1. Mɛni wɔnyɛmimɛi oblahii lɛ baanyɛ afee kɛye amɛbua asafo lɛ?

NYƐMIMƐI oblahii, nibii pii yɛ ni nyɛbaanyɛ nyɛtsu yɛ nyɛsafo lɛ mli. Nyɛteŋ mɛi babaoo yɛ gbɔmɔtsoŋ hewalɛ. (Abɛi 20:29) Nibii pii yɛ ni nyɛbaanyɛ nyɛfee kɛye nyɛbua nyɛsafoŋbii lɛ. Ekolɛ ooshwe waa ni awó bo asafoŋ sɔɔlɔ. Shi ekolɛ oosusu akɛ mɛi naa bo akɛ odako loo oshɛko he ni abaanyɛ akɛ nitsumɔ ni tamɔ nakai awo odɛŋ. Shi kɛ́ odako po lɛ, nibii pii yɛ ni obaanyɛ ofee bianɛ ni baahã nyɛmimɛi lɛ abu bo, ni amɛmu amɛfɔ̃ onɔ.

2. Mɛni wɔbaasusu he yɛ nikasemɔ nɛɛ mli?

² Wɔbaasusu nibii komɛi ni tee nɔ yɛ Maŋtsɛ David shihilɛ mli lɛ he yɛ nikasemɔ nɛɛ mli. Agbɛnɛ hu, wɔbaasusu nibii komɛi ni tee nɔ yɛ Yuda maŋtsɛmɛi enyɔ, ni ji Asa kɛ Yehoshafat shihilɛ mli lɛ he fioo. Wɔbaasusu naagbai ni hii nɛɛ kɛkpe lɛ ahe, ni wɔkwɛ bɔ ni amɛtsu he nii amɛhã koni wɔkwɛ nɔ ni oblahii baanyɛ akase kɛjɛ amɛdɛŋ.

3. Mɛni ji gbɛ kome ni oblahii baanyɛ aye abua mɛi ni edara yɛ afii amli lɛ?

³ Be ni David ji oblanyo lɛ, no mli lɛ ele nibii komɛi feemɔ, ni mɛi buɔ nibii nɛɛ akɛ enɔ bɛ kwraa. No mli lɛ, naanyobɔɔ ni yɔɔ ekɛ Yehowa teŋ lɛ mli wa waa. Agbɛnɛ hu, ekase bɔ ni atswaa saŋku jogbaŋŋ. Ni etswa saŋku ehã Saul ni ji maŋtsɛ ni Nyɔŋmɔ ehala yɛ nakai beiaŋ lɛ. (1 Sam. 16:16, 23)  Nyɛmimɛi oblahii, ani nyɛ hu nyɛyɛ nɔ ko ni nyɛle feemɔ waa ni nyɛsafoŋbii lɛ baanyɛ aná he sɛɛ? Nyɛteŋ mɛi babaoo yɛ eko. Akɛ nɔkwɛmɔnɔ lɛ, nyɛteŋ mɛi komɛi le tablɛti kɛ ehenɔi lɛ amli waa diɛŋtsɛ. No hewɔ lɛ, nyɛbaanyɛ nyɛye nyɛbua mɛi ni edara yɛ afii amli lɛ, koni amɛle bɔ ni amɛkɛ amɛtablɛti kɛ ehenɔi lɛ baatsu nii jogbaŋŋ kɛ́ amɛmiifee aŋkro nikasemɔ loo amɛba asafoŋ kpee.

