1-2. Mɛɛ naagba Lot kɛkpe ni wɔ hu wɔkɛkpeɔ ŋmɛnɛ?

 KƐ́ WƆNA bɔ ni mɛi ajeŋba ekpɔtɔ ŋmɛnɛ lɛ, wɔnuɔ he tamɔ bɔ ni Lot nu he lɛ. Lot le akɛ, wɔ-Tsɛ ni yɔɔ ŋwɛi lɛ sumɔɔɔ jeŋba sha. No hewɔ lɛ, ‘ehao babaoo yɛ jeŋba gbonyo ni efeee mɔ hiɛgbele ni nɔtɔlɔi lɛ kɛ amɛhe wo mli lɛ hewɔ.’ (2 Pet. 2:7, 8) Shi Lot ekaseee mɛi ni bɔle lɛ lɛ ajeŋba gbonyo lɛ, ejaakɛ esheɔ Nyɔŋmɔ gbeyei ni esumɔɔ lɛ. Wɔ hu wɔyɛ mɛi ni ebuuu Yehowa jeŋba he mlai lɛ amɛhãaa nɔ ko lɛ ateŋ. Kɛ̃lɛ, kɛ́ wɔtee nɔ wɔfee nibii ni baahã wɔsumɔ Nyɔŋmɔ ni wɔshe lɛ gbeyei lɛ, wɔbaaba wɔjeŋ jogbaŋŋ be fɛɛ be.​—Abɛi 14:2.

² Yehowa ejɛ suɔmɔ mli ewo wɔ ŋaa pii yɛ Abɛi awolo lɛ mli ni baaye abua wɔ ni wɔfee nakai. Kɛ́ hii ji wɔ jio, yei ji wɔ jio, gbekɛbii ji wɔ jio, onukpai ji wɔ jio lɛ, kɛ́ wɔsusu ŋaawoi kpakpai ni yɔɔ Abɛi awolo lɛ mli lɛ ahe lɛ, wɔbaaná he sɛɛ waa.

3. Yɛ nɔ ni awie yɛ Abɛi 17:3 lɛ naa lɛ, mɛni ji yiŋtoo kome hewɔ ni ehe miihia waa ni wɔhã wɔhiɛ akã wɔtsui he? (Kwɛmɔ mfoniri lɛ hu.)

³ Nɔ kome hewɔ ni ehe miihia waa ni wɔhã wɔhiɛ akã wɔtsui he ji akɛ, Yehowa taoɔ tsui amli. Nɔ ni enɛ tsɔɔ ji akɛ, jeee bɔ ni mɛi naa wɔ yɛ kponɔgbɛ lɛ pɛ Yehowa naa, shi moŋ, enaa mɛi ni wɔji yɛ wɔmligbɛ, ni ji mɛi ni wɔji diɛŋtsɛ. (Kanemɔ Abɛi 17:3.) Kɛ́ wɔjwɛŋɔ Yehowa ŋaawoi kpakpai ni baanyɛ ahã wɔhi shi kɛya naanɔ lɛ ahe daa lɛ, ebaasumɔ wɔsane, ni wɔnáŋ dekã ni wɔkɛjwɛŋ nibii gbohii ni Satan kɛ eje lɛ lɛ baanyɛ amɛkɛfite wɔjwɛŋmɔ lɛ ahe. (Yoh. 4:14; 1 Yoh. 5:18, 19) Kɛ́ wɔbale Yehowa jogbaŋŋ  lɛ, wɔbaasumɔ lɛ waa ni wɔbaabu lɛ waa hu. Enɛ hewɔ lɛ, wɔsumɔŋ ni wɔfee nɔ ko ni baakumɔ etsui, ni kɛ́ wɔnu he akɛ wɔyafee esha lɛ, wɔbaajie kɛje wɔjwɛŋmɔ mli oya. Wɔbaabi wɔhe akɛ, ‘Mɛni hewɔ mafee nɔ ko ni tamɔ nɛkɛ ni mikɛkumɔ mɔ ko ni sumɔɔ mi waa nɛkɛ lɛ tsui?’​—1 Yoh. 4:9, 10.

