1-2. Yɛ nɔ ni awie yɛ Lala 25:14 lɛ naa lɛ, kɛ́ wɔmiitao wɔkɛ Yehowa abɔ naanyo kpaakpa lɛ, mɛni esa akɛ wɔfee?

 KƐ́ OOTAO okɛ mɔ ko abɔ naanyo ni nyɛnaanyobɔɔ lɛ mli awa ni ehi shi daa lɛ, mɛɛ sui komɛi ni he hiaa esa akɛ oná? Ekolɛ obaakɛɛ akɛ, esa akɛ osumɔ onaanyo lɛ ni oye obua lɛ. Shi ekã shi faŋŋ akɛ, okɛŋ akɛ esa akɛ oshe lɛ gbeyei. Kɛ̃lɛ, tamɔ bɔ ni wɔnaa yɛ ŋmalɛ ni nikasemɔ nɛɛ damɔ nɔ lɛ mli lɛ, kɛ́ wɔmiitao wɔkɛ Yehowa abɔ naanyo kpaakpa lɛ, esa akɛ ‘wɔshe lɛ gbeyei.’​—Kanemɔ Lala 25:14.

² Kɛ́ wɔbɔi Yehowa sɔɔmɔ etsɛ jio, wɔbɔi lɛ sɔɔmɔ etsɛko jio, esa akɛ wɔ fɛɛ wɔshe lɛ gbeyei. Shi kɛ́ akɛɛ wɔshe Nyɔŋmɔ gbeyei lɛ, te etsɔɔ tɛŋŋ? Mɛni kɛ́ wɔfee lɛ, ebaahã wɔshe Yehowa gbeyei? Ni mɛni wɔbaanyɛ wɔkase yɛ Obadia, ni ji shĩa nɔkwɛlɔ lɛ, Osɔfonukpa Yehoiada, kɛ Maŋtsɛ Yehoash he saji ni yɔɔ Biblia lɛ mli lɛ amli ni baaye abua wɔ ni wɔshe Nyɔŋmɔ gbeyei?

3. Mɛni hewɔ bei komɛi lɛ ehi akɛ wɔbaashe nii gbeyei? Okɛ enɛ he nɔkwɛmɔnɔ ahã.

³ Bei komɛi lɛ, kɛ́ wɔna akɛ nɔ ko ni wɔyaafee lɛ baanyɛ aye wɔ awui lɛ, wɔsheɔ gbeyei. Enɛ hi waa, ejaakɛ ehãa wɔkwɛɔ wɔnifeemɔ jogbaŋŋ. Akɛ nɔkwɛmɔnɔ lɛ, wɔyanyiɛŋ gɔŋ ko naabu, ejaakɛ wɔsheɔ gbeyei akɛ wɔbaagbee shi. Agbɛnɛ hu, kɛ́ wɔna akɛ oshãra ko yaaba he ni wɔyɔɔ lɛ, wɔjoɔ foi kɛshiɔ jɛmɛ, ejaakɛ  wɔsheɔ gbeyei akɛ wɔbaapila. Ni kɛ́ wɔna akɛ nɔ ko ni wɔyaawie loo wɔyaafee lɛ ehiii ni ebaanyɛ egba wɔnaanyo ko naa lɛ, wɔfeee, ejaakɛ wɔsheɔ gbeyei akɛ no baanyɛ afite wɔ kɛ wɔnaanyo lɛ teŋ.

4. Te Satan miisumɔ ni wɔna Yehowa wɔhã tɛŋŋ?

⁴ Satan miisumɔ ni wɔna Yehowa akɛ mɔ ko ni nɔ ko nɔ ko esaaa ehiɛ ni daa nɛɛ emli efu ni kɛ́ wɔtɔ̃ bibioo po lɛ, ebaagbala wɔtoi waa. Eesumɔ ni wɔná susumɔ nɛɛ koni no ahã wɔshe gbeyei akɛ wɔkɛ Yehowa baabɔ naanyo. (Hiob 4:18, 19) Ele akɛ, kɛ́ Yehowa he ŋmiŋmi mɔ wɔ lɛ, wɔbaakpa Yehowa sɔɔmɔ. Mɛni baaye abua wɔ ni wɔkaná susumɔ ni ejaaa nɛɛ ni Satan taoɔ wɔná lɛ? No ji, ni wɔbaashe Yehowa gbeyei.