4. Mɛɛ sui David jie lɛ kpo ni esa akɛ nyɛmimɛi oblahii lɛ hu abɔ mɔdɛŋ ni amɛná? (Kwɛmɔ mfoniri ni yɔɔ wolo lɛ hiɛ lɛ.)

⁴ David fee nibii ni hã ana akɛ abaanyɛ amu afɔ̃ enɔ be fɛɛ be. Akɛ nɔkwɛmɔnɔ lɛ, be ni eji oblanyo lɛ, ekwɛ epapa toi lɛ jogbaŋŋ diɛŋtsɛ. Nitsumɔ nɛɛ ji nitsumɔ ko ni yɔɔ oshãra waa. Be ko lɛ David kɛɛ Maŋtsɛ Saul akɛ: “Otsulɔ kwɛɔ etsɛ toi, ni gbi ko lɛ, jata ko ba, ni ebamɔ gwantɛŋi lɛ ekome kɛjɛ tooku lɛ mli, ni be ko hu lɛ oshishibrishi ko hu bafee nakai nɔŋŋ. Minyiɛ eko fɛɛ eko sɛɛ, ni mitswa lɛ nɔ, ni mijie too lɛ kɛje edaaŋ.” (1 Sam. 17:34, 35) David na akɛ, esa akɛ ekwɛ toi lɛ jogbaŋŋ. No hewɔ lɛ, efee ekãa, ni ebu amɛhe. No hewɔ lɛ, nyɛmimɛi oblahii, kɛ́ nyɛtsuɔ nitsumɔ fɛɛ nitsumɔ ni akɛwoɔ nyɛdɛŋ lɛ jogbaŋŋ lɛ, belɛ nyɛmiikase David.

5. Yɛ nɔ ni awie yɛ Lala 25:14 lɛ naa lɛ, mɛni ji nɔ ni he hiaa fe fɛɛ ni esa akɛ nyɛmimɛi oblahii afee?

⁵ Be ni David ji oblanyo lɛ, efee nibii ni hã naanyobɔɔ ni yɔɔ ekɛ Yehowa teŋ lɛ mli bawa waa. Nakai naanyobɔɔ lɛ he hiaa kwraa fe ekãa ni David yɔɔ kɛ saŋku ni ele tswaa lɛ. Yehowa batsɔ David Nyɔŋmɔ kɛ e-Naanyo kpaakpa. (Kanemɔ Lala 25:14.) Nyɛmimɛi oblahii, nɔ ni he hiaa waa ni esa akɛ nyɛfee ji, ni nyɛbaahã naanyobɔɔ ni yɔɔ nyɛ kɛ nyɛ-Tsɛ ni yɔɔ ŋwɛi lɛ teŋ lɛ mli awa waa. Kɛ́ nyɛfee nakai lɛ, ekolɛ akɛ sɔ̃i krokomɛi baawo nyɛdɛŋ yɛ asafo lɛ mli.

6. Te mɛi bu David amɛhã tɛŋŋ?

⁶ Naagba kome ni David kɛkpe ji akɛ, mɛi na lɛ akɛ gbekɛ, ni amɛnu he akɛ etsuuu enitsumɔ jogbaŋŋ. Akɛ nɔkwɛmɔnɔ lɛ, be ni ekɛ ehe hã akɛ ekɛ Goliat baayawu lɛ, Maŋtsɛ Saul ka akɛ ebaaje enijiaŋ wui. Ekɛɛ lɛ akɛ: “Gbekɛ ji bo.” (1 Sam. 17:31-33) Dani Saul baawie enɛ po lɛ, no mli lɛ David diɛŋtsɛ nyɛmi nuu efolɔ enaa akɛ ekɛ enitsumɔ shwɛɔ. (1 Sam. 17:26-30) Shi Yehowa enaaa David akɛ gbekɛ loo mɔ ko ni kɛ enitsumɔ shwɛɔ, ejaakɛ ele lɛ jogbaŋŋ. David nyɛ egbe Goliat ejaakɛ ekɛ ehiɛ fɔ̃ɔ Yehowa ni ji e-Naanyo lɛ nɔ.​—1 Sam. 17:45, 48-51.