4. Mɛɛ gbɛ nɔ Yehowa gbeyei ni nyɛmi yoo ko sheɔ lɛ ye ebua lɛ ni ekɛ ehe eyawooo jeŋba sha mli?

⁴ Nyɛmi yoo ko ni yɔɔ Croatia ni atsɛɔ lɛ Marta lɛ kɛ shihilɛ ko ni kulɛ ewaaa akɛ ekɛ ehe baawo jeŋba sha mli lɛ kpe. Ewie akɛ: “Esha lɛ mli ŋɔɔmɔ ni maye lɛ he mijwɛŋmɔ fɛɛ, ni minyɛɛɛ majwɛŋ nɔ ko nɔ ko he. Shi akɛni misheɔ Yehowa gbeyei hewɔ lɛ, mikɛ mihe wooo mli.” b Mɛɛ gbɛ nɔ Yehowa gbeyei ni esheɔ lɛ ye ebua lɛ ni ekɛ ehe wooo jeŋba sha lɛ mli? Marta wie akɛ, esusu nɔ ni baaba kɛ́ ekɛ ehe yawo mli lɛ he. Wɔ hu wɔbaanyɛ wɔfee nakai. Kɛ́ wɔkɛ wɔhe yawo jeŋba sha mli lɛ, nɔ ni ehiii fe fɛɛ ni baajɛ mli kɛba ji, wɔbaakumɔ Yehowa tsui, ni hegbɛ ni kulɛ wɔbaaná akɛ wɔbaasɔmɔ lɛ kɛya naanɔ lɛ baaŋmɛɛ wɔ.​—1 Mo. 6:5, 6.

5. Mɛni okaseɔ yɛ Leo sane lɛ mli?

⁵ Kɛ́ wɔsheɔ Yehowa gbeyei lɛ, wɔkɛ mɛi ni feɔ nibii gbohii ebɔŋ. Naa nyɛmi nuu ko ni yɔɔ Congo ni atsɛɔ lɛ Leo lɛ niiashikpamɔ. Ebaptisimɔ lɛ sɛɛ afii ejwɛ lɛ, ekɛ mɛi komɛi ni feɔ nibii gbohii bɔi bɔɔ. Enu he akɛ, bei abɔ ni efeee nibii gbohii ni amɛfeɔ lɛ eko lɛ, etɔ̃ko Yehowa nɔ. Shi etsɛɛɛ ni enanemɛi gbohii nɛɛ anifeemɔ ná enɔ hewalɛ ni ebɔi dãanumɔ babaoo, ni ekɛ ehe wo jeŋba sha mli hu. Shi sɛɛ mli lɛ, ebɔi nibii ni efɔlɔi ni ji Yehowa Odasefoi lɛ tsɔɔ lɛ, kɛ miishɛɛ ni eyɔɔ be ni esɔmɔɔ Yehowa lɛ he susumɔ. Mɛni jɛ mli kɛba? Ejwɛŋmɔ ba shĩa, ni asafoŋ onukpai lɛ ye amɛbua lɛ ni eku esɛɛ kɛba Yehowa ŋɔɔ. Ŋmɛnɛ lɛ, eesɔmɔ akɛ asafoŋ onukpa kɛ gbɛgbalɔ krɛdɛɛ, ni ená miishɛɛ waa.

