1. Yɛ Lala 18:46 lɛ, mɛni he David kɛ Yehowa to?

 WƆYƐ jeŋ fɔŋ mli, ni enɛ hewɔ lɛ, wɔshihilɛ baanyɛ atsake trukaa, loo wɔbaanyɛ wɔkɛ naagba ko ni naa wa akpe be ni wɔkpaaa gbɛ. Shi miishɛɛ sane ji akɛ, wɔbaanyɛ wɔkɛ wɔhiɛ afɔ̃ Yehowa Nyɔŋmɔ nɔ akɛ ebaaye ebua wɔ! Yɛ nikasemɔ ni tsɔ hiɛ lɛ mli lɛ, wɔbana akɛ Yehowa wɔ-Nyɔŋmɔ lɛ hiɛ kã, ni efee klalo akɛ ebaaye ebua wɔ be fɛɛ be. Be fɛɛ be ni Yehowa baaye ebua wɔ lɛ, ehãa hemɔkɛyeli ni wɔyɔɔ akɛ “Yehowa hiɛ kã” lɛ mli waa. (Kanemɔ Lala 18:46.) Shi be ni David wie akɛ Yehowa hiɛ kã lɛ sɛɛ nɔŋŋ lɛ, ekɛ Yehowa to nɔ ko ni wala bɛ mli lɛ he. Etsɛ lɛ “mi-Tɛsaa.” Mɛni hewɔ etsɛ lɛ nakai?

2. Mɛni wɔbaakase yɛ tsɛ ni David tsɛ Yehowa akɛ “mi-Tɛsaa” lɛ he?

² Yɛ nikasemɔ nɛɛ mli lɛ, wɔbaakwɛ nɔ hewɔ ni akɛ Yehowa toɔ tɛsaa he kɛ nɔ ni no tsɔɔ wɔ yɛ ehe. Agbɛnɛ hu, wɔbaakwɛ nibii ni baaye abua wɔ ni wɔkɛ wɔhiɛ afɔ̃ enɔ waa ni wɔna lɛ akɛ wɔ-Tɛsaa. Naagbee kwraa lɛ, wɔbaakwɛ bɔ ni wɔbaafee wɔkase Yehowa.

NƆ HEWƆ NI AKƐ YEHOWA TOƆ TƐSAA HE

3. Bei pii lɛ, kɛ́ Biblia lɛ kɛ wiemɔ ni ji “tɛsaa” lɛ tsu nii lɛ, namɔ he ekɔɔ? Okɛ enɛ he nɔkwɛmɔnɔ ahã. (Kwɛmɔ mfoniri lɛ.)

³ Biblia lɛ kɛ Yehowa toɔ tɛsaa he koni no aye abua wɔ ni wɔna sui komɛi ni eyɔɔ. Bei pii lɛ, kɛ́ Yehowa tsuji ni awie amɛhe yɛ Biblia lɛ mli lɛ miijie Yehowa yi akɛ Nyɔŋmɔ ko bɛ ni tamɔ lɛ lɛ, amɛkɛ lɛ toɔ tɛsaa he. He klɛŋklɛŋ ni akɛ Yehowa to tɛsaa he yɛ Biblia lɛ mli ji, 5 Mose 32:4. Be ni Hana sɔleɔ lɛ, ewie akɛ “tɛsaa ko bɛ ni tamɔ wɔ-Nyɔŋmɔ lɛ.” (1 Sam. 2:2) Habakuk hu tsɛ Yehowa “Mi-Tɛsaa.” (Hab. 1:12) Mɔ ni fo Lala 73 lɛ tsɛ Nyɔŋmɔ akɛ ‘etsui tɛsaa.’ (Lala 73:26) Yehowa diɛŋtsɛ po tsɛ ehe tɛsaa. (Yes. 44:8) Nyɛhãa wɔsusua nibii etɛ ahewɔ ni abaanyɛ akɛ Yehowa ato tɛsaa he lɛ ahe, ni wɔkwɛ nibii ni baaye abua wɔ ni wɔkɛ wɔhiɛ afɔ̃ enɔ ni wɔna lɛ akɛ “wɔ-Tɛsaa.”—5 Mo. 32:31.