7. Mɛni obaanyɛ okase yɛ David sane lɛ mli?

 ⁷ Mɛni obaanyɛ okase yɛ David sane lɛ mli? Ekome ji akɛ, esa akɛ oto otsui shi. Ebaahe be dani mɛi ni le bo kɛjɛ ogbekɛbiiashi lɛ baabu bo akɛ mɔ ko ni eda. Shi ná nɔmimaa akɛ Yehowa naa mɔ ni oji diɛŋtsɛ. Ele bo jogbaŋŋ, ni ele nibii ni obaanyɛ ofee. (1 Sam. 16:7) Agbɛnɛ hu, feemɔ nibii ni baahã naanyobɔɔ ni yɔɔ okɛ Yehowa teŋ lɛ mli awa. David kwɛ nibii ni Yehowa ebɔ lɛ, ni ejwɛŋ nɔ ni amɛtsɔɔ lɛ yɛ Yehowa he lɛ nɔ, ni no hã naanyobɔɔ ni yɔɔ ekɛ Yehowa teŋ lɛ mli wa. (Lala 8:3, 4; 139:14; Rom. 1:20) Nɔ kroko ni esa akɛ ofee ji, ni osɔle obi Yehowa ni ewaje bo ni ofee nɔ ni ja. Akɛ nɔkwɛmɔnɔ lɛ, ani mɛi ni okɛyaa skul lɛ yeɔ ohe fɛo yɛ Yehowa Odasefonyo ni oji lɛ hewɔ? Kɛ́ nakai lɛ, sɔlemɔ obi Yehowa ni eye ebua bo ni onyɛ odamɔ naagba nɛɛ naa. Agbɛnɛ hu, okɛ ŋaawoi ni yɔɔ e-Wiemɔ lɛ mli kɛ asafo lɛ woji lɛ kɛ vidioi lɛ amli lɛ atsu nii. Be fɛɛ be ni obaana akɛ Yehowa eye ebua bo ni onyɛ odamɔ shihilɛ ko naa lɛ, okɛ ohiɛ baafɔ̃ enɔ waa. Kɛ́ mɛi na akɛ okɛ ohiɛ fɔ̃ɔ Yehowa nɔ lɛ, amɛbaabu bo waa.

8-9. Mɛni ye ebua David ni enyɛ eto etsui shi emɛ kɛyashi awó lɛ maŋtsɛ? Ni mɛni nyɛmimɛi oblahii baanyɛ akase kɛjɛ enɛ mli?

⁸ Hã wɔsusu naagba kroko ni David kɛkpe lɛ he wɔkwɛ. Be ni afɔ David mu akɛ maŋtsɛ lɛ, afii babaoo ho dani awó lɛ maŋtsɛ yɛ Yuda. (1 Sam. 16:13; 2 Sam. 2:3, 4) Mɛni ye ebua David ni eto etsui shi emɛ yɛ nakai afii lɛ fɛɛ mli? Yɛ nɔ najiaŋ ni David nijiaŋ baaje wui lɛ, ekɛ ejwɛŋmɔ ma nibii ni ebaanyɛ efee lɛ moŋ anɔ. Akɛ nɔkwɛmɔnɔ lɛ, be ni eyaba abo yɛ Filistibii lɛ akpokpaa lɛ nɔ lɛ, ekɛ nakai be lɛ wu eshi Israelbii lɛ ahenyɛlɔi lɛ. David tsɔ enɛ ni efee lɛ nɔ ebu Yuda shikpɔŋ lɛ he koni mɔ ko akabakɔ shikpɔŋ lɛ.​—1 Sam. 27:1-12.

