1. Mɛni esa akɛ mɔ ko ni miitao ema tsũ lɛ afee dani eje shishi?

ŊƆƆ lɛ akɛ, mɔ ko miitao ema tsũ. Ele tsũ pɔtɛɛ ni eetao ema kɛ bɔ ni eesumɔ ni ema lɛ ehã. Shi ani no tsɔɔ akɛ ebaanyɛ eyahé tsumaa nibii ni ebɔi tsũ lɛ maa amrɔ nɔŋŋ? Dabi. Dani ebaabɔi tsũ lɛ maa lɛ, esa akɛ eta shi ebu naa ekwɛ akɛ shika enyiɛ he baahia lɛ kɛhã tsũ lɛ maa. Enɛ he miihia waa. Mɛni hewɔ? Ejaakɛ no baahã ena kɛji eyɛ shika bɔ ni sa ni ebaanyɛ ekɛma tsũ lɛ egbe naa. Kɛji ebu akɔntaa lɛ jogbaŋŋ lɛ, ebaanyɛ ema etsũ lɛ egbe naa.

2. Yɛ nɔ ni awie yɛ Luka 14:27-30 lɛ naa lɛ, mɛni he esa akɛ osusu jogbaŋŋ dani ohã abaptisi bo?

² Ani osumɔɔ Yehowa ni ohiɛ sɔɔ nibii fɛɛ ni efee ehã bo lɛ? Kɛ́ nakai ni lɛ, ŋwanejee ko bɛ he akɛ, oosumɔ ni abaptisi bo. Shi dani obaahã abaptisi bo lɛ, esa akɛ ofee nɔ ni nuu lɛ ni miitao ema tsũ lɛ baafee lɛ eko. Mɛni hewɔ wɔkɛɔ nakai? Wɔmiikɛɛ nakai yɛ nɔ ni Yesu wie yɛ Luka 14:27-30 lɛ hewɔ. (Kanemɔ.) Yɛ nakai ŋmalɛ lɛ mli lɛ, Yesu tsɔɔ nɔ ni ebiɔ ni wɔfee kɛji wɔmiitao wɔtsɔmɔ ekaselɔi. Ewie akɛ, esa akɛ ‘wɔbu naa wɔkwɛ’ dã. Nɔ ni enɛ tsɔɔ ji akɛ, esa akɛ wɔfee klalo akɛ wɔkɛ nibii komɛi baashã afɔle, ni agbɛnɛ hu, wɔkpɛlɛ nɔ akɛ wɔkɛ naagbai baakpe. (Luka 9:23-26; 12:51-53) No hewɔ lɛ, dani obaahã abaptisi bo lɛ, esa akɛ osusu naagbai ni okɛbaakpe kɛ́ obatsɔ Kristo kaselɔ lɛ he jogbaŋŋ. Kɛ́ ofee nakai lɛ, ebaaye ebua bo ni oye Nyɔŋmɔ anɔkwa ni oya nɔ osɔmɔ lɛ yɛ obaptisimɔ lɛ sɛɛ.

3. Mɛni he wɔbaasusu yɛ nikasemɔ nɛɛ mli?

³ Baptisimɔ kɛ Kristo kaselɔ tsɔmɔ kãaa shi akɔɔɔ. Shi ani ehe yɛ sɛɛnamɔ? Hɛɛ, ehe yɛ sɛɛnamɔ waa! Kɛ́ ohã abaptisi  bo lɛ, obaaná jɔɔmɔi pii amrɔ nɛɛ kɛ wɔsɛɛ hu. Yɛ nikasemɔ nɛɛ mli lɛ, wɔbaasusu sanebimɔi komɛi ni he hiaa ni kɔɔ baptisimɔ he lɛ ahe. Enɛ baaye abua bo ni ona kɛji oshɛ kɛhã baptisimɔ.

4. (a) Mɛni ji henɔjɔɔmɔ? (b) Kɛ́ akɛɛ okwa ohe, tamɔ bɔ ni atsɔɔ yɛ Mateo 16:24 lɛ, te atsɔɔ tɛŋŋ?

