1. Yɛ nɔ ni aŋma yɛ 1 Petro 5:2 lɛ naa lɛ, mɛɛ nitsumɔ Yehowa kɛwo asafoŋ onukpai adɛŋ?

 YEHOWA kɛ etsuji ni eshwɛɛɛ amɛhe lɛ ewo asafoŋ onukpai lɛ adɛŋ ni amɛkwɛ amɛnɔ. Asafoŋ onukpai lɛ naa nitsumɔ nɛɛ akɛ ehe hiaa waa, ni amɛtsuɔ nii waa kɛkwɛɔ Yehowa tsuji lɛ anɔ jogbaŋŋ. (Yer. 23:4; kanemɔ 1 Petro 5:2.) Eŋɔɔ wɔnaa waa akɛ wɔyɛ hii ni tamɔ nɛkɛ yɛ Kristofoi asafo lɛ mli!

2. Mɛɛ naagbai ekolɛ asafoŋ onukpai komɛi kɛbaakpe?

² Asafoŋ onukpai kɛ naagbai pii kpeɔ be ni amɛtsuɔ nitsumɔ ni Yehowa kɛwo amɛdɛŋ lɛ. Naagbai lɛ ekome ji akɛ, nibii ni esa akɛ amɛtsu lɛ fa waa ni etsumɔ wa hu. Asafoŋ onukpa ko ni yɔɔ United States ni atsɛɔ lɛ Tony lɛ bayɔse akɛ nitsumɔ ni eloɔ eshwieɔ enɔ lɛ fa tsɔ. Ewie akɛ: “Be ni COVID-19 lɛ je shishi lɛ, mika akɛ mato asafoŋ kpeei lɛ fɛɛ kɛ shiɛmɔ nitsumɔ lɛ he gbɛjianɔ. Shi mibana akɛ nitsumɔ lɛ ni mitsuɔ lɛ fɛɛ sɛɛ lɛ, be fɛɛ be lɛ nitsumɔ pii yɛ lolo ni esa akɛ matsu. Ebashɛ he ko ni mináaa be tsɔ makane Biblia lɛ, ni mafee aŋkro nikasemɔ, ni masɔle.” Asafoŋ onukpa ko ni yɔɔ Kosovo ni atsɛɔ lɛ Ilir lɛ hu kɛ naagba kroko kpe. Be ni awuɔ ta yɛ he ni eyɔɔ lɛ, ebawa kɛhã lɛ akɛ ekɛ asafo lɛ gbɛtsɔɔmɔi baatsu nii. Ewie akɛ: “Be ni nitsumɔhe nine lɛ kɛ nitsumɔ wo midɛŋ akɛ miyaye mibua nyɛmimɛi ni yɔɔ he ko ni yɔɔ oshãra waa lɛ, mishe gbeyei ni minu he akɛ nɔ ni amɛkɛɛ miyafee lɛ, nilee bɛ mli. Ehe bahia ni mafee ekãa.” Maŋsɛɛ sɔɔlɔ ko ni yɔɔ Asia ni atsɛɔ lɛ Tim lɛ na akɛ, ewa kɛhã lɛ akɛ ebaagbe nibii fɛɛ ni eyɔɔ feemɔ lɛ naa daa gbi. Ewie akɛ: “Bei komɛi lɛ, minuɔ he akɛ etɔ mi bliboo.” Mɛni baaye abua asafoŋ onukpai ni kɛ naagbai ni tamɔ nɛkɛ miikpe?

