛi ni ajieɔ mlihilɛ kpo atsɔɔ lɛ, ni ehãa wɔleɔ nɔ ko ni he hiaa waa yɛ su nɛɛ he. Anɔkwa, yɛ Kristofoi a-Greek Ŋmalɛ lɛ mli lɛ, akɛ wiemɔ ni ji “dromɔ” lɛ tsu nii shii abɔ. Mɛni Yehowa efee kɛjie mlihilɛ kpo etsɔɔ wɔ?

Yehowa mli hi waa, ejaakɛ ehãa adesai fɛɛ nibii ni he hiaa amɛ koni amɛyanɔ amɛhi wala mli. (Mat. 5:45) Anɔkwa, be ni wɔleee Yehowa po lɛ, ejie mlihilɛ kpo etsɔɔ wɔ. (Efe. 2:4, 5, 8) Akɛ nɔkwɛmɔnɔ lɛ, ehã e-Bi koome lɛ, mɔ ni esumɔɔ waa lɛ, bagbo ehã adesai fɛɛ. Bɔfo Paulo wie akɛ, Yehowa wo kpɔmɔnɔ lɛ ‘yɛ edromɔ babaoo lɛ naa.’ (Efe. 1:7) Agbɛnɛ hu, eyɛ mli akɛ wɔtɔ̃ɔ ni wɔfeɔ nibii ni Yehowa sumɔɔɔ moŋ, shi eyaa nɔ etsɔɔ wɔ gbɛ ni etsɔɔ wɔ nii. Kɛ́ Yehowa miitsɔɔ wɔ gbɛ loo ekɛ wɔ miiwie lɛ, ejɛɔ mlihilɛ mli efeɔ nakai. (5 Mo. 32:2) Nɔ ko bɛ ni wɔkɛbaato Yehowa najiaŋ yɛ nibii kpakpai fɛɛ ni efeɔ ehãa wɔ lɛ hewɔ. Ni wɔle akɛ edromɔ lɛ naa wɔyɔɔ hiɛnɔkamɔ akɛ wɔsɛɛ lɛ nibii baahi lɛ.​—Okɛto 1 Petro 1:13 lɛ he.

Ŋwanejee ko bɛ he akɛ, bɔ ni Yehowa mli hi lɛ hewɔ wɔsumɔɔ lɛ ni wɔ hu wɔbɔɔ mɔdɛŋ akɛ wɔbaajie mlihilɛ kpo lɛ. No hewɔ lɛ, nɔ najiaŋ ni wɔbaajie mlihilɛ kpo wɔtsɔɔ mɛi komɛi ni wɔshi mɛi komɛi lɛ, esa akɛ wɔbɔ mɔdɛŋ wɔkase Yehowa ni wɔjie mlihilɛ kpo wɔtsɔɔ mɔ fɛɛ mɔ daa gbi. (1 Tes. 5:15) Bɔ ni kɛ́ mɛi ta la he yɛ fɛi beiaŋ lɛ amɛhe dɔɔ la lɛ, nakai nɔŋŋ kɛ́ wɔjie mlihilɛ kpo wɔtsɔɔ wɔwekumɛi, wɔnyɛmimɛi Kristofoi, mɛi ni wɔkɛtsuɔ nii, mɛi ni wɔkɛyaa skul, kɛ wɔkutsoŋbii lɛ be fɛɛ be lɛ, amɛbaaná miishɛɛ.

Okɛ ohiɛ afɔ̃ shi ni okwɛ akɛ namɔ yɔɔ oweku lɛ loo osafo lɛ mli ni kɛ́ owo lɛ hewalɛ, oshɛje emii, loo ofee nɔ ko kɛye obua lɛ lɛ ebaaná he sɛɛ waa. Ekolɛ mɔ ko yɛ osafo lɛ mli ni egbɔ loo ebɛ hewalɛ ni no hewɔ lɛ lɛ diɛŋtsɛ enyɛŋ esaa eshĩa lɛ mli, eyaye jara, loo efee nibii krokomɛi ni tamɔ nakai. Ani obaanyɛ ofee nibii nɛɛ kɛye obua lɛ? Ni kɛ́ okɛ mɔ ko kpe yɛ shiɛmɔ nitsumɔ lɛ mli ni yelikɛbuamɔ he miihia lɛ lɛ, ani obaanyɛ owa lɛ?

Nyɛhãa wɔkasea Yehowa ni wɔhã ana yɛ wɔwiemɔ kɛ wɔnifeemɔ mli akɛ wɔmiihã “mlihilɛ mla lɛ” miikudɔ wɔ.