6. Mɛɛ yei enyɔ ahe wɔbaasusu agbɛnɛ?

 ⁶ Agbɛnɛ, nyɛhãa wɔsusua Abɛi yitso 9 lɛ he. Yɛ nakai ŋmalɛ lɛ mli lɛ, akɛ hiɛshikamɔ kɛ kwashiafeemɔ toɔ yei srɔtoi enyɔ ahe. (Okɛto Romabii 5:14; Galatiabii 4:24 lɛ he.) Be ni wɔsusuɔ ŋmalɛ nɛɛ he lɛ, hã ehi ojwɛŋmɔ mli akɛ ŋmɛnɛ lɛ, mɛi pii ni yɔɔ je lɛ lɛ mli lɛ enaaa bɔlɛnamɔ mli jeŋba sha kɛ ponografi kwɛmɔ akɛ nɔ ko gbonyo. (Efe. 4:19) No hewɔ lɛ, ehe miihia waa ni wɔya nɔ wɔfee nibii ni baahã wɔshe Nyɔŋmɔ gbeyei, ni wɔtsi wɔhe kɛje efɔŋ he. (Abɛi 16:6) Kɛ́ hii ji wɔ jio, yei ji wɔ jio, wɔbaanyɛ wɔná ŋaawoi ni yɔɔ Abɛi yitso 9 lɛ mli lɛ ahe sɛɛ. Yei ni awie amɛhe yɛ ŋmalɛ nɛɛ mli lɛ ateŋ mɔ fɛɛ mɔ miifɔ̃ “mɛi ni bɛ jwɛŋmɔ,” ni ji mɛi ni jwɛŋmɔ esako lɛ nine ni amɛba eshĩa lɛ. Etamɔ nɔ ni amɛteŋ mɔ fɛɛ mɔ miikɛɛ amɛ akɛ, ‘Nyɛbaa mishĩa lɛ ni nyɛbayea nii.’ (Abɛi 9:1, 5, 6, 13, 16, 17) Shi esoro bɔ ni mɛi ni yaa yoo kwashia lɛ shĩa lɛ baayagbe naa amɛhã lɛ kwraa yɛ bɔ ni mɛi ni yaa yoo hiɛshikalɔ lɛ shĩa lɛ baayagbe naa amɛhã lɛ he.

7. Yɛ nɔ ni awie yɛ Abɛi 9:13-18 lɛ naa lɛ, mɛni baa mɛi ni yaa yoo kwashia lɛ shĩa lɛ anɔ? (Kwɛmɔ mfoniri lɛ hu.)

⁷ Naa nɔ ni awie yɛ “yoo kwashia” lɛ he. (Kanemɔ Abɛi 9:13-18.) Eboɔ etsɛɔ mɔ fɛɛ mɔ ni jwɛŋmɔ esako lɛ akɛ, ‘Ba biɛ’ ni obaye nii. Shi mɛni baa mɛi ni yaa eshĩa lɛ anɔ? Biblia lɛ kɛɛ: “Mɛi ni egboi ni bɛ hewalɛ dɔŋŋ lɛ ji mɛi ni yɔɔ jɛmɛ.” Kɛ́ obaakai lɛ, yɛ Abɛi yitso 2 lɛ, awie nɔ ko ni tamɔ nakai nɔŋŋ yɛ yoo ni “bɛ subaŋ” ni “bɛ jeŋba” lɛ he. Awie yɛ ehe akɛ: “Eshĩa lɛ kɛ mɔ kpelekeɔ shi kɛyaa gbele mli.” (Abɛi 2:11-19) Yɛ Abɛi 5:3-10 lɛ, awie yoo kroko ni “bɛ subaŋ” ni lɛ hu “enaji kpelekeɔ shi kɛyaa gbele mli” lɛ he.

8. Mɛni esa akɛ mɛi fɛɛ ni yoo kwashia lɛ boɔ etsɛɔ amɛ lɛ akpɛ amɛyiŋ yɛ he?

⁸ Esa akɛ mɛi fɛɛ ni “yoo kwashia” lɛ boɔ etsɛɔ amɛ lɛ akpɛ amɛyiŋ yɛ nɔ ni amɛbaafee he. Ani amɛbaaya etsɛmɔ lɛ aloo amɛyaŋ? Wɔ hu wɔbaanyɛ wɔkɛ shihilɛ ko akpe ni ebaabi ni wɔkpɛ wɔyiŋ yɛ nɔ ni wɔbaafee he. Akɛ nɔkwɛmɔnɔ lɛ, kɛ́ wɔkɛ shihilɛ ko kpe ni baanyɛ ahã wɔbɔ ajwamaŋ loo wɔmiikwɛ TV loo wɔyɛ Intanɛt lɛ nɔ ni wɔna ponografi lɛ, mɛni wɔbaafee?

9-10. Mɛɛ yiŋtoi ahewɔ esa akɛ wɔkwɛ wɔhenɔ jogbaŋŋ koni wɔkayabɔ ajwamaŋ?