3. Mɛni wɔ fɛɛ wɔbaanyɛ wɔkase kɛjɛ Kojolɔ Gideon sane lɛ mli?

³ Asafoŋ onukpai baanyɛ akase nibii pii kɛjɛ Kojolɔ Gideon dɛŋ. (Heb. 6:12; 11:32) Enyiɛ Nyɔŋmɔ webii lɛ ahiɛ ni ebu amɛhe.  (Koj. 2:16; 1 Kro. 17:6) Ŋmɛnɛ hu lɛ, Yehowa ehala asafoŋ onukpai lɛ ni amɛkwɛ ewebii lɛ anɔ yɛ be ni mli shihilɛ wa nɛɛ mli. (Bɔf. 20:28; 2 Tim. 3:1) No hewɔ lɛ, asafoŋ onukpai lɛ baanyɛ akase bɔ ni Gideon ŋmɛ gbɛ ni mɛi krokomɛi ye amɛbua lɛ, bɔ ni eba ehe shi, bɔ ni ebo gbɛtsɔɔmɔ toi, kɛ bɔ ni emia ehiɛ etsu nitsumɔ ni akɛwo edɛŋ lɛ egbe naa yɛ tɔ ni etɔ lɛ lɛ fɛɛ sɛɛ lɛ. Shi jeee asafoŋ onukpai pɛ baanyɛ akase nii yɛ Gideon sane lɛ mli. Esane lɛ baanyɛ aye abua wɔ fɛɛ ni wɔhiɛ asɔ nitsumɔ ni asafoŋ onukpai lɛ tsuɔ lɛ waa, ni ebaanyɛ ehã wɔna nɔ ni wɔbaanyɛ wɔfee kɛye wɔbua amɛ.​—Heb. 13:17.

4. Mɛni hãa wɔnaa akɛ Gideon baa ehe shi?

⁴ Gideon baa ehe shi waa. b Be ni Yehowa bɔfo ko kɛɛ Gideon akɛ Yehowa ehala lɛ ni ehere Israelbii lɛ kɛjɛ Midianbii lɛ adɛŋ lɛ, ewie akɛ: “Shĩa ni mijɛ mli lɛ ji bibioo kwraa yɛ Manase weku lɛ mli, ni miji mɔ bibioo kwraa yɛ mipapa shĩa lɛ.” (Koj. 6:15) Enɛ hãa wɔnaa akɛ ebaa ehe shi waa. Gideon nu he akɛ nitsumɔ ni akɛwo edɛŋ lɛ da fe lɛ, shi Yehowa le akɛ ebaanyɛ etsu. Yehowa ye ebua Gideon ni etsu nitsumɔ lɛ pɛpɛɛpɛ.

5. Mɛɛ shihilɛi amli ebaanyɛ ewa kɛhã asafoŋ onukpa ko akɛ ebaaba ehe shi?

⁵ Asafoŋ onukpai bɔɔ mɔdɛŋ akɛ amɛbaaba amɛhe shi yɛ nɔ fɛɛ nɔ ni amɛfeɔ lɛ mli. (Mika 6:8; Bɔf. 20:18, 19) Amɛkɛ nibii ni amɛbaanyɛ amɛfee loo nibii ni amɛnyɛ amɛfee momo lɛ eshwãaa, ni kɛ́ amɛtɔ̃ lɛ, amɛhãaa no ahã amɛnu he akɛ amɛhe bɛ sɛɛnamɔ. Shi bei komɛi lɛ, shihilɛi komɛi baa ni hãa ewaa kɛhãa asafoŋ onukpai lɛ akɛ amɛbaaba amɛhe shi. Akɛ nɔkwɛmɔnɔ lɛ, ekolɛ asafoŋ onukpa ko baakpɛlɛ akɛ ebaatsu nitsumɔi komɛi, shi sɛɛ mli dani ebaana akɛ nitsumɔi ni ehe eshwie enɔ lɛ fa fe lɛ. Aloo ekolɛ abaajie eyi loo abaawie ashi lɛ yɛ nitsumɔ ko ni etsu lɛ hewɔ. Yɛ shihilɛi ni tamɔ enɛɛmɛi amli lɛ, mɛɛ gbɛ nɔ asafoŋ onukpai baanyɛ akase Gideon?

6. Mɛni ji nɔ kome ni Gideon fee kɛtsɔɔ akɛ ebaa ehe shi? Ni mɛɛ gbɛ nɔ asafoŋ onukpai baanyɛ akase lɛ? (Kwɛmɔ mfoniri lɛ hu.)