4. Mɛɛ gbɛ nɔ Yehowa ji abobaahe? (Lala 94:22)

⁴ Yehowa ji abobaahe. Bɔ ni kɛ́ nugbɔ miinɛ waa loo ahum ko ni  naa wa miitswa lɛ mɔ ko baanyɛ eyatee ehe fioo yɛ tɛsaa ko shishi loo tɛkplo ko mli lɛ, nakai nɔŋŋ kɛ́ wɔkɛ shihilɛ ko ni mli wa miikpe lɛ, Yehowa baanyɛ abu wɔhe. (Kanemɔ Lala 94:22.) Ebaanyɛ eye ebua wɔ ni wɔkafee nɔ ko ni baafite wɔ kɛ lɛ teŋ, ni ehã wɔle akɛ kɛ́ naagbai ni wɔkɛkpeɔ lɛ eko hã wɔwala ŋmɛɛ wɔ bianɛ po lɛ, naanɔ wala ebɔŋ wɔ. Ni nɔ ni fe fɛɛ lɛ, ewo wɔ shi akɛ ebaajie nibii fɛɛ ni yeɔ wɔtsui kɛ nibii ni hãa wɔnaa nɔ lɛ kɛya kwraa.—Eze. 34:​25, 26.

5. Kɛ́ wɔmiitao wɔná Yehowa hebuu lɛ he sɛɛ lɛ, mɛni esa akɛ wɔfee?

⁵ Kɛ́ wɔkɛ naagbai kpe lɛ, nɔ kome ni wɔbaanyɛ wɔfee koni wɔná Yehowa hebuu lɛ he sɛɛ ji, ni wɔbaasɔle. Kɛ́ wɔsɔle lɛ, Yehowa baahã wɔ “Nyɔŋmɔ toiŋjɔlɛ” lɛ, ni no baabu wɔtsui kɛ wɔjwɛŋmɔ he. (Fip. 4:​6, 7) Naa nyɛmi nuu ko ni atsɛɔ lɛ Artem ni awo lɛ tsuŋ yɛ ehemɔkɛyeli lɛ hewɔ lɛ niiashikpamɔ. Be ni eyɔɔ tsuŋwoohe lɛ, amralo lɛ najiaŋdamɔlɔ ko ta edaaŋ shii abɔ, efee lɛ niseniianii, ni ewo ehe gbeyei. Artem wie akɛ: “Be fɛɛ be ni ebaatsɛ mi ni eta midaaŋ lɛ, mitsui fãa. . . . Misɔle mihã Yehowa daa. Mibi lɛ ni edro mi hiɛshikamɔ ni eye ebua mi koni ŋmiŋmi akamɔ mi.” Artem tsa esane lɛ nɔ akɛ: “Nibii fɛɛ ni amralo lɛ najiaŋdamɔlɔ lɛ fee mi lɛ eko eko yeee omanye. . . . Yehowa ye ebua mi, ni minu he tamɔ nɔ ni midamɔ gbogbo ko ni wa sɛɛ.”