⁹ Wɔyɛ yiŋtoi kpakpai pii ahewɔ ni esa akɛ wɔkwɛ wɔhe nɔ jogbaŋŋ koni wɔkayabɔ ajwamaŋ. “Yoo kwashia” lɛ kɛɛ, “Nu ni aju lɛ, enumɔ ŋɔɔ.” Mɛni ji “nu ni aju lɛ”? Biblia lɛ kɛ bɔlɛnamɔ ni yaa nɔ yɛ nuu kɛ eŋa teŋ lɛ toɔ nu ni hãa mɔ tsui nyɔɔ emli lɛ he. (Abɛi 5:15-18) Kɛ́ nuu ko kɛ yoo ko bote gbalashihilɛ mli lɛ, amɛbaanyɛ amɛná bɔlɛ, ejaakɛ Yehowa ehã amɛ  hegbɛ lɛ akɛ amɛfee nakai. No hewɔ lɛ, wɔbaanyɛ wɔkɛɛ akɛ, “nu ni aju lɛ” ji ajwamaŋbɔɔ, ni ji bɔlɛnamɔ ni yaa nɔ yɛ mɛi enyɔ ni jeee wu kɛ ŋa lɛ ateŋ. Bɔ ni julɔi feɔ bɔ fɛɛ bɔ ni amɛbaanyɛ koni akamɔ amɛ lɛ, nakai nɔŋŋ bei pii lɛ, mɛi ni bɔɔ ajwamaŋ lɛ feɔ yɛ teemɔŋ koni akamɔ amɛ. “Nu ni aju lɛ” ŋɔɔ mɛi ni nuɔ lɛ anaa waa, titri lɛ, kɛ́ amɛnu he akɛ mɔ ko mɔ ko enaaa nɔ ni amɛfeɔ lɛ. Shi amɛmiilaka amɛhe! Yehowa miina nɔ ni amɛfeɔ lɛ fɛɛ, ni nɔ ko bɛ ni yɔɔ oshãra fe wekukpaa ni yɔɔ mɔ ko kɛ Yehowa teŋ lɛ ni baafite. Enɛ jeee nɔ ko ni “ŋɔɔ” kwraa, ejoɔ moŋ. (1 Kor. 6:9, 10) Shi jeee no pɛ ji naagba ni amɛbaaná.

¹⁰ Kɛ́ mɔ ko bɔ ajwamaŋ lɛ, ebaanyɛ ewo lɛ hiɛgbele, ehã enu he akɛ ehe bɛ sɛɛnamɔ, ehã ehiɛ hɔ be ni esako ehe, ni ejwaa weku hu. Kɛfata he lɛ, mɛi ni bɔɔ ajwamaŋ lɛ gboiɔ yɛ mumɔŋ, ni tsɔɔ akɛ, wekukpaa ni yɔɔ amɛ kɛ Yehowa teŋ lɛ fiteɔ. Shi jeee no pɛ. Helai mɔmɔɔ amɛteŋ mɛi pii ni amɛgboiɔ diɛŋtsɛ hu. (Abɛi 7:23, 26) No hewɔ lɛ, eyɛ faŋŋ akɛ, nilee yɛ mli akɛ wɔyaŋ yoo kwashia lɛ ‘shĩa’ lɛ, ni wɔyeŋ eniyenii lɛ eko. Abɛi 9:18 lɛ kɛɔ akɛ: “Mɛi ni yoo lɛ fɔ̃ amɛ nine lɛ yɛ Gbonyobu lɛ mli tɔ̃ɔ.” Kɛ́ nɛkɛ ji bɔ ni mɛi ni yaa yoo kwashia lɛ shĩa lɛ yagbeɔ naa amɛhãa lɛ, mɛni hewɔ mɔ ni mɛi pii yaa jɛmɛ lɛ?​—Abɛi 9:13-18.