5. Kɛ́ akɛɛ mɔ ko sheɔ Nyɔŋmɔ gbeyei lɛ, te etsɔɔ tɛŋŋ?

⁵ Kɛ́ akɛɛ mɔ ko sheɔ Nyɔŋmɔ gbeyei lɛ, te etsɔɔ tɛŋŋ? Etsɔɔ akɛ, mɔ lɛ sumɔɔ Nyɔŋmɔ waa ni esumɔɔɔ ni efeɔ nɔ ko ni baafite ekɛ lɛ teŋ. Yesu ‘sheɔ Nyɔŋmɔ gbeyei.’ (Heb. 5:7) Shi no etsɔɔɔ akɛ Yehowa he ŋmiŋmi mɔ lɛ. (Yes. 11:2, 3) Moŋ lɛ, esumɔɔ Yehowa waa, ni eboɔ lɛ toi. (Yoh. 14:21, 31) Wɔ hu wɔbuɔ Yehowa waa, ejaakɛ eyɛ suɔmɔ, ehiɛ kã shi, eyeɔ jalɛ sane, ni eyɛ hewalɛ. Wɔle hu akɛ, akɛni Yehowa sumɔɔ wɔ waa hewɔ lɛ, ekwɛɔ bɔ ni wɔfeɔ wɔnii wɔhãa yɛ gbɛtsɔɔmɔi ni ekɛhãa wɔ lɛ ahe. Kɛ́ wɔbo egbɛtsɔɔmɔi toi lɛ, enáa miishɛɛ, shi kɛ́ wɔbooo toi lɛ, edɔɔ lɛ waa.​—Lala 78:41; Abɛi 27:11.

6. Mɛni ji nɔ kome ni kɛ́ wɔfee lɛ, ebaahã wɔshe Nyɔŋmɔ gbeyei? (Lala 34:11)

⁶ Wɔteŋ mɔ ko mɔ ko bɛ ni be ni abaafɔ lɛ lɛ esheɔ Yehowa gbeyei momo. (Kanemɔ Lala 34:11.) No hewɔ lɛ, esa akɛ wɔje gbɛ wɔkase bɔ ni asheɔ Yehowa gbeyei. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaakwɛ nibii ni ebɔ lɛ ni wɔsusu he. Kɛ́ wɔkwɛ ‘nibii ni Nyɔŋmɔ efee lɛ,’ wɔbaana akɛ ehiɛ kã shi, eyɛ hewalɛ, ni esumɔɔ wɔ waa, ni enɛ baahã wɔbu lɛ ni wɔ hu wɔsumɔ lɛ waa. (Rom. 1:20) Nyɛmi yoo ko ni atsɛɔ lɛ Adrienne lɛ wie akɛ: “Kɛ́ mikwɛ nibii ni Yehowa ebɔ lɛ, minaa kpɛɔ mihe, ni ehãa minaa akɛ ehiɛ kã shi waa. Agbɛnɛ hu, eyeɔ ebuaa mi ni minaa akɛ nɔ fɛɛ nɔ ni ebaakɛɛ akɛ mifee lɛ, kɛ́ mifee lɛ maná he sɛɛ.” Nibii ni Yehowa ebɔ lɛ ahe ni Adrienne susuɔ be fɛɛ be lɛ hewɔ lɛ, ebi ehe akɛ: “Mɛni hewɔ mafee nɔ ko ni baafite mi kɛ Yehowa, mɔ ni hã mi wala lɛ teŋ?” Ani obaanyɛ ohe be fioo otsi nɛɛ ni okɛsusu nɔ ko ni Yehowa ebɔ lɛ he? Kɛ́ ofee nakai lɛ, ebaahã osumɔ Yehowa waa ni obu lɛ waa hu.​—Lala 111:2, 3.