⁴ Mɛni ji henɔjɔɔmɔ? No ji, ni obaajɛ otsuiŋ osɔle okɛɛ Yehowa akɛ, obaasɔmɔ lɛ kɛya naanɔ. Esa akɛ ojɔɔ ohe nɔ dani ohã abaptisi bo. Kɛ́ ojɔɔ ohe nɔ ohã Nyɔŋmɔ lɛ, ‘okwa ohe.’ (Kanemɔ Mateo 16:24.) Nɔ ni enɛ tsɔɔ ji akɛ, obatsɔ Yehowa nɔ, ni enɛ ji hegbɛ kpele diɛŋtsɛ. (Rom. 14:8) Yɛ gbɛ ko nɔ lɛ, ookɛɛ Yehowa akɛ, kɛjɛ nakai gbi lɛ nɔ kɛyaa lɛ, obaahã esɔɔmɔ lɛ he ahia bo fe ni obaafee nɔ ni bo diɛŋtsɛ osumɔɔ. Enɛ jeee wiemɔ folo ko kɛkɛ; eji shiwoo ni yɔɔ hiɛdɔɔ. Yehowa enyɛɛɛ wɔnɔ ni wɔwo lɛ shi nɛɛ. Shi kɛ́ wɔná wɔwo shi lɛ, eekpa gbɛ akɛ wɔye nɔ.​—Lala 116:12, 14.

5. Mɛɛ srɔto yɔɔ henɔjɔɔmɔ kɛ baptisimɔ teŋ?

⁵ Mɛɛ srɔto yɔɔ henɔjɔɔmɔ kɛ baptisimɔ teŋ? Henɔjɔɔmɔ ji okɛ Yehowa pɛ teŋ sane. No hewɔ lɛ, ewa akɛ mɛi krokomɛi baale akɛ ojɔɔ ohe nɔ. Shi jeee nakai eji yɛ baptisimɔ gbɛfaŋ; no lɛ, afeɔ yɛ mɛi pii ahiɛ, bei pii lɛ, yɛ kpokpaa nɔ kpee loo kpee wulu shishi. Kɛ́ abaptisi bo lɛ, no hãa mɛi fɛɛ leɔ akɛ ojɔɔ ohe nɔ ohã Yehowa. * No hewɔ lɛ, baptisimɔ ni obaahã abaptisi bo lɛ baahã mɛi ana akɛ osumɔɔ Yehowa, o-Nyɔŋmɔ lɛ, kɛ otsui muu fɛɛ kɛ osusuma muu fɛɛ kɛ ojwɛŋmɔ muu fɛɛ kɛ onyɛmɔ fɛɛ, ni akɛ, otswa ofai shi akɛ obaasɔmɔ lɛ kɛya naanɔ.​—Mar. 12:30.

6-7. Yɛ nɔ ni awie yɛ 1 Petro 3:18-22 lɛ naa lɛ, mɛɛ yiŋtoi enyɔ ahewɔ ehe miihia ni abaptisi bo?

⁶ Ani ehe miihia ni abaptisi bo? Hɛɛ, ehe miihia. Susumɔ wiemɔi ni yɔɔ 1 Petro 3:18-22 lɛ he okwɛ. (Kanemɔ.) Petro kɛ baptisimɔ to kpɛ ni Noa kpɛ adeka lɛ he. Bɔ ni adeka lɛ hã ana akɛ Noa yɛ hemɔkɛyeli lɛ, nakai nɔŋŋ baptisimɔ hu hãa anaa akɛ, wɔjɔɔ wɔhe nɔ wɔhã Yehowa. No sɛɛ lɛ, Petro tsɔɔ nɔ hewɔ ni baptisimɔ he miihia. Ewie akɛ, klɛŋklɛŋ lɛ, ‘ehereɔ wɔyiwala.’ Kɛ́ wɔfee nibii ni tsɔɔ akɛ wɔheɔ Yesu nɔ wɔyeɔ, ni wɔkpɛlɛɔ nɔ akɛ ebagbo ehã wɔ, atee lɛ shi kɛtee ŋwɛi, ni amrɔ nɛɛ “eyɛ Nyɔŋmɔ ninejurɔ nɔ” lɛ, no lɛ, baptisimɔ ni wɔbaahã abaptisi wɔ lɛ baahere wɔyiwala.