⁶ Hã mɛi aye abua bo. Mɔ ko ni baa ehe shi lɛ le akɛ, jeee nɔ fɛɛ nɔ ebaanyɛ efee. Gideon ba ehe shi, ni no hewɔ lɛ, ebi mɛi krokomɛi adɛŋ yelikɛbuamɔ. (Koj. 6:27, 35; 7:24) Asafoŋ onukpai ni hiɛ kã shi lɛ hu feɔ nakai nɔŋŋ. Tony, ni wɔtsĩ etã kɛtsɔ hiɛ lɛ wie akɛ: “Bɔ ni atsɔse mi ahã lɛ hewɔ lɛ, mileee bɔ ni akɛɔ dabi, ni miheɔ nitsumɔ babaoo mishwieɔ minɔ fe bɔ ni manyɛ matsu. Enɛ hewɔ lɛ, mihã wɔsusu saji ni baaye abua mi ni male he ni minyɛmɔ yawaa lɛ ahe yɛ wɔweku jamɔ  lɛ mli, ni mihã miŋa tsɔɔ mi bɔ ni enaa mi ehãa yɛ no gbɛfaŋ. Agbɛnɛ hu, mikwɛ vidio ni ji, Tsɔsemɔ Mɛi Krokomɛi, Muu Ofɔ̃ Amɛnɔ, Ni Owo Amɛ Hewalɛ, Taakɛ Yesu Feɔ Lɛ ni yɔɔ jw.org lɛ nɔ lɛ.” No sɛɛ lɛ, Tony kɛ nitsumɔi ni jwere enɔ lɛ ekomɛi wo mɛi adɛŋ koni amɛye amɛbua lɛ kɛtsu he nii. Mɛni jɛ mli kɛba? Tony wie akɛ: “Aatsu nibii ni esa akɛ atsu yɛ asafo lɛ mli lɛ fɛɛ ahe nii pɛpɛɛpɛ. Ni bianɛ lɛ, miná be pii ni mikɛbaafee nibii ni baahã mihemɔkɛyeli lɛ mli awa.”

7. Mɛɛ gbɛ nɔ asafoŋ onukpai baanyɛ akase Gideon kɛ́ aawie amɛhiɛ? (Yakobo 3:13)

⁷ Kɛ́ mɔ ko wie ohiɛ loo ewie eshi bo lɛ, kaajie naa yɛ mlifu mli. Nɔ kroko ni baanyɛ ahã ewa kɛhã asafoŋ onukpai akɛ amɛbaaba amɛhe shi ji, kɛ́ mɛi wie amɛhiɛ. Yɛ shihilɛ nɛɛ hu mli lɛ, amɛbaanyɛ amɛkase Gideon. Gideon le akɛ eyeee emuu. No hewɔ lɛ, be ni Efraimbii lɛ wie ehiɛ lɛ, emli fuuu amɛ, moŋ lɛ ekɛ amɛwie yɛ naajɔlɛ mli. (Koj. 8:1-3) Be ni amɛwieɔ lɛ, ebo amɛ toi jogbaŋŋ, ni ejɔɔ sane lɛ he. Enɛ hãa wɔnaa akɛ, ebaa ehe shi. Asafoŋ onukpai ni hiɛ kã shi lɛ kaseɔ Gideon. Kɛ́ mɔ ko wie akɛ nɔ ko ni amɛfee lɛ ejaaa lɛ, amɛboɔ mɔ lɛ toi, ni amɛjieee naa yɛ mlifu mli. (Kanemɔ Yakobo 3:13.) Enɛ ni amɛfeɔ lɛ hãa toiŋjɔlɛ hiɔ asafo lɛ mli.