⁹ Nyɛmimɛi oblahii, mɛni nyɛbaanyɛ nyɛkase yɛ David sane lɛ mli? Nyɛfea nɔ ni nyɛbaanyɛ kɛsɔmɔa nyɛnyɛmimɛi lɛ. Naa nyɛmi nuu ko ni atsɛɔ lɛ Ricardo * lɛ niiashikpamɔ. Be ni eji oblanyo fioo lɛ, no mli lɛ eeshwe waa ni esɔmɔ akɛ daa gbɛgbalɔ, shi esafoŋ onukpai lɛ kɛɛ eshɛko. Ricardo hãaa enɛ aje enijiaŋ wui, ni emli fuuu asafoŋ onukpai lɛ hu, moŋ lɛ, ekɛ nakai be lɛ tsu nii waa yɛ shiɛmɔ nitsumɔ lɛ mli. Ewie akɛ: “Ŋmɛnɛ lɛ, kɛ́ misusu bɔ ni nibii tee lɛ ehã lɛ he lɛ, miina akɛ no mli lɛ eshwɛ mi fioo lɛɛlɛŋ. Mikɛfee oti ni ma mihiɛ akɛ, maku misɛɛ mayasara mɔ fɛɛ mɔ ni jieɔ miishɛɛ kpo yɛ sane lɛ he lɛ, ni masaa mihe jogbaŋŋ dani maya. No po ye ebua mi ni miná Biblia mli nikaselɔ. Be ni mitee nɔ mikɛ mihe wo shiɛmɔ nitsumɔ lɛ mli babaoo lɛ, agbɛnɛ lɛ misheee gbeyei kɛ́ miiya shiɛmɔ.” Bianɛ lɛ, Ricardo etsɔ daa gbɛgbalɔ ni bɔɔ mɔdɛŋ waa, ni eesɔmɔ akɛ asafoŋ sɔɔlɔ hu.

10. Be ko lɛ, mɛni David fee dani ekpɛ yiŋ ko ni he hiaa waa lɛ?

¹⁰ Susumɔ nɔ kroko ni tee nɔ yɛ David shihilɛ mli lɛ he okwɛ. Be ni ebaa abo yɛ Filistibii lɛ akpokpaa lɛ nɔ lɛ, be ko lɛ, ekɛ ehii lɛ tee amɛyawu ta, ni amɛshi amɛŋamɛi kɛ amɛbii lɛ yɛ shĩa. Shi henyɛlɔi komɛi ba ni amɛbamɔmɔ amɛŋamɛi kɛ amɛbii lɛ, ni amɛloo amɛnibii lɛ fɛɛ kɛtee. Be ni David ku esɛɛ ni ebana nɔ ni etee nɔ lɛ, kulɛ ebaanyɛ enu he akɛ akɛni ehe esa kɛ tawuu hewɔ lɛ, ebaanyɛ eto ŋaa ni etiu amɛhenyɛlɔi lɛ, ni eyahere mɛi ni amɔmɔ lɛ. Shi David efeee nakai, moŋ lɛ, ebi Yehowa dɛŋ gbɛtsɔɔmɔ. Etsɔ osɔfo ko ni atsɛɔ lɛ Abiatar lɛ nɔ ebi Yehowa akɛ: “Mitiu nɛkɛ ojotswalɔi ata nɛɛ lo?” Yehowa kɛɛ David akɛ ebaanyɛ etiu amɛ, ni ebaaye ebua lɛ ni eye amɛnɔ  kunim. (1 Sam. 30:7-10) Mɛni obaanyɛ okase kɛjɛ sane nɛɛ mli?

11. Mɛni esa akɛ ofee dani okpɛ yiŋ ko?

¹¹ Dani obaakpɛ yiŋ ko lɛ, bi ŋaawoo. Bi ofɔlɔi adɛŋ ŋaawoo. Agbɛnɛ hu, obaanyɛ obi ŋaawoo kɛjɛ asafoŋ onukpai lɛ aŋɔɔ. Yehowa heɔ hii ni ahala nɛɛ eyeɔ, ni bo hu obaanyɛ ohe amɛ oye. Yehowa kɛ amɛ ehã asafo lɛ akɛ “nikeenii.” (Efe. 4:8) Kɛ́ okase amɛhemɔkɛyeli lɛ, ni obo ŋaawoi kpakpai ni amɛkɛhãa lɛ toi lɛ, obaaná he sɛɛ waa. Agbɛnɛ, nyɛhãa wɔkwɛa nɔ ni wɔbaanyɛ wɔkase kɛjɛ Maŋtsɛ Asa dɛŋ.