⁷ Nɔ ni ji enyɔ lɛ, baptisimɔ hãa wɔnáa “henilee kpakpa.” Kɛ́ wɔjɔɔ wɔhe nɔ wɔhã Nyɔŋmɔ ni abaptisi wɔ lɛ, wekukpaa krɛdɛɛ ko bakãa wɔ kɛ lɛ teŋ. Akɛni wɔtsake wɔtsui lɛɛlɛŋ, ni wɔheɔ wɔyeɔ akɛ Kristo kɛ elá lɛ kpɔ̃ wɔ hewɔ lɛ, Nyɔŋmɔ kɛ wɔhe eshai keɔ wɔ. Enɛ hãa wɔnáa henilee kpakpa yɛ ehiɛ.

8. Mɛni esa akɛ efee yiŋtoo titri hewɔ ni oosumɔ ni abaptisi bo?

⁸ Mɛni esa akɛ efee yiŋtoo hewɔ ni obaahã abaptisi bo? Okase Biblia lɛ jogbaŋŋ, ni enɛ ehã obale Yehowa, esui lɛ, kɛ bɔ ni efeɔ enii ehãa. Nibii ni obale yɛ ehe lɛ eta otsuiŋ ni ehã obasumɔ lɛ waa. Esa akɛ suɔmɔ nɛɛ ni oyɔɔ kɛhã Yehowa lɛ afee yiŋtoo titri hewɔ ni oosumɔ ni abaptisi bo.

9. Kɛ́ akɛɛ abaptisi mɔ ko yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli, tamɔ bɔ ni awie yɛ Mateo 28:19, 20 lɛ, te atsɔɔ tɛŋŋ?

⁹ Agbɛnɛ hu, okase Biblia lɛ ni ohe anɔkwa saji ni yɔɔ mli lɛ oye, ni esa akɛ enɛ hu atsirɛ bo ni ohã abaptisi bo. Nɔ ni Yesu wie be ni efãa esɛɛnyiɛlɔi lɛ ni amɛyafee mɛi kaselɔi lɛ  hãa wɔnaa nakai. (Kanemɔ Mateo 28:19, 20.) Ewie akɛ, amɛbaptisi mɛi “yɛ Tsɛ lɛ gbɛ́i mli, kɛ Bi lɛ gbɛ́i mli, kɛ mumɔ krɔŋkrɔŋ lɛ gbɛ́i mli.” Mɛni enɛ tsɔɔ? Etsɔɔ akɛ, esa akɛ mɛi ni abaabaptisi lɛ ahe Yehowa, e-Bi Yesu, kɛ mumɔ krɔŋkrɔŋ lɛ he anɔkwa saji ni yɔɔ Biblia lɛ mli lɛ amɛye kɛ amɛtsui muu fɛɛ. Anɔkwa saji nɛɛ yɛ hewalɛ ni amɛtaa mɔ tsuiŋ waa. (Heb. 4:12) Nyɛhãa wɔsusua amɛmli enyɔoo ko he wɔkwɛa.

10-11. Mɛɛ anɔkwa saji okase ni ohe oye yɛ Tsɛ lɛ he?