8. Kɛ́ ajie asafoŋ onukpai ayi lɛ, te esa akɛ amɛfee amɛnii amɛhã tɛŋŋ? Okɛ enɛ he nɔkwɛmɔnɔ ahã.

⁸ Okɛ yijiemɔ lɛ fɛɛ ahã Yehowa. Be ni Gideon ye Midianbii lɛ anɔ kunim ni mɛi jie eyi lɛ, egbala mɛi lɛ ajwɛŋmɔ kɛtee Yehowa moŋ nɔ. (Koj. 8:22, 23) Mɛɛ gbɛ nɔ asafoŋ onukpai baanyɛ akase Gideon? No ji ni amɛkɛ yijiemɔ lɛ baahã Yehowa yɛ nibii ni amɛnyɛ amɛfee lɛ ahe. (1 Kor. 4:6, 7) Akɛ nɔkwɛmɔnɔ lɛ, kɛ́ asafoŋ onukpa ko tsɔɔ nii jogbaŋŋ ni mɛi jie eyi lɛ, ebaanyɛ egbala jwɛŋmɔ kɛya Nyɔŋmɔ Wiemɔ lɛ nɔ akɛ jɛmɛ ji he ni ená nɔ ni etsɔɔ lɛ kɛjɛ. Loo ebaanyɛ egbala jwɛŋmɔ kɛya Yehowa asafo lɛ nɔ akɛ jɛmɛ ji he ni ená nakai tsɔsemɔ lɛ kɛjɛ. Yɛ be kɛ beiaŋ lɛ, esa akɛ asafoŋ onukpai lɛ akwɛ kɛji bɔ ni amɛtsɔɔ nii amɛhãa lɛ gbalaa jwɛŋmɔ kɛyaa Yehowa nɔ loo egbalaa jwɛŋmɔ kɛbaa amɛ moŋ amɛnɔ. Asafoŋ onukpa ko ni atsɛɔ lɛ Timothy lɛ fee nɔ ko ni tamɔ nɛkɛ. Be ni awó lɛ akɛ asafoŋ onukpa lɛ, no mli lɛ esumɔɔ wiemɔ hãmɔ waa. Ewie akɛ: “Kɛ́ miihã wiemɔ lɛ, misumɔɔ ni makpa misane lɛ hiɛ kakadaŋŋ ni mikɛ nɔkwɛmɔnii ni yɔɔ kɛŋtsɛŋŋ atsu nii. Enɛ hãa bei pii lɛ nyɛmimɛi lɛ jieɔ miyi waa. Shi mibayɔse akɛ, enɛ gbalaa nyɛmimɛi lɛ ajwɛŋmɔ kɛbaa minɔ moŋ fe ni amɛjwɛŋmɔ baaya Biblia lɛ loo Yehowa nɔ.” Sɛɛ mli lɛ, Timothy na akɛ esa akɛ etsake bɔ ni etsɔɔ nii ehãa lɛ koni ekagbala jwɛŋmɔ kɛba enɔ. (Abɛi 27:21) Mɛni jɛ mli kɛba? Ewie akɛ: “Bianɛ lɛ, nyɛmimɛi lɛ hãa mileɔ bɔ ni wiemɔ ko ni mihã lɛ eye ebua amɛ ni amɛdamɔ naagba ko naa loo ewaje amɛ ni amɛfi shi yɛ shihilɛ ko ni mli wa mli loo ehã amɛbɛŋkɛ Yehowa kpaakpa. Kɛ́ amɛwie nakai lɛ, mináa miishɛɛ waa fe afii komɛi ni eho be ni amɛyijiemɔ lɛ fɛɛ kɔɔ mi pɛ mihe lɛ.”

9. Mɛɛ shihilɛi amli ehe bahia ni Gideon abo gbɛtsɔɔmɔ toi ni efee ekãa? (Kwɛmɔ mfoniri ni yɔɔ wolo lɛ hiɛ lɛ.)

⁹ Be ni Yehowa hala Gideon akɛ enyiɛ Israelbii lɛ ahiɛ lɛ, ekɛ shihilɛi komɛi kpe ni bi ni ebo gbɛtsɔɔmɔ toi ni efee ekãa. Akɛ nɔkwɛmɔnɔ lɛ, Yehowa kɛ nitsumɔ ko ni wa wo edɛŋ akɛ ekumɔ epapa Baal afɔleshaa latɛ lɛ eshwie shi. (Koj. 6:25, 26) Sɛɛ mli be ni Gideon bua asraafoi anaa koni amɛkɛ Midianbii lɛ ayawu lɛ, Yehowa kɛɛ lɛ akɛ egbɔ asraafoi lɛ anɔ. Sɛɛ mli lɛ, esaa ekɛɛ lɛ akɛ egbɔ amɛnɔ ekoŋŋ. (Koj. 7:2-7) Agbɛnɛ hu, be ni shɛ be ni ebaayatutua Midianbii lɛ, Yehowa kɛɛ lɛ ni etutua amɛ nyɔɔŋ.​—Koj. 7:9-11.