6. Mɛni hewɔ wɔbaanyɛ wɔmu wɔfɔ̃ Yehowa nɔ daa? (Yesaia 26:​3, 4)

⁶ Yehowa yeɔ anɔkwa, ni wɔbaanyɛ wɔmu wɔfɔ̃ enɔ. Bɔ ni tɛsaa loo gɔŋ tsiii ehe kɛjeee he ni ema lɛ, nakai nɔŋŋ Yehowa baahi wɔmasɛi daa. Wɔbaanyɛ wɔkɛ wɔhiɛ afɔ̃ enɔ, ejaakɛ lɛ ji “naanɔ Tɛsaa” lɛ. (Kanemɔ Yesaia 26:​3, 4.) Yehowa gboŋ kɔkɔɔkɔ, no hewɔ lɛ, ebaanyɛ eye eshiwoi fɛɛ anɔ, ebo wɔsɔlemɔi toi be fɛɛ be, ni eye ebua wɔ be fɛɛ be ni yelikɛbuamɔ he baahia wɔ. Agbɛnɛ hu, wɔbaanyɛ wɔmu wɔfɔ̃ enɔ, ejaakɛ eyeɔ mɛi fɛɛ ni sɔmɔɔ lɛ lɛ anɔkwa. (2 Sam. 22:26) Ehiɛ kpaŋ nibii ni wɔfeɔ lɛ anɔ kɔkɔɔkɔ, ni ebaajɔɔ wɔ daa.—Heb. 6:10; 11:6.

7. Kɛ́ wɔkɛ wɔhiɛ fɔ̃ Yehowa nɔ yɛ nibii fɛɛ mli lɛ, mɛɛ gbɛ nɔ wɔnáa he sɛɛ? (Kwɛmɔ mfoniri lɛ hu.)

⁷ Kɛ́ wɔkɛ wɔhiɛ fɔ̃ Yehowa nɔ yɛ nibii fɛɛ mli lɛ, no tsɔɔ akɛ wɔkɛ lɛ efee wɔ-Tɛsaa. Wɔheɔ wɔyeɔ akɛ, kɛ́ wɔbo Yehowa toi yɛ shihilɛi ni mli wawai po amli lɛ, wɔbaaná he sɛɛ. (Yes. 48:​17, 18) Be fɛɛ be ni wɔbaana akɛ Yehowa eye ebua wɔ lɛ, hemɔkɛyeli ni wɔyɔɔ akɛ ebaaye ebua wɔ wɔsɛɛ lɛ mli waa. Ni kɛ́ eba lɛ nakai lɛ, wɔyiŋ efeŋ wɔ kɔshikɔshi bibioo po akɛ, Yehowa pɛ baanyɛ aye abua wɔ ni wɔdamɔ shihilɛ fɛɛ shihilɛ ni wɔkɛbaakpe lɛ naa, ekɔɔɔ he eko bɔ ni emli wa hã. Bei pii lɛ, kɛ́ wɔyaje shihilɛ ko mli ni mɔ ko mɔ ko bɛ ni baaye abua wɔ lɛ, nakai beiaŋ wɔyɔseɔ akɛ, Yehowa pɛ nɔ wɔbaanyɛ wɔkɛ wɔhiɛ afɔ̃ be fɛɛ be. Nyɛmi nuu ko ni atsɛɔ lɛ Vladimir lɛ wie akɛ: “Be ni miye yɛ tsuŋwoohe lɛ ji be ni minu he akɛ mibɛŋkɛ Yehowa fe be fɛɛ be. Akɛni eshwɛ mi kome ni minyɛɛɛ nɔ ko mafee yɛ shihilɛ mli ni miyaje lɛ he hewɔ lɛ, ehã mikɛ mihiɛ fɔ̃ Yehowa nɔ waa fe tsutsu lɛ.”

8. (a) Mɛni hewɔ wɔbaanyɛ wɔwie akɛ Yehowa tsakeee lɛ? (b) Kɛ́ wɔkɛ Yehowa fee wɔ-Tɛsaa lɛ, mɛɛ gbɛ nɔ wɔnáa he sɛɛ? (Lala 62:​6, 7)