¹⁰ Ani okaiɔ nibii ni okase yɛ Tsɛ lɛ he lɛ? Okase akɛ, ‘egbɛ́i ji Yehowa,’ lɛ ji “Mɔ Ni Nɔ Kwɔ Fe Fɛɛ yɛ shikpɔŋ lɛ nɔ fɛɛ,” ni lɛ pɛ ji “anɔkwa Nyɔŋmɔ” lɛ. (Lala 83:18; Yes. 37:16) Okase hu akɛ, Yehowa ni bɔ wɔ, ni ‘yiwalaheremɔ lɛ, lɛ enɔ ni.’ (Lala 3:8; 36:9) Yehowa eto gbɛjianɔ koni wɔye wɔhe kɛjɛ esha kɛ gbele dɛŋ, ni ehã wɔ hiɛnɔkamɔ akɛ wɔbaanyɛ wɔhi shi kɛya naanɔ. (Yoh. 17:3) Kɛ́ ojɔɔ ohe nɔ ni abaptisi bo lɛ, no hãa mɛi fɛɛ naa akɛ obatsɔ Yehowa Odasefonyo. (Yes. 43:10-12) Kɛ́ obatsɔ Yehowa Odasefonyo lɛ, Nyɔŋmɔ gbɛ́i lɛ bakãa onɔ, ni obafataa ewebii ni yɔɔ jeŋ fɛɛ ni kɛ miishɛɛ hãa mɛi leɔ egbɛ́i lɛ ahe.​—Lala 86:12.

¹¹ Eji hegbɛ kpele akɛ okase nɔ ni Biblia lɛ wieɔ yɛ Tsɛ lɛ he lɛ ni onu shishi! Kɛ́ ohe nibii ni nɔ bɛ ni okase nɛɛ oye lɛ, otsui baatsirɛ bo ni ojɔɔ ohe nɔ ohã Yehowa ni ohã abaptisi bo.

12-13. Mɛɛ anɔkwa saji okase ni ohe oye yɛ Bi lɛ he?

¹² Be ni okase Yesu, ni ji Bi lɛ, he nii lɛ, te onu he ohã tɛŋŋ? Naa ehe anɔkwa saji komɛi ni okase. Yesu ji mɔ ni ji enyɔ ni he hiaa fe fɛɛ yɛ ŋwɛi kɛ shikpɔŋ. Ejɛ esuɔmɔ mli ekɛ ewala hã akɛ kpɔmɔnɔ kɛhã wɔ. Kɛ́ wɔkɛ wɔnifeemɔi tsɔɔ akɛ wɔheɔ enɛ wɔyeɔ lɛ, Nyɔŋmɔ kɛ wɔhe eshai baake wɔ, wɔbaatsɔmɔ enanemɛi, ni wɔbaaná naanɔ wala. (Yoh. 3:16) Yesu ji wɔ-Sɔfonukpa. Eesumɔ ni eye ebua wɔ ni wɔná kpɔmɔnɔ lɛ he sɛɛ, ni agbɛnɛ hu, wekukpaa kpakpa ahi wɔ kɛ Nyɔŋmɔ teŋ. (Heb. 4:15; 7:24, 25) Yesu ji Nyɔŋmɔ Maŋtsɛyeli lɛ nɔ Maŋtsɛ, ni lɛ enɔ Yehowa baatsɔ etse egbɛ́i lɛ he, ehã efɔŋfeemɔ fɛɛ sɛɛ afo, ni ejɔɔ adesai kɛya naanɔ yɛ Paradeiso ni baa lɛ mli. (Mat. 6:9, 10; Kpo. 11:15) Yesu fee Nyɔŋmɔ suɔmɔnaa nii ewala gbii abɔ fɛɛ. (Yoh. 4:34) Etsɔ enɛ nɔ efee nɔkwɛmɔnɔ kpakpa ehã wɔ koni wɔnyiɛ enanemaahei lɛ asɛɛ.​—1 Pet. 2:21.

¹³ Kɛ́ ohe nɔ ni Biblia lɛ tsɔɔ yɛ Yesu, ni ji Nyɔŋmɔ suɔmɔ Bi lɛ, he lɛ oye lɛ, bo hu obaasumɔ lɛ waa. Suɔmɔ nɛɛ baatsirɛ bo ni ofee Nyɔŋmɔ suɔmɔnaa nii daa, tamɔ bɔ ni Yesu fee lɛ, ni no baahã oná he miishɛɛ akɛ ojɔɔ ohe nɔ ohã Yehowa ni abaptisi bo.