10. Mɛɛ shihilɛi baanyɛ ehã ewa kɛhã asafoŋ onukpa ko akɛ ebaabo gbɛtsɔɔmɔ toi?

¹⁰ Esa akɛ asafoŋ onukpai abo gbɛtsɔɔmɔ toi oya. (Yak. 3:17) Asafoŋ onukpa ni boɔ gbɛtsɔɔmɔ toi lɛ kɛ nɔ ni Biblia lɛ kɛɔ loo gbɛtsɔɔmɔi ni Yehowa asafo lɛ kɛhãa lɛ tsuɔ nii oya. Enɛ feɔ nɔkwɛmɔnɔ kpakpa kɛhãa mɛi krokomɛi. Shi nɔ ko baanyɛ ahã ewa kɛhã lɛ akɛ ebaabo gbɛtsɔɔmɔ toi. Ekolɛ bɔ ni gbɛtsɔɔmɔi lɛ eko nyiɛ eko sɛɛ,  loo bɔ ni atsakeɔ gbɛtsɔɔmɔi lɛ ekomɛi oyayaayai lɛ baanyɛ ahã ewa kɛhã lɛ akɛ ekɛbaatsu nii. Bei komɛi lɛ, ebaanyɛ ena gbɛtsɔɔmɔi lɛ akɛ nilee bɛ mli akɛ akɛbaatsu nii loo ewa akɛ akɛbaatsu nii. Bei komɛi hu lɛ, abaanyɛ akɛ gbɛtsɔɔmɔ ko ahã lɛ ni baanyɛ ekɛ ewala awo oshãra mli. Mɛɛ gbɛ nɔ asafoŋ onukpai lɛ baanyɛ akase Gideon yɛ enɛ hu mli?

11. Mɛni asafoŋ onukpai baafee kɛtsɔɔ akɛ amɛboɔ gbɛtsɔɔmɔ toi?

¹¹ Bo gbɛtsɔɔmɔ toi jogbaŋŋ ni okɛtsu nii. Yehowa tsɔɔ Gideon bɔ ni ekpãtã epapa afɔleshaa latɛ lɛ hiɛ ehã, he ni ema afɔleshaa latɛ hee yɛ ehã Yehowa, kɛ kooloo pɔtɛɛ ni ekɛshã afɔle. Gideon eyasusuuu akɛ gbɛtsɔɔmɔ ni akɛhã lɛ lɛ wa tsɔ loo nilee bɛ mli. Efee bɔ ni Yehowa tsɔɔ lɛ lɛ pɛpɛɛpɛ. Ŋmɛnɛ lɛ, Yehowa asafo lɛ tsɔɔ lɛtai, adafitswai, kɛ saji krokomɛi anɔ ekɛ gbɛtsɔɔmɔi hãa asafoŋ onukpai lɛ koni no aye abua wɔ ni wɔbɛŋkɛ Yehowa kpaakpa ni wɔhi shi shweshweeshwe hu. Wɔsumɔɔ asafoŋ onukpai lɛ waa, ejaakɛ amɛkɛ gbɛtsɔɔmɔi ni Yehowa asafo lɛ kɛhãa amɛ lɛ tsuɔ nii pɛpɛɛpɛ. Asafo muu lɛ fɛɛ náa enɛ ni amɛfeɔ lɛ he sɛɛ waa.​—Lala 119:112.

12. Mɛɛ gbɛ nɔ asafoŋ onukpai baanyɛ amɛkɛ Hebribii 13:17 lɛ atsu nii kɛ́ Yehowa asafo lɛ bi ni amɛtsake bɔ ni amɛtsuɔ nɔ ko he nii amɛhãa lɛ?