7. Mɛɛ gbɛ nɔ sɔlemɔ baanyɛ aye abua wɔ ni wɔshe Yehowa gbeyei?

⁷ Nɔ kroko ni baahã wɔshe Nyɔŋmɔ gbeyei ji, ni wɔbaasɔle daa. Be fɛɛ be ni wɔbaasɔle lɛ, wɔjwɛŋmɔ baaya nɔ ko ni hãa wɔnaa akɛ Yehowa yɛ lɛɛlɛŋ lɛ nɔ. Akɛ nɔkwɛmɔnɔ lɛ, be fɛɛ be ni wɔbaasɔle ni Yehowa awaje wɔ koni wɔnyɛ wɔdamɔ naagba ko naa lɛ, no hãa wɔkaiɔ akɛ Yehowa yɛ hewalɛ waa. Be fɛɛ be ni wɔbaada lɛ shi yɛ e-Bi lɛ ni ekɛ lɛ hã wɔ lɛ hewɔ lɛ, no kaiɔ wɔ akɛ Yehowa sumɔɔ wɔ waa. Ni be fɛɛ be ni wɔbaakpa Yehowa fai ni eye ebua wɔ ni wɔnyɛ wɔtsu naagba ko he nii lɛ, no kaiɔ wɔ akɛ ehiɛ kã shi waa. Kɛ́ wɔsɔle yɛ nibii ni tamɔ nɛkɛ ahe lɛ, no baahã wɔbu Yehowa waa, ni wɔtswa wɔfai shi waa akɛ wɔfeŋ nɔ ko ni baafite wɔ kɛ lɛ teŋ.

8. Mɛni kɛ́ wɔfee lɛ, ebaahã wɔya nɔ wɔshe Nyɔŋmɔ gbeyei?

⁸ Kɛ́ wɔkase Biblia lɛ daa ni wɔkɛma wɔhiɛ akɛ wɔbaakase nii kɛjɛ mɛi ni fee nɔkwɛmɔnɔ kpakpa kɛ mɛi ni efeee nɔkwɛmɔnɔ kpakpa lɛ ahe saji ni yɔɔ mli lɛ amli lɛ, no baaye abua wɔ ni wɔya nɔ wɔshe Yehowa gbeyei. Yɛ nikasemɔ nɛɛ mli lɛ, wɔbaasusu Yehowa tsuji anɔkwafoi enyɔ komɛi ahe. Amɛji, Maŋtsɛ Ahab shĩa  nɔkwɛlɔ ko ni atsɛɔ lɛ Obadia lɛ, kɛ Osɔfonukpa Yehoiada. No sɛɛ lɛ, wɔbaakwɛ nɔ ni wɔbaanyɛ wɔkase kɛjɛ Yuda maŋtsɛ Yehoash, mɔ ni shishijee mli lɛ esɔmɔ Yehowa jogbaŋŋ, shi sɛɛ mli lɛ, ekpa lɛ sɔɔmɔ lɛ sane lɛ mli.

9. Mɛɛ gbɛ nɔ Nyɔŋmɔ gbeyei ni Obadia sheɔ lɛ ye ebua lɛ? (1 Maŋtsɛmɛi 18:3, 12)

⁹ Klɛŋklɛŋ be ni atsĩ Obadia b tã yɛ Biblia lɛ mli lɛ, awie yɛ ehe akɛ: “Obadia sheɔ Yehowa gbeyei waa.” (Kanemɔ 1 Maŋtsɛmɛi 18:3, 12.) Mɛɛ gbɛ nɔ Nyɔŋmɔ gbeyei ni Obadia sheɔ lɛ ye ebua lɛ? Ehã ebatsɔ mɔ ko ni yeɔ anɔkwa ni anyɛɔ amuɔ afɔ̃ɔ enɔ. Enɛ hewɔ lɛ, maŋtsɛ lɛ tu eshĩa lɛ fɛɛ kwɛmɔ ewo edɛŋ. (Okɛto Nehemia 7:2 lɛ he.) Agbɛnɛ hu, akɛni Obadia sheɔ Nyɔŋmɔ gbeyei hewɔ lɛ, enyɛ efee ekãa waa, ni su nɛɛ ye ebua lɛ. Be ni Obadia yɔɔ wala mli lɛ, no mli lɛ, Maŋtsɛ Ahab ni yeɔ Israel nɔ, ni eyitsoŋ wa waa. Biblia lɛ wie yɛ Ahab he akɛ, ‘efee efɔŋ yɛ Yehowa hiɛ fe mɛi fɛɛ ni tsɔ ehiɛ lɛ.’ (1 Maŋ. 16:30) No mli lɛ, Ahab ŋa Yezebel hu jáa Baal, ni enyɛɔ Yehowa aahu akɛ, eka akɛ ebaabule anɔkwa jamɔ shishi kɛje Israel akutsei nyɔŋma maŋtsɛyeli lɛ mli. Ehã agbe Yehowa gbalɔi babaoo po. (1 Maŋ. 18:4) Enɛ hãa wɔnaa akɛ, Obadia kɛ mɛi fɛɛ ni jáa Yehowa ni hi shi yɛ nakai beiaŋ lɛ náaa nibii mlɛo kwraa.