14-15. Mɛɛ anɔkwa saji okase ni ohe oye yɛ mumɔ krɔŋkrɔŋ lɛ he?

¹⁴ Be ni okase mumɔ krɔŋkrɔŋ lɛ he nii lɛ, te onu he ohã tɛŋŋ? Naa nibii komɛi ni okase yɛ mumɔ krɔŋkrɔŋ lɛ he. Mumɔ krɔŋkrɔŋ lɛ tamɔɔɔ Yehowa, Yesu, loo ŋwɛibɔfoi lɛ. Moŋ lɛ, eji Nyɔŋmɔ hewalɛ ni ekɛtsuɔ nii. Yehowa kɛ mumɔ krɔŋkrɔŋ lɛ tsirɛ mɛi ni amɛŋma Biblia lɛ, ni no nɔŋŋ yeɔ ebuaa wɔ ni wɔnuɔ shishi ni wɔkɛtsuɔ nii yɛ wɔshihilɛ mli. (Yoh. 14:26; 2 Pet. 1:21) Yehowa tsɔɔ mumɔ krɔŋkrɔŋ lɛ nɔ ehãa wɔ “hewalɛ ni fa kɛteke nɔ.” (2 Kor. 4:7) Mumɔ krɔŋkrɔŋ lɛ wajeɔ wɔ ni wɔnyɛɔ wɔshiɛɔ sane kpakpa lɛ. Agbɛnɛ hu, kɛ́ wɔkɛ kai kpe, wɔnijiaŋ je wui, loo wɔyaje shihilɛi ni mli wawai amli lɛ, mumɔ krɔŋkrɔŋ lɛ yeɔ ebuaa wɔ ni wɔnyɛɔ wɔdamɔɔ naa. Eyeɔ ebuaa wɔ ni wɔjieɔ sui kpakpai ni feɔ mumɔ lɛ yibii lɛ akpo. (Gal. 5:22) Nyɔŋmɔ kɛ emumɔ lɛ droɔ mɛi fɛɛ ni kɛ amɛhiɛ fɔ̃ɔ enɔ ni jɛɔ tsui krɔŋŋ mli amɛbiɔ lɛ lɛ.​—Luka 11:13.

 ¹⁵ Le ni wɔle akɛ Yehowa baanyɛ adro wɔ, ni ji ewebii lɛ, emumɔ krɔŋkrɔŋ lɛ koni no aye abua wɔ ni wɔya nɔ wɔsɔmɔ lɛ lɛ woɔ wɔ hewalɛ waa! Kɛ́ ohe anɔkwa saji ni okase yɛ mumɔ krɔŋkrɔŋ lɛ he lɛ oye lɛ, no baatsirɛ bo ni ojɔɔ ohe nɔ ohã Nyɔŋmɔ ni ohã abaptisi bo.

16. Kɛbashi he ni wɔshɛ nɛɛ, mɛni wɔkase?

¹⁶ Kɛ́ okpɛ oyiŋ akɛ obaajɔɔ ohe nɔ ohã Nyɔŋmɔ ni ohã abaptisi bo lɛ, belɛ okpɛ yiŋ ko ni he hiaa waa. Tamɔ bɔ ni wɔna yɛ nikasemɔ nɛɛ mli lɛ, esa akɛ ofee klalo akɛ okɛ nibii komɛi baashã afɔle, ni agbɛnɛ hu, okpɛlɛ nɔ akɛ okɛ naagbai baakpe. Shi jɔɔmɔi ni obaaná lɛ fa kwraa fe nibii ni okɛbaashã afɔle lɛ. Baptisimɔ baanyɛ ahere oyiwala, ni ehã oná henilee kpakpa yɛ Nyɔŋmɔ hiɛ. Wɔna hu akɛ, esa akɛ suɔmɔ ni oyɔɔ kɛhã Yehowa lɛ afee nɔ titri hewɔ ni oosumɔ ni abaptisi bo. Kɛfata he lɛ, esa akɛ ohe nibii fɛɛ ni okase yɛ Tsɛ lɛ, kɛ Bi lɛ, kɛ mumɔ krɔŋkrɔŋ lɛ he lɛ oye kɛ otsui fɛɛ. No hewɔ lɛ, te tɛŋŋ? Ani oshɛ kɛhã baptisimɔ?