⁸ Yehowa tsakeee. Bɔ ni tɛsaa wulu ko loo gɔŋ ko hiɔ bɔ ni eyɔɔ lɛ nɔŋŋ afii pii ni etsakeee lɛ, nakai nɔŋŋ Yehowa hu tsakeee. Bɔ ni efeɔ enii ehãa  lɛ tsakeee, ni nɔ ni eto eyiŋ akɛ ebaafee lɛ hu tsakeŋ. (Mal. 3:6) Adam kɛ Hawa toigbele lɛ hãaa Yehowa atsake nɔ ni eto eyiŋ akɛ ebaafee ehã adesai lɛ. Tamɔ bɔ ni bɔfo Paulo wie lɛ, lɛɛlɛŋ, Yehowa ‘nyɛŋ ekpa yɛ lɛ diɛŋtsɛ ehe sɛɛ.’ (2 Tim. 2:13) Enɛ tsɔɔ akɛ, ekɔɔɔ he eko nɔ ni baaba loo nɔ ni mɛi baafee lɛ, bɔ ni wɔle Yehowa wɔhã, nɔ ni eto eyiŋ akɛ ebaafee, kɛ eshishitoo mlai lɛ tsakeŋ kɔkɔɔkɔ. Kɛ́ wɔkɛ wɔhiɛ fɔ̃ Yehowa, wɔ-Nyɔŋmɔ ni tsakeee lɛ nɔ lɛ, wɔbaaná hemɔkɛyeli ni mli wa akɛ ebaaye ebua wɔ kɛ́ wɔkɛ shihilɛi ni mli wawai kpe, ni ebaafee nibii ni ewo shi akɛ ebaafee ehã wɔ wɔsɛɛ lɛ.—Kanemɔ Lala 62:​6, 7.

9. Mɛni okaseɔ yɛ Tatyana niiashikpamɔ lɛ mli?

⁹ Kɛ́ wɔkɛ wɔjwɛŋmɔ ma mɔ ni Yehowa ji kɛ nɔ ni eto eyiŋ akɛ ebaafee ehã wɔ lɛ nɔ be fɛɛ be lɛ, no tsɔɔ akɛ wɔkɛ lɛ efee wɔ-Tɛsaa. Ni kɛ́ wɔfee nakai lɛ, no baaye abua wɔ ni wɔye lɛ anɔkwa ni wɔkahao fe nine kɛ́ wɔyaje shihilɛ ko ni mli wa waa mli. (Lala 16:8) Nyɛmi yoo ko ni atsɛɔ lɛ Tatyana lɛ ná enɛ mli niiashikpamɔ. Be ko lɛ, amralofoi lɛ tsĩ enaa yɛ lɛ diɛŋtsɛ eshĩa ni amɛhãaa eya he ko he ko yɛ Odasefonyo ni eji lɛ hewɔ lɛ. Ewie akɛ: “Eshwɛ mi kome too yɛ shĩa. Minaaa shihilɛ lɛ naa kwraa. Mihao waa diɛŋtsɛ.” Shi Tatyana bɔi Yehowa kɛ nɔ ni Yehowa eto eyiŋ akɛ ebaafee ehã adesai lɛ hesusumɔ, ni no hã ena akɛ, ehe miihia waa ni eye Yehowa anɔkwa yɛ kaa ni ekɛkpeɔ lɛ mli. Enɛ ye ebua lɛ ni ehaooo waa tamɔ tsutsu ko, ni enyɛ eye Yehowa anɔkwa. Ewie akɛ: “Be ni misusu shihilɛ mli ni miyaje lɛ he jogbaŋŋ lɛ, no ye ebua ni mina akɛ Yehowa ni miisumɔ ni maye lɛ anɔkwa lɛ hewɔ mitsɔɔ shihilɛ ni mli wa nɛɛ mli lɛ. Enɛ ye ebua mi ni mijwɛŋŋ mi pɛ mihe dɔŋŋ.”