10. Mɛni Obadia fee ni tsɔɔ akɛ eyɛ ekãa waa?

¹⁰ Mɛni Obadia fee ni tsɔɔ akɛ eyɛ ekãa waa? Be ni Yezebel gbeɔ Yehowa gbalɔi lɛ, Obadia kɛ gbalɔi 100 yato tɛkploi enyɔ amli, ni ‘ekɛ gbalɔi 50 wo tɛkploi lɛ eko fɛɛ eko mli, ni eyahãa amɛ blodo kɛ nu.’ (1 Maŋ. 18:13, 14) Eji Yezebel ná ele nɔ ni Obadia feɔ lɛ kulɛ, ebaagbe lɛ. Obadia lɛ, gbɔmɔ ji lɛ tamɔ wɔ nɔŋŋ. No hewɔ lɛ, ekã shi faŋŋ akɛ, eshe gbeyei akɛ abaanyɛ amɔ lɛ ni agbe lɛ. Fɛɛ sɛɛ lɛ, efee ekãa ni ekɛ gbalɔi lɛ to, ejaakɛ esumɔɔ Yehowa kɛ mɛi fɛɛ ni sɔmɔɔ Yehowa lɛ fe lɛ diɛŋtsɛ ewala po.

11. Mɛɛ gbɛ nɔ Yehowa tsuji komɛi ni yɔɔ ŋmɛnɛ lɛ kaseɔ Obadia? (Kwɛmɔ mfoniri lɛ hu.)

¹¹ Ŋmɛnɛ lɛ, Yehowa tsuji pii yɛ maji ni atsĩ wɔnitsumɔ lɛ naa yɛ mli lɛ anɔ. Nyɛmimɛi nɛɛ buɔ maŋ onukpai lɛ, shi tamɔ Obadia fee lɛ, amɛ hu amɛtswa amɛfai shi akɛ amɛhãŋ nɔ ko ahã amɛkpa Yehowa jamɔ. (Mat. 22:21) Amɛboɔ  Nyɔŋmɔ toi moŋ fe gbɔmɛi, ni no hãa anaa akɛ amɛsheɔ lɛ gbeyei. (Bɔf. 5:29) Amɛyaa nɔ amɛshiɛɔ sane kpakpa lɛ, ni amɛkpeɔ yɛ teemɔŋ kɛjáa Yehowa. (Mat. 10:16, 28) Agbɛnɛ hu, amɛkwɛɔ koni amɛnyɛmimɛi lɛ anine ashɛ nibii ni he hiaa amɛ koni amɛya nɔ amɛjá Yehowa lɛ anɔ. Naa nɔ ni nyɛmi nuu ko ni yɔɔ Afrika maji lɛ eko nɔ ni atsɛɔ lɛ Henri lɛ fee. Be ni atsĩ nitsumɔ lɛ naa yɛ amɛmaŋ lɛ nɔ lɛ, ekɛ asafo lɛ woji yahãa nyɛmimɛi lɛ. Ewie akɛ: “Mihiɛ gboɔ waa. No hewɔ lɛ, mina faŋŋ akɛ, bulɛ kpele ni miyɔɔ kɛhã Yehowa lɛ ji nɔ ni hã miná ekãa kɛtsu nitsumɔ nɛɛ.” Ani obaanyɛ ofee ekãa tamɔ Henri? Hɛɛ, obaanyɛ aahu kɛji osheɔ Nyɔŋmɔ gbeyei waa.