12. Mɛɛ sui Maŋtsɛ Asa jie lɛ kpo be ni ebɔi nɔyeli lɛ?

¹² Be ni Maŋtsɛ Asa ji oblanyo lɛ, no mli lɛ ebaa ehe shi, ni eyɛ ekãa waa. Akɛ nɔkwɛmɔnɔ lɛ, be ni ebaye etsɛ Abiya sɛɛ lɛ, ejie amagajamɔ kɛje shikpɔŋ lɛ nɔ. Agbɛnɛ hu, “ekɛɛ Yudabii lɛ koni amɛtao Yehowa, amɛtsɛmɛi a-Nyɔŋmɔ lɛ sɛɛ gbɛ, ni amɛye Mla lɛ kɛ kitã lɛ nɔ.” (2 Kro. 14:1-7) Be ni Etiopianyo ko ni atsɛɔ lɛ Zera lɛ batutua Yuda kɛ asraafoi 1,000,000 lɛ, Asa bi Yehowa dɛŋ yelikɛbuamɔ ekɛɛ: “Yehowa, onyɛɔ oyeɔ obuaa mɛi fɛɛ, mɛi pii jio, mɛi fioo jio, mɛi ni he wa jio, mɛi ni he waaa jio. Ao Yehowa, wɔ-Nyɔŋmɔ, ye obua wɔ, ejaakɛ bo onɔ wɔkɛ wɔhiɛ fɔ̃ɔ.” Nɔ ni Asa fee nɛɛ tsɔɔ akɛ ehiɛ kã shi waa, ni eheɔ eyeɔ akɛ Yehowa baahere lɛ kɛ ewebii lɛ. Asa kɛ ehiɛ fɔ̃ e-Tsɛ ni yɔɔ ŋwɛi lɛ nɔ. Ni “Yehowa ye Etiopiabii lɛ anɔ kunim.”​—2 Kro. 14:8-12.

13. Mɛni ba Asa nɔ sɛɛ mli? Ni mɛni hewɔ?

¹³ Ŋwanejee ko bɛ he akɛ, be ni asraafoi 1,000,000 batutua Asa kɛ ewebii lɛ, no mli lɛ jeee nɔ ko bibioo kwraa. Shi akɛni ekɛ ehiɛ fɔ̃ Yehowa nɔ hewɔ lɛ, enyɛ eye kunim. Shi dɔlɛ sane ji, sɛɛ mli be ni Asa kɛ naagba ko ni mli waaa tamɔ enɛ kpe lɛ, ebiii Yehowa dɛŋ yelikɛbuamɔ. Be ni Israel maŋtsɛ ko ni atsɛɔ lɛ Baasha batutua lɛ lɛ, etee eyabi Siria maŋtsɛ lɛ moŋ dɛŋ yelikɛbuamɔ. Yiŋ ni ekpɛ nɛɛ kɛ naagbai babaoo ba. Yehowa tsɔ egbalɔ Hanani nɔ ekɛɛ Asa akɛ: “Akɛni okɛ ohiɛ fɔ̃ Siria maŋtsɛ lɛ nɔ, ni okɛ ohiɛ efɔ̃ɔɔ Yehowa, o-Nyɔŋmɔ lɛ nɔ hewɔ lɛ, Siria maŋtsɛ lɛ asraafoi lɛ eje odɛŋ.” Kɛjɛ nakai be lɛ nɔ kɛyaa lɛ, tai sɔŋŋ mɛi kɛ Asa wu. (2 Kro. 16:7, 9; 1 Maŋ. 15:32) Mɛni okaseɔ yɛ sane nɛɛ mli?