10. Mɛɛ gbɛ nɔ wɔbaanyɛ wɔkɛ Yehowa afee wɔ-Tɛsaa bianɛ?

¹⁰ Etsɛŋ, wɔkɛ shihilɛi ni mli wa waa baakpe, ni ehe baahia ni wɔkɛ wɔhiɛ afɔ̃ Yehowa nɔ fe bei fɛɛ ni eho. No hewɔ lɛ, amrɔ nɛɛ ji be ni esa akɛ wɔfee nibii ni baahã wɔhe wɔye waa akɛ, Yehowa baaye ebua wɔ ni wɔye lɛ anɔkwa yɛ shihilɛ fɛɛ shihilɛ mli. Mɛni ji nibii nɛɛ ekomɛi? Eko ji, ni wɔbaakane mɛi ni awie amɛhe yɛ Biblia lɛ mli kɛ Yehowa tsuji ni yɔɔ ŋmɛnɛ lɛ ahe saji. Kɛ́ ookane saji nɛɛ eko lɛ, okɛ ojwɛŋmɔ ama bɔ ni Nyɔŋmɔ eye ebua ewebii nɛɛ kɛtsɔɔ akɛ lɛ ji amɛ-Tɛsaa lɛ nɔ. Jwɛŋmɔ nɔ ni obaakase yɛ saji nɛɛ amli lɛ nɔ jogbaŋŋ. Kɛ́ ofee nakai lɛ, no baaye abua bo ni okɛ Yehowa afee o-Tɛsaa.

KASEMƆ YEHOWA

11. Mɛni hewɔ esa akɛ wɔbɔ mɔdɛŋ wɔkase Yehowa? (Kwɛmɔ akrabatsa ni ji, “ Oti Ko Ni Nyɛmimɛi Oblahii Baanyɛ Amɛkɛma Amɛhiɛ” lɛ hu.)

¹¹ Wɔsusu nibii komɛi ni hãa akɛ Yehowa toɔ tɛsaa he lɛ ahe. Agbɛnɛ lɛ, wɔbaakwɛ bɔ ni wɔbaafee wɔkase lɛ. Kɛ́ wɔkase Yehowa jogbaŋŋ lɛ, wɔbaanyɛ wɔtswa wɔnyɛmimɛi Kristofoi lɛ wɔma shi. Akɛ nɔkwɛmɔnɔ lɛ, Yesu wo Simon, Kefa (loo “Petro”), ni shishi ji, “Tɛ.” (Yoh. 1:42) Ewo Petro nakai gbɛ́i lɛ, ejaakɛ ena akɛ Petro baashɛje mɛi amii yɛ asafo lɛ mli, ni ebaahã amɛhemɔkɛyeli lɛ mli awa. Biblia lɛ kɛ asafoŋ onukpai lɛ toɔ “hɔɔŋ ni tɛsaa agbo hãa” lɛ he. Enɛ hãa wɔnaa akɛ, asafoŋ onukpai lɛ buɔ asafoŋbii lɛ ahe. (Yes. 32:2) Kɛ́ nyɛmimɛi fɛɛ ni yɔɔ asafo lɛ mli lɛ hu bɔ mɔdɛŋ akɛ amɛbaakase Yehowa lɛ, asafo lɛ he baawa yɛ hemɔkɛyeli lɛ mli.—Efe. 5:1.