12. Mɛni Osɔfonukpa Yehoiada kɛ eŋa fee ni hãa wɔnaa akɛ amɛye Yehowa anɔkwa waa?

¹² Osɔfonukpa Yehoiada she Yehowa gbeyei ni no tsirɛ lɛ ni eye Yehowa anɔkwa ni ewo mɛi krokomɛi hu hewalɛ ni amɛjá Yehowa. Nɔ ni efee be ni Yezebel biyoo Atalia wó ehe maŋnyɛ yɛ Yuda lɛ hãa wɔnaa nakai. No mli lɛ, maŋbii lɛ sheɔ Atalia gbeyei waa. Ani ole nɔ hewɔ? Atalia enaaa mɔbɔ, ni eyitsoŋ wa aahu akɛ, eka akɛ ebaagbe maŋtsɛ bihii lɛ fɛɛ, ni ji lɛ diɛŋtsɛ enabii lɛ, koni lɛ etsɔ maŋnyɛ. (2 Kro. 22:10, 11) Shi maŋtsɛ bihii lɛ ateŋ mɔ kome ni atsɛɔ lɛ Yehoash lɛ yi ná wala ejaakɛ Yehoiada ŋa Yehoshabeat here eyiwala. Yehoshabeat kɛ ewu lɛ kɛ Yehoash yato ni amɛkwɛ lɛ. Nɔ ni amɛfee nɛɛ baa David wekutɔkpaa lɛ yi ni aná mɔ ko yɛ nakai weku lɛ mli ni baaye maŋtsɛ. Yehoiada ye Yehowa anɔkwa, ni esheee Atalia gbeyei.​—Abɛi 29:25.

13. Be ni Yehoash ye afii kpawo lɛ, mɛni ekoŋŋ Yehoiada fee kɛtsɔɔ akɛ eyeɔ anɔkwa?

¹³ Be ni Yehoash ye afii kpawo lɛ, Yehoiada fee nɔ kroko ni hãa wɔnaa akɛ eyeɔ Yehowa anɔkwa. Eto ŋaa ko; ni bɔ ni sane lɛ yɔɔ lɛ ji, kɛ́ ŋaa ni eto lɛ ye omanye lɛ, Yehoash, ni ji mɔ ni sa akɛ eyeɔ maŋtsɛ lɛ, baatsɔ maŋtsɛ. Shi kɛ́ eyayeee omanye lɛ, abaagbe lɛ, Yehoiada lɛ. Yehowa jɔɔ ŋaa ni Yehoiada to lɛ nɔ ni eye omanye. Israelbii lɛ atsɛmɛi ashĩai onukpai lɛ kɛ Levibii lɛ ye amɛbua Yehoiada ni ewó Yehoash maŋtsɛ ni ehã agbe Atalia. (2 Kro. 23:1-5, 11, 12, 15; 24:1) No sɛɛ lɛ, “Yehoiada hã maŋtsɛ lɛ kɛ maŋbii lɛ kɛ Yehowa kpaŋ kpaŋmɔ akɛ amɛbaaya nɔ amɛhi shi akɛ Yehowa maŋ.” (2 Maŋ. 11:17) “Agbɛnɛ hu, eto agbonaakwɛlɔi ewo Yehowa shĩa lɛ agbói lɛ anaa koni mɔ ko ni he tseee yɛ gbɛ ko nɔ lɛ akabote mli.”​—2 Kro. 23:19.