14. Mɛni kɛ́ ofee lɛ, no baatsɔɔ akɛ okɛ ohiɛ fɔ̃ɔ Yehowa nɔ? Ni yɛ nɔ ni awie yɛ 1 Timoteo 4:12 lɛ naa lɛ, kɛ́ ofee nakai lɛ, te asafoŋbii lɛ baana bo amɛhã tɛŋŋ?

 ¹⁴ Ba ohe shi ni oya nɔ okɛ ohiɛ afɔ̃ Yehowa nɔ. Be ni ohã abaptisi bo lɛ, ohã ana akɛ oheɔ Yehowa nɔ oyeɔ waa, ni okɛ ohiɛ fɔ̃ɔ enɔ. Enɛ hã Yehowa ná miishɛɛ waa, ni ehere bo kɛbafata eweku lɛ he. Bianɛ lɛ, nɔ ni esa akɛ ofee ji, ni oya nɔ okɛ ohiɛ afɔ̃ Yehowa nɔ. Eeenyɛ efee akɛ, kɛ́ oyaakpɛ yiŋ yɛ sane ko ni he hiaa waa he lɛ, no lɛ obiɔ Yehowa dɛŋ yelikɛbuamɔ. Shi yɛ nibii krokomɛi tamɔ hiɛtserɛjiemɔ, nitsumɔ ni obaatsu, loo otii komɛi ni otaoɔ ni okɛmamɔ ohiɛ yɛ shihilɛ mli lɛ amli hu? Ehe miihia waa ni okɛ ohiɛ afɔ̃ Yehowa nɔ yɛ enɛɛmɛi hu amli. Okɛ ohiɛ akafɔ̃ bo diɛŋtsɛ ohiɛshikamɔ nɔ. Taomɔ Biblia mli shishitoo mlai ni kɔɔ nakai saji lɛ ahe ni okɛtsu nii. (Abɛi 3:5, 6) Kɛ́ ofee enɛ lɛ, Yehowa baaná miishɛɛ, ni osafoŋbii lɛ hu baabu bo waa.​—Kanemɔ 1 Timoteo 4:12.

15. Tamɔ bɔ ni wɔnaa yɛ 2 Kronika 18:1-3; 19:2 lɛ, mɛɛ tɔmɔi Maŋtsɛ Yehoshafat tɔ̃?

¹⁵ Wɔ fɛɛ wɔyeee emuu. No hewɔ lɛ, bei komɛi lɛ obaatɔ̃. Shi esaaa akɛ ohãa no jeɔ onijiaŋ wui yɛ Yehowa sɔɔmɔ lɛ mli. Hã wɔkɛ Maŋtsɛ Yehoshafat afee enɛ he nɔkwɛmɔnɔ. No mli lɛ, eyɛ sui kpakpai babaoo. Be ni eji oblanyo lɛ, “etao etsɛ Nyɔŋmɔ lɛ sɛɛ gbɛ, ni eye ekitã lɛ nɔ.” Agbɛnɛ hu, etsu lumɛi lɛ kɛtee Yuda maji lɛ amli, koni amɛyatsɔɔ maŋbii lɛ Yehowa he nii. (2 Kro. 17:4, 7) Yɛ nibii kpakpai ni Yehoshafat fee nɛɛ fɛɛ sɛɛ lɛ, etɔ̃ tɔmɔi komɛi hu. Tɔmɔi nɛɛ eko hewɔ lɛ, Yehowa hã egbalɔ ko wo Yehoshafat ŋaa waa. (Kanemɔ 2 Kronika 18:1-3; 19:2.) Mɛni obaanyɛ okase kɛjɛ sane nɛɛ mli?