17. Mɛni ji nibii komɛi ni esa akɛ ofee dani abaptisi bo?

¹⁷ Kɛ́ onuɔ he akɛ oshɛ kɛhã baptisimɔ lɛ, belɛ ekã shi faŋŋ akɛ, otsɔ hiɛ ofee nibii pii ni baahã okɛ Yehowa teŋ naanyobɔɔ lɛ mli awa. * Akɛ nɔkwɛmɔnɔ lɛ, okase Biblia lɛ waa ni no ehã obale Yehowa kɛ Yesu he saji pii, ni enɛ ehã ohemɔkɛyeli mli ewa. (Heb. 11:6) Oheɔ nibii fɛɛ ni Yehowa ewo shi yɛ Biblia lɛ mli akɛ ebaafee lɛ oyeɔ kɛ otsui fɛɛ. Agbɛnɛ hu, ole akɛ, Yehowa baanyɛ ekɛ ohe eshai ake bo ni ehã bo naanɔ wala ejaakɛ oheɔ oyeɔ akɛ, Yesu kɛ ewala bashã afɔle yɛ ohewɔ. Otsake otsui, ni tsɔɔ akɛ, oshwa ohe yɛ nibii gbohii ni ofee lɛ ahewɔ, ni osɔle okpa Yehowa fai ni ekɛ ohe eshai lɛ ake bo. Oku osɛɛ hu, ni tsɔɔ akɛ, otswa ofai shi waa akɛ ofeŋ nibii gbohii ni ofeɔ be ko ni eho lɛ dɔŋŋ, ni obɔi nibii ni Nyɔŋmɔ sumɔɔ feemɔ. (Bɔf. 3:19) Oosumɔ ni ogba mɛi nibii ni oheɔ oyeɔ lɛ. No hewɔ lɛ, akpɛlɛ onɔ ni obatsɔ shiɛlɔ ni abaptisiko lɛ koni oná hegbɛ ofata asafo lɛ he kɛshiɛ. (Mat. 24:14) Yehowa ená ohe miishɛɛ waa yɛ nibii nɛɛ ni ofee lɛ ahewɔ. Ohã etsui enyɔ emli.​—Abɛi 27:11.

18. Mɛni ekoŋŋ esa akɛ ofee dani abaptisi bo?

¹⁸ Shi dani abaanyɛ abaptisi bo lɛ, naa nibii fioo komɛi ni eshwɛ ni esa akɛ ofee. Tamɔ bɔ ni wɔna yɛ nikasemɔ nɛɛ mli lɛ, esa akɛ ojɔɔ ohe nɔ ohã Nyɔŋmɔ. Jɛɛ otsuiŋ osɔle ohã Nyɔŋmɔ okome too, ni owo lɛ shi akɛ obaafee esuɔmɔnaa nii owala gbii abɔ fɛɛ. (1 Pet. 4:2) No sɛɛ lɛ, kɛɛmɔ onukpai akuu lɛ saji ahe gbɛjianɔtolɔ lɛ akɛ oosumɔ ni abaptisi bo. Ebaahã asafoŋ onukpai komɛi kɛ bo akpe. Kaahã otsui fã. Nyɛmimɛi nɛɛ le bo momo, ni amɛsumɔɔ osane. Amɛkɛ bo baasusu  nibii ni okase yɛ Biblia lɛ mli lɛ, ni ji Biblia mli tsɔɔmɔi ni esa akɛ ale klɛŋklɛŋ lɛ ahe, koni amɛna kɛji onu tsɔɔmɔi nɛɛ ashishi jogbaŋŋ ni ole hiɛdɔɔ ni yɔɔ henɔjɔɔmɔ kɛ baptisimɔ he. Kɛji amɛkpɛlɛ nɔ akɛ oshɛ kɛhã baptisimɔ lɛ, amɛbaahã ole akɛ, abaanyɛ abaptisi bo yɛ kpokpaa nɔ kpee loo kpee wulu ni kã nyɛhiɛ lɛ shishi.

