Ja wɔyɛ hemɔkɛyeli dani wɔbaanyɛ wɔsa Yehowa hiɛ. Shi Biblia lɛ kɛɛ, “jeee mɛi fɛɛ yɔɔ hemɔkɛyeli.” (2 Tes. 3:2) Bɔfo Paulo kɛ wiemɔi nɛɛ tsu nii be ni ewieɔ “gbɔmɛi gbohii kɛ mɛi fɔji” ni waa lɛ yi ni eetao ahere lɛ kɛje amɛdɛŋ lɛ ahe lɛ. Shi nɔ ni ewie nɛɛ kɔɔ mɛi krokomɛi hu ahe. Mɛi komɛi sumɔɔɔ akɛ amɛheɔ amɛyeɔ akɛ Nyɔŋmɔ ko ni bɔ nibii fɛɛ. (Rom. 1:20) Mɛi komɛi hu heɔ amɛyeɔ akɛ Nyɔŋmɔ yɛ. Shi hemɔkɛyeli ni tamɔ nɛkɛ lɛ kɛkɛ faaa.

Esa akɛ wɔná nɔmimaa akɛ Yehowa yɛ ni ejwereɔ mɛi fɛɛ ni yɔɔ hemɔkɛyeli ni mli wa lɛ. (Heb. 11:6) Akɛni hemɔkɛyeli fata yibii ni mumɔ krɔŋkrɔŋ lɛ woɔ lɛ ahe hewɔ lɛ, ja wɔná Nyɔŋmɔ mumɔ krɔŋkrɔŋ lɛ dani wɔbaanyɛ wɔná hemɔkɛyeli. Kɛ́ wɔmiitao Nyɔŋmɔ mumɔ krɔŋkrɔŋ lɛ, belɛ esa akɛ wɔsɔle wɔbi Yehowa. (Luka 11:​9, 10, 13) Gbɛ kroko ni he hiaa waa ni wɔbaanyɛ wɔtsɔ nɔ wɔná Nyɔŋmɔ mumɔ krɔŋkrɔŋ lɛ eko ji, ni wɔbaakane e-Wiemɔ lɛ, ejaakɛ ekɛ emumɔ krɔŋkrɔŋ lɛ tsirɛ mɛi ni ŋma lɛ ni amɛŋma. Agbɛnɛ, kɛ́ wɔkane e-Wiemɔ lɛ, esa akɛ wɔsusu nɔ ni wɔkane lɛ he ni wɔbɔ mɔdɛŋ wɔkɛ nɔ ni wɔkase lɛ atsu nii. Kɛ́ wɔfee enɛ lɛ, no baahã wɔná Yehowa mumɔ krɔŋkrɔŋ lɛ, ni ebaahã wɔná hemɔkɛyeli ni baahã wɔsa Yehowa hiɛ.