¹² Kɛ́ Yehowa asafo lɛ fee tsakemɔ ko lɛ, okɛtsu nii. Kɛ́ obaakai lɛ, Yehowa kɛɛ Gideon akɛ ehã esraafoi lɛ fɛɛ aya shĩa ni eshwɛ mɛi fioo pɛ. (Koj. 7:8) Ekolɛ Gideon bi ehe akɛ: ‘Ani ehe miihia ni mɛi nɛɛ aya? Ani wɔbaaye kunim?’ Kɛ́ Gideon bi ehe nakai po lɛ, efee nɔ ni Yehowa kɛɛ efee lɛ pɛpɛɛpɛ. Ŋmɛnɛ lɛ, kɛ́ Yehowa asafo lɛ bi ni asafoŋ onukpai lɛ atsake bɔ ni amɛtsuɔ nɔ ko he nii amɛhãa, ni asafoŋ onukpai lɛ fee nakai amrɔ nɔŋŋ lɛ, no baatsɔɔ akɛ amɛmiikase Gideon. (Kanemɔ Hebribii 13:17.) Akɛ nɔkwɛmɔnɔ lɛ, yɛ afi 2014 lɛ, Gbɛtsɔɔmɔ Kuu lɛ tsake gbɛ ni atsɔɔ nɔ awoɔ nyɔmɔ ni abɔɔ yɛ Maŋtsɛyeli Asai kɛ Kpeei Asai amaamɔ he lɛ. (2 Kor. 8:12-14) Tsutsu ko lɛ, kɛ́ ama Maŋtsɛyeli Asa lɛ, ahãa asafoi ni kpeɔ yɛ jɛmɛ lɛ woɔ nyɔmɔ ni abɔ kɛma Maŋtsɛyeli Asa lɛ fiofio. Shi kɛjɛ afi 2014 lɛ, ajɛɔ onia ni asafoi ni yɔɔ jeŋ fɛɛ lɛ tsuɔ lɛ mli amamɔɔ asafo lɛ tsũi yɛ he fɛɛ he ni ehe baahia ni ama eko yɛ kɛ́ asafoi ni yɔɔ jɛmɛ lɛ baanyɛ awo he nyɔmɔ jio, amɛnyɛŋ amɛwo he nyɔmɔ jio. Be ni nyɛmi nuu ko ni atsɛɔ lɛ José lɛ nu tsakemɔ nɛɛ he lɛ, ewie yɛ eyitsoŋ akɛ: ‘Kɛ́ nɛkɛ abaaya lɛ, no lɛ anyɛŋ ama Maŋtsɛyeli Asa kome po. Biɛ nɛɛ afeee nakai.’ Mɛni ye ebua José ni etsake susumɔ ni ehiɛ nɛɛ? Ewie akɛ: “Wiemɔi ni yɔɔ Abɛi 3:5, 6 lɛ kai mi akɛ esa akɛ mikɛ mihiɛ afɔ̃ Yehowa nɔ. Ni kɛjɛ be ni akɛ gbɛtsɔɔmɔ nɛɛ hã lɛ, nibii etee lɛ jogbaŋŋ diɛŋtsɛ! Anyɛ amamɔ Maŋtsɛyeli Asai pii, ni bɔ ni wɔtsuɔ onia wɔhãa bianɛ lɛ hewɔ lɛ, anyɛɔ atsuɔ asafoi fɛɛ ahiamɔ nii ahe nii.”

13. (a) Mɛni Gideon ná hemɔkɛyeli akɛ Nyɔŋmɔ baafee ehã lɛ? (b) Mɛɛ gbɛ nɔ asafoŋ onukpai baanyɛ akase Gideon? (Kwɛmɔ mfoniri lɛ hu.)

¹³ Feemɔ ekãa ni ofee Yehowa suɔmɔnaa nii. Gideon bo Yehowa toi yɛ gbeyei ni esheɔ kɛ ewala ni baayaje oshãra mli lɛ fɛɛ sɛɛ. (Koj. 9:17) Yehowa fee nibii srɔtoi ni hã Gideon ná hemɔkɛyeli ni mli wa akɛ, Yehowa baaye ebua lɛ ni ebu Israelbii lɛ  ahe. Asafoŋ onukpai ni yɔɔ hei ni atsĩ wɔnitsumɔ lɛ naa yɛ lɛ miikase Gideon. Amɛtoɔ asafoŋ kpeei ahe gbɛjianɔ, ni amɛkɛ nyɛmimɛi lɛ feɔ ekome kɛyaa shiɛmɔ eyɛ mli akɛ abaanyɛ amɔ amɛ loo abaanyɛ akɛ amɛ aya amralofoi anitsumɔhe ko ni abibii amɛ saji ŋmɛlɛtswai abɔ loo ashwie amɛ yɛ nitsumɔ mli loo ayi amɛ po. c Enɛ hãa wɔnaa akɛ nyɛmimɛi nɛɛ yɛ ekãa waa. Yɛ amanehulu kpeteŋkpele lɛ mli lɛ, ja asafoŋ onukpai lɛ yɛ ekãa dani amɛbaanyɛ amɛkɛ gbɛtsɔɔmɔi ni akɛbaahã amɛ lɛ atsu nii, kɛ́ no kɛ amɛwala baawo oshãra mli po. Ekolɛ gbɛtsɔɔmɔi nɛɛ baakɔ bɔ ni wɔbaafee wɔshiɛ kojomɔ sane ni naa wa ni tamɔ nyɔŋmɔŋtɛi lɛ he kɛ bɔ ni wɔbaafee wɔje Gog ni jɛ Magog lɛ tutuamɔ lɛ mli shweshweeshwe lɛ he.​—Eze. 38:18; Kpo. 16:21.