12. Mɛni wɔbaanyɛ wɔfee kɛye wɔbua wɔnyɛmimɛi Kristofoi lɛ?

 ¹² Obaanyɛ otsɔ abobaahe ohã onyɛmimɛi Kristofoi lɛ. Kɛ́ adebɔɔ naa oshãra hewɔ lɛ, wɔnyɛmimɛi ashĩai ŋmɛɛ amɛ, loo tai ahewɔ lɛ, amɛjo foi kɛshi amɛshĩa lɛ, esa akɛ wɔhã amɛ he ko amɛhi. Akɛni wɔyɛ “naagbee gbii lɛ amli” hewɔ lɛ, nibii amli baawa ni ehe baahia ni wɔye wɔbua wɔnyɛmimɛi lɛ. (2 Tim. 3:1) Agbɛnɛ hu, wɔbaanyɛ wɔshɛje wɔnyɛmimɛi ni tsui ekumɔ lɛ amii ni wɔhã amɛna akɛ wɔsumɔɔ amɛ. Gbɛ kome ni wɔbaanyɛ wɔtsɔ nɔ wɔfee nakai ji, ni wɔbaajɛ wɔtsui mli wɔkɛ amɛ agba sane ni wɔhã amɛná miishɛɛ kɛ́ wɔtee asafoŋ kpeei. Ŋmɛnɛ lɛ, akɛ mɛi yeee jogbaŋŋ kwraa ni eko saa wɔnyɛmimɛi lɛ ahe, kɛ́ eba lɛ nakai lɛ, ehãa amɛhaoɔ waa ni amɛnuɔ he po akɛ mɔ ko mɔ ko sumɔɔɔ amɛsane. No hewɔ lɛ kɛ́ amɛba asafoŋ kpeei lɛ, esa akɛ wɔfee bɔ fɛɛ bɔ ni wɔbaanyɛ ni wɔwo amɛ hewalɛ ni wɔhã amɛna akɛ wɔsumɔɔ amɛsane.

13. Mɛɛ gbɛ nɔ asafoŋ onukpai lɛ baanyɛ atsɔ abobaahe amɛhã amɛnyɛmimɛi Kristofoi lɛ? (Kwɛmɔ mfoniri lɛ hu.)

¹³ Asafoŋ onukpai, nyɛbaanyɛ nyɛtsɔmɔ abobaahe nyɛhã nyɛnyɛmimɛi Kristofoi ni kɛ naagbai miikpe lɛ. Kɛ́ adebɔɔ naa oshãra ko ba loo nɔ ko fee nyɛmi ko trukaa ni esa akɛ akɛ lɛ aya helatsamɔhe lɛ, asafoŋ onukpai lɛ toɔ gbɛjianɔ oya nɔŋŋ ni amɛyeɔ amɛbuaa lɛ. Agbɛnɛ hu, asafoŋ onukpai lɛ jɛɔ Biblia lɛ mli amɛwoɔ wɔ ŋaa ni amɛwoɔ wɔ hewalɛ. Kɛ́ asafoŋ onukpai lɛ kɛ nyɛmimɛi lɛ wieɔ kɛ naajɔlɛ, amɛboɔ amɛ toi, ni amɛmiaa amɛhiɛ akɛ amɛbaanu amɛ shishi jogbaŋŋ lɛ, ewaŋ kɛhãŋ nyɛmimɛi lɛ akɛ amɛbaabɛŋkɛ amɛ. Anɔkwa, kɛ́ asafoŋ onukpai lɛ jie sui ni tamɔ nɛkɛ kpo lɛ, nyɛmimɛi lɛ naa akɛ amɛsane kã amɛtsui nɔ, ni no hewɔ lɛ, kɛ́ amɛjɛ Biblia lɛ mli amɛwo nyɛmimɛi lɛ ŋaa lɛ, amɛmiaa amɛhiɛ ni amɛkɛtsuɔ nii.—1 Tes. 2:​7, 8, 11.

14. Kɛ́ wɔmiitao mɛi anyɛ amu afɔ̃ wɔ nɔ lɛ, mɛni esa akɛ wɔfee?

¹⁴ Feemɔ nibii ni baahã anyɛ amu afɔ̃ onɔ. Wɔmiisumɔ ni mɛi anyɛ amu afɔ̃ wɔ nɔ, titri lɛ kɛ́  amɛkɛ naagbai kpe. (Abɛi 17:17) Kɛ́ wɔmiitao mɛi anyɛ amɔ afɔ̃ wɔ nɔ lɛ, mɛni esa akɛ wɔfee? Esa akɛ wɔbɔ mɔdɛŋ waa ni wɔkase Yehowa daa gbi. Akɛ nɔkwɛmɔnɔ lɛ, esa akɛ wɔye wɔshiwoi anɔ ni wɔye wɔbe nɔ hu. (Mat. 5:37) Agbɛnɛ hu, kɛ́ wɔna akɛ yelikɛbuamɔ he miihia wɔnyɛmi ko lɛ, esa akɛ wɔye wɔbua lɛ. Kɛfata he lɛ, kɛ́ akɛ nitsumɔ ko wo wɔdɛŋ loo ahã wɔ asaimɛnti ko lɛ, esa akɛ wɔkɛ ehe gbɛtsɔɔmɔi fɛɛ atsu nii.