14. Mɛɛ gbɛ nɔ awo Yehoiada hiɛ nyam akɛni ewo Yehowa hiɛ nyam lɛ hewɔ?

¹⁴ Afii pii dani abaafɔ Yehoiada lɛ, Yehowa wie akɛ: “Mɛi ni woɔ mihiɛ nyam lɛ, mawo amɛhiɛ nyam.” Ni lɛɛlɛŋ, ewo Yehoiada hiɛ nyam. (1 Sam. 2:30) Akɛ nɔkwɛmɔnɔ lɛ, ehã aŋma Yehoiada he sane yɛ Biblia lɛ mli koni wɔkase nii yɛ mli. (Rom. 15:4) Agbɛnɛ hu, be ni Yehoiada gbo lɛ, awo ehiɛ nyam. No ji, afu lɛ ‘yɛ David Maŋ lɛ mli yɛ he ni afuɔ maŋtsɛmɛi lɛ yɛ lɛ, ejaakɛ efee nibii kpakpai yɛ Israel ehã anɔkwa Nyɔŋmɔ lɛ kɛ anɔkwa Nyɔŋmɔ lɛ shĩa lɛ.’​—2 Kro. 24:15, 16.

15. Mɛni wɔbaanyɛ wɔkase yɛ Yehoiada sane lɛ mli? (Kwɛmɔ mfoniri lɛ hu.)

¹⁵ Yehoiada sane lɛ baanyɛ aye abua wɔ fɛɛ ni wɔshe Yehowa gbeyei. Asafoŋ onukpai lɛ baanyɛ akase Yehoiada kɛji be fɛɛ be lɛ, amɛkwɛ nibii ni amɛbaanyɛ amɛfee kɛbu asafoŋbii lɛ ahe, ni amɛfee. (Bɔf. 20:28) Yehoiada sane lɛ hãa nyɛmimɛi ni egbɔlɔ lɛ hu naa akɛ, kɛ́ amɛshe Yehowa gbeyei ni amɛye lɛ anɔkwa lɛ, eshɛrɛŋ amɛ efɔŋ, shi moŋ ekɛ amɛ baatsu nii koni eyiŋtoo aba mli. Oblahii, oblayei, kɛ gbekɛbii, ani nyɛkadi bɔ ni Yehowa kɛ Yehoiada ye ehã lɛ? Kɛ́ nyɛkɛ nyɛwiemɔ kɛ nyɛnifeemɔ tsɔɔ akɛ nyɛbuɔ Yehowa tsuji ni edara yɛ afii amli,  titri lɛ, mɛi ni kɛ afii pii esɔmɔ lɛ, no tsɔɔ akɛ nyɛmiikase Yehowa. (Abɛi 16:31) Naagbee kwraa lɛ, nyɛhãa wɔ fɛɛ wɔkasea Israelbii lɛ atsɛmɛi ashĩai onukpai lɛ kɛ Levibii lɛ ni ye amɛbua Yehoiada lɛ, ni wɔ hu wɔye “mɛi ni nyiɛɔ hiɛ” lɛ anɔkwa, wɔfi amɛsɛɛ, ni wɔbo amɛ toi.​—Heb. 13:17.

16. Mɛni hãa wɔnaa akɛ Maŋtsɛ Yehoash sɔmɔɔɔ Yehowa kɛ etsui muu fɛɛ?

¹⁶ Yehoiada ye ebua Maŋtsɛ Yehoash waa ni ebatsɔ gbɔmɔ kpakpa. (2 Maŋ. 12:2) Enɛ hewɔ lɛ, yɛ eblahiiaŋ lɛ, maŋtsɛ lɛ fee nɔ ni sa Yehowa hiɛ. Shi yɛ Yehoiada gbele sɛɛ lɛ, Yehoash bo lumɛi ni yeee Yehowa anɔkwa lɛ toi. Mɛni jɛ mli kɛba? Ekɛ emaŋbii lɛ ‘bɔi wɔŋ tsei lɛ, kɛ amagai lɛ sɔɔmɔ.’ (2 Kro. 24:4, 17, 18) Nɔ ni amɛfee lɛ dɔ Yehowa waa. No hewɔ lɛ, ‘etee nɔ etsu gbalɔi kɛtee amɛŋɔɔ koni amɛhã amɛku amɛsɛɛ kɛba eŋɔɔ, shi amɛbooo toi.’ Amɛbooo Yehoiada binuu Zakaria ni no mli lɛ eesɔmɔ akɛ Yehowa gbalɔ kɛ osɔfo lɛ po toi. c Zakaria feɔ Yehoash papa nyɛmi yoo bi hu. Fɛɛ sɛɛ lɛ, Maŋtsɛ Yehoash hã agbe Zakaria, eyɛ mli akɛ Zakaria weku lɛ ni here eyiwala ni amɛye amɛbua lɛ.​—2 Kro. 22:11; 24:19-22.