14. Mɛɛ gbɛ nɔ Gideon mia ehiɛ egbe nitsumɔ ko ni Yehowa kɛwo edɛŋ lɛ naa?

¹⁴ Nitsumɔ ni Yehowa kɛwo Gideon dɛŋ akɛ esɔmɔ akɛ kojolɔ lɛ bi ni etsu nii waa. Be ni Gideon kɛ mɛi 300 ni fata ehe lɛ yatutua Midianbii lɛ nyɔɔŋ mli lɛ, Midianbii lɛ jo foi, shi Gideon kɛ ewebii lɛ nyiɛ amɛsɛɛ kɛjɛ Yezreel Jɔɔ lɛ mli kɛtee Yordan Faa lɛ naa tɔ̃ɔ, ni eeenyɛ efee akɛ jwɛi kɛ tsei yɛ Yordan Faa lɛ naa fɛɛ. (Koj. 7:22) Be ni Gideon kɛ ewebii lɛ shɛ Yordan Faa lɛ naa lɛ, ani amɛkpa Midianbii lɛ asɛɛ nyiɛmɔ? Dabi. Eyɛ mli akɛ no mli lɛ etɔ amɛ moŋ, shi amɛfo Yordan Faa lɛ ni amɛtee nɔ amɛnyiɛ Midianbii lɛ asɛɛ. Naagbee lɛ, amɛnine yashɛ Midianbii lɛ anɔ ni amɛkpãtã amɛhiɛ.​—Koj. 8:4-12.

15. Mɛni nɛkɛ baanyɛ ahã etɔ asafoŋ onukpa ko bliboo?

¹⁵ Nibii ni asafoŋ onukpai lɛ tsuɔ yɛ asafo lɛ mli kɛ amɛwekui lɛ akwɛmɔ lɛ hãa etɔɔ amɛ bliboo. Kɛ́ eba lɛ nakai lɛ, mɛɛ gbɛ nɔ amɛbaanyɛ amɛkase Gideon?

16-17. Mɛni ye ebua Gideon ni etee nɔ etsu nitsumɔ ni Yehowa kɛwo edɛŋ lɛ? Ni mɛni asafoŋ onukpai baanyɛ amɛhe amɛye akɛ Yehowa baafee ehã amɛ? (Yesaia 40:28-31) (Kwɛmɔ mfoniri lɛ hu.)

¹⁶ Hemɔ oye akɛ Yehowa baahã bo hewalɛ. Gideon he eye akɛ Yehowa baahã lɛ hewalɛ, ni nakai pɛpɛɛpɛ Yehowa fee. (Koj. 6:14, 34) Akɛ nɔkwɛmɔnɔ lɛ, be ko lɛ, Gideon kɛ ewebii lɛ hiɛ foi kɛnyiɛ Midian maŋtsɛmɛi enyɔ komɛi asɛɛ. Eeenyɛ  efee akɛ, maŋtsɛmɛi nɛɛ tara afukpɔŋɔi anɔ, shi Gideon kɛ ewebii lɛ nyiɛ amɛnane nɔ. (Koj. 8:12, 21) Kɛ̃lɛ, Yehowa ye ebua Israelbii lɛ ni amɛmɔmɔ maŋtsɛmɛi enyɔ nɛɛ ni amɛye kunim yɛ ta lɛ mli. Asafoŋ onukpai, be fɛɛ be ni nyɛbaanu he akɛ etɔ nyɛ lɛ, nyɛkɛ nyɛhiɛ afɔ̃ɔ Yehowa nɔ ni ebaahã nyɛ hewalɛ, ejaakɛ Yehowa lɛ, “etɔɔɔ lɛ, ni egbɔjɔɔɔ hu.”​—Kanemɔ Yesaia 40:28-31.