15. Kɛ́ asafoŋ onukpai lɛ fee nibii ni baahã anyɛ amu afɔ̃ amɛ nɔ lɛ, mɛɛ gbɛ nɔ nyɛmimɛi lɛ náa he sɛɛ?

¹⁵ Kɛ́ asafoŋ onukpai lɛ fee nibii ni baahã anyɛ amu afɔ̃ amɛ nɔ lɛ, nyɛmimɛi lɛ náa he sɛɛ waa. Akɛ nɔkwɛmɔnɔ lɛ, kɛ́ nyɛmimɛi lɛ le akɛ be fɛɛ be ni amɛbaatswa asafoŋ onukpa ko, tamɔ amɛkuu nɔkwɛlɔ lɛ nɛkɛ, kɛhã yelikɛbuamɔ lɛ, amɛnine baashɛ enɔ lɛ, no hãaa amɛye amɛtsui kwraa. Agbɛnɛ hu, kɛ́ amɛna akɛ asafoŋ onukpai lɛ miisumɔ waa ni amɛye amɛbua amɛ lɛ, no hãa amɛnaa akɛ asafoŋ onukpai lɛ susuɔ amɛhe. Ni kɛ́ nyɛmimɛi lɛ na akɛ be fɛɛ be ni asafoŋ onukpai lɛ baawo amɛ ŋaa lɛ, amɛdamɔɔɔ amɛ diɛŋtsɛ amɛsusumɔ nɔ amɛfeee nakai, shi moŋ amɛdamɔɔ Biblia lɛ kɛ asafo lɛ woji lɛ anɔ amɛfeɔ nakai lɛ, nyɛmimɛi lɛ baamu amɛfɔ̃ amɛ nɔ waa. Nɔ kroko ni baahã nyɛmimɛi lɛ anyɛ amu afɔ̃ asafoŋ onukpai  lɛ anɔ ji, kɛ́ asafoŋ onukpai lɛ egbaaa mɛi mɛi ateemɔŋ saji ni agbɛnɛ hu amɛyeɔ amɛwiemɔ nɔ.

16. Kɛ́ wɔfee nɔ ni ja yɛ Yehowa hiɛ be fɛɛ be lɛ, mɛɛ gbɛ nɔ wɔ diɛŋtsɛ kɛ mɛi krokomɛi baaná he sɛɛ?

¹⁶ Feemɔ nɔ ni ja yɛ Yehowa hiɛ be fɛɛ be. Kɛ́ wɔbo Yehowa toi yɛ nibii fɛɛ mli ni wɔhã Biblia lɛ kudɔ wɔ yɛ yiŋ fɛɛ yiŋ ni wɔkpɛɔ lɛ mli lɛ, mɛi baana, ni amɛbaakase wɔ. Kɛ́ wɔkase Nyɔŋmɔ Wiemɔ lɛ ni wɔfee nibii ni baahã wɔhemɔkɛyeli lɛ mli awa lɛ, no baaye abua wɔ ni wɔye Yehowa anɔkwa ni wɔhi shi yɛ eshishitoo mlai lɛ anaa. Agbɛnɛ hu, amale tsɔɔmɔi kɛ susumɔi ni ehe shi yɛ je lɛ mli ni kɛ Yehowa susumɔ kpãaa gbee lɛ naŋ wɔ nɔ hewalɛ. (Efe. 4:14; Yak. 1:​6-8) Kɛ́ wɔnu sane fɔŋ ko lɛ, hemɔkɛyeli ni wɔyɔɔ yɛ Yehowa mli kɛ le ni wɔle akɛ ebaaye eshiwoi fɛɛ anɔ lɛ, baawa wɔ ni wɔya nɔ wɔsɔmɔ lɛ. (Lala 112:​7, 8) Ni kɛ́ wɔdamɔ shi shiŋŋ yɛ hemɔkɛyeli lɛ mli lɛ, wɔbaanyɛ wɔye wɔbua mɛi ni kɛ naagbai miikpe lɛ.—1 Tes. 3:​2, 3.