16. Mɛni okaseɔ yɛ Rajeev niiashikpamɔ lɛ mli?

¹⁶ Kɛ́ awo bo ŋaa lɛ, bo toi ni okɛtsu nii. Ekolɛ ewa kɛhã bo akɛ okɛ Yehowa sɔɔmɔ lɛ baafee nɔ titri yɛ oshihilɛ mli tamɔ ewa kɛhã oblahii babaoo lɛ. Shi kaahã onijiaŋ je wui. Susumɔ nyɛmi nuu ko ni atsɛɔ lɛ Rajeev lɛ niiashikpamɔ lɛ he okwɛ. Be ni eji oblanyo fioo lɛ, no mli lɛ enaaa nɔ ni efeɔ ehe yɛ shihilɛ mli. Ewie akɛ: “Tamɔ eji yɛ oblahii pii agbɛfaŋ lɛ, no mli lɛ misumɔɔ kpɔiaŋgbɔlemɔ kɛ shwɛmɔ fe asafoŋ kpeei kɛ shiɛmɔ yaa.” Mɛni ye ebua Rajeev? Asafoŋ onukpa ko ni sumɔɔ esane waa wo lɛ ŋaa. Rajeev wie  akɛ: “Eye ebua mi ni mijwɛŋ shishitoo mla ni yɔɔ 1 Timoteo 4:8 lɛ nɔ.” Rajeev ba ehe shi ni ebo ŋaawoo lɛ toi, ni ejwɛŋ nɔ ni he hiaa waa yɛ eshihilɛ mli lɛ he. Ewie akɛ: “Mikpɛ miyiŋ akɛ, mahã Yehowa sɔɔmɔ he ahia mi fe nibii krokomɛi fɛɛ yɛ mishihilɛ mli.” Mɛni jɛ mli kɛba? Ewie akɛ: “Be ni asafoŋ onukpa lɛ wo mi ŋaa lɛ sɛɛ afii fioo lɛ, ahã mibɔi sɔɔmɔ akɛ asafoŋ sɔɔlɔ.”

17. Te nyɛmimɛi lɛ naa oblahii ni sɔmɔɔ Yehowa lɛ amɛhãa tɛŋŋ?

¹⁷ Nyɛmimɛi lɛ sumɔɔ nyɛ oblahii ni nyɛkɛ amɛ feɔ ekome kɛsɔmɔɔ Yehowa lɛ sane waa. (Zef. 3:9) Amɛsumɔɔ bɔ ni nyɛfeɔ ekãa kɛ bɔ ni nyɛkɛ hiɛdɔɔ tsuɔ nitsumɔ fɛɛ nitsumɔ ni akɛwoɔ nyɛdɛŋ lɛ he nii waa. Amɛsumɔɔ nyɛsane naakpa.​—1 Yoh. 2:14.

18. Yɛ nɔ ni awie yɛ Abɛi 27:11 lɛ naa lɛ, te Yehowa naa nyɛmimɛi oblahii ni sɔmɔɔ lɛ lɛ ehãa tɛŋŋ?

¹⁸ Nyɛmimɛi oblahii, nyɛhiɛ akakpaa nɔ akɛ Yehowa sumɔɔ nyɛ, ni eheɔ nyɛ eyeɔ. Egba akɛ, yɛ naagbee gbii lɛ amli lɛ, oblahii pii baajɛ amɛsuɔmɔ mli amɛkɛ amɛhe ahã. (Lala 110:1-3) Yehowa le akɛ osumɔɔ lɛ, ni oosumɔ ni okɛ onyɛmɔ fɛɛ asɔmɔ lɛ. No hewɔ lɛ, ná tsui ohã mɛi krokomɛi, ni oto otsui shi hu. Kɛ́ otɔ̃ lɛ, mɔ tsɔsemɔ ni akɛbaahã bo lɛ mli, ni ona lɛ akɛ Yehowa ŋɔɔ ejɛ. (Heb. 12:6) Tsu nitsumɔi fɛɛ ni akɛbaawo odɛŋ lɛ jogbaŋŋ. Ni nɔ ni fe fɛɛ lɛ, yɛ nɔ fɛɛ nɔ ni ofeɔ lɛ mli lɛ, hã Yehowa, o-Tsɛ ni yɔɔ ŋwɛi lɛ tsui anya.​—Kanemɔ Abɛi 27:11.