¹⁷ Etɔɔ nyɛmi nuu ko ni atsɛɔ lɛ Matthew ni fata Ajinafoi Akuu Ni Kɛ Helatsamɔhei Shãraa lɛ he lɛ waa. Mɛni yeɔ ebuaa lɛ ni enyɛɔ eyaa nɔ etsuɔ nitsumɔ nɛɛ? Ewie akɛ: “Mina akɛ wiemɔi ni yɔɔ Filipibii 4:13 lɛ ji anɔkwale. Bei pii kɛ́ etɔ mi bliboo ni minu he akɛ minyɛɛɛ dɔŋŋ lɛ, misɔleɔ waa ni mikpaa Yehowa fai koni ehã mi hewalɛ ni manyɛ maye mabua minyɛmimɛi lɛ. Yɛ bei ni tamɔ nɛkɛ amli lɛ, minuɔ he akɛ Yehowa mumɔ lɛ hãa mi hewalɛ ni miyaa nɔ miyeɔ mibuaa minyɛmimɛi lɛ.” Tamɔ Gideon fee lɛ, asafoŋ onukpai lɛ kɛ amɛhe shãa afɔle waa koni amɛnyɛ amɛkwɛ Yehowa webii lɛ anɔ, eyɛ mli akɛ jeee be fɛɛ be amɛnáa enɛ feemɔ mlɛo. Shi esa akɛ amɛyɔse akɛ, amɛnyɛmɔ yawaa he ko, ni no hewɔ lɛ, jeee be fɛɛ be amɛbaanyɛ amɛfee nɔ ni amɛshweɔ akɛ amɛfee lɛ. Kɛ̃lɛ, amɛbaanyɛ amɛhe amɛye akɛ kɛ́ amɛsɔle amɛhã Yehowa lɛ, ebaahã amɛ hewalɛ lɛ ni amɛnyɛ amɛya nɔ amɛtsu amɛnitsumɔ lɛ.​—Lala 116:1; Fip. 2:13.

18. Mɛɛ gbɛ nɔ asafoŋ onukpai baanyɛ akase Gideon?

¹⁸ Asafoŋ onukpai baanyɛ akase nibii pii kɛjɛ Gideon dɛŋ. Akɛ nɔkwɛmɔnɔ lɛ, esa akɛ amɛhã ehi amɛjwɛŋmɔ mli akɛ, jeee nɔ fɛɛ nɔ amɛbaanyɛ amɛfee. No hewɔ lɛ, esaaa akɛ amɛloɔ nitsumɔ pii amɛshwieɔ amɛnɔ fe bɔ ni amɛbaanyɛ amɛtsu. Agbɛnɛ hu, esa akɛ amɛba amɛhe shi kɛ́ ajie amɛyi loo awie akɛ amɛtsuuu nɔ ko he nii jogbaŋŋ be ni yɛ anɔkwale mli lɛ naagba bɛ nɔ ni amɛtsu lɛ he. Kɛfata he lɛ, esa akɛ amɛbo gbɛtsɔɔmɔ toi ni amɛfee ekãa, titri lɛ, be ni jeŋ fɔŋ nɛɛ naagbee lɛ bɛŋkɛɔ lɛ. Ni esa akɛ amɛná hemɔkɛyeli ni mli wa akɛ, ekɔɔɔ he eko naagbai ni amɛkɛbaakpe lɛ, Yehowa baahã amɛ hewalɛ lɛ ni amɛkɛdamɔ naa. Anɔkwa, wɔhiɛ sɔɔ asafoŋ onukpai ni tsuɔ nii waa nɛɛ, ni wɔbuɔ amɛ akɛ “mɛi ni sa woo.”​—Fip. 2:29.