17. Te Yehoash yagbe naa ehã tɛŋŋ?

¹⁷ Yehoash efeee nibii ni baahã eya nɔ eshe Yehowa gbeyei, ni enɛ hewɔ lɛ, eyagbeee naa ekpakpa. Afii pii dani abaafɔ Yehoash lɛ,  Yehowa wie akɛ: “Mɛi ni ebuuu mi lɛ, abuŋ amɛ ahãŋ nɔ ko.” (1 Sam. 2:30) Nakai pɛpɛɛpɛ eba lɛ yɛ Yehoash gbɛfaŋ. Siria asraafoi fioo komɛi kɛ Yehoash kɛ ‘esraafoi babaoo’ lɛ bawu ni amɛye enɔ kunim ni “amɛpila lɛ waa.” Be ni amɛshi lɛ amɛtee lɛ, Yehoash diɛŋtsɛ tsuji kpaŋ eyi nɔ ni amɛgbe lɛ yɛ Zakaria ni egbe lɛ hewɔ. Nibii fɔji ni Yehoash fee lɛ ahewɔ lɛ, maŋbii lɛ ebuuu lɛ akɛ mɔ ko ni sa akɛ afuɔ lɛ yɛ “maŋtsɛmɛi afuuhei lɛ” po.​—2 Kro. 24:23-25.

18. Yɛ nɔ ni awie yɛ Yeremia 17:7, 8 lɛ naa lɛ, kɛ́ wɔsumɔɔɔ ni wɔfeɔ tamɔ Yehoash lɛ, mɛni esa akɛ wɔfee?

¹⁸ Mɛni wɔkaseɔ yɛ Yehoash sane lɛ mli? Yehoash tamɔ tso ko ni shishifã mɔ ko shi ni akɛ tso etsɔɔki lɛ koni ekagbee shi. Be ni Yehoiada, ni ji tso lɛ ni akɛtsɔɔki lɛ lɛ gbo lɛ, eyabo mɛi ni yeee Yehowa anɔkwa lɛ toi, ni egbee shi. Esane lɛ hãa wɔnaa akɛ, esaaa akɛ wɔsheɔ Yehowa gbeyei akɛni wɔwekumɛi kɛ wɔnanemɛi Kristofoi miifee nakai lɛ pɛ kɛkɛ hewɔ. Kɛ́ wɔmiitao wɔhe awa yɛ hemɔkɛyeli lɛ mli lɛ, esa akɛ wɔjá Nyɔŋmɔ daa, ni wɔfee nibii ni baahã wɔshe lɛ gbeyei waa. Ni wɔbaanyɛ wɔfee nakai kɛtsɔ Biblia lɛ ni wɔbaakase daa, sanenɔjwɛŋmɔ, kɛ sɔlemɔ nɔ.​—Kanemɔ Yeremia 17:7, 8; Kol. 2:6, 7.

19. Mɛni Yehowa taoɔ ni wɔfee koni ená wɔhe miishɛɛ?

¹⁹ Nɔ ni Yehowa taoɔ wɔfee koni ená wɔhe miishɛɛ lɛ jeee nɔ ko ni wa ni wɔnyɛŋ wɔfee. Jajelɔ 12:13 lɛ tsɔɔ wɔ nɔ ni etaoɔ ni wɔfee lɛ. Jɛmɛ kɛɔ akɛ: “She anɔkwa Nyɔŋmɔ lɛ gbeyei ni oye ekitãi lɛ anɔ, ejaakɛ enɛ ji nitsumɔ kwraa ni esa akɛ gbɔmɔ fɛɛ gbɔmɔ atsu.” Kɛ́ wɔsheɔ Nyɔŋmɔ gbeyei lɛ, wɔbaanyɛ wɔdamɔ kai ni wɔkɛbaakpe wɔsɛɛ lɛ anaa ni wɔfi shi shiŋŋ tamɔ Obadia kɛ Yehoiada, ni nɔ ko nɔ ko nyɛŋ afite wɔ kɛ Yehowa teŋ.