11. Mɛni hewɔ kɛ́ mɔ ko kwɛ ponografi lɛ, ebaaye lɛ awui waa?

¹¹ Nɔ kome ni hãa mɛi pii yabɔɔ ajwamaŋ loo kɛ́ wɔɔwie lɛ amɛyaa yoo kwashia lɛ shĩa ji, amɛkwɛɔ ponografi. Mɛi komɛi nuɔ he akɛ naagba ko bɛ he akɛ mɔ ko baakwɛ ponografi. Shi jeee nakai kwraa sane lɛ ji. Kɛ́ mɔ ko kwɛ ponografi lɛ, eyeɔ lɛ awui waa. Ehãa bulɛ ni mɔ lɛ yɔɔ kɛhã lɛ diɛŋtsɛ ehe kɛ mɛi krokomɛi lɛ tãa, ni agbɛnɛ hu, ewaa kɛhãa lɛ akɛ ebaakpa kwɛmɔ. Kɛ́ mɔ ko kwɛ ponografi lɛ, nibii ni ena lɛ kaa ejwɛŋmɔ mli ni ewa waa akɛ ebaajie kɛje ejwɛŋmɔ mli. Biblia lɛ kɛɛ wɔgbe wɔgbɔmɔtso lɛ he nii lɛ, ni tsɔɔ akɛ, wɔkashwe nibii fɔji. Shi ponografi hãa mɛi shweɔ nibii fɔji moŋ. (Kol. 3:5; Yak. 1:14, 15) No hewɔ lɛ, ebɛ naakpɛɛ akɛ mɛi ni kwɛɔ ponografi lɛ ateŋ mɛi pii yabɔɔ ajwamaŋ.

12. Mɛni kɛ́ wɔfee lɛ, no baatsɔɔ akɛ wɔsumɔɔɔ ni wɔkwɛɔ mfonirii ni baatee wɔbɔlɛnamɔ henumɔi ashi?

¹² Kɛ́ wɔhiɛ foŋ loo tablɛti loo amɛhenɔi lɛ eko ni ponografi ba nɔ trukaa lɛ, mɛni esa akɛ wɔfee? Esa akɛ wɔjie wɔhiɛ amrɔ nɔŋŋ ni wɔkakwɛ. Nɔ kome ni baaye abua wɔ ni wɔfee nakai ji, ni wɔbaahã ehi wɔjwɛŋmɔ mli akɛ, wekukpaa ni yɔɔ wɔ kɛ Yehowa teŋ lɛ ji nii ni jara wa fe fɛɛ ni wɔyɔɔ. Bei komɛi lɛ, mfonirii ni jeee ponografi lɛ po baanyɛ atee wɔbɔlɛnamɔ henumɔi ashi, ni esaaa akɛ wɔkwɛɔ mfonirii ni tamɔ nɛkɛ lɛ hu. Mɛni hewɔ? Ejaakɛ wɔsumɔɔɔ ni wɔfeɔ nɔ ko bibioo po ni baahã wɔná akɔnɔ fɔŋ ko yɛ wɔtsui mli. (Mat. 5:28, 29) Asafoŋ onukpa ko ni yɔɔ Thailand ni atsɛɔ lɛ David lɛ wie akɛ: “Mibiɔ mihe akɛ: ‘Eyɛ mli akɛ mfonirii nɛɛ jeee ponografi moŋ, shi ani Yehowa baaná mihe miishɛɛ kɛ́ ena ni miikwɛ?’ Kɛ́ mibi mihe sane nɛɛ, no yeɔ ebuaa mi ni mikwɛɛɛ mfonirii nɛɛ.”

13. Mɛni kɛ́ wɔfee lɛ no baatsɔɔ akɛ wɔhiɛ kã shi?

¹³ Kɛ́ wɔsheɔ Yehowa gbeyei lɛ, no baaye abua wɔ ni wɔkafee nɔ ko ni esumɔɔɔ. Biblia lɛ kɛɛ: “Yehowa gbeyeishemɔ ji nɔ klɛŋklɛŋ ni hãa mɔ náa hiɛshikamɔ.” (Abɛi 9:10) Wɔnaa enɛ faŋŋ yɛ Abɛi yitso 9 lɛ shishijeegbɛ. Jɛmɛ lɛ, akɛ “anɔkwa hiɛshikamɔ” to yoo kroko he.

14. Yɛ nɔ ni awie yɛ Abɛi 9:1-6 lɛ naa lɛ, nɛgbɛ afɔ̃ɔ mɛi nine ni amɛya?

¹⁴ Kanemɔ Abɛi 9:1-6. Yehowa, ni ji mɔ ni bɔ wɔ kɛ anɔkwa hiɛshikamɔ fɛɛ Jɛɛhe lɛ ni wieɔ yɛ biɛ lɛ. (Abɛi 2:6; Rom. 16:27) Shĩa ni awie he yɛ biɛ lɛ da ni eyɛ akulashiŋi kpawo. Enɛ tsɔɔ akɛ, Yehowa miisumɔ ni mɔ fɛɛ mɔ ni miitao ekase ehe nii koni ehiɛ akã shi lɛ aba eŋɔɔ.