17. Mɛni kɛ́ asafoŋ onukpai lɛ fee lɛ, no baahã amɛnyɛ amɛye amɛbua nyɛmimɛi lɛ koni amɛkahao fe nine ni amɛya nɔ amɛsɔmɔ Yehowa jogbaŋŋ?

¹⁷ Biblia lɛ kɛɔ akɛ esa akɛ asafoŋ onukpai lɛ afee mɛi ni ŋmɛɔ pɛpɛɛpɛ yɛ amɛnifeemɔi amli, mɛi ni jwɛŋɔ jogbaŋŋ, mɛi ni nyiɛɔ yɛ gbɛjianɔtoo naa, kɛ mɛi ni nuɔ nii ashishi. Akɛni asafoŋ onukpai lɛ jieɔ sui nɛɛ akpo hewɔ lɛ, amɛnyɛɔ amɛyeɔ amɛbuaa nyɛmimɛi lɛ koni amɛkahao fe nine, ni agbɛnɛ hu, amɛkɛ amɛhiɛ afɔ̃ Yehowa nɔ. Kɛfata he lɛ, ‘amɛhiɛɔ anɔkwa wiemɔ lɛ mli kpɛŋŋ,’ ni no hewɔ lɛ amɛnyɛɔ amɛwajeɔ asafo lɛ. (Tito 1:9; 1 Tim. 3:​1-3) Asafoŋ onukpai lɛ yasaraa nyɛmimɛi lɛ ni amɛwoɔ amɛ hewalɛ. Agbɛnɛ hu, amɛfolɔɔɔ asafoŋ kpeei amli, amɛyaa shiɛmɔ daa, ni amɛfeɔ aŋkro nikasemɔ. Enɛ hewɔ lɛ, nyɛmimɛi lɛ kaseɔ amɛnɔkwɛmɔnɔ kpakpa lɛ. Kɛ́ nyɛmimɛi lɛ kɛ naagba ko kpe ni amɛhao waa lɛ, asafoŋ onukpai lɛ yeɔ amɛbuaa amɛ koni amɛkɛ amɛjwɛŋmɔ ama Yehowa kɛ eshiwoi lɛ anɔ.

18. Mɛni hewɔ esa akɛ wɔjie Yehowa yi ni wɔhi emasɛi kpaakpa? (Kwɛmɔ akrabatsa ni ji, “ Nɔ Ko Ni Baaye Abua Bo Ni Obɛŋkɛ Yehowa Kpaakpa” lɛ hu.)

¹⁸ Kɛ́ wɔsusu nibii ni wɔkase yɛ Yehowa he yɛ nikasemɔ nɛɛ mli lɛ ahe lɛ, wɔ hu wɔbaanyɛ wɔkɛɛ nɔ ni Maŋtsɛ David kɛɛ lɛ eko, akɛ: “Ajie Yehowa, mi-Tɛsaa lɛ yi.” (Lala 144:1) Kɛ́ wɔkɛ wɔhiɛ fɔ̃ Yehowa nɔ lɛ, ehãŋ wɔnine anyɛ shi kɔkɔɔkɔ. Yɛ wɔgbɔlɛ beiaŋ po lɛ, wɔbaanyɛ wɔwie akɛ, ‘Yehowa ji wɔ-Tɛsaa,’ ejaakɛ wɔle akɛ ebaaya nɔ eye ebua wɔ ni wɔhi emasɛi kpaakpa.—Lala 92:​14, 15.