19-20. Yɛ obaptisimɔ lɛ sɛɛ lɛ, mɛni esa akɛ ofee? Ni te obaafee tɛŋŋ ofee nakai?

¹⁹ Yɛ obaptisimɔ lɛ sɛɛ lɛ, mɛni esa akɛ ofee? * Kaimɔ akɛ, be ni ojɔɔ ohe nɔ ohã Yehowa lɛ, owo lɛ shi, ni eekpa gbɛ akɛ obaaye shiwoo nɛɛ nɔ. No hewɔ lɛ, yɛ obaptisimɔ lɛ sɛɛ lɛ, esa akɛ oye oshiwoo lɛ nɔ. Te obaafee tɛŋŋ ofee nakai?

²⁰ Okɛ nyɛmimɛi ni yɔɔ osafo lɛ mli lɛ abɔ gbagbalii. Amrɔ nɛɛ ni abaptisi bo lɛ, obatsɔ nyɛmi, ni oná nyɛmimɛi yɛ jeŋ muu lɛ fɛɛ. (1 Pet. 2:17) Osafo lɛ tamɔ oweku. Kɛ́ otee asafoŋ kpeei daa lɛ, okɛ amɛ teŋ naanyobɔɔ lɛ mli baawa. Agbɛnɛ hu, kanemɔ Nyɔŋmɔ Wiemɔ lɛ daa gbi ni ojwɛŋ nɔ. (Lala 1:1, 2) Kɛ́ okane Biblia lɛ fã ko ogbe naa lɛ, hemɔ be ni osusu nɔ ni okane lɛ he jogbaŋŋ. Kɛ́ ofee nakai lɛ, Nyɔŋmɔ wiemɔi lɛ baashɛ otsui he tɔ̃ɔ. ‘Sɔlemɔ daa.’ (Mat. 26:41) Kɛ́ ojɛ otsuiŋ osɔle ohã Yehowa lɛ, okɛ lɛ teŋ naanyobɔɔ lɛ mli baawa. ‘Yaa nɔ otao Maŋtsɛyeli lɛ klɛŋklɛŋ.’ (Mat. 6:33) Obaanyɛ ofee nakai kɛji ohã shiɛmɔ nitsumɔ lɛ he hia bo waa yɛ oshihilɛ mli. Kɛ́ otee shiɛmɔ daa lɛ, ohemɔkɛyeli lɛ mli baawa, ni ekolɛ obaaná hegbɛ oye obua mɔ ko ni eyi wala gbɛ lɛ nɔ.​—1 Tim. 4:16.

21. Kɛ́ abaptisi bo lɛ, mɛɛ jɔɔmɔi obaaná?

²¹ Yiŋkpɛɛ ko bɛ ni he hiaa fe ni obaakpɛ oyiŋ akɛ obaajɔɔ ohe nɔ ohã Yehowa ni ohã abaptisi bo. Eyɛ mli akɛ okɛ naagbai baakpe ni okɛ nibii komɛi baashã afɔle moŋ, shi oshwaŋ ohe kɔkɔɔkɔ! Naagbai ni okɛbaakpe yɛ jeŋ fɔŋ nɛɛ mli lɛ ji ‘be fioo ko nɔ, ni amɛtsiii.’ (2 Kor. 4:17) Shi obaptisimɔ lɛ baahã oná anɔkwa miishɛɛ amrɔ nɛɛ, ni wɔsɛɛ hu lɛ, obaaná “wala diɛŋtsɛ” lɛ. (1 Tim. 6:19) No hewɔ lɛ, ofainɛ sɔlemɔ, ni ohe be osusu bɔ ni obaahã sanebimɔ ni nyiɛ sɛɛ nɛɛ hetoo ohã lɛ he jogbaŋŋ. Sanebimɔ lɛ ji, “Ani oshɛ kɛhã baptisimɔ?”