15. Mɛni Yehowa fɔ̃ɔ wɔ fɛɛ nine ni wɔfee?

 ¹⁵ Nɔ ni awie yɛ yoo lɛ ni akɛ lɛ damɔ shi kɛhã “anɔkwa hiɛshikamɔ” lɛ he lɛ hãa wɔnaa akɛ, Yehowa nineshi jɔ, ni ehãa wɔ nibii kpakpai babaoo. Akɛ nɔkwɛmɔnɔ lɛ, awie yɛ “anɔkwa hiɛshikamɔ” [loo “yoo lɛ”] he akɛ, esaa kooloo ni egbe lɛ jogbaŋŋ, efutu ewain lɛ, ni eŋmɛ ekpɔlɔ lɛ hu. (Abɛi 9:2, shn.) Awie yɛ kuku 4 kɛ 5 lɛ hu akɛ, “Yoo lɛ [loo “hiɛshikamɔ”] kɛɔ mɔ ni bɛ jwɛŋmɔ lɛ akɛ: ‘Nyɛbaa nyɛbayea miniyenii lɛ eko.’” Mɛni hewɔ esa akɛ wɔya anɔkwa hiɛshikamɔ shĩa lɛ ni wɔyaye eniyenii lɛ eko? Nɔ hewɔ lɛ ji akɛ, Yehowa miisumɔ ni ebii fɛɛ ahiɛ akã shi ni amɛkafee nibii ni baaye amɛ awui. Esumɔɔɔ ni wɔkɛ wɔhiɛ ayashi dani wɔkase nii yɛ mli. Enɛ hewɔ “ekɛ hiɛshikamɔ toɔ ehãa mɔ ni ja” lɛ. (Abɛi 2:7) Kɛ́ wɔsheɔ Yehowa gbeyei lɛ, wɔbaafee nibii ni esumɔɔ. Wɔbaabo ŋaa kpakpa ni ewoɔ wɔ lɛ toi, ni wɔbaajɛ wɔtsuiŋ wɔkɛtsu nii.​—Yak. 1:25.

16. Mɛɛ gbɛ nɔ Nyɔŋmɔ gbeyeishemɔ ye ebua nyɛmi nuu ko ni atsɛɔ lɛ Alain lɛ ni ekpɛ yiŋ kpakpa yɛ sane ko he? Ni mɛni jɛ mli kɛba?

¹⁶ Asafoŋ onukpa ko ni atsɛɔ lɛ Alain lɛ nyɛ ekpɛ yiŋ kpakpa yɛ sane ko he, ejaakɛ esheɔ Yehowa gbeyei. Ewie akɛ: “He ni mitsɔɔ nii yɛ lɛ, tsɔɔlɔi lɛ pii kɛɛ kɛ́ amɛkwɛ ponografi lɛ, amɛkaseɔ nii yɛ mli.” Shi Alain hãaa nɔ ni amɛwie lɛ akɔne eyiŋ ni lɛ hu ekwɛ eko. Ewie akɛ: “Misheɔ Nyɔŋmɔ gbeyei, no hewɔ lɛ mitswa mifai shi akɛ mikwɛŋ nakai sinii lɛ. Agbɛnɛ hu, mitsɔɔ amɛ nɔ hewɔ ni mikwɛɛɛ lɛ.” Wɔbaanyɛ wɔkɛɛ akɛ, Alain kɛ ŋaa ni “anɔkwa hiɛshikamɔ” woɔ akɛ ‘wɔnyiɛ niiashishinumɔ gbɛ lɛ nɔ tɛ̃ɛ’ lɛ tsu nii. (Abɛi 9:6) Nɔ ni efee lɛ sa tsɔɔlɔi lɛ ateŋ mɛi komɛi ahiɛ waa. No hewɔ lɛ, amrɔ nɛɛ akɛ amɛ miikase Biblia lɛ ni amɛyaa asafoŋ kpeei.

17-18. Mɛɛ jɔɔmɔi mɛi ni yaa “anɔkwa hiɛshikamɔ” shĩa lɛ náa bianɛ? Ni mɛɛ jɔɔmɔi amɛbaaná wɔsɛɛ hu? (Kwɛmɔ mfoniri lɛ hu.)

¹⁷ Yehowa etsɔ mfonirifeemɔŋ yei enyɔ nɛɛ anɔ etsɔɔ wɔ nɔ ni kɛ́ wɔfee lɛ wɔbaaná miishɛɛ kɛya naanɔ. Ehã wɔna akɛ, mɛi ni yaa “yoo kwashia” ni yɔɔ hoo lɛ shĩa lɛ kɛ amɛjwɛŋmɔ maa ‘ŋɔɔmɔ’ ni amɛbaaná kɛ́ amɛyabɔ ajwamaŋ lɛ nɔ. Shi amɛleee akɛ nɔ ni amɛfeɔ lɛ baaye amɛ awui wɔsɛɛ. Amɛbaayagbe naa yɛ “Gbonyobu lɛ mli tɔ̃ɔ.”​—Abɛi 9:13, 17, 18.

¹⁸ Shi mɛi ni yaa “anɔkwa hiɛshikamɔ” shĩa lɛ náa he sɛɛ waa! Amrɔ nɛɛ po lɛ, Yehowa ehã amɛ mumɔŋ niyenii babaoo, ni ji nibii ni baaye abua amɛ ni amɛhi emasɛi kpaakpa. (Yes. 65:13) Yehowa tsɔ gbalɔ Yesaia nɔ ewie akɛ: “Nyɛboa mi toi jogbaŋŋ, ni nyɛye nɔ ni hi, ni nyɛbaaná nɔ ni ji niyenii kpakpa diɛŋtsɛ he miishɛɛ.” (Yes. 55:1, 2) Yehowa miitsɔɔ wɔ nii koni wɔsumɔ nibii ni esumɔɔ lɛ ni wɔnyɛ nibii ni enyɛɔ lɛ. (Lala 97:10) Agbɛnɛ hu, kɛ́ wɔfɔ̃  mɛi nine akɛ amɛba “anɔkwa hiɛshikamɔ” shĩa lɛ ni amɛba lɛ, wɔnáa miishɛɛ waa. Etamɔ nɔ ni ‘wɔyadamɔ maŋ lɛ mli hei ni kwɔlɔ lɛ wɔmiibolɔ akɛ: “Mɔ fɛɛ mɔ ni jwɛŋmɔ esako lɛ aba biɛ.”’ Mɛi fɛɛ ni boɔ wɔtsɛmɔ lɛ toi ni amɛbafataa wɔhe lɛ kɛ wɔ fɛɛ baaná jɔɔmɔi bianɛ. Shi jeee no kɛkɛ. Kɛ́ wɔtee nɔ ‘wɔnyiɛ niiashishinumɔ gbɛ lɛ nɔ tɛ̃ɛ’ lɛ, wɔbaahi shi kɛya naanɔ.​—Abɛi 9:3, 4, 6.

19. Yɛ nɔ ni aŋma yɛ Jajelɔ 12:13, 14 lɛ naa lɛ, mɛni esa akɛ wɔya nɔ wɔfee? (Kwɛmɔ akrabatsa ni ji, “ Nyɔŋmɔ Gbeyeishemɔ Buɔ Wɔhe” lɛ hu.)

¹⁹ Kanemɔ Jajelɔ 12:13, 14. Nyɛhãa wɔyaa nɔ wɔshea Yehowa gbeyei koni no abu wɔtsui he. Agbɛnɛ hu, kɛ́ wɔsheɔ Yehowa gbeyei lɛ, no baaye abua wɔ ni wɔba wɔjeŋ jogbaŋŋ yɛ naagbee gbii nɛɛ amli, ni wɔhi emasɛi daa. Akɛni wɔsheɔ Yehowa gbeyei hewɔ lɛ, wɔbaaya nɔ wɔshiɛ wɔhã mɛi babaoo koni amɛba “anɔkwa hiɛshikamɔ” shĩa lɛ, ni amɛná he